ALEVI
1 Dichi Yehova wamutambikili Mosi mwitenti dakubulakena+ nakumuleja nindi: 2 “Hoshaku nawaIsarela* nawa wuyileji neyi, ‘Neyi wumu hakachi kenu nakukeña kumulambula Yehova mulambu wahayimuna, watela kulambula mulambu kufuma hamukanka wawañombi hela wawanyikoku hela wawampembi.+
3 “‘Neyi wakalambula mulambu wakafuma hamukanka wawañombi kulonda wakekali mulambu wakushita, watela kulambula ñombi wachizamba wakadi ihuji.+ Watela kumulambula kumesu aYehova chakufuma hamuchima+ kuwiñililu wakwitenti dakubulakena. 4 Akanañiki chikasa chindi hamutu wanowu mulambu wakushita nawa Nzambi waketeja owu mulambu nakumwanakena nshidi jindi.
5 “‘Kuhiñahu, owu mwana kañombi wachizamba akamujahili kumesu aYehova nawa atupristu+ anyana kaAroni, akasendi mashi nakuyisampwila kutubadi twejima twakameña+ kadi kuwiñililu wakwitenti dakubulakena. 6 Dichi owu ñombi akalambulawu kwikala mulambu wakushita, akamuuwi nikumuhabola muyimamu.+ 7 Atupristu anyana kaAroni, akashi kesi hakameña+ ninchawa hakesi. 8 Atupristu anyana kaAroni, akaloñesha yimamu yamulambu+ hamu namutu nimanji akunshiya nakuyisha hanchawa yidi hakesi kadi hakameña. 9 Nyijiñwa ninyikonu yindi akayikosa namenji nawa kapristu wakayocha yejima kulonda yakakakumuki wishi hakameña nakwikala mulambu wakushita. Himulambu wakwocha hakesi wevumba dadiwahi* kudi Yehova.+
10 “‘Neyi wakalambula mulambu wakafuma hamukanka+ wawanyikoku hela wawampembi nakwikala mulambu wakushita, hela himwana kamukoku wachizamba hela wampembi, owu chimuna watela kwikala wakadi ihuji.+ 11 Akamujahili kukabadi kakukabeta kakuchimunswa kakameña kumesu aYehova nawa atupristu anyana kaAroni, akasampwila mashi indi kutubadi twejima twakameña.+ 12 Wakamuhabola muyimamu nimutu windi nimanji indi akunshiya, kapristu wakajiloñesha nakujisha hanchawa yidi hakesi kadi hakameña. 13 Wakakosa nyijiñwa ninyikonu namenji nawa kapristu wakayilambula yejima nawa wakayocha kulonda yakakakumuki wishi hakameña. Himulambu wakushita, mulambu wakwocha hakesi wevumba dadiwahi* kudi Yehova.
14 “‘Ilaña neyi wakalambula tuda kwikala mulambu wakumushitila Yehova, wakalambula mulambu windi kufuma hatuteela hela hanyana katupompa.*+ 15 Kapristu wakakilambula hakameña nakuketula mutu* waku nawa wakakwocha kulonda kakakakumuki wishi hakameña, ilaña mashi aku wakayivwishila kumbadi yakameña. 16 Akafumishi isakwila nimavuji aku nakuyinatila kumbadi yakameña, kukabadi kakumusela, kwiluña kwasukwilañawu mawuti.*+ 17 Wakakibalula haneli iku mpuula, iku mpuula chakadi kukaambula hayedi. Kuhiñahu, kapristu wakakwocha hanchawa yidi hakesi kulonda kakakakumuki wishi hakameña. Himulambu wakushita, mulambu wakwocha hakesi wevumba dadiwahi* kudi Yehova.
2 “‘Neyi muntu nakumulambula* Yehova mulambu wambutu,+ mulambu windi watela kwikala wawuña walembuluka nawa watela kuhuñunwinahu manji nikushahu+ manaña evumba dadiwahi. 2 Kuhiñahu, wakawuleta kudi atupristu anyana kaAroni, nawa kapristu wakanona mukonu* wumu wawuña walembuluka wawuwahi, manji nimanaña achu evumba dadiwahi. Wakajocha kulonda jakakakumuki wishi hakameña nakwikala mulambu wakwanukilaku.+ Himulambu wakwocha hakesi wevumba dadiwahi* kudi Yehova. 3 Mulambu wejima wakashalahu hamulambu wambutu, wakekalaña waAroni nianyanindi awamayala+ nakwikala chuma chajila chikupu+ chakufuma hanyilambu yaYehova yakwocha hakesi.
4 “‘Neyi wulambula mulambu wambutu wunochiwu dehi muoveni,* watela kwikala wawuña walembuluka wawuwahi, wamankendi akadi iluñi anjiñumuki epwata hakachi akubomba namanji nimankendi apapalala akadi iluñi akulambwija manji.+
5 “‘Neyi mulambu weyi himulambu wambutu yakwocha hachikañu, + owu mulambu watela kwikala wawuwahi, wawuña wakadi iluñi wakubomba namanji. 6 Watela kuwutebola muyikunku-yikunku nawa wakahuñunwinahu manji.+ Himulambu wambutu.
7 “‘Neyi mulambu weyi himulambu wambutu yakwocha hapani, watela kuwutuña nawuña wawuwahi walembuluka nimanji. 8 Watela kuleta kudi Yehova mulambu wambutu iwunatuñi kuzatisha yumiyi nawa wakamwinkiwu kapristu, yena wakawuleta kwakwihi nakameña. 9 Dichi kapristu akanonihu mulambu wumu wambutu nakwikala mulambu wakwanukilaku+ nawa akawochi kulonda wakakakumuki wishi hakameña nakwikala mulambu wakwocha hakesi wevumba dadiwahi* kudi Yehova.+ 10 Mulambu wakashalahu hamulambu wambutu, wakekalaña waAroni nianyanindi awamayala nawa wakekalaña chuma chajila chikupu chahanyilambu yakwocha hakesi yakumulambula Yehova.+
11 “‘Kwosi mulambu wambutu wumwakalambulaña kudi Yehova watela kwikala neluñiku,+ muloña himwatela kwilisha chikanka chikweti iluñi hela wuchi kukakumuka wishi nakwikala mulambu waYehova wakwocha hakesiku.
12 “‘Munateli kujilambula kudi Yehova kwikala mulambu wanyikaabu yatachi,+ hela chochu, bayi mwakajileta kukameña kwikala mulambu wevumba dadiwahiku.*
13 “‘Mulambu wambutu wejima iwakalambulaña watela kwikala wakushaku muñwa; nawa bayi wakavulamena kusha muñwa wachitiyañenu chaNzambi yeyi kumulambu weyi wambutuku. Nyilambu yeyi yejima yiwakalambulaña, wakasheñaku muñwa.+
14 “‘Neyi wakalambula kudi Yehova mulambu wambutu yanyikaabu yinasambili kuha, watela kulambula mbutu yayiha* yinochiwu hakesi, yinasoholiwu yakekali mulambu wambutu wanyikaabu yeyi yinasambili kuha.+ 15 Wakashiku manji nimanaña evumba dadiwahi. Himulambu wambutu. 16 Kapristu wakawocha kulonda wakakakumuki wishi nakwikala mulambu wakwanukilaku,+ dikwila nawu mbutu yimu yakusohola nimanji hamu nimanaña awu ejima evumba dadiwahi akekali mulambu wakwocha hakesi wakumulambula Yehova.
3 “‘Neyi mulambu windi himulambu wakuwunda+ nawa neyi nakuwulambula kufuma hamukanka wawañombi, hela chizamba hela himukaji, watela kulambula kumesu aYehova chimuna wakadi ihuji. 2 Yakanañiki chikasa chindi hamutu wanowu chimuna wunakulambulayi nawa akamujahili kuwiñililu wakwitenti dakubulakena. Atupristu anyana kaAroni, akasampwila mashi kutubadi twejima twakameña. 3 Yakalambuli chibalu chimu chamulambu wakuwunda kulonda wakekali mulambu wakwocha hakesi wakumulambula Yehova,+ dikwila nawu: manji+ ajika nyijiñwa, manji ejima akunyijiñwa, 4 ninshiya jiyedi jekala kwakwihi nachalamu hamu namanji aju. Wakafumisha niijika ntulu dakumuchima wachida ambanda hamu nanshiya.+ 5 Anyana kaAroni awamayala, akajocha kulonda jakakakumuki wishi hakameña hewulu damulambu wakushita wakekala hanchawa yakekala hakesi.+ Himulambu wakwocha hakesi wevumba dadiwahi* kudi Yehova.+
6 “‘Neyi nakumulambula Yehova mukoku hela mpembi wamulambu wakuwunda, watela kulambula chimuna wachizamba hela wamukaji wakadi ihuji.+ 7 Neyi nakulambula mwana kamukoku wachizamba kwikala mulambu windi, akamulambuli kumesu aYehova. 8 Akanañiki chikasa chindi hamutu wanowu chimuna wunakulambulayi nawa akamujahili kumbidi yetenti dakubulakena. Anyana kaAroni awamayala, akasampwila mashi indi kutubadi twejima twakameña. 9 Wakalambula manji akafumishayi kuchimuna chamulambu wakuwunda kulonda wakekali mulambu wakwocha hakesi wakumulambula Yehova.+ Wakafumisha mukila wejima wudi namanji nakuwuketwila kwakwihi namoñololu, manji ajika nyijiñwa, manji ejima akunyijiñwa, 10 ninshiya jiyedi jekala kwakwihi nachalamu hamu namanji aju. Wakafumisha niijika ntulu dakumuchima wachida ambanda hamu nanshiya.+ 11 Dichi kapristu wakajocha kulonda jakakakumuki wishi hakameña jakekali yakuda,* himulambu wakwocha hakesi wakumulambula Yehova.+
12 “‘Neyi nakulambula mpembi, akamulambuli kumesu aYehova. 13 Akanañiki chikasa chindi hamutu wanowu chimuna nawa akamujahili kumbidi yetenti dakubulakena. Anyana kaAroni awamayala, akasampwila mashi indi kutubadi twejima twakameña. 14 Yuma yakalambulayi kwikala mulambu windi wakwocha hakesi kudi Yehova, himanji ajika nyijiñwa, manji ejima akunyijiñwa,+ 15 ninshiya jiyedi jekala kwakwihi nachalamu hamu namanji aju. Wakafumisha niijika ntulu dakumuchima wachida ambanda hamu nanshiya. 16 Kapristu wakajocha kulonda jakakakumuki wishi hakameña nakwikala yakuda,* himulambu wakwocha hakesi wevumba dadiwahi.* Manji ejima aYehova.+
17 “‘Bayi muda manji adi ejima hela mashi+ adi ejimaku. Ilu hilushimbi lwahaya nyaaka lumwakalondelaña mumakiñu enu nimumaluña enu ejima mumwakashakamaña.’”
4 Yehova watwalekelihu kumuleja Mosi nindi: 2 “Lejaku aIsarela neyi, “Neyi muntu avulumuna* chakadi kwiluka+ nakukoña chuma chahayuma yashimunayi Yehova nindi bayi ayikoñaku, ichi dichimwatela kwila:
3 “‘Neyi kapristu wawayishewa+ avulumuna+ nawa ayiletela antu nshidi, watela kulambula kudi Yehova mwana kañombi wachizamba wakadi ihuji kulonda ekali mulambu wahanshidi yinakoñiyi.+ 4 Wakaleta owu ñombi wachizamba kuwiñililu wakwitenti dakubulakena+ kumesu aYehova nawa wakanañika chikasa chindi hamutu wanowu ñombi. Yenowu ñombi wakamujahila kumesu aYehova.+ 5 Kuhiñahu, kapristu wawayishewa+ wakanonahu mashi añombi wachizamba nakuyitwala mwitenti dakubulakena; 6 nawa kapristu wakatumpika munu windi mumashi+ nakusampwila mashi amakwawu kumesu aYehova mapampa 7+ kumbidi yehina dakujika nachu damwiluña dajila. 7 Kapristu wakasha cheñi mashi amakwawu kunseñu jakameña kainsensi yevumba dadiwahi+ kadi kumesu aYehova mwitenti dakubulakena. Kuhiñahu, mashi ejima añombi wachizamba akashalahu, wakayimwañila kwishina dakameña kakulambwilahu mulambu wakushita+ kadi kuwiñililu wakwitenti dakubulakena.
8 “‘Kuhiñahu, wakafumisha manji ejima añombi wachizamba wamulambu wahanshidi, kushilahu nimanji ajika nyijiñwa nimanji akunyijiñwa, 9 ninshiya jiyedi jekala kwakwihi nachalamu hamu namanji aju. Nawa wakafumisha ijika ntulu dakumuchima wachida ambanda hamu nanshiya.+ 10 Wakafumisha yumiyi neyi chelañawu nañombi wachizamba wamulambu wakuwunda.+ Nawa kapristu wakajocha kulonda jakakakumuki wishi hakameña kakulambwilahu mulambu wakushita.
11 “‘Ilaña chitembi chañombi wachizamba nimbiji yindi yejima hamu namutu windi, nyikonu yindi, nyijiñwa yindi niwusoyi+ windi, 12 nijejima jakashalahu kuñombi wachizamba, wakajitwala kunsa yachilombu kwiluña dawunyonji kwasukwilañawu mawuti* nawa wakajocha hanchawa jidi hakesi.+ Akajocheli kwasukwilañawu mawuti.
13 “‘Dichi neyi izaza dejima dawaIsarela dinekali namuloña wakukoña nshidi chakadi kwiluka,+ ilaña chipompelu hichineluki nawu anakoñi chuma chayilejeliwu kudi Yehova nindi bayi achikoñaku,+ 14 nawa neyi mukuhita kwampinji oyu nshidi ayiluka, chipompelu chatela kulambula mwana kañombi wachizamba kulonda ekali mulambu wahanshidi nakuwuleta kumbidi yetenti dakubulakena. 15 Akulumpi ezaza dawantu akanañiki makasa awu hamutu wanowu ñombi wachizamba kumesu aYehova, nawa owu ñombi akamujahili kumesu aYehova.
16 “‘Kufumahu, kapristu wawayishewa wakaleta mashi amakwawu añombi wachizamba mwitenti dakubulakena. 17 Kapristu wakatumpika munu windi mumashi nakusampwila mashi amakwawu kumesu aYehova mapampa 7 kumbidi yehina dakujika nachu.+ 18 Kufumahu, wakasha mashi amakwawu kunseñu jakameña+ kadi kumesu aYehova, mwitenti dakubulakena. Kuhiñahu, mashi ejima akashalahu, wakayimwañila kwishina dakameña kakulambwilahu mulambu wakushita kadi kuwiñililu wakwitenti dakubulakena.+ 19 Wakafumisha manji indi ejima nakuyocha kulonda akakakumuki wishi hakameña.+ 20 Wakamwila ñombi wachizamba neyi cheliliyi nañombi mukwawu wachizamba wamulambu wahanshidi. Ichi dichakamwilayi nawa kapristu wakabuta hanshidi jawu+ nawa akayanakena. 21 Wakatwala ñombi wachizamba kunsa yachilombu nawa wakamwocha neyi chocheliyi ñombi wachizamba+ watachi. Himulambu wahanshidi yachipompelu.+
22 “‘Neyi nyuuli+ avulumuna chakadi kwiluka kuhitila mukukoña chuma hayuma yejima yashimunayi Yehova Nzambi yindi nindi bayi ayikoñaku, nawa nekali namuloña 23 hela neyi eluka nshidi yinakoñiyi yakufumpa lushimbi, watela kuleta mwana kampembi wachizamba wakadi ihuji ekali mulambu windi. 24 Akanañiki chikasa chindi hamutu wamwana kampembi wachizamba nawa akamujahili heluña hajahilañawu mulambu wakushita kumesu aYehova.+ Himulambu wahanshidi. 25 Kapristu wakanonahu namunu windi mashi achimuna chamulambu wahanshidi nakuyilamba kunseñu+ jakameña kakulambwilahu mulambu wakushita. Kuhiñahu, mashi indi akashalahu, wakayimwañila kwishina dakameña kakulambwilahu mulambu wakushita.+ 26 Wakwocha manji anowu chimuna ejima kulonda akakakumuki wishi hakameña neyi manji amulambu wakuwunda.+ Kuhiñahu, kapristu wakabuta hanshidi janowu muntu nawa akamwanakena.
27 “‘Neyi muntu wumu hakachi kawantu amwituña akoña nshidi chakadi kwiluka nawa ekala namuloña wakukoña chuma hayuma yejima yinashimuniyi Yehova nindi bayi ayikoñaku,+ 28 hela neyi eluka nshidi yinakoñiyi, watela kuleta mwana kampembi wamukaji wakadi ihuji kulonda ekali mulambu windi wahanshidi yinakoñiyi. 29 Akanañiki chikasa chindi hamutu wamwana kampembi nawa akamujahili heluña hajahilañawu mulambu wakushita kumesu aNzambi. Himulambu wahanshidi.+ 30 Kapristu wakanonahu namunu windi mashi anowu chimuna nakuyilamba kunseñu jakameña kakulambwilahu mulambu wakushita. Kuhiñahu, mashi indi ejima akashalahu, wakayimwañila kwishina dakameña.+ 31 Wakafumisha manji+ ejima anowu chimuna neyi chafumishañawu manji kumulambu wakuwunda.+ Kuhiñahu, kapristu wakayocha kulonda akakakumuki wishi hakameña nakwikala mulambu wevumba dadiwahi* kudi Yehova. Kufumahu, kapristu wakabuta hanshidi yanowu muntu nawa akamwanakena.
32 “‘Ilaña neyi alambula mwana kamukoku kulonda ekali mulambu windi wahanshidi, watela kuleta mwana kamukoku wamukaji wakadi ihuji. 33 Akanañiki chikasa chindi hamutu wachimuna chamulambu wahanshidi nawa yakamujahili heluña hajahilañawu+ mulambu wakushita kulonda wakekali mulambu windi wahanshidi. 34 Kapristu wakanonahu namunu windi mashi achimuna chamulambu wahanshidi nakuyilamba kunseñu jakameña kakulambwilahu mulambu wakushita.+ Kuhiñahu, mashi indi ejima akashalahu, wakayimwañila kwishina dakameña. 35 Wakafumisha manji ejima anowu chimuna neyi chafumishañawu manji kumwana kamukoku wachizamba wamulambu wakuwunda. Kuhiñahu, kapristu wakayocha kulonda akakakumuki wishi hakameña hewulu danyilambu yaYehova yakwocha hakesi.+ Kufumahu, kapristu wakabuta hanshidi yinakoñiyi owu muntu nawa akamwanakena.+
5 “‘Neyi muntu natiyi* mbila yakushimuna wunsahu*+ nawa yena hichinsahu hela wamona hela nayiluki oyu nsañu ilaña yena kushimuna nehi, navulumuni nawa wakalumbulula hachiluwa chindi.
2 “‘Hela neyi muntu akwata* chuma chidi chejima chamajilu, hela mujimba wakanyama kanafwi kamwisaña, wakanyama kamukala kamajilu hela wayileñaleña yendaña munyikanka-nyikanka,+ dikwila nawu owu muntu nekali wamajilu nawa nekali namuloña hela chakwila yena nachiluki wanyi. 3 Hela neyi muntu chakadi kwiluka akwata chuma chidi chejima chamajilu+ chakufuma kudi muntu, chuma chidi chejima chamajilu chinateli kumuletesha kwikala wamajilu, ilaña mukuhita kwampinji chumochu yachiluka, muntu yenowu wukwikala namuloña.
4 “‘Hela neyi muntu anyakala* kusanyika kwila chuma, hela kwila chuma chachiwahi hela chatama, hela chikwikala chuma chamuchidinyi, nawa yena kuchiluka chumochu nehi, ilaña mukuhita kwampinji yeluka nindi wanyakala kusanyika, muntu yenowu wukwikala namuloña.*+
5 “‘Neyi muntu ekala namuloña wachuma chimu chahayumiyi, watela kushimuna nshidi+ yidi yejima yinakoñiyi. 6 Yakaleti nimulambu wamuloña windi kudi Yehova wahanshidi yinakoñiyi.+ Iyi diyuma yakaletayi, chimuna wamukaji kufuma hamukanka wawanyikoku hela wawampembi, hela mwana kamukoku wamukaji hela mwana kampembi wamukaji kwikala mulambu wahanshidi. Kuhiñahu, kapristu wakabuta hanshidi yanowu muntu.
7 “‘Ilaña neyi hakutwesha kuleta mukokuku, watela kuleta kudi Yehova tuteela tuyedi hela anyana katupompa* ayedi+ kulonda wiikali mulambu wamuloña windi wahanshidi, kamu kamulambu wahanshidi nawa kakwawu kamulambu wakushita.+ 8 Akatuleti kudi kapristu nawa kapristu akasambili kulambula kada kamulambu wahanshidi. Akakiketuli hanyidiwu yaku chakadi kufumishaku mutu. 9 Yakasampwili mashi amakwawu amulambu wahanshidi kumbadi yakameña, ilaña mashi akashalahu, wakayivwishila kwishina dakameña.+ Himulambu wahanshidi. 10 Kakwawu wakakilambula nakwikala mulambu wakushita neyi chelañawu diikalu.+ Kuhiñahu, kapristu wakabuta hanshidi yinakoñiyi owu muntu nawa akamwanakena.+
11 “‘Dichi neyi hakutwesha kuleta tuteela tuyedi hela anyana katupompa* ayediku, watela kuleta chipimu chamwikumi chaifa*+ chawuña wawuwahi walembuluka kwikala mulambu windi wahanshidi yindi. Hatela kushaku manji hela manaña evumba dadiwahiku, muloña himulambu wahanshidi. 12 Iwu wuña wakawuleta kudi kapristu nawa kapristu wakanonahu mukonu* wumu kulonda wakekali mulambu wakwanukilaku nawa wakawocha kulonda wakakakumuki wishi hakameña hewulu damulambu waYehova wakwocha hakesi. Himulambu wahanshidi. 13 Kapristu wakabuta hanshidi yinakoñiyi owu muntu, nshidi yidi yejima haniji nshidi nawa akamwanakena.+ Wakashalahu, wakekala wakapristu+ neyi chelañawu namulambu wambutu.’”+
14 Yehova watwalekelihu kumuleja Mosi nindi: 15 “Neyi muntu abula* kwikala washinshika kuhitila mukufumpa nshimbi yahosha hayuma yajila yaYehova+ chakadi kwiluka, muntu yenowu wakaleta kudi Yehova mukoku wachizamba wakadi ihuji kufuma hamukanka kulonda ekali mulambu wamuloña.+ Wuseya wamali asiliva amashekeli* aniwu mukoku awutoñolaña kwesekeja nalushekeli lwatelela lwamwiluña dajila.*+ 16 Nawa wakafweta muloña wanshidi yinakoñiyi heluña dajila nawa akabombelihu nichipimu chimu chamuchitanu chawuseya windi.+ Wakachihana kudi kapristu kulonda kapristu akabuti hanshidi+ yanowu muntu namukoku wachizamba wamulambu wamuloña nawa akamwanakena.+
17 “‘Neyi muntu avulumuna* kuhitila mukwila chuma hayuma yejima yashimunayi Yehova nindi bayi ayikoñaku, wudi namuloña hela chakwila yena neluki wanyi nawa wakalumbulula hachiluwa chindi.+ 18 Watela kuleta kudi kapristu mukoku wachizamba wakadi ihuji kufuma hamukanka kwesekeja nawuseya wunatoñoliwu wamulambu wamuloña.+ Kuhiñahu, kapristu wakabuta hanshidi yanowu muntu hamuloña wachiluwa chinakoñiyi chakadi kwiluka nawa akamwanakena. 19 Himulambu wamuloña. Nekali chikupu namuloña wakumuvulumuna Yehova.”
6 Yehova watwalekelihu kumuleja Mosi nindi: 2 “Neyi muntu akoña* nshidi nawa abula kwikala washinshika kudi Yehova+ kuhitila mukudimba mukwawu nayuma yamukunjikawu+ hela yuma yamwinkawu kuhemba hela eya hela asenda chuma chamukwawu kuhitila mukumudimba, 3 hela anona chuma chinajimbali ilaña hakudikala nawa asanyika mwakutwamba kutalisha hanoyu nshidi yinakoñiyi,+ ichi dichatela kwilayi: 4 Neyi navulumuni nawa wudi namuloña, watela kufuntisha yuma yeyayi, yuma yatambulayi muwupwapoki, yuma yasendayi kuhitila mukudimbana, yuma yamukunjikiliwu hela chuma chajimbeli chanoneliyi, 5 hela chuma chasanyikiliyi mwakutwamba, akafweti+ ochu chuma chejima nawa akabombelihu chipimu chimu chamuchitanu chawuseya wachu. Wakachihana kudi yomweni hefuku dakamuwanawu namuloña. 6 Nawa akanoni mukoku wachizamba wakadi ihuji kufuma hamukanka windi, akamuleti kudi kapristu kulonda akekali mulambu windi wamuloña kudi Yehova kwesekeja nawuseya wakatoñolawu wamulambu wamuloña.+ 7 Kapristu wakabuta hanshidi yanowu muntu kumesu aYehova nawa akamwanakena chuma chejima chinakoñiyi chinamuleteshi ekali namuloña.”+
8 Yehova watwalekelihu kumuleja Mosi nindi: 9 “Muleji Aroni nianyanindi awamayala neyi, ‘Ilu dilushimbi lwamulambu wakushita:+ Mulambu wakushita wakekalaña hejiku dakameña wufuku wejima kushika nintetemena nawa kesi kakatwalekahu kubutuka hakameña. 10 Kapristu wakavwala dilesi yindi yehina+ yakukalakelamu mudimu nawa wakavwala nikaputula* kehina.+ Kuhiñahu, wakakuñula mawuti*+ amulambu wakushita wunahi nakesi hakameña nakuyisukwila kumbadi yakameña. 11 Kufumahu, wakavuula yakuvwala+ yindi nakuvwala yakuvwala yacheñi nawa wakanona mawuti nakuyitwala kwiluña dawunyonji hanji yachilombu.+ 12 Kesi kakatwalekahu kubutuka hakameña. Bayi kakajimaku. Kapristu akasheñahu nchawa+ hakameña hantetemena-hantetemena. Akasheñahu mulambu wakushita nawa yakwocheña manji amulambu wakuwunda kulonda akakakumukileñahu wishi.+ 13 Kesi kakatwalekahu kubutuka hakameña. Bayi kakajimaku.
14 “‘Ilu dilushimbi lwamulambu wambutu:+ Anyana kaAroni awamayala akawulambula kumesu aYehova, kumbidi yakameña. 15 Wumu hakachi kawu wakanonahu mukonu* wumu hawuña wawuwahi walembuluka wamulambu wambutu nimanji awu amakwawu nimanaña ejima adi hamulambu wambutu. Wakayocha kulonda yakakakumuki wishi hakameña nakwikala mulambu wakwanukilaku wevumba dadiwahi* kudi Yehova.+ 16 Aroni nianyanindi awamayala akada mulambu wakashalahu.+ Akawudiila mwiluña dajila neyi mankendi akadi iluñi. Akawudiila mulubanza lwetenti dakubulakena.+ 17 Owu mulambu bayi akawocha nachuma chejima chikweti iluñiku.+ Nayinkiwu wiikali iseka dawu dahanyilambu yami yakwocha hakesi.+ Hichuma chajila chikupu+ neyi mulambu wahanshidi nawa neyi mulambu wamuloña. 18 Iyala wejima hadi anyana kaAroni wakada owu mulambu.+ Hiiseka dawu dahaya nyaaka mwakahita makiñu awu ejima dakufuma hanyilambu yaYehova yakwocha hakesi.+ Chuma chejima chakakunka kunoyu nyilambu chakekala chajila.’”
19 Yehova wamulejeli cheñi Mosi nindi: 20 “Iwu diwu mulambu wakalambulayi Aroni nianyanindi awamayala kudi Yehova hefuku dakamuwayishawu:+ chipimu chamwikumi chaifa*+ chawuña wawuwahi walembuluka kulonda chakekali mulambu wambutu+ wakulambula mpinji yejima. Chibalu chawuña chimu nantetemena nawa chibalu chikwawu namelela. 21 Akawocha namanji hachikañu.+ Wakawuleti wakwocha nawa wakubomba chiwahi namanji. Wakawulambuli muyikunku-yikunku kulonda wakekali mulambu wambutu wevumba dadiwahi* kudi Yehova. 22 Kapristu wawayishewa wakamuswana Aroni owu wakafuma hadi anyanindi awamayala,+ diyi wakawocha. Mulambu wamukuma akawochi wejima kulonda wakakakumukili wishi kudi Yehova. Ilu hilushimbi lwahaya nyaaka. 23 Mulambu wejima wambutu wakapristu watela kwikala mulambu wamukuma. Bayi awidaku.”
24 Yehova wamulejeli cheñi Mosi nindi: 25 “Muleji Aroni nianyanindi awamayala neyi, ‘Ilu dilushimbi lwamulambu wahanshidi:+ Kwiluña dajahilañawu+ mulambu wakushita, dikwakajahilañawu nimulambu wahanshidi kumesu aYehova. Hichuma chajila chikupu. 26 Kapristu wakalambulaña owu mulambu wahanshidi, diyi wakawida.+ Wakawidiilaña mwiluña dajila, mulubanza lwetenti dakubulakena.+
27 “‘Chuma chejima chikakunka kumbiji yanowu mulambu, chakekala chajila. Neyi muntu wejima asampwila mashi anowu mulambu hachakuvwala chindi, ochu chakuvwala hanasampukili mashi wakachikoseli mwiluña dajila. 28 Ndehu yewumba muyanatelekiwu oyu mbiji, akayifumpi. Ilaña neyi ayitelekela mundehu yawuneñu, oyu ndehu akayikuusi* nikuyikosa namenji.
29 “‘Iyala wejima hadi atupristu wakada oyu mbiji.+ Hichuma chajila chikupu.+ 30 Hela chochu, kwosi muntu watela kuda mulambu wahanshidi neyi mashi awu amakwawu anayileti mwitenti dakubulakena mwiluña dajila+ kulonda abuti hanshidi. Atela kuwocha nakesi.
7 “‘Ilu dilushimbi lwahosha hamulambu wamuloña:+ Hichuma chajila chikupu. 2 Chimuna chamulambu wamuloña akamujahili heluña dajahilañawu nyilambu yakushita, nawa mashi indi+ atela kuyisampwila kutubadi twejima twakameña.+ 3 Wakalambula manji+ anowu chimuna ejima, kushilahu nimukila wukweti manji, manji ajika nyijiñwa, 4 ninshiya jiyedi jekala kwakwihi nachalamu hamu namanji aju. Wakafumisha niijika ntulu dakumuchima wachida ambanda hamu nanshiya.+ 5 Kapristu wakajocha kulonda jakakakumuki wishi hakameña nakwikala mulambu wakwocha hakesi kudi Yehova.+ Himulambu wamuloña. 6 Iyala wejima wahadi atupristu wakada owu mulambu+ nawa atela kuwudiila mwiluña dajila. Hichuma chajila chikupu.+ 7 Kudi lushimbi lumu hohu lwahosha hamulambu wahanshidi nihamulambu wamuloña; kapristu wakalambula iwu mulambu, diyi wakatambula yumiyi kwikala yindi.+
8 “‘Neyi kapristu amulambwilaku muntu mulambu wakushita, chitembi+ chanowu mulambu wakushita wunamwinkiwu kapristu chakekala chakapristu.
9 “‘Mulambu wambutu wejima wunochiwu muoveni* hela hapani hela hachikañu,+ wakekala wakapristu wunawulambuli. Wakekala windi.+ 10 Ilaña mulambu wambutu wejima wakubomba namanji+ hela wooma,+ wakekala wawanyana kaAroni awamayala ejima; wejima wawu hamuntu-hamuntu akatambula iseka dodimu.
11 “‘Dichi, ilu dilushimbi lwamulambu wakuwunda+ wunateli kuhanayi muntu kudi Yehova: 12 Neyi awulambula kwikala chuma chakusakilila nachu,+ wakawulambula hamu namulambu wakusakilila nachu wamankendi akadi iluñi anjiñumuki epwata hakachi akubomba namanji, namankendi apapalala akadi iluñi akulambwija manji ninamankendi anjiñumuki epwata hakachi akwocha nawuña wawuwahi walembuluka, wakubomba chiwahi namanji. 13 Wakalambula mulambu windi hamu namankendi akweti iluñi anjiñumuki epwata hakachi nimulambu wakusakilila nachu wamulambu windi wakuwunda. 14 Hayumiyi wakalambulahu mulambu wumu kwikala iseka dajila kudi Yehova; iwu mulambu wakekala wakapristu owu wasampulaña mashi amulambu wakuwunda.+ 15 Mbiji yamulambu wakusakilila nachu yamulambu windi wakuwunda akayida hefuku dakayilambulayi. Bayi yakayihemba kushika ntetemenaku.+
16 “‘Neyi mulambu windi himulambu wakusanyika+ hela himulambu wakudikeñela,+ akawidi hefuku dakawulambulawu nawa mbiji yakashalahu anateli tuhu nikuyida hefuku dakalondelahu. 17 Ilaña neyi hashala mbiji yidi yejima kushika nihefuku damuchisatu, akayochi hakesi.+ 18 Hela chochu, neyi mbiji yidi yejima yamulambu windi wakuwunda ayida hefuku damuchisatu, owu wunakuyilambula akamutiya kuwaha wanyi. Mulambu windi wukamuleñela akabuli kumutiya kuwaha muloña hichuma chawuzondu nawa muntu* wakada kunoyu mbiji, wakalumbulula hachiluwa chindi.+ 19 Mbiji yejima yikakunka kuchuma chamajilu, bayi akayidaku. Akayochi hakesi. Muntu wejima wakadi majilu wakada mbiji yakadi majilu.
20 “‘Ilaña muntu* wejima wamajilu neyi ada mbiji yamulambu wakuwunda waYehova, akamujahi nakumufumisha hadi antu jindi.*+ 21 Neyi muntu akwata* chuma chamajilu, hela hichuma chamajilu chakufuma kudi muntu+ hela kanyama+ wamajilu hela chuma chidi chejima chawuzondu+ nawa ada mbiji yimu yamulambu wakuwunda waYehova, akamujahi nakumufumisha hadi antu jindi.’”*
22 Yehova watwalekelihu kumuleja Mosi nindi: 23 “Lejaku aIsarela neyi, ‘Bayi muda manji+ adi ejima añombi wachizamba hela amwana kamukoku wachizamba hela ampembiku. 24 Manji akanyama wunadifwili nimanji akanyama wunajahiwu kudi mukwawu kanyama, munateli kuyizatisha kunyidimu yikwawu, hela chochu, bayi muyidaku.+ 25 Muntu wakada manji akanyama wunakulambulayi kwikala mulambu wakwocha hakesi kudi Yehova, akamujahi nakumufumisha hadi antu jindi.
26 “‘Bayi muda mashi+ adi ejima kumaluña kwejima kumunakushakamaku, hela himashi atuda hela anyama. 27 Muntu wejima* wakada mashi adi ejima, akamujahi+ nakumufumisha hadi antu jindi.’”
28 Yehova watwalekelihu kumuleja Mosi nindi: 29 “Lejaku aIsarela neyi, ‘Muntu wejima wunakulambula mulambu wakuwunda kudi Yehova, akaleti kudi Yehova chibalu chamulambu kufuma hamulambu windi wakuwunda.+ 30 Wakaleta mumakasa indi manji+ hamu nebwaambu nakwikala mulambu wakwocha hakesi kudi Yehova. Wakawuzuyañesha iku niniku nakwikala mulambu wakuzuyañesha+ kumesu aYehova. 31 Kapristu wakwocha manji kulonda akakakumuki wishi hakameña,+ ilaña ibwaambu dakekala daAroni nianyanindi awamayala.+
32 “‘Mwakamwinka kapristu mwendu wachidiilu wakekali iseka dindi dajila kufuma hamulambu wenu wakuwunda.+ 33 Mwana kaAroni weyala wakalambula mashi amulambu wakuwunda nimanji, diyi wakatambula mwendu wachidiilu wakekali iseka dindi.+ 34 Muloña ami nanoni ibwaambu damulambu wakuzuyañesha nimwendu weseka dajila dakufuma hanyilambu yakuwunda yawaIsarela. Yumiyi nayihani kudi kapristu Aroni nikudi anyanindi awamayala yiikali lushimbi lwahaya nyaaka kudi aIsarela.+
35 “‘Idi dadiña iseka dafumini hanyilambu yaYehova yakwocha hakesi dakwinka atupristu, dikwila nawu daAroni nianyanindi awamayala hefuku dayitondeliyi kwikala atupristu aYehova.+ 36 Yehova washimwini kuyinka idi iseka kudi aIsarela hefuku dayiwayishiliyi.+ Hilushimbi lwahaya nyaaka mumakiñu awu.’”
37 Ilu dilushimbi lwahosha hamulambu wakushita,+ hamulambu wambutu,+ hamulambu wahanshidi,+ hamulambu wamuloña,+ hamulambu wakuswanyika nachu+ nihamulambu wakuwunda,+ 38 neyi chamulejeliwu Mosi kudi Yehova haMpidi yaSinayi+ hefuku dalejeliyi aIsarela nindi alambuli nyilambu yawu kudi Yehova mwisaña daSinayi.+
8 Yehova watwalekelihu kumuleja Mosi nindi: 2 “Sendaku Aroni nianyanindi awamayala,+ yakuvwala,+ manji akuwayisha nachu,+ ñombi wachizamba wamulambu wahanshidi, anyikoku ayizamba ayedi nichimpaaya chamankendi* akadi iluñi,+ 3 nawa wupompeshi hamu izaza dawantu dejima kuwiñililu wakwitenti dakubulakena.”
4 Kuhiñahu, Mosi welili mwamulejeliwu kudi Yehova nawa izaza dawantu dapompeli hamu kuwiñililu wakwitenti dakubulakena. 5 Hohenohu Mosi walejeli izaza dawantu nindi: “Ichi dichinatulejiyi Yehova nindi twili.” 6 Dichi Mosi waleteli Aroni nianyanindi awamayala kwakwihi nawa wayiwelesheli namenji.+ 7 Hanyima yachumichi, wamuvwikili munkukumba,+ wamukasili muya wehina,+ wamuvwikili chakuvwala chakadi makasa+ nawa wamuvwikili ifwodi*+ nakuyikasa namushipi wakupikula* + wefwodi, nakumukasayi chiwahi. 8 Kuhiñahu, wamuvwikili ipakumuna dahantulu+ nawa washili Urimi niTumimi+ mwipakumuna dahantulu. 9 Kufumahu, wamukasili chitambala+ kumutu windi nawa hambidi yachitambala washilihu ilata dawuru yakutookesha dakekema kwikala chinjikijilu chajila chakudihana*+ neyi chamulejeliwu Mosi kudi Yehova.
10 Kuhiñahu, Mosi wanoneli manji akuwayisha nachu. Wawayishili tabanaka niyuma yejima yadiñamu+ nawa wayijilikili. 11 Hanyima yachumichi, wasampwilili manji amakwawu hakameña nikuyuma yaku yejima mapampa 7 nikubeseni* nihakuyitenteka kulonda ayijiliki. 12 Nkumininaku, wahuñunwinini manji amu akuwayisha nachu hamutu waAroni nakumuwayisha kulonda amujiliki.+
13 Kuhiñahu, Mosi wayileteli anyana kaAroni awamayala kwakwihi nakuyivwika nyinkukumba nawa wayikasili nyiya yehina nikuyivwika matepa*+ neyi chamulejeliwu Mosi kudi Yehova.
14 Kufumahu, waleteli ñombi wachizamba wamulambu wahanshidi nawa Aroni nianyanindi awamayala anañikili makasa awu hamutu wanowu ñombi wachizamba wamulambu wahanshidi.+ 15 Mosi wamujahili owu ñombi nawa wanoneli mashi+ namunu windi nakuyilamba kunseñu jakameña kutubadi twejima. Watookesheli nikameña kunshidi, ilaña mashi ashalilihu, wayihuñunwinini kwishina dakameña kulonda yakijiliki hakwila nawu abutileñahu nshidi. 16 Hanyima yachumichi, wanoneli manji ejima adiña kunyijiñwa, ijika ntulu dakumuchima wachida ambanda ninshiya jiyedi hamu namanji aju. Dichi Mosi wocheli iyi yuma nawa yakakumukili wishi hakameña.+ 17 Kuhiñahu, Mosi wasendeli ñombi wachizamba wejima, chitembi chindi, mbiji yindi niwusoyi windi, wocheli yumiyi hakesi kunsa yachilombu+ neyi chamulejeliwu Mosi kudi Yehova.
18 Kufumahu, waleteli kwakwihi mukoku wachizamba wamulambu wakushita nawa Aroni nianyanindi awamayala anañikili makasa awu hamutu wanowu mukoku wachizamba.+ 19 Kuhiñahu, Mosi wamujahili owu mukoku nawa wasampwilili mashi kutubadi twejima twakameña. 20 Owu mukoku wachizamba wamuhabwili muyimamu nawa Mosi wanoneli mutu, yimamu nimanji akunshiya nakuyocha hakesi nawa yakakumukili wishi. 21 Wakoseli nyijiñwa ninyikonu namenji. Mosi wocheli owu mukoku wachizamba wejima nawa wakakumukili wishi hakameña. Wadiña mulambu wakushita wevumba dadiwahi.* Wadiña mulambu wakwocha hakesi kudi Yehova neyi chamulejeliwu Mosi kudi Yehova.
22 Kuhiñahu, waleteli mukoku mukwawu wachizamba, yowu mukoku wachizamba wakuswanisha nachu+ nawa Aroni nianyanindi awamayala anañikili makasa awu hamutu wanowu mukoku wachizamba.+ 23 Mosi wajahili owu mukoku nawa wanonelihu mashi nakuyilamba kwishina deetu daAroni dachidiilu nikumunu windi wedimbanu dakuchikasa chachidiilu nikwidimbanu dakumwendu windi wachidiilu. 24 Kufumahu, Mosi waleteli anyana kaAroni awamayala kumbidi nakusha mashi amakwawu kwishina damatu awu achidiilu nikumadimbanu akumakasa awu achidiilu nikumadimbanu akunyendu yawu yachidiilu. Ilaña mashi ashalilihu, Mosi wayisampwilili kutubadi twejima twakameña.+
25 Kuhiñahu, wanoneli manji, mukila wudi namanji, manji ejima adiña kunyijiñwa, ijika ntulu dakumuchima wachida ambanda, nshiya jiyedi nimanji aju nimwendu wachidiilu.+ 26 Wanoneli mankendi akadi iluñi muchimpaaya* chadiña kumesu Yehova, wanonelimu dinkendi dimu dakadi iluñi danjiñumuki dadiña nepwata hakachi,+ dinkendi dimu danjiñumuki dadiña nepwata hakachi dakulambwija manji+ nidinkendi dapapalala. Kuhiñahu, wayishili hewulu damanji nihamwendu wachidiilu. 27 Hanyima yachumichi, wayishili ejima mumakasa aAroni nimumakasa awanyanindi awamayala nawa atachikili kuyizuyañesha iku niniku nakwikala mulambu wakuzuyañesha kumesu aYehova. 28 Kufumahu, Mosi wayifumishili mumakasa awu nakuyocha nawa akakumukili wishi hakameña hewulu damulambu wakushita. Adiña mulambu wakuswanisha nachu wevumba dadiwahi.* Wadiña mulambu wakwocha hakesi kudi Yehova.
29 Kuhiñahu, Mosi wanoneli ibwaambu nakudizuyañesha iku niniku nakwikala mulambu wakuzuyañesha kumesu aYehova.+ Dekalili iseka daMosi kufuma kumukoku wachizamba wakuswanisha nachu neyi chamulejeliwu Mosi+ kudi Yehova.
30 Nawa Mosi wanonelihu manji akuwayisha nachu+ nimashi amakwawu adiña hakameña nakumusampwila Aroni nikuyakuvwala yindi nianyanindi awamayala adiñayi nawu nikuyakuvwala yawu. Dichi, wamujilikili Aroni niyakuvwala yindi kushilahu nianyanindi awamayala+ niyakuvwala yawu.+
31 Kuhiñahu, Mosi wamulejeli Aroni nianyanindi awamayala nindi: “Telekelenu+ mbiji kuwiñililu wakwitenti dakubulakena nawa mukuyidiila kwenoku hamu namankendi adi muchimpaaya* chakuswanisha nachu neyi chanlejeliwu nawu, ‘Akayida+ kudi Aroni nianyanindi awamayala.’ 32 Mbiji nimankendi jakashalahu mwakajochi nakesi.+ 33 Hadi mafuku 7, bayi mwakafuma kuwiñililu wakwitenti dakubulakenaku, sampu nichakamana mafuku enu akuyiswanisha, muloña hakahita mafuku 7 hakuyiswanisha kwikala atupristu.*+ 34 Yehova washimwini nindi twili chuma chituneli mwifuku dalelu kulonda enu ayibutili hanshidi jenu.+ 35 Mukushakamaña kuwiñililu wakwitenti dakubulakena mwaana niwufuku hadi mafuku 7+ nikukalakala mudimu wenu kudi Yehova+ kulonda mubuli kufwa; muloña ichi dichinanlejiwu.”
36 Dichi Aroni nianyanindi awamayala elili yuma yejima yashimwiniyi Yehova kuhitila mudi Mosi.
9 Hefuku damu 8,+ Mosi wamutambikili Aroni, anyanindi awamayala niakulumpi jawaIsarela. 2 Wamulejeli Aroni nindi: “Sendaku mwana kañombi wamulambu wahanshidi+ nimukoku wachizamba wamulambu wakushita, akadi hataminawu nawa wuyilambuli kumesu aYehova. 3 Hela chochu, aIsarela wuyileji neyi, ‘Sendenu mpembi wachizamba wamulambu wahanshidi nimwana kañombi nimwana kamukoku wachizamba, ejima wawu atela kwikala achaaka chimu, akadi hataminawu kulonda ekali amulambu wakushita, 4 niñombi wachizamba nimukoku wachizamba anyilambu yakuwunda,+ akulambula kumesu aYehova nimulambu wambutu+ wakubomba namanji. Muloña dalelu Yehova wukumwekana kudi enu.’”+
5 Dichi, aleteli kwitenti dakubulakena yuma yejima yayilejeliwu kudi Mosi. Kuhiñahu, izaza dawantu dejima denjili nakwimana kumesu aYehova. 6 Nawa Mosi wahosheli nindi: “Ichi dichinayilejiyi Yehova nindi mwili, kulonda kulema kwaYehova kuyimwekeni.”+ 7 Kuhiñahu, Mosi wamulejeli Aroni nindi: “Yaku kukameña wuhani mulambu weyi wahanshidi+ nimulambu wakushita kulonda wubuti hanshidi yeyi+ nihanshidi yaamwitala deyi. Wuyilambwiliku antu+ mulambu nikubuta hanshidi jawu+ neyi chinashimuniyi Yehova.”
8 Hohenohu, Aroni wayili kukameña nawa wajahili mwana kañombi wamulambu wahanshidi yindi.+ 9 Kuhiñahu, Aroni amwinkeli mashi+ kudi anyanindi awamayala, watumpikili munu windi mumashi nakuyilamba kunseñu jakameña nawa mashi ashalilihu wayihuñunwinini kwishina dakameña.+ 10 Wanoneli manji, nshiya niijika ntulu dakumuchima wachida ambanda kufuma kumulambu wahanshidi nakuyocha nawa yakakumukili wishi hakameña neyi chamulejeliwu Mosi+ kudi Yehova. 11 Nawa mbiji nichitembi wajocheli nakesi hanji yachilombu.+
12 Kuhiñahu, Aroni wajahili mukoku wachizamba wamulambu wakushita, anyanindi awamayala amwinkeli mashi nawa wayisampwilili kutubadi twejima twakameña.+ 13 Amwinkeli yimamu yamulambu wakushita hamu namutu, wayocheli nawa yakakumukili wishi hakameña. 14 Kubombelahu, wakoseli nyijiñwa ninyikonu, wayocheli nawa yakakumukili wishi hewulu damulambu wakushita hakameña.
15 Kufumahu, waleteli mulambu wawantu nawa wanoneli mpembi wamulambu wahanshidi yawantu, wamujahili nakumulambula kwikala mulambu wahanshidi neyi cheliliyi nawatachi. 16 Waleteli mulambu wakushita nawa wawulambwili kwesekeja nachelileñawu diikalu.+
17 Kuhiñahu, waleteli mulambu wambutu,+ wanonelihu mukonu* wumu wenzala nakuwocha nawa wakakumukili wishi hakameña, kubombela hamulambu wakushita wantetemena.+
18 Kufumahu, Aroni wajahili ñombi wachizamba nimukoku wachizamba amulambu wakuwunda wawantu. Kuhiñahu, anyanindi awamayala amwinkeli mashi nawa wayisampwilili kutubadi twejima twakameña.+ 19 Hakwila manji añombi wachizamba,+ mukila wudi namanji wamukoku wachizamba, manji ajika kuyiidi yamwivumu, nshiya niijika ntulu dakumuchima wachida ambanda,+ 20 ashili owu manji ejima hewulu datubwaambu. Hanyima yachumichi, wocheli owu manji nawa akakumukili wishi hakameña.+ 21 Ilaña mabwaambu nimwendu wachidiilu, Aroni wajizuyañesheli iku niniku nakwikala mulambu wakuzuyañesha kumesu aYehova neyi chashimwiniyi Mosi.+
22 Kufumahu, Aroni watalishili kudi antu nakwolwela makasa indi hadi wena nawa wayikiswilili.+ Kuhiñahu, wakunkumukili kufuma hakameña hanyima yakulambula mulambu wahanshidi, mulambu wakushita ninyilambu yakuwunda. 23 Nkumininaku, aMosi naAroni eñilili mwitenti dakubulakena, edikilimu nawa ayikiswilili antu.+
Dichi, kulema kwaYehova kwamwekeni kudi antu+ ejima, 24 nawa kesi kafumini kudi Yehova+ nakwocha mulambu wakushita nimanji adiña hakameña. Antu ejima chamweniwu chumichi, atachikili kubidika nawa adinatili chamesu heseki.+
10 Chimwahitili mpinji, aNadabi naAbihu+ anyana kaAroni awamayala, anoneli yeña yakusendelahu kesi iwu nachindi iwu nachindi, ashilihu kesi nawa hakesi ashilihu insensi.+ Kuhiñahu, amulambwili Yehova kesi kabulili kuyitejawu,+ chuma chabuliliyi kuyileja nindi eli. 2 Hohenohu, kesi kafumini kudi Yehova nakuyocha+ nawa afwili kumesu aYehova.+ 3 Kufumahu, Mosi wamulejeli Aroni nindi: “Yehova nahoshi nindi, ‘Akunjilika kudi antu adi kwakwihi nanami+ nawa akunlemesha hamesu awantu ejima.’” Hakwila Aroni wamweneni kwanzo-o.
4 Dichi Mosi watambikili Mishayeli niElizafani anyana kaUziyeli,+ tata yaAroni wakansi, nawa wayilejeli nindi: “Twayenu kunu, sendenu awa amanakwenu muyifumishi mudinu iluña dajila, muyitwali kwiluña didi hanji yachilombu.” 5 Dichi enjili nawa asendeli nyijimba yanowu amayala afwili iku achidi munyinkukumba yawu nakuyitwala kwiluña dadiña hanji yachilombu neyi chayilejeliwu kudi Mosi.
6 Kuhiñahu, Mosi wamulejeli Aroni nianyanindi amakwawu awamayala aEleyazari naItamari nindi: “Bayi muleka nsuki yenu kuzakalala hela kutabola yakuvwala+ yenuku, kulonda mubuli kufwa nawa Nzambi yabuli kuhilila izaza dawantu dejima. Anakwenu amwitala daIsarela dejima akudila owu anajahiwu nakesi kudi Yehova. 7 Bayi mufuma kuwiñililu wakwitenti dakubulakenaku, mukunkulwayi mukufwa muloña manji akuwayisha nachu aYehova adi hadi enu.”+ Dichi elili kwesekeja namwayilejeliyi Mosi.
8 Kufumahu, Yehova wamulejeli Aroni nindi: 9 “Himwakenzaña mwitenti dakubulakena,+ eyi nianyaneyi awamayala bayi mwakanwa vinyu hela walwa wukwawuku, kulonda mwakabuli kufwa. Ilu hilushimbi lwahaya nyaaka lumwakalondelaña mumakiñu enu. 10 Chumichi chakwaambula nachu chuma chajila nachuma chabula kujila, chuma chamajilu nachuma chakadi majilu,+ 11 nikudizisha aIsarela nshimbi jejima jinayilejiyi Yehova kuhitila mudi Mosi.”+
12 Kuhiñahu, Mosi walejeli Aroni nianyanindi awamayala ashalilihu aEleyazari niItamari nindi: “Nonenu mulambu wambutu wunashalihu hanyilambu yaYehova yakwocha hakesi. Iwu mulambu wamankendi akadi iluñi muwudiili kwakwihi nakameña,+ muloña hichuma chajila chikupu.+ 13 Muwudiili mwiluña dajila,+ muloña hiiseka deyi nawa hiiseka dawanyaneyi awamayala kufuma hanyilambu yaYehova yakwocha hakesi. Muloña ichi dichinanlejiwu. 14 Cheñi, mukudiila ibwaambu damulambu wakuzuyañesha nimwendu weseka dajila+ mwiluña dawunyonji, eyi nianyaneyi awamayala niawambanda,+ muloña anakwinki yumiyi kwikala iseka deyi nawa iseka dawanyaneyi awamayala kufuma hanyilambu yakuwunda yawaIsarela. 15 Akuleta mwendu weseka dajila niibwaambu damulambu wakuzuyañesha hamu nanyilambu yamanji yakwocha hakesi, kulonda azuyañeshi iku niniku mulambu wakuzuyañesha kumesu aYehova. Chumichi chikwikala iseka dahaya nyaaka kudi eyi nikudi anyaneyi awamayala iwudi nawu+ neyi chinashimuniyi Yehova.”
16 Mosi wakeñakeñeli chikupu mpembi wamulambu wahanshidi+ ilaña wawanini anamwochi dehi. Dichi wayizuwilili aEleyazari naItamari, anyana kaAroni awamayala ashalilihu, nakuyila nindi: 17 “Muloñadi chimwabula kudiila chimuna wamulambu wahanshidi mwiluña dajila?+ Hichuma chajila chikupu nawa yena nayinki chumichi kulonda mwiikali namuloña wachiluwa chezaza dawantu nikuyibutila hanshidi jawu kumesu aYehova. 18 Talenu! Mashi anowu chimuna anayileti wanyi mwiluña dajila.+ Mwatelela kumudiila mwiluña dajila neyi chanlejawu.” 19 Aroni wamwakwili Mosi nindi: “Talaña! Dalelu alambula mulambu wawu wahanshidi nimulambu wawu wakushita kumesu aYehova,+ ilaña yumiyi yinammwekeni ami. Neyi dalelu nada mulambu wahanshidi, komana chumichi chadi kumuzañalesha Yehova?” 20 Mosi chatiyiliyi chumichi, wazañaleli.
11 Kuhiñahu, Yehova wayilejeli aMosi naAroni nindi: 2 “Lejenu aIsarela nenu, ‘Iyi diyileñaleña yayumi yahamaseki yimwatela* kuda:+ 3 Kanyama wejima waambuka yikwa chikupu niwabukulaña nakutafunya cheñi yakuda yadayi, mwatela kumuda.
4 “‘Ilaña awa anyama abukulaña nakutafunya cheñi yakuda yadawu hela owu aambuka yikwa, bayi muyidaku: ngameli, wabukulaña nakutafunya cheñi yadayi, ilaña wudi nayikwa yaambuka. Wamajilu kudi enu.+ 5 Nichibatata,+ muloña wabukulaña nakutafunya cheñi yakuda yadayi, ilaña wudana yikwa yaambuka. Wamajilu kudi enu. 6 Nikachinchi, muloña kabukulaña nakutafunya cheñi yakuda yikaada, ilaña kadana yikwa yaambuka. Kamajilu kudi enu. 7 Ningulu,*+ muloña wukweti yikwa yaambuka chikupu, ilaña habukulaña nikutafunya cheñi yakuda yadayiku. Wamajilu kudi enu. 8 Bayi muda mbiji yawu yidi yejima hela kukwata nyijimba yawanyama anafwiku. Amajilu kudi enu.+
9 “‘Iyi diyuma yamumenji yimunateli kuda: Chuma chejima chamumenji chikweti mazañu nimakalu, hela chamutuluñalwiji hela chamutuloña, munateli kuda tuhu.+ 10 Ilaña chuma chejima chamutuluñalwiji nimutuloña chabula mazañu nimakalu, chahayileñaleña yejima yendaña munyikanka-nyikanka nichahayileñaleña yikwawu yayumi yejima yekala* mumenji, hichuma chawuzondu kudi enu. 11 Chalala, yatela kwikala yawuzondu kudi enu nawa bayi muda mbiji yawu yidi yejimaku. Nyijimba yawu+ yafwa, mwatela kuyimona nenu yawuzondu. 12 Chuma chejima chamumenji chabula mazañu nimakalu, hichuma chawuzondu kudi enu.
13 “‘Iyi diyileñaleña yatuukaña yimukumonaña nenu yawuzondu; himwatela kuyidaku, muloña yawuzondu: mbuulu,+ nkwaji, ikubi wiyila,+ 14 chiyimbi wuchinana ninyichidi yejima yayiyimbi yiyila, 15 ninyichidi yejima yamakololu,* 16 nyamalanda, ikuñu, kasafu ninyichidi yejima yatukoji, 17 kapoñoji,* choyu, kawenjili, 18 iwunda, nkumbi, ikubi, 19 kakumbikumbi, nyichidi yejima yatunañampemba, susutenu nikatata. 20 Chileñaleña chejima chikweti mpuula chahayileñaleña* yendaña munyikanka-nyikanka nawa chendaña nanyendu yejima yiwana, hichuma chawuzondu kudi enu.
21 “‘Hayileñaleña yejima yendaña munyikanka-nyikanka yikweti mpuula nawa yendaña nanyendu yejima yiwana, mwatela kuda hohu yikweti nyendu yayilehi yakumotokelaku heseki. 22 Iyi diyuma yimwatela kuda: nyichidi yamboka-mboka yatuboola twatuukaña, tuboola tukwawu twadañawu,+ mazenzi nimpasu. 23 Yileñaleña yikwawu yejima yendaña munyikanka-nyikanka yikweti nyendu yiwana, hiyuma yawuzondu kudi enu. 24 Yumiyi yinateli kuyiletesha mwiikali amajilu. Muntu wejima wakakwata kuyibimbi yawu, wakekala wamajilu kushika nimelela.+ 25 Muntu wejima wakasenda yibimbi yawu, akakosi yakuvwala+ yindi; muntu yenowu wakekala wamajilu kushika nimelela.
26 “‘Kanyama wejima waambuka yikwa, ilaña yabula kwambuka chikupu nawa wabulaña kubukula nakutafunya cheñi yakuda yadayi, wamajilu kudi enu. Muntu wejima wakamukwata owu kanyama wakekala wamajilu.+ 27 Chileñaleña chejima chachumi chikweti makabu chahayileñaleña chendaña nanyendu yejima yiwana, chamajilu kudi enu. Muntu wejima wakakwata kuyibimbi yawu, wakekala wamajilu kushika nimelela. 28 Muntu wakasenda yibimbi yawu, akakosi yakuvwala+ yindi nawa muntu yenowu wakekala wamajilu kushika nimelela.+ Hiyanyama amajilu kudi enu.
29 Iyi diyileñaleña yakalabaña hamaseki yendaña munyikanka-nyikanka yamajilu kudi enu: mpumba, infwa,+ nyichidi yejima yanyinsulu, 30 munsulu, ibulu, musenvu, chitombu niiloñolu. 31 Iyi yileñaleña yendaña munyikanka-nyikanka yamajilu kudi enu.+ Muntu wakakwata kuyibimbi yawu, wakekala wamajilu kushika nimelela.+
32 “‘Dichi, chuma chejima hakaholokelawu hakufwa, chakekala chamajilu, hela hachipwepu chamutondu, hachakuvwala, hachitembi hela hachitabu chachisasa. Chipwepu chejima chakazatishawu, akachombeki mumenji nawa chakekala chamajilu kushika nimelela; kufumahu dinu chakekali chakadi majilu. 33 Neyi aholokela hachuma chewumba, ochu chuma mwakachifumpi nawa yuma yejima yadiña munochu chuma, yakekala yamajilu.+ 34 Yakuda yejima kwakasampukila menji akafuma munochu chipwepu, yakekala yamajilu, nawa yuma yejima yakunwa yidi munochu chipwepu, yakekala yamajilu. 35 Chuma chejima hakaholokela yibimbi yawu, chakekala chamajilu. Hela haoveni* hela hasitovu yanyanya,* akayibaluli muyikunku-yikunku. Yamajilu nawa yakatwalekahu kwikala yamajilu kudi enu. 36 Kaseloki nimwakuhembela menji dijakekala hohu jakadi majilu, ilaña wejima wakakwata kuyibimbi yawu, wakekala wamajilu. 37 Neyi yibimbi yawu yiholokela hambutu yinakukeña kutumbawu, oyu mbutu yakekala yakadi majilu. 38 Ilaña neyi menji ayisha haniyi mbutu nawa kachuma kadi kejima kakunyijimba yawu yafwa kaholokelahu, oyu mbutu yakekala yamajilu kudi enu.
39 “‘Dichi, neyi kanyama kimwadaña kafwa, muntu wejima wakakwata kumujimba wanoku kanyama, wakekala wamajilu kushika nimelela.+ 40 Muntu wejima wakada kumbiji yanoku kanyama kanafwi, akakosi yakuvwala yindi nawa wakekala wamajilu kushika nimelela.+ Muntu wejima wakasenda mujimba wanoku kanyama, akakosi yakuvwala yindi nawa wakekala wamajilu kushika nimelela. 41 Yileñaleña yejima yahamaseki yendaña munyikanka-nyikanka yawuzondu.+ Bayi muyidaku. 42 Bayi muda chileñaleña chidi chejima chendelaña hevumuku, hela kuda chileñaleña chendaña nanyendu yiwana hela yileñaleña yahamaseki yendaña munyikanka-nyikanka yikweti nyendu yayivulu nankashiku, muloña hiyuma yawuzondu.+ 43 Bayi mudilisha enu aweni* kwikala awuzondu nachileñaleña chejima chahayileñaleña yendaña munyikanka-nyikankaku, nawa bayi muditamisha enu aweni nakwikala amajilu muloña waniyi yileñaleñaku.+ 44 Muloña ami nidi Yehova Nzambi yenu+ nawa mwatela kudijilika nakwikala ajila+ muloña ami najila.+ Bayi muditamisha enu aweni* nachileñaleña chejima chahayileñaleña yendaña munyikanka-nyikanka hamasekiku. 45 Muloña yami Yehova wunakuyifumisha mwituña daEjipitu kulonda nidimwekeshi kwikala Nzambi kudi enu,+ nawa mwatela kwikala ajila+ muloña ami najila.+
46 “‘Ilu dilushimbi lwahosha hadi anyama, yileñaleña yatuukaña, chileñaleña chejima chachumi chendaña* mumenji nihayileñaleña yejima yendaña* hamaseki munyikanka-nyikanka, 47 kulonda hekali chaambu hakachi kachuma chamajilu nachakadi majilu nihakachi kayileñaleña yayumi yatela kudawu nanoyu yatela kubula kudawu.’”+
12 Yehova watwalekelihu nakumuleja Mosi nindi: 2 “Lejaku aIsarela neyi, ‘Neyi mumbanda emita ivumu nawa avwala mwana weyala, owu mumbanda wakekala wamajilu hadi mafuku 7 neyi chekalañayi wamajilu mumafuku ayañayi kukakweji.+ 3 Hefuku damu 8, owu mwana akamwalamisha+ kalomulomu kindi. 4 Wakatwalekahu kuditookesha kumashi hadi mafuku 33 akalondelahu. Hatela kukwata kuchuma chidi chejima chajilaku, nawa hatela kwinza mwiluña dajilaku, sampu namanishi dehi mafuku indi akuditookeshelamu.
5 “‘Neyi avwala mwana wamumbanda, wakekala wamajilu hadi mafuku 14 neyi chekalañayi wamajilu hayañayi kukakweji. Wakatwalekahu kuditookesha kumashi hadi mafuku 66 akalondelahu. 6 Neyi mafuku indi akuditookeshelamu amwana weyala hela wamumbanda anamani dehi, akaleti mwana kamukoku wachizamba wudi nachaaka chimu wamulambu wakushita+ nimwana kakapompa* hela kateela kamulambu wahanshidi kudi kapristu. Akaleti kuwiñililu wakwitenti dakubulakena. 7 Kapristu wakawulambula kumesu aYehova nakubuta hanshidi yanowu mumbanda nawa owu mumbanda wakekala wakadi majilu kukupweka mashi indi. Ilu dilushimbi lwamumbanda wunavwali mwana weyala hela wamumbanda. 8 Ilaña neyi wukutwesha wanyi kuhana mukoku, akahani tuteela tuyedi hela anyana katupompa* ayedi,+ kamu kamulambu wakushita nawa kakwawu kamulambu wahanshidi. Kuhiñahu, kapristu wakabuta hanshidi yanowu mumbanda nawa wakekala wakadi majilu.’”
13 Yehova watwalekelihu nakuyileja aMosi naAroni nindi: 2 Neyi muntu hekowa dindi hanana, hekala chitumbatumba hela iyaaji, nawa chibalumuka nakwikala musoñu wambumba*+ hamujimba windi, owu muntu atela kumutwala kudi kapristu Aroni hela kudi mwanindi wumu hadi anyanindi atupristu.+ 3 Kapristu wakachitalatala ochu chikatu chidi hekowa danowu muntu. Neyi wuvuji wudi hanochu chilonda wunabalumuki nakwikala wutooka nawa neyi ochu chikatu chinakumwekana neyi chinahanuki nankashi hekowa, dikwila nawu himusoñu wambumba. Kapristu wakawutalatala owu musoñu wudi nanowu muntu nakumuleja nindi wudi namajilu. 4 Ilaña neyi iyaaji didi hekowa dindi ditooka nawa dinakunami wanyi kubadika hekowa nawa wuvuji hiwunabalumuki nakwikala wutookaku, dikwila nawu kapristu wakamutwala owu muntu wakata kwakankawindi hadi mafuku 7.+ 5 Kuhiñahu, kapristu wakamutalatala hefuku damu 7 nawa neyi awana nindi ochu chikatu chinamani nawa hichinataandi hekowaku, kapristu wakamutwala owu muntu kwakankawindi hadi mafuku amakwawu 7.
6 “Kapristu akamutalatali cheñi hefuku damu 7, neyi ochu chikatu chinajimañani nawa hichinataandi hekowaku, kapristu wakamutena owu muntu nindi wakadi majilu;+ dikwila nawu chadiña hohu chitumbutumbu. Kuhiñahu, owu muntu wakakosa yakuvwala yindi nakwikala wakadi majilu. 7 Ilaña neyi chitumbutumbu chitaanda* chikupu hekowa dindi hanyima yakudimona nakapristu kulonda amumoni neyi wutooka, owu muntu akadimoni cheñi* nakapristu. 8 Kapristu wakamutalatala nawa neyi chitumbutumbu chinataandi hekowa dindi, kapristu wakamutena owu muntu nindi wamajilu. Himbumba.+
9 Neyi musoñu wambumba wunamukwati muntu, atela kumuleta kudi kapristu, 10 nawa kapristu wakamutalatala.+ Neyi hekowa hananani chuma chitooka chinaleteshi wuvuji kutooka nawa ohu hananani+ hadi chilonda, 11 dikwila nawu himbumba yakabula kumana hekowa dindi, nawa kapristu wakamutena owu muntu nindi wamajilu. Bayi amutwala kwakankawindiku,+ muloña wamajilu. 12 Neyi mbumba yitaanda hekowa dejima nawa oyu mbumba yimukwata muntu kufuma kumutu nakushika kunyendu chakwila nikapristu nateli kumona, 13 nawa kapristu namutalatali dehi nawa namoni nindi mbumba yinataandi hekowa dindi dejima, kapristu wakamutena owu muntu wakata nindi wakadi majilu.* Mbumba yejima yinabalumuki dehi yitooka nawa nekali wakadi majilu. 14 Ilaña neyi hekowa hekala chilonda, owu muntu wakekala wamajilu. 15 Neyi kapristu amona ochu chilonda, wakamutena owu muntu nindi wamajilu.+ Ochu chilonda chamajilu. Himbumba.+ 16 Ilaña neyi ochu chilonda chibalumuka nakwikala chitooka, owu muntu wakenza cheñi kudi kapristu. 17 Kapristu wakamutalatala+ nawa neyi ochu chikatu chinabalumuki nakwikala chitooka, kapristu wakamutena owu muntu wakata nindi wudana majilu. Wakadi majilu.
18 Neyi muntu ekala nehuti hekowa dindi nawa dimana, 19 ilaña mwadiña ihuti munana chuma chitooka hela iyaaji dachiluluka, owu muntu watela kuya nakudimona nakapristu. 20 Kapristu wakatalatala+ ochu chuma, neyi chinahanuki hekowa nawa wuvuji wudihu wunatooki, kapristu wakamuleja owu muntu nindi wamajilu. Himusoñu wambumba wunedikili mwihuti. 21 Ilaña neyi kapristu atalatala ochu chuma nawa amona nindi hosi wuvuji wutooka, hichinahanuki hekowaku, nawa chinakumwekana kujimañana, kapristu wakamutwala owu muntu kwakankawindi hadi mafuku 7.+ 22 Nawa neyi chinataandi chikupu hekowa, kapristu wakamutena owu muntu nindi wamajilu. Himusoñu. 23 Ilaña neyi iyaaji diikala hohu heluña dimu nawa hidinataandiku, dikwila nawu hichuma hohu chinedikili hehuti nawa kapristu wakamutena owu muntu nindi wakadi majilu.+
24 “Hela neyi muntu wukweti chibata chakesi nawa mbiji yahachibata yibalumuka nakwikala iyaaji dachiluluka hela ditooka, 25 kapristu wakachitalatala. Neyi wuvuji wudi heyaaji wunabalumuki nakwikala wutooka nawa odu iyaaji dinakunami kubadika hekowa, dikwila nawu himbumba yinedikili muchibata nawa kapristu wakamutena owu muntu nindi wamajilu. Himusoñu wambumba. 26 Ilaña neyi kapristu achitalatala, amona nindi heyaaji hosi wuvuji wutooka nawa hidinakunami kubadika hekowaku nawa dinajimañani, kapristu wakamutwala owu muntu kwakankawindi hadi mafuku 7.+ 27 Kapristu wakamutalatala owu muntu hefuku damu 7 nawa neyi dinataandi chikupu hekowa, kapristu wakamutena owu muntu nindi wamajilu. Himusoñu wambumba. 28 Ilaña neyi iyaaji diikala hohu heluña dimu nawa hidinataandi hekowaku nawa dinajimañani, dikwila nawu hichibata hohu chinanani. Kapristu wakamutena owu muntu nindi wakadi majilu muloña hichuma hohu chinedikili hachibata.
29 “Neyi muntu weyala hela wamumbanda ekala nachikatu kumutu hela kukalevu, 30 kapristu wakachitalatala ochu chikatu.+ Neyi chinahanuki hekowa nawa nsuki yibalumuka wulombu wansela nikupepela, kapristu wakamutena owu muntu nindi wamajilu; hichikatu chahekowa dakumutu hela chakuwevu. Himbumba yakumutu hela yakukalevu. 31 Ilaña neyi kapristu amona nindi ochu chikatu hichinahanuki hekowaku nawa hosi nsuki yiyila, kapristu wakamutwala owu muntu wakata kwakankawindi hadi mafuku 7.+ 32 Hefuku damu 7, kapristu wakatalatala hanochu chikatu. Neyi ochu chikatu chinataandi wanyi nawa hosi nsuki yawulombu wansela nawa ochu chikatu chinahanuki wanyi kubadika hekowa, 33 owu muntu watela kutewula, ilaña ohu hadi chikatu bayi atewulahuku. Kuhiñahu, kapristu wakamutwala owu muntu wakata kwakankawindi hadi mafuku 7.
34 “Kapristu wakatalatala cheñi ohu hadi ochu chikatu hefuku damu 7 nawa neyi ochu chikatu chahekowa dakumutu hela chakuwevu hichinataandiku, nawa chinahanuki wanyi kubadika hekowa, kapristu wakamutena owu muntu nindi wakadi majilu nawa watela kukosa yakuvwala yindi nakwikala wakadi majilu. 35 Ilaña neyi chikatu chitaanda chikupu hekowa hanyima yakumutookesha, 36 kapristu wakamutalatala owu muntu, nawa neyi chikatu chinataandi hekowa, kapristu bayi akeñakeña nsuki yawulombu wanselaku; owu muntu wamajilu. 37 Ilaña neyi awana nindi ochu chikatu chinataandi wanyi nawa hanameni nsuki yiyila, dikwila nawu ochu chikatu chinamani. Owu muntu wakadi majilu nawa kapristu wakamutena nindi wakadi majilu.+
38 “Neyi muntu weyala hela wamumbanda ekala namayaaji hekowa* nawa owu mayaaji atooka, 39 kapristu wakayitalatala.+ Neyi owu mayaaji adi hekowa atookoloka, dikwila nawu hiyuma yabula kufwana yinasaluki hekowa. Owu muntu wakadi majilu.
40 “Neyi muntu weyala apeleka nsuki kumutu nawa ekala nebala, owu muntu wakadi majilu. 41 Neyi muntu weyala apeleka nsuki hambidi yamutu windi nawa hekala ibala, owu muntu wakadi majilu. 42 Neyi chilonda chachiluluka chitumba mwibala hekowa dakumutu windi hela hehama dindi, dikwila nawu himbumba yinedikili hekowa dakumutu windi hela hehama dindi. 43 Kapristu wakamutalatala, neyi mwibala danowu muntu hela hehama dindi hanana nikuchiluluka muloña wachikatu nawa chinakumwekana neyi mbumba hekowa dindi, 44 dikwila nawu himukambumba. Owu muntu wamajilu nawa kapristu wakamutena owu muntu nindi wamajilu muloña wamusoñu wudi kumutu windi. 45 Kutalisha kudi muntu wudi namusoñu wambumba, yakuvwala yindi akayitaboli, kumutu windi kwakekali kwazakalala nawa akabuti hawevu windi wahamahembelu nakubidika nindi, ‘Majilu, majilu!’ 46 Wakekala wamajilu hampinji yejima yakekalayi namusoñu. Chineli owu muntu wamajilu, watela kushakama kwakankawindi. Wakashakamaña hanji yachilombu.+
47 Neyi musoñu wambumba wutamisha chakuvwala, hela hichakuvwala chakutuña nawanda hela chehina, 48 chili wanda wakusowashana kuchakuvwala hela wanda wamavuji hela chitembi hela chuma chidi chejima chakutuña nachitembi, 49 hela neyi ikeñeji dawulombu wunakumwekana neyi wansela iku neyi mafu amatamba hela dichinana chanti damusoñu ditamisha chakuvwala, chitembi, hela wanda wakuchakuvwala chakusowashana hela chuma chidi chejima chakutuña nachitembi, dikwila nawu hichuma chinatamishiwu nambumba nawa atela kuchitwala kudi kapristu. 50 Kapristu wakawutalatala owu musoñu nawa ochu chuma chinatami namusoñu akachitwali kwakankawachu hadi mafuku 7.+ 51 Neyi nawutalatali dehi owu musoñu hefuku damu 7 nawa awana nindi wunataandi kuchakuvwala, kuwanda wakuchakuvwala chakusowashana hela kuchitembi (hichikweti muloña namudimu wanochu chitembiku), owu musoñu himbumba yasambukilaña nawa wamajilu.+ 52 Kapristu akwochi ochu chakuvwala hela wanda wakuchakuvwala chakusowashana hela wanda wamavuji hela ihina hela chuma chidi chejima chakutuña nachitembi. Atela kuchocha mukesi.
53 “Ilaña neyi kapristu achitalatala nawa awana nindi musoñu wunataandi wanyi kuchakuvwala hela kuwanda wakuchakuvwala chakusowashana hela kuchuma chidi chejima chakutuña nachitembi, 54 dichi, kapristu wakayileja nindi akosi chuma chinatamishiwu nawa wakachitwala kwakankawachu hadi mafuku amakwawu 7. 55 Kufumahu, kapristu wakatalatala chuma chinakoweli hanyima yakuchikosa chikupu. Neyi ohu hanakoweli hanatooki wanyi, hela chakwila owu musoñu wunataandi wanyi, ochu chuma chakekala chamajilu. Mwatela kuchocha hakesi muloña chinadikewi, hela mukachi hela hanji.
56 “Ilaña neyi kapristu nachitalatali nawa hakowela hanajimañani hanyima yakuchikosa chikupu, akatabuli odu ikeñeji damusoñu didi hachakuvwala hela hachitembi hela hawanda wakuchakuvwala chakusowashana. 57 Hela chochu, neyi dichidi kumwekena kukabadi kakwawu kachakuvwala hela hawanda wakuchakuvwala chakusowashana hela hachuma chidi chejima chakutuña nachitembi, dikwila nawu dinakutaanda nawa watela kwocha hakesi+ chuma chidi chejima chinakoweli. 58 Ilaña neyi ikeñeji damusoñu dijimañana kuchakuvwala hela kuwanda wakuchakuvwala chakusowashana hela kuchuma chidi chejima chiwakosa, chatela kukosewa kamuchiyedi nawa chakekala chakadi majilu.
59 “Ilu dilushimbi lwahosha hamusoñu wambumba wudi kuchakuvwala chamavuji hela chehina hela kuwanda wakuchakuvwala chakusowashana hela kuchuma chidi chejima chakutuña nachitembi kulonda achiteni nawu chakadi majilu hela chamajilu.”
14 Yehova watwalekelihu kumuleja Mosi nindi: 2 “Ilu dilushimbi lwahosha hamuntu wudi nambumba lwakalondelañawu hefuku dakamuletawu kudi kapristu+ kulonda yamutookeshi. 3 Kapristu wakaya hanji yachilombu nakumutalatala owu muntu. Neyi owu mukwambumba anamuuki dehi, 4 kapristu wakamuleja owu muntu kuleta tuda tuyedi twatumi twakadi majilu, mutondu wamusida, wanda wuchinana nge-e nihisopi* yakumutookesha nachu.+ 5 Kapristu wakayileja nindi kada kamu akakijahili muchipwepu chewumba hewulu damenji anafumi tuhu nakutehunawu. 6 Ilaña akanoni kada kakumi hamu namutondu wamusida, nawanda wuchinana nge-e nihisopi nakujitumpika mumashi akada kiyajahilawu hewulu damenji anafumi tuhu nakutehunawu. 7 Kuhiñahu, owu muntu wunakuditookesha kumbumba wakamusampwila mashi mapampa 7 nakumutena nindi wakadi majilu, nawa oku kada kakumi wakakuumbaku kulonda kakayi mumpata.+
8 “Muntu wunakuditookesha akakosi yakuvwala yindi, akatewuli nsuki yindi yejima niwuvuji wejima hamujimba windi nikuwela mumenji, nawa wakekala wakadi majilu. Kuhiñahu, wakenza muchilombu, ilaña wakashakama hanji yetenti dindi hadi mafuku 7. 9 Hefuku damu 7, wakatewula nsuki yindi yejima, wevu wakukalevu ninkuñu. Neyi neli dehi mwenimu, wakakosa yakuvwala yindi nikuwela mumenji nawa wakekala wakadi majilu.
10 “Hefuku damu 8, wakanona anyana kanyikoku ayizamba ayedi akadi ihuji, mwana kamukoku wamukaji+ wumu wakadi ihuji wachaaka chimu, yipimu yisatu yamwikumi yaifa* yawuña wawuwahi walembuluka wakubomba namanji kwikala mulambu wambutu+ nilogu* yimu yamanji.+ 11 Nawa kapristu wakamutena owu muntu wunakuditookesha nindi wakadi majilu, diyi wakamutwala hamu nanyilambu kumesu aYehova kuwiñililu wakwitenti dakubulakena. 12 Kapristu wakasenda mwana kamukoku wachizamba wumu nilogu yimu yamanji nakuyilambula kwikala mulambu wamuloña+ nawa wakayizuyañesha iku niniku kulonda wakekali mulambu wakuzuyañesha kumesu aYehova.+ 13 Kuhiñahu, wakajahila mwana kamukoku wachizamba mwiluña dajila mwajahilañawu+ mulambu wahanshidi nimulambu wakushita, muloña mulambu wamuloña wakekala wakapristu+ neyi chochekala mulambu wahanshidi. Hichuma chajila chikupu.+
14 “Kufumahu, kapristu wakanonahu mashi achimuna chamulambu wamuloña nakuyilamba kwishina deetu danowu muntu wunakuditookesha nikwidimbanu dakuchikasa chindi chachidiilu nikwidimbanu dakumwendu windi wachidiilu. 15 Nawa kapristu wakanonahu manji+ nilogu yimu yamanji nakuyihuñunwina muchikasa chindi chachimunswa. 16 Kuhiñahu, kapristu wakatumpika munu windi wakuchidiilu mumanji adi muchikasa chindi chachimunswa nakusampula manji amakwawu mapampa 7 namunu windi kumesu aYehova. 17 Kufumahu, kapristu wakanonahu manji akashala muchikasa chindi nakuyilamba kwishina deetu dakuchidiilu danowu muntu wunakuditookesha nikwidimbanu dakuchikasa chindi chachidiilu nikwidimbanu dakumwendu windi wachidiilu hewulu damashi amulambu wamuloña. 18 Kapristu wakanona manji amakwawu akashala muchikasa chindi nakuyilamba hamutu wanowu muntu wunakuditookesha nawa kapristu wakabuta hanshidi yanowu muntu kumesu aYehova.+
19 “Kapristu wakalambula mulambu wahanshidi+ nikubuta hanshidi yanowu muntu wunakuditookesha kumajilu indi. Kuhiñahu, wakajaha chimuna chamulambu wakushita. 20 Kufumahu, kapristu wakalambula hakameña mulambu wakushita nimulambu wambutu+ nikubuta hanshidi yanowu muntu+ nawa wakekala wakadi majilu.+
21 “Hela chochu, neyi hikazweñi nawa hakweti yuma yayivuluku, akaleti mwana kamukoku wachizamba wumu akekali mulambu wamuloña wamulambu wakuzuyañesha kulonda akadibutili hanshidi yindi, nawa akaleti chipimu chamwikumi chaifa* chawuña wawuwahi walembuluka wakubomba namanji kulonda wakekali mulambu wambutu, logu yimu yamanji, 22 nituteela tuyedi hela anyana katupompa* ayedi kwesekeja nayuma yikwetiyi. Kada kamu kakekala kamulambu wahanshidi nawa kakwawu kakekala kamulambu wakushita.+ 23 Hefuku damu 8,+ akayileti kuwiñililu wakwitenti dakubulakena kumesu aYehova+ kulonda kapristu akamutookeshi.
24 “Kapristu wakanona mwana kamukoku wachizamba wamulambu wahanshidi+ nilogu yimu yamanji nawa kapristu wakayizuyañesha iku niniku kulonda yakekali mulambu wakuzuyañesha kumesu aYehova.+ 25 Kufumahu, kapristu wakajaha mwana kamukoku wachizamba wamulambu wamuloña, nawa kapristu wakanonahu mashi amulambu wamuloña nakuyilamba kwishina deetu danowu muntu wunakuditookesha nikwidimbanu dakuchikasa chindi chachidiilu nikwidimbanu dakumwendu windi wachidiilu.+ 26 Kapristu wakahuñunwina manji amakwawu muchikasa chindi chachimunswa,+ 27 nawa wakasampula manji amakwawu adi muchikasa chindi chachimunswa mapampa 7 namunu windi wachidiilu kumesu aYehova. 28 Kufumahu, kapristu wakanonahu manji adi muchikasa chindi nakuyilamba kwishina deetu dakuchidiilu danowu muntu wunakuditookesha nikwidimbanu dakuchikasa chindi chachidiilu nikwidimbanu dakumwendu windi wachidiilu hamaluña wowamu hashayi mashi amulambu wamuloña. 29 Kuhiñahu, kapristu wakanona manji amakwawu akashala muchikasa chindi nakuyilamba hamutu wanowu muntu wunakuditookesha kulonda yakamubutili hanshidi yindi kumesu aYehova.
30 “Hanotu tuda, akalambulihu kateela kamu hela mwana kakapompa* wumu kwesekeja nayuma yikwetiyi,+ 31 yuma yinateli kuhanayi kwikala mulambu wahanshidi nawa yikwawu kwikala mulambu wakushita+ hamu namulambu wambutu. Kuhiñahu, kapristu wakabuta hanshidi yanowu muntu wunakuditookesha kumesu aYehova.+
32 “Ilu dilushimbi lwahosha hamuntu wadiña namusoñu wambumba, ilaña hakweti yuma yatela kuhanayi kulonda amutookeshi nachuku.”
33 Kuhiñahu, Yehova wayilejeli aMosi naAroni nindi: 34 “Chimwakashika mwituña daKenani+ dinnakuyinka diikali iheta+ denu nawa nitamisha itala didi mwituña denu namusoñu wambumba,+ 35 mwini odu itala watela kwinza kudi kapristu nakumuleja nindi, ‘Mwitala dami mudi yuma yimu yinakumwekana neyi musoñu.’ 36 Kapristu wakahana nshimbi yakuwahisha odu itala henohu kanda enzi nakuwutalatala owu musoñu kulonda yakabuli kutena yuma yejima yidi munodu itala nindi yamajilu. Hanyima yachumichi, dihakeñilayi kapristu mwitala nakuditalatala. 37 Wakatalatala heluña hadi musoñu, nawa neyi hambañu janodu itala hadi makeñeji awulombu wunakumwekana neyi wansela iku neyi mafu amatamba hela ohu hanapokoki hanakumwekana kuchinana chanti nawa hanakunami kubadika hambañu, 38 kapristu wakedika munodu itala nakuya kuchiisu chetala nawa wakenzela kunodu itala hadi mafuku 7.+
39 “Kufumahu, wakafunta hefuku damu 7 nakutalatala odu itala. Neyi chakwila owu musoñu wunataandi hambañu jetala, 40 kapristu wakahana nshimbi yakufumisha malola anatamishiwu nakuyinatila hanji yamusumba kwiluña damajilu. 41 Kuhiñahu, wakayileja nindi akooli chachiwahi mukachi ketala nawa ndaaka jiyakakoolamu, akajinatili hanji yamusumba kwiluña damajilu. 42 Kufumahu, akashamu malola acheñi mumapwata mwakafumishawu owu malola nawa yakasoti itala kuzatisha ndaaka yacheñi.
43 “Ilaña neyi owu musoñu wufunta cheñi mwitala hanyima yakufumisha malola, kukoola itala nikudisota chachiha, 44 kapristu wakeñilamu nakutalatalamu. Neyi musoñu wunataandi mwitala, dikwila nawu mwitala mudi mbumba+ yasambukilaña. Odu itala damajilu. 45 Kuhiñahu, odu itala akadisanda, dikwila nawu malola adu, nyitondu yadu nindaaka yejima yakwitala, nawa akajinatila hanji yamusumba kwiluña damajilu.+ 46 Ilaña muntu wejima wakeñila munodu itala mumafuku anadenzeliwu,+ wakekala wamajilu kushika nimelela.+ 47 Nimuntu wejima wakakaama munodu itala, akakosi yakuvwala yindi nawa wejima wakadiila munodu itala, akakosi yakuvwala yindi.
48 “Hela chochu, neyi kapristu enza nawa amona nindi musoñu wunataandi wanyi mwitala hanyima yakusota odu itala chachiha, kapristu wakatena odu itala nindi dakadi majilu muloña musoñu wunamani. 49 Hakwila nawu atookeshi itala kumusoñu,* watela kuleta tuda tuyedi, mutondu wamusida, wanda wuchinana nge-e nihisopi.*+ 50 Kada kamu, akakijahili muchipwepu chewumba hewulu damenji anafumi tuhu nakutehunawu. 51 Kuhiñahu, wakanona kada kakumi hamu namutondu wamusida, hisopi* niwanda wuchinana nge-e nakujitumpika mumashi akada kajahawu nimumenji anafumi tuhu nakutehunawu, nawa akayisampwili kwitala mapampa 7.+ 52 Kuhiñahu, wakatookesha odu itala kumusoñu,* namashi akada, namenji anafumi tuhu nakutehunawu, nakada kakumi, namutondu wamusida, nahisopi* ninawanda wuchinana nge-e. 53 Kufumahu, wakakuumbaku oku kada kakumi hanji yamusumba kulonda kakayi mumpata nawa wakabuta hanshidi yanodu itala nawa dakekala dakadi majilu.
54 “Ilu dilushimbi lwahosha hamusoñu wambumba wudi wejima, chikatu chekowa dakumutu hela kuwevu,+ 55 mbumba yakuchakuvwala+ hela yamwitala,+ 56 nikutalisha hakunana, yitumbatumba nimayaaji,+ 57 lwakwilukilaku neyi chuma chamajilu indi kwiji chakadi majilu.+ Ilu hilushimbi lwahosha hambumba.”+
15 Yehova watwalekelihu kuyileja aMosi naAroni nindi: 2 “Hoshenu nawaIsarela muyileji nenu, ‘Neyi kudi iyala wunakuvwa yuma kuchiidi chindi chalusemu,* oyu yinakuvwa yikumuletesha kwikala wamajilu.+ 3 Nekali wamajilu muloña wanoyu yuma, hela yinatwalekihu kuvwa kuyiidi yindi hela yinaleki, owu muntu wuchidi wamajilu.
4 “‘Kadidi kejima hakakaamayi owu muntu wunakuvwa oyu yuma, kakekala kamajilu, nawa hejima hakashakamayi, hakekala hamajilu. 5 Muntu wakakwata kukadidi kanowu iyala, akakosi yakuvwala yindi, akaweli mumenji nawa akekali wamajilu kushika nimelela.+ 6 Muntu wejima wakashakama hachuma hashakamayi owu muntu wukweti yuma yinakuvwa, akakosi yakuvwala yindi, akaweli mumenji nawa akekali wamajilu kushika nimelela. 7 Muntu wejima wakakwata hamujimba wanowu muntu wukweti yuma yinakuvwa, akakosi yakuvwala yindi, akaweli mumenji nawa akekali wamajilu kushika nimelela. 8 Neyi owu muntu wukweti yuma yinakuvwa afwijila mazeñi muntu wakadi majilu, owu muntu anafwijiliwu, akakosi yakuvwala yindi, akaweli mumenji nawa akekali wamajilu kushika nimelela. 9 Chakushakamahu hakanyama chidi chejima hakashakamayi owu muntu wukweti yuma yinakuvwa, chakekala chamajilu. 10 Muntu wejima wakakwata kuchuma hashakamayi owu muntu, wakekala wamajilu kushika nimelela. Nawa muntu wejima wakasenda oyu yuma, akakosi yakuvwala yindi, akaweli mumenji nawa akekali wamajilu kushika nimelela. 11 Neyi muntu wukweti yuma yinakuvwa+ naweli wanyi kumakasa indi namenji nawa akwata mukwawu, owu anakwatiwu akakosi yakuvwala yindi, akaweli mumenji nawa akekali wamajilu kushika nimelela. 12 Chipwepu chewumba kwakakwata owu muntu wukweti yuma yinakuvwa, akachifumpi, nichipwepu chidi chejima chamutondu akachikosi namenji.+
13 “‘Neyi oyu yuma yavwaña yinaleki nawa owu muntu ekala wakadi majilu kunoyu yuma, kuhiñahu, akachindi mafuku 7 akuditookeshelamu, akakosi yakuvwala yindi, akaweli mumenji anafumi tuhu nakutehunawu nawa wakekala wakadi majilu.+ 14 Hefuku damu 8, akanoni tuteela tuyedi hela anyana katupompa*+ ayedi nakuya kumesu aYehova kuwiñililu wakwitenti dakubulakena nawa akatuhani kudi kapristu. 15 Dichi kapristu wakatulambula otu tuda, kamu kakekala kamulambu wahanshidi nawa kakwawu kakekala kamulambu wakushita. Kuhiñahu, kapristu wakabuta hanshidi yanowu muntu kumesu aYehova kutalisha hanoyu yuma yinakuvwayi.
16 “‘Dichi neyi iyala adimwañila mbutu yalusemu, akaweli mujimba wejima mumenji nawa akekali wamajilu kushika nimelela.+ 17 Akakosi namenji chakuvwala chidi chejima nichitembi chidi chejima kunamwañikili mbutu yalusemu, nawa chakekala chamajilu kushika nimelela.
18 “‘Neyi iyala akaama namumbanda nawa amwaña mbutu yalusemu, wejima wawu ayedi akaweli mumenji nawa akekali amajilu kushika nimelela.+
19 “‘Neyi mumbanda nakuvwa mashi kumujimba windi muloña wakuya kukakweji, wakekala wamajilu hadi mafuku 7.+ Muntu wejima wakamukwata, wakekala wamajilu kushika nimelela.+ 20 Chuma chejima hakakaamayi owu mumbanda hakekalayi kukakweji, chakekala chamajilu, nawa hejima hakashakamayi hakekala hamajilu.+ 21 Muntu wejima wakakwata kukadidi kanowu mumbanda, akakosi yakuvwala yindi, akaweli mumenji nawa akekali wamajilu kushika nimelela. 22 Muntu wejima wakakwata kuchuma hashakamayi, akakosi yakuvwala yindi, akaweli mumenji nawa akekali wamajilu kushika nimelela. 23 Neyi washakama hakadidi hela hachuma chacheñi, iyala wakakwataku wakekala wamajilu kushika nimelela.+ 24 Nawa neyi muntu weyala akaama nindi nawa mashi anowu mumbanda wudi kukakweji amukwata,+ wakekala wamajilu hadi mafuku 7, nawa kadidi kejima hakakaamayi kakekala kamajilu.
25 “‘Neyi mumbanda nakupweka mashi hadi mafuku amavulu + henohu diyi mpinji yayañayi kukakweji+ wanyi, hela neyi apweka mashi hadi mpinji yayilehi kubadika yayilañamu kukakweji, wakekala wamajilu hadi mafuku ejima akapwekañayi mashi neyi chekalañayi wamajilu hayañayi kukakweji. 26 Kadidi kejima hakakaamayi mumafuku akapwekañayi, kakekala neyi kadidi hakaamañayi neyi wudi kukakweji.+ Nawa chuma chejima hakashakamayi, chakekala chamajilu neyi chichekalaña mumpinji yayañayi kukakweji. 27 Muntu wejima wakakwata kuyumiyi, wakekala wamajilu nawa akakosi yakuvwala yindi, akaweli mumenji nawa akekali wamajilu kushika nimelela.+
28 “‘Hela chochu, neyi owu mumbanda aleka kupweka mashi, akachindi mafuku 7 kufuma hefuku dinalekiyi kupweka, kuhiñahu dihakekalayi wakadi majilu.+ 29 Hefuku damu 8, akasendi tuteela tuyedi hela anyana katupompa*+ ayedi nakuyitwala kudi kapristu kuwiñililu wakwitenti dakubulakena.+ 30 Kapristu wakalambula kada kamu kakekali mulambu wahanshidi nawa kakwawu kakekala kamulambu wakushita. Kuhiñahu, kapristu wakabuta hanshidi yanowu mumbanda kumesu aYehova kutalisha hayuma yinakuvwayi.+
31 “‘Dichi, mwakayikwashi aIsarela kwikala akadi majilu kulonda akabuli kufwa muloña wakutamisha tabanaka yami yidi mukachi kawu.+
32 “‘Ilu dilushimbi lwahosha hadi iyala wukweti yuma yinakuvwa, iyala wukweti majilu muloña wakudimwañila mbutu yalusemu,+ 33 mumbanda wudi namajilu akukakweji,+ iyala wudi wejima hela mumbanda wukweti yuma yinakuvwa kumujimba+ windi niiyala wakakaama namumbanda wamajilu.’”
16 Yehova wahosheli naMosi chelili anyana kaAroni awamayala anafwi dehi owu afwili muloña wakuswina kwakwihi naYehova.+ 2 Yehova wamulejeli Mosi nindi: “Muleji manakweyi Aroni neyi hatela kwinza kala mpinji mwiluña dajila+ didi mukachi kehina dakujika nachu+ kumbidi yachifwiku chakujika haChimbañuku, mukunkulwayi wakenda kafwa,+ muloña ami nakamwekana mwivu+ hewulu dachifwiku.+
3 “Iyi diyuma yatela kusendayi Aroni hakenzayi mwiluña dajila: mwana kañombi wachizamba wamulambu wahanshidi+ nimukoku wachizamba wamulambu wakushita.+ 4 Akavwali munkukumba wajila wehina,+ kaputula kehina+ kakubuta* hamujimba windi,* akadikasi muya wehina+ nawa akavwali kumutu windi chitambala chehina.+ Hiyakuvwala yajila.+ Akaweli mumenji+ nakuyivwala.
5 “Akatambuli kudi izaza dawaIsarela+ anyana kampembi ayizamba ayedi amulambu wahanshidi nimwana kamukoku wachizamba wamulambu wakushita.
6 “Kuhiñahu, Aroni akalambuli ñombi wachizamba wamulambu wahanshidi yindi, nawa akabuti hanshidi yindi+ niyaamwitala dindi.
7 “Wakanona cheñi ampembi ayedi nakuyimika kumesu aYehova kuwiñililu wakwitenti dakubulakena. 8 Aroni wakasakula owu ampembi ayedi kuzatisha yinjikijilu, chinjikijilu chimu chakekala chaYehova nawa chinjikijilu chikwawu chakekala chaAzazeli.* 9 Aroni wakalambula owu mpembi anasakuliwu nachinjikijilu+ chaYehova nakumwilisha kwikala mulambu wahanshidi. 10 Ilaña mpembi akasakulawu nachinjikijilu chaAzazeli, akamutwali wamumi nakumwimika kumesu aYehova kulonda akabutilihu nshidi, kuhiñahu, mpembi waAzazeli akamuumbiku yakayi mwisaña.+
11 “Aroni wakaleta ñombi wachizamba wahanshidi yindi nikubuta hanshidi yindi niyaamwitala dindi. Kufumahu, wakajaha owu ñombi wachizamba wahanshidi yindi.+
12 “Kuhiñahu, wakanona cheña chakusendelahu kesi+ nakwinzeshahu makala akesi ahakameña+ kumesu aYehova ninyikonu yiyedi yenzala yainsensi yevumba dadiwahi,+ nawa wakajileta mukachi kehina dakujika nachu.+ 13 Wakasha cheñi insensi hakesi kumesu aYehova+ nawa wishi wainsensi wakakakumuka nakubuta hachifwiku+ chaChimbañu chaWunsahu+ kulonda akabuli kufwa.
14 “Wakanonahu mashi+ añombi wachizamba nakuyisampwila kumbidi yachifwiku namunu windi kukabadi kakumusela, nawa wakasampwila mashi amu kumbidi yachifwiku+ namunu windi mapampa 7.
15 “Kuhiñahu, wakajaha mpembi wamulambu wahanshidi yawantu,+ wakaleta mashi anowu mpembi mukachi kehina dakujika nachu+ nawa owu mashi+ wakayila neyi chelayi namashi añombi wachizamba; wakayisampwila kumbidi yachifwiku.
16 “Akabuti hanshidi yeluña dajila muloña wayilwilu yamajilu yawaIsarela nihamuloña wayiluwa ninshidi jawu,+ nawa ichi dichatela kwilayi ninetenti dakubulakena didi mukachi kawu muloña wayilwilu yawu yamajilu.
17 “Hakeñilañayi Aroni mwiluña dajila nakubuta hanshidi sampu nichakedikamu, mwitenti dakubulakena bayi mwakekala muntu mukwawuku. Wakabuta hanshidi yindi, yaamwitala dindi+ nichipompelu chawaIsarela+ chejima.
18 “Kuhiñahu, wakedika nakuya kukameña+ kadi kumesu aYehova, nawa wakabuta hanshidi yaku. Kufumahu, wakanonahu mashi añombi wachizamba nimashi amakwawu ampembi nakuyilamba kunseñu jakameña kutubadi twejima. 19 Nawa wakasampwila kukameña mashi amu namunu windi mapampa 7, kukitookesha nikukijilika kuyilwilu yamajilu yawaIsarela.
20 “Neyi amanisha kubuta hanshidi+ yeluña dajila, yetenti dakubulakena niyakameña,+ wakalambula nimpembi+ wamumi. 21 Aroni wakanañika makasa indi ejima ayedi hamutu wanowu mpembi wamumi nakushimwinahu yiluwa yejima yawaIsarela, nyiloña yawu yejima ninshidi jawu jejima, nawa wakajisha hamutu wanowu mpembi+ nakumutwala mwisaña kudi iyala akatondawu kwila mwenomu.* 22 Mpembi wakasenda yiluwa+ yawu yejima nakuyitwala muchinkalampata+ nawa owu iyala wakamuumbaku mpembi kulonda akayi mwisaña.+
23 “Kuhiñahu, Aroni wakeñila mwitenti dakubulakena nawa wakavuula yakuvwala yehina yavwalayi heñilayi mwiluña dajila nawa wakayitenteka mwenomu heseki. 24 Akaweli* mumenji+ mwiluña dajila nawa akavwali yakuvwala+ yindi. Kufumahu, akediki hanji nakulambula mulambu+ windi nimulambu wawantu wakushita+ nikubuta hanshidi yindi nihanshidi jawantu.+ 25 Wakwocha manji amulambu wahanshidi kulonda akakakumuki wishi hakameña.
26 “Owu iyala wakombaku mpembi waAzazeli,+ akakosi yakuvwala yindi nawa akaweli mumenji, kuhiñahu dinu akenzi muchilombu.
27 “Dichi ñombi wachizamba wamulambu wahanshidi nimpembi wamulambu wahanshidi, owu akweti mashi aletawu mwiluña dajila kulonda abuti hanshidi, akayitwala kunsa yachilombu nawa yitembi yawu, mbiji yawu niwusoyi wawu akajocha mukesi.+ 28 Muntu wakwocha yumiyi, akakosi yakuvwala yindi nawa akaweli mumenji, kuhiñahu dinu akenzi muchilombu.
29 “Ilu lukwikala lushimbi lwahaya nyaaka kudi enu: Mukakweji kamu 7, hefuku damu 10 dakakweji, mwakadikabisheña enu aweni* nawa bayi mwakazata mudimu wudi wejimaku,+ hela mwenimbu hela ñiinza wunakushakama mukachi kenu. 30 Hanidi ifuku dihakayibutilañawu hanshidi+ jenu kulonda akayiteni nawu mudi akadi majilu. Mwakekala akadi majilu kunshidi jenu jejima kumesu aYehova.+ 31 Hisabata yakunooka chikupu kudi enu nawa mwakadikabisheña enu aweni.*+ Hilushimbi lwahaya nyaaka.
32 “Kapristu akawayishawu+ nawa akaswanyikawu* kukalakala mudimu wawupristu+ nakumusinsa tata yindi,+ diyi wakabuta hanshidi nikuvwala yakuvwala yehina,+ yakuvwala yajila.+ 33 Wakabuta hanshidi yeluña dajila,+ yetenti dakubulakena,+ yakameña;+ nawa wakabuta hanshidi yawatupristu niyezaza dawantu+ dejima. 34 Ilu lukwikala lushimbi lwahaya nyaaka kudi enu+ kulonda mwakabuteña hanshidi yawaIsarela kutalisha hanshidi yawu yejima kamu hachaaka.”+
Dichi Aroni welili kwesekeja namwamulejeliwu Mosi kudi Yehova.
17 Yehova watwalekelihu kuhosha naMosi nindi: 2 “Hoshaku naAroni nianyanindi awamayala niaIsarela ejima wuyileji neyi, ‘Ilu dilushimbi lunahaniyi Yehova nindi:
3 “‘ “Neyi muntu wudi wejima wamwitala daIsarela ajaha ñombi wachizamba hela mpembi muchilombu hela amujahila hanji yachilombu, 4 chatela amuleti kuwiñililu wakwitenti dakubulakena kulonda amulambuli ekali mulambu kudi Yehova kumesu atabanaka yaYehova, owu muntu wakekala namuloña wamashi. Napwekeshi mashi, nawa muntu yenowu akamujahi nakumufumisha hadi antu jindi. 5 Chinekali mwenimu kulonda aIsarela aleteña nyilambu kudi Yehova yinakulambwilañawu mwisaña, ayileteña kudi kapristu kuwiñililu wakwitenti dakubulakena. Akulambulaña iyi nyilambu kulonda yiikaleña nyilambu yakuwunda kudi Yehova.+ 6 Nawa kapristu wakasampwila mashi kukameña kaYehova kuwiñililu wakwitenti dakubulakena nawa wakwocha manji kulonda akepuki ivumba dadiwahi* kudi Yehova.+ 7 Dichi, bayi akalambuleña cheñi nyilambu kudi andemoni+ adifwana nawampembi owu anakwilawu nawu wuvumbiku.+ Ilu lukwikala lushimbi lwahaya nyaaka kudi enu mwakahita makiñu enu ejima.”’
8 “Wuyileji neyi, ‘muntu wejima wamwitala daIsarela hela ñiinza wudi wejima wunakushakama mukachi kenu, wakalambula mulambu wakushita hela mulambu wukwawu 9 chakubula kuwuleta kuwiñililu wakwitenti dakubulakena kulonda awulambuli kudi Yehova, muntu yenowu akamujahi nakumufumisha hadi antu jindi.+
10 “‘Neyi muntu wudi wejima wamwitala daIsarela hela ñiinza wudi wejima imwashakamaña nindi ada mashi+ adi ejima, nakamukaana owu muntu* wunakuda mashi nawa nakamujaha nakumufumisha hadi antu jindi. 11 Muloña wumi wachileñaleña chejima chachumi wudi mumashi+ nawa ami nayihani hakameña+ kulonda niyibutili hanshidi jenu,* muloña himashi abutaña hanshidi+ muloña wawumi wudimu. 12 Dihanafumi niyileji aIsarela nami: “Kwosi niwumu hadi enu+ watela kuda mashiku, nawa kwosi ñiinza imwashakamaña nindi watela kuda mashiku.”+
13 “‘Neyi kaIsarela wumu hela ñiinza imwashakamaña nindi aya nakuzomba nawa ajaha kanyama wamwisaña hela kada kadañawu, watela kumwaña mashi+ anowu kanyama hela anoku kada nakuyibuta namaseki. 14 Muloña wumi wachileñaleña chejima chachumi wudi mumashi achu, muloña wumi wudi mumashi. Dihafumini niyileji aIsarela nami: “Bayi muda mashi achileñaleña chidi chejimaku, muloña wumi wachileñaleña chejima wudi mumashi achu. Muntu wejima wakada mashi akamujahi.”+ 15 Neyi muntu wejima,* hela mwenimbu hela ñiinza ada kanyama wunadifwili hela wunataboliwu kudi kanyama wamwisaña,+ owu muntu akakosi yakuvwala yindi, akaweli mumenji nawa akekali wamajilu kushika nimelela.+ Kufumahu dinu, akekali wakadi majilu. 16 Ilaña neyi abula kukosa yakuvwala yindi nawa abula kuwela, wakalumbulula hachiluwa+ chindi.’”
18 Yehova watwalekelihu kumuleja Mosi nindi: 2 “Hoshaku nawaIsarela wuyileji neyi, ‘Yami Yehova Nzambi+ yenu. 3 Bayi mwila neyi chelañawu mwituña daEjipitu mumwashakamineñaku, nawa bayi mwila neyi chelañawu mwituña daKenani mwinnakuyitwalaku.+ Nawa bayi mulondela nshimbi jawuku. 4 Mwatela kulondela mazu ami awunsompeshi nawa mwatela kuhemba nshimbi jami nikujilondela.+ Yami Yehova Nzambi yenu. 5 Mwatela kuhemba nshimbi jami nimazu ami awunsompeshi; muntu wejima wayihembaña wakahanda muloña wakuyihemba.+ Yami Yehova.
6 “‘Kwosi muntu niwumu hakachi kenu watela kuswina kudi ntaña yindi nakukaama nindiku.*+ Yami Yehova. 7 Bayi wukaama natata yeyiku, nawa bayi wukaama namama yeyiku. Himama yeyi nawa bayi wukaama nindiku.
8 “‘Bayi wukaama nañoda tata yeyiku.+ Hikumutiyisha tata yeyi nsonyi.*
9 “‘Bayi wukaama namuheleyiku, hela himwana wamumbanda avwalawu kudi tata yeyi hela himwana wamumbanda avwalawu kudi mama yeyi, hela mwavwalika muchisaka chimu hela nehi.+
10 “‘Bayi wukaama namwana wamumbanda avwalawu kudi mwaneyi weyala hela mwana wamumbanda avwalawu kudi mwaneyi wamumbandaku, muloña hinzekesi yeyi.
11 “‘Bayi wukaama namwana wamumbanda avwalawu kudi ñoda tata yeyiku, himwana katata yeyi, muloña himuheleyi.
12 “‘Bayi wukaama namuhela katata yeyiku. Muloña himashi wowamu natata yeyi.+
13 “‘Bayi wukaama namuhela amama yeyiku, muloña himashi wowamu namama yeyi.
14 “‘Bayi wumutiyisha mana kwatata yeyi nsonyi* kuhitila mukukaama nañodindiku. Himama+ yeyi.
15 “‘Bayi wukaama nañoda mwaneyiku.+ Hiñoda mwaneyi nawa bayi wukaama nindiku.
16 “‘Bayi wukaama nañoda manakweyiku,+ muloña hikumutiyisha manakweyi nsonyi.*
17 “‘Neyi wusumbula mumbanda, bayi wukaama namwanindi wamumbandaku.+ Bayi wusenda mwana wamumbanda avwalawu kudi mwanindi weyala hela mwana wamumbanda avwalawu kudi mwanindi wamumbanda wukaami nindiku. Hiyantaña jindi chikupu; ichi hichilwilu chansonyi.*
18 “‘Bayi wusumbula mana kwañodeyi ekali ñodeyi wamuchiyedi+ nakukaama nindi henohu ñodeyi wuchidi wamumiku.
19 “‘Bayi wuswina kwakwihi namumbanda wudi kukakweji kulonda wukaami nindiku.+
20 “‘Bayi wukaama nañoda mukwenu* nakudilisha eyi aweni kwikala wamajiluku.+
21 “‘Bayi witeja mwaneyi wudi wejima amulambuli* kudi Molekiku.+ Bayi wutamisha ijina daNzambi yeyi muniyi njilaku.+ Yami Yehova.
22 “‘Bayi wukaama neyala neyi chiwakaamaña namumbandaku.+ Hichilwilu chawuzondu.
23 “‘Iyala bayi akaama nakanyamaku muloña wukwikala wamajilu; hela mumbanda bayi adihana kudi kanyama nakukaama nakuku.+ Hikuluwañesha mwaya chisemwa.
24 “‘Bayi mudilisha kwikala amajilu nachuma chidi chejima chahayumiyiku, muloña yumiyi diyaletesheli nyuza yinnakutemuna kumesu enu kudilisha kwikala yamajilu.+ 25 Dichi, ituña didi namajilu, nakadibabesha muloña wachiluwa chadu nawa antu ashakama munidi ituña akayifumishamu.+ 26 Ilaña enu, mwatela kuhemba nshimbi jami nimazu ami awunsompeshi+ nawa bayi mwila chuma chidi chejima chahayumiyi yawuzonduku, hela mwenimbu hela ñiinza imunakushakama nindi.+ 27 Muloña yuma yejimiyi yawuzondu ayilileña kudi antu ashakamineña mwituña henohu enu kanda mwiikaliku,+ nawa ichi ituña didi namajilu. 28 Kufumahu, hamuloña wakuditamisha ituña dakayisanza wanyi neyi chidakasanza nyuza yadiñaku henohu enu kanda mwiikaliku. 29 Neyi muntu wudi wejima akoña chuma chimu chahayumiyi yawuzondu, antu* ejima anakukoña yumoyu, akayijahi nakuyifumisha hadi antu jawu. 30 Muhembeña yuma yinnayileji kuhitila mukubula kulondela yaaku yidi yejima yalondeleleñawu henohu enu kanda mwiikaliku,+ kulonda iyi yaaku yibuli kuyiletesha enu kwikala amajilu. Yami Yehova Nzambi yenu.’”
19 Yehova wamulejeli cheñi Mosi nindi: 2 “Lejaku izaza dawaIsarela dejima neyi, ‘Mwatela kwikala ajila, muloña ami Yehova Nzambi yenu najila.+
3 “‘Wejima wenu muntu-himuntu watela kulemesha* mama yindi nitata+ yindi nawa muhembeña masabata+ ami. Yami Yehova Nzambi yenu. 4 Bayi mubalumukila kudi anzambi amukunkulwayi+ hela kudituñila anzambi akweñununaku.+ Yami Yehova Nzambi yenu.
5 “‘Dichi, neyi himukulambula mulambu wakuwunda kudi Yehova,+ mwatela kuwulambula munjila yikuletesha ayitiyi kuwaha.+ 6 Mwatela kuwida hefuku dimwakawulambula nihefuku dakalondelahu, ilaña wakashalahu kushika nihefuku damuchisatu, mwatela kuwocha mukesi.+ 7 Ilaña neyi mulambu wumu akawida hefuku damuchisatu, owu mulambu wakekala wawuzondu, hiyakawutiya kuwahaku. 8 Muntu wakawida wakalumbulula hachiluwa chindi muloña natamishi chuma chajila chaYehova, nawa muntu* yenowu akamujahi nakumufumisha hadi antu jindi.
9 “‘Neyi himukwaañula yakuda mumaha enu, bayi mwaañula chikupu kushika nimwakumina ihaku, nawa bayi munonojola yakuda+ yinashalashalimuku. 10 Cheñi, bayi mukumuna nyivinyu yinashali mwitempa denu danyivinyu hela kunonojola nyivinyu yinaholoki mwitempa denu danyivinyuku. Mwatela kuyishila atuzweñi*+ niañiinza. Yami Yehova Nzambi yenu.
11 “‘Bayi mwiyaku,+ bayi mudimbanaku,+ nawa bayi mudidimbaña wumu namukwawuku. 12 Bayi musanyika nsañu yakutwamba mwijina dami+ nakutamisha ijina danami Nzambi yenuku. Yami Yehova. 13 Bayi wumwekesha wupwapoki kudi mukwenuku,+ nawa bayi wiyaku.+ Wufwetu wamuntu wunakukalakeli, bayi wushakama nawu wufuku wejima kushika nintetemenaku.+
14 “‘Bayi wushiña njika matu hela kusha chuma chakuhukanaku mputamesuku,+ nawa watela kumutiya Nzambi+ woma. Yami Yehova.
15 “‘Bayi muheñesha wuñajiku. Bayi mumwekesha chaambu kudi kazweñi hela kulemesha samahetaku.+ Mwatela kusompesha mukwenu munjila yawuñanji.
16 “‘Bayi wuya nakutaandisha nsañu yakutwamba hakachi kawantu jeyiku.+ Bayi wimakena wumi wamukwenuku.*+ Yami Yehova.
17 “‘Bayi wumuhela manakweyi mumuchima weyiku.+ Watela kumufumba mukwenu+ kulonda wubuli kwikala nanshidi hamu nayena.
18 “‘Bayi wutendana+ hela kuhembela nkunyi anyana kawantu jeyiku, nawa watela kukeña mukwenu neyi chiwadikeña eyi aweni.+ Yami Yehova.
19 “‘Mwatela kuhemba nshimbi jami jakwila nawu: Bayi mwakelisha yimuna yenu yamuchidi wumu kudisemesha nayimuna yenu yamuchidi wacheñiku. Bayi mutumba mbutu+ yanyichidi yiyedi mwiha denuku, nawa bayi muvwala chakuvwala chakuchima nawanda wakubomba+ wanyichidi yiyediku.
20 “‘Neyi iyala akaama namumbanda nawa yela nindi wuvumbi nawa owu mumbanda hiñamba yamuntu wacheñi, ilaña hiyanamukuuli hela kumusubulaku, atela kuyibabesha. Hela chochu, bayi ayijahaku muloña owu mumbanda achidi kanda amusubuli. 21 Owu iyala watela kuleta mulambu windi wamuloña kudi Yehova kuwiñililu wakwitenti dakubulakena, dikwila nawu mukoku wachizamba wamulambu wamuloña.+ 22 Kapristu wakabuta hanshidi yakoñayi owu iyala kuzatisha mukoku wachizamba wamulambu wamuloña kumesu aYehova, nawa owu iyala akamwanakena nshidi yakoñayi.
23 “‘Neyi mwakashiki mwituña dinnakuyinka nawa mwenomu mutumba nyitondu yanyikaabu yakuda, bayi mwakada nyikaabu yaniyi nyitondu hadi yaaka yisatu yakutachikilahuku. Mwakamoneña nyikaabu yaniyi nyitondu nenu yamajilu nawa ayikaanisha kuyida. 24 Ilaña muchaaka chamuchiwana, nyikaabu yejima yanoyu nyitondu yakekala yajila yakuzañalelamu kumesu aYehova.+ 25 Kuhiñahu, muchaaka chamuchitanu, mwakadi nyikaabu yanoyu nyitondu kulonda yakayisoñeli nyikaabu yayivulu. Yami Yehova Nzambi yenu.
26 “‘Bayi muda chuma chikweti mashiku.+
“‘Bayi mwakahoñesha hela kwikala atutepaku.+
27 “‘Bayi mutewula* nsuki mumbavu yanyitu yenu* hela kutetateta kunsa yawevu wenuku.+
28 “‘Bayi muditapola hanyijimba yenu muloña wamuntu wunafwiku,*+ nawa bayi mudichaata nchaatuku. Yami Yehova.
29 “‘Bayi wumwiteja mwaneyi wamumbanda ekali chivumbiku+ muloña wukumusawisha, mukunkulwayi, ituña denu akaditamisha nawuvumbi nawa dakenzala nayilwilu yawuzondu.+
30 “‘Mwakahembeña masabata+ ami nawa mwakalemesheña* iluña dami dajila. Yami Yehova.
31 “‘Bayi muya kudi akakuhoña nawandemoni+ hela kudi akakushimuna yuma yakamwekana kumbidiku,+ akenda kayiletesha enu kwikala amajilu. Yami Yehova Nzambi yenu.
32 “‘Watela kumwekesha kavumbi+ kudi muntu wudi nanvu nawa watela kulemesha mukulumpi+ nikumutiya Nzambi+ woma. Yami Yehova.
33 “‘Neyi ñiinza ashakama hamu nanenu mwituña denu, bayi mumukabishaku.+ 34 Ñiinza wunakushakama hamu nanenu, mwatela kumumonaña neyi mwenimbu hakachi kenu;+ nawa mwatela kumukeña neyi chimwadikeña enu aweni, muloña ninenu mwadiña añiinza mwituña daEjipitu.+ Yami Yehova Nzambi yenu.
35 “‘Bayi muzatisha yesekelu yakudimbana hakupima nachu kuleha, kulema hela yuma yamenji-menjiku.+ 36 Mwatela kuzatisha masikelu aloña, jakupiminaku kulema jaloña, chipimu chaloña* chakupiminaku yuma yooma nichipimu chaloña* chakupiminaku yuma yamenji.+ Yami Yehova Nzambi yenu wayifumishili mwituña daEjipitu. 37 Dichi, mwatela kuhemba nshimbi jami jejima nimazu ami awunsompeshi ejima, nawa mwatela kujilondela.+ Yami Yehova.’”
20 Yehova watwalekelihu kumuleja Mosi nindi: 2 “Wuyileji aIsarela neyi, ‘Muntu wejima wamuIsarela niñiinza wejima washakamaña muIsarela wakalambula mwanindi wudi wejima kudi Moleki, chiña tuhu+ akamujahi. Antu amwituña akamwasi malola nakumujaha. 3 Ami nakamukaana owu muntu nawa nakamujaha nakumufumisha hadi antu jindi muloña nahani mwanindi kudi Moleki nawa natamishi iluña dami dajila+ nikujilola ijina dami dajila. 4 Neyi antu amwituña akadiwula mumushikila chuma chinakoñiyi owu muntu chakuhana mwanindi kudi Moleki nawa wena kumujaha+ nehi, 5 dikwila nawu nakamukaana owu muntu hamu nichisaka+ chindi. Nakamujaha nakumufumisha hadi antu jindi hamu nawantu ejima akadibomba nayena mukwila wuvumbi naMoleki.
6 “‘Hakwila muntu* wakaya nakuhoñesha kudi akakuhoña nawandemoni+ nikudi akakushimuna yuma yakamwekana kumbidi+ kulonda eli nawu wuvumbi wakuspiritu,* chakadi nikujina, owu muntu nakamufutalela nikumujaha nakumufumisha hadi antu jindi.*+
7 “‘Dijilikenu mwiikali ajila,+ muloña yami Yehova Nzambi yenu. 8 Nawa muhembeña nshimbi jami nikujilondela.+ Yami Yehova wunakuyijilika enu.+
9 “‘Muntu wudi wejima wukushiña tata yindi hela mama yindi, chiña tuhu+ akamujahi. Chineli nashiñi tata yindi hela mama yindi, mashi indi akwikala hadi yomwenindi.
10 “‘Kutalisha kudi muntu wuneli wujila nañodambala: Muntu wuneli wujila nañoda mukwawu chiña tuhu akamujahi, ninowu mumbanda aneliyi nindi wujila+ niyena chiña tuhu akamujahi. 11 Muntu wukukaama nañoda tata yindi namutiyishi tata yindi nsonyi.*+ Mwayedi wawu chiña tuhu akayijahi. Mashi awu akuyikumina awenawu. 12 Neyi muntu akaama nañoda mwanindi, wejima wawu ayedi chiña tuhu akayijahi. Analuwañeshi mwaya chisemwa. Mashi awu akwikala hadi awenawu.+
13 “‘Neyi iyala akaama namukwawu iyala neyi iyala chadikaamañayi namumbanda, wejima wawu ayedi anakoñi chuma chawuzondu.+ Chiña tuhu akayijahi. Mashi awu akwikala hadi awenawu.
14 “‘Neyi iyala asumbula mwana nimama yindi, ichi hichilwilu chansonyi.*+ Atela kumwocha mukesi+ hamu nanowu ambanda kulonda ochu chilwilu chansonyi chibuli kutwalekahu mukachi kenu.
15 “‘Neyi iyala akaama nakanyama, chiña tuhu akamujahi nawa owu kanyama+ niyena atela kumujaha. 16 Neyi mumbanda aya kudi kanyama kulonda akaami naku,+ mwatela kumujaha owu mumbanda nikanyama. Chiña tuhu akayijahi. Mashi awu akuyikumina awenawu.
17 “‘Neyi iyala akaama namuhelindi, hela mwana katata yindi hela mwana kamama yindi, nawa amona nzekesi yamuhelindi, muhelindi niyena amona nzekesi yindi, hichuma chansonyi.+ Wejima wawu ayedi atela kuyijahila hamesu awanyana kawantu jawu. Namutiyishi muhelindi nsonyi.* Watela kulumbulula hachiluwa chindi.
18 “‘Neyi iyala akaama namumbanda wudi kukakweji nawa ela nindi wuvumbi, mwayedi wawu anamwekeshi hatooka nawu kudi wena mashi+ alema wanyi. Wejima wawu ayedi atela kuyijaha nakuyifumisha hadi antu jawu.
19 “‘Bayi wukaama namuhela amama yeyi hela muhela atata yeyiku, muloña chumochu hikusawula+ ntaña yeyi wamashi wowamu. Atela kulumbulula hachiluwa chawu. 20 Iyala wukukaama nañoda mana kwatata yindi, namutiyishi mana kwatata yindi nsonyi.*+ Atela kulumbulula hanshidi jawu. Akafwa chakadi kuvwalahu mwana. 21 Neyi iyala asumbula ñoda manakwindi, hichuma chawuzondu.+ Namutiyishi manakwindi nsonyi.* Hiyamba kavwalahu mwanaku.
22 “‘Mwatela kuhemba nshimbi jami nimazu ami awunsompeshi+ ejima nawa mujilondeleña+ kulonda akabuli kuyihaña+ mwituña mwinnakuyitwala. 23 Bayi mulondela nshimbi janyuza yinnakutemuna kumesu enuku;+ muloña yinakoñi yuma yejimiyi nawa ami nayimoni nami yawuzondu.+ 24 Dihafumini niyileji enu nami: “Mwakaheta ituña dawu nawa nakayinkadu enu dakekali iheta denu, ituña dasweja mayeli niwuchi.+ Yami Yehova Nzambi yenu wunayaambuli kufuma mudi antu amboka-mboka.”+ 25 Mwatela kwaambula kanyama wakadi majilu nawamajilu, nikada kamajila nakabula majilu.+ Bayi mudilisha enu aweni* kwikala awuzondu nakanyama hela kada hela chuma chidi chejima chakalabaña hesekiku, yuma yejima yinayilejeli nami muyimoneña nenu yamajilu.+ 26 Mwatela kwikala ajila kudi ami, muloña ami Yehova najila+ nawa inakuyaambula enu kufuma mudi antu amboka-mboka kulonda mwiikali antu jami.+
27 “‘Iyala wudi wejima hela mumbanda wahoñaña nawandemoni hela washimunaña yuma yakamwekana kumbidi,* chiña tuhu+ akamujahi. Antu akayasi malola nakuyijaha. Mashi awu akayikumina awenawu.’”
21 Yehova watwalekelihu kumuleja Mosi nindi: “Yileji atupristu, anyana kaAroni awamayala neyi, ‘Kwosi muntu watela kuditamisha yomweni kukoola muntu* wunafwi hakachi kawantu jindiku.+ 2 Ilaña nateli kwila mwenimu kudi ntaña yindi chikupu wamashi wowamu, mama yindi, tata yindi, mwanindi weyala, mwanindi wamumbanda, manakwindi, 3 nawa nateli kuditamisha yomweni kukoola muhelindi chikupu, chiña hohu neyi owu muhelindi himujiki* nawa kanda asumbukeñahu dehi. 4 Hanateli kuditamisha yomweni nikudijilola hamuloña wamumbanda wasumbuka kudi iyala wahadi antu jindiku. 5 Bayi atewula tuwewula+ hela kutetateta kunsa yawevu wawu hela kuditapola hanyijimba yawuku.+ 6 Atela kwikala ajila kudi Nzambi yawu+ nawa hiyatela kujilola ijina daNzambi yawuku,+ muloña anakulambula nyilambu yaYehova yakwocha hakesi, yakuda yaNzambi* yawu, nawa atela kwikala ajila.+ 7 Hiyatela kusumbula chivumbi,+ hela mumbanda anatamishiwu hela mumbanda anaseñiwu kudi nfumwindiku,+ muloña kapristu wajila kudi Nzambi yindi. 8 Mwatela kumujilika+ muloña diyi wunakulambula yakuda yaNzambi* yenu. Watela kwikala wajila kudi enu, muloña ami Yehova wunakuyijilika enu, najila.+
9 “‘Dichi neyi mwana kakapristu wamumbanda adijilola hamuloña wakwila wuvumbi, dikwila nawu nakujilola tata yindi. Owu mwana atela kumwocha mukesi.+
10 “‘Kapristu muneni hadi amanakwindi, owu anahuñunwiniwu+ hamutu windi manji akuwayisha nachu nawa anaswanishiwu* kulonda avwaleña yakuvwala yawupristu,+ bayi aleka nsuki yindi kuzakalala hela kutabola yakuvwala yindiku.+ 11 Hatela kuswina kwakwihi namuntu wudi wejima wunafwiku;*+ hela chakwila owu wunafwi hitata yindi hela himama yindi, bayi aditamisha yomweniku. 12 Hatela kwidika mwiluña dajilaku, nawa hatela kujilola iluña dajila daNzambi+ yindiku, muloña chinjikijilu chakudihana nimanji akuwayisha nachu aNzambi yindi,+ jidi hadi yena. Yami Yehova.
13 “‘Watela kusumbula mumbanda mujiki.*+ 14 Hatela kusumbula ntuluwa, mumbanda aseñawu, mumbanda atamishawu hela chivumbiku; ilaña watela kusumbula mumbanda mujiki* hakachi kawantu jindi. 15 Hatela kujilola anyanindi ahadi* antu jindiku,+ muloña yami Yehova wunakumujilika owu iyala.’”
16 Yehova watwalekelihu kumuleja Mosi nindi: 17 “Wumuleji Aroni neyi, ‘Kwosi muntu wukweti wufwayi wahadi anyaneyi* mwakahita makiñu awu ejima wakaswina kwakwihi nakulambula yakuda* kudi Nzambi yeyiku. 18 Neyi kudi iyala wukweti wufwayi, bayi aswina kwakwihiku: iyala mputamesu hela mukakubalakata hela chifwayi kumesu* hela wamulehi mwendu wumu hela chikasa chimu, 19 iyala wachiñumuka mwendu hela chikasa, 20 wukweti ntunda hela wakiya,* hela iyala wafwa disu hela wukweti mukuli hela yisesela hela wukweti makutu akisika.+ 21 Kwosi iyala wahadi anyana kakapristu Aroni wukweti wufwayi watela kuswina kwakwihi nakulambula nyilambu yaYehova yakwocha hakesiku. Chineli wukweti wufwayi, hatela kuswina kwakwihi nakulambula yakuda* kudi Nzambi yindiku. 22 Nateli kuda yakuda yaNzambi* yindi kufuma hayuma yajila+ chikupu nihayuma yajila.+ 23 Hela chochu, bayi aswina kwakwihi nehina dakujika nachuku,+ nawa bayi aswina kwakwihi nakameñaku,+ muloña wukweti wufwayi. Bayi ajilola iluña dami dajilaku,+ muloña yami Yehova wunakuyijilika.’”+
24 Dichi, Mosi wamulejeli Aroni, anyanindi awamayala niaIsarela ejima.
22 Yehova watwalekelihu kumuleja Mosi nindi: 2 “Muleji Aroni nianyanindi awamayala neyi atela kwikala asoñama hakuzatisha yuma* yajila yawaIsarela kulonda abuli kujilola ijina dami dajila+ nayuma yinakujilikawu kudi ami.+ Yami Yehova. 3 Yileji neyi, ‘Mwakahita makiñu enu ejima, mwanenu wudi wejima wamajilu wakaswina kwakwihi nayuma yajila yakamujilikilawu Yehova kudi aIsarela, muntu yenowu akamujahi nakumufumisha* kumesu ami.+ Yami Yehova. 4 Kwosi iyala wahadi anyana kaAroni wukweti mbumba+ hela wukweti yuma yinakuvwa+ watela kuda kuyuma yajilaku, sampu nekali wakadi majilu,+ hela iyala wakwata muntu wamajilu wunatami muloña wakwata muntu* wafwa+ hela iyala wunadimwañili mbutu yalusemu,+ 5 hela iyala wakwata chileñaleña chamajilu chahayileñaleña yendaña munyikanka-nyikanka+ hela wakwata muntu wamajilu wunatami muloña wayuma yashiyashana, owu wunateli kumuleñela ekali wamajilu.+ 6 Muntu* wukukwata kuchuma chidi chejima chahaniyi yuma, wukwikala wamajilu kushika nimelela nawa hatela kuda kuchuma chidi chejima chahayuma yajilaku, ilaña watela kuwela mumenji.+ 7 Neyi itena dihuma wukwikala wakadi majilu, nawa hanyima yachumichi watela kuda kuyuma yajila, muloña diyi yakuda yindi.+ 8 Cheñi, hatela kuda kanyama wunadifwili hela chuma chidi chejima chinataboliwu kudi anyama amwisaña nakwikala wamajilu muloña wachumochuku.+ Yami Yehova.
9 “‘Ahembeña yuma yinnayileji kulonda abuli kuvulumuna muloña wakubula kuhemba yumiyi nakufwa muloña wakujilola yuma yajila. Yami Yehova wunakuyijilika.
10 “‘Kwosi muntu* anabuli kwitejawu watela kuda chuma chidi chejima chajilaku.+ Kwosi ñiinza wakapristu hela muntu eñijawu mudimu watela kuda chuma chidi chejima chajilaku. 11 Ilaña neyi kapristu alanda muntu* namali indi, owu muntu nateli kudaku. Anduñu avwalikila mwitala dindi niwena anateli kuda yakuda yindi.+ 12 Neyi mwana wamumbanda avwalawu kudi kapristu asumbuka kudi muntu wabula kwikala kapristu,* owu mwana hatela kuda kuyawaana yajilaku. 13 Ilaña neyi mwana wamumbanda avwalawu kudi kapristu ekala ntuluwa hela amuseña nawa hakweti mwanaku, afunta kwitala datata yindi neyi chichadiña hadiñayi kansi, watela kuda yakuda yimu yatata yindi.+ Ilaña muntu* anabuli kwitejawu watela kudaku wanyi.
14 “‘Neyi muntu ada chuma chajila chakadi kwiluka, akabombelihu chipimu chimu chamuchitanu chawuseya wachu nawa akahani mulambu wajila kudi kapristu.+ 15 Dichi hiyatela kujilola yuma yajila yawaIsarela yahanañawu kudi Yehova+ 16 nakuyikojeja ayibabeshi hachiluwa chawu muloña wakuda yuma yawu yajilaku. Muloña ami Yehova yami wunakuyijilika.’”
17 Yehova watwalekelihu kumuleja Mosi nindi: 18 “Hoshaku naAroni nianyanindi awamayala niaIsarela ejima neyi, ‘Neyi iyala kaIsarela hela ñiinza washakamaña muIsarela alambula mulambu wakumushitila+ Yehova kulonda ashikiji mwasanyikiliyi hela kulambula mulambu wakudikeñela,+ 19 watela kulambula ñombi wachizamba wakadi ihuji+ kufuma hamukanka wawañombi, anyana kanyikoku ayizamba hela ampembi kulonda amutiyi kuwaha. 20 Bayi mulambula chimuna chidi chejima chikweti wufwayiku,+ muloña chikuyikojeja abuli kuyitiya kuwaha.
21 “‘Neyi iyala alambula mulambu wakuwunda+ kudi Yehova kulonda eli mwasanyikiliyi hela kulambula mulambu wakudikeñela, watela kwikala kanyama wakadi ihuji kufuma hamukanka wawañombi hela wawanyikoku hela wawampembi kulonda amutiyi kuwaha. Owu chimuna hatela kwikala nawufwayi hela hanteshaku. 22 Kwosi chimuna chamulambu watela kwikala waputa mesu, wakotoka, wukweti chilonda, wukweti njotu, wukweti mukuli hela yiseselaku. Himwatela kulambula yimuna yamuchidiwu kudi Yehova hela kuyilambula kudi Yehova hakameñaku. 23 Munateli kulambula ñombi wachizamba hela mukoku wukweti mwendu wumu wawulehi hela wawihi kwikala mulambu wakudikeñela, ilaña hiyanateli kuwiteja kwikala mulambu wakusanyikaku. 24 Bayi mulambula kudi Yehova chimuna wukweti makutu akisika hela achikeka hela asokolawu hela aketulawuku, nawa bayi mulambula anyama amuchidiwu mwituña denuku. 25 Nawa bayi mulambula anyama adi ejima amuchidiwu imwakatambula kudi mwenyi kulonda ekali yakuda yaNzambi yenuku, muloña atama nawa akweti wufwayi. Yimuna yeniyi hiyakayiteja nakuyiletesha enu ayitiyi kuwahaku.’”
26 Yehova watwalekelihu kumuleja Mosi nindi: 27 “Neyi mwana kañombi wachizamba hela mwana kamukoku wachizamba hela mpembi asemuka, hadi mafuku 7+ wakekala namama yindi, ilaña hefuku damu 8 nakuya kumbidi akamwiteja kwikala mulambu wakumulambula Yehova wakwocha hakesi. 28 Hakwila ñombi wachizamba hela mukoku, bayi mwakamujahila hefuku dodimu namwanindiku.+
29 “Neyi mulambula mulambu wakusakilila nachu kudi Yehova,+ mwatela kuwulambula munjila yikuyiletesha ayitiyi kuwaha. 30 Mwatela kuwida hadodenodu ifuku. Bayi mushiyahu wudi wejima kushika nintetemenaku.+ Yami Yehova.
31 “Mwatela kuhemba nshimbi jami nikujilondela.+ Yami Yehova. 32 Bayi mujilola ijina dami dajilaku,+ nawa atela kunjilika mukachi kawaIsarela.+ Yami Yehova wunakuyijilika enu,+ 33 yami wunakuyifumisha mwituña daEjipitu kulonda nidimwekeshi kwikala Nzambi yenu.+ Yami Yehova.”
23 Yehova watwalekelihu kumuleja Mosi nindi: 2 “Hoshaku nawaIsarela nawa wuyileji neyi, ‘Yawija yahachilaaka+ yaYehova yimukubidika+ hikupompa kweneni kwajila. Iyi diyi yawija yami yahachilaaka:
3 “‘Munateli kuzata mudimu mumafuku 6, ilaña hefuku damu 7, hisabata yakunooka chikupu,+ hikupompa kweneni kwajila. Himwatela kuzata mudimu wudi wejimaku. Dakekalaña hisabata yaYehova kwejima kumwakashakamaña.+
4 “‘Iyi diyi yawija yaYehova yahachilaaka, dikwila nawu kupompa kweneni kwajila kumwatela kubidika hampinji yakupompa yatoñolawu: 5 Mukakweji katachi, hefuku damu 14 dakakweji,+ hakabwidibwidi,* hiifuku daChipandakenu+ chaYehova.
6 “‘Hefuku damu 15 dakanu kakweji, hiifuku daChawija chaMankendi Akadi Iluñi kudi Yehova.+ Hadi mafuku 7, mwakadaña mankendi akadi iluñi.+ 7 Hefuku datachi, mwakapompeña kupompa kweneni kwajila.+ Himwatela kuzata mudimu wudi wejima wakolaku. 8 Ilaña mwakalambulaña mulambu kudi Yehova wakwocha hakesi hadi mafuku 7. Hefuku damu 7, kwakekalaña kupompa kweneni kwajila. Himwatela kuzata mudimu wudi wejima wakolaku.’”
9 Yehova watwalekelihu kumuleja Mosi nindi: 10 “Hoshaku nawaIsarela nawa wuyileji neyi, ‘Neyi munashiki dehi mwituña dinnakuyinka nawa munaañuli yakuda yidimu, mwatela kuleta kudi kapristu+ chiita chanyikaabu yatachi+ yambutu yenu. 11 Kapristu wakazuyañesha ochu chiita iku niniku kumesu aYehova kulonda enu akayitiyi kuwaha. Kapristu watela kuchizuyañesha hefuku dakalondelahu kufuma hasabata. 12 Hefuku dakayizuyañeshelawu chiita chenu, mwakalambuli mwana kamukoku wachizamba wakadi ihuji wudi nachaaka chimu kwikala mulambu wakushita wakumulambula Yehova. 13 Mulambu wawu wambutu wakekala yipimu yiyedi yamwikumi yaifa* yawuña wawuwahi walembuluka wakubomba namanji wakekali mulambu wakumulambula Yehova wakwocha hakesi, wevumba dadiwahi.* Mulambu wawu wavinyu wakekala chipimu chamuchiwana chahini.* 14 Himwatela kuda dinkendi didi dejima, hela mbutu yakwocha hela mbutu yayihaku, sampu niifuku dimwakaleta mulambu waNzambi yenu. Ilu hilushimbi lwahaya nyaaka lwakalondelaña makiñu enu ejima kwejima kumwakashakamaña.
15 “‘Mwakachindeña masabata 7 akahitañahu kufuma hefuku dakalondelahu hanyima yasabata, kufuma hefuku dimwakaleta chiita chamulambu wakuzuyañesha.+ Yatela kwikala nyilungu yashikila. 16 Mwakachinda mafuku 50+ akahitahu kushika nihefuku dakalondela hasabata yamu 7, kuhiñahu, mwakalambuli mulambu wambutu yayiha kudi Yehova.+ 17 Mwakaleti mankendi ayedi amulambu wakuzuyañesha kufuma kumaluña enu kumwakashakamaña. Awa mankendi mwakayituñi kuzatisha yipimu yiyedi yamu 10 yaifa* yawuña wawuwahi walembuluka. Mwatela kuyocha neluñi+ kwikala nyikaabu yinasambili kuha yakumwinka Yehova.+ 18 Nawa owu mankendi mwatela kuyilambwila hamu nanyikoku yayizamba 7 yakadi ihuji, chizamba-hichizamba watela kwikala wachaaka chimu niñombi wachizamba wumu nianyana kanyikoku ayizamba yiyedi.+ Yakekala nyilambu yakushita yakumulambula Yehova hamu namulambu wambutu nimulambu wavinyu, nakwikala mulambu wakwocha hakesi wevumba dadiwahi* kudi Yehova. 19 Nawa mwatela kulambula mwana kampembi wumu kwikala mulambu wahanshidi+ nianyana kanyikoku ayizamba ayedi, achaaka chimu kwikala mulambu wakuwunda.+ 20 Kapristu wakajizuyañesha iku niniku hamu namankendi anyikaabu yinasambili kuha, kulonda ekali mulambu wakuzuyañesha kudi Yehova hamu nanyana kanyikoku ayizamba ayedi. Yakekala yajila kudi Yehova, yakekala yakapristu.+ 21 Hanidi ifuku mwakabidiki+ kupompa kweneni kwajila. Himwatela kuzata mudimu wudi wejima wakolaku. Ilu hilushimbi lwahaya nyaaka lwakalondelaña makiñu enu ejima kwejima kumwakashakamaña.
22 “‘Neyi himukwaañula yakuda mwituña denu, bayi mwakaañula chikupu kushika nimwakumina ihaku nawa bayi mwakanonojola yakuda+ yakashalashalañamuku. Mwatela kuyishila atuzweñi*+ niañiinza.+ Yami Yehova Nzambi yenu.’”
23 Yehova watwalekelihu kumuleja Mosi nindi: 24 “Lejaku aIsarela neyi, ‘Hefuku datachi dakakweji kamu 7, mwatela kunooka chikupu kunyidimu yenu yejima, idi ifuku akadibidikaña kuhitila mukuvumisha mpuña+ kulonda enu mwakanukeña nenu hikupompa kweneni kwajila. 25 Himwatela kuzata mudimu wudi wejima wakolaku, nawa mwakalambula mulambu wakwocha hakesi kudi Yehova.’”
26 Yehova watwalekelihu kumuleja Mosi nindi: 27 Hela chochu, hefuku damu 10 dakakweji kamu 7, hiIfuku daKubuta haNshidi.+ Mupompeña kupompa kweneni kwajila nawa mwatela kudikabisha enu aweni*+ nikulambula kudi Yehova mulambu wakwocha hakesi. 28 Himwakazata mudimu wudi wejima hanidi ifukuku, muloña hiifuku dakuyibutila hanshidi+ jenu kumesu aYehova Nzambi yenu. 29 Muntu* wudi wejima wakabula kudikabisha yomweni* hanidi ifuku, akamujahi nakumufumisha hadi antu jindi.+ 30 Nawa hadi antu jindi nakajilumuna muntu* wejima wakazata mudimu wudi wejima hanidi ifuku. 31 Himwatela kuzata mudimu wudi wejimaku. Ilu hilushimbi lwahaya nyaaka lwakalondelaña makiñu enu ejima, kwejima kumwakashakamaña. 32 Hisabata yakunooka chikupu kudi enu nawa mwakadikabishaña enu aweni*+ hefuku damu 9 dakakweji namelela. Mwatela kuhemba sabata kutachika namelela yimu nakushika kumelela yikwawu.”
33 Yehova watwalekelihu kumuleja Mosi nindi: 34 “Lejaku aIsarela neyi, ‘Hefuku damu 15 dakanu kakweji kamu 7, dikwikalaña ifuku dakumwilila Yehova Chawija chaYisolu* hadi mafuku 7.+ 35 Hefuku datachi, hakekalaña kupompa kweneni kwajila nawa bayi muzata mudimu wudi wejimaku. 36 Mumafuku 7 mwatela kumulambula Yehova mulambu wakwocha hakesi. Hefuku damu 8, mwakapompeña kupompa kweneni kwajila nawa mwakalambuleña mulambu kudi Yehova wakwocha hakesi. Hikupompa kweneni kwajila.+ Himwatela kuzata mudimu wudi wejimaku.
37 “‘Iyi diyi yawija yahachilaaka+ yaYehova yimukubidikaña nenu hikupompa kweneni kwajila+ kwakulambwilahu kudi Yehova mulambu wakwocha hakesi: mulambu wakushita,+ mulambu wambutu+ nimulambu wavinyu+ kwesekeja nandandanda yahefuku-hefuku. 38 Iyi diyi nyilambu kubombela hanyilambu yimwakamulambulaña Yehova hamasabata+ niyawaana yenu,+ nyilambu yenu yakusanyika,+ nyilambu yenu yakudikeñela,+ yimwatela kumulambula Yehova. 39 Hela chochu, hefuku damu 15 dakakweji kamu 7, neyi munapompeshi dehi yakuda yamwituña, mwakekaleña nachawija chaYehova hadi mafuku 7.+ Ifuku datachi, hiifuku dakunooka chikupu niifuku damu 8, hiifuku dakunooka chikupu.+ 40 Hefuku datachi, mwakasendeña nyikaabu yakunyitondu yayiwahi, nyitayi yanyitondu yanyikoma,+ nyitayi yanyitondu yamafu amavulu ninyitondu yamuchinekineki,* nawa mwakazañalela+ kumesu aYehova Nzambi yenu hadi mafuku 7.+ 41 Mwakachanukeña kwikala chawija kudi Yehova hadi mafuku 7 muchaaka.+ Chineli hilushimbi lwahaya nyaaka lumwakalondelaña mumakiñu enu ejima, mwakekaleña nachu mukakweji kamu 7. 42 Mwatela kushakama muyisolu hadi mafuku 7.+ Enimbu amuIsarela ejima atela kushakama muyisolu, 43 kulonda makiñu enu akumbidi akeluki+ nawu aIsarela nayishakamishili muyisolu hinayifumishileña mwituña daEjipitu.+ Yami Yehova Nzambi yenu.’”
44 Dichi Mosi wayilejeli aIsarela hayawija yaYehova yahachilaaka.
24 Yehova watwalekelihu kumuleja Mosi nindi: 2 “Lejaku aIsarela akuleteleña manji amuolivi akusohola nawa akadi majilu, akusha mumanoñu kulonda manoñu atwalekeñahu kubutuka.+ 3 Hanji yehina dakujika nachu kuchimbañu chaWunsahu mwitenti dakubulakena, Aroni watela kushaku ntanjikilu yakwila nawu manoñu atwalekeñahu kubutuka kumesu aYehova kufuma melela kushika nintetemena. Hilushimbi lwakalondelaña makiñu enu ejima. 4 Mpinji yejima, watela kutanjika manoñu mundonda hachakutentekahu manoñu+ chawuru yakadi majilu kumesu aYehova.
5 “Wakanoni wuña wawuwahi walembuluka, wakwochimu mankendi 12 anjiñumuki epwata hakachi. Hakwocha dinkendi-hidinkendi, wakazatishi yipimu yiyedi yamwikumi yaifa.* 6 Wakayitanjiki munyilumba yiyedi kumesu aYehova hamesa yawuru yakadi majilu. Mulumba-himulumba wakekali namankendi 6.+ 7 Hamulumba-himulumba wakashihu manaña evumba dadiwahi akadi majilu, nawa akekala mankendi amulambu wakwanukilaku+ wakwocha hakesi wakumulambula Yehova. 8 Hefuku dasabata-hisabata, akayitanjikeña mpinji yejima kumesu aYehova.+ Ichi hichitiyañenu chahaya nyaaka nawaIsarela. 9 Wakekala waAroni nianyanindi awamayala.+ Akawudiila mwiluña dajila muloña hichuma chindi chajila chikupu+ chakufuma hanyilambu yaYehova yakwocha hakesi. Ilu hilushimbi lwahaya nyaaka.”
10 Hakachi kawaIsarela hadiña mwana weyala avweliwu kudi mumbanda kaIsarela niiyala mwini Ejipitu.+ Dichi owu mwana watachikili kuzuña neyala kaIsarela muchilombu. 11 Owu mwana weyala avweliwu kudi mumbanda kaIsarela watachikili kusawula nikushiña+ Ijina.* Dichi amuleteli kudi Mosi.+ Nawa mama yindi wadiña Shelomiti, mwana wamumbanda avweliwu kudi Dibiri wakumuchidi waDani. 12 Amushili mukaleya sampu nichayilejeliwu mwafuukwiliyi Yehova.+
13 Kuhiñahu, Yehova wamulejeli Mosi nindi: 14 “Muleti hanji yachilombu owu muntu washiñana, nawa antu ejima amutiya anañiki makasa awu hamutu windi, kufumahu izaza dawantu dejima dimwasi malola.+ 15 Nawa wuyileji aIsarela neyi, ‘Muntu wejima wukushiña Nzambi yindi, wakalumbulula hanshidi yindi. 16 Dichi, mukwakusawula ijina daYehova chiña tuhu+ akamujahi. Izaza dawantu dejima chiña tuhu dakamwasi malola. Ñiinza niyena atela kumujaha neyi chinateli kujahawu mwenimbu muloña wakusawula Ijina.
17 “‘Neyi muntu ajaha mukwawu,* niyena chiña tuhu+ akamujahi. 18 Muntu wudi wejima wakatapa chimuna nakumujaha,* watela kufwetelamu wacheñi, wumi nawumi. 19 Neyi muntu akatisha mukwawu, niyena atela kumwila neyi chineliyi mukwawu.+ 20 Muntu wukukotola mukwawu niyena akumukotola, disu nadisu, izewu nezewu, chinamukatishiyi mukwawu dichatela kumukatishawu niyena.+ 21 Muntu wakatapa kanyama nakumujaha, watela kufwetelamu wacheñi,+ ilaña muntu wakatapa muntu nakumujaha, niyena atela kumujaha.+
22 “‘Mazu awunsompeshi wowamu akuzatikaña kudi enu, hela owu muntu hiñiinza hela himwenimbu,+ muloña yami Yehova Nzambi yenu.’”
23 Kuhiñahu, Mosi wayilejelimu aIsarela nawa wena amwidishili hanji yachilombu owu muntu washiñeni nawa amwasili malola.+ Dichi aIsarela elili neyi chamulejeliwu Mosi kudi Yehova.
25 Yehova wamulejeli cheñi Mosi haMpidi yaSinayi nindi: 2 “Hoshaku nawaIsarela wuyileji neyi, ‘Chimwakashika mwituña dinnakuyinka,+ ituña dakahemba sabata kudi Yehova.+ 3 Mwakatumbaña mbutu mumaha enu hadi yaaka 6, mwakakunkulaña nyivinyu yamumatempa enu hadi yaaka 6 nawa mwakapompeshaña mbutu yahamaseki.+ 4 Ilaña muchaaka chamu 7, ituña datela kwikala nasabata yakunooka chikupu, hisabata yaYehova. Bayi mwakatumba mbutu mumaha enu hela kukunkula matempa enu anyivinyuku. 5 Bayi mwakaañula mbutu yinadimeneni yayeni mumaha hanyima yakwaañulamuku, nawa bayi mwakakumuna nyivinyu kumuvinyu wumwakabula kukunkulaku. Iseki dakacheluki hadi chaaka chamukuma. 6 Hela chochu, munateli kuda yakuda yakamenaña mwituña muchaaka chasabata yadu; mwakayidi, enu, anduñu jenu awamayala niawambanda, muntu imweñija mudimu niañiinza imunakushakama nawu, 7 niyimuna nianyama amwisaña amwituña denu. Yuma yejima yakamenaña mwituña munateli kuda.
8 “‘Mwakachindaña yaaka yamasabata 7, dikwila nawu yaaka 7 kuyivulisha mapampa 7, nawa mafuku ayaaka yamasabata 7 akekala yaaka 49. 9 Kuhiñahu, mwakavumisha chikupu chivumina chanseñu mukakweji kamu 7 hefuku damu 10 dakakweji; Hefuku daKubuta haNshidi,+ mwakatiyakeshi chivumina chanseñu mwituña denu dejima. 10 Mwatela kujilika chaaka chamu 50 nakubidika nsañu yakusubuka mwituña kudi antu ejima ashakamañamu.+ Chakekala Chaaka chenu chaKusubuka, wejima wenu muntu-himuntu wakafunta kumpata yindi yawuswana nawa wejima wenu muntu-himuntu watela kufunta kuchisaka chindi.+ 11 Chaaka chamu 50 dichakekala Chaaka chenu chaKusubuka. Himwakatumbaña mbutu hela kwaañula mbutu yakadimenenaña yayeni hambutu yakashalañahu hela kupompesha nyikaabu yakunyivinyu yimwakabulaña kukunkulaku.+ 12 Muloña hiChaaka chaKusubuka. Chakekala chaaka chajila kudi enu. Mwakadaña hohu yakuda yakadimenenaña yayeni hamaseki.+
13 “‘Munichi Chaaka chaKusubuka, wejima wenu muntu-himuntu watela kufunta kumpata yindi yawuswana.+ 14 Neyi mulandisha chuma chidi chejima kudi mukwenu hela mulanda chuma kudi yena, bayi mudidimba wumu namukwawuku.+ 15 Watela kulanda kudi mukwenu kwesekeja nayaaka yinahitihu kufuma muChaaka chaKusubuka, nawa niyena watela kukulandisha kwesekeja nayaaka yinashaliku nakwaañula mbutu.+ 16 Neyi kunashali yaaka yayivulu, nateli kukandamisha wuseya, nawa neyi kunashali yaaka yantesha, watela kukeheshaku wuseya, muloña nakukulandisha kwesekeja nakuvula kwambutu jiwakañula. 17 Kwosi muntu niwumu hakachi kenu watela kudimba mukwawuku,+ nawa mwatela kumutiya Nzambi yenu woma,+ muloña yami Yehova Nzambi yenu.+ 18 Neyi mwakahembaña nshimbi jami nimazu ami awunsompeshi, mwakashakamaña akiñewa mwituña.+ 19 Ituña dakayinkaña yakuda yadu+ nawa mwakadaña nakwikuta nikushakama akiñewa+ munodu ituña.
20 “‘Ilaña neyi mukehula nenu: “Twakadañadi muchaaka chamu 7 neyi tubula kukuwa mbutu hela kupompesha yakuda yetu?”+ 21 Nakatemesha nkisu yami kudi enu muchaaka chamu 6 nawa iseki dakedisha mbutu yayivulu yakuda muyaaka yisatu.+ 22 Kuhiñahu, mwakatumba mbutu muchaaka chamu 8 nawa mwakadaña yakuda yayikulu kushika nimuchaaka chamu 9. Mwakadaña yakuda yayikulu kushika nimpinji yakaha yakuda yayiha.
23 “‘Bayi mulandisha mpata lwejimaku,+ muloña mpata yami.+ Muloña kudi ami, enu mudi añiinza nawa enyi.+ 24 Mwakahita ituña dejima dimwakaheta, mwatela kwinka antu wuswa wakulandulula cheñi mpata.
25 “‘Neyi manakweyi ekala kazweñi nawa hakukeña kulandisha chibalu chimu champata yindi, ntaña yindi chikupu mukakumukuula watela kwinza nakulandulula mpata yalandishiliyi manakwindi.+ 26 Neyi muntu hakweti mukakumukuulaku, ilaña aheta nawa ekala namali akulandulula nachu oyu mpata, 27 watela kuchinda wuseya wayu kufuma muchaaka chayilandishiliyi nawa wakamufuntishila owu muntu mali akashala mumali amulandishiliyi nachu. Kuhiñahu dinu, nateli kufunta kumpata yindi yawuswana.+
28 “‘Ilaña neyi akañanya kuwana mali akuyitambula nachu kudi yena, mpata yalandishiliyi yakatwalekahu kwikala yanowu wayilandili kushika nimuChaaka chaKusubuka; muChaaka chaKusubuka,+ iyi mpata akayifuntisha kudi mweniyu nawa yena wakafunta kumpata yindi yawuswana.+
29 “‘Neyi muntu alandisha mukala wudi mumusumba wukweti mpwembu, wakatwalekahu kwikala nawuswa wakuwulandulula kushika nikukumana kwachaaka kufuma hamanishiliyi kuwulandisha; wakatwalekahu kwikala nawuswa wakuwulandulula+ hadi chaaka chamukuma. 30 Ilaña neyi anawulandululi wanyi hakumana kwachaaka chamukuma, itala didi mumusumba wukweti mpwembu dakekala iheta dahaya nyaaka danowu wanadilandi mwakahita makiñu indi ejima. Odu itala hiyatela kudisubula muChaaka chaKusubukaku. 31 Hela chochu, matala akushakamamu akadi kunyeñumwisha mpwembu, atela kuyimonaña nawu himaha amumaluña amukamwihi. Wuswa wakuyilandulula watela kutwalekahu nawa atela kuyisubula muChaaka chaKusubuka.
32 “‘Hakwila matala awaLevi adi mukachi kanyisumba yawu,+ aLevi akekalaña nawuswa wahaya nyaaka wakuyilandulula. 33 Neyi chuma chawaLevi akañanya kuchilandulula, itala dawu dalandishiliwu mumusumba nidena akadisubula muChaaka chaKusubuka,+ muloña matala amumusumba wawaLevi hiwuswana wawu hakachi kawaIsarela.+ 34 Kubombelahu, hiyanateli kulandisha mpata yakudiishilamu yimuna+ yanyeñumuka nyisumba yawuku, muloña hiiheta dawu dahaya nyaaka.
35 “‘Neyi manakweyi iwashakamaña nindi mukamwihi ekala kazweñi nawa hanakutwesha kudihemba yomweniku, watela kumukwasha+ neyi chiwunateli kukwasha ñiinza nimwenyi+ kulonda atwalekihu kuhandila hamu naneyi. 36 Bayi wumuleja neyi akushilihu mali hela kuhetela hadi yenaku.+ Wumutiyeña Nzambi yeyi woma,+ nawa manakweyi wakahandilaña hamu naneyi. 37 Bayi wakamukwongwesha* mali eyi kulonda akakushilihu mali ahewulu+ hela kumwinka yakuda kulonda wuhetelimuku. 38 Yami Yehova Nzambi yenu wayifumishili mwituña daEjipitu+ nakuyinka ituña daKenani kulonda nidimwekeshi nami nidi Nzambi yenu.+
39 “‘Neyi manakweyi iwashakamaña nindi mukamwihi ekala kazweñi chakwila hakukeña kudilandisha yomweni kudi eyi,+ bayi wakamukanjikija kuzata nyidimu yawuduñuku.+ 40 Watela kumuzatishaña neyi muntu iweñija mudimu,+ neyi mwenyi. Watela kukalakela hamu naneyi kushika nimuChaaka chaKusubuka. 41 Kuhiñahu wakakushiya, yena hamu nianyanindi* nakufunta kuchisaka chindi. Watela kufunta kumpata yawuswana yawankakulula jindi.+ 42 Muloña hiyanduñu jami inafumishili mwituña daEjipitu.+ Hiyatela kudilandisha aweni neyi chalandishañawu nduñuku. 43 Hiwatela kumukabishaku,+ nawa watela kumutiya Nzambi yeyi woma.+ 44 Anduñu jeyi awamayala niawambanda akafumaña munyuza yayinyeñumuka, kunyuza yeniyi dikuwunateli kulanda nduñu weyala hela wamumbanda. 45 Cheñi, wunateli kulanda anduñu hadi anyana kawañiinza anakushakama hamu naneyi+ nikuyisaka yawu yavwalikila mwituña denu nawa akekala iheta denu dahaya nyaaka. 46 Neyi munafwi, anyanenu akayiswana owu anduñu nawa akatwalekahu kuyikalakela anyanenu nakwikala iheta dawu dahaya nyaaka. Munateli kuyizatisha neyi akwanyidimu, ilaña himwatela kukabisha+ amanakwenu aIsarelaku.
47 “‘Ilaña neyi ñiinza hela mwenyi wudi mukachi kenu aheta nawa manakweyi wunakushakamayi nindi ekala kazweñi nawa hakudilandisha kudi ñiinza hela mwenyi washakamaña hakachi kenu hela kudi muntu wamuchisaka chañiinza, 48 wakatwalekahu kwikala nawuswa wakudikuula hanyima yakudilandisha yomweni. Wumu hakachi kawamanakwindi nateli kumulandulula,+ 49 hela mana kwatata yindi hela mwana weyala avwalawu kudi mana kwatata yindi hela ntaña yindi chikupu,* wamuchisaka chindi, nateli kumukuula.
“‘Hela neyi yomweni nekali namaheta, nateli kudikuula yomweni.+ 50 Watela kuchinda mpinji hamu nanowu wamulandili kufuma muchaaka chadilandishiliyi kudi yena kushika nimuChaaka chaKusubuka,+ nawa wuseya wamali adilandishiliyi nachu wakesekana nakuvula kwayaaka.+ Hayina mpinji, mafuku indi akazatayi akayichinda neyi chachindañawu mafuku amuntu eñijawu mudimu.+ 51 Neyi kunashali yaaka yayivulu, watela kuhana mali akudikuula nachu kwesekeja nayaaka yinashaliku. 52 Ilaña neyi kunashali hohu yaaka yantesha kushika muChaaka chaKusubuka, akadichindili yomweni nawa akahani mali akudikuula nachu kwesekeja nayaaka yinashaliku. 53 Watela kutwalekahu kumukalakela chaaka nichaaka neyi muntu eñijawu mudimu; nawa watela kumona kwila neyi hanakumukabishaku.+ 54 Hela chochu, neyi hakatwesha kudikuula yomweni muniyi njilaku, wakasubuka muChaaka chaKusubuka,+ yena hamu nianyanindi.*
55 “‘Hakwila aIsarela hiyanduñu jami. Hiyanduñu jami inafumishili mwituña daEjipitu.+ Yami Yehova Nzambi yenu.
26 “‘Bayi mwakadituñila+ anzambi amukunkulwayiku, bayi mwakemika nkishi wakusoña+ hela ishiki dajilaku, nawa bayi mwakasha ilola+ mwituña denu kulonda mudifukamineñaku;+ muloña yami Yehova Nzambi yenu. 2 Muhembeña masabata ami nikulemesha* iluña dami dajila. Yami Yehova.
3 “‘Neyi mukutwalekahu kwovwahila nshimbi jami nikuhemba kuleja kwami nawa mujilondela,+ 4 nakayinka nvula hampinji yayu yatelela+ nawa ituña dakedisha yakuda+ yadu nawa nyitondu yamumaha yakasoña nyikaabu yayu. 5 Yilaaka yenu yakuhulilamu mbutu, yakashikaña nikuyilaaka yakwaañwilamu nyivinyu, nawa yilaaka yakwaañwilamu nyivinyu, yakashikaña nikuyilaaka yakutumbilamu mbutu; mwakadaña yakuda yenu nakwikuta nawa mwakashakamaña akiñewa mwituña denu.+ 6 Nakaleta kuwunda mwituña+ nawa mwakakaamaña chakadi wakuyitiyisha woma;+ mwituña nakafumishamu anyama amwisaña azuwa nawa mpoku yakabali yanjita hiyakahita mwituña denuku. 7 Chakadi nikujina, mwakakupisha ayilumbu jenu nawa mwakayitapa nampoku yakabali. 8 Hakachi kenu, antu atanu akakupishaña antu 100, nawa hakachi kenu antu 100 akakupishaña antu 10,000, nawa ayilumbu jenu mwakayitapa nampoku yakabali.+
9 “‘Nakayitiya kuwaha,* nakayisemunwisha nikuyivulisha+ nawa nakahemba chitiyañenu chinatiyañeni nanenu.+ 10 Henohu muchidi kuda yakuda yayikulu yachaaka chinamani, mwatela kufumisha yakuda yayikulu kulonda mwakekali neluña hakusha yakuda yayiha. 11 Nakasha tabanaka yami mukachi kenu+ nawa hinakayikaanaku.* 12 Nakenda mukachi kenu, nakekala Nzambi yenu+ nawa enu mwakekala antu jami.+ 13 Yami Yehova Nzambi yenu wayifumishili mwituña daEjipitu kulonda mubuli kutwalekahu kwikala anduñu jawu, nawa nakotweli mpaanda jenu nakuyilisha enu mwendeña iku munabanduli nyitu mwiwulu.*
14 “‘Hela chochu, neyi mwakantiyilila wanyi hela mwakabula kuhemba iku kuleja+ kwami kwejima, 15 neyi mwakakaana nshimbi jami,+ nawa neyi mazu ami awunsompeshi mwakayimona nenu amukunkulwayi kulonda mwakabuleña kuhemba kuleja kwami kwejima nawa neyi mwakafumpa chitiyañenu chami,+ 16 iyi diyuma yinakayikoña: Nakayibabesha nayihuñu, kakohu kafwana,* mashika asweja, nakakojeja mesu enu kuleka kumona chiwahi nawa wumi wenu wakayaña nakukisika. Mwakatumba mbutu jenu chamukunkulwayi, muloña ayilumbu jenu akajida.+ 17 Nakayikaana nawa akayimika mushindu kudi ayilumbu jenu.+ Antu ayihela akayidatola enu+ nawa mwakatemukaña henohu kwosi wunakuyikumpisha.+
18 “‘Neyi chakwila hanyima yayumiyi mwakantiyilila wanyi, nakayibabesha mapampa 7 muloña wanshidi jenu. 19 Nakamanisha kudivwimba kwenu nikukojeja mawulu enu kwikala neyi chikuñu+ nawa iseki denu kwikala neyi wuneñu. 20 Mwakamanisha ñovu jenu chamukunkulwayi, muloña ituña denu dakedisha wanyi yakuda+ yadu nawa nyitondu yamwituña yakasoña nyikaabu wanyi.
21 “‘Neyi mwakatwalekahu kwenda nakudikaña nanami nikukaana kuntiyilila, nakayibombelahu yihuñu yikwawu mapampa 7 kwesekeja nanshidi jenu. 22 Nakatemesha anyama amwisaña mukachi kenu+ nawa akada anyanenu+ nikujaha yimuna yenu nakuyileñela enu kushala antesha, nawa nyikwakwa yenu yakabunda.+
23 “‘Neyi chakwila mwakakaana kufumba kwami+ nihanyima yayumiyi nawa mwakatwalekahu nakudikaña nanami, 24 ninami nawa nakadikaña nanenu nawa nakayibombelahu yihuñu yikwawu mapampa 7 muloña wanshidi jenu. 25 Nakaleta mpoku yakabali yakutenda nachu hadi enu muloña wakufumpa chitiyañenu.+ Neyi mwakadipompesha munyisumba yenu, nakatemesha musoñu mukachi kenu+ nawa akayihana muchikasa chachilumbu.+ 26 Neyi nakisañani dehi kwafumaña* yakuda yenu,*+ ambanda 10 akayochelaña enu mankendi muoveni yimu* hohu, kuhiñahu, akayanzañenaña mankendi nayipimu;+ mwakadaña ilaña himwakekutañaku.+
27 “‘Neyi chakwila mwakantiyilila wanyi nihanyima yayumiyi nawa mwakatwalekahu kwenda nakudikaña nanami, 28 nakasweja kudikaña nanenu+ nawa nakayibabesha nayihuñu yikwawu mapampa 7 muloña wanshidi jenu. 29 Mwakada nyijimba yawanyanenu awamayala ninyijimba yawanyanenu awambanda.+ 30 Nakajilumuna yinañanaña+ yenu yajila nikutema jakutentekahu insensi jenu nikulumbika nyijimba yenu yafwa hewulu danyijimba yawankishi jenu awuzondu,*+ nawa nakafuma kudi enu muloña wakuyitiya wuzondu.+ 31 Nakahana nyisumba yenu kumpoku yakabali+ nikuleñela maluña enu ajila kwikala mahembi nawa hinakepula ivumba dadiwahi* danyilambu yenuku. 32 Ami aweni nakaletesha ituña kushala kwamahembi+ hohu nawa ayilumbu jenu akashakamamu akadihayama odu ituña.+ 33 Nawa enu nakayipalañeshela mukachi kanyuza+ nawa nakaleñela ayilumbu jenu akazuñi nanenu nampoku yakabali.+ Ituña denu dakashala kwamahembi+ hohu nawa nyisumba yenu yakakisika.
34 “‘Hanoyu mpinji, ituña dakanooka nakuhemba masabata hadi mafuku ejima idakashala kwamahembi hohu himwakashakamaña mwituña dawayilumbu jenu. Hanoyu mpinji, ituña dakanooka muloña dakahembaña masabata+ idabulili kuhemba. 35 Mafuku ejima idakashala kwamahembi hohu dakanookaña, muloña hidanookeli hampinji yamasabata enu himwashakamineñamuku.
36 “‘Hakwila owu akapuluka,+ nakenzesha nyichima yawu nawoma mwituña dawayilumbu jawu; akatemukaña nimuswalu weefu dinakuleloka. Akatemuka neyi muntu wunakutemuka mpoku yakabali nawa akadimbuka chakadi muntu wunakuyikumpisha.+ 37 Akahukana mudi wumu namukwawu nakudidimbokela neyi antu anakutemuka mpoku yakabali henohu kwosi muntu wunakuyikumpisha. Himwakatwesha kuyikañesha ayilumbu jenuku.+ 38 Mwakajilumukila mukachi kanyuza+ nawa ituña dawayilumbu jenu dakayiminya. 39 Owu akashala hakachi kenu akashala nakutoka mwituña dawayilumbu jenu+ muloña wachiluwa chenu. Chalala, akatoka muloña wayiluwa yawatata jawu.+ 40 Kuhiñahu, akashimuna chiluwa chawu,+ chiluwa chawatata jawu nikubula kushinshika kwawu nawa aketeja nawu amwekesheli kubula kushinshika nachadikañiliwu nanami.+ 41 Ninami nendeli nakudikaña nawena+ nanochu chinayileteli mwituña dawayilumbu jawu.+
“‘Hadaha nyichima yawu yabula kwalama* yakadizoza,+ kuhiñahu dinu akafweta hachiluwa chawu. 42 Nawa nakanuka chitiyañenu chami chinatiyañeni naYakoba+ nichinatiyañeni naIsaka.+ Nakanuka nichitiyañenu chinatiyañeni naAbarahama+ nawa nakanuka ituña. 43 Chadishiliwu ituña kudi wena, dadiña nakuhemba masabata+ adu nawa dashalili kwamahembi hohu chakadi wena. Afweteleña hachiluwa chawu muloña akaanini mazu ami awunsompeshi nawa amweneña* nshimbi jami+ nawu jawuzondu. 44 Hela chochu, hakekalawu mwituña dawayilumbu jawu, hinakayikaana chikupu+ hela kuyinata chakwila nakayijilumuni wejima wawu nakufumpa chitiyañenu chami chinatiyañeni nawuku,+ muloña yami Yehova Nzambi yawu. 45 Muloña wawena, nakanuka chitiyañenu chinatiyañeni nawankakulula jawu+ inafumishili mwituña daEjipitu iku nyuza yinakutalaku,+ kulonda nakadimwekeshi nami nidi Nzambi yawu. Yami Yehova.’”
46 Iku dikuleja, mazu awunsompeshi ninshimbi jayinkeliyi Yehova aIsarela haMpidi yaSinayi kuhitila mudi Mosi.+
27 Yehova watwalekelihu kumuleja Mosi nindi: 2 “Hoshaku nawaIsarela nawa wuyileji neyi, ‘Neyi muntu asanyika kusanyika kwadimena+ kudi Yehova nindi wukumwinka mali anesekani nawuseya wakulandishilahu muntu,* 3 wuseya wakumulandishilahu muntu weyala wudi nayaaka kutachikila ha 20 kushika ku 60, wakekala mashekeli* asiliva 50 kwesekeja nalushekeli lwatelela lwamwiluña dajila.* 4 Ilaña neyi himumbanda, wuseya wakumulandishilahu wakekala mashekeli 30. 5 Neyi wudi nayaaka kutachikila hayitanu kushika ku 20, neyi hiiyala, wuseya wakumulandishilahu wakekala mashekeli 20, ilaña neyi himumbanda, wuseya wakumulandishilahu wakekala mashekeli 10. 6 Neyi owu muntu natachikili hakakweji kamu kushika kuyaaka yitanu, neyi hiiyala, wuseya wakumulandishilahu wakekala mashekeli atanu asiliva, ilaña neyi himumbanda, wuseya wakumulandishilahu wakekala mashekeli asatu asiliva.
7 “‘Neyi wudi nayaaka 60 kuya hewulu, neyi hiiyala, wuseya wakumulandishilahu wakekala mashekeli 15, ilaña neyi himumbanda, wuseya wakumulandishilahu wakekala mashekeli 10. 8 Ilaña neyi owu muntu hikazweñi chikupu chakwila hakutwesha kufweta wuseya wunashimuniwuku,+ akayi kudi kapristu nawa kapristu wakamupimina wuseya. Kapristu wakapima wuseya kwesekeja nayuma yinateli kutwesha kuhanayi+ owu muntu wunakusanyika.
9 “‘Neyi muntu asanyika kuhana kanyama watelela kumulambula Yehova, wejima wakahanayi kudi Yehova wakekala chuma chajila. 10 Hatela kusinsishahu wacheñi hela kuhimpa wamuwahi nawatama hela watama nawamuwahiku. Ilaña neyi ahimpa kanyama wumu nakanyama mukwawu, ejima wawu ayedi, kanyama watachi ninowu anahimpiyi akekala ajila. 11 Neyi nakuhana kanyama wamajilu+ wabula kwitejawu kuhana kwikala mulambu kudi Yehova, owu kanyama wakamwimika kumesu akapristu. 12 Kapristu wakapima wuseya wanowu kanyama, hela wamuwahi hela watama. Wuseya wakapimayi kapristu diwowenowu. 13 Ilaña neyi owu muntu nakukeña kumulandulula owu kanyama, hawuseya wunapimiwu, watela kubombelahu chipimu chimu chamuchitanu chawuseya windi.+
14 “‘Neyi muntu ajilika itala dindi kulonda diikali dajila kudi Yehova, kapristu wakapima wuseya wanodu itala, hela dadiwahi hela datama. Wuseya wakapimayi kapristu, diwowenowu.+ 15 Ilaña neyi owu muntu wunajiliki itala dindi wakakeña kudilandulula, akabombelihu mali anesekani nachipimu chimu chamuchitanu chawuseya wunapimiwu, nawa dakekala dindi.
16 “‘Neyi muntu ajilika chibalu chimu cheha dindi kudi Yehova, wuseya wanodu iha akawupima kwesekeja nambutu yiyakatumbamu: chipimu chimu chahomeri* chambutu yabali chakekala mashekeli 50 asiliva. 17 Neyi ajilika iha dindi muChaaka chaKusubuka,+ wuseya wunapimiwu wakahimpika wanyi. 18 Neyi ajilika iha dindi hanyima yaChaaka chaKusubuka, kapristu wakamuchindila owu muntu wuseya kwesekeja nayaaka yakashalaku nakushika muChaaka chaKusubuka chikahiñahu, nawa wakamufumishilaku kuwuseya wakapimayi.+ 19 Ilaña neyi owu muntu wajilikili iha dindi nakukeña kudilandulula, akabombelihu mali anesekani nachipimu chimu chamuchitanu chawuseya wunapimiwu, nawa dakekala dindi. 20 Ilaña neyi abula kudilandulula nawa odu iha adilandisha kudi muntu wacheñi, dikwila nawu hiyakadilandulula cheñiku. 21 Neyi iha adisubula muChaaka chaKusubuka, dakekala dajila kudi Yehova, hiiha dinamwinkiwu yena. Dakekala dawatupristu.+
22 “‘Neyi muntu ajilika kudi Yehova iha dalandiliyi odu dinabuli kwikala chuma chawuswana windi,+ 23 kapristu wakamuchindila wuseya kwesekeja nayaaka yakashalaku nakushika muChaaka chaKusubuka, nawa wakahana wuseya wunapimiwu hadodenodu ifuku.+ Hichuma chajila kudi Yehova. 24 MuChaaka chaKusubuka, wakafuntisha iha kudi owu muntu kwalandiliyi, dikwila nawu kudi yomweni mpata.+
25 “‘Wuseya wejima atela kuwupima kwesekeja nalushekeli lwatelela lwamwiluña dajila. Lushekeli lumu lwatela kwikala lwamagira* 20.
26 “‘Hela chochu, kwosi watela kujilika kanyama wawediku, muloña chimuna wawedi waYehova.+ Hela hiñombi wachizamba hela mukoku, wekala dehi waYehova.+ 27 Neyi hikanyama wahadi anyama amajilu nawa amukuula kwesekeja nawuseya wunapimiwu, watela kubombelahu chipimu chimu chamuchitanu chawuseya windi.+ Ilaña neyi hiyanamulandululiku, akamulandisha kwesekeja nawuseya wunamupiminiwu.
28 “‘Ilaña kwosi chuma chinafumishiyi muntu hayuma yahetayi chinahaniyi kudi Yehova namuchima wejima chinateli kulandishawu hela kulandululawuku, hela himuntu hela hikanyama hela hiiha. Chuma chejima chikumwinkawu Yehova, hichuma chajila chikupu.+ 29 Kubombelahu, kwosi muntu anasompesheliwu kukufwa atela kukuulawuku.+ Chiña tuhu+ kumujaha.
30 “‘Chuma chejima chamwikumi+ chamenaña heseki, hela chinafumi hayakuda yamwiha hela hanyikaabu yakunyitondu, chaYehova. Hichuma chajila kudi Yehova. 31 Neyi muntu nakukeña kulandulula chuma chindi chamwikumi, watela kubombelahu chipimu chamuchitanu chawuseya wachu. 32 Hakwila chimuna chejima chamwikumi chahamukanka wawañombi nichahamukanka wawanyikoku hela wawampembi, yimuna yejima yakahitaña mwishina damutondu wabiñañayi nachu kabiña, kanyama wamwikumi, watela kwikala wajila kudi Yehova. 33 Hatela kumutalatala kulonda amoni neyi wamuwahi hela watamaku, nawa hatela kumuhimpaku. Ilaña neyi ahimpa kanyama wumu nakanyama mukwawu, ejima wawu ayedi, kanyama watachi ninowu anahimpiyi akekala chuma chajila.+ Hiyanateli kuyilandululaku.’”
34 Iji diji nshimbi jawaIsarela jamwinkeliwu Mosi kudi Yehova haMpidi yaSinayi.+
MuchiHeberu, “anyana kaIsarela awamayala.”
Hela “dakuwundisha; dakufwomona.” MuchiHeberu, “dakutontolwesha.”
Hela “dakuwundisha; dakufwomona.” MuchiHeberu, “dakutontolwesha.”
Hela “tunkudimba.”
Iku kuketula mutu kunashimuniwu haniyi vasi bayi neyi hikuwuketula nakuwufumishakuku.
Hela “mawuti amanji,” dikwila nawu, mawuti anazowi namanji anyilambu.
Hela “dakuwundisha; dakufwomona.” MuchiHeberu, “dakutontolwesha.”
Hela “wumi wunakumulambula.”
Hela “wuña washikila hohu muchikasa chami.”
Hela “dakuwundisha; dakufwomona.” MuchiHeberu, “dakutontolwesha.”
Hela “mwijiku.”
Hela “dakuwundisha; dakufwomona.” MuchiHeberu, “dakutontolwesha.”
Hela “dakuwundisha; dakufwomona.” MuchiHeberu, “dakutontolwesha.”
Hela “mbutu yandenda.”
Hela “dakuwundisha; dakufwomona.” MuchiHeberu, “dakutontolwesha.”
MuchiHeberu, “mankendi,” dikwila nawu, iseka daNzambi damulambu wakuwunda.
MuchiHeberu, “mankendi,” dikwila nawu, iseka daNzambi damulambu wakuwunda.
Hela “dakuwundisha; dakufwomona.” MuchiHeberu, “dakutontolwesha.”
Hela “wumi wuvulumuna.”
Hela “mawuti amanji,” dikwila nawu, mawuti anazowi namanji anyilambu.
Hela “dakuwundisha; dakufwomona.” MuchiHeberu, “dakutontolwesha.”
Hela “wumi wuvulumuna muloña wunatiyi.”
MuchiHeberu, “izu dakushiña (dakusanyika). Hadaha mbila kutalisha hachiluwa mwabombeleli kushiña muntu wunavulumuni hela chinsahu wunakañanyi kushimuna wunsahu.
Hela “wumi wukwata.”
Hela “wumi wunyakala.”
Hadaha chinakulumbulula nawu nakañanyi kwila munasanyikiyi.
Hela “tunkudimba.”
Hela “tunkudimba.”
Chipimu chamwikumi chaifa chesekeni namalita 2.2 (makwati ayedi oma). Talenu Nsañu Jikwawu B14.
Hela “wuña washikila hohu muchikasa chami.”
Hela “wumi wubula.”
Lushekeli lumu lwesekeni namagiramu 11.4. Talenu Nsañu Jikwawu B14.
Hela “nalushekeli lwajila.”
Hela “wumi wuvulumuna.”
Hela “wumi wukoña.”
Hela “nichakuvwala chamukachi.”
Hela “mawuti amanji,” dikwila nawu, mawuti anazowi namanji anyilambu.
Hela “wuña washikila hohu muchikasa.”
Hela “dakuwundisha; dakufwomona.” MuchiHeberu, “dakutontolwesha.”
Chipimu chamwikumi chaifa chesekeni namalita 2.2 (makwati ayedi oma). Talenu Nsañu Jikwawu B14.
Hela “dakuwundisha; dakufwomona.” MuchiHeberu, “dakutontolwesha.”
Hela “akayicheki.”
Hela “mwijiku.”
Hela “wumi.”
Hela “wumi.”
Hela “wumi wenowu akawujahi nakuwufumisha hadi antu jawu.”
Hela “wumi.”
Hela “wumi wenowu akawujahi nakuwufumisha hadi antu jawu.”
Hela “Wumi wejima.”
Hela “nibasiketi yamankendi.”
Ichi hichakuvwala chakadi makasa chafwana apuloni.
Hela “nimushipi wamumbunda.”
Hela “chibañula chajila.”
Hela “nikumbashila.”
Hela “tusoti.”
Hela “dakuwundisha; dakufwomona.” MuchiHeberu, “dakutontolwesha.”
Hela “mubasiketi.”
Hela “dakuwundisha; dakufwomona.” MuchiHeberu, “dakutontolwesha.”
Hela “mubasiketi.”
MuchiHeberu, “hakwinzesha chikasa chawu.”
Hela “wuña washikila hohu muchikasa.”
Hela “Awa diwu anyama ahamaseki imwatela.”
Hela “Niñulu.”
Hela “nimawumi ejima ekala.”
Hela “yamakolukolu.”
Hela “kapoñoloji.”
Hela “Kabubu kejima kakweti mpuula kahayileñaleña.”
Hela “hejiku.”
Hela “hejiku danyanya.”
Hela “mawumi enu.”
Hela “mawumi enu.”
Hela “wumi wejima wendaña.”
Hela “mawumi ejima endaña.”
Hela “kankudimba.”
Hela “tunkudimba.”
Izu dachiHeberu dabalumunawu nawu “mbumba” datalisha kuyuma yayivulu nawa dinateli kubombelamu nyisoñu yasambukilaña yashiyashana yahekowa. Dinateli cheñi kubombelamu nyisoñu yawanikaña kuyakuvwala nimumatala.
Hela “musoñu wutaanda.”
Hela “kamuchiyedi.”
Hela “wudana chikatu chamunsambunsambu.”
MuchiHeberu, “mwikowa danyijimba yawu mwikala mayaaji.”
Talenu Kulumbulula.
Yipimu yisatu yamwikumi yaifa yesekeni namalita 6.6 (makwati 6 oma). Talenu Nsañu Jikwawu B14.
Logu yimu yesekeni namalita 0.31. Talenu Nsañu Jikwawu B14.
Ifa yamwikumi yesekeni namalita 2.2 (makwati 20 oma). Talenu Nsañu Jikwawu B14.
Hela “tunkudimba.”
Hela “kankudimba.”
MuchiHeberu, “kunshidi.”
Talenu Kulumbulula.
Talenu Kulumbulula.
MuchiHeberu, “kunshidi.”
Talenu Kulumbulula.
MuchiHeberu, “kumujimba windi.”
Hela “tunkudimba.”
Hela “tunkudimba.”
Hela “nichakuvwala chamukachi chakubuta.”
Hela “hamujimba windi wudi hatooka.”
Hadaha datalisha mukwila nawu, “Mpembi Wajimbalaña.”
Hela “kudi muntu wunadiloñeshi.”
MuchiHeberu, “Akaweli hamujimba.”
Hela “mwakakabisheña mawumi enu.” “Kudikabisha eyi aweni” kakavulu kwatalisha kuyuma yayivulu yakudibonda, kushilahu nikushakama chakadi kuda.
Hela “mawumi enu.”
MuchiHeberu, “akenzeshawu muchikasa chindi.”
Hela “dakuwundisha; dakufwomona.” MuchiHeberu, “dakutontolwesha.”
Hela “nakawukaana owu wumi.”
Hela “hamawumi enu.”
Hela “wumi wejima.”
MuchiHeberu, “nakumuvuula nzekesi yindi,” hayinu vasi nihamavasi amakwawu.
MuchiHeberu, “Hinzekesi yatata yeyi.”
MuchiHeberu, “wumwekesha nzekesi yamana kwatata yeyi.”
MuchiHeberu, “hinzekesi yamanakweyi.”
Hela “chawuzondu.”
Hela “ntuñi neyi; ibwambu deyi.”
Hela “amuhani.”
Hela “mawumi.”
MuchiHeberu, “kutiya woma.”
Hela “wumi.”
Hela “akabakana.”
Hela hekwawu, “Bayi wimana hohu nakutala henohu wumi wamukwenu wudi muwubanjiku.”
Hela “muteta; muketula.”
Hela “nsuki yenu yadikwata nawevu.”
Hela “wawumi wunafwiku.” Izu dachiHeberu dakwila nawu nefeshi, hanu dinakutalisha kudi muntu wafwa.
Hela “mwakakameña.” MuchiHeberu, “mwakatiyeña woma.”
MuchiHeberu, “chipimu chaifa chaloña.” Talenu Nsañu Jikwawu B14.
MuchiHeberu, “chipimu chahini chaloña.” Talenu Nsañu Jikwawu B14.
Hela “wumi.”
Hela “abuli kwikala washinshika kudi ami.”
Hela “wumi nakawufutalela nikuwujaha nakuwufumisha hadi antu jawu.”
MuchiHeberu, “namwekeshi nzekesi yatata yindi.”
Hela “chawuzondu.”
MuchiHeberu, “Namwekeshi nzekesi yamuhelindi.”
MuchiHeberu, “Namwekeshi nzekesi yamana kwatata yindi.”
MuchiHeberu, “Namwekeshi nzekesi yamanakwindi.”
Hela “mwilisha mawumi enu.”
Hela “wukweti spiritu yakushimuna jakumbidi.”
Hela “wumi.”
Iwu himumbanda wabula kukaamahu dehi neyala.
MuchiHeberu, “mankendi aNzambi,” kutalisha kunyilambu.
MuchiHeberu, “mankendi aNzambi.”
MuchiHeberu, “anenzeshiwu muchikasa chindi.”
Hela “wumi wudi wejima wunafwiku.” Izu dachiHeberu dakwila nawu nefeshi, hanu dinakwatankani nezu dachiHeberu dalumbuluka nawu “kufwa.”
Iwu himumbanda wabula kukaamahu dehi neyala.
Iwu himumbanda wabula kukaamahu dehi neyala.
Hela “mbutu.”
MuchiHeberu, “mbutu.”
MuchiHeberu, “mankendi.”
MuchiHeberu, “hela wabaluka muzulu.”
Hela hekwawu, “wakosa chikupu.”
MuchiHeberu, “mankendi.”
MuchiHeberu, “mankendi aNzambi.”
MuchiHeberu, “atela kudaambula kuyuma.”
Hela “wumi wenowu akawujahi nakuwufumisha.”
Hela “wumi.”
Hela “wumi.”
MuchiHeberu, “Kwosi mwenyi,” dikwila nawu, muntu wabula kwikala wamuchisaka chaAroni.
Hela “wumi.”
Hela “asumbuka kudi mwenyi.”
MuchiHeberu, “mwenyi,” dikwila nawu, muntu wabula kwikala wamuchisaka chaAroni.
MuchiHeberu, “hakachi kamamelela ayedi.”
Yipimu yiyedi yamwikumi yaifa yesekeni namalita 4.4 (makwati awana oma). Talenu Nsañu Jikwawu B14.
Hela “dakuwundisha; dakufwomona.” MuchiHeberu, “dakutontolwesha.”
Hini yesekeni namalita 3.67. Talenu Nsañu Jikwawu B14.
Yipimu yiyedi yamwikumi yaifa yesekeni namalita 4.4 (makwati awana oma). Talenu Nsañu Jikwawu B14.
Hela “dakuwundisha; dakufwomona.” MuchiHeberu, “dakutontolwesha.”
Hela “akabakana.”
Hela “mwakakabisheña mawumi enu.” “Kudikabisha eyi aweni” kakavulu kwatalisha kuyuma yayivulu yakudibonda, kushilahu nikushakama chakadi kuda.
Hela “Wumi.”
Hela hekwawu, “wakabula kushakama chakadi kuda.”
Hela “wumi.”
Hela “mwakakabisheña mawumi enu.”
Hela “Nyinkanda.”
Hela “yamumuhoñi.”
Yipimu yiyedi yamwikumi yaifa yesekeni namalita 4.4 (makwati awana oma). Talenu Nsañu Jikwawu B14.
Dikwila nawu, ijina Yehova neyi chinamwekeshiwu havasi 15 ni 16.
Hela “ajaha wumi wamuntu wudi wejima.”
Hela “Nawa wukujaha wumi wakanyama.”
Hela “wakamusondamisha.”
MuchiHeberu, “nianyanindi awamayala.”
Hela “ntaña yindi wudi wejima wamashi wowamu.”
MuchiHeberu, “nianyanindi awamayala.”
Hela “nikwakama.” MuchiHeberu, “nikutiya woma.”
MuchiHeberu, “Nakabalumukila kudi enu.”
Hela “wumi wami hiwakayikaanaku.”
MuchiHeberu, “mwenuka.”
Hela “TB.”
MuchiHeberu, “mbwechi.” Hadaha anakutalisha kumbwechi kwakudikileñawu mankendi.
Hela “mankendi enu.”
Hela “mwiijiku.”
Izu dachiHeberu dazatishawu ahanu dinateli kutalisha “kutuji” nawa adizatishaña kwikala izu dakusawula nachu.
Hela “dakuwundisha; dakufwomona.” MuchiHeberu, “dakutontolwesha.”
Hela “yachinchika.”
Hela “mawumi awu amweneña.”
Hela “wumi.”
Lushekeli lumu lwesekeni namagiramu 11.4. Talenu Nsañu Jikwawu B14.
Hela “nalushekeli lwajila.”
Homeri yimu yesekeni namalita 220 (makwati 200 oma). Talenu Nsañu Jikwawu B14.
Gira yimu yesekeni namagiramu 0.57. Talenu Nsañu Jikwawu B14.