Yeremiya
34 Hampinji Mwanta Nebukaneza* wakuBabiloni ninjita yindi yejima nimawanta ejima ahamaseki adiña muchiyuulu chindi niantu ejima hazuñileñawu naYerusalema ninyisumba yindi, izu daYehova denjili kudi Yeremiya nawu:+
2 “Yehova Nzambi yaIsarela nahoshi nindi, ‘Yaku wakahoshi naMwanta Zedekiya+ waYuda wumuleji neyi: “Yehova nahoshi nindi, ‘Iwu musumba inakuwuhana muchikasa chamwanta waBabiloni, nawa yena wukuwocha nakesi.+ 3 Dichi eyi hiwukupuluka kuchikasa chindiku, muloña chakadi nikujina akukukwata nakukuhana kudi yena.+ Nawa wukudimona namwanta waBabiloni mesu-namesu, wukuhosha naneyi kanwa-nakanwa, nawa wukuya kuBabiloni.’+ 4 Hela chochu, eyi Mwanta Zedekiya waYuda, tiyaku izu daYehova dinahoshiyi nindi, ‘Yehova nahoshi hadi eyi nindi: “Wakafwa nampoku yakabali wanyi. 5 Wakafwa mukuwunda,+ nawa akakwilila chidika chakwocha insensi neyi chayilililiwu ankakulula jeyi, anyanta adiñaku henohu eyi kanda, nawa akakudila nawu, ‘Yoyoyu, eyi mwanta!’ muloña ‘ami nahoshi dehi idi izu,’ dichinahoshiyi Yehova.”’”’”
6 Kufumahu, kaprofwetu Yeremiya wahosheli awa mazu ejima kudi Mwanta Zedekiya waYuda muYerusalema, 7 hazuñileñawu amashidika amwanta waBabiloni naYerusalema ninanyisumba yejima yamuYuda yashalilihu,+ naLakishi+ ninaAzeka;+ muloña diyi nyisumba hohu yakiñewa yashalilihu hanyisumba yamuYuda.
8 Izu denjili kudi Yeremiya kufuma kudi Yehova hanyima yakwila Mwanta Zedekiya natiyañani dehi chitiyañenu nawantu ejima muYerusalema dakubidika nsañu yakusubuka kudi wena,+ 9 nawu muntu wejima watela kusubula anduñu jindi aHeberu, awamayala niawambanda, kulonda kubuli kwikala muntu hela wumu wukutwalekahu kuhemba mukwawu kaYudeya wunduñu. 10 Dichi ayilolu ejima niantu ejima ovwahilili. Atiyañeni chitiyañenu nawu muntu wejima watela kuumbaku anduñu jindi awamayala niawambanda nawa hatela kutwalekahu kuyihemba wuduñuku. Dichi ovwahilili nawa ayuumbiliku. 11 Ilaña, mukuhita kwampinji afuntishili anduñu jawu awamayala niawambanda asubwiliwu, nawa ayiñijili cheñi muwuduñu. 12 Dichi izu daYehova denjili cheñi kudi Yeremiya kufuma kudi Yehova nawu:
13 “Yehova Nzambi yaIsarela nahoshi nindi, ‘Natiyañeni chitiyañenu nawankakulula jenu+ hefuku dinayifumishili mwituña daEjipitu, mwitala dawuduñu,+ nami: 14 “Hakumana kwayaaka 7, wejima wenu muntu-himuntu watela kuumbaku manakwindi kaHeberu ayilandishiliwu nawa wunayikalakeli yaaka 6. Mwatela kumuumbaku.”+ Ilaña ankakulula jenu hiyatiyilili hela kuteñeleka matu awu kudi amiku. 15 Nawa katataka* enu aweni mwabalumuka nakwila chuma chaloña kumesu ami nanochu chimwabidika nsañu yakusubuka kudi akwenu, nawa mwatiyañana chitiyañenu kumesu ami mwitala dikweti ijina dami. 16 Ilaña mwabalumuka nakujilola ijina dami+ nanochu chimwafuntisha anduñu jenu awamayala niawambanda owu imwombiliku kwesekeja nachakeñeleñawu,* nawa mwayiñija cheñi muwuduñu.’
17 “Dichi, Yehova nahoshi nindi: ‘Himunañovwahili nakubidika nsañu yakusubukaku, muntu-himuntu kudi manakwindi nikudi mukwawu.+ Ichi dinu inakubidika nsañu yakusubuka kudi enu, mwakafwa nampoku yakabali, nachipupu* ninanzala yakapwelendendi,+ nawa nakayibalumuna mwakekali chuma chakuhayama chikupu kudi mawanta ejima ahamaseki,’+ dichinahoshiyi Yehova. 18 ‘Nawa ichi dichakayimwekena antu afumpili chitiyañenu chami nakubula kwovwahila mazu achitiyañenu chatiyañeniwu kumesu ami habalwiliwu mwana kañombi hakachi nakuhita haneli mutamba iku mutamba iku,+ 19 dikwila nawu, ayilolu amuYuda, ayilolu amuYerusalema, ayilolu amuchota, atupristu niantu ejima amwituña owu ahitili hakachi kanyitamba yamwana kañombi: 20 Nakayihana kudi ayilumbu jawu nikudi owu anakukeña kuyijaha* nawa yibimbi yawu yakekala yakuda yawatuda amuluzwizu niyawanyama ahamaseki.+ 21 Nawa Mwanta Zedekiya waYuda niayilolu jindi nakayihana muchikasa chawayilumbu jawu nimuchikasa chanowu anakukeña kuyijaha* nimuchikasa chawamashidika amwanta waBabiloni,+ anakuchiina kuzuña nanenu.’+
22 “Yehova nahoshi nindi, ‘Inakuhana lushimbi, nukuyifuntisha muniwu musumba, nawa akuzuña nawu nakuwutambula nikuwocha nakesi;+ nawa nyisumba yamuYuda nukuyibalumuna kwamahembi, chakadi muntu wukushalamu.’”+