EZEKELI

1 Muchaaka chamu 30, hefuku damuchitanu dakakweji kamuchiwana, hinadiña hakachi kawankoli+ kwakwihi nakaloña Kebari,+ mawulu enzunukili nawa natachikili kumona yimwenu yaNzambi. 2 Hefuku damuchitanu dakakweji, dikwila nawu muchaaka chamuchitanu chawunkoli waMwanta Yehoyakini,+ 3 izu daYehova denjili kudi Ezekeli* mwana kaBuzi kapristu, kwakwihi nakaloña Kebari mwituña dawaKalideya.+ Chikasa chaYehova chenjili hadi yena kwenoku.+

4 Chinatalileña, namweni mpepela yasweja+ yinakufumina kukabeta kakuchimunswa, nawa kwadiña ivu deneni nikesi kanakubidima*+ kanyeñumukiliwu kudi chejeji chatamuka, nawa mukachi kakesi mwadiña chuma chamwekeneña neyi chikuñu chakejima.*+ 5 Mukachi kaku mwadiña jamwekeneña neyi yileñaleña yayumi yiwana,+ nawa chileñaleña-hichileñaleña chamwekeneña neyi muntu. 6 Yejima yadiña nayifu* yiwana nimpuula jiwana.+ 7 Yadiña nanyendu yoloka, nawa madatilu akunyendu yayu adiña neyi amwana kañombi, nawa akekemeneña neyi wuneñu wakweñununa chachiwahi.+ 8 Mwishina dampuula jayu mwadiña makasa amuntu kutubadi twejima tuwana, nawa iyi yileñaleña yejima yiwana yadiña nachifu* nimpuula. 9 Mpuula jayu jadiña nakudikunka. Neyi yinakwenda yabalumukileña wanyi; yayileña hohu-u kumbidi.+

10 Ichi dichiyamwekeneña kumesu: Yejima yiwana yadiña nachifu* chamuntu, kuchidiilu chifu chamutupa,+ kuchimunswa chifu chañombi wachizamba,+ nawa yejima yiwana yadiña nachifu+ chambuulu.+ 11 Ichi dichamwekeneñawu kumesu. Mpuula jayu jadiña jakutandumuna mwiwulu. Chileñaleña-hichileñaleña chadiña nampuula jiyedi jadikunkileña nimpuula jiyedi jakubuta nyijimba yayu.+

12 Yayileña hohu-u kumbidi, yayileña kwejima kukukeña spiritu nawu yiyi.+ Neyi yinakwenda yabalumukileña wanyi. 13 Nawa iyi yileñaleña yayumi yamwekeneña neyi makala akesi, nawa kwadiña yuma yamwekeneña neyi yimunyi yakesi kanakubidima yadiña nakuzuyañana kumbidi nikunyima hakachi kayileñaleña yayumi, nawa mukesi+ mwakenashanineña nzaji. 14 Nawa neyi yileñaleña yayumi yiya kumbidi nawa yifunta kunyima, kwenda kwayu kwamwekeneña neyi kukenashana kwanzaji.

15 Chinatalileña yileñaleña yayumi, namweni kafumbu kamu hamaseki kadi kwakwihi nachileñaleña chejima chachumi chidi nayifu yiwana.+ 16 Tufumbu nintuñilu yatu yakekemeneña neyi ilola dakrisoliti, nawa twejima tuwana twadiña twadifwana. Mmwekenu yatu nintuñilu yatu yamwekeneña hohu neyi kafumbu kamu kadi mukafumbu kakwawu.* 17 Neyi tunakwenda, twayileña kutubadi twejima tuwana chakadi kuteñuluka hampinji yitunakwenda. 18 Tufumbu twadiña twazanduka chakwila twatiyishileña niwoma, nawa hanji yatufumbu twejima tuwana hanyeñumukili mesu.+ 19 Kwejima kukuya yileñaleña yayumi, tufumbu nitwena tukuya hamu nayu, nawa neyi yileñaleña yayumi ayinyamuna mwiwulu kufuma hamaseki, tufumbu nitwena akutunyamuna.+ 20 Yayileña kwejima kwakeñeleña spiritu nawu yiyi, kwejima kwayileña spiritu. Tufumbu nitwena akutunyamuna hamu nayu, muloña spiritu yazatikileña hayileñaleña yayumi* diyadiña nimutufumbu. 21 Neyi yenda, tufumbu nitwena tukwenda; nawa neyi yimana kuka-a, tufumbu nitwena tukwimana kuka-a; nawa neyi ayinyamuna mwiwulu kufuma hamaseki, tufumbu nitwena akutunyamuna hamu nayu, muloña spiritu yazatikileña hayileñaleña yayumi* diyadiña nimutufumbu.

22 Hewulu dayileñaleña yayumi hadiña chuma chamwekeneña neyi luzwizu chadiña nakubekuma neyi ayisi* yakutiyisha woma, iku chinatandumukili hanyitu yayu.+ 23 Mwishina daluzwizu mpuula jayu jadiña joloka, yimu yadiña yadinuña nayikwawu. Chileñaleña-hichileñaleña chadiña nampuula jiyedi jabutili kabadi kamu kanyijimba yawu nijikwawu jiyedi jabutili kabadi kakwawu. 24 Chinatiyili kuvuma kwampuula jayu, kwavumineña neyi mpola yamenji, neyi izu daWañovu Jejima.+ Neyi yenda, yatiyakeneña neyi lushindu lwamashidika. Neyi yimana kuka-a, yakulwileña mpuula jayu.

25 Kwadiña izu datiyakeni hewulu daluzwizu hanyitu yayileñaleña yayumi. (Neyi yimana kuka-a, yakulwileña mpuula jayu.) 26 Hewulu daluzwizu lwadiña hanyitu yayu hadiña chuma chamwekeneña neyi ilola dasafira,+ nawa chamwekeneña neyi itanda.+ Washakamini hetanda hewulu wamwekeneña neyi chamwekanaña muntu.+ 27 Namweni chuma chadiña nakukekema neyi chikuñu chakekema+ chamwekeneña neyi kesi kanakufumina kwamwekeneña neyi mbunda yindi nakuya kwiwulu. Nawa namweni chuma chamwekeneña neyi kesi kufumina mumbunda yindi nakuya kwishina.+ Chejeji chatoñeka chamunyeñumukili 28 neyi chakansuluñunda kadi mwivu hefuku danvula.+ Dichamwekeneña chejeji chatamuka chamunyeñumukili. Chamwekeneña neyi chamwekanaña kulema kwaYehova.+ Chinachimweni, nadibukili chamesu heseki nawa natiyili izu damuntu wunakuhosha.

2 Kufumahu, wanlejeli nindi: “Eyi mwana kamuntu,* nyamukaku kulonda nihoshi neyi.”+ 2 Chahosheliyi nanami, spiritu yenjili mudi ami nawa yankwashili kunyamuka+ kulonda nitiyi Owu wahosheleña nanami.

3 Watwalekelihu kunleja nindi: “Eyi mwana kamuntu, innakukutemesha kudi antu jaIsarela,+ kunyuza yadikaña yinadikañi nanami.+ Wena niankakulula jawu anafumpi nshimbi jami kushika nikwifuku dalelu.+ 4 Innakukutemesha kudi anyana adikaña* nawa akola nyichima,+ nawa watela kuyileja neyi, ‘Ichi dichinahoshiyi Yehova Mwanta Wabadika.’ 5 Hela chakwila akatiyilila hela akakaana kutiyilila, muloña hiyantu adikaña,+ akeluka chikupu nawu kaprofwetu wadiña mukachi kawu.+

6 “Hakwila eyi mwana kamuntu, bayi wuyitiya womaku,+ nawa bayi wutiya woma mazu awuku, hela chakwila anakunyeñumuki kudi yikwata ninyiña*+ nawa wunakushakama mukachi katunjimbu. Bayi wutiya woma mazu awuku,+ nawa bayi wuchiina chinakumwekanawu kumesuku,+ muloña hiyantu adikaña. 7 Watela kuyileja mazu ami, hela akutiyilila hela nehi, muloña hiyantu adikaña.+

8 “Hakwila eyi mwana kamuntu, tiyililaku mazu innakukuleja. Bayi wudikaña neyi awa antu adikañaku. Asamaku mukanwa keyi kulonda wudii chuma chinnakukwinka.”+

9 Chinelili nami nitali, namweni anañolweli chikasa,+ nawa muchikasa mwadiña muvuñilu wakusoneka.*+ 10 Chawutandumwiniyi kumesu ami, wadiña wakusoneka kwishinadi nikwishinadi.+ Asonekelimu nyikeña,* nsañu yakutiyisha wushona niyakudilisha makumbu.+

3 Kuhiñahu wanlejeli nindi: “Eyi mwana kamuntu, daku chuma chiwunakumona.* Daku iwu muvuñilu, nawa yaku, kahoshi naamwitala daIsarela.”+

2 Dichi naasamini mukanwa kami nawa wandiishili iwu muvuñilu. 3 Wanlejeli cheñi nindi: “Eyi mwana kamuntu, daku iwu muvuñilu winnakukwinka, nawa wukwikutishi.” Dichi natachikili kuwida nawa watoweli neyi wuchi mukanwa kami.+

4 Wanlejeli nindi: “Eyi mwana kamuntu, yaku mukachi kawantu amwitala daIsarela wuyileji mazu ami. 5 Muloña hinnakukutemesha kudi antu ahoshaña muchidi wakala hela idimi dacheñiku, ilaña kudi amwitala daIsarela. 6 Hinnakukutemesha kudi antu amavulu ashiyashana ahoshaña muchidi wakala hela idimi dacheñiku, ahoshaña mazu iwukubula kutiyishisha. Neyi nukutemesha kudi wena, akukutiyilila.+ 7 Ilaña amwitala daIsarela akukaana kukutiyilila, muloña anakukeña kuntiyilila wanyi.+ Ejima amwitala daIsarela achinchika nawa adikaña.+ 8 Tiyaña! Nakoleshi kumesu eyi neyi chakola kumesu awu nawa nakoleshi ihama deyi neyi chakola mahama awu.+ 9 Nakoleshi ihama deyi neyi dayimani, nadikoleshi nankashi kubadika ilola dakola.+ Bayi wuyitiya woma hela kuchiina chamwekanañawu kumesuku,+ muloña hiyantu adikaña.”

10 Watwalekelihu kunleja nindi: “Eyi mwana kamuntu, shakuku muchima nawa tiyililaku mazu ami ejima innakukuleja. 11 Yaku mukachi kawantu jeyi adi muwunkoli*+ nawa wuhoshi nawu. Wuyileji neyi, ‘Ichi dichinahoshiyi Yehova Mwanta Wabadika,’ hela chakwila akutiyilila hela akukaana kutiyilila.”+

12 Dichi spiritu yansendeli+ nawa natiyili izu deneni dinakubuluma kunyima yami nawu: “Kulema kwaYehova akushimekeli mwiluña dindi.” 13 Kwatiyakeneña chivumina champuula jayileñaleña yayumi chijadikunkileña+ nichivumina chatufumbu twadiña kwakwihi nayu+ nikubuluma kwasweja. 14 Spiritu yansendeli nakuntwala nawa nayili iku natiyi kutama nikuzuwa, nawa natiyili ñovu yaYehova yinakuzatika chikupu mudi ami. 15 Dichi nayili kudi ankoli adiña kuTeli Abibi, ashakamineña kwakwihi nakaloña Kebari+ nawa nashakamini kwenoku kwashakamineñawu. Nashakamini nawu mafuku 7 iku naluwankani.+

16 Chamanini mafuku 7 izu daYehova denjili kudi ami nawu:

17 “Eyi mwana kamuntu, nakutondi wiikali mukakutalatala waamwitala daIsarela;+ nawa neyi wutiya izu damukanwa kami, watela kuyileja kusoñamisha kwami.+ 18 Neyi nileja muntu watama nami, ‘Chalala wakafwa,’ ilaña eyi kumusoñamisha nehi, nawa wukañanya kuhosha kulonda wumusoñamishi muntu watama aleki yuma yatama yelañayi kulonda atwalekihu kuhanda,+ wakafwa kukoola kuluwa kwindi, muloña himuntu watama,+ ilaña mashi indi nakayikeñela kudi eyi.*+ 19 Ilaña neyi wumusoñamisha muntu watama nawa abula kuleka kwila yuma yatama ninjila yindi yatama, wakafwa kukoola kuluwa kwindi, ilaña chakadi nikujina, eyi wakapulwisha wumi weyi.+ 20 Ilaña neyi muntu waloña aleka kuloña kwindi, nawa hakukoña yuma yatama,* nakasha chuma chakuhukesha kumesu indi nawa wakafwa.+ Neyi wamusoñamishili wanyi, wakafwa nanshidi yindi nawa nyidimu yindi yakuloña hiyakayanukaku, ilaña mashi indi nakayikeñela kudi eyi.*+ 21 Ilaña neyi wumusoñamisha muntu waloña kulonda abuli kuvulumuna, dichi yena kuvulumuna nehi, chalala wakatwalekahu kuhanda muloña wamusoñamishili,+ nawa nineyi wakaamwina wumi weyi.”

22 Chikasa chaYehova chenjili hadi ami kwenoku, nawa wanlejeli nindi: “Nyamukaku, yaku kuchana chachinekineki, nawa ami nukuhosha neyi kwenoku.” 23 Dichi nanyamukili nawa nayili kuchana chachinekineki, chinelili nami nitali! kulema kwaYehova kwadiña kwenoku,+ kwadiña neyi kulema kunamweni kwakwihi nakaloña Kebari,+ nawa nadibukili chamesu heseki. 24 Kuhiñahu, spiritu yeñilili mudi ami nawa yankwashili kwimana,+ nawa Nzambi wahosheli nanami nindi:

“Yaña, kadenzeleli mwitala deyi. 25 Hakwila eyi mwana kamuntu, akakukasa nanyonji kulonda wakabuli kufuma hakachi kawu. 26 Nawa nakalamatisha idimi deyi mundakwila yakanwa keyi, wakaleka kuhosha, hiwakatwesha kuyizuwilaku, muloña hiyantu adikaña. 27 Ilaña neyi inakuhosha naneyi nakashinkulaña kanwa keyi, nawa watela kuyileja neyi,+ ‘Ichi dichinahoshiyi Yehova Mwanta Wabadika.’ Muntu wunakutiyilila atiyilili,+ nawa muntu wunakaani kutiyilila akaani, muloña hiyantu adikaña.+

4 “Nawa eyi mwana kamuntu, nonaku itafwali nawa wudishi kumbidi yeyi. Wubazilihu musumba waYerusalema. 2 Wuwukuchiki,+ wutuñi mbañu yakuwukuchika nachu,+ wutuñi mpwembu yakuwukuchika nachu,+ wutuñiliku niyilombu, nawa wunyeñumwishiku yuma yakuwujilumuna nachu.+ 3 Nonaku ilata danjiñumuki nawa wudishi hakachi haneli eyi iku musumba iku kulonda diikali mbañu yachikuñu. Kufumahu, wuwutali, nawa atela kuwukuchika; yeyi wukuwukuchika. Ichi dichinjikijilu kudi amwitala daIsarela.+

4 “Kuhiñahu, wukaamini kukabavu keyi kachimunswa nawa wushi yiluwa yaamwitala daIsarela hadi eyi aweni.*+ Wakasenda yiluwa yawu mafuku ejima iwakakaamina kukabavu keyi. 5 Nawa inakukutoñwela mafuku 390, kwesekana nayaaka yinakoñiwu yiluwa,+ nawa eyi wakasenda yiluwa yaamwitala daIsarela. 6 Nawa watela kuyimanisha.

“Dichi wakakaamina cheñi kukabavu keyi kachidiilu, nawa wakasenda yiluwa yaamwitala daYuda+ hadi mafuku 40. Ifuku dimu chaaka, ifuku dimu chaaka, dichuma chinnakuleji kwila. 7 Nawa wakatalishila chamesu eyi kuYerusalema+ anakukuchikawu iku chikasa cheyi chinashali hatooka, nawa watela kuprofweta yuma yikamumwekena.

8 “Tiyaña! Nukukukasa nanyonji kulonda wakabuli kubalumukila kukabadi kacheñi sampu wunamanishi mafuku eyi akukuchikilamu.

9 “Nawa watela kunona tidiku, bali, makundi ashiyashana, malanda, kachayi nisipeliti,* wuyishi muchuma chimu nawa wochimu mankendi iwukudaña. Muloña hadi mafuku ejima 390 iwukukaaminaña kukabavu keyi, diwu iwukudaña.+ 10 Eyi wakapimaña yakuda yahefuku-hefuku nawa wakadaña mashekeli 20.* Wakayidiilaña hampinji jakutoñola dehi.

11 “Nawa wakanwaña menji akupima, chipimu chamu 6 chahini.* Wakayinwinaña hampinji jakutoñola dehi.

12 “Wakayidaña neyi chiwunateli kuda dinkendi dabali danjiñumuki; wakayochaña kuzatisha tuji twamuntu twoma iku anakutalaku.” 13 Yehova watwalekelihu kuhosha nindi: “Ichi dichakadañawu aIsarela mankedi awu, amajilu, munyuza munakayipalañeshela.”+

14 Kufumahu, nahosheli nami: “Ochu nehi, eyi Yehova Mwanta Wabadika! Kufuma tuhu kuwansi wami kushika nidalelu, ami* kanda niditamisheñahu dehi nakuda mbiji yakanyama wunadifwili hela yakanyama anataboliwuku.+ Nawa mukanwa kami kanda mwiñileñahu dehi mbiji yamajilu.”*+

15 Dichi yena wanlejeli nindi: “Chachiwahi, nukukwiteja kuzatisha tuji twañombi chatela wuzatishi twamuntu, nawa dihuwukwochelaña mankendi eyi.” 16 Wanlejeli cheñi nindi: “Eyi mwana kamuntu, inakulekesha yakuda* kwinza muYerusalema,+ nawa antu akudaña mankendi awu akupima chakupima+ iku anakameni chikupu, nawa akunwaña menji akupima chakupima+ iku anahayami nankashi. 17 Chakekala mwenimu kulonda chikwakabula yakuda nimenji, antu akadihayami wumu namukwawu nawa akanoñi muloña wayiluwa yawu.

5 “Hakwila eyi mwana kamuntu, nonaku mpoku yakabali yatwa* wuyizatishi neyi ntewula. Tewulaku mutu weyi niwevu weyi, kufumahu wunoni sikelu kulonda wupimi nsuki nikuyanzañana mumaseka. 2 Iseka dimu dansuki wakadochi mukesi mukachi kamusumba neyi mafuku akulukuka anamani dehi.+ Kufumahu wakanoni iseka dikwawu nakudiketola nampoku yakabali kunyeñumuka mumusumba*+ wejima, nawa iseka dikwawu wakadikuwili mumpepela, nawa nakahola mpoku yakabali kulonda nakayikumpishi.+

3 “Cheñi wakanonihu nsuki jantesha wakajivuñili muchakuvwala cheyi. 4 Nawa wakanonihu jikwawu wakajinatili mukesi nawa wakajochi shitu-u. Kesi kakafuma aha nakutaanda kudi amwitala daIsarela ejima.+

5 “Yehova Mwanta Wabadika nahoshi nindi: ‘Iwu diyi Yerusalema. Namushi mukachi kanyuza, iku anamunyeñumuki kudi matuña. 6 Ilaña nadikañi namazu ami awunsompeshi ninshimbi jami, nakoñi yuma yatama kubadika nyuza nimatuña amunyeñumuka.+ Muloña anadikañi namazu ami awunsompeshi, nawa hiyanovwahili nshimbi jamiku.’

7 “Dichi, Yehova Mwanta Wabadika nahoshi nindi: ‘Chineli mwadiña antu akalisha kubadika nyuza yejima yayinyeñumuka nawa himwovwahilili nshimbi jami hela kulondela mazu ami awunsompeshiku, ilaña mwalondeleli mazu awunsompeshi anyuza yejima yayinyeñumuka,+ 8 Yehova Mwanta Wabadika nahoshi nindi: “Eyi musumba,+ inakukwimakena, ami aweni yami nakaleta wunsompeshi mukachi keyi iku nyuza yinakutalaku.+ 9 Nakakoña mudi eyi yuma yinabulahu dehi kwila, nawa yumoyu hinakayilahu cheñiku, muloña wayaaku yeyi yejima yawuzondu.+

10 “‘“Dichi atata jawantu adi mudi eyi akadaña anyanawu,+ nawa anyana niwena akadaña atata jawu, nawa nakaleta wunsompeshi mukachi keyi nawa ejima akashala mudi eyi nakayipalañeshela kutubadi twejima.”’*+

11 “Dichi, Yehova Mwanta Wabadika nahoshi nindi: ‘Kwesekeja nachinahanda ami, chineli iluña dami dajila didu watamishili nawankishi jeyi awuzondu ninayaaku yeyi yejima yawuzondu,+ ninami nakakukaana;* disu dami dikakutiyila luwi wanyi, nawa hinakakutiyila wushonaku.+ 12 Izanvu dimu dawantu jeyi dakafwa nachipupu* hela dikajilumukila mukachi keyi nanzala yakapwelendendi. Izanvu dikwawu dakadimbuka kumpoku yakabali nakukunyeñumuka.+ Nawa izanvu dikashalahu nakadipalañeshela kutubadi twejima, nawa nakahola mpoku yakabali kulonda nakadikumpishi.+ 13 Kufumahu, kuzuwa kwami kwakamana nikuhila kunayihililili kwakafwomoka, dichi nakatiya kuwaha.+ Neyi namanishi dehi kuyizuwila, akeluka nawu ami Yehova, yami inahoshi nakukonkomwena nami atela kudifukula kudi ami hohu.+

14 “‘Nakakubalumuna mahembi nawa chuma chakadiwulañawu mukachi kanyuza yakunyeñumuka nikudi muntu wejima wunakuhita kwakwihi.+ 15 Wakekala chuma chakadiwulañawu nikuseha,+ chuma chakusoñaminaku nichakuhayama chikupu kudi nyuza yakunyeñumuka, hinakaleta wunsompeshi hadi eyi nikukubabesha nakuzuwa ninakuhila. Ami Yehova, yami inachihoshi.

16 “‘Nakayitemeshela nyivu yafwana yanzala yakapwelendendi kulonda yikayikisañani. Nyivu yinakatemesha yakayijilumuna.+ Nakayiswejeshela nzala yakapwelendendi kuhitila mukulekesha kwafumaña yakuda yenu.*+ 17 Nakayitemeshela nzala yakapwelendendi nianyama azuwa amwisaña,+ nawa jakayijahila anyanenu. Chipupu nikupwekesha mashi jikayimika enu mushindu, nawa nakayiletela mpoku yakabali.+ Ami Yehova, yami inachihoshi.’”

6 Izu daYehova denjili cheñi kudi ami nawu: 2 “Eyi mwana kamuntu, talishaku chamesu eyi kumpidi jaIsarela nawa wuprofweti yuma yikajimwekena. 3 Watela kuhosha neyi, ‘Enu mpidi jaIsarela, tiyenu izu daYehova Mwanta Wabadika: Yehova Mwanta Wabadika naleji jimpidi, tupidi, tuloña niyinekineki nindi: “Tiyenu! Nakayiletela mpoku yakabali, nawa nakakisañana yinañanaña yenu. 4 Tumeña twenu akatuhumuna, jakutentekahu insensi jenu akajikotola,+ nawa antu jenu akajahawu nakayinatila kudi ankishi jenu awuzondu.*+ 5 Yibimbi yawantu jaIsarela nakayinatila kudi ankishi jawu awuzondu, nawa nakanatila mafwaha enu kutumeña twenu twejima.+ 6 Mumaluña mwejima mumwashakamaña, nyisumba akayijilumuna+ niyinañanaña akayisanda nawa yakashala kwamahembi.+ Tumeña twenu akatuhumuna nikutuchika, ankishi jenu awuzondu akayinoñesha, jakutentekahu insensi jenu akajitema, nawa nyidimu yenu akayijiyisha. 7 Nawa antu akajahawu akadimbukila mukachi kenu,+ nawa mwakeluka nenu yami Yehova.+

8 “‘“Ilaña nakashiyahu amakwawu, muloña enu amakwawu mwakapuluka kumpoku yakabali mukachi kanyuza hakayipalañeshelawu mumatuña.+ 9 Ilaña owu akapuluka akañanuka mukachi kanyuza mwakayitwalawu wunkoli.+ Akeluka nawu naneñeli nankashi muloña wakubula kushinshika* kwanyichima yawu yafumini kudi ami+ nihamuloña wamesu awu anakufwila nankashi ankishi jawu awuzondu.+ Akatiya nsonyi nankashi muloña wayuma yejima yatama niyawuzondu yinakoñiwu.+ 10 Akeluka nawu yami Yehova nawa nawu chinayitiyishili woma nami nakayiletela iku kukala, hinahosheleñamu hohuku.”’+

11 “Yehova Mwanta Wabadika nahoshi nindi: ‘Etaku mumakasa eyi nachineñi nikudatola mwendu weyi heseki nakumwekesha neyi wunaneñi. Dishoni hamuloña wayuma yatama yejima niyuma yawuzondu yinakoñi amwitala daIsarela, muloña akafwa kumpoku yakabali, nanzala yakapwelendendi ninachipupu.+ 12 Muntu wudi kwakulehi wakafwa nachipupu, muntu wudi mukamwihi wakafwa kumpoku yakabali, wejima wakapuluka kuyumiyi nawa wakashalahu wakafwa nanzala yakapwelendendi; nawa nakayizuwila chikupu.+ 13 Nawa mwakeluka nenu yami Yehova,+ hampinji yakakaama yibimbi yawu lela-a hadi ankishi jawu awuzondu, kutumeña twawu twejima,+ hatupidi twejima, hewulu jampidi jejima, mwishina damutondu wejima wawuwahi nimwishina danyitayi yanyitondu yamaneni mwalambwilañawu nyilambu yamavumba amawahi kulonda atiyishi kuwaha ankishi jawu ejima awuzondu.+ 14 Nakayolwela chikasa chami kulonda nakayibabeshi nawa nakabalumuna ituña dakashali kwamahembi, nawa maluña ejima munakushakamawu akashala kwamahembi kubadika isaña didi kwakwihi naDibila. Nawa akeluka nawu yami Yehova.’”

7 Izu daYehova denjili cheñi kudi ami nawu: 2 “Hakwila eyi mwana kamuntu, Yehova Mwanta Wabadika naleji ituña daIsarela nindi: ‘Kukuma! Kukuma kunenzi kumawombu awana etuña. 3 Ichi dinu kukuma kunakwinza hadi enu, nawa nakayizuwila, nakayisompesha kwesekeja nayilwilu yenu nawa nakayifwisha namuloña hanyidimu yenu yejima yawuzondu. 4 Disu dami dakayitiyila luwi wanyi; nawa hinakayitiyila wushonaku,+ muloña nakayibabesha kwesekeja nayilwilu yenu enu aweni, nawa mwakakabakana nankashi muloña wanyidimu yenu yawuzondu.+ Nawa mwakeluka nenu yami Yehova.’+

5 “Yehova Mwanta Wabadika nahoshi nindi: ‘Tiyenu! Kunakwinza kukala, kukala kwabulahu dehi kumwekana.+ 6 Kukuma kunakwinza; kukuma kwakenza; kwakayinyamukila.* Tiyenu! Kunakwinza. 7 Mpinji* yenu yinashiki dehi, enu mwashakama mwituña. Mpinji yinakwinza, ifuku dinaswini dehi kwakwihi.+ Hampidi hadi kuluwankana, hosi kubula nyiñulaku.

8 “‘Katataka niyihuñunwini kuzuwa kwami,+ nawa nakayizuwila nankashi,+ nakayisompesha kwesekeja nayilwilu yenu nawa nakayifwisha namuloña hanyidimu yenu yejima yawuzondu. 9 Disu dami dakatiya luwi wanyi; nawa hinakatiya wushonaku.+ Nakayibabesha kwesekeja nayilwilu yenu, nawa mwakakabakana nankashi muloña wanyidimu yenu enu aweni yawuzondu. Nawa mwakeluka nenu ami Yehova, yami inakuyibabesha.+

10 “‘Tiyenu, ifuku dinakwinza!+ Didi kwakwihi! Mpinji* yenu yinashiki dehi; mbwechi yinakenuki nawa kudivwimba kunameni. 11 Ndombu yinakuli nakwikala mbwechi yakutama.+ Wena hela maheta awu hela mazaza awu hela mpuhu yawu hijakapulukaku. 12 Mpinji yakenza, ifuku dakashika. Mukakulanda bayi azañalalaku, nawa mukakulandisha bayi adishonaku, muloña izaza dawu dejima nakadizuwila.*+ 13 Muloña mukakulandisha hakafunta kuchuma chalandishiliyiku, hela chakwila akamupulwisha, muloña chimwenu chinakundami kuyuma yakamwekena izaza dejima. Kwosi hela wumu wakafunta, nawa muloña wachiluwa chindi,* kwosi muntu hela wumu wakapulwisha wumi windiku.

14 “‘Anavumishi mpuña,+ nawa muntu wejima nadiloñeshi, ilaña kwosi muntu hela wumu wunakuya kunjitaku, muloña nakazuwila izaza dejima.+ 15 Mpoku yakabali yidi hanji,+ nawa chipupu ninzala yakapwelendendi jidi mukachi. Muntu wejima wudi hanji yamusumba wakafwa kumpoku yakabali, nawa nzala yakapwelendendi nichipupu jakajilumuna ejima adi mumusumba.+ 16 Antu akapuluka akaya kujimpidi, nawa muntu-himuntu wakadishona muloña wachiluwa+ chindi neyi chadishonaña tumbolu twamuyinekineki. 17 Makasa awu ejima akela tuhu lehu-u, nawa manuñu awu ejima akavwaña menji.*+ 18 Akavwala yisasa+ nawa akazaala. Muntu wejima akamutiyisha nsonyi nawa mutu wejima wakekala ibala.*+

19 “‘Akanatila siliva yawu munyikwakwa, nawa akamona wuru yawu nawu yawuzondu. Siliva yawu hela wuru yawu hijikatwesha kuyamwina mwifuku dakuzuwa kwaYehovaku.+ Hiyakekuta hela kwinzesha mavumu awuku, muloña yumiyi* yinekali chuma chakuhukesha chinakuletesha aluwañesheña. 20 Adisambilileña mulubanji lwayuma yawu yakudikudeka, nawa azatishili yumiyi* kutuñamu yifwikija yawu yawuzondu, ankishi jawu awuzondu.+ Dichinakelishila yumiyi yakekali yawuzondu kudi wena. 21 Nakahana yumiyi* mumakasa awañiinza kulonda akayipuupi nikudi antu atama ahamaseki kulonda akayibuwi, nawa akayijilola.

22 “‘Nakayifutalela,+ nawa akajilola iluña dami dakujinda,* atupondu akeñilamu nawa akadijilola.+

23 “‘Fulaku ileñi,*+ muloña mashi awantu anasompeshiwu+ mwaluwa anakuyipwekesha mwituña dejima nawa musumba wunenzali namadombu.+ 24 Nakaleta antu atama nankashi kufuma munyuza,+ akatambula matala awu,+ nawa nakamanisha kudivwimba kwawantu akola, nawa maluña awu ajila akayijilola.+ 25 Yihuñu chiyikayiwana, akakeñakeña kuwunda, ilaña akakumona wanyi.+ 26 Kwakela kwinza kukala iku kwinza kukala iku, nawa kwinza nsañu iyi kwinza nsañu iyi. Nawa antu akakeñakeña chimwenu kudi kaprofwetu,+ ilaña kapristu hakahanahu cheñi lushimbiku,* nawa akulumpi+ hiyakalejanahu maana* cheñiku. 27 Mwanta wakadishona,+ mulopu wakavwala chineñi, nawa makasa awantu amunodu ituña akazaala muloña wawoma. Nakayikoña kwesekeja nayilwilu yawu, nawa nakayisompesha neyi chasompeshañawu. Nawa dihu hakelukawu nawu yami Yehova.’”+

8 Nawa muchaaka chamu 6, mukakweji kamu 6, hefuku damuchitanu dakakweji, hampinji yinashakamini mwitala dami iku akulumpi amuYuda anashakami kumesu ami, kwenoku chikasa chaYehova Mwanta Wabadika chankwatili kwenoku. 2 Chinelili nami nitali, namweni chuma chamwekeneña neyi kesi; kwishina kwamwekeneña neyi mbunda yindi, kwadiña kesi, nawa kufuma mumbunda+ kuya kwiwulu mmwekenu yindi yadiña yatoñeka neyi chikuñu chakejima.*+ 3 Kufumahu, wolweli chuma chamwekeneña neyi chikasa nawa wankwatilili kumukanji wansuki yakumutu nakunsenda, nawa spiritu yansendeleli haneli iseki iku iwulu iku nakuntwala kuwiñililu wakuchiisu chamukachi+ chatalisha kukabeta kakuchimunswa, oku kwemeni chinjikijilu* chankishi wamukawu wasañumunaña mukawu.+ 4 Nawa chinelili nami nitali! kulema kwaNzambi yaIsarela kwadiña kwenoku,+ kwadiña neyi kulema kunamweni muchana chachinekineki.+

5 Kuhiñahu, wanlejeli nindi: “Eyi mwana kamuntu, mwani fumbulaku mesu eyi wutali kukabeta kakuchimunswa.” Dichi nafumbwili mesu nakutala kukabeta kakuchimunswa, nawa namweni kuchiisu chakameña chakukabeta kakuchimunswa, muwiñililu mudi ochu chinjikijilu* chamukawu. 6 Nawa wañilili nindi: “Eyi mwana kamuntu, wunamoni yuma yatama, yawuzondu yinakukoñawu amwitala daIsarela hanu,+ yinakunletesha niyi kwakulehi neluña dami dajila?+ Ilaña wukumona yuma yawuzondu nankashi kubadika iyi.”

7 Kufumahu, wantwalili kuwiñililu walubanza, nawa chinelili nami nitali, namweni iloku hambañu. 8 Wanlejeli nindi: “Eyi mwana kamuntu, mwani toheshaku iloku didi hambañu.” Dichi natohesheli iloku dadiña mumbañu, nawa namweni muwiñililu. 9 Wanlejeli nindi: “Iñilaku mukachi kulonda wumoni yuma yatama, yawuzondu yinakukoñawu munu.” 10 Dichi neñilili mukachi nawa chinelili nami nitali, namweni yifwikija yashiyashana yayuma yakalabaña niyawanyama awuzondu+ niankishi ejima awuzondu* awantu amwitala daIsarela.+ Jadiña jakubazila hambañu yejima. 11 Nawa akulumpi 70 amwitala daIsarela emeni kumbidi yaju, iku Yazaniya mwana kaShafani+ nemani mukachi kawu. Muntu-himuntu wadiña nachakwochelahu insensi muchikasa chindi, nawa wishi wevumba dadiwahi dainsensi wakakumukileña.+ 12 Wañilili nindi: “Eyi mwana kamuntu, wunamoni yuma yinakwilawu akulumpi amwitala daIsarela mumwidima, jinakwilayi mukulumpi wejima mutupeka twamukachi mwashayi ankishi jindi?* Muloña anakuhosha nawu, ‘Yehova nakutumona wanyi. Yehova nafumi mwituña.’”+

13 Nawa watwalekelihu kunleja nindi: “Wukumona yuma yawuzondu nankashi kubadika yinakwilawu.” 14 Dichi wanleteli kuwiñililu wakuchiisu chakukabeta kakuchimunswa chakwitala daYehova, nawa kwenoku namweni ambanda anashakami nawa anakumudila nzambi Tamuzi.

15 Nawa wañilili cheñi nindi: “Eyi mwana kamuntu, wunayimoni iyi yuma? Wukumona yuma yawuzondu nankashi kubadika iyi.”+ 16 Dichi wanleteli mulubanza lwamukachi lwetala daYehova.+ Kuwiñililu wakutembeli yaYehova, haneli ikeeki dahawiñililu iku kameña iku, kwadiña amayala 25 afutaleleli kutembeli yaYehova nawa atalishilili chamesu kumusela. Adiña nakudibuka kwitena kumusela.+

17 Wañilili nindi: “Eyi mwana kamuntu, wunamoni chumichi? Komana hichuma chachiwahi chakwila antu amwitala daYuda akoñeña iyi yuma yawuzondu, nakwinzesha ituña namadombu+ nikutwalekahu nakunzuwisha? Ichi anakusha mutayi* kumazulu ami. 18 Dichi nakayibabesha nakuzuwa. Disu dami dakatiya luwi wanyi; nawa hinakatiya wushonaku.+ Hela chakwila akandilila nezu datiyakana ñahi, hinakayitiyaku.”+

9 Kufumahu, wantambikili nezu datiyakana nindi: “Tambikaku ejima akenza nakujilumuna musumba, muntu-himuntu enzi nachitwa chindi chakujilumuna nachu muchikasa chindi!”

2 Namweni amayala 6 anakufumina kukabadi kachiisu chahewulu+ chatalisha kukabeta kakuchimunswa, muntu-himuntu nachitwa chindi chakujahana nachu muchikasa chindi. Nawa hakachi kawu hadiña iyala wumu wavwalili ihina iku mumbunda yindi mudi ipakumuna dayuma yansoneki yakusoneka nachu,* nawa eñilili mukachi nakwimana kwakwihi nakameña kawuneñu.+

3 Dichi kulema kwaNzambi yaIsarela+ kwanyamukili hewulu dawakerubi hikwadiña nawa kwayili muchiisu chetala,+ nawa watachikili kutambika iyala wavwalili ihina, owu wadiña nepakumuna mumbunda yindi dayuma yansoneki yakusoneka nachu. 4 Yehova wanlejeli nindi: “Yaku wuhitañani mumusumba, wuhitañani muYerusalema, nawa wushi chinjikijilu hamahama awantu ejima anakudishona nikwaaba+ hamuloña wayuma yejima yawuzondu yinakukoñawu mumusumba.”+

5 Nawa natiyili nakuleja amayala amakwawu nindi: “Mulondelenu mumusumba nawa mujahani. Mesu enu bayi atiya luwiku, nawa bayi mutiya wushonaku.+ 6 Muyijahi ejima,+ mukulumpi weyala, mukwenzi, mumbanda mujiki,* mwana wanyanya niambanda. Ilaña bayi muswina kwakwihi namuntu wejima wudi nachinjikijiluku.+ Mwatela kutachikila mwiluña dami dajila.”+ Dichi atachikilili hadi akulumpi adiña kumbidi yetala.+ 7 Kuhiñahu, wayilejeli nindi: “Mutamishi itala nawa mwinzeshi malubanza nayibimbi.+ Yenuña!” Dichi edikili nakuya nawa ajahili antu mumusumba.

8 Chayijahileñawu, yami hohu nashalilihu, nawa nadibukili chamesu heseki nakubidika nami: “Mama eyi Yehova Mwanta Wabadika! Komana wukujilumuna aIsarela ejima anashalihu hampinji yiwunakuhuñunwina kuzuwa kweyi hadi Yerusalema?”+

9 Dichi wanlejeli nindi: “Yiluwa yaamwitala daIsarela nidaYuda yinasweji, yinasweji nankashi.+ Ituña dinenzali namashi anakupwekeshawu,+ nawa musumba wunenzali namajika kanwa.*+ Muloña ahoshaña nawu, ‘Yehova nafumi mwituña, nawa Yehova nakumona wanyi.’+ 10 Hakwila ami, disu dami dakatiya luwi wanyi; nawa hinakatiya wushonaku.+ Nakayibabesha kwesekeja nayilwilu yawu.”

11 Kufumahu, namweni iyala wavwalili ihina iku mumbunda yindi mudi ipakumuna dayuma yansoneki yakusoneka nachu, nakufuntisha mazu nindi: “Neli dehi kwesekeja nachiwanleja.”

10 Chinatalileña, namweni hewulu daluzwizu lwadiña hanyitu yawakerubi hadiña chuma chamwekeneña neyi ilola dasafira chidi hewulu dawu, nawa chamwekeneña neyi itanda.+ 2 Kufumahu, walejeli iyala wavwalili ihina+ nindi: “Iñilaku hakachi katufumbu,+ mwishina dawakerubi, nawa inzeshaku makasa eyi namakala akesi+ adi hakachi kawakerubi, wuyinatili mumusumba.”+ Dichi weñilili iku inakutala.

3 Akerubi emeni kuchidiilu chetala hampinji yeñililiyi owu iyala, nawa ivu denzeli mulubanza lwamukachi. 4 Nawa kulema kwaYehova+ kwanyamukili hewulu dawakerubi nakuya muchiisu chetala, nawa itala denzeleña chovu-chovu neevu,+ nawa lubanza lwenzeli nakutoñeka kwakulema kwaYehova. 5 Chivumina champuula jawakerubi chatiyakeneña mulubanza lwahanji, neyi chatiyakanaña izu daNzambi Wañovu Jejima neyi nakuhosha.+

6 Kuhiñahu, wamulejeli owu iyala wavwalili ihina nindi: “Nonaku kesi hakachi katufumbu, hakachi kawakerubi,” dichi weñilili nakwimana kwakwihi nakafumbu. 7 Kufumahu, kerubi wumu wolweleli chikasa chindi hakesi kadiña hakachi kawakerubi.+ Wanonelihu kesi nakukisha mumakasa anowu wavwalili ihina,+ yena watambwili nawa wedikili. 8 Mwishina dampuula jawakerubi mwadiña yuma yamwekeneña neyi makasa amuntu.+

9 Chinatalileña, namweni tufumbu tuwana kwakwihi nawakerubi, kafumbu-hikafumbu kadiña kwakwihi nakerubi, nawa tufumbu twakekemeneña neyi ilola dakrisoliti.+ 10 Mmwekenu yatu twejima tuwana twadiña twadifwana, twamwekeneña hohu neyi kafumbu kamu kadi mukafumbu kakwawu. 11 Neyi tunakwenda, twayileña kutubadi twejima tuwana chakadi kuteñuluka, muloña twayileña chakadi kuteñuluka kwejima kukutalishila mutu. 12 Nyijimba yawakerubi yejima, nyima jawu, makasa awu, mpuula jawu nitufumbu, tufumbu twawu ejima awana, jejima jadiña namesu hejima-hejima.+ 13 Kutalisha kutufumbu, natiyili izu dinakutubidika nawu, “Tufumbu!”

14 Ejima* adiña nayifu* yiwana. Chifu chatachi chadiña chakerubi, chamuchiyedi chadiña chamuntu, chamuchisatu chadiña chamutupa, nawa chamuchiwana chadiña chambuulu.+

15 Nawa akerubi anyamukileña, hiyileñaleña yoyimu yayumi* yinamweni kukaloña Kebari,+ 16 nawa neyi akerubi hiyakwenda, tufumbu nitwena tukuya hamu nawu; nawa neyi akerubi anyamuna mpuula jawu hewulu kufuma hamaseki, tufumbu nitwena twateñulukileña hela kufuma kukabadi katu wanyi.+ 17 Neyi emana kuka-a, tufumbu nitwena tukwimana kuka-a; nawa neyi anyamuka, nitwena tukunyamuka nawu hamu, muloña spiritu yazatikileña hayileñaleña yayumi* diyadiña nimutufumbu.

18 Kuhiñahu, kulema kwaYehova+ kwanyamukili kufuma muchiisu chetala nakwimana kuka-a hewulu dawakerubi.+ 19 Dichi akerubi anyamwini mpuula jawu nawa anyamukili hamaseki iku inakutala. Chanyamukileñawu nakuya, tufumbu nitwena twadiña hamu nawu. Emeneni kuwiñililu wakuchiisu chetala daYehova chakukabeta kakumusela, nawa kulema kwaNzambi yaIsarela kwadiña hewulu dawu.+

20 Iyi yadiña yileñaleña yayumi* yinamweni mwishina detanda daNzambi yaIsarela kukaloña Kebari,+ dihinelukili nami adiña akerubi. 21 Ejima awana adiña nayifu yiwana, mpuula jiwana niyuma yamwekeneña neyi makasa amuntu mwishina dampuula jawu.+ 22 Nawa kumesu awu kwamwekeneña neyi kumesu kunamweni kwakwihi nakaloña Kebari.+ Ayileña hohu-u kumbidi.+

11 Nawa spiritu yannyamwini nakunleta kuchiisu chetala daYehova chakukabeta kakumusela, chiisu chatalisha kumusela.+ Kwenoku kuwiñililu wakuchiisu namweni amayala 25, nawa hakachi kawu hadiña Yazaniya mwana kaAzuri niPelatiya mwana kaBenaya, owu adiña anlomboli jawantu.+ 2 Kufumahu, Nzambi wanlejeli nindi: “Eyi mwana kamuntu, awa diwu amayala anakutiyañana kulonda akwili chatama nawa anakuleja antu maana atama muwunu* musumba. 3 Anakuhosha nawu, ‘Komana yinu hidiyi mpinji yakutuña matalaku?+ Musumba* diyi ndehu,*+ nawa etu yetu mbiji.’

4 “Dichi profwetaku kutalisha hadi wena. Eyi mwana kamuntu, profwetaku.”+

5 Kuhiñahu, spiritu yaYehova yenjili hadi ami,+ nawa Nzambi wanlejeli nindi: “Hoshaku neyi, ‘Yehova nahoshi nindi: “Enu amwitala daIsarela, chuma chimunahoshi chalala nawa neluki yuma yimunakutoñojoka. 6 Munajahishi antu amavulu mumusumba, nawa munyikwakwa munenzeshimu yibimbi.”’”+ 7 “Dichi, Yehova Mwanta Wabadika nahoshi nindi: ‘Yibimbi yimunakaamiki mumusumba diyi mbiji, nawa musumba diyi ndehu.+ Ilaña enu akayifumishamu.’”

8 “Yehova Mwanta Wabadika nahoshi nindi: ‘Mwachiinaña mpoku yakabali,+ ilaña mpoku yakabali diyinakayiletela. 9 Nakayifumisha mudi yena nawa nakayihana mumakasa awañiinza kulonda akayisompeshi.+ 10 Mwakafwa kumpoku yakabali.+ Nakayisompeshela kuñinza yaIsarela,+ nawa mwakeluka nenu yami Yehova.+ 11 Musumba hiwakekala ndehu yenuku, nawa enu himwakekala mbiji muniyi ndehuku. Nakayisompeshela kuñinza yaIsarela, 12 nawa mwakeluka nenu yami Yehova. Muloña himwovwahilili nshimbi jami nikulondela wunsompeshi wamiku,+ ilaña munakwila yuma kwesekeja nawunsompeshi wanyuza yayinyeñumuka.’”+

13 Chinaprofweteli tuhu, Pelatiya mwana kaBenaya wafwili, nawa nadibukili chamesu heseki nakubidika nezu datiyakana nami: “Mama eyi Yehova Mwanta Wabadika! Komana wukujilumuna aIsarela ejima anashalihu?”+

14 Izu daYehova denjili cheñi kudi ami nawu: 15 “Eyi mwana kamuntu, amanakweyi akweti wuswa wakukuula adi hakachi kawamanakweyi, kushilahu niamwitala daIsarela ejima, anayileji kudi antu amuYerusalema nawu, ‘Fumenu kudi Yehova. Adinu hiituña detu; anatwinkidu diikali iheta detu.’ 16 Dichi wuhoshi neyi, ‘Yehova Mwanta Wabadika nahoshi nindi: “Hela chakwila nayifumishi kwakulehi mukachi kanyuza nawa nayipalañesheli mumatuña,+ chimwakahita kapinji kantesha nakekala iluña dajila kudi wena mumatuña munayiwu.”’+

17 “Dichi wuhoshi neyi, ‘Yehova Mwanta Wabadika nahoshi nindi: “Cheñi nawa nakayisenda kufuma kudi antu nikuyipompesha kufuma kumatuña kumunapalañeni, nawa nakayinka ituña daIsarela.+ 18 Akafunta kwenoku nawa akafumishamu yuma yejima yawuzondu yidimu niyaaku yawuzondu.+ 19 Nawa nakanuñañesha nyichima yawu*+ nikusha spiritu yayiha mudi wena.+ Nakafumisha muchima wakola neyi ilola munyijimba yawu+ nakuyinka muchima wawovu,*+ 20 kulonda akwovwahileña nshimbi jami, kulondela wunsompeshi wami nikuwuhemba. Dihu dinu hiyakekalawu antu jami, nawa ami nakekala Nzambi yawu.”’

21 “‘“Ilaña owu akweti nyichima yatwalekañahu kukoña yuma yawuzondu niyaaku yawuzondu, nakayibabesha kwesekeja nayilwilu yawu,” dichinahoshiyi Yehova Mwanta Wabadika.’”

22 Dichi akerubi anyamwini mpuula jawu, nawa tufumbu twadiña kwakwihi nawena+ nikulema kwaNzambi yaIsarela kwadiña hewulu dawu.+ 23 Kuhiñahu, kulema kwaYehova+ kwafumini mumusumba nakuya nakwimena hampidi yidi kumusela wamusumba.+ 24 Muchimwenu chinamweni naspiritu yaNzambi, spiritu yannyamwini nakuntwala kudi ankoli adiña muKalideya. Kufumahu, chimwenu chinamweni chajimañeni. 25 Nawa natachikili kuleja ankoli yuma yejima yammwekesheleliyi Yehova.

12 Izu daYehova denjili cheñi kudi ami nawu: 2 “Eyi mwana kamuntu, wunakushakama nawantu adikaña. Akweti mesu, ilaña hiyamonañaku, nawa akweti matu, ilaña hiyatiyañaku,+ muloña hiyantu adikaña.+ 3 Hakwila eyi mwana kamuntu, loñejaku yiteli yeyi yakusenda muwunkoli. Dichi, namwaana iku wena anakutalaku, watela kuya muwunkoli. Fumaku kwitala deyi wuyi muwunkoli kwiluña dacheñi iku wena anakutalaku. Hadaha akwiluka munatalishi chumichi, hela chakwila hiyantu adikaña. 4 Namwaana iku wena anakutalaku, widishi yiteli yeyi yiwunaloñeji yakusenda muwunkoli, nawa namelela iku wena anakutalaku, wunyamuki nakuya neyi muntu anakutwalawu muwunkoli.+

5 “Iku wena anakutalaku, wulokoli iloku hambañu, nawa widishilimu yuma yeyi.+ 6 Iku wena anakutalaku, wushi yuma yeyi hachifwiji nawa wuyisendi nakwidika iku hachidi heyila. Wubuti hamesu eyi kulonda wubuleña kumona heseki, muloña inakukubalumuna wiikali chinjikijlu kudi amwitala daIsarela.”+

7 Nelili kwesekeja nachanlejeliwu. Namwaana nedishili yiteli yami neyi yakusenda muwunkoli, nawa namelela nalokweli iloku mumbañu nachikasa. Nawa chikwelili kabwidibwidi, nedishili yuma yami, nayisendeli hachifwiji iku anakutalaku.

8 Nantetemena izu daYehova denjili cheñi kudi ami nawu: 9 “Eyi mwana kamuntu, komana amwitala daIsarela, antu adikaña, akwihula wanyi nawu, ‘Wunakwiladi?’ 10 Wuyileji neyi, ‘Yehova Mwanta Wabadika nahoshi nindi: “Awa mazu anakundami kudi nlomboli+ wamuYerusalema niamwitala daIsarela ejima adi mumusumba.”’

11 “Wuhoshi neyi, ‘Yami chinjikijilu chenu.+ Neyi chinneli, dichakayilawu ninenu. Akayitwala muwunkoli kwituña dacheñi.+ 12 Nlomboli wudi hakachi kawu wakasenda yuma yindi hachifwiji nakuya iku hachidi heyila. Wakalokola iloku mumbañu nawa wakedishilamu yuma yindi.+ Wakabuta hamesu indi kulonda akabuleña kumona heseki.’ 13 Nakamutila kaleñi kami,+ nawa yena wakafwamu. Kuhiñahu, nakamuleta kuBabiloni, kwituña dawaKalideya, ilaña hakadimonaku. Nawa dikwakafwilayi.+ 14 Ejima adiyi nawu, ankwashi jindi nimazanvu amashidika indi, nakayipalañeshela kutubadi twejima;+ nawa nakahola mpoku yakabali kulonda nakayikumpishi.+ 15 Nawa akeluka nawu yami Yehova neyi niyimwañila munyuza nikuyipalañeshela mumatuña. 16 Ilaña hakachi kawu nakapulwishahu antesha kumpoku yakabali, kunzala yakapwelendendi nikuchipupu, kulonda akalejeña nyuza kwakayawu yuma yawuzondu yejima yakoñeliwu. Nawa atela akeluki nawu yami Yehova.”

17 Nawa izu daYehova denjili cheñi kudi ami nawu: 18 “Eyi mwana kamuntu, watela kuda yakuda* yeyi nakuzaala nikunwa menji nakudihomba nikwakama.+ 19 Wuyileji antu adi mwituña neyi, ‘Yehova Mwanta Wabadika nayileji antu amuYerusalema mwituña daIsarela nindi: “Akadaña yakuda* yawu iku anakameni nikunwa menji iku anahayami nankashi, ituña dawu dakashala kwamahembi chikupu+ muloña wamadombu awantu ejima anakushakamamu.+ 20 Nyisumba mwashakama antu akayikisañana, ituña nidena dakashala kwamahembi.+ Nawa dihu himwakeluka nenu yami Yehova.”’”+

21 Nawa izu daYehova denjili cheñi kudi ami nawu: 22 “Eyi mwana kamuntu, indi ichi chishimu chimukweti muIsarela chatalisha mudihi, chakwila nawu, ‘Mafuku ahitaña, ilaña kwosi chimwenu nichimu chashikijewañaku’?+ 23 Dichi wuyileji neyi, ‘Yehova Mwanta Wabadika nahoshi nindi: “Nakajiyisha iyi nhoshelu, nawa ichi chishimu hiyakachitahu cheñi muIsarelaku.”’ Ilaña wuyileji neyi, ‘Mafuku anaswini dehi kwakwihi,+ nawa chimwenu chejima chakashikijewa.’ 24 Muloña mudi amwitala daIsarela+ himwakekalahu cheñi chimwenu chakutwamba hela kuhoña kwakulumbishaku.* 25 ‘“Muloña ami Yehova, nakahosha. Izu dejima dinakahosha dakashikijewa chakadi kulaba.+ Enu antu adikaña,+ mumafuku enu, nakahosha izu nawa nakadikoña,” dichinahoshiyi Yehova Mwanta Wabadika.’”

26 Izu daYehova denjili cheñi kudi ami nawu: 27 “Eyi mwana kamuntu, ichi dichinakuhosha antu* jaIsarela nawu, ‘Chimwenu chinakumonayi chakashikijewa kumbidi kwakweni, nawa nakuprofweta yuma yakamwekana kumbidi chikupu.’+ 28 Dichi wuyileji neyi, ‘Yehova Mwanta Wabadika nahoshi nindi: “‘Kwosi izu dami hela dimu dakalabaku; chejima chinukuhosha chakashikijewa,’ dichinahoshiyi Yehova Mwanta Wabadika.”’”

13 Nawa izu daYehova denjili cheñi kudi ami nawu: 2 “Eyi mwana kamuntu, profwetaku yuma yakayimwekena atuprofwetu amuIsarela,+ nawa wuyileji owu aprofwetaña yuma yamunyichima yawu aweni+ neyi, ‘Tiyenu izu daYehova. 3 Yehova Mwanta Wabadika nahoshi nindi: “Oyihuñu yakamonawu atuprofwetu asupa, alondelaña yuma yamunyichima yawu aweni henohu kwosi nichuma chinamwoniwuku!+ 4 Eyi Isarela, atuprofwetu tweyi anekali neyi nyumbu yinakushakama mumahembi. 5 Himwakaya hamaluña hahumoka mumbañu jamalola nakuyituñulwilawu amwitala daIsarelaku,+ kuchiina aIsarela akenda katwalekahu kwimana kunjita mwifuku daYehova.”+ 6 “Anamoni yimwenu yakutwamba nikushimwina chadimu yuma yamakudi, owu anakuhosha nawu, ‘Yehova nahoshi nindi,’ henohu Yehova hidiyi wunayitemeshiku, nawa atalilaña kushikijewa kwamazu anahoshiwu.+ 7 Munamoni chimwenu chakutwamba nikushimwina chadimu yuma yamakudi nenu, ‘Yehova nahoshi nindi,’ henohu ami hinnahoshihu chuma chidi chejimaku.”’

8 “‘Dichi, Yehova Mwanta Wabadika nahoshi nindi: “‘Chineli munahoshi yuma yamakudi nikumona yimwenu yakutwamba, nayimakeni,’ dichinahoshiyi Yehova Mwanta Wabadika.”+ 9 Chikasa chami chinayimakeni atuprofwetu amonaña yimwenu yakutwamba nawa ashimwinaña chadimu yuma yamakudi.+ Hiyakekala hamu nawantu inadikunda nawuku; nawa hiyakayisoneka mumukanda wawantu amwitala daIsarelaku. Akafunta mwituña daIsarela wanyi; nawa mwakeluka nenu yami Yehova Mwanta Wabadika.+ 10 Yejimiyi yakayimwekena muloña analuwañeshi antu jami nanochu chinahoshiwu nawu, “Kudi kuwunda!” henohu kuwunda kwosi.+ Neyi atuña mbañu yamukachi yabula kukola, ayilambwijaña mpemba.’*+

11 “Wuyileji anakulambwija mpemba kumbañu neyi yakahumuka. Yakahumuka chikwakanoka nvula yeneni, nvula yamalola* nichikakunka mpepela yasweja.+ 12 Nawa neyi mbañu yinahumuki dehi akayihula enu nawu, ‘Indi mpemba yimwalambwijilihu yidi kudihi?’+

13 “Dichi, Yehova Mwanta Wabadika nahoshi nindi: ‘Nakakunkisha mpepela yeneni chikupu, nakanokesha nvula yeneni ninvula yamalola yafwana kulonda nakamwekeshi kuzuwa kwami. 14 Nakahumuna mbañu yimwalambwijili mpemba nawa yikakaama la-a hamaseki, nawa chikuku chayu chikashala hatooka. Neyi musumba wuhumuka, ninenu mukajilumukila mwomwenomu; dihu himwakeluka nenu yami Yehova.’

15 “‘Chinakamanisha kusukwila kuzuwa kwami hambañu nihadi antu ayilambwijili mpemba, nakayileja enu nami: “Mbañu yinakisiki dehi, niantu ayilambwijili anakisiki dehi.+ 16 Atuprofwetu amuIsarela anajilumuki, owu aprofwetaña hadi Yerusalema nawa amumwenañaku yimwenu yakuwunda, henohu kuwunda kwosi,”’+ dichinahoshiyi Yehova Mwanta Wabadika.

17 “Hakwila eyi mwana kamuntu, talishaku kudi anyana awambanda avwalawu kudi antu jeyi owu aprofwetaña yuma yamunyichima yawu aweni, nawa wuprofweti yuma yakayimwekena. 18 Wuyileji neyi, ‘Yehova Mwanta Wabadika nahoshi nindi: “Oyihuñu yakamonawu ambanda achimaña tumahina twakuvwala hamakasa* nikutuña yitambala yakunyitu yashiyashana kulonda azombi mawumi awantu! Komana munakufwila kuzomba mawumi awantu jami nakukeña kuhandisha mawumi enu tahindi? 19 Hamuloña wanyikonu yenzala yabali nihankuuku* yamankendi,+ komana mukunjilola mukachi kawantu* jami kuhitila mukujaha antu atela kubula kufwa nakuhandisha antu* atela kufwa? Munakwila mwenimu nanochu chimunakudimba antu jami atiyililaña kumakudi enu.”’+

20 “Dichi, Yehova Mwanta Wabadika nahoshi nindi: ‘Enu ambanda, naheli tumahina twenu tumwazombaña nachu antu* neyi kwiji hiyatuda, nakatutabola kumakasa enu nikusubula antu imunakuzomba neyi tuda. 21 Nakatabola yitambala yenu nikupulwisha antu jami mumakasa enu, nawa himwakayizombahu cheñiku. Dihu himwakeluka nenu yami Yehova.+ 22 Munaneñeshi muntu waloña namakudi+ enu henohu ami hinamuneñeshelihuku,* nawa munakoleshi makasa amuntu watama,+ nakumuletesha abuli kuleka yuma yatama kulonda ahandi.+ 23 Dichi enu ambanda, himwakamonahu cheñi yimwenu yakutwamba hela kuhoñahuku.+ Nakapulwisha antu jami mumakasa enu, nawa mwakeluka nenu yami Yehova.’”

14 Dichi akulumpi amakwawu amuIsarela enjili nawa ashakami kudi ami.+ 2 Kufumahu, izu daYehova denjili kudi ami nawu: 3 “Eyi mwana kamuntu, awa amayala anakufwila kulondela ankishi jawu awuzondu,* nawa asha chuma chakuhukesha chakojejaña antu kuvulumuna. Komana niyiteji añihuli tahindi?+ 4 Dichi hoshaku nawu wuyileji neyi, ‘Yehova Mwanta Wabadika nahoshi nindi: “Neyi kaIsarela nakufwila kulondela ankishi jindi awuzondu nikusha chuma chakuhukesha chakojejaña antu kuvulumuna nawa enza nakwihula kaprofwetu, ami Yehova, yami nakamwakula mwatelela kwesekeja nakuvula kwawankishi jindi awuzondu. 5 Nakafwisha nyichima yaamwitala daIsarela* mutentu muloña wejima wawu anafumi kudi ami nawa analondeli ankishi jawu awuzondu.”’+

6 “Dichi wuyileji amwitala daIsarela neyi, ‘Yehova Mwanta Wabadika nahoshi nindi: “Funtenu nawa lekenu kulondela ankishi jenu awuzondu niyaaku yenu yejima yawuzondu.+ 7 Muloña neyi kaIsarela wejima hela ñiinza wunakushakama muIsarela yadaambula yomweni kudi ami nakufwila kulondela ankishi jindi awuzondu nikusha chuma chakuhukesha chakojejaña antu kuvulumuna nawa enza nakwihula kaprofwetu kami,+ ami Yehova, yami nakamwakula. 8 Nakamufutalela owu muntu nawa nakamwilisha kwikala chinjikijilu nawa chishimu, nakamujaha nakumufumisha hadi antu jami.+ Dihu himwakeluka nenu yami Yehova.”’

9 “‘Ilaña neyi kaprofwetu anamusupishi nawa ahana ñakwilu, dikwila nawu ami Yehova, yami inamusupishi owu kaprofwetu.+ Nukumwolwela chikasa chami nakumujilumuna hadi antu jami aIsarela. 10 Wejima wawu akwikala namuloña; muloña wanowu wunakwihula wukwikala wowumu namuloña wakaprofwetu, 11 kulonda amwitala daIsarela aleki kuntemwoka nikuditamisha nayilwilu yawu yatama. Nawa akwikala antu jami, ninami nukwikala Nzambi yawu,’+ dichinahoshiyi Yehova Mwanta Wabadika.”

12 Nawa izu daYehova denjili cheñi kudi ami nawu: 13 “Eyi mwana kamuntu, neyi ituña dinvulumuna muloña wakubula kushinshika, nakadolwela chikasa chami nakudibabesha nikulekesha kwafumaña yakuda yadu,*+ nawa nakaletamu nzala yakapwelendendi+ nikujaha antu adimu nianyama.”+ 14 “Yehova Mwanta Wabadika nahoshi nindi, ‘Hela neyi awa amayala asatu, aNowa,+ Danyeli+ niYoba+ adiña munidi ituña, adi kudipulwisha awenawu* hohu muloña wakuloña kwawu.’”+

15 “‘Hela neyi nihitisha mwituña anyama amwisaña azuwa nawa afumishamu antu* nakudishiya kwamahembi chakadi muntu hela wumu wakuhitamu kuchiina anyama amwisaña,+ 16 kwesekeja nachinahanda ami, hela tuhu neyi awa amayala asatu adiña munidi ituña, hiyadi kupulwisha anyanawu awamayala hela awambandaku; adi kudipulwisha awenawu hohu, nawa ituña dadi kushala kwamahembi,’ dichinahoshiyi Yehova Mwanta Wabadika.”

17 “‘Hela neyi nileta mpoku yakabali mwituña+ nawa nihosha nami: “Mpoku yakabali yihiti mwituña,” nakujaha antu nianyama,+ 18 kwesekeja nachinahanda ami, hela tuhu neyi awa amayala asatu adiña munidi ituña, hiyadi kupulwisha anyanawu awamayala hela awambandaku; adi kudipulwisha hohu awenawu,’ dichinahoshiyi Yehova Mwanta Wabadika.”

19 “‘Hela neyi nitemesha chipupu munodu ituña+ nawa nihuñunwinamu kuzuwa kwami nakupwekesha mashi kulonda nijahi antu adimu nianyama, 20 kwesekeja nachinahanda ami, hela tuhu neyi awa amayala asatu, aNowa,+ Danyeli+ niYoba+ adiña munidi ituña, hiyadi kupulwisha anyanawu awamayala hela awambandaku; adi kudipulwisha awenawu* hohu muloña wakuloña kwawu,’ dichinahoshiyi Yehova Mwanta Wabadika.”+

21 “Muloña Yehova Mwanta Wabadika nahoshi nindi: ‘Dichichakekala nihampinji yinakatemesha yuma yiwana yakumubabesha nachu*+ Yerusalema, dikwila nawu, mpoku yakabali, nzala yakapwelendendi, anyama amwisaña azuwa nichipupu,+ kulonda nakajahi antu adimu nianyama.+ 22 Hela chochu, antu amakwawu akashalamu akapuluka nawa akayidishamu,+ anyana awamayala niawambanda. Anakwinza kudi enu, nawa neyi mumona yilwilu yawu ninyidimu yawu, chakadi nikujina, mwakakundejewa hamuloña wamakabi inaleteli hadi Yerusalema, yuma yejima yinamukoñeli.’”

23 “Yehova Mwanta Wabadika nahoshi nindi, ‘Mwakakundejewa chimwakamona yilwilu yawu ninyidimu yawu, nawa mwakeluka nenu hinamubabesheli Yerusalema chakadi muloñaku.’”+

15 Izu daYehova denjili cheñi kudi ami nawu: 2 “Eyi mwana kamuntu, indi mutondu wamuvinyu wesekena hadihi namutondu wukwawu hela nanyitayi yanyitondu yamwisaña? 3 Komana kuniwu muvinyu anateli kufumishaku mutondu wakuzata nachu mudimu? Hela komana antu anateli kusoñaku lubwambu lwakukudikaku yuma? 4 Tiyenu! Awunatilaña mukesi nawa wekalaña nchawa, dichi kesi kwochaña insa jejima jiyedi nawa hakachi kaniwu mutondu hababikaña. Kutala dinu wunateli kuzata mudimu wudi wejima? 5 Nihiwachidiña wamukuma, hiwashikilamu kuwuzatisha kumudimu wudi wejimaku. Dichi neyi wunahi dehi nakubabika, hiyakutwesha kuwuzatisha hela hantiku!”

6 “Dichi, Yehova Mwanta Wabadika nahoshi nindi: ‘Neyi chinnahani mutondu wamuvinyu hakachi kanyitondu yamwisaña wiikali nchawa, dichinakayila niantu amuYerusalema.+ 7 Nayifutaleli. Anatemuki kesi, ilaña kesi kakayocha. Nawa neyi nayifutaleli dehi, dihu himwakeluka nenu yami Yehova.’”+

8 “‘Nawa nakelisha ituña kushala kwamahembi+ muloña anakoñi yuma yatama,’+ dichinahoshiyi Yehova Mwanta Wabadika.”

16 Izu daYehova denjili cheñi kudi ami nawu: 2 “Eyi mwana kamuntu, muleji Yerusalema yaaku yindi yawuzondu.+ 3 Wuhoshi neyi, ‘Ichi dichinamulejiwu Yerusalema kudi Yehova Mwanta Wabadika nindi: “Eyi wafumini kwituña dawaKenani nawa dikuwavwalikilili. Tata yeyi wadiña mwini Amori,+ mama yeyi wadiña mwini Hiti.+ 4 Kutalisha kukuvwalika kweyi, hefuku diwavwalikili mukwa* weyi hiyawuketwiliku, hiyakuwelesheli menji kulonda wutookiku, hiyakukwitili muñwaku, nawa hiyakuvuñekeli mumahinaku. 5 Kwosi wakutiyilili luwi nakukwilila yuma yejimiyiku. Kwosi wakutiyilili wushonaku. Ilaña akunatilili mumpata muloña eyi* akuheleli hefuku diwavwalikili.

6 “‘“Chinahitileña, nakumweni wunakusobwela nyendu mumashi eyi, nawa hampinji yiwadiña wakaama mumashi eyi, nakulejeli nami: ‘Twalekakuhu kuhanda!’ Eñañi, nakulejeli iku wunakaami mumashi eyi nami: ‘Twalekakuhu kuhanda!’ 7 Nakuvulishili chikupu neyi nyitombu yinakututuka mwiha, nawa wakulili, washikili hawunkaña nawa wavwalili yuma yakudikudeka yayiwahi nankashi. Mayeli eyi aseleli, ninsuki jeyi jakulili; ilaña wachidiña nzekesi chakadi yakuvwala.”’

8 “Yehova Mwanta Wabadika nahoshi nindi, ‘Chinahitileña, nakumweni nami wunakuli wunashiki hachipimu chakukukeña. Dichi nakubutili chakuvwala* chami+ nakubuta nzekesi yeyi nawa nasanyikili nikutiyañana chitiyañenu naneyi, nawa wekalili wami. 9 Kubombelahu, nakuwelesheli nakukufumisha mashi hamujimba nawa nakuwayishili manji.+ 10 Kuhiñahu, nakuvwikili chakuvwala chakubaza chiwahi, nakwinkeli nkwabilu jajiwahi jachitembi* nikukuvuñeka mwihina dadiwahi, nawa nakuvwikili yakuvwala yalema wuseya. 11 Nakuwahishili nayuma yakudikudeka nawa nakuvwikili makaayi kumakasa niileñi* munshiñu. 12 Nakuvwikili nikazeya kumazulu nawa nakuvwikili tuzeya kumatu nichibañula chalubanji kumutu weyi. 13 Watwalekelihu kudiwahisha nawuru nisiliva, nawa wavwalileña mahina amawahi, mahina alema wuseya nichakuvwala chakubaza chiwahi. Wadiileña wuña wawuwahi walembuluka, wuchi nimanji, wakulileña nalubanji chikupu+ nawa washikililimu kwikala mwadi.’”*

14 “Yehova Mwanta Wabadika nahoshi nindi, ‘Mpuhu* yeyi yataandili mukachi kanyuza+ muloña walubanji lweyi, wadiña walubanji chikupu muloña nashili lubanji lwami hadi eyi.’”+

15 “‘Ilaña watachikili kukuhwelela mulubanji+ lweyi, nawa wekalili chivumbi muloña wampuhu yeyi.+ Wataandishili yilwilu yeyi yawuvumbi nanochu chiwelileña wuvumbi namuntu wejima wahitileña,+ nawa wadihanineña eyi aweni kudi yena. 16 Wanonelihu yakuvwala yeyi nakutuñamu yinañanaña yayiwahi hiwelilileña wujila.+ Yuma yamuchidiwu hiyatela kumwekanaku, nawa bayi yakamwekanihu cheñiku. 17 Wanoneli niyingelingeli* yeyi yalubanji yakutuña nawuru nisiliva yinakwinkeli nawa watuñilimu yifwikija yawantu awamayala yiwelileña nayu wujila.+ 18 Nawa wanoneli yakuvwala yeyi yakubaza chiwahi nakuyivwikayu.* Wayinkeli manji ami niinsensi yami.+ 19 Nawa dinkendi dinakwinkeli nami wudii—dakutuña nawuña wawuwahi walembuluka, manji niwuchi—nidena wadilambwili kudi awa ankishi kulonda depukeña ivumba dadiwahi.*+ Ichi dichuma chamwekeni,’ dichinahoshiyi Yehova Mwanta Wabadika.”

20 “‘Wanoneli anyaneyi awamayala niawambanda iwavweli nanami+ nakuyilambula kudi awa ankishi kulonda ayidii.+ Komana yilwilu yeyi yawuvumbi yiwakoñaña yinashikili wanyi? 21 Wanjahilili anyanami, nawa wayihanini ekali nyilambu nanochu chiwayihitishili mukesi.+ 22 Hampinji yiwelileña yaaku yeyi yejima yawuzondu niwujila, hiwanukili mafuku akuwansi weyi hiwadiña nzekesi chakadi yakuvwala iku wunakusobwela nyendu mumashi eyiku. 23 Oyihuñu yiwakamona! Oyihuñu yiwakamona muloña wunakoñi iyi yuma yejima yatama!’+ dichinahoshiyi Yehova Mwanta Wabadika. 24 ‘Wadilumbikilili mulumba nawa wadituñilili chinañanaña mulubanza-hilubanza. 25 Watuñili yinañanaña hamaluña alema nankashi mumukwakwa wudi wejima, nawa wabalumwini lubanji lweyi kwikala chuma chawuzondu kuhitila mukudihana eyi aweni* kudi muntu wejima wahitileña,+ nawa wavulishili yilwilu yeyi yawujila.+ 26 Welili wujila nawanyana kaEjipitu+ awamayala, antuñi neyi akweti chikupu mpwila yawuvumbi,* nawa wanhilishili nayilwilu yeyi yawujila yakadi kutwesha kuchinda. 27 Ichi dinu inakukwolwela chikasa chami nakukubabesha nikukehesha yakuda yeyi+ nawa nukukuhana kudi ambanda akuhela+ akwili munakukeñawu, dikwila nawu anyana kawaFilisitinu, owu ahayamini muloña wayilwilu yeyi yawuzondu.+

28 “‘Chineli wachidiña nampwila yakwila wuvumbi, dichi welili wujila nawanyana kaAsiriya+ awamayala, ilaña hanyima yakwila nawu wujila, mpwila yeyi yakwila wuvumbi yamanini wanyi. 29 Dichi watandishili wujila weyi kukabadi ketuña dawakakulanda nakulandulula* nikudi aKalideya,+ ilaña hohamu mpwila yeyi yakwila wuvumbi yamanini wanyi. 30 Muchima weyi wakatili* nankashi,’* dichinahoshiyi Yehova Mwanta Wabadika, ‘nanochu chiwakoñeli yuma yejimiyi, nakudilisha neyi chivumbi wabula nsonyi!+ 31 Ilaña wadilumbikilili mulumba heluña dalema nankashi mumukwakwa wudi wejima nawa watuñili chinañanaña mulubanza-hilubanza, hiwadiña neyi chivumbiku, muloña wakaanini kukonda mali adi ejima. 32 Eyi wudi mumbanda chivumbi washiyaña nfumweyi nakuya kudi amayala acheñi!+ 33 Ayivumbi ejima+ ayinkaña yawaana kudi antu, ilaña eyi yeyi wunakwinka yawaana ejima anakukukeña,+ nawa wayinkaña majika kanwa* kulonda enzi kudi eyi nakwila wuvumbi+ kufuma kumaluña ejima. 34 Eyi wunambukiku nawakwenu ambanda adiñijaña muyilwilu yawunyakalwalu. Kwosi welaña wuvumbi neyi chiwunakwila eyiku! Wondaña akwenu, ilaña eyi hiyakondañaku. Njila yeyi yaambukaku.’

35 “Dichi eyi nyakalwalu,+ tiyaku izu daYehova. 36 Yehova Mwanta Wabadika nahoshi nindi: ‘Chineli wuvumbi weyi wunasoloki hatooka nawa nzekesi yeyi yinashali hatooka hampinji yiwelaña wuvumbi nawatujila tweyi nihamuloña wawankishi jeyi ejima awuzondu*+ iwalambwileña mashi awanyaneyi,+ 37 dichi inakupompesha atujila tweyi ejima iwelileña nawu wuvumbi, ejima iwakeñeli niejima iwaheleli. Nukukupompeshelawu kufuma kumaluña ejima, nukukuvuula nakukushiya nzekesi nawa akumona chikupu nzekesi yeyi.+

38 “‘Nawa nukukubabesha neyi chababeshañawu ambanda ayivumbi+ niambanda apwekeshaña mashi,+ nawa nakelisha mashi eyi kupweka muloña wakuzuwa nimukawu.+ 39 Nukukuhana mumakasa awu, nawa wena akusanda nyilumba yeyi niyinañanaña yeyi.+ Nawa akukuvuula yakuvwala yeyi+ nikusenda yingelingeli*+ yeyi yalubanji nakukushiya hohu nzekesi. 40 Akukuletela izaza dawantu+ kulonda dikubabeshi, akukwasa malola+ nawa akukujaha nampoku jawu jatubali.+ 41 Akwocha matala eyi nakesi+ nawa akukusompesha hamesu awambanda amavulu. Dichi nukulekesha wujila weyi,+ nawa wukuleka kondana. 42 Nukuleka kukuzuwila+ nikukuhilila;+ nukudiwunjika nawa hinakatiyahu cheñi kutamaku.’

43 “Yehova Mwanta Wabadika nahoshi nindi, ‘Chineli hiwanukili mafuku akuwansi weyiku,+ nawa wunanzuwishi muloña wayuma yejima yiwunakukoña, ichi dinu inakukubabesha muloña wayilwilu yeyi. Nawa hiwakakoñahu cheñi yilwilu yawuzondu niyaaku yejima yawuzonduku.

44 “‘Tiyaña! Muntu wejima wataña yishimu wakakundamisha ichi chishimu kudi eyi nindi: “Chochidi mama yindi, dichidi nimwana!”+ 45 Eyi wudi neyi mama yeyi watiyili nfumwindi nianyanindi kutama. Nawa wudi neyi ahela jeyi atiyili anfumu jawu nianyanawu kutama. Mama yeyi wadiña mwini Hiti, nawa tata yeyi wadiña mwini Amori.’”+

46 “‘Yayeyi wamumbanda hiSamariya,+ washakamaña kukabeta keyi kakuchimunswa* hamu nawanyanindi awambanda,*+ nawa mwanyikeyi wamumbanda hiSodoma,+ washakamaña kukabeta keyi kakuchidiilu* hamu nawanyanindi awambanda.+ 47 Bayi neyi wendeli hohu munjila jawu nikulondela yaaku yawu yawuzonduku, ilaña mukapinji kantesha hohu yilwilu yeyi yatamini chikupu kubadika yawu.+ 48 Yehova Mwanta Wabadika nahoshi nindi, ‘Kwesekeja nachinahanda ami, mwanyikeyi Sodoma nianyanindi awambanda hiyanakoñihu yuma yatama neyi yiwunakoñi eyi nawanyaneyi awambandaku. 49 Tiyaña! Iyi diyiluwa yakoñeliyi mwanyikeyi Sodoma: Yena nianyanindi awambanda+ adisambileña+ nawa adiña nayakuda yayivulu+ nikushakama chakadi kwakama,+ ilaña hiyakwashilihu antu anakukabakana niatuzweñiku.+ 50 Atwalekelihu nakudivwimba+ nikulondela yaaku yawuzondu iku inakutalaku,+ dichi namweni nami chinateleli kuyifumishamu.+

51 “‘NiSamariya+ hakoñelihu nshidi yakushika hakachi kakuvula kwanshidi yiwakoñeliku. Watwalekelihu kudivulishila yaaku yawuzondu kubadika wena, chakwila waletesheli anakweyi kumwekana neyi aloña muloña wayaaku yeyi yejima yawuzondu.+ 52 Ichi dinu itejaku kusawuka muloña wunahakwiliku yilwilu yawanakweyi. Chineli wunakoñi yuma yatama nankashi kubadika wena, wunayileteshi kwikala aloña kubadika eyi. Dichi dinu, tiyaku nsonyi nawa itejaku kusawuka muloña wunelishi anakweyi kumwekana neyi aloña.’

53 “‘Nawa nakapompesha ankoli jawu, ankoli jaSodoma nawanyanindi awambanda niankoli jaSamariya nawanyanindi awambanda. Nakapompesha niankoli jeyi hamu nawena,+ 54 kulonda wakasawuki. Nawa wakatiya nsonyi muloña wanochu chiwunayikundeji. 55 Mwanyikeyi Sodoma nianyanindi awambanda akekala neyi chadiñawu hakusambila, nimanakweyi Samariya nianyanindi awambanda akekala neyi chadiñawu hakusambila. Nineyi hamu nawanyaneyi awambanda mwakekala neyi chimwadiña hakusambila.+ 56 Mwanyikeyi Sodoma hiwamutenenihu hela chanti hamafuku iwadisambileña, 57 henohu nshidi jeyi kanda jisolokiku.+ Ichi dinu anakukusawula kudi anyana kaSiriya awambanda niantuñi nindi, nawa anakukuseha kudi anyana kawaFilisitinu+ awambanda, ejima akunyeñumuka. 58 Akakubabesha muloña wayilwilu yeyi yawuzondu niyaaku yeyi yawuzondu,’ dichinahoshiyi Yehova.”

59 “Muloña Yehova Mwanta Wabadika nahoshi nindi: ‘Ichi dinu inakukwila kwesekeja nayuma yiwunakoñi,+ muloña wadiwili kusanyika nanochu chiwafumpili chitiyañenu chami.+ 60 Ilaña ami nakanuka chitiyañenu chinatiyañeni naneyi hampinji yiwadiña kansi, nawa nakatiyañana naneyi chitiyañenu chahaya nyaaka.+ 61 Wakanuka yilwilu yeyi nawa wakatiya nsonyi+ chiwakatambwila anakweyi awambanda, ayaya jeyi nianyiki jeyi. Nawa nakakwinkawu akekali anyaneyi awambanda, bayi neyi hamuloña wachitiyañenu cheyiku.’

62 “‘Nawa ami aweni nakatiyañana chitiyañenu chami naneyi; dichi wakeluka neyi yami Yehova. 63 Kuhiñahu, wakanuka yuma yiwakoñeli nawa wakatiya nsonyi chikupu yakwasama mukanwa keyi muloña wakusawuka,+ hampinji yinakabuta hanshidi jeyi jejima jiwunakoñi,’+ dichinahoshiyi Yehova Mwanta Wabadika.”

17 Izu daYehova denjili cheñi kudi ami nawu: 2 “Eyi mwana kamuntu, anaku kaanu nawa tilaku amwitala daIsarela chishimu.+ 3 Wuhoshi neyi, ‘Yehova Mwanta Wabadika nahoshi nindi: “Mbuulu weneni,+ wukweti mpuula jamaneni, mavuji amalehi nawa amavulu adi nawulombu washiyashana, wenjili kuLebanoni+ nawa wasendeli kamutu kamutondu wamusida.+ 4 Waketwili kamutu kaniwu mutondu nakukileta mwituña dawakakulanda nakulandulula* nawa wakitentekeli mumusumba wawakakulanda nakulandulula.+ 5 Kuhiñahu, wasendeli mbutu yimu yamwituña+ nakuyitumba mwiha dawushi. Wayitumbili neyi musombu wudi kwakwihi namenji amavulu. 6 Dichi, yameneni nakwikala muvinyu wawihi+ wataandala wukweti mafu atalisha mukachi nawa weñijili nyiji yindi hamaseki. Dichi yekalili muvinyu nawa wedishili nyitu nikumena nyitayi.+

7 “‘“Nawa kwenjili mbuulu mukwawu weneni,+ wukweti mpuula jamaneni nimavuji amalehi.+ Kufumahu, iwu muvinyu wataandeleleli nyiji yindi kudi iwu mbuulu, kufuma hanyihaña yamwitempa hawutumbiliwu, nawa wasapukili mafu nakutalisha kudi yena kulonda yawutukumwineña menji.+ 8 Wadiña wakutumba dehi mwiha dikweti wushi kwakwihi namenji amavulu, kulonda wumeni nyitayi, kusoña nyikaabu nikwikala muvinyu weneni.”’+

9 “Wuhoshi neyi, ‘Yehova Mwanta Wabadika nahoshi nindi: “Kutala iwu muvinyu wukutwalekahu? Muntu hanateli kuketula nyiji+ yindi nakwilisha nyikaabu yindi kutoka nikukojeja mafu indi kulepaku?+ Wakooma chawu chakwila hakuwubwita hikwakakeñekaña chikasa chañovu hela antu amavuluku. 10 Hela neyi awutumbulula, kutala dinu wakatwalekahu? Hiwakashikena dakuuma chawu neyi kukunkila mpepela yakumuselaku? Wakomina hamuhaña wamwitempa hiwameneni.”’”

11 Nawa izu daYehova denjili kudi ami cheñi nawu: 12 “Mwani wuyili antu adikaña neyi, ‘Himuneluki munatalishi iyi yumaku?’ Wuyileji neyi, ‘Tiyenu! Mwanta waBabiloni wenjili kuYerusalema nawa wasendeli mwanta wawu niayilolu awu nakuyileta kuBabiloni.+ 13 Kubombelahu, wasendeli mwana* wumu wakuwanta+ nawa watiyañeni nindi chitiyañenu nikumusanyikisha.+ Kuhiñahu, wasendeli amayala alema amwituña,+ 14 kulonda wanta wudimbuki, wukañanyi kwimana cheñi, wunateli kutwalekahu hohu neyi wuhemba chitiyañenu chindi.+ 15 Ilaña mwanta waYuda wadikañili+ namwanta waBabiloni hakutemesha antemesha indi kuEjipitu kulonda asendi tuwalu+ niizaza deneni damashidika kudi wena.+ Kutala dinu wakashinda? Komana muntu wunakwila yumiyi hiyanateli kumubabeshaku? Komana nateli kufumpa chitiyañenu chakadi kumubabesha?’+

16 “‘Yehova Mwanta Wabadika nahoshi nindi: “Kwesekeja nachinahanda ami, wakafwila muBabiloni mwashakamaña mwanta* wamudiishili* wanta, mwini kusanyika kwadiwiliyi nichitiyañenu chafumpiliyi.+ 17 Nawa njita yeneni nimazanvu awamashidika aFwaru hiyakatwesha kumukwasha munjitaku,+ hampinji yakatuñawu mpwembu jakukuchika nachu nimbañu jakukuchika nachu kulonda ajilumuni antu* amavulu. 18 Nadiwuli kusanyika nawa nafumpi chitiyañenu. Hela chakwila wakanini,* nakoñi yuma yejimiyi nawa wakapuluka wanyi.”’

19 “‘Dichi, Yehova Mwanta Wabadika nahoshi nindi: “Kwesekeja nachinahanda ami, nakamubabesha muloña wakudiwula kusanyika kwami+ nikufumpa chitiyañenu chami. 20 Nakamuta kaleñi kami, nawa yena wakafwamu.+ Nakamuleta kuBabiloni nawa twakasompela kwenoku muloña wayuma yatama yankoñeliyi.+ 21 Amashidika indi ejima amatunduka akafwa kumpoku yakabali, nawa owu akashalahu akayipalañeshela kutubadi twejima.*+ Dihu dinu himwakeluka nenu ami aweni, Yehova, yami inachihoshi.”’+

22 “‘Yehova Mwanta Wabadika nahoshi nindi: “Nakaketula kamutu kwiwulu damutondu wamusida wawulehi+ nakukitumba. Kwiwulu danyitayi yindi nakaketulaku kamutu kandenda,+ nawa nakakitumba hampidi yanyuña nawa yayilehi.+ 23 Nakakitumba hampidi yayilehi yamuIsarela; nyitayi yaku yakakula nawa kakasoña nyikaabu nakwikala mutondu wamusida weneni. Nawa atuda anyichidi yejima akashakamaña mwishina dindi nimuwulelu wamafu indi. 24 Nawa nyitondu yejima yamwisaña yakeluka nawu ami aweni, Yehova, yami inakeheshi mutondu wawulehi nakutuumbakesha mutondu wawihi.+ Nomishi mutondu wutuuta nakusapwisha mutondu wooma.+ Ami aweni, Yehova, yami inachihoshi nikuchikoña.”’”

18 Nawa izu daYehova denjili cheñi kudi ami nawu: 2 “Indi ichi chishimu chimwahoshaña mwituña daIsarela chakwila nawu, ‘Atata jawantu anadii nyivinyu yabatuka, ilaña anyana diwu anatiyi ñañanyi,’+ chatalisha mudihi?

3 “Yehova Mwanta Wabadika nahoshi nindi, ‘Kwesekeja nachinahanda ami, himwakatwalekahu kutena ichi chishimu muIsarelaku. 4 Tiyenu! Mawumi* ejima ami. Wumi watata yawantu niwumi wamwana, wejima wami. Wumi* wukuvulumuna diwakafwa.

5 “‘Indi neyi chakwila muntu waloña nawa welaña yuma yaloña niyoloka. 6 Wadaña wanyi yakuda yinayilambuliwu ankishi hajimpidi;+ hakuhwelelaña mudi ankishi awuzondu* awantu amwitala daIsarelaku; hatamishaña ñoda mukwawu+ hela kwila wuvumbi namumbanda wudi kukakwejiku;+ 7 hakabishaña muntu wudi wejimaku,+ ilaña wamufuntishilaña mukamukudi chuma chinamwinkiyi nindi akwatilimu;+ habuwaña muntu wudi wejimaku,+ ilaña wahanaña yakuda yindi kudi muntu wudi nanzala+ nikuvwika muntu wudi nawuvu;+ 8 hatambulaña ngalanyi hela kukongwesha nindi amushilihuku,+ ilaña watondolwelaña kuheñesha wuñanji;+ wasompelaña antu nyiloña mwawuñanji;+ 9 nawa watwalekañahu kwovwahila nshimbi jami nikulondela mazu ami awunsompeshi kulonda eleña yuma nakashinshi. Muntu yeniwu waloña nawa wakatwalekahu kuhanda,’+ dichinahoshiyi Yehova Mwanta Wabadika.

10 “‘Indi neyi iwu muntu avwala mwana kapondu+ hela mbanji*+ hela wakoñaña chuma chidi chejima haniyi yuma yikwawu 11 (hela chakwila tata yindi kanda akoñeñahu dehi yumiyi), wadaña yakuda yinayilambuliwu ankishi hajimpidi, watamishaña ñoda mukwawu, 12 wakabishaña antu akaankila niatuzweñi,+ wabuwaña yuma, hafuntishaña chuma chakwatililimuku, wakuhwelelaña mudi ankishi awuzondu,+ wadiñijaña muyaaku yawuzondu,+ 13 wakongweshaña* nindi amushilihu nawa watambulaña ngalanyi.+ Iwu mwana wakatwalekahu kuhanda wanyi. Muloña waniyi yuma yejima yatama yinakoñiyi, chakadi nikujina, akamujaha. Mashi indi akekala hadi yomwenindi.

14 “‘Indi neyi nvwali wukweti mwanindi wunakumona nshidi yejima yinakukoñayi tata yindi, ilaña yena hayikoñañaku, hela chakwila wayimonaña. 15 Wadaña wanyi yakuda yinayilambuliwu ankishi hajimpidi; hakuhwelelaña mudi ankishi awuzondu awantu amwitala daIsarelaku; hatamishaña ñoda mukwawuku; 16 hakabishaña muntu wudi wejimaku; hatambulaña chuma chiyamulejeliwu kukwatilamuku; habuwaña chuma chidi chejimaku; wahanaña yakuda yindi kudi muntu wudi nanzala nikuvwika muntu wudi nawuvu; 17 hakabishaña kazweñiku; hakongweshaña* nindi amushilihu hela kutambula ngalanyiku; nawa walondelaña mazu ami awunsompeshi nikwovwahila nshimbi jami. Muntu yeniwu hakafwa kukoola nshidi yatata yindiku. Chakadi nikujina, wakatwalekahu kuhanda. 18 Ilaña chineli tata yindi watambwileña yuma munjila yawupwapoki, wamubuwili manakwindi, nawa wakoñeli yuma yatama mukachi kawantu jindi, wakafwa kukoola nshidi yindi.

19 “‘Ilaña enu mwakahosha nenu: “Muloñadi mwana chinabuliliyi kukoola nshidi yatata yindi?” Chineli mwana neli yuma yayiwahi nawa yaloña, natwalekihu kwovwahila nshimbi jami jejima nikujihemba, chakadi nikujina, wakatwalekahu kuhanda.+ 20 Wumi* wukuvulumuna diwakafwa.+ Mwana hakekala namuloña kukoola nshidi yatata yindiku, nawa tata yawantu hakekala namuloña kukoola nshidi yamwanindiku. Muntu waloña akamutena kuloña nkawindi, nawa muntu watama akamutena kutama nkawindi.+

21 “‘Dichi neyi muntu watama aleka yuma yatama yejima yakoñañayi nakutwalekahu kwovwahila nshimbi jami nakutachika kwila yuma yayiwahi nawa yaloña, chakadi nikujina, wakatwalekahu kuhanda. Wakafwa wanyi.+ 22 Kwosi chuma chatama hela chimu chakoñeliyi chakamwinkelahu muloñaku.*+ Wakatwalekahu kuhanda muloña wakwila yuma yaloña.’+

23 “Yehova Mwanta Wabadika nahoshi nindi, ‘Komana natiyaña kuwaha neyi muntu watama afwa?+ Komana hinakeñaña nami aleki yuma yatama yinakukoñayi kulonda atwalekihu kuhandaku?’+

24 “‘Ilaña neyi muntu waloña aleka kuloña kwindi nawa hakukoña yuma yatama,* nakwila yuma yejima yawuzondu yakoñaña muntu watama, komana wakahanda? Kwosi mudimu waloña hela wumu wakoñeliyi wakanukawuku.+ Wakafwa muloña wakubula kushinshika nimuloña wanshidi yinakoñiyi.+

25 “‘Ilaña enu mwakahosha nenu: “Njila yaYehova yaheña.”+ Mwani tiyenu, enu amwitala daIsarela! Komana njila yami diyaheña,+ tahindi njila yenu diyaheña?+

26 “‘Neyi muntu waloña aleka kuloña kwindi nawa hakukoña yuma yatama, kuhiñahu afwa muloña wayumoyu, wakafwa kukoola yuma yatama yinakoñiyi.

27 “‘Nawa neyi muntu watama aleka yuma yatama yakoñañayi nakutachika kwila yuma yayiwahi nawa yaloña, wakahandisha wumi*+ windi. 28 Neyi anuka yuma yatama yejima yakoñañayi nawa ayileka, chakadi nikujina, wakatwalekahu kuhanda. Wakafwa wanyi.

29 “‘Ilaña amwitala daIsarela akahosha nawu: “Njila yaYehova yaheña.” Enu amwitala daIsarela,+ komana mwamweni njila yami diyaheña, tahindi njila yenu diyaheña?’

30 “Yehova Mwanta Wabadika nahoshi nindi, ‘Dichi, enu amwitala daIsarela, nakayisompesha muntu-himuntu kwesekeja nanjila jendañayi.+ Balumukenu, eña, balumukenu chikupu nakuleka yuma yatama yejima yimunakukoña, kuchiina yakenda kekala chuma chakuhukesha chakayiletesha kwikala namuloña. 31 Lekenu yuma yatama yejima yimunakukoña+ nawa mwiikali* namuchima wawuha nispiritu yayiha.+ Enu amwitala daIsarela, muloñadi chimukufwila?’+

32 “Yehova Mwanta Wabadika nahoshi nindi, ‘Natiyaña kuwaha wanyi neyi muntu wudi wejima afwa.+ Dichi balumukenu kulonda muhandi.’”+

Wakaamini hakachi kanyenzi yanyitupa yakola* nawa waleleli anyanindi.

 3 Wakulishilihu mwanindi wumu weyala, nawa wekalili mwenzi wamutupa wakola.+

 5 Mama yindi wahembeleleña, nkumininaku, wamweni nindi mwenzi wamutupa wakola wukufunta wanyi.

Dichi wanonelihu mwanindi mukwawu weyala nawa wamudizishili kulonda ekali mwenzi wamutupa wakola.

 6 Niyena wendeli hakachi kawanyitupa nawa wekalili mwana kamutupa* wakola.

Wadizili chakutabola kanyama, nawa wadiileña niantu.+

 9 Amukobeli nanzambu nakumusha muchuma chafwana chikalaña nawa amutwalili kudi mwanta wakuBabiloni.

Amuhembeleli kwenoku kulonda kubuluma kwindi kubuli kutiyakanahu cheñi hamapidi aIsarela.

10 Mama yeyi wadiña neyi muvinyu+ mumashi eyi,* atumbawu kwakwihi namenji.

Wasoñeli nyikaabu nawa wadiña nanyitayi yayivulu muloña wamenji amavulu.

11 Wekalili nanyitayi yakola,* yashikila munkuunyi jawanyuuli.

Nyitayi yindi yakola yahatukiliku nawa yoomini,+ kuhiñahu yasukumini nakesi.+

“‘Iwu diwu mukeña, nawa wakatwalekahu kwikala mukeña.’”

20 Dichi muchaaka chamu 7, mukakweji kamuchitanu, hefuku damu 10 dakakweji, akulumpi amakwawu amuIsarela enjili nawa ashakamini kumesu ami kulonda amwihuli Yehova. 2 Kuhiñahu, izu daYehova denjili kudi ami nawu: 3 “Eyi mwana kamuntu, hoshaku nawakulumpi amuIsarela, nawa wuyileji neyi, ‘Yehova Mwanta Wabadika nahoshi nindi: “Munenzi kulonda muñihuli tahindi? ‘Kwesekeja nachinahanda ami, yuma yimukuñihula nukuyakula wanyi,’+ dichinahoshiyi Yehova Mwanta Wabadika.”’

4 “Wunadiloñeshi kuyisompesha?* Eyi mwana kamuntu, wunadiloñeshi kuyisompesha? Yileji eluki yuma yawuzondu yakoñeliwu ankakulula jawu.+ 5 Wuyileji neyi, ‘Yehova Mwanta Wabadika nahoshi nindi: “Hefuku dinamutondeli Isarela,+ nasanyikili* nikudi anyana* amwitala daYakoba, nawa nadimwekesheli ami aweni kudi wena mwituña daEjipitu.+ Eña, nasanyikili kudi wena nami, ‘Yami Yehova Nzambi yenu.’ 6 Hadina ifuku nasanyikili nami nakayifumisha mwituña daEjipitu nakuyitwala mwituña dinayikeñeleli,* ituña dasweja mayeli niwuchi. Dadiña ituña dalubanji*+ chikupu hamatuña ejima. 7 Kufumahu, nayilejeli nami, ‘Wejima wenu hamuntu-hamuntu mwatela kunata yuma yawuzondu yimudi nayu. Bayi muditamisha nawankishi awuzondu* amuEjipituku.+ Yami Yehova Nzambi yenu.’+

8 “‘“Ilaña adikañili nanami nawa hiyakeñeleña kuntiyililaku. Hiyanatili yuma yawuzondu yadiñawu nayuku, nawa hiyalekeli kulondela ankishi awuzondu amuEjipituku.+ Dichi nakanini nami nakayihuñunwina kuzuwa kwami nikuyilendumukila chikupu mwituña daEjipitu. 9 Nelili mwenimu muloña wejina dami, kuchiina akadijilola kumesu anyuza mwashakamineñawu.+ Muloña nadimwekesheli kudi wena* iku iyi nyuza yinakutalaku hinayifumishileña* mwituña daEjipitu.+ 10 Dichi nayifumishili mwituña daEjipitu nakuyitwala mwisaña.+

11 “‘“Kuhiñahu, nayinkeli nshimbi jami nawa nayilejeli nimazu ami awunsompeshi,+ kulonda muntu wukuyilondela ahandilimu.+ 12 Nayinkeli nimasabata ami+ ekali chinjikijilu hakachi kanami nawena,+ kulonda eluki nawu ami Yehova, yami inakuyijilika.

13 “‘“Ilaña amwitala daIsarela adikañili nanami mwisaña.+ Hiyovwahilili nshimbi jamiku, nawa akaanini mazu ami awunsompeshi, akwila neyi muntu ayilondela, wukuhandilamu. Ajiloleli masabata ami chikupu. Dichi nakanini nami nakayihuñunwina kuzuwa kwami mwisaña kulonda nakayijiyishi.+ 14 Nelili mwenimu muloña wejina dami, kuchiina akadijilola kumesu anyuza oyu yamweneña chinayifumishileña.*+ 15 Nawa nasanyikili kudi wena mwisaña nami hinakayitwala mwituña dinayinkeliku,+ ituña dasweja mayeli niwuchi,+ dalubanji* chikupu hamatuña ejima, 16 muloña akaanini mazu ami awunsompeshi, hiyovwahilili nshimbi jamiku, nawa ajiloleli masabata ami, muloña nyichima yawu yalondeleleña ankishi jawu awuzondu.+

17 “‘“Ilaña ami* nayitiyilili luwi, nawa hinayijilumwiniku; hinayijiyishili mwisañaku. 18 Nalejeli anyanawu mwisaña+ nami, ‘Bayi mwovwahila nshimbi jawankakulula jenu+ hela kulondela wunsompeshi wawu hela kuditamisha enu aweni nawankishi jawu awuzonduku. 19 Yami Yehova Nzambi yenu. Ovwahilenuña nshimbi jami nikulondela mazu ami awunsompeshi, nawa mujihembeña.+ 20 Mujiliki masabata ami,+ nawa akekala chinjikijilu hakachi kanami nanenu kulonda mwakeluki nenu yami Yehova Nzambi yenu.’+

21 “‘“Ilaña anyanawu atachikili kudikaña nanami.+ Hiyovwahilili nshimbi jamiku, nawa hiyovwahilili nikulondela mazu ami awunsompeshiku, akwila neyi muntu ayilondela, wukuhandilamu. Ajiloleli masabata ami. Dichi nakanini nami nakayihuñunwina kuzuwa kwami nikuyilendumukila chikupu mwisaña.+ 22 Ilaña nadifuntilimu+ nawa nakoñelimu muloña wejina dami,+ kulonda abuli kudijilola kumesu anyuza oyu yamweneña chinayifumishileña.* 23 Cheñi, nasanyikili kudi wena mwisaña nami nakayipalañeshela munyuza nikuyimwañila mumatuña,+ 24 muloña alondeleli wanyi mazu ami awunsompeshi nawa akaanini nshimbi jami,+ ajiloleli masabata ami, nawa alondeleli* ankishi awuzondu awankakulula jawu.+ 25 Nawa nayitejeli cheñi kulondela nshimbi jatama nimazu awunsompeshi akubula kuyihandisha.+ 26 Nayilekeli nami aditamishi nanyilambu yawu, hampinji yahitishileñawu anyanawu awedi mukesi,+ kulonda ajilumuki, hakwila eluki nawu yami Yehova.”’

27 “Dichi eyi mwana kamuntu, hoshaku kudi amwitala daIsarela, nawa wuyileji neyi, ‘Yehova Mwanta Wabadika nahoshi nindi: “Ichi dicheliliwu niankakulula jenu, anhosheli mazu akasawuntu nanochu chabuliliwu kwikala ashinshika kudi ami. 28 Nayileteli mwituña dinakanini kuyinka.+ Chamweniwu tupidi twejima twanyuña ninyitondu yamafu,+ atachikili kulambula nyilambu niyawaana yawu yakuntiyisha kutama. Ahanini yuma yevumba dadiwahi* yahanyilambu yawu nikuhuñunwina nyilambu yawu yavinyu kwenoku. 29 Dichi nayihwili nami, ‘Muloñadi chimwayilaña kunichi chinañanaña? (Niyinu mpinji achidi kuchitena nawu Chinañanaña.)’”’+

30 “Ichi dinu hoshaku kudi amwitala daIsarela neyi ‘Yehova Mwanta Wabadika nahoshi nindi: “Komana munakuditamisha enu aweni neyi chaditamishileñawu ankakulula jenu nakulondela ankishi jawu awuzondu kulonda eli nawu wuvumbi wakuspiritu?+ 31 Nawa muchidi kuditamisha enu aweni kushika nikulelu kuhitila mukulambula nyilambu kudi ankishi jenu ejima awuzondu, nakuhitisha anyanenu awamayala mukesi?+ Enu amwitala daIsarela, komana munakutoñojoka nenu nateli kuyakula?”’+

“Yehova Mwanta Wabadika nahoshi nindi: ‘Kwesekeja nachinahanda ami, yuma yimukuñihula nukuyakula wanyi.+ 32 Nawa chuma chidi muyitoñojoka* yenu chimwahoshaña nenu, “Twayenu twiikali neyi chidi nyuza, neyi yisaka yakumatuña amakwawu, yadifukulaña* kunyitondu nikumalola,”+ chikamwekana wanyi.’”

33 “Yehova Mwanta Wabadika nahoshi nindi, ‘Kwesekeja nachinahanda ami, nakekala mwanta wenu nachikasa chañovu, nachikasa chakwolola ninakuzuwa kwami kunakuhuñunuka.+ 34 Nakayifumisha mukachi kawantu ashiyashana nikuyipompesha hamu nachikasa chañovu, nachikasa chakwolola ninakuzuwa kwami kunakuhuñunuka nakuyifumisha mumatuña mumwapalañena.+ 35 Nakayitwala mwisaña dawantu ashiyashana nawa kwenoku twakasompa mesu namesu.+

36 “Yehova Mwanta Wabadika nahoshi nindi, ‘Neyi chinasompeli nawankakulula jenu mwisaña damwituña daEjipitu, dichinakasompa ninanenu. 37 Nakayihitisha mwishina damutondu wabiñañayi nachu+ kabiña nawa nakatiyañana nanenu chitiyañenu. 38 Ilaña nakafumisha akakudikaña mukachi kenu niantu anakunvulumuna.+ Muloña nakayifumisha mwituña munakushakamawu neyi añiinza, ilaña hiyakeñila mwituña daIsarelaku.+ Dihu himwakeluka nenu yami Yehova.’

39 “Hakwila enu amwitala daIsarela, Yehova Mwanta Wabadika nahoshi nindi: ‘Wejima wenu muntu-himuntu ayi nakukalakela ankishi jindi awuzondu.+ Ilaña mukuhita kwampinji, neyi mwakabuli kuntiyilila, himwakatwalekahu kujilola ijina dami dajila nanyilambu yenu ninawankishi jenu awuzonduku.’+

40 “Yehova Mwanta Wabadika nahoshi nindi, ‘Muloña kumpidi yami yajila, hampidi yayilehi yaIsarela,+ dihakankalakelañawu amwitala daIsarela ejima mwituña.+ Kwenoku nakayitiya kuwaha, nawa nakakeña yawaana yenu ninyikaabu yenu yatachi yanyilambu yenu, yuma yenu yejima yajila.+ 41 Muloña wevumba dadiwahi,* nakayitiya kuwaha neyi niyifumisha mukachi kawantu nikuyipompesha hamu kufuma mumatuña mumwapalañena.+ Nawa nakekala wajila mukachi kenu iku nyuza yinakumonaku.’+

42 “‘Nawa neyi niyitwala mwituña daIsarela,+ mwituña dinakanini kuyinka ankakulula jenu, mwakeluka nenu yami Yehova.+ 43 Nawa kwenoku mwakanuka yilwilu yenu ninyidimu yenu yejima yimwaditamishili nachu enu aweni,+ nawa chakayikata kumuchima chikupu muloña wayuma yatama yejima yimwakoñeli.+ 44 Dihu himwakeluka nenu yami Yehova neyi niyila chumichi muloña wejina dami,+ bayi neyi nayilwilu yenu yatama hela nanyidimu yenu yatamaku, enu amwitala daIsarela,’ dichinahoshiyi Yehova Mwanta Wabadika.”

45 Nawa izu daYehova denjili cheñi kudi ami nawu: 46 “Eyi mwana kamuntu, talishaku chamesu eyi kukabeta kakuchidiilu nawa wubidiki kukabeta kakuchidiilu, nawa wuprofweti nakuleja ivunda damwisaña dakukabeta kakuchidiilu. 47 Lejaku ivunda dakukabeta kakuchidiilu neyi, ‘Tiyaku izu daYehova. Yehova Mwanta Wabadika nahoshi nindi: “Inakukubutwila kesi,+ kulonda kwochi nyitondu yejima yituuta ninyitondu yejima yooma yidi mudi eyi. Nyizuzu yakesi hiyakayijimaku,+ nawa yuma yejima yakababika nanyizuzu, kufuma kukabeta kakuchidiilu ndo-o nikukabeta kakuchimunswa. 48 Nawa antu ejima akeluka nawu ami Yehova, yami inakibutuli, kulonda akabuli kukijima.”’”+

49 Nawa nahosheli nami: “Yayami, eyi Yehova Mwanta Wabadika! Anakuhosha hadi ami nawu, ‘Iwu muntu hanakwana twanu hohuku?’”*

21 Izu daYehova denjili cheñi kudi ami nawu: 2 “Eyi mwana kamuntu, talishaku chamesu eyi kuYerusalema, wubidiki yuma yakamwekena maluña ajila, nawa wuprofweti yuma yakamwekena ituña daIsarela. 3 Lejaku ituña daIsarela neyi, ‘Yehova nahoshi nindi: “Ichi nakwimakeni, nawa nukuhola mpoku yami yakabali muchindalu+ chayu kulonda nijahi aloña niatama adi mudi eyi. 4 Chineli nukujaha aloña niatama adi mudi eyi, nukuhola mpoku yami yakabali muchindalu chayu kulonda nijahi antu ejima, kufuma kukabeta kakuchidiilu kushika kukabeta kakuchimunswa. 5 Antu ejima akeluka nawu ami Yehova, yami inaholi mpoku yami yakabali muchindalu chayu. Hiyikafuntamu cheñiku.”’+

6 “Hakwila eyi mwana kamuntu, wudishishimuni iku* wunakuzaala, eña, wudishishimuni chikupu kumesu awu.+ 7 Nawa neyi akwihula nawu, ‘Wunakudishishimunadi?’ eyi wakayakuli neyi, ‘Muloña wansañu yinnatiyi.’ Chalala yakenza, nyichima yejima yakasuñunuka nawoma, makasa ejima akela tuhu lehu-u nawa antu ejima akadihomba nimanuñu ejima akavwa menji.*+ ‘Tiyenu! Chalala yakenza, yikashikijewa,’ dichinahoshiyi Yehova Mwanta Wabadika.”

8 Izu daYehova denjili cheñi kudi ami nawu: 9 “Eyi mwana kamuntu, profwetaku nakuhosha neyi, ‘Yehova nahoshi nindi: “Hoshaku neyi, ‘Mpoku yakabali! Mpoku yakabali+ anayiloli* nikuyitookesha. 10 Anayiloli kulonda yijahi antu amavulu. Anayitookeshi kulonda yikejimeña neyi nzaji.’”’”

“Kwila tuzañalala nehi?”

“‘Komana yikukaana* nkuunyi yamwanami,+ neyi chiyelaña namutondu wudi wejima?

11 “‘Anayihani kulonda ayitookeshi nikuyikwata muchikasa. Iyi mpoku yakabali anayiloli* nikuyitookesha, kulonda ayishi muchikasa chamukakujilumuna.+

12 “‘Eyi mwana kamuntu,+ kalokaku nyitetu nikudila makumbu, muloña yinenzi hadi antu jami; yinenzi hadi anlomboli ejima aIsarela.+ Awa diwu antu akufwa kumpoku yakabali hamu nawantu jami. Dichi etaku hekata deyi nachineñi. 13 Muloña anayishinshiki dehi,+ nawa chumanyi chikumwekana neyi mpoku yakabali yikaana nkuunyi? Yikuleka* kwikalaku,’+ dichinahoshiyi Yehova Mwanta Wabadika.

14 “Hakwila eyi mwana kamuntu, profwetaku nikweta mumakasa eyi nawa wufuntishihu kapampa kasatu neyi, ‘Mpoku yakabali!’ Himpoku yawantu anakujahawu, mpoku yakabali yakujaha nachu antu amavulu, yinayinyeñumuki.+ 15 Nyichima yawu yikusuñunuka nawoma+ nawa antu amavulu akufwila kuyenzelu yamusumba wawu; ami nukujaha antu nampoku yakabali. Eña, yinakubekuma neyi nzaji nawa anayitookeshi kulonda yijahañani! 16 Tapaku kuchidiilu, nawa tapaku nikuchimunswa! Yaku kwejima kunatalishili wumwemu weyi! 17 Nawa nukweta mumakasa ami nakumanisha ndulu yami.+ Ami aweni, Yehova, yami inachihoshi.”

18 Nawa izu daYehova denjili cheñi kudi ami nawu: 19 “Hakwila eyi mwana kamuntu, funjekaku njila jiyedi mwakwinjila mpoku yakabali yamwanta wakuBabiloni. Jejima jiyedi jifumini mwituña dodimu, nawa hamaakenu anjila jaya munyisumba yiyedi wushihu chipamba.* 20 Funjekaku njila yimu mwakwinjila mpoku yakabali yakulukuka nachu Raba+ yawaAmoni, nawa njila yikwawu mwakwinjila mpoku yakabali yakulukuka nachu Yerusalema+ yakiñewa muYuda. 21 Muloña mwanta wakuBabiloni naleki kuhoñela hamaakenu anjila, haambukila njila jiyedi. Hakunyinkesha nyivu. Hakwihula ankishi jindi;* nawa hakushinshika muchima wachida ambanda. 22 Chuma chakuhoña nachu chidi muchikasa chindi chachidiilu chinakumwekesha nawu atela kuya kuYerusalema nakutuña yuma yakujilumuna nachu, nakushimuna mazu akujahañana, nakubidika mbila yanjita, nakutuña yuma yakukisañana nachu yenzelu yamusumba, nakulumbika mulumba wakukuchika nachu nikutuña mbañu yakukuchika nachu.+ 23 Ilaña iku kuhoña kwakamwekana neyi kwamakudi kudi owu* asanyikili kudi wena.+ Ilaña yena wakanuka nyiloña yawu nawa wakayikwata.+

24 “Dichi, Yehova Mwanta Wabadika nahoshi nindi: ‘Munaleteshi nyiloña yenu ayanuki nanochu chimunamwekeshi yilwilu yenu yatama hatooka nikukojeja nshidi jenu kumwekena munyidimu yenu yejima. Chineli anayanuki, akuyisenda chakuyikanjikija.’*

25 “Ilaña ifuku deyi dinashiki dehi, mpinji yakukubabesha kwakukumishaku, eyi anakatishiwu chikupu, nlomboli watama waIsarela.+ 26 Yehova Mwanta Wabadika nahoshi nindi: ‘Vuulaku chitambala, nawa subulaku chibañula.+ Yumiyi hiyikatwalekahu kwikala chochimuku.+ Tuumbakeshaku wadikehesha,+ nawa keheshaku wadituumbakesha.+ 27 Nakachijilumuna, nakachijilumuna, nakachijilumuna. Nawa hichakekala chamuntu wudi wejimaku sampu wukweti wuswa nenzi dehi,+ nawa nakamwinkachu.’+

28 “Nawa eyi mwana kamuntu, profwetaku nakuhosha neyi, ‘Ichi dichinahoshiyi Yehova Mwanta Wabadika kutalisha hadi eni Amoni nihakasawuntu kawu.’ Wuhoshi neyi, ‘Mpoku yakabali! Mpoku yakabali anayiholi kulonda yijahañani; anayitookeshi kulonda yijilumuni nawa yikejimi neyi nzaji. 29 Hela chakwila anakukumwena yimwenu yamakudi nikukuhoñela jamakudi, akakusha hewulu dayibimbi,* antu atama aweni ifuku dinashiki dehi, mpinji yakuyibabesha kwakukumishaku. 30 Yifuntishi muchindalu chayu. Nakakusompeshela mwiluña mwakuleñeleliwu, mwituña muwafuma. 31 Nakakuhuñunwina kuzuwa kwami. Nakakupeepa* nakesi kakuzuwa kwami, nawa nakakuhana kudi ambanji, antu elukisha kujilumuna.+ 32 Wakekala chuma chakukwatisha nachu kesi;+ mashi eyi akayipwekeshela mwituña, nawa hiyakakwanukahu cheñiku, muloña ami aweni, Yehova, yami inachihoshi.’”

22 Nawa izu daYehova denjili cheñi kudi ami nawu: 2 “Hakwila eyi mwana kamuntu, komana wunadiloñeshi kubidika wunsompeshi* musumba wukweti muloña wamashi+ nikumuleja yuma yindi yejima yawuzondu?+ 3 Wukuhosha neyi, ‘Yehova Mwanta Wabadika nahoshi nindi: “Eyi musumba wapwekeshaña mashi+ mukachi keyi, mpinji yeyi yakukubabesha yinakwinza,+ watuñaña ankishi awuzondu* nakuditamisha eyi aweni,+ 4 mashi iwunapwekeshi anakuleteshi kwikala namuloña,+ nawa ankishi jeyi awuzondu anakutamishi.+ Wunadikehesheli mafuku eyi, nawa yaaka yeyi yinamani dehi. Dichikuletesha nikwilishi wiikali chuma chikudiwulañawu kudi nyuza nichuma chikusawulañawu kudi matuña ejima.+ 5 Matuña adi mukamwihi ninowu adi kwakulehi naneyi akukusawulaña,+ eyi wukweti ijina nawu majilu nawa wenzala namapumpa. 6 Tiyaña! Nlomboli wejima waIsarela wudi mudi eyi wazatishaña wuswa windi kupwekeshelamu mashi.+ 7 Mudi eyi dimu mwasupishilañawu atata jawu niamama jawu.+ Amutambulaña ñiinza yuma munjila yawupwapoki, nawa akabishaña mwana wabula tata yindi* nintuluwa.”’”+

8 “‘Wadiwulaña maluña ami ajila, nawa wajilolaña+ masabata ami. 9 Mudi eyi mudi akakutwambila akwawu akeña kupwekesha mashi.+ Mudi eyi+ dimu mwadiilañawu nyilambu hamapidi nawa dimu mwelilañawu yilwilu yawuzondu. 10 Mudi eyi dimu mwajilolelañawu kadidi katata yawu,*+ nawa akamaaña mumbanda wudi namajilu wunayi kukakweji.+ 11 Mudi eyi, mudi iyala wumu wunakwililamu yuma yawuzondu nañoda mukwawu,+ mukwawu nakutamisha ñoda mwanindi nayilwilu yawuzondu,+ nawa mukwawu nakwila wuvumbi namuhelindi, mwasemwakenawu tata yawu wumu.+ 12 Mudi eyi dimu mwatambwilañawu majika kanwa kulonda apwekeshi mashi.+ Watambulaña ngalanyi+ hela kukongwesha neyi akushilihu, nawa watambulaña mali kudi antuñi neyi+ muwupwapoki. Chalala, wunanvulameni chikupu,’ dichinahoshiyi Yehova Mwanta Wabadika.

13 “‘Tiyaña! Neti mumakasa ami nakadiwu nanochu chiwunatambuli yuma munjila yawupwapoki nihamuloña wayilwilu yakupwekesha mashi yidi mukachi keyi. 14 Komana kuhamuka* kweyi kwakatwalekahu nawa makasa eyi akatwalekahu kukola mumafuku inakakubabesha?+ Ami aweni, Yehova, yami inahoshi, nawa nakelamu. 15 Nakakupalañeshela munyuza nikukumwañila mumatuña,+ nawa nakamanisha majilu eyi.+ 16 Dichi wakasawuka kumesu anyuza, nawa wakeluka neyi yami Yehova.’”+

17 Nawa izu daYehova denjili cheñi kudi ami nawu: 18 “Eyi mwana kamuntu, amwitala daIsarela anekali neyi yuma yamukunkulwayi kudi ami. Wejima wawu adi neyi wuneñu, wufoyu, yikuñu ninsumbu jidi muluteñu. Anekali majilu afumaña kusiliva.+

19 “Dichi, ichi dichinahoshi Yehova Mwanta Wabadika nindi: ‘Chineli wejima wenu munekali neyi yuma yamukunkulwayi,+ inakuyikuñulwila mukachi kaYerusalema. 20 Neyi siliva, wuneñu, yikuñu, nsumbu niwufoyu chajikuñulwilañawu mukachi kaluteñu nakupeepelahu* kesi kulonda jisuñunuki, ninenu dichinakayikuñulwila hamu nakuzuwa kwami ninakulendumuka kwami, nawa nakayipeepa kulonda mwakasuñunuki.+ 21 Nakayikuñulwila hamu nikuyipeepa nakesi kakuzuwa kwami,+ nawa mwakasuñunukila mukachi kindi.+ 22 Neyi chasuñunukaña siliva muluteñu, ninenu dichimwakasuñunuka mukachi kindi. Nawa mwakeluka nenu ami Yehova, yami inahuñunwini kuzuwa kwami hadi enu.’”

23 Nawa izu daYehova denjili cheñi kudi ami nawu: 24 “Eyi mwana kamuntu, wumuleji neyi, ‘Eyi wudi ituña dakabula kuwahishawu nawa dakabula kunokela nvula mwifuku dakuzuwa kwami. 25 Atuprofwetu tweyi anakukasili kafuta,+ neyi mutupa wunakubuluma iku nakutabola kanyama.+ Anakujilumuna antu.* Anakutambula maheta niyuma yalema wuseya. Anelishi antu amavulu mudi eyi kwikala antuluwa. 26 Atupristu eyi anakufumpa nshimbi jami,+ nawa anatwalekihu kujilola maluña ami ajila.+ Akañanyaña kwaambula yuma yajila nayuma yabula kujila,+ akañanyaña kwiluka yuma yamajilu niyuma yakadi majilu,+ akaanaña kuhemba masabata ami nawa hiyanakunjilika mukachi kawuku. 27 Atulamba tweyi adi mudi eyi adi neyi atuñwidi anakutabola kanyama; apwekeshaña mashi nikujaha antu* kulonda aheti munjila yawupwapoki.+ 28 Ilaña atuprofwetu tweyi anabuti yilwilu yawu yatama neyi kwiji anakulambwija mpemba hambañu. Amonaña yimwenu yakutwamba nikuhoña mwamakudi,+ nawa ahoshaña nawu: “Yehova Mwanta Wabadika nahoshi nindi,” henohu Yehova kwosi jinahoshiyiku. 29 Antu adi mwituña anakutambula yuma munjila yawupwapoki nikubuwa yuma.+ Anakukabisha akaankila niatuzweñi, nawa anakumutambula ñiinza yuma munjila yawupwapoki nikumuhakwila mwaheña.’

30 “‘Nakeñeli muntu mukachi kawu wunateli kutuñulula mpwembu yamalola hela wunateli kwimana kudi ami mwipwata nakwimenaku ituña, kulonda abuli kudikisañana,+ ilaña hinawaninihu hela wumuku. 31 Dichi nakayisukwila ndulu yami nawa nakayijiyisha nakesi kakuzuwa kwami. Nakayibabesha kwesekeja nayilwilu yawu,’ dichinahoshiyi Yehova Mwanta Wabadika.”

23 Izu daYehova denjili cheñi kudi ami nawu: 2 “Eyi mwana kamuntu, kwadiña ambanda ayedi avwalikili kudi mumbanda wumu.+ 3 Ekalili anyatulwalu muEjipitu;+ kufuma hawunkaña wawu adiñijili muwuvumbi. Mayeli awu ayichikitilili kwenoku, nawa mayeli awu ankanki awujiki* ayikwatujoleli. 4 Mukulumpi wadiña Ohola,* nawa kansi wadiña Oholiba.* Ekalili ami nawa avweli anyana awamayala niawambanda. Imu dimwatalishili majina awu, Ohola diyi Samariya,+ nawa Oholiba diyi Yerusalema.

5 “Ohola watachikili kwila wuvumbi+ henohu wuchidi wami. Watiyilileña wuvumbi atujila twindi,+ wowu antuñi nindi aAsiriya.+ 6 Adiña anguvulu avwalileña yakuvwala yawulombu wabulu niayinlonda awanyuuli, wejima wawu adiña anyikwenzi alubanji endeleleña hatuwalu twawu. 7 Watwalekelihu kwila wuvumbi nawanyana kaAsiriya awamayala amawahi chikupu, nawa waditamishili+ nawankishi awuzondu* anowu atiyilileñayi wuvumbi. 8 Halekeli yilwilu yindi yawuvumbi yelileñayi muEjipituku, muloña akaamini nindi muwunkaña windi, nawa mayeli indi ankanki awujiki* ayikwatujoleli nikwila nindi wuvumbi chikupu.+ 9 Dichi namuhanini mumakasa awatujila twindi, anyana kaAsiriya+ awamayala atiyilileñayi wuvumbi. 10 Ashiyili nzekesi+ yindi hatooka nawa anyanindi awamayala niawambanda ayisendeli,+ yena amujahili nampoku yakabali. Watamini chikupu hakachi kawambanda, nawa amusompesheli.

11 “Mwanyikindi Oholiba chamweniyi chumichi, wuvumbi windi waswejeleliku, nawa wunyakalwalu windi wabadikili nankashi wayayindi.+ 12 Watiyilileña wuvumbi antuñi nindi anyana kaAsiriya+ awamayala, anguvulu niayinlonda awanyuuli avwalileña yakuvwala yalubanji nikwendela hatuwalu. Awa ejima adiña anyikwenzi alubanji. 13 Chaditamishiliyi yomweni, namweni nami wejima wawu ayedi adiña nayilwilu yoyimu.+ 14 Ilaña yilwilu yindi yawunyakalwalu yaswejeleliku. Wamweni amayala akubazila hambañu, yifwikija yawaKalideya yabaziliwu nawulombu wuchinana, 15 iku anavwali nyishipi mumbunda jawu niyitambala yakuluka, amwekeneña neyi akakuzuña njita, ejima wawu amwekeneña neyi eni Babiloni, avwalikila mwituña dawaKalideya. 16 Chayimweniyi hohu, watachikili kuyitiyila wuvumbi, nawa watemesheli antemesha kudi wena kuKalideya.+ 17 Dichi anyana kaBabiloni awamayala atwelekelihu kwinza kukadidi kindi kakwilila wuvumbi, nawa amutamishili nawuvumbi wawu. Hanyima yakumutamisha, wayibalumukililimu muloña ekalili awuzondu kudi yena.

18 “Chelili atwalekihu kwila wuvumbi chakadi kutiya nsonyi nikumwekesha nzekesi+ yindi, namubalumukililimu muloña wekalili wawuzondu, neyi chinamubalumukililimu yayindi chekaliliyi wawuzondu.+ 19 Nawa watwalekelihu kuvulisha yilwilu yindi yawunyakalwalu,+ nakwanuka mafuku awunkaña windi elileñayi wuvumbi mwituña daEjipitu.+ 20 Wayitiyilili wuvumbi neyi chatiyañawu antombu* akweti amayala adi nayidi yalusemu neyi yachimbuulu nawa neyi yakawalu. 21 Wafwilileña yilwilu yeyi yawuzondu hiwadiña kansi muEjipitu+ chelili akukwatujoli hamayeli eyi awunkaña.+

22 “Dichi, eyi Oholiba, ichi dichinahoshi Yehova Mwanta Wabadika nindi: ‘Inakusañumuna atujila tweyi+ iwabalumukililimu muloña wakwikala awuzondu kulonda niyileti kudi eyi kufuma kutubadi twejima,+ 23 anyana kaBabiloni+ awamayala niaKalideya+ ejima, amayala akuPekodi,+ Showa niKowa, kushilahu nianyana kaAsiriya awamayala ejima. Wejima wawu hiyamayala alubanji, anguvulu niayinlonda awanyuuli, akakuzuña njita niatondawu,* wejima wawu endelaña hatuwalu. 24 Akakulukuka namakalu anjita alushindu akweti tufumbu, nezanvu deneni damashidika amavulu, nankebu jamaneni ninkebu janyanya* ninamatepa. Akakunyeñumuka nawa nakayinka wuswa wakukusompesha, dichi akakusompesha mwejima munakeñiwu.+ 25 Nakamwekesha kuzuwa kwami hadi eyi, nawa akakubabesha nakuzuwa. Akaketula muzulu weyi nimatu eyi, nawa akashalahu hadi eyi akafwa nampoku yakabali. Akakusendela anyaneyi awamayala niawambanda, nawa akashalahu hadi eyi akayocha nakesi.+ 26 Akakuvuula yakuvwala+ yeyi nikukutambula yingelingeli* yeyi yalubanji.+ 27 Nakamanisha yilwilu yeyi yawuzondu niwunyakalwalu+ weyi wuwatachikilili mwituña daEjipitu.+ Wakaleka kuyitala nawa hiwakamwanukahu Ejipitu cheñiku.’

28 “Muloña Yehova Mwanta Wabadika nahoshi nindi: ‘Ichi keña nukuhani kudi owu iwahela, iwabalumukililimu muloña wakwikala awuzondu.+ 29 Akakubabesha muloña wakukuhela nikusenda yuma yejima yiwunakabakeni+ nakukushiya nzekesi chikupu. Nzekesi yawuvumbi weyi, yilwilu yawuzondu niwunyakalwalu weyi jakashala hatooka.+ 30 Akakukoña yumiyi muloña walondeleli nyuza neyi chivumbi,+ muloña waditamishili eyi aweni nawankishi jawu awuzondu.+ 31 Wunalondeli yilwilu yayayeyi,+ nawa nakasha kaapu* kindi muchikasa cheyi.’+

32 “Yehova Mwanta Wabadika nahoshi nindi:

“Muloña ami aweni yami inahoshi chumichi,” dichinahoshiyi Yehova Mwanta Wabadika.’

35 “Dichi, Yehova Mwanta Wabadika nahoshi nindi: ‘Chineli wunanvulameni nawa wunandiwuli chikupu,*+ nakakubabesha muloña wayilwilu yeyi yawunyakalwalu.’”

36 Kuhiñahu, Yehova wañilili nindi: “Eyi mwana kamuntu, inakukeña wubidiki wunsompeshi hadi Ohola niOholiba+ nikuyileja hatooka yaaku yawu yawuzondu. 37 Anakwila wujila,*+ nawa mumakasa awu mudi mashi. Bayi neyi anakwila wujila nawankishi jawu hohuku, ilaña nianyanawu avweliwu nanami anakuyihitisha mukesi kulonda ekali yakuda yawankishi jawu.+ 38 Kubombelahu, ichi dichinañiliwu: Hadina ifuku, atamishili iluña dami dajila, nawa ajiloleli masabata ami. 39 Hanyima yakujaha anyanawu nakuyilambula kudi ankishi jawu awuzondu,+ eñilili mwiluña dami dajila nakujilolamu+ hadodenodu ifuku. Ichi dicheliliwu mwitala dami. 40 Atemesheli nintemesha kuya nakutambika amayala kumaluña akwakulehi.+ Chenjileñawu, eyi waweleli nawa wapentapenteli mesu eyi nikudiwahisha nayuma yakudikudeka.+ 41 Nawa washakamini hachitwamu chachiwahi,+ kumbidi yachu+ kwadiña mesa hiwashili insensi+ yami nimanji ami.+ 42 Mwenomu mwatiyakeni ipumba dezaza dawamayala adiña nakudikuwa, hakachi kawu hadiña niakakusheta aleteliwu kufuma mwisaña. Avwikili ambanda makaayi kumakasa nawa ayivwikili yibañula yalubanji kunyitu.

43 “Kufumahu, nahosheli hadi mumbanda wazeyeli nawujila nami: ‘Ichi dinu wukutwalekahu nawunyakalwalu windi.’ 44 Dichi atwalekelihu kwiñila mwadiñayi, neyi chayañayi muntu kudi nyakalwalu. Ichi dicheñilileñawu mudi Ohola nimudi Oholiba, ambanda ayilwilu yawuzondu. 45 Ilaña amayala aloña akamusompesha nawunsompeshi wayitelela akawujila+ niakakupwekesha mashi;+ muloña hiyambanda ayivumbi, nawa akweti mashi mumakasa awu.+

46 “Muloña Yehova Mwanta Wabadika nahoshi nindi: ‘Akayiletela njita kulonda yakayimakeni nakuyilisha kwikala chuma chakuhayama chikupu nawa chuma chakupuupa.+ 47 Njita yakayasa malola+ nawa yakayijaha nampoku jatubali. Akayijahila anyanawu awamayala niawambanda+ nikuyochela matala nakesi.+ 48 Nakamanisha yilwilu yawuzondu mwituña, ambanda ejima akadizilaku nawa hiyakembujola yilwilu yenu yawuzonduku.+ 49 Akayibabesha muloña wayilwilu yenu yawuzondu ninshidi jimunakoñi nawankishi jenu awuzondu; nawa mwakeluka nenu yami Yehova Mwanta Wabadika.’”+

24 Izu daYehova denjili cheñi kudi ami muchaaka chamu 9, mukakweji kamu 10, hefuku damu 10 dakakweji, nawu: 2 “Eyi mwana kamuntu, sonekaku adinu ifuku,* dodalelu. Mwanta wakuBabiloni natachiki kulukuka Yerusalema dodalelu.+ 3 Nawa tilaku chishimu antu adikaña, wuhoshi hadi wena neyi:

“‘Yehova Mwanta Wabadika nahoshi nindi:

“Shaku ndehu* hakesi; yishihu nawa wushimu menji.+

 5 Nonaku mukoku wamuwahi hamukanka,+ nawa sonselaku nchawa mwishina dandehu.

Bwakatishaku nyisunyi, nawa telekaku mafwaha adimu.”’

6 “Dichi, Yehova Mwanta Wabadika nahoshi nindi:

‘Oyihuñu yakamona musumba wapwekeshaña mashi,+ ndehu yandala, yikweti ndala yinabuli kukuusawu!

Fumishakumu chimamu-hichimamu;+ bayi wusakula nachinjikijiluku.

 7 Muloña mashi indi achidi mudi yena;+ wayimwañilili helola hakadi chuma.

Hayimwañilili hamaseki kulonda lunkuñu luyibutiku.+

9 “Dichi, Yehova Mwanta Wabadika nahoshi nindi:

‘Oyihuñu yakamona musumba wapwekeshaña mashi!+

Nukulumbika mulumba wanchawa wazanduka.

Majilu ayu akusuñunuka+ nawa ndala yayu yikufuma.

Yinatilenu mukesi nindala yayu!’

13 “‘Wekalili namajilu muloña wayilwilu yeyi yawuzondu.+ Nesekeli kukutookesha, ilaña majilu eyi afumini wanyi. Wukatooka wanyi sampu kuzuwa kwami kunafwomoki.+ 14 Ami aweni, Yehova, yami inahoshi chumichi. Chikashikijewa. Nakelamu chakadi kufunta hanyima, chakadi kutiya luwi, chakadi kwakama.+ Akakusompesha kwesekeja nayilwilu yeyi ninanyidimu yeyi,’ dichinahoshiyi Yehova Mwanta Wabadika.”

15 Nawa izu daYehova denjili cheñi kudi ami nawu: 16 “Eyi mwana kamuntu, mukapinji kantesha hohu inakukujahila nkeñi yeyi.+ Bayi wudishona;* hela kudila hela kuwulumuna madiluku. 17 Dishishimoni wumweneni, bayi wulondela tushidikilu twakudililamu afuku.+ Kasaku chitambala cheyi,+ nawa vwalaku nkwabilu jeyi.+ Bayi wubuta hawevu weyi wahamahembeluku,*+ nawa bayi wuda yakuda yikukuletelawu kudi antu acheñiku.”*+

18 Dichi nantetemena nayilejeli antu, nawa chikwelili melela ñodami wafwili. Dichi nantetemena nelili kwesekeja nachanlejeliwu. 19 Antu añihwileña nawu: “Komana wukutuleja wanyi iyi yuma yiwunakwila chiyinatukumi?” 20 Nayakwili nami: “Izu daYehova dinenzi kudi ami nawu, 21 ‘Wuyileji amwitala daIsarela neyi: “Yehova Mwanta Wabadika nahoshi nindi, ‘Keña nijiloli iluña dami dajila,+ mumwadisambilaña chikupu, chuma chimwakeña nankashi nawa chimwafwilaña munyichima yenu. Anyanenu awamayala niawambanda imwakashiya akafwa kumpoku yakabali.+ 22 Dichi mwakela neyi chinneli. Himwakabuta hawevu wenu wahamahembeluku, nawa himwakada yakuda* yakayiletelawu kudi antu acheñiku.+ 23 Kunyitu yenu kwakekala yitambala nawa kunyendu yenu kwakekala nkwabilu. Himwakadishona hela kudilaku. Ilaña, mwakajilumwisha mawumi enu muloña wayiluwa yenu,+ nawa mwakadishishimonena wumu namukwawu. 24 Ezekeli nekali chinjikijilu kudi enu.+ Neyi chineliyi, dichimwakela ninenu. Neyi chimwekana, dihu himwakeluka nenu yami Yehova Mwanta Wabadika.’”’”

25 “Hakwila eyi mwana kamuntu, hefuku dinakafumisha chuma mwakinkawu manuñu, dikwila nawu, chuma chalubanji chayizañaleshaña, chuma chakeñawu nankashi, chafwilaña nyichima* yawu, hamu nianyanawu awamayala niawambanda,+ 26 akakuleja iyi nsañu kudi muntu wakapuluka.+ 27 Hanodu ifuku wakaasama mukanwa keyi nakuhosha nanowu wakapuluka, nawa wakatachika cheñi kuhosha.+ Wakekala chinjikijilu kudi wena, nawa dihu hakelukawu nawu yami Yehova.”

25 Izu daYehova denjili cheñi kudi ami nawu: 2 “Eyi mwana kamuntu, talishaku chamesu eyi kudi eni Amoni,+ nawa wuprofweti yuma yakayimwekena.+ 3 Watela kuhosha hadi eni Amoni neyi, ‘Tiyenu izu daYehova Mwanta Wabadika. Yehova Mwanta Wabadika nahoshi nindi: “Chineli mwaseheli nenu, ‘Anha!’ hampinji yajiloleliwu iluña dami dajila, hampinji yashalili ituña daIsarela mahembi nihampinji yayitwaliliwu amwitala daYuda muwunkoli, 4 dichi inakuyihana kudi antu aKumusela kulonda mwiikali awu. Akatuña yilombu* yawu mudi enu nikulema matenti awu mukachi kenu. Akada nyikaabu yenu nikunwa mayeli enu. 5 Nakabalumuna Raba+ kwikala iluña mwakudiila angameli, nawa mpata yaweni Amoni nakayibalumuna yakekali iluña dakunookela mukanka wayimuna. Dihu hiwakeluka neyi yami Yehova.”’”

6 “Muloña Yehova Mwanta Wabadika nahoshi nindi: ‘Chineli mweteli mumakasa+ enu nikudatola nyendu yenu heseki nawa mwazañaleli hayuma yamwekeneni ituña daIsarela nanochu chimwaseheli chikupu,+ 7 dichi nukuyolwela chikasa chami kulonda niyihani kunyuza mwiikali chuma chakupuupa. Nukuyifumisha hakachi kawantu nawa nukuyijaha mumatuña.+ Nukuyijilumuna, nawa dihu himukwiluka nenu yami Yehova.’

8 “Yehova Mwanta Wabadika nahoshi nindi: ‘Chineli Mowabi+ niSeyiri+ anahoshi nawu, “Tiyenu! Amwitala daYuda adi neyi nyuza yikwawu yejima,” 9 inakushiya hatooka mukunkumuki waMowabi wekalila kunyisumba yawu yakuñinza, kwawahila ituña dawu, dikwila nawu Betiyeshimoti, Bayali Meyoni ndo-o nikuKiriyatayimi.+ 10 Nakawuhana kudi antu aKumusela+ hamu nieni Amoni akekali awu, kulonda eni Amoni akabuli kuyanukahu cheñi mukachi kanyuza.+ 11 Nawa nakamusompesha Mowabi,+ dihu hakelukawu nawu yami Yehova.’

12 “Yehova Mwanta Wabadika nahoshi nindi: ‘Edomi natendi antu amwitala daYuda nawa nekali namuloña weneni muloña wakuditenda nawu;+ 13 dichi, Yehova Mwanta Wabadika nahoshi nindi: “Edomi niyena nakamwolwela chikasa chami nawa nakajaha antu niyimuna yidimu, nakamushiya kwamahembi.+ Akafwa nampoku yakabali,+ kufuma kuTemani ndo-o nikuDedani. 14 Yehova Mwanta Wabadika nahoshi nindi, ‘Nakamutenda Edomi kuzatisha antu jami aIsarela.+ Akamuletela kuzuwa kwami nikulendumoka kwami, kulonda aEdomi akeluki kuditenda kwami chikwekala.’”’+

15 “Yehova Mwanta Wabadika nahoshi nindi: ‘Chineli aFilisitinu anatwalekihu kuhemba nkunyi, anakufwila chikupu kuditenda nikujilumuna.+ 16 Dichi, Yehova Mwanta Wabadika nahoshi nindi: “Inakuyolwela aFilisitinu+ chikasa chami, nukujaha aKereti+ nawa nukujilumuna antu ejima anashali kumukulishu wakaluñalwiji.+ 17 Nakaditenda nawena nankashi nakuyibabesha chikupu, nawa dihu hakelukawu nawu yami Yehova neyi niditenda nawu.”’”

26 Muchaaka chamu 11, hefuku datachi dakakweji, izu daYehova denjili kudi ami nawu: 2 “Eyi mwana kamuntu, chineli Tira namusehi Yerusalema+ nindi, ‘Anha! Chiisu mweñililileña antu ashiyashana anachikisañani!+ Yuma yejima yikwinzaña kudi ami, nawa chineli anamukisañani dehi, ichi dinu nukuheta’; 3 dichi, Yehova Mwanta Wabadika nahoshi nindi: ‘Eyi Tira, ichi inakukwimakena, nawa nukukuletela nyuza yayivulu, neyi chaletaña kaluñalwiji mankanda aku. 4 Akukisañana mpwembu jeyi nikuhumuna tuposhi tweyi,+ nawa nukukoola maseki eyi ejima nakukwilisha wiikali ilola dakejima, hakadi chuma. 5 Wukwikala iluña hakachi kakaluñalwiji+ hakwanyika makokela.’

“‘Muloña ami aweni yami inahoshi,’ dichinahoshiyi Yehova Mwanta Wabadika, ‘nawa wukwikala chuma chakapuupa kunyuza. 6 Nawa antu ashakamaña munyikala* yeyi yamukamwihi akayijaha nampoku yakabali, nawa antu dihu hakelukawu nawu yami Yehova.’

7 “Muloña Yehova Mwanta Wabadika nahoshi nindi: ‘Inakuleta Mwanta Nebukaneza* wakuBabiloni kufuma kukabeta kakuchimunswa+ kulonda amwimakeni Tira; himwanta wawanyanta,+ wakenza natuwalu,+ makalu anjita,+ akakwendela hatuwalu ninjita yamashidika amavulu.* 8 Wakajaha antu ashakamaña munyikala yeyi yamukamwihi nampoku yakabali, nawa wakatuña mpwembu yakukuchika nachu, kulumbika nyilumba yakukuchika nachu nikukunyamwina mbañu yankebu. 9 Wakachika mpwembu jeyi nachuma chindi chakujilumuna nachu,* nawa wakahumuna tuposhi tweyi nayizembi* yindi. 10 Tuwalu twindi twakekala twatuvulu nankashi chakwila twakakufukwila lunkuñu, nawa lushindu lwawakakwendela hatuwalu, lwatufumbu nilwamakalu lwakakankisha mpwembu jeyi hampinji yakeñilayi muyiisu yeyi, neyi amayala anakwiñila mumusumba wahumuka mpwembu. 11 Yikwa yatuwalu twindi yakakisañana nyikwakwa yeyi yejima.+ Wakajaha antu jeyi nampoku yakabali, nawa wakachika yishimi yeyi yakola. 12 Akabuwa maheta eyi, akapuupa yuma yeyi yakuselujola,+ akahumuna mpwembu jeyi nimatala eyi amawahi; kuhiñahu, akanatila malola eyi mumenji, yuma yeyi yakusoña nimaseki eyi.’

13 “‘Nakalekesha ipumba datumina tweyi, nawa chivumina chatudada tweyi hichakatiyakanahu cheñiku.+ 14 Dichi nakakwilisha wakekali ilola dakejima, hakadi chuma, nawa wakekala iluña hakwanyika makokela.+ Hiyakakutuñululaku, muloña ami aweni, Yehova, yami inahoshi chumichi,’ dichinahoshiyi Yehova Mwanta Wabadika.

15 “Yehova Mwanta Wabadika namwili Tira nindi: ‘Chikatiyakana lushindu lwakuhumuka kweyi, hampinji yakaabaña antu anakufwa,* hampinji yakajahañawu antu mukachi keyi, komana yituutu hiyakazaalaku?+ 16 Ayilolu* ejima akukaluñalwiji akenza kufuma hamatanda awu nawa akasubula nyinkukumba* yawu nikuvuula yakuvwala yawu yakubaza chiwahi, akazaala. Akashakama heseki, akatwalekahu kuzaala nawa akakuhayama.+ 17 Nawa akakwimbila mukeña*+ nikukwila nawu:

19 “Muloña Yehova Mwanta Wabadika nahoshi nindi: ‘Neyi nakukisañani dehi neyi nyisumba mwabula antu, neyi nakukumpuli dehi namenji amavulu nawa neyi menji ampupa anakubuti dehi,+ 20 nakakutwala kudi antu akushankulu hamu nanowu anakuya mwibuku.* Nakakushakamisha mwiluña damwishina, neyi maluña akunyaka akisañanawu dehi, hamu nanowu anakuya mwibuku,+ kulonda mudi eyi akabuli kushakamamu. Kufumahu dinu, nakalemesha* ituña dawamomi.

21 “Yehova Mwanta Wabadika nahoshi nindi, ‘Nakakufwisha mutentu mukukasumwisha, nawa hiwakekalaku cheñiku.+ Akakukeñakeña, ilaña hiyakakuwanahu cheñiku.’”

“Eyi Tira, wunahoshi eyi aweni neyi, ‘Nidi walubanji nankashi.’+

 8 Antu amuSidoni niamuArivadi+ diwu adiña akakuvuwa eyi.

Eyi Tira, antu elukisha kwendesha maatu diwu adiña akakwendesha watu.+

 9 Amayala akulukila* niakuGebali+ elukisha kwendesha maatu diwu alamikileña munyaji yeyi.+

Mbopolu jejima jahakaluñalwiji niantu azatilileñamu enjileña kudi eyi nakuselujola.

10 Amayala akuPeresi, kuLudi nikuPati+ adiña hakachi kamashidika eyi, antu jeyi anjita.

Akudikili nkebu jawu nimatepa awu mudi eyi, nawa akukojejeli kwikala walubanji.

12 “‘“Tashishi+ waselujoleli naneyi muloña eyi wadiña namaheta amavulu.+ Aleteleña siliva, yikuñu, wufoyu ninsumbu kulonda ahimpi nayuma yeyi.+ 13 Yavani, Tubali+ niMisheki+ aselujoleli naneyi, aleteleña anduñu+ niyuma yawuneñu kulonda ahimpi nayuma yeyi yakuselujola. 14 Amwitala daTogama+ aleteleña tuwalu, tuwalu twanjita niyingongavalu kulonda ahimpi nayuma yeyi. 15 Antu amuDedani+ aselujoleli naneyi; weñijili akakulanda nakulandulula hayituutu yayivulu. Akulambwileña mazewu anzovu+ ninyitondu yatupwipu. 16 Edomi waselujoleli naneyi muloña wayuma yayivulu yiwadiña nayu. Akwinkeleña malola atakwozi, wanda wawusombu, yakuvwala yakubaza chiwahi yawulombu washiyashana, mahina amawahi, malola akorali niarubi kulonda ahimpi nayuma yeyi.

17 “‘“Yuda niituña daIsarela aselujoleli naneyi, akwinkeleña tidiku yakuMiniti,+ yakuda yayiwahi, wuchi,+ manji nibalisamu+ kulonda ahimpi nayuma yeyi.+

18 “‘“Damakasa+ waselujoleli naneyi muloña wayuma yayivulu yiwadiña nayu nimaheta eyi ejima, waselujoleleña vinyu yakuHeliboni niwanda wakuZahari.* 19 Vedani naYavani akuUzali ahanini yikuñu yakuchila dehi, kasiya* nikalamasi* kulonda ahimpi nayuma yeyi. 20 Dedani+ waselujoleli naneyi mahina akushakamahu* akusha hanyima yatunyama. 21 Weñijili eni Arabi nianlomboli ejima amuKedari+ mudimu, adiña nakulanda nikulandisha anyana kanyikoku, anyikoku ayizamba niampembi.+ 22 Akakulanda nakulandulula akuSheba nikuRama+ aselujoleli naneyi; akwinkeleña yuma yejima yashiyashana yamavumba amawahi nankashi, malola alema wuseya niwuru kulonda ahimpi nayuma yeyi.+ 23 Harani,+ Kane, Edeni,+ akakulanda nakulandulula akuSheba,+ akuAshishuri+ nikuKilimadi aselujoleli naneyi. 24 Adiña nakuselujolela yuma yalubanji hayisankanu yeyi, tuhuma twakutuña nayuma yawulombu wabulu, yakuvwala yakubaza chiwahi yawulombu washiyashana nimahina akudatahu* awulombu washiyashana, jejima jakukasa nawa jakukolesha nanyonji.

28 Neyi akakukwendesha akaluka nyitetu, yikumu yakaluñalwiji yakakanka.

32 Chakadilañawu akemba mukeña nawa akakwimbila nawu:

‘Hinyi wudi neyi Tira, wunamweneni hakachi kakaluñalwiji?+

33 Yuma yeyi chiyenjili kufuma hakaluñalwiji, wekutishili antu amavulu ashiyashana.+

Maheta eyi amavulu niyuma yeyi yakuselujola yahetesheli anyanta ahamaseki.+

36 Akakulanda nakulandulula adi mukachi kanyuza akahayama nakwimba muloji muloña wachuma chikakumwekena.

28 Izu daYehova denjili cheñi kudi ami nawu: 2 “Eyi mwana kamuntu, wumuleji nlomboli yaTira neyi, ‘Yehova Mwanta Wabadika nahoshi nindi:

“Chineli wunadivwimbi+ mumuchima weyi, wunatwalekihu kuhosha neyi, ‘Ami nidi nzambi.

Nashakama hetanda danzambi hakachi kakaluñalwiji.’+

 3 Tiyaña! Wukweti maana kubadika Danyeli.+

Kwosi chuma hela chimu chinakujindiwuku.

6 “‘Dichi, Yehova Mwanta Wabadika nahoshi nindi:

 9 Komana wukumuleja wunakukujaha neyi, ‘Ami nidi nzambi,’ tahindi?

Kumakasa anowu anakukutamisha, wakekala muntu hohu, bayi nzambiku.”’

11 Nawa izu daYehova denjili cheñi kudi ami nawu: 12 “Eyi mwana kamuntu, mwimbili mwanta wakuTira mukeña,* nawa wumuleji neyi, ‘Yehova Mwanta Wabadika nahoshi nindi:

13 Wadiña muEdeni, itempa daNzambi.

Ayiloñesheli hefuku dakuleñeliwu.

14 Nakwinkeli mudimu nami wiikali kerubi wawayishewa wakubuta.

Wadiña hampidi yajila yaNzambi,+ nawa wendeleña hamalola akesi.

17 Muchima weyi wadivwimbili muloña walubanji lweyi.+

Watamishili maana eyi muloña walubanji lweyi lwasweja.+

Nakakunatila hamaseki.+

Nakakwilisha wakekali chuma chakatalañawu kudi anyanta.

18 Hamuloña wanshidi jeyi jasweja nikuselujola kweyi kwawupwapoki, wunajiloli maluña eyi ajila.

Nakabutula kesi mukachi keyi nawa kakakwocha.+

Nakakubalumuna wakashali kwamawuti hamaseki kumesu awantu ejima akakutalaña.

19 Ejima akwilukili hakachi kawantu akakuhayama.+

20 Nawa izu daYehova denjili cheñi kudi ami nawu: 21 “Eyi mwana kamuntu, talishaku chamesu eyi kuSidoni,+ nawa wuprofweti yuma yakamumwekena. 22 Watela kuhosha neyi, ‘Yehova Mwanta Wabadika nahoshi nindi:

23 Nakatemesha chipupu mudi eyi nawa munyikwakwa yeyi mwakapwekela mashi.

24 “‘“Kufumahu, amwitala daIsarela hiyakayinyeñumukahu cheñi kudi yikwata yafwana hela nyiña yakataku,+ owu ayisupishaña. Nawa antu dihu hakelukawu nawu yami Yehova Mwanta Wabadika.”’

25 “‘Yehova Mwanta Wabadika nahoshi nindi: “Neyi nipompesha cheñi amwitala daIsarela hamu kufuma mudi antu ashiyashana mwapalañeneniwu,+ akanjilika mukachi kawu iku nyuza yinakutalaku.+ Nawa akashakamaña mwituña dawu+ dinamwinkeli kambuñami Yakoba.+ 26 Akashakamamu mukuwunda,+ akatuña matala, akadima matempa anyivinyu,+ nawa akashakama mukuwunda neyi nasompeshi dehi ejima ayinyeñumuka, owu ayisupishaña.+ Nawa dihu hakelukawu nawu yami Yehova Nzambi yawu.”’”

29 Muchaaka chamu 10, mukakweji kamu 10, hefuku damu 12 dakakweji, izu daYehova denjili kudi ami nawu: 2 “Eyi mwana kamuntu, talishaku chamesu eyi kudi Fwaru mwanta wakuEjipitu, nawa wuprofweti yuma yikamumwekena niyikamwekena Ejipitu yejima.+ 3 Awa diwu mazu iwukuhosha neyi: ‘Yehova Mwanta Wabadika nahoshi nindi:

Namuleñeli nami wami ami aweni.’+

 4 Ilaña nakasha mayumba munyibaña yeyi nawa nakalamatisha inshi jaNile weyi kumakalu eyi.

Nakakufumisha muNile weyi hamu nanshi jamuNile yakalamata kumakalu eyi.

 5 Nakakunatila muchinkalampata hamu nanshi jamuNile weyi.

Wakaholokela hampata, nawa hiyakakupompesha hela kukukuñwijaku.+

Nakakuhana kudi anyama azuwa amwisaña ahamaseki nikudi atuda amuluzwizu+ kulonda akakudii.

8 “‘Dichi, Yehova Mwanta Wabadika nahoshi nindi: “Ichi inakukuletela mpoku yakabali,+ nawa mudi eyi nukujahamu antu nianyama. 9 Ituña daEjipitu dakashala kwamahembi nawa dakakisika.+ Dihu hakelukawu nawu yami Yehova, muloña eyi wunahoshi neyi,* ‘Kaloña Nile wami; ami aweni yami namuleñeli.’+ 10 Dichi nakwimakeni eyi niNile weyi, nakakisañana nikuumisha ituña daEjipitu, dakashala kwamahembi,+ kutachikila kuMigidoli+ kushika nikuSiyene+ ndo-o nikuñinza yaEtiyopiya. 11 Kwosi muntu hela chimuna wakadatamu mwenduku,+ nawa hadi yaaka 40 kwosi wakashakamamuku. 12 Ituña daEjipitu nakadibalumuna mahembi chikupu kubadika matuña amakwawu, nawa nyisumba yadu nakayibalumuna mahembi kubadika nyisumba yikwawu hadi yaaka 40;+ nawa nakapalañeshela aEjipitu munyuza nikuyimwañila mumatuña.”+

13 “‘Muloña Yehova Mwanta Wabadika nahoshi nindi: “Neyi yaaka 40 yinahiti dehi, nakapompesha aEjipitu kufuma mudi antu ashiyashana mwapalañeneniwu.+ 14 Nakafumisha aEjipitu muwunkoli nakuyifuntisha kwituña daPatirosi,+ kwituña kwafuminiwu, nawa kweniku akekala wanta wabula kulema. 15 Wanta wakuEjipitu wakekala wakehelamu chikupu kubadika mawanta amakwawu nawa hiwakekala nawuswa cheñi hadi nyuza yikwawuku,+ nakayikehesha nankashi chakwila hiyakatwesha kwimika mushindu nyuza yikwawuku.+ 16 Hakekalahu cheñi mwakukinka manuñu amwitala daIsarelaku,+ ilaña wakayanukishaña hohu chiluwa chawu cheliliwu chakulomba wukwashu kudi aEjipitu. Nawa dihu hakelukawu nawu yami Yehova Mwanta Wabadika.”’”

17 Dichi muchaaka chamu 27, mukakweji katachi, hefuku datachi dakakweji, izu daYehova denjili kudi ami nawu: 18 “Eyi mwana kamuntu, Mwanta Nebukaneza*+ wakuBabiloni wayinkeli amashidika indi mudimu wakola wakulukuka Tira.+ Nyitu yejima yaseyekeli mabala, nawa mafwiji ejima ayokokeli. Ilaña yena niamashidika indi hiyatambwilihu wufwetu wudi wejima hamudimu wazatiliyi wakulukuka Tiraku.

19 “Dichi, Yehova Mwanta Wabadika nahoshi nindi, ‘Inakuhana ituña daEjipitu kudi Mwanta Nebukaneza* wakuBabiloni,+ nawa yena wukusenda maheta adimu nikupuupa yuma yidimu. Nawa yumiyi diyikwikala wufwetu wamashidika indi.’

20 “Yehova Mwanta Wabadika nahoshi nindi, ‘Chineli nazati mudimu wakumulukuka,* nukumufweta ituña daEjipitu nanochu chinankalakeliwu.’+

21 “Hanodu ifuku nakamenesha luseñu kudi amwitala daIsarela,*+ nawa nakakwinka wuswa wakuhosha hakachi kawu. Dihu hakelukawu nawu yami Yehova.”

30 Nawa izu daYehova denjili cheñi kudi ami nawu: 2 “Eyi mwana kamuntu, profwetaku neyi, ‘Yehova Mwanta Wabadika nahoshi nindi:

“Dilenu makumbu nenu, ‘Yayo-o, ifuku dinakwinza!’

 3 Muloña ifuku didi kwakwihi, eñañi, ifuku daYehova didi kwakwihi.+

Dakekala ifuku damavu,+ himpinji yatoñwelawu nyuza.+

 6 Yehova nahoshi nindi:

“‘Kutachikila kuMigidoli+ kushika nikuSiyene+ antu ejima amwituña akafwa kumpoku yakabali,’ dichinahoshiyi Yehova Mwanta Wabadika. 7 ‘Akayibalumuna mahembi chikupu kubadika matuña amakwawu, nawa nyisumba yawu akayikisañana chikupu kubadika nyisumba yikwawu.+ 8 Neyi namwochi dehi Ejipitu nawa neyi ejima adinuñayi nawu anajilumuki, dihu hakelukawu nawu yami Yehova. 9 Hanodu ifuku nakatemesha antemesha mujimbopolu kulonda akamuzaalishi Etiyopiya wadikuhwelela yomweni; akaluwankana hanodu ifuku dinakwinza hadi Ejipitu, muloña chalala dakenza.’

10 “Yehova Mwanta Wabadika nahoshi nindi: ‘Nakakisañana mazaza aEjipitu kuzatisha chikasa chaMwanta Nebukaneza* wakuBabiloni.+ 11 Yena nimazanvu indi amashidika, antu asweja kuzuwa chikupu munyuza,+ akayileta nakukisañana ituña. Akamuholela Ejipitu mpoku jawu jatubali nawa akenzesha ituña dejima nayibimbi.+ 12 Nakomisha nyifwolu yaNile+ yamenji nawa nakalandisha ituña kudi antu atama. Nakazatisha añiinza kulonda nakabalumuni ituña niyuma yejima yidimu kwikala mahembi.+ Ami aweni, Yehova, yami inahoshi chumichi.’

13 “Yehova Mwanta Wabadika nahoshi nindi: ‘Nawa nakakisañana ankishi awuzondu* nianzambi amukunkulwayi amuNofi.*+ Mwituña daEjipitu himwakekalahu cheñi chiloluku,* nawa nakatiyisha antu amwituña daEjipitu+ woma. 14 Nakamubalumuna Patirosi+ kwikala mahembi nawa nakamwocha Zowani nikumusompesha No.*+ 15 Nakamuhuñunwina Sini kuzuwa kwami, mwakolela Ejipitu, nawa nakajilumuna antu amuNo. 16 Nakamwocha Ejipitu; nawa Sini wakafwa mutentu, No akamuhumuna nakumwiñilila nawa Nofi* akamulukuka namwaana wetenda! 17 Anyikwenzi amuOni* niamuPibeseti akafwa kumpoku yakabali, nawa antu amuniyi nyisumba akaya muwunkoli. 18 MuTehafinehesi, ifuku dakela mwidima neyi nakotoli dehi mpaanda jaEjipitu kwenoku.+ Ñovu yindi mwadivwimbilañayi yakamana,+ mavu akamubuta, nawa antu amumatawuni* indi akaya muwunkoli.+ 19 Nakamusompesha Ejipitu, nawa dihu hakelukawu nawu yami Yehova.’”

20 Nawa muchaaka chamu 11, mukakweji katachi, hefuku damu 7 dakakweji, izu daYehova denjili kudi ami nawu: 21 “Eyi mwana kamuntu, nakotoli chikasa chaFwaru mwanta wakuEjipitu; hiyakutwesha kuchikasa kulonda achuuki hela kuchipombeka ihina kulonda chikoli chakwila chitweshi kunona mpoku yakabaliku.”

22 “Dichi, Yehova Mwanta Wabadika nahoshi nindi: ‘Inakumwimakena Fwaru mwanta wakuEjipitu,+ nawa nukukotola makasa indi, chakola nichakotoka dehi,+ nawa nukukojeja mpoku yakabali yiholoki muchikasa chindi.+ 23 Kufumahu, nukuyipalañeshela aEjipitu munyuza nikuyimwañila mumatuña.+ 24 Nakakolesha makasa* amwanta wakuBabiloni+ nawa nakasha mpoku yami yakabali muchikasa chindi,+ dichi Fwaru nakamukotola makasa, nawa wakaabila kumesu indi* nezu datiyakana neyi chabaaña muntu wunakufwa. 25 Nakakolesha makasa amwanta wakuBabiloni, ilaña makasa aFwaru akalepa; nawa dihu hakelukawu nawu yami Yehova neyi nashi dehi mpoku yami yakabali muchikasa chamwanta wakuBabiloni nawa yayizatisha kujilumuna nachu ituña daEjipitu.+ 26 Nawa nakapalañeshela aEjipitu munyuza nikuyimwañila mumatuña,+ nawa dihu hakelukawu nawu yami Yehova.’”

 4 Menji amavulu amutohesheli, tuseloki tunakusefuka menji kwishina twamukojejeli kuleha nankashi.

 5 Dichaletesheli wulehi kubadika nyitondu yikwawu yejima yamwisaña.

 8 Kwosi mutondu wukwawu wamusida mwitempa daNzambi+ wesekeni nindiku.

Kwosi mutondu wukwawu mwitempa daNzambi wamubadikili lubanjiku.

10 “Dichi, Yehova Mwanta Wabadika nahoshi nindi: ‘Chineli waleheli nankashi, washikijili insa yindi mumavu, nawa muchima windi wadivwimbili muloña wakuleha kwindi, 11 nakamuhana kudi nyuuli wañovu wayuulaña nyuza.+ Chakadi nikujina, yena wakamubabesha, nawa ami nakamukaana muloña wakutama kwindi. 12 Nawa añiinza, antu asweja kuzuwa chikupu munyuza, akamutema nawa akamushiya hamapidi, mafu indi akaholokela muyinekineki yejima, nawa nyitayi yindi yakakotokela mutuloña twanyanya twejima twamwituña.+ Antu ejima ahamaseki akafuma muwulelu windi nawa akamushiya. 13 Tuda twejima twamuluzwizu twakashakama hañowa yindi, nawa anyama ejima amwisaña akashakama hanyitayi yindi.+ 14 Chakekala mwenimu kulonda kwakabuli kwikala mutondu hela wumu wudi kumenji wakakula nankashi hela wakashikija insa yindi mumavu, nawa kulonda kwakabuli kwikala mutondu atukumwinañawu chiwahi wakaleha nakushika kudi wena. Muloña awa ejima akayihana kudi kufwa, kwituña dakwishina deseki hamu nanowu anakuya mwibuku.’*

15 “Yehova Mwanta Wabadika nahoshi nindi: ‘Hefuku dakayayi Mwijamu,* nakadilisha antu. Dichi, nakajika menji amavulu asefukaña kwishina nawa nakashinka tuloña twanyanya twaletaña menji kulonda menji amavulu akaleki kuhita. Nakeyilisha Lebanoni muloña wamutondu wamusida, nawa nyitondu yejima yamwisaña yakooma. 16 Chikatiyakana lushindu lwakuchañuka kwindi, nakazaalisha nyuza hampinji yinakamukunkumwina Mwijamu* hamu nanowu ejima anakuya mwibuku,* nawa nyitondu yejima yamuEdeni,+ yasweja lubanji nikuwaha muLebanoni, yejima yatukumwinañawu chiwahi, yakakundejewa kwituña dakwishina deseki. 17 Anakunkumuki nindi Mwijamu,* kudi owu ajahawu nampoku yakabali,+ hamu nanowu amukwashileñaku* ashakamineña muwulelu windi mukachi kanyuza.’+

18 “‘Nyitondwinyi yamuEdeni yadiña yalema nawa yatoha neyi eyi?+ Ilaña chakadi nikujina, akakutwala hamu nanyitondu yamuEdeni kwituña dakwishina deseki. Wakakaama hamu nanowu abula kwalama, hamu nanowu ajahawu nampoku yakabali. Ichi dichakamumwekena Fwaru nimazaza indi ejima,’ dichinahoshiyi Yehova Mwanta Wabadika.”

 3 Yehova Mwanta Wabadika nahoshi nindi:

 7 ‘Neyi anakujimi dehi nakabuta mawulu nikwiyilisha tutumbwa tudimu.

11 Muloña Yehova Mwanta Wabadika nahoshi nindi:

‘Mpoku yakabali yamwanta wakuBabiloni yakenza hadi eyi.+

Kudivwimba kwaEjipitu akakumanisha, nawa mazaza indi ejima akayijilumuna.+

Akamwimbilaña Ejipitu nimazaza indi ejima,’ dichinahoshiyi Yehova Mwanta Wabadika.”

17 Dichi muchaaka chamu 12, hefuku damu 15 dakakweji, izu daYehova denjili kudi ami nawu: 18 “Eyi mwana kamuntu, yidili mazaza aEjipitu makumbu nawa wumukunkumwini kwituña dakwishina deseki, yena nianyana awambanda amunyuza yañovu, hamu nanowu anakuya mwibuku.*

19 “‘Hinyi iwabadika lubanji? Kunkumukaku, yaña wukaami nanowu abula kwalama!’

20 “‘Akafwila hamu nanowu akajahawu nampoku yakabali.+ Anamuhani kumpoku yakabali; mukokañeshelenu hamu namazaza indi ejima.

21 “‘Ayilobu añovu chikupu akahosha nayena niankwashi jindi kwishina Dejamu.* Chakadi nikujina, akakunkumuka nawa akakaama neyi abula kwalama, akajahawu nampoku yakabali. 22 Asiriya wudi mwenomu namazaza indi ejima. Majamu awu amunyeñumuka, ejima wawu afwili kumpoku yakabali.+ 23 Majamu indi adi kwishina debuku,* nawa mazaza indi anyeñumuka kwijamu dindi, ejima wawu ayitapili nampoku yakabali, muloña adiña nakutiyisha woma mwituña dawamomi.

24 “‘Elami+ wudi mwenomu namazaza indi iku ananyeñumuki ijamu dindi, ejima wawu afwili kumpoku yakabali. Anakunkumukili kwituña dakwishina chakadi kwalama, owu adiña nakutiyisha woma mwituña dawamomi. Ichi dinu akutiyila hamu nsonyi nanowu anakuya mwibuku.* 25 Anamwalili kadidi hamu nayibimbi, hamu namazaza indi ejima iku ananyeñumuki majamu indi. Wejima wawu hiyalamaku, ayijaha nampoku yakabali, muloña adiña nakutiyisha woma mwituña dawamomi. Nawa akutiyila hamu nsonyi nanowu anakuya mwibuku.* Anamushi hamu nayibimbi.

26 “‘Mwenomu dimudi aMisheki naTubali+ nimazaza awu* ejima. Majamu awu* amunyeñumuka. Wejima wawu hiyalamaku, ayipwikili nzwa-a nampoku yakabali, muloña adiña nakutiyisha woma mwituña dawamomi. 27 Komana hiyakakaama hamu nawayilobu añovu abula kwalama afwa dehi, owu akunkumukilili Mwijamu* hamu nayitwa yawu yanjitaku? Nawa akasha mpoku jawu jatubali mwishina danyitu yawu* ninshidi jawu hewulu damafwaha awu, muloña awa ayilobu añovu adiña nakutiyisha woma mwituña dawamomi. 28 Ilaña eyi, akakuchikila hamu nanowu abula kwalama, nawa wakakaama hamu nanowu ajahiliwu nampoku yakabali.

29 “‘Edomi+ wudi mwenomu, anyanta jindi nianlomboli jindi, hela chakwila adiña nañovu, ayikaamikili hamu nanowu ajahiliwu nampoku yakabali. Niwena akakaama hamu nanowu abula kwalama+ ninanowu anakuya mwibuku.*

30 “‘Mwenomu dimudi atulamba* ejima akukabeta kakuchimunswa, hamu naweni Sidoni+ ejima, anakunkumuki nansonyi hamu nanowu anajahiwu, hela chakwila atiyishileña woma muloña wañovu jawu. Akakaama chakadi kwalama hamu nanowu ajahiliwu nampoku yakabali nawa akatiyila hamu nsonyi nanowu anakuya mwibuku.*

31 “Yehova Mwanta Wabadika nahoshi nindi, ‘Fwaru wakamona yuma yejimiyi, nawa wakakundejewa hayuma yejima yamwekeneni mazaza indi;+ Fwaru niamashidika indi ejima akayijaha nampoku yakabali.’

32 “‘Chineli Fwaru watiyishileña woma mwituña dawamomi, yena nimazaza indi ejima akayikaamika hamu nanowu abula kwalama, nanowu ajahiliwu nampoku yakabali,’ dichinahoshiyi Yehova Mwanta Wabadika.”

6 “‘Ilaña neyi mukakutalatala amona mpoku yakabali yinakwinza ilaña yena kuvumisha luseñu+ kulonda asoñamishi antu nehi nawa mpoku yakabali yinza nakukisañana wumu hakachi kawu, owu muntu wakafwa muloña wakuluwa kwindi yomweni, ilaña nakakeñela mashi indi kudi mukakutalatala.’*+

7 “Hakwila eyi mwana kamuntu, nakutondi wiikali mukakutalatala waamwitala daIsarela; nawa neyi wutiya izu damukanwa kami, watela kuyileja kusoñamisha kwami.+ 8 Neyi nileja muntu watama nami, ‘Eyi muntu watama, chalala wakafwa,’+ ilaña eyi wukañanya kuhosha kulonda wumusoñamishi muntu watama ahimpi yuma yelañayi, muntu watama wakafwa muloña wakuluwa kwindi yomweni,+ ilaña mashi indi nakayikeñela kudi eyi. 9 Ilaña neyi wumusoñamisha muntu watama kulonda aleki yuma yatama ilaña akaana kuhimpa njila yindi yatama, wakafwa kukoola kuluwa kwindi,+ ilaña chakadi nikujina, eyi wakapulwisha wumi weyi.+

10 “Nawa eyi mwana kamuntu, wuyileji amwitala daIsarela neyi, ‘Munahoshi nenu: “Kudikaña kwetu ninshidi jetu jinatulemeni nankashi, jinakutukosesha;+ hanu dinu tukutwalekahu ñahi kuhanda?”’+ 11 Wuyileji neyi, ‘Yehova Mwanta Wabadika nahoshi nindi: “Kwesekeja nachinahanda ami, natiyaña kuwaha wanyi neyi muntu watama afwa,+ ilaña nakeñaña muntu watama kuhimpa njila yindi+ kulonda atwalekahu kuhanda.+ Lekenu, lekenu yuma yatama,+ enu amwitala daIsarela, muloñadi chimukufwila?”’+

12 “Nawa eyi mwana kamuntu, wuyileji anyana kawantu jeyi neyi, ‘Kuloña kwamuntu waloña kwakamwamwina wanyi neyi adikaña;+ hela kutama kwamuntu watama kwakamuhukesha wanyi neyi aleka kukoña yuma yatama;+ nawa hefuku dinavulumuniyi muntu waloña hakatwalekahu kuhanda muloña wakwila nawu waloñaku.+ 13 Neyi nimuleja muntu waloña nami: “Chalala wakatwalekahu kuhanda,” ilaña yakuhwelela mukuloña kwindi yomweni nawa akoñaña yuma yatama,*+ kwosi nyidimu yindi yakuloña yakanukawuku, ilaña wakafwa muloña wayuma yatama yinakoñiyi.+

14 “‘Nawa neyi nimuleja muntu watama nami: “Chalala wakafwa,” ilaña aleka kukoña nshidi nakutachika kwila yuma yayiwahi nawa yaloña,+ 15 nawa neyi muntu watama afuntisha chuma chakwatililimu+ nichuma chabuwiliyi,+ nawa atachika kwovwahila nshimbi jawumi nakuleka yuma yatama, chalala wakatwalekahu kuhanda.+ Wakafwa wanyi. 16 Kwosi nshidi yakoñeliyi hakamwinkelawu muloñaku.*+ Hamuloña wakwila yuma yayiwahi nawa yaloña, chalala wakatwalekahu kuhanda.’+

17 “Ilaña antu jeyi anahoshi nawu, ‘Njila yaYehova yaheña,’ henohu njila yawu diyaheña.

18 “Neyi muntu waloña aleka kuloña kwindi, nawa hakukoña yuma yatama, watela kufwa kukoola yumoyu.+ 19 Ilaña neyi muntu watama aleka yuma yatama yakoñañayi nakutachika kwila yuma yayiwahi nawa yaloña, wakatwalekahu kuhanda muloña wakwila mwenomu.+

20 “Ilaña enu munahoshi nenu, ‘Njila yaYehova yaheña.’+ Enu amwitala daIsarela, nakayisompesha hamuntu-hamuntu kwesekeja nanjila jenu.”

21 Chimwahitili mpinji, muchaaka chamu 12, mukakweji kamu 10, hefuku damuchitanu dakakweji kawunkoli wetu, iyala wapulukili muYerusalema wenjili kudi ami+ nakunleja nindi: “Musumba anawuhumuni!”+

22 Namelela henohu owu iyala wapulukili kanda enzi, chikasa chaYehova chenjili hadi ami, nawa wenzunwini kanwa kami henohu owu iyala kanda enzi kudi ami nantetemena. Dichi kanwa kami kenzunukili, nawa natachikili kuhosha cheñi.+

23 Kuhiñahu, izu daYehova denjili kudi ami nawu: 24 “Eyi mwana kamuntu, antu amunawa maluña akisika+ anakuhosha kutalisha hetuña daIsarela nawu, ‘Abarahama wadiña hohu nkawindi, hela chochu, watambwili ituña.+ Ilaña etu tudi amavulu; mwamweni anatwinki ituña diikali detu.’

25 “Dichi wuyileji neyi, ‘Yehova Mwanta Wabadika nahoshi nindi: “Munakuda mbiji yidi namashi,+ nawa mwafumbwilaña mesu kudi ankishi jenu awuzondu,* nawa munatwalekihu kupwekesha mashi.+ Hanu dinu ituña dikwikaliladi denu? 26 Munashindameni hampoku jenu jatubali,+ munakudiñija muyaaku yawuzondu, nawa muntu-himuntu hakachi kenu natamishi ñoda mukwawu.+ Hanu dinu ituña dikwikaliladi denu?”’+

27 “Ichi dichiwatela kuyileja neyi, ‘Yehova Mwanta Wabadika nahoshi nindi: “Kwesekeja nachinahanda ami, antu ejima adi mumaluña akisika akafwa kumpoku yakabali; ejima adi mwisaña, nakayihana kudi anyama azuwa amwisaña kulonda akayidii; nawa ejima adi mujimpwembu nimumayeñu akafwa namusoñu.+ 28 Nakabalumuna ituña dakekali mahembi chikupu,+ kudivwimba kwadu kwatama kwakamana, nawa mpidi jaIsarela jakashala kwamahembi,+ chakwila kwosi wakahitañamuku. 29 Neyi nabalumuni dehi ituña kwikala mahembi chikupu+ muloña wayuma yawuzondu yejima yinakoñiwu,+ dihakelukawu nawu yami Yehova.”’

30 “Hakwila eyi mwana kamuntu, antu jeyi anakuhosha wumu namukwawu hadi eyi kujimbañu nimuyiisu yamatala.+ Anakuhosha wumu namukwawu, muntu namanakwindi nindi, ‘Twayenu tutiyi izu dikufuma kudi Yehova.’ 31 Akadipompesha hamu nakushakama kumesu eyi neyi antu jami; nawa akatiya muwakahosha, ilaña hiyakelamuku.+ Muloña akuhamekaña mwamakudi* natunwa twawu, ilaña nyichima yawu yinakufwila kuheta munjila yawupwapoki. 32 Tiyaña! Kudi wena eyi wudi neyi kamina kakukeña, kanembiwu nezu dadiwahi nawa kanembiwu chiwahi nachisanji chanyonji. Akatiya muwakahosha, ilaña kwosi niwumu wakelamuku. 33 Nawa neyi chumichi chinashikijewi—nawa chakashikijewa—dihakelukawu nawu kaprofwetu wadiña mukachi kawu.”+

34 Izu daYehova denjili cheñi kudi ami nawu: 2 “Eyi mwana kamuntu, profwetaku yuma yakamwekena atubiña aIsarela. Wuprofweti nakuyileja atubiña neyi, ‘Yehova Mwanta Wabadika nahoshi nindi: “Oyihuñu yakamonawu atubiña aIsarela,+ adidiishaña awenawu! Komana anyikoku hidiwu atela kudiishawu kudi atubiñaku?+ 3 Mwadaña manji, mwavwalaña yakuvwala yakutuña namavuji anyikoku, nawa mwajahaña anyama atoha chikupu,+ ilaña mwadiishaña anyikoku wanyi.+ 4 Munakoleshi azeya hela kuuka akata wanyi. Nawa himunakasi anadikatishi hela kufuntisha anakululuta hela kukeñakeña anajimbaliku;+ ilaña, munayiyuuli chatama nikuyikabisha.+ 5 Dichi apalañenenimu muloña kwadiña kabiña wanyi;+ apalañenenimu nawa ekalili yakuda yawanyama ejima amwisaña. 6 Anyikoku ami alulutileña hampidi jejima nihatupidi twejima. Anyikoku ami apalañeneni heseki dejima, hikwadiña wakuyikeñakeña hela kuyitondaku.

7 “‘“Dichi, enu atubiña, tiyenu izu daYehova: 8 ‘“Kwesekeja nachinahanda ami,” dichinahoshiyi Yehova Mwanta Wabadika, “chineli anyikoku ami anekali ayikwachika, yakuda yawanyama ejima amwisaña, muloña hikwadiña kabiñaku, nawa atubiña twami hiyakeñakeñeli anyikoku amiku; ilaña atwalekelihu kudidiisha awenawu chatela adiisheña anyikoku ami,”’ 9 dichi, enu atubiña, tiyenu izu daYehova. 10 Yehova Mwanta Wabadika nahoshi nindi: ‘Inakwimakena atubiña, nukuyinkela muloña hanyikoku yami,* nawa nukuyilekesha kudiisha* anyikoku ami, nawa atubiña+ hiyakadidiishahu cheñi awenawuku. Nukupulwisha anyikoku ami kutunwa twawu, nawa hiyakekalahu yakuda yawu cheñiku.’”

11 “‘Dichi, Yehova Mwanta Wabadika nahoshi nindi: “Tiyenu, ami aweni nukukeñakeña anyikoku ami, nawa nukuyakamenaña.+ 12 Nukuyakamenaña anyikoku ami neyi kabiña wunawani anyikoku indi apalañenenimu nawa nakuyidiisha.+ Nukuyipulwisha kumaluña ejima kwapalañeneniwu mwifuku damavu nidamwidima wiyila bwi-i.+ 13 Nukuyileta kufuma mudi antu nawa nukuyikuñulwila hamu kufuma mumatuña nakuyileta mwituña dawu nawa nakayidiishilaña hamapidi aIsarela,+ kutuloña nikumaluña ejima akushakamamu amwituña. 14 Nakayidiishilaña mwiluña dadiwahi dakudiila, nawa iluña dakadiilañawu dakekala hampidi jaIsarela jajilehi.+ Akakaamaña kwenoku mwiluña dadiwahi mwakudiila,+ nawa akadaña munyenvu wawuwahi hamapidi aIsarela.”

15 “‘Yehova Mwanta Wabadika nahoshi nindi: “Ami aweni yami nakadiishaña anyikoku ami,+ nawa ami aweni yami nakayikaamikaña.”+ 16 “Anajimbali nakayikeñakeña,+ anakululuta nakayifuntisha, anadikatishi nakayikasakasa, nawa anazeyi nakayikolesha; ilaña atoha niakola nakayijilumuna. Wenawa nakayidiisha wunsompeshi.”

17 “‘Hakwila enu anyikoku ami, ichi dichinahoshiyi Yehova Mwanta Wabadika nindi: “Katataka nisompeshi hakachi kamukoku wumu namukoku mukwawu, hakachi kawayizamba anyikoku nawayizamba ampembi.+ 18 Komana munyenvu wawuwahi wumunadi wunashikili wanyi? Munakukeña nikudatola munyenvu wunashali nanyendu yenu? Nawa hanyima yakunwa menji anateeli, mwatela kuvundañesha menji nanyendu yenu? 19 Komana anyikoku ami atela kuda munyenvu wumunadatoli nanyendu yenu nikunwa menji imunavundañeshi nanyendu yenu?”

20 “‘Dichi, Yehova Mwanta Wabadika nayileji nindi: “Ichi dinu, ami aweni nukusompesha hakachi kamukoku watoha namukoku wakosa, 21 muloña mwatwalekelihu kuyishinjeka nambavu ninamafwiji, nawa ejima akata mwatwalekelihu kuyihuma nanseñu jenu nichimwayipalañesheleli kumaluña acheñi. 22 Nawa nakapulwisha anyikoku ami, hiyakekalahu cheñi ayikwachikaku;+ nawa nakasompesha hakachi kamukoku namukoku mukwawu. 23 Nakayitondela kabiña wumu,+ kambuñami Davidi,+ nawa wakayidiisha. Yena yomwenindi wakayidiishaña nawa wakekala kabiña kawu.+ 24 Nawa ami, Yehova, nakekala Nzambi yawu,+ nawa kambuñami Davidi wakekala nlomboli yawu.+ Ami aweni, Yehova, yami inachihoshi.

25 “‘“Nawa nakatiyañana chitiyañenu chakuwunda nawena,+ nawa anyama azuwa amwisaña+ nakayifumisha mwituña, kulonda akashakameña mukuwunda muchinkalampata nikukaama mumasaña.+ 26 Wena niiluña danyeñumuka kukapidi kami nakayibalumuna nkisu,+ nawa nakanokesha nvula hampinji yatelela. Nkisu jakanoka neyi nvula.+ 27 Nyitondu yamwisaña yakasoña nyikaabu, iseki dakamenesha yakuda+ nawa wena akashakama mukuwunda mwituña. Nawa dihakelukawu nawu yami Yehova neyi nakotoli dehi mpaanda jawu+ nikuyipulwisha kudi owu ayitwalili muwuduñu. 28 Hiyakekalahu cheñi ayikwachika kudi nyuzaku, hiyakayidahu cheñi kudi anyama azuwa amwisañaku, nawa akashakama mukuwunda, chakadi wakuyitiyisha woma.+

29 “‘“Nakayitumbila itempa dampuhu,* hiyakafwahu cheñi nanzala yakapwelendendi mwituñaku,+ nawa hiyakayisawulahu cheñi kudi nyuzaku.+ 30 ‘Dihakelukawu nawu ami Yehova Nzambi yawu, nidi nawu nawa amwitala daIsarela hiyantu jami,’+ dichinahoshiyi Yehova Mwanta Wabadika.”’

31 “Yehova Mwanta Wabadika nahoshi nindi, ‘Hakwila enu anyikoku ami,+ anyikoku inakamenaña, mudi antu hohu, nawa ami nidi Nzambi yenu.’”

35 Izu daYehova denjili cheñi kudi ami nawu: 2 “Eyi mwana kamuntu, talishaku chamesu eyi kwiluña damapidi daSeyiri,+ nawa wuprofweti yuma yakadimwekena.+ 3 Wudileji neyi, ‘Yehova Mwanta Wabadika nahoshi nindi: “Eyi iluña damapidi daSeyiri, ichi dinu inakukwimakena, nawa nukukwolwela chikasa chami kulonda nukubalumuni mahembi.+ 4 Nukukisañana nyisumba yeyi, eyi wukushala kwamahembi;+ nawa dihu hiwukwiluka neyi yami Yehova. 5 Muloña watwalekelihu kwikala nankunyi,+ nawa wayihanini aIsarela kumpoku yakabali hampinji yamweneñawu makabi, hampinji yayibabesheleñawu kakukumishaku.”’+

6 “Dichi, Yehova Mwanta Wabadika nahoshi nindi, ‘Kwesekeja nachinahanda ami, nakutoñweli kufwa* nawa hiwukutwesha kukutemukaku.+ Chineli kufwa dikuwababesheli nachu antu akuheleli, hiwukutwesha kukutemukaku.+ 7 Iluña damapidi daSeyiri nakadibalumuna mahembi,+ nawa nakakisañana wejima wunakuhitamu niwejima wunakufunta. 8 Nakenzesha mpidi jeyi nayibimbi; nawa antu akajahawu nampoku yakabali akadimbokela hatupidi tweyi, muyinekineki yeyi nimutuloña tweyi twejima. 9 Nakakubalumuna mahembi haya nyaaka, nawa munyisumba yeyi kwosi wakashakamamuku.+ Nawa dihiwakeluka neyi yami Yehova.’

10 “Chineli wahosheli neyi, ‘Iyi nyuza yiyedi ninawa matuña ayedi jakekala jami, nawa jejima jakekala jetu,’+ hela chakwila Yehova yomweni wudi mwenomu, 11 ‘dichi kwesekeja nachinahanda ami,’ dichinahoshiyi Yehova Mwanta Wabadika, ‘neyi chiwayizuwilili nikuyitiyila ichima muloña wakuyihela, ninami dichinakakwila.+ Nawa neyi nakusompeshi dehi, dihu hakañilukawu hakachi kawu. 12 Dihiwakeluka neyi ami aweni, Yehova, natiyi mazu akasawuntu ejima iwahosheli mapidi aIsarela hampinji yiwahosheli neyi, “Anayishiyi kwamahembi nawa anayihani kudi etu kulonda tuyikisañani.”* 13 Mwanhosheli nakudivwimba, nawa mwanhosheli mazu amavulu.+ Ejima nayitiyili.’

14 “Yehova Mwanta Wabadika nahoshi nindi: ‘Neyi nakushiyi dehi kwamahembi, iseki dejima dakazañalala. 15 Neyi chiwazañaleli hampinji yashalili wuswana wawantu amwitala daIsarela mahembi, dichinakakwila nineyi.+ Eyi iluña damapidi daSeyiri, wakashala kwamahembi, eña, Edomi yejima.+ Nawa dihakelukawu nawu yami Yehova.’”

36 “Hakwila eyi mwana kamuntu, profwetaku kutalisha hampidi jaIsarela neyi, ‘Enu mpidi jaIsarela, tiyenu izu daYehova. 2 Yehova Mwanta Wabadika nahoshi nindi: “Chilumbu nayisehi nindi, ‘Anha! Nimaluña azandama akushankulu anekali etu!’”’+

3 “Dichi profwetaku neyi, ‘Yehova Mwanta Wabadika nahoshi nindi: “Chineli anayishiyi kwamahembi nikuyilukukila kutubadi twejima kulonda mwiikali iheta dawayipuluka* amunyuza nawa antu anatwalekihu kuhosha hadi enu nikuyitwambila,+ 4 dichi enu mpidi jaIsarela, tiyenu izu daYehova Mwanta Wabadika! Yehova Mwanta Wabadika naleji jimpidi nitupidi, tuloña niyinekineki, maluña ashiyawu mahembi,+ nyisumba yakupuupa yashiyawu chisayikila nawa yaseheliwu kudi ayipuluka amunyuza yadikumashanawu nayu;+ 5 kudi awa ejima Yehova Mwanta Wabadika nahoshi nindi: ‘Nakuzuwa kwami kwasweja+ nakayihosha ayipuluka amunyuza nawa nakahosha Edomi yejima, ejima anatambuli ituña dami namuzañalu chikupu ninatusehu+ nawu diikali dawu, kulonda atambuli maluña adu akudiishilamu yimuna nikudipuupa.’”’+

6 “Dichi profwetaku kutalisha hadi ituña daIsarela, nawa wuleji jimpidi nitupidi, tuloña niyinekineki neyi, ‘Yehova Mwanta Wabadika nahoshi nindi: “Tiyenu! Nakahosha nakuzuwa kwami kwasweja ninakuhila kwami, muloña munomiki kasawuntu kanyuza.”’+

7 “Dichi, Yehova Mwanta Wabadika nahoshi nindi: ‘Ami aweni nanyamwini chikasa chami nakusanyika nami nyuza yayinyeñumuka yakasawuka yayenayu.+ 8 Ilaña enu mpidi jaIsarela, mwakamena nyitayi nikusoña nyikaabu yakuda antu jami aIsarela,+ muloña keña afunti. 9 Muloña ami nidi nenu, nukubalumukila kudi enu, nawa akayidima nikuyitumba mbutu. 10 Nakavulisha antu jenu, wowu antu jaIsarela ejima, wejima wawu, nawa munyisumba mwakashakama antu+ nimaluña akisika akayituñulula.+ 11 Mwamweni, nakavulisha antu jenu niyimuna yenu;+ akavula nakusemununa. Nawa hadi enu nakashakamishahu antu neyi chimwadiña hakusambila,+ nawa nakayilisha mwakekali nawushi kubadika kunyima.+ Dihu himwakeluka nenu yami Yehova.+ 12 Nakakojeja antu, dikwila nawu antu jami aIsarela, kwenda hadi enu, nawa mwakekala awu.+ Mwakekala wuswana wawu, nawa himwakayileteshahu cheñi kushala chakadi anyanaku.’”+

13 “Yehova Mwanta Wabadika nahoshi nindi: ‘Chineli anakuyila enu nawu, “Mudi ituña dadaña antu nawa dabondaña nyuza yadu anyana,”’ 14 ‘dichi, hiwakadahu cheñi antu hela kushiya nyuza yeyi chakadi anyanaku,’ dichinahoshiyi Yehova Mwanta Wabadika. 15 ‘Naketejahu cheñi nyuza kukuhosha kasawuntu hela kukusupisha kudi antuku,+ nawa hiwakahukeshahu cheñi nyuza yeyiku,’ dichinahoshiyi Yehova Mwanta Wabadika.”

16 Nawa izu daYehova denjili cheñi kudi ami nawu: 17 “Eyi mwana kamuntu, hampinji amwitala daIsarela yashakamineñawu mwituña dawu, atamishili ituña nayilwilu yawu ninanyidimu yawu.+ Yilwilu yawu nayimweneña neyi majilu amumbanda wunayi kukakweji.+ 18 Dichi nayihuñunwinini kuzuwa kwami muloña wamashi apwekesheliwu hetuña+ nihamuloña wakutamisha ituña nawankishi jawu awuzondu.*+ 19 Dichi nayipalañesheleli munyuza nikuyimwañila mumatuña.+ Nayisompesheli kwesekeja nayilwilu yawu nikwesekeja nanyidimu yawu. 20 Ilaña chayiliwu kunoyu nyuza, antu ajiloleli ijina dami dajila+ nanochu chayililiwu nawu, ‘Awa diwu antu jaYehova, ilaña afumini mwituña dindi.’ 21 Ilaña nakahakwilaku ijina dami dajila dinajiloliwu antu jaIsarela munyuza mwayiliwu.”+

22 “Dichi wuyileji amwitala daIsarela neyi, ‘Yehova Mwanta Wabadika nahoshi nindi: “Enu amwitala daIsarela, bayi neyi inakuyifuntisha hamuloña wanenuku, ilaña hamuloña wejina dami dajila dimunajiloli munyuza mumwayili.”’+ 23 Yehova Mwanta Wabadika nahoshi nindi: ‘Chakadi nikujina, nakajilika ijina dami+ dabadika dinajiloliwu munyuza, dimunajiloli mukachi kawu. Nawa nyuza dihu hakelukawu nawu yami Yehova+ neyi nadijiliki dehi mukachi kenu hamesu awu. 24 Nakayifumisha munyuza nawa nakayikuñulwila hamu kufuma mumatuña ejima nakuyileta mwituña denu.+ 25 Nakayisansa menji atooka, nawa mwakekala akadi majilu;+ nakayitookesha kumajilu enu ejima+ nikudi ankishi jenu awuzondu ejima.+ 26 Nakayinka muchima wawuha+ nikusha spiritu yayiha mudi enu.+ Nakafumisha muchima wakola neyi ilola+ munyijimba yenu nakuyinka muchima wawovu.* 27 Nakasha spiritu yami mudi enu, nakayendesha munshimbi jami,+ nawa mwakwovwahila nikulondela mazu ami awunsompeshi. 28 Kufumahu, mwakashakama mwituña dinenkeli ankakulula jenu, enu mwakekala antu jami nawa ami nakekala Nzambi yenu.’+

29 “‘Nakayamwina kumajilu enu ejima nawa nakaleja mbutu kulonda jakasoñi nankashi, nawa hinakaletahu nzala yakapwelendendi hadi enuku.+ 30 Nakavulisha chikupu nyikaabu yakunyitondu niyakuda yamumaha, kulonda mwakabuli kusawuka cheñi nanzala yakapwelendendi munyuza.+ 31 Dichi mwakanuka yilwilu yenu yatama ninyidimu yenu yatama, nawa chakayikata chikupu kumuchima muloña wayilwilu yenu yatama niyaaku yenu yawuzondu.+ 32 Ilaña ilukenu chumichi: Inakwila chumichi muloña wanenu wanyi,’+ dichinahoshiyi Yehova Mwanta Wabadika. ‘Ilaña, tiyenu nsonyi nawa sawukenu muloña wayilwilu yenu yatama, enu amwitala daIsarela.’

33 “Yehova Mwanta Wabadika nahoshi nindi: ‘Mwifuku dinakayitookesha kunshidi jenu jejima, nakaletesha antu akashakami munyisumba+ nawa maluña akisika akayituñululi.+ 34 Ituña dashalili kwamahembi datalileñawu kudi muntu wejima wahitileña akadidima. 35 Nawa antu akahosha nawu: “Ituña dashalili kwamahembi dinekali neyi itempa daEdeni,+ nawa nyisumba yakisikili nakushala kwamahembi nawa yahumwiniwu, anayikoleshi nawa munakushakama antu.”+ 36 Nawa nyuza yayinyeñumuka yakashala, yakeluka nawu ami, Yehova, yami inatuñululi jahumwiniwu, nawa natumbi mwashalili mahembi. Ami aweni, Yehova, yami inachihoshi, nawa nachikoñi.’+

37 “Yehova Mwanta Wabadika nahoshi nindi: ‘Naketeja cheñi amwitala daIsarela kunlomba kulonda nakayilili chumichi: kuyivulishila antu jawu neyi mukanka wayimuna. 38 Neyi mukanka wawakakujila, neyi mukanka waYerusalema* hampinji yayawija yawu,+ nyisumba yakisikili yakenzala nanyikanka yawantu;+ nawa dihakelukawu nawu yami Yehova.’”

37 Chikasa chaYehova chadiña hadi ami, Yehova wansendeli naspiritu yindi nawa wantentekeli hakachi kachana chachinekineki,+ nawa mwadiña mwenzala mafwaha. 2 Wanhitañesheli mwejima mwadiñawu, dichi namweni mafwaha amavulu analumbami muchana chachinekineki, nawa adiña oma chikupu.+ 3 Wañihwili nindi: “Eyi mwana kamuntu, awa mafwaha anateli kwikala nawumi cheñi?” Ami naakwili nami: “Yehova Mwanta Wabadika, eyi yeyi wuneluki.”+ 4 Dichi wanlejeli nindi: “Profwetaku hanawa mafwaha, nawa wuyili neyi, ‘Enu mafwaha oma, tiyenu izu daYehova:

5 “‘Yehova Mwanta Wabadika nayili awa mafwaha nindi: “Nukukojeja muuya wiñili mudi enu, nawa mukwikala nawumi cheñi.+ 6 Nukuyisha nyisisa ninyisunyi, nukuyibuta ikowa nawa nukuyisha muuya, dichi mukwikala nawumi cheñi; nawa dihimukwiluka nenu yami Yehova.”’”

7 Dichi naprofweteli neyi chanlejeliwu. Chinaprofweteleña, natiyili ipumba, ipumba damafwaha anakukolokota, nawa mafwaha atachikili kudinuña hamu, ifwaha nefwaha. 8 Dichi namweni nyisisa ninyisunyi yinakwinza hadi wena, nawa anakuyibuta kudi ikowa. Ilaña adiña kanda ekali namuuya.

9 Kufumahu, wanlejeli nindi: “Profwetaku kumpepela. Eyi mwana kamuntu, profwetaku nakuleja mpepela neyi, ‘Yehova Mwanta Wabadika nahoshi nindi: “Eyi mpepela,* inzaku kufuma kumbadi jiwana,* nawa wukunkili hadi awa antu ajahiliwu kulonda ekali cheñi nawumi.”’”

10 Dichi naprofweteli neyi chanlejeliyi, nawa muuya* weñilili mudi wena, ekalili nawumi cheñi nawa emeni,+ adiña izaza deneni chikupu.

11 Kuhiñahu, wanlejeli nindi: “Eyi mwana kamuntu, awa mafwaha diwu muza waIsarela wejima.+ Anakuhosha nawu, ‘Mafwaha etu oma, nawa kuchiñeja kwetu kwajiya dehi.+ Anatuketuli kuyuma yejima.’ 12 Dichi profwetaku nawa wuyileji neyi, ‘Yehova Mwanta Wabadika nahoshi nindi: “Enu antu jami, nakenzununa majamu enu+ nikuyihindwisha mumajamu, nawa nakayileta kwituña daIsarela.+ 13 Nawa enu antu jami, neyi nenzununa majamu enu nikuyihindwisha mumajamu, dihimwakeluka nenu yami Yehova.”’+ 14 ‘Nakasha spiritu yami mudi enu nawa mwakekala nawumi cheñi,+ nakayishakamisha mwituña denu. Mwakeluka nenu ami aweni, Yehova, yami inahoshi chumichi nawa nachikoñi,’ dichinahoshiyi Yehova.”

15 Izu daYehova denjili cheñi kudi ami nawu: 16 “Hakwila eyi mwana kamuntu, nonaku kamutondu wusonekihu neyi, ‘KaYuda nawa kawantu jaIsarela adiyi nawu.’*+ Kufumahu, wunoni kamutondu kakwawu wusonekihu neyi, ‘KaYosefu, dikwila nawu kamutondu kaEfuremu, nawa kawantu jaIsarela ejima adiyi nawu.’*+ 17 Kuhiñahu, wutubombi hamu kulonda twiikali kamutondu kamu hohu muchikasa cheyi.+ 18 Neyi antu jeyi* akwihula nawu, ‘Wukutuleja wanyi munatalishi yumiyi?’ 19 wuyakuli neyi, ‘Yehova Mwanta Wabadika nahoshi nindi: “Nakanona kamutondu kaYosefu nawa kanyichidi yaIsarela yidiyi nayu. Kamutondu kadi muchikasa chaEfuremu. Nakakibomba nakamutondu kaYuda; nawa nakatwilisha kwikala kamutondu kamu,+ dichi twakekala kamutondu kamu muchikasa chami.”’ 20 Tunyitondu tuwunasonekihu twatela kwikala muchikasa cheyi kulonda akatumoni.

21 “Kufumahu wakayileji neyi, ‘Yehova Mwanta Wabadika nahoshi nindi: “Nakafumisha aIsarela munyuza munayiwu, nawa nakayikuñulwila hamu kufuma kutubadi twejima nakuyileta kwituña dawu.+ 22 Nakayibalumuna kwikala muza wumu mwituña,+ hamapidi aIsarela, nawa wejima wawu akayiyuula kudi mwanta wumu,+ hiyakekalahu cheñi nyuza yiyedi hela kwambukahu cheñi nakwikala mawanta ayediku.+ 23 Hiyakaditamishahu cheñi nawankishi jawu awuzondu* hela nayaaku yawu yawuzondu hela nakutama kwawu kwejimaku.+ Nakayamwina kunyidimu yawu yejima yakubula kushinshika yayileteshaña avulumuneña nawa nakayitookesha. Akekala antu jami, nawa ami nakekala Nzambi yawu.+

24 “‘“Kambuñami Davidi diyi wakekala mwanta wawu,+ nawa wejima wawu akekala nakabiña wumu hohu.+ Akalondelaña mazu ami awunsompeshi nikwovwahila nshimbi jami.+ 25 Akashakama mwituña dinenkeli kambuñami, Yakoba, mwashakamineña ankakulula jenu,+ nawa akashakamamu haya nyaaka,+ wena nianyanawu*+ kushilahu nimakiñu akalondelahu. Nawa kambuñami Davidi diyi wakekala nlomboli* yawu haya nyaaka.+

26 “‘“Dichi nakatiyañana nawu chitiyañenu chakuwunda;+ chakekala chitiyañenu chahaya nyaaka nawena.+ Nakayiloñeshela iluña nawa nakayivulisha nikusha iluña dami dajila mukachi kawu haya nyaaka. 27 Itenti* dami dakekala nawena,* nawa ami nakekala Nzambi yawu, niwena akekala antu jami.+ 28 Neyi iluña dami dajila didi dehi mukachi kawu haya nyaaka, dihakeluka nyuza nawu ami Yehova, yami inakujilika aIsarela.”’”+

38 Izu daYehova denjili cheñi kudi ami nawu: 2 “Eyi mwana kamuntu, talishaku chamesu eyi kudi Gogi wakwituña daMagogi,+ nlomboli muneni* waMisheki naTubali,+ nawa wuprofweti yuma yikamumwekena.+ 3 Wuhoshi neyi, ‘Yehova Mwanta Wabadika nahoshi nindi: “Tiyaña, inakukwimakena eyi Gogi, nlomboli muneni* waMisheki naTubali. 4 Nakakubalumuna nawa nakakukoba nzambu munyibaña+ yeyi nakukwidishila hamu nanjita+ yeyi yejima, tuwalu niakakwendela hatuwalu, iku wejima wawu anavwali yakuvwala yalubanji, izaza deneni nankashi dikweti nkebu jamaneni ninkebu janyanya,* ejima wawu anakwati mpoku jatubali; 5 Peresi, Etiyopiya niPati+ adi hamu nawu, wejima wawu akweti nkebu janyanya nimatepa; 6 Goma nimazanvu amashidika indi ejima, amwitala daTogama+ kufuma kumaluña akwakulehi akukabeta kakuchimunswa, hamu namazanvu amashidika indi ejima—antu amavulu ashiyashana adi naneyi.+

7 “‘“Dimanyeki, diloñeshenu, eyi hamu namashidika eyi ejima anapompi hamu naneyi, nawa eyi wukwikala mukulumpi* wawu.

8 “‘“Akakutambika neyi hanahiti dehi mafuku amavulu. Muyaaka yakukuminina wakalukuka ituña dikweti antu anafuntishiwu kufuma kulukisa lwampoku yakabali, anafumi mudi antu amavulu ashiyashana nakupompela hampidi jaIsarela, jashalili kwamahembi hampinji yayilehi. Antu amunidi ituña afumini mudi antu ashiyashana, nawa wejima wawu ashakamini mukuwunda.+ 9 Wakayilukuka neyi nvula yampepela, nawa wakabuta ituña neyi mavu, eyi nimazanvu eyi amashidika ejima niantu amavulu ashiyashana iwudi nawu.”’

10 “Yehova Mwanta Wabadika nahoshi nindi: ‘Hanodu ifuku yitoñojoka yakenza mumuchima weyi, nawa wakakasa kafuta katama. 11 Wakahosha neyi: “Nukulukuka ituña dikweti nyikala yabula kukiñewa.*+ Nukwimakena ejima anakushakama mukuwunda, anakushakama chakadi kwakama, ejima anakushakama munyikala yabula kukiñewa nampwembu, nanyikomenu hela nayiisu.” 12 Kakekala kafuta kakupuupa yuma yayivulu, kulukuka maluña akisika munakushakamawu+ niantu anapompeshiwu kufuma munyuza,+ anakudilumbikila maheta niyuma,+ owu anakushakama hakachi keseki.

13 “‘Sheba+ niDedani,+ akakulanda nakulandulula aTashishi+ niamashidika* indi ejima akakwila nawu: “Wunakulukuka kulonda wupuupi yuma yayivulu? Wunapompeshi mashidika eyi kulonda wusendi siliva niwuru, wusendi maheta niyikumba, wupuupi yuma yayivulu?”’

14 “Dichi eyi mwana kamuntu, profwetaku nakumuleja Gogi neyi, ‘Yehova Mwanta Wabadika nahoshi nindi: “Hanodu ifuku dakashakamañawu antu jami aIsarela mukuwunda, eyi wakachiluka wanyi?+ 15 Wakafumina kwiluña deyi, kumaluña akwakulehi akukabeta kakuchimunswa,+ eyi niantu amavulu ashiyashana iwudi nawu, wejima wawu anakwendela hatuwalu, hiizaza deneni, njita yeneni.+ 16 Wakalukuka antu jami neyi mavu chabutañawu ituña. Eyi Gogi, mumafuku akukuminina nakakuleta wakalukuki ituña dami+ kulonda nyuza yakañiluki neyi nadijiliki dehi ami aweni kuhitila mudi eyi hamesu awu.”’+

17 “Yehova Mwanta Wabadika nahoshi nindi: ‘Hiyeyi muntu yowumu inahoshelihu mumafuku akunyima kuhitila mudi ambuñami atuprofwetu amuIsarela, aprofweteli hadi yaaka yayivulu nawu akakuleta kulonda wakayimakeni aIsarelaku?’

18 “Yehova Mwanta Wabadika nahoshi nindi, ‘Hanodu ifuku, hefuku dakalukukayi Gogi ituña daIsarela, kuzuwa kwami kwasweja kwakasañumuka.+ 19 Nakahosha iku nahili nawa nazuwi chikupu; nawa hanodu ifuku mwituña daIsarela mwakahita mutentanshi weneni. 20 Muloña wanami, inshi jamukaluñalwiji, atuda amuluzwizu, anyama azuwa amwisaña, anyama ejima asemaña mateta akalabaña hamaseki niantu ejima aheseki akazaala, mpidi jakashihuka, malola anyuña akahumuka,+ nawa mbañu jejima jakakundukila heseki.’

21 “Yehova Mwanta Wabadika nahoshi nindi: ‘Nakamutemeshela mpoku yakabali hamapidi ami ejima. Muntu wejima wakemakena manakwindi+ nampoku yindi yakabali. 22 Nakamusompesha* nachipupu+ ninakupwekesha mashi. Nawa nakanokesha nvula yeneni ninvula yamalola,+ kesi+ nisawufa*+ hadi yena nihamazanvu amashidika indi nihadi antu amavulu ashiyashana adiyi nawu.+ 23 Nawa chakadi nikujina, nakaditohesha nikudijilika ami aweni nawa nakaletesha nyuza yayivulu yakañiluki. Dihakelukawu nawu yami Yehova.’

39 “Nawa eyi mwana kamuntu, profwetaku hadi Gogi+ nakumuleja neyi, ‘Yehova Mwanta Wabadika nahoshi nindi: “Inakukwimakena eyi Gogi, nlomboli muneni* waMisheki naTubali.+ 2 Nakakubalumuna nawa nakakulombola nakukufumisha kumaluña akwakulehi akukabeta kakuchimunswa+ nakukuleta hamapidi aIsarela. 3 Naketa kuwuta weyi wamukunji kulonda wakaholoki muchikasa cheyi chachimunswa nawa nakakojeja nyivu yeyi yakaholoki muchikasa cheyi chachidiilu. 4 Wakafwila hamapidi aIsarela,+ eyi nimazanvu amashidika eyi ejima niantu akekala naneyi. Nakayihana kudi atuda ashiyashana ayikwata nikudi anyama azuwa amwisaña kulonda akayidii.”’+

5 “Yehova Mwanta Wabadika nahoshi nindi, ‘Wakafwila hampata,+ muloña ami aweni yami inachihoshi.’

6 “‘Nawa Magogi nakamutemeshela kesi ninowu anakushakama muyituutu mukuwunda,+ nawa dihu hakelukawu nawu yami Yehova. 7 Nakakojeja ijina dami dajila akadiluki mukachi kawantu jami aIsarela, nawa hinaketeja ijina dami dajila akadijilolihu cheñiku. Nawa nyuza yakeluka nawu yami Yehova,+ Wajila muIsarela.’+

8 “‘Mwamweni, chumichi chinakwinza, nawa chakamwekana,’ dichinahoshiyi Yehova Mwanta Wabadika. ‘Idi didu ifuku dinatenaña. 9 Antu amunyisumba yaIsarela akayaña nakubutula kesi kuzatisha yitwa yanjita, dikwila nawu nkebu janyanya* nijamaneni, mata anyikunji ninyivu, tubama twanjita* nimayoña. Nawa yumiyi akayizatishaña kubutula nachu kesi+ hadi yaaka 7. 10 Hiyakasendaña nyitondu mwisaña hela kuchaya nchawa mumpataku, muloña akazatishaña yitwa yanjita kubutula nachu kesi.’

“Yehova Mwanta Wabadika nahoshi nindi, ‘Akasenda yuma kudi antu ayitambwili nawa akapuupa yuma kudi antu ayipuupili.’

11 “‘Hanodu ifuku, Gogi+ nakamwinka iluña dakumujiikahu muIsarela, muchinekineki mwahitilaña antu ayaña kumusela wakaluñalwiji, nawa wakajika njila yanowu ahitilañamu. Kwenoku dikwakamujiikawu Gogi nimazaza indi ejima, nawa akatenaku nawu Chinekineki chaHamoni Gogi.*+ 12 Amwitala daIsarela akajiika awa antu hadi tukweji 7 kulonda akatookeshi ituña.+ 13 Antu ejima amwituña akazataku mudimu wakuyijiika, nawa chumichi chakayitiyakesha mpuhu mwifuku dinakadilemesha ami aweni,’+ dichinahoshiyi Yehova Mwanta Wabadika.

14 “‘Amayala akayinka mudimu wakutwalekahu kuhitañana mwituña nakujiika yibimbi yakakaama heseki dejima, kulonda akaditookeshi. Akatwalekahu nakukeñakeña hadi tukweji 7. 15 Owu akahitañanaña mwituña neyi awana ifwaha damuntu, akashañahu chinjikijilu. Kuhiñahu, owu anenkiwu mudimu wakujiika akadijiika muChinekineki chaHamoni Gogi.+ 16 Nawa kwenoku kwakekala nimusumba akatenañawu nawu Hamona.* Nawa akatookesha ituña.’+

17 “Hakwila eyi mwana kamuntu, Yehova Mwanta Wabadika nahoshi nindi: ‘Lejaku atuda ashiyashana ejima nianyama ejima azuwa amwisaña neyi, “Dipompeshenu hamu mwinzi. Pompenu kumulambu wami winnakuyiloñeshela, mulambu weneni hamapidi aIsarela.+ Mukuda mbiji nikunwa mashi.+ 18 Mukuda mbiji yawayilobu nawa mukunwa mashi awanlomboli ahamaseki, dikwila nawu anyikoku ayizamba, anyana kanyikoku, ampembi niañombi ayizamba, wowu anyama ejima atoha amuBashani. 19 Mukuda manji amavulu nankashi nikunwa mashi sampu munasheti namulambu winnakuyiloñeshela.”’

20 “Yehova Mwanta Wabadika nahoshi nindi, ‘Kumesa yami mukwikuta tuwalu niakakwendesha makalu, ayilobu niamashidika+ ashiyashana ejima.’

21 “‘Nakamwekesha kulema kwami munyuza, nawa nyuza yejima yakamona wunsompeshi winnasompeshi niñovu* yinnamwekeshi hakachi kawu.+ 22 Kufuma tuhu hanodu ifuku amwitala daIsarela dihakelukawu nawu yami Yehova Nzambi yawu. 23 Nawa nyuza yakeluka nawu amwitala daIsarela ayili muwunkoli kukoola nshidi jawu, muloña adiña ashinshika kudi ami wanyi.+ Dichi nayiswekeli chamesu ami+ nawa nayihanini kudi ayilumbu jawu,+ nawa wejima wawu afwili kumpoku yakabali. 24 Nayibabesheli kwesekeja namajilu awu ninochu chafumpileñawu nshimbi, nawa nayiswekeli chamesu ami.’

25 “Dichi, Yehova Mwanta Wabadika nahoshi nindi: ‘Nakafuntisha ankoli jaYakoba+ nawa nakatiyila luwi amwitala daIsarela+ ejima; nawa nakaamwina ijina dami dajila+ nañovu jami jejima. 26 Neyi anayisawuli dehi muloña wakubula kwikala ashinshika kudi ami,+ akashakama mwituña dawu mukuwunda, chakadi wakuyitiyisha woma.+ 27 Neyi nayileti dehi kufuma mudi antu ashiyashana nikuyipompesha hamu kufuma mumatuña awayilumbu jawu,+ nakadijilika cheñi ami aweni mukachi kawu hamesu anyuza yayivulu.’+

28 “‘Dihakelukawu nawu yami Yehova Nzambi yawu neyi niyitwala muwunkoli mukachi kanyuza nawa niyifuntisha kwituña dawu, chakadi kushiyahu hela wumu.+ 29 Hinakaswekahu cheñi chamesu ami kudi wenaku,+ muloña nakahuñunwina spiritu yami hadi amwitala daIsarela,’+ dichinahoshiyi Yehova Mwanta Wabadika.”

40 Muchaaka chamu 25 chawunkoli wetu,+ kumatachikilu achaaka, hefuku damu 10 dakakweji, muchaaka chamu 14 kufuma hahumukili musumba,+ hadodenodu ifuku chikasa chaYehova chadiña hadi ami, nawa wantwalili kumusumba.+ 2 Kuzatisha yimwenu, Nzambi wanleteli mwituña daIsarela nawa wantentekeli hampidi yayilehi nankashi,+ hadiña chuma chamwekeneña neyi musumba kukabeta kakuchidiilu.

3 Chanshikijiliyi kwenoku, namweni iyala wamwekeneña neyi wuneñu.+ Muchikasa chindi mwadiña mwonji wafalakisi niiteti* dakupima nachu,+ nawa wadiña wemana muchiisu. 4 Owu iyala wanlejeli nindi: “Eyi mwana kamuntu, shinshikaku chikupu, tiyililaku nakanañachima, nawa wushiku muchima kuyuma yejima yinukukuleja, muloña dichinakuleteliwu kunu. Wuyileji amwitala daIsarela yuma yejima yiwukumona.”+

5 Namweni mpwembu yanyeñumuka hanji yatembeli.* Muchikasa chanowu iyala mwadiña iteti dakupima nachu dadilehi makyubiti 6 (kukyubiti-hikyubiti kwadiña kwakunuña chikasa chakusamanesha).* Watachikili kupima mpwembu, nawa kudita kwayu kwadiña iteti dimu nawa kuleha kwayu kuya mwiwulu kwadiña iteti dimu.

6 Kufumahu, wayili kuchiisu chatalisha kumusela+ nawa wakandamini hamankenka* achu. Chapiminiyi hawiñililu wakuchiisu, hadiña iteti dimu muwihi, nawa hawiñililu wukwawu nihena hadiña iteti dimu muwihi. 7 Kapeka-hikapeka kanhembi kadiña iteti dimu mukuleha nawa iteti dimu muwihi, kufuma hakapeka kamu kawanhembi+ kuya hakakwawu haleheli makyubiti atanu. Hawiñililu wakuchiisu chadiña kukamwihi nekeeki dahachiisu chatalisha mukachi haleheli iteti dimu.

8 Wapimini ikeeki dahachiisu datalisha mukachi, nawa daleheli iteti dimu. 9 Kuhiñahu, wapimini ikeeki dahachiisu, dadiña makyubiti 8; nawa wapimini niyishimi yachu yamumbavu, yadiña makyubiti ayedi; nawa ikeeki dahawiñililu wakuchiisu dadiña kukabadi katalisha mukachi.

10 Kukabadi-hikabadi kachiisu chakumusela kwadiña tupeka tusatu twawanhembi. Twejima twadiña twesekana, nawa yishimi yejima yamumbavu yakutubadi twejima yadiña yesekana.

11 Kufumahu, wapimini wiñililu wakuchiisu muwihi, wadiña makyubiti 10; nawa chiisu chadiña makyubiti 13 mukuleha.

12 Iluña dakukoleka dadiña kumbidi yatupeka twawanhembi kutubadi twejima dadiña kyubiti yimu. Tupeka twawanhembi kutubadi twejima tuyedi twadiña namakyubiti 6.

13 Kuhiñahu, wapimini chiisu kufuma kwiwulu dakapeka kamu kawanhembi* nakushika kwiwulu dakapeka kakwawu, nawa muwihi hadiña makyubiti 25; wiñililu wumu waditalashanini nawiñililu wukwawu.+ 14 Kufumahu, wapimini yishimi yamumbavu, yadiña makyubiti 60 kuya mwiwulu, kushilahu niyishimi yamumbavu yakuyiisu yanyeñumukili lubanza lwejima. 15 Kufuma kumbidi yawiñililu wakuchiisu nakushika kumbidi yekeeki dahawiñililu kuchiisu chamukachi hadiña makyubiti 50.

16 Kwadiña mawindu* atupeka twawanhembi niayishimi yatu yamumbavu yamukachi kachiisu kutubadi twejima, adiña namafuremu+ atoheleli mukachi ilaña hanji anyanya. Mukachi kamakeeki ahawiñililu nimwena mwadiña mawindu kutubadi twejima, nawa hayishimi yamumbavu hadiña yifwikija+ yamutondu wamukoma.

17 Kufumahu, wantwalili mulubanza lwahanji, nawa namweni tupeka twakudiilamu*+ nichisesa chamalola chanyeñumukili lubanza. Kwadiña tupeka twakudiilamu 30 hachisesa chamalola. 18 Chisesa chamalola chadiña kumbadi yayiisu, kuleha kwachu kwesekeni nakuleha kwayiisu. Ichi chisesa chamalola chadiña chamwishina.

19 Kuhiñahu, wapimini chintampu* kufuma kumbidi yachiisu chamwishina kushika kumbidi yalubanza lwamukachi. Hadiña makyubiti 100 kumusela nikukabeta kakuchimunswa.

20 Lubanza lwahanji lwadiña nachiisu chatalishili kukabeta kakuchimunswa, nawa wachipimini mukuleha nimuwihi. 21 Kukabadi-hikabadi kwadiña tupeka twawanhembi tusatu. Yishimi yachu yamumbavu niikeeki dahawiñililu jadiña jesekana nachiisu chatachi. Chadiña makyubiti 50 mukuleha nawa makyubiti 25 muwihi. 22 Mawindu* achu, ikeeki dachu dahawiñililu niyifwikija+ yachu yamutondu wamukoma jadiña jesekana nanoju jakuchiisu chakumusela. Hakwila antu ashiki hachiisu, akandamineña mankenka* 7, nawa ikeeki dachu dahawiñililu dadiña kumbidi yawu.

23 Mulubanza lwamukachi mwadiña chiisu chaditalashanini nachiisu chakukabeta kakuchimunswa nichaditalashanini nachiisu chakumusela. Wapimini chintampu kufuma kuchiisu chimu nakushika kuchiisu chikwawu, nawa hadiña makyubiti 100.

24 Kufumahu, wantwalili kukabeta kakuchidiilu, nawa namweni chiisu kukabeta kakuchidiilu.+ Wapimini yishimi yachu yamumbavu niikeeki dachu dahawiñililu, nawa jesekeni najikwawu. 25 Kukabadi-hikabadi kachu kwadiña mawindu* nihekeeki dachu dahawiñililu, neyi chadiña mawindu amakwawu. Chadiña makyubiti 50 mukuleha nawa makyubiti 25 muwihi. 26 Chadiña namankenka* 7 akukandaminahu,+ nawa ikeeki dachu dahawiñililu dadiña kumbidi yawu. Nawa hayishimi yachu hadiña yifwikija yamutondu wamukoma, chimu iku chikwawu iku.

27 Lubanza lwamukachi lwadiña nachiisu chatalishili kukabeta kakuchidiilu; nawa wapimini kukabeta kakuchidiilu kufuma kuchiisu chimu nakushika kuchiisu chikwawu, hadiña chintampu chamakyubiti 100. 28 Kuhiñahu, wantwalili mulubanza lwamukachi kuzatisha chiisu chakukabeta kakuchidiilu; chapiminiyi chiisu chakukabeta kakuchidiilu, chesekeni nayikwawu. 29 Tupeka twawanhembi twadiñaku, yishimi yachu yamumbavu niikeeki dachu dahawiñililu jesekeni najikwawu. Kukabadi-hikabadi kachiisu kwadiña mawindu* nihekeeki dachu dahawiñililu. Chadiña makyubiti 50 mukuleha nawa makyubiti 25 muwihi.+ 30 Kuyiisu yejima kwadiña makeeki ahawiñililu; adiña makyubiti 25 mukuleha nawa makyubiti atanu muwihi. 31 Ikeeki dachu dahawiñililu datalishilili kulubanza lwahanji. Hayishimi yachu yamumbavu+ hadiña yifwikija yamutondu wamukoma, nawa chadiña namankenka* 8 akukandaminahu.+

32 Chantwaliliyi mulubanza lwamukachi kukabadi kumusela, wapimini chiisu, nawa chesekeni nayikwawu. 33 Tupeka twawanhembi twadiñaku, yishimi yachu niikeeki dachu dahawiñililu jesekeni najikwawu, nawa kukabadi-hikabadi kachu kwadiña mawindu* niihekeeki dachu dahawiñililu. Chadiña makyubiti 50 mukuleha nawa makyubiti 25 muwihi. 34 Ikeeki dachu dahawiñililu datalishilili kulubanza lwahanji, nawa hayishimi yachu yiyedi yamumbavu hadiña yifwikija yamutondu wamukoma, nawa chadiña namankenka 8 akukandaminahu.

35 Kufumahu, wantwalili kuchiisu+ chakukabeta kakuchimunswa nawa wachipimini; chesekeni nayikwawu. 36 Tupeka twawanhembi twadiñaku, yishimi yachu niikeeki dachu dahawiñililu jesekeni najikwawu. Chadiña namawindu* kutubadi twejima. Chadiña makyubiti 50 mukuleha nawa makyubiti 25 muwihi. 37 Yishimi yachu yamumbavu yatalishilili kulubanza lwahanji, nawa hayishimi yachu yiyedi yamumbavu hadiña yifwikija yamutondu wamukoma, nawa chadiña namankenka 8 akukandaminahu.

38 Kapeka kakudiilamu kadiña nawiñililu kwakwihi nayishimi yamumbavu yakuyiisu, dimwakoseleleñawu+ nyilambu yamukuma yakushita.

39 Kukabadi-hikabadi kekeeki dahachiisu kwadiña mesa jiyedi hajahilileñawu anyama anyilambu yamukuma yakushita,+ anyilambu yahanshidi+ nianyilambu yanyiloña.+ 40 Munjila yaya kuchiisu chakukabeta kakuchimunswa, mwadiña mesa jiyedi hanji yawiñililu. Kwadiña nimesa jiyedi kukabadi kakwawu kekeeki dahachiisu. 41 Kukabadi-hikabadi kachiisu kwadiña mesa jiwana, jejima hamu jadiña 8, hajahilileñawu anyama anyilambu. 42 Mesa jiwana jamulambu wamukuma wakushita jadiña jamalola akusoña. Mukuleha jadiña kyubiti yimu nachikunku, muwihi jadiña kyubiti yimu nachikunku nawa mukuleha kwiwulu jadiña kyubiti yimu. Dihahembeleleñawu yitwa yajahileñawu nachu anyama anyilambu yakushita nianyilambu yikwawu. 43 Mashewufu aleheli neyi muwihi wachikasa, ayipopeli kunyeñumuka mbañu jejima jamukachi; nawa mbiji yanyilambu ayishileña hajimesa.

44 Hanji yachiisu chamukachi hadiña tupeka mwakudiila añimbi;+ twadiña mulubanza lwamukachi kwakwihi nachiisu chakukabeta kakuchimunswa, twatalishilili kukabeta kakuchidiilu. Kapeka kakwawu kakudiilamu kadiña kwakwihi nachiisu chakumusela, katalishilili kukabeta kakuchimunswa.

45 Wanlejeli nindi: “Aka kapeka kakudiilamu katalisha kukabeta kakuchidiilu kawatupristu anakutala nyidimu yamutembeli.+ 46 Kapeka kakudiilamu katalisha kukabeta kakuchimunswa kawatupristu anakutala mudimu wakukameña.+ Hiyanyana kaZadoki,+ afuma mudi aLevi enkawu mudimu wakuswina kwakwihi naYehova kulonda amukalakeleña.”+

47 Kufumahu, wapimini lubanza lwamukachi. Lwadiña makyubiti 100 mukuleha nawa makyubiti 100 muwihi, mumbadi jejima jiwana. Kameña kadiña kumbidi yatembeli.

48 Kuhiñahu, wantwalili kwikeeki dahawiñililu watembeli,+ nawa wapimini chishimi chamumbavu yekeeki dahawiñililu, kabadi kamu chadiña makyubiti atanu nawa kabadi kakwawu makyubiti atanu. Chiisu chadiña makyubiti asatu muwihi kabadi kamu nawa kabadi kakwawu makyubiti asatu.

49 Ikeeki dahawiñililu dadiña makyubiti 20 mukuleha nawa makyubiti 11* muwihi. Hakwila antu ashiki hachiisu, akandamineña hamankenka. Kwadiña yishimi yadiña kwakwihi namashiki amumbavu, chimu iku chikwawu iku.+

41 Kuhiñahu, wanleteli mwiluña dajila* dahanji, nawa wapimini yishimi yamumbavu; yadiña makyubiti* 6 mukutoha kukabadi kamu nawa makyubiti 6 mukutoha kukabadi kakwawu. 2 Wiñililu wadiña makyubiti 10 muwihi, nawa mbañu jamumbavu* yawiñililu jadiña makyubiti atanu kukabadi kamu nawa makyubiti atanu kukabadi kakwawu. Wapimini mukuleha, mwadiña makyubiti 40, nawa muwihi mwadiña makyubiti 20.

3 Kufumahu, weñilili mukachi* nawa wapimini chishimi chamumbavu yawiñililu, chadiña chadita makyubiti ayedi, nawa wiñililu wadiña namakyubiti 6 muwihi. Mbañu jamumbavu yawiñililu jadiña* makyubiti 7. 4 Kuhiñahu, wapimini kapeka katalishili kwiluña dajila dahanji, kadiña makyubiti 20 mukuleha nawa makyubiti 20 muwihi.+ Nawa wanlejeli nindi: “Imu diMwajila Chikupu.”+

5 Kufumahu, wapimini mbañu yatembeli, nawa yadiña yadita makyubiti 6. Tupeka twamumbavu twanyeñumukili tembeli yejima twadiña makyubiti awana muwihi.+ 6 Tupeka twamumbavu twadiña matala asatu akulunjika kuya mwiwulu, itala dimu hetala dikwawu, itala-hiitala dadiña natupeka 30. Mbañu yejima yatembeli ayituñili najakukwatisha nachu tupeka twamumbavu, ilaña hijeñilili mumbañu yatembeli yayeniku.+ 7 Kutubadi twejima tuyedi twatembeli kwadiña mwakuhitila mwanjiñumuki* mwayileña nakutoha hakuya kutupeka twahewulu.+ Muwihi mwayileña nakutohelaku kufuma hetala-hiitala neyi muntu nakufuma hetala daheshina nakuya hetala dahewulu kuhita hetala dahakachi.

8 Namweni chinañamu kunyeñumuka tembeli yejima, nawa yikuku yatupeka twamumbavu yadiña iteti damukuma damakyubiti 6 kufuma heseki kushika kwiwombu. 9 Mbañu yahanji yatupeka twamumbavu yadiña makyubiti atanu muwihi. Kunsa yetala dikweti tupeka twamumbavu kwadiña iluña hakadi chuma* dadiña iluña datembeli.

10 Hakachi katembeli natupeka twakudiilamu+ hadiña iluña dadiña makyubiti 20 muwihi kutubadi twejima. 11 Hakachi katupeka twamumbavu neluña hakadi chuma kukabeta kakuchimunswa hadiña wiñililu, nawa wiñililu wukwawu wadiña kukabeta kakuchidiilu. Iluña hakadi chuma dadiña makyubiti atanu muwihi kwi-i ndo-o.

12 Kumujika kwadiña itala deneni datalishilili heluña hakadi chuma dadiña makyubiti 70 muwihi nawa makyubiti 90 mukuleha. Mbañu yadu yadiña yadita makyubiti atanu kwi-i ndo-o.

13 Wapimini tembeli, nawa yadiña makyubiti 100 mukuleha. Iluña hakadi chuma, itala* deneni nimbañu jadu nijena jadiña makyubiti 100 mukuleha. 14 Wihi wakumbidi yatembeli kumusela, kushilahu niiluña hakadi chuma, hadiña makyubiti 100.

15 Wapimini kuleha kwetala deneni kunyima datalishilili heluña hakadi chuma, hamu niikeeki dadu mwakuhitila kutubadi twejima tuyedi, nawa hadiña makyubiti 100.

Wapimini niiluña dajila dahanji, iluña dajila damukachi+ nimakeeki alubanza ahawiñililu, 16 kushilahu nihamawiñililu, mawindu* adiña namafuremu atoheleli mukachi ilaña hanji anyanya+ nimakeeki mwakuhitila adiña munawa maluña ejima asatu. Kwakwihi nakuwiñililu emikiliku mapulanga+ kufuma heseki kushika kumawindu; nawa mawindu ayibutili. 17 Wapimini hewulu dawiñililu nimukachi katembeli nihanji nimbañu yejima kwi-i ndo-o. 18 Hadiña hakubazila akerubi+ niyifwikija yamutondu wamukoma,+ hakachi kawakerubi ayedi-ayedi hadiña mutondu wamukoma, nawa kerubi-hikerubi wadiña nakumesu kuyedi. 19 Chifu* chamuntu chatalishilili kumutondu wamukoma wudi kukabadi kamu, nawa chifu chamutupa* chatalishilili kumutondu wamukoma wudi kukabadi kakwawu.+ Dichayibaziliwu kunyeñumuka tembeli yejima. 20 Kufuma heseki kushika hewulu dawiñililu hambañu yamwiluña dajila abazililihu akerubi niyifwikija yamutondu wamukoma.

21 Yipamba yakuyiisu* yamwiluña dajila yadiña yesekana mumbadi jejima jiwana.+ Kumbidi yeluña dajila* kwadiña chuma chamwekeneña neyi 22 kameña+ kamapulanga kaleheli makyubiti asatu kuya mwiwulu nimakyubiti asatu mukuleha. Kadiña namashiki mumawombu, nawa kadiña kakutuña namapulanga heshina* nimumbavu. Dichi wanlejeli nindi: “Iyi diyi mesa yidi kumesu aYehova.”+

23 Iluña dajila dahanji niiluña dajila damukachi adiña nayenzelu yiyedi-yiyedi.+ 24 Yiisu yadiña nayenzelu yiyedi-yiyedi yashinkukilileña kumbidi nikunyima, chiisu-hichiisu chadiña nayenzelu yiyedi. 25 Hayenzelu yamwiluña dajila abazililihu akerubi niyifwikija yamutondu wamukoma, neyi yadiña hambañu.+ Hanji hadiña niikeeki dasompoka damapulanga kumbidi yekeeki dahawiñililu. 26 Kwadiña nimawindu* adiña namafuremu atoheleli mukachi ilaña hanji anyanya+ niyifwikija yamutondu wamukoma kutubadi twejima tuyedi twekeeki dahawiñililu, nikutupeka twamumbavu twatembeli nikumakeeki asompoka.

42 Kufumahu, wantwalili kulubanza lwahanji kukabadi kakukabeta kakuchimunswa.+ Wanleteli kwitala dikweti tupeka twakudiilamu dadiña kwakwihi neluña hakadi chuma,+ kukabeta kakuchimunswa ketala dadinuñili nadu.+ 2 Kukabeta kakuchimunswa daleheli makyubiti* 100, nawa dadiña makyubiti 50 muwihi. 3 Dadiña hakachi kalubanza lwamukachi, lwadiña makyubiti 20 muwihi,+ nachisesa chamalola chadiña mulubanza lwahanji. Makeeki adu akuhitilamu aditalashanini nawa adiña matala asatu akulunjika kuya mwiwulu. 4 Kumbidi yatupeka twakudiilamu kwadiña njila yamukachi+ yadiña makyubiti 10 muwihi nawa makyubiti 100 mukuleha,* nawa mawiñililu awu adiña kukabeta kakuchimunswa. 5 Tupeka twakudiilamu twetala dahewulu twadiña twanyanya kubadika twadiña mwitala daheshina nidahakachi, muloña makeeki mwakuhitila adiili iluña deneni. 6 Muloña adiña akulunjika matala asatu kuya mwiwulu, ilaña hiyadiña nayishimi neyi yishimi yamalubanzaku. Dichaletesheli adii iluña deneni kubadika itala daheshina nidahakachi.

7 Mbañu yahanji yamalola yadiña makyubiti 50 mukuleha, yadiña kwakwihi natupeka twakudiilamu twadiña kwakwihi nalubanza lwahanji twaditalashanini natupeka tukwawu twakudiilamu. 8 Tupeka twakudiilamu twadiña kwakwihi nalubanza lwahanji twaleheli makyubiti 50, ilaña twatalishilili kwiluña dajila, twaleheli makyubiti 100. 9 Tupeka twakudiilamu twadiña nachiisu kumusela chakwiñililamu hakufuma mulubanza lwahanji.

10 Kwadiña cheñi tupeka twakudiilamu mukachi* kambañu yamalola yalubanza kukabadi kakumusela, kwakwihi neluña hakadi chuma niitala.+ 11 Kumbidi yatu kwadiña njila neyi yadiña kutupeka twakudiilamu+ twadiña kukabeta kakuchimunswa. Twadiña twesekana mukuleha nimuwihi, twadiña namwakwidikila mwadifwana nawa atutuñili munjila yoyimu. Itu tupeka twadiña namawiñililu 12 adifwana namawiñililu atupeka twakudiilamu twadiña kukabeta kakuchidiilu. Hatachikilili njila hadiña wiñililu, kwakwihi nambañu yamalola kumusela, munateli kwiñililayi muntu.+

13 Kufumahu, wanlejeli nindi: “Tupeka twakudiilamu tudi kukabeta kakuchimunswa nitupeka twakudiilamu tudi kukabeta kakuchidiilu kwakwihi neluña hakadi chuma,+ hitupeka twajila twakudiilamu nyilambu yajila nankashi+ kudi atupristu amusolomokaña Yehova. Mwenomu dimu mwashañawu nyilambu yajila nankashi, mulambu wambutu, mulambu wahanshidi nimulambu wamuloña, muloña hiiluña dajila.+ 14 Neyi atupristu eñilamu, hiyedikaña mwiluña dajila nakuya mulubanza lwahanji chakadi kuvuula yakuvwala yiyazatilañamuku,+ muloña yumiyi yajila. Avwalaña yakuvwala yacheñi hakuya mumaluña mwetejawu antu amakwawu.”

15 Chamanishiliyi kupima iluña datembeli damukachi,* wañidishilili kuchiisu chatala kumusela,+ nawa wapimini iluña dejima.

16 Wapimini kabadi kakumusela neteti* dakupima nachu. Kwesekeja nachipimu cheteti, haleheli mateti 500 kufuma kukabadi kamu nakushika kukabadi kakwawu.

17 Wapimini kabadi kakukabeta kakuchimunswa, nawa kwesekeja nachipimu cheteti, haleheli mateti 500.

18 Wapimini kabadi kakukabeta kakuchidiilu, nawa kwesekeja nachipimu cheteti, haleheli mateti 500.

19 Wanyeñumukili kukabadi kakumujika. Wapimini mateti 500 mukuleha neteti dakupima nachu.

20 Wayipimini mutubadi twejima tuwana. Yadiña nampwembu yayinyeñumukili+ yadiña mateti 500 mukuleha+ nawa mateti 500 muwihi, kulonda yaambuli mwajila namwabula kujila.+

43 Kuhiñahu, wantwalili kuchiisu chatalisha kumusela.+ 2 Kwenoku namweni kulema kwaNzambi yaIsarela kunakwinza kufuma kumusela,+ nawa izu dindi datiyakeneña neyi mpola yamenji;+ nawa hamaseki hejima hatoñekeleli kulema kwindi.+ 3 Chuma chinamweni chamwekeneña neyi chimwenu chinamweni hinenjili* nakujilumuna musumba, nawa chamwekeneña neyi chinamweni kwakwihi nakaloña Kebari.+ Dichi nadimbukili chamesu heseki.

4 Kufumahu, kulema kwaYehova kweñilili mutembeli* kuchiisu chatalisha kumusela.+ 5 Dichi spiritu yannyamwini nakuntwala mulubanza lwahanji, nawa chinelili nami nitali, namweni mutembeli munenzali kulema kwaYehova.+ 6 Kuhiñahu, natiyili muntu nakuhosha nanami mutembeli, nawa owu iyala wenjili nakwimana kwakwihi nanami.+ 7 Wanlejeli nindi:

“Eyi mwana kamuntu, idi didu iluña detanda+ dami nawa hiiluña dakudata nyendu+ yami, munakashakamaña nawantu jaIsarela haya nyaaka.+ Amwitala daIsarela, wena nianyanta jawu, hiyakatamishahu cheñi ijina dami dajila+ nawuvumbi wawu wakuspiritu ninayibimbi yawanyanta jawu hakufwa kwawuku. 8 Atamishili ijina dami dajila nayuma yawuzondu yelileñawu nanochu chashiliwu wiñililu wawu kwakwihi nawiñililu wami+ nichipamba chawu chakuchiisu kwakwihi nachipamba chami chakuchiisu, hashalili hohu mbañu hakachi kanami nawena, dichaletesheli niyijilumuni nakuzuwa kwami.+ 9 Dichi aleki wuvumbi wawu wakuspiritu nawa anatili yibimbi yawanyanta jawu kwakulehi nanami, kulonda nakashakameña nawu haya nyaaka.+

10 “Hakwila eyi mwana kamuntu, lumbululaku chidi tembeli kudi amwitala daIsarela,+ kulonda akatiyi nsonyi muloña wayiluwa yawu,+ nawa atela kwiluka njila mwakuyituñila.* 11 Neyi atiya nsonyi muloña wayuma yejima yinakoñiwu, wakayileji chakutuña tembeli hamaseki, chiyatela kwikala, mwakwidikila nimwakwiñilila.+ Wakayileji mwejima mwakuyituñila hamaseki niyuma yatela kulondelawu, mwejima mwakuyituñila hamaseki ninshimbi jayu. Nawa wakajisoneki iku anakutalaku, kulonda akalondeleña mwejima mwakuyituñila hamaseki ninshimbi jayu jakulondela.+ 12 Ilu dilushimbi lwatembeli. Iluña dejima danyeñumuka hewulu dampidi hiiluña dajila chikupu.+ Tiyenu! Ilu dilushimbi lwatembeli.

13 “Iyi diyi yipimu yakameña mumakyubiti+ (kukyubiti-hikyubiti kwadiña kwakunuña wihi wachikasa).* Heshina daku kyubiti yimu, nawa muwihi waku kyubiti yimu. Kakweti mukinkita wanyeñumuka kunsa, weneni chikasa chimu chakusamanesha nyinu.* Ichi dichidi kameña heshina. 14 Kufuma kwishina hamaseki kushika kumukinkita wakwishina hadi makyubiti ayedi, nawa kakweti kyubiti yimu muwihi. Kufuma kumukinkita wanyanya wanyeñumuka nakushika kumukinkita weneni wanyeñumuka hadi makyubiti awana, nawa kakweti kyubiti yimu muwihi. 15 Ijiku dakameña didi namakyubiti awana kuya mwiwulu, nawa kunidi ijiku dakameña kudi nseñu+ jiwana jedika. 16 Ijiku dakameña dikweti mbadi jiwana jesekana, mukuleha makyubiti 12 nawa muwihi makyubiti 12.+ 17 Tubadi twejima tuwana twamukinkita wanyeñumuka tukweti makyubiti 14 mukuleha nawa makyubiti 14 muwihi; nawa muvumbu wamukinkita weneni wanyeñumuka wukweti kyubiti yachikunku, nawa heshina kutubadi twejima kudi kyubiti yimu.

“Nawa mankenka aku atalisha kumusela.”

18 Kufumahu, wañilili nindi, “Eyi mwana kamuntu, Yehova Mwanta Wabadika nahoshi nindi: ‘Iyi diyi nshimbi yakulondela neyi kameña anakituñi dehi, kulonda akalambwileñahu nyilambu yamukuma yakushita nikusampwilahu mashi.’+

19 “Yehova Mwanta Wabadika nahoshi nindi, ‘Atupristu eni Levi amudi anyana kaZadoki,+ owu ansolomokaña nakunkalakela, wakayinki mwana kañombi wachizamba kufuma hamukanka kulonda akekali mulambu wahanshidi.+ 20 Wakanonihu mashi aniwu chimuna nakuyisha kunseñu jiwana jakameña, kumawombu awana amukinkita wanyeñumuka, nawa wakashi kumukinkita wejima, kulonda wakakitookeshi kunshidi nikukibutila hanshidi.+ 21 Kuhiñahu, wakanoni mwana kañombi wachizamba, wamulambu wahanshidi, kulonda wakamwocheli mwiluña damutembeli datondawu, hanji yeluña dajila.+ 22 Hefuku damuchiyedi, wakalambuli mpembi wachizamba wakadi ihuji kulonda akekali mulambu wahanshidi. Nawa wena akatookesha kameña kunshidi neyi chakitookesheliwu kunshidi namwana kañombi wachizamba.’

23 “‘Neyi wunakitookeshi dehi kunshidi, wakalambuli mwana kañombi wachizamba wakadi ihuji kufuma hamukanka nimukoku wachizamba kufuma hamukanka. 24 Wakayihani kudi Yehova, nawa atupristu akakuwaku muñwa+ nakuyilambula kudi Yehova kulonda yakekali mulambu wamukuma wakushita. 25 Hadi mafuku 7 eyi wakalambulaña mpembi wachizamba kwikala mulambu wahanshidi+ wahefuku-hefuku, kushilahu nimwana kañombi wachizamba kufuma hamukanka nimukoku wachizamba kufuma hamukanka. Wakalambulaña anyama akadi ihuji.* 26 Hadi mafuku 7 akabutilaña kameña hanshidi, nawa atela kukitookesha nikukiwahisha. 27 Neyi awa mafuku anamani dehi, hefuku damu 8+ nakuya kumbidi, atupristu akalambulaña nyilambu yenu yamukuma yakushita ninyilambu yakuwunda hakameña; nawa nakayitiyaña enu kuwaha,’+ dichinahoshiyi Yehova Mwanta Wabadika.”

44 Wanfuntishilili kunjila yakuchiisu chahanji cheluña dajila chatala kumusela,+ nawa chadiña chakwenzela.+ 2 Kufumahu, Yehova wanlejeli nindi: “Ichi chiisu chikwikalaña chakwenzela hohu. Hiyakachenzununahuku, nawa kwosi muntu wakeñililamuku; muloña Yehova, Nzambi yaIsarela dimuneñililiyi,+ dichi chikwikalaña chakwenzela hohu. 3 Hela chochu, nlomboli wakashakamaña mwenomu nakuda mankendi kumesu aYehova,+ muloña hinlomboli. Wakeñililaña hekeeki dahachiisu, nawa dihakedikilañayi.”+

4 Kuhiñahu, wanleteli kumbidi yatembeli kuzatisha chiisu chakukabeta kakuchimunswa. Chinelili nami nitali, namweni kulema kwaYehova kunenzali mutembeli yaYehova.+ Dichi nadibukili chamesu heseki.+ 5 Kufumahu, Yehova wanlejeli nindi: “Eyi mwana kamuntu, wushiku muchima, wutalishishi, nawa wutiyilili nakanañachima kuyuma yejima yinukukuleja kutalisha hayuma yakulondela ninshimbi jatembeli yaYehova. Wushiku muchima chikupu kuwiñililu watembeli nikumaluña akwidikila ejima akwiluña dajila.+ 6 Wuyileji antu amwitala daIsarela adikaña neyi, ‘Yehova Mwanta Wabadika nahoshi nindi: “Enu amwitala daIsarela, yaaku yenu yawuzondu yinaswejeshi. 7 Neyi muleta añiinza abula kwalama munyichima nikumujimba mwiluña dami dajila, ajilolaña tembeli yami. Mwahanaña mankendi ami, manji nimashi, henohu munakufumpa chitiyañenu chami nayaaku yenu yejima yawuzondu. 8 Himunakwakamena yuma yami yajilaku.+ Ilaña, munakuleja antu acheñi kuzata nyidimu mwiluña dami dajila.”’

9 “‘Yehova Mwanta Wabadika nahoshi nindi: “Kwosi ñiinza wunakushakama muIsarela wabula kwalama mumuchima nikumujimba watela kwiñila mwiluña dami dajilaku.”’

10 “‘Ilaña aLevi afumini chikupu kudi ami+ mpinji yafuminiwu aIsarela kudi ami nakulondela ankishi jawu awuzondu,* nakayibabesha muloña wayiluwa yawu. 11 Kufumahu, akekala akakukalakala mwiluña dami dajila kulonda akakameneña yiisu yatembeli+ nikukalakela hatembeli. Akajahaña anyama amulambu wamukuma wakushita niamulambu wakulambwila antu, nawa akemanaña kumesu awantu nakuyikalakela. 12 Chineli adiña nakuyikalakela iku adi nawankishi jawu awuzondu nawa ekalili chuma chakuhukesha chavulumwishileña amwitala daIsarela,+ dichinnasanyikili nakuyinyamwina chikasa chami,’ dichinahoshiyi Yehova Mwanta Wabadika, ‘nawa nakayibabesha muloña wayiluwa yawu. 13 Hiyakaswina kwakwihi nanami nakunkalakela mudimu wawupristu hela kuya kwakwihi nayuma yami yajila hela yajila chikupuku, nawa akatiya nsonyi muloña wayuma yawuzondu yakoñeliwu. 14 Ilaña nakayinka mudimu wakwakamena nyidimu yahatembeli, kwakamena nyidimu yawu niyuma yejima yiyatela kuzatilamu.’+

15 “Yehova Mwanta Wabadika nahoshi nindi, ‘Hakwila atupristu eni Levi, anyana kaZadoki,+ owu akalakeleña nyidimu yaheluña dami+ dajila hampinji yafuminiwu aIsarela kudi ami, akenzaña kudi ami nakunkalakela, nawa akemanaña kumesu ami nakunlambula manji+ nimashi.’+ 16 ‘Diwu akeñilaña mwiluña dami dajila, nawa akayaña kumesa yami nakunkalakela+ nikukalakala nyidimu yinnayinki.+

17 “‘Neyi enza muyiisu yamulubanza lwamukachi, atela kuvwala yakuvwala yehina.+ Bayi avwala yakuvwala yamavuji anyikoku neyi anakukalakela muyiisu yamulubanza lwamukachi hela mukachi kayuku. 18 Atela kuvwala yitambala yehina kunyitu yawu, nawa atela kuvwala tuputula twatulehi twehina.+ Bayi avwala chuma chikuyiletesha asulwiliku. 19 Henohu kanda ediki nakuya mulubanza lwahanji, dikwila nawu, lubanza lwahanji mudi antu, atela kuvuula yakuvwala yiyakalakelañamu+ nakuyisha mutupeka twajila twakudiilamu.+ Kufumahu, atela kuvwala yakuvwala yacheñi, kulonda abuli kusenda kujila kuyakuvwala yawu nakukutwala kudi antu. 20 Hiyatela kutewula kunyitu+ yawu hela kuleka nsuki jakunyitu yawu kulehaku. Atela kulela nsuki jawu. 21 Atupristu bayi anwa vinyu neyi anakwiñila mulubanza lwamukachiku.+ 22 Bayi asumbula ntuluwa hela mumbanda aseñawuku;+ ilaña anateli kusumbula mujiki* wakumutaña waIsarela hela ntuluwa asumbwiliwu kudi kapristu.’+

23 “‘Atela kuleja antu jami chaambu chidi hayuma yajila nayuma yabula kujila; nawa akayileja chaambu chidi hayuma yamajilu nayuma yakadi majilu.+ 24 Atela kwikala ansompeshi neyi kudi muloña;+ atela kuwusompa kwesekeja namazu ami awunsompeshi.+ Atela kwovwahila nshimbi jami nikuleja kwami kutalisha hayawija+ yami yejima nikujilika masabata ami. 25 Bayi aswina kwakwihi namuntu wafwaku, akenda kekala amajilu. Hela chochu, anateli hohu kwila mwenimu neyi owu muntu hitata yawu, mama yawu, mwanawu weyala, mwanawu wamumbanda, manakwawu hela muhelawu wabula kusumbuka.+ 26 Nawa neyi kapristu anamutookeshi dehi, atela kumuchindila mafuku 7. 27 Hefuku dakeñilayi mwiluña dajila, mulubanza lwamukachi, nakukalakela mwiluña dajila, watela kulambula mulambu windi wahanshidi,’+ dichinahoshiyi Yehova Mwanta Wabadika.

28 “‘Nawa iwu diwakekala wuswana wawu: Yami wuswana wawu.+ Bayi muyinka iheta didi dejima muIsarelaku, muloña yami iheta dawu. 29 Diwu akadaña mulambu wambutu,+ mulambu wahanshidi nimulambu wamuloña,+ nawa chuma chejima chinahembeliwu mudimu wajila muIsarela, chakekala chawu.+ 30 Nyikaabu yejima yayiwahi yinasambili kuha nichawaana chejima chinafumi kudi enu jakekalaña jawatupristu.+ Nawa mwatela kumwinka kapristu+ wuña wenu watachi wanseki. Chumichi chakayiletela amwitala denu nkisu.+ 31 Kapristu bayi ada kada kadi kejima hela kanyama kanadifwili hela kanataboliwuku.’+

45 “‘Neyi himukwanzañana ituña kulonda diikali wuswana wenu,+ mwakamwinki Yehova chibalu chajila chetuña kulonda chakekali chawaana chindi.+ Chatela kwikala makyubiti* 25,000 mukuleha, nawa makyubiti 10,000 muwihi.+ Iluña dadu dejima* dakekala chibalu chajila. 2 Mwenimu mwakekala iluña dajila dikweti mbadi jiwana jesekana jamakyubiti 500,*+ nawa kukabadi kadu kejima kwakekala iluña dakudiishilamu yimuna damakyubiti 50.+ 3 Munidi ituña, watela kupimamu iluña damakyubiti 25,000 mukuleha nawa 10,000 muwihi, nawa mwenomu dimwakekala iluña dajila, chuma chajila chikupu. 4 Chakekala chibalu chetuña chajila chawatupristu,+ akakukalakala mwiluña dajila, enzaña kwakwihi nakumukalakela Yehova.+ Dakekala iluña mwakutuña matala awu nawa iluña dajila datembeli.

5 “‘Hakwila Alevi, akakukalakala mutembeli, akayinka chibalu cheluña chamakyubiti 25,000 mukuleha nawa makyubiti 10,000 muwihi,+ nawa akekala natupeka 20 twakudiilamu.+

6 “‘Mwatela kwinka musumba mpata yamakyubiti 25,000 mukuleha (yinesekani nachawaana chajila) nawa makyubiti 5,000 muwihi.+ Yakekala yawantu amwitala daIsarela ejima.

7 “‘Nawa nlomboli akamwinka mpata kukabadi kachawaana chajila nakukabadi keluña dinenkiwu musumba. Yakekala kwakwihi nachawaana chajila nikwakwihi nampata yamusumba. Yakashika kukabadi kamujika nikukabadi kamusela. Kuleha kwayu kufuma kuñinza yakumujika nakushika kuñinza yakumusela kwakesekana namaluña anyichidi.+ 8 Iyi mpata yakekala yindi muIsarela. Anlomboli jami hiyakakabishahu cheñi antu jamiku,+ nawa akayinka amwitala daIsarela mpata kwesekeja nanyichidi yawu.’+

9 “Yehova Mwanta Wabadika nahoshi nindi: ‘Enu anlomboli amuIsarela, munasweji!’

“‘Lekenu madombu nikukabishana, ilenuña yuma yayiwahi nawa yaloña.+ Lekenu kutambula antu jami yuma,’+ dichinahoshiyi Yehova Mwanta Wabadika. 10 ‘Mwatela kuzatisha masikelu aloña, chipimu chaifa* chaloña nichipimu chamulondu* chaloña.+ 11 Chipimu chaifa nichipimu chamulondu jatela kwikala jesekana. Chipimu chamulondu chatela kwiñila muhomeri* mapampa 10, nichipimu chaifa chatela kwiñila muhomeri mapampa 10. Homeri diyakekala chipimu chiyatela kupiminamu. 12 Lushekeli*+ lwakekala magira* 20. Nawa mashekeli 20 kushilahu mashekeli 25 nikushilahu mashekeli 15 diwakekala mane* yenu.’

13 “‘Ichi dichawaana chimwatela kuhana: chipimu chimu muyipimu yaifa 6 kufuma muhomeri-hihomeri yatidiku nichipimu chimu muyipimu yaifa 6 kufuma muhomeri-hihomeri yabali. 14 Manji akahanañawu akayipiminaña mumulondu. Mulondu weñilaña munsaba* mapampa 10, nawa nyilondu 10 hihomeri yimu, muloña muhomeri yimu mweñilaña nyilondu 10. 15 Nawa hamukanka wayimuna yaIsarela, hadi anyikoku ejima 200 akahanañahu mukoku wumu. Wenawa akekala amulambu wambutu,+ amulambu wamukuma wakushita+ nianyilambu yakuwunda,+ kulonda akayibutileña antu hanshidi,’+ dichinahoshiyi Yehova Mwanta Wabadika.

16 “‘Antu ejima amwituña akamwinkaña nlomboli ichi chawaana+ muIsarela. 17 Ilaña nlomboli diyi wakakamenaña nyilambu yamukuma yakushita,+ mulambu wambutu,+ nimulambu wavinyu hampinji yayawija,+ hatukweji twatuha, haMasabata+ nihayawija yejima yayitoñwelawu amwitala daIsarela.+ Diyi wakaloñeshaña mulambu wahanshidi, mulambu wambutu, mulambu wamukuma wakushita ninyilambu yakuwunda, kulonda yakayibutileña amwitala daIsarela hanshidi.’

18 “Yehova Mwanta Wabadika nahoshi nindi: ‘Mukakweji katachi, hefuku datachi dakakweji, wakanoni mwana kañombi wachizamba wakadi ihuji hamukanka, kulonda wakajiliki nachu iluña dajila kunshidi.+ 19 Kapristu wakanonahu mashi amulambu wahanshidi nakuyisha hachipamba chakuchiisu chatembeli,+ hamawombu awana amukinkita wanyeñumuka kukameña nihachipamba chakuchiisu chamulubanza lwamukachi. 20 Ichi dichiwakela hefuku damu 7 dakakweji hamuloña wamuntu wudi wejima wunavulumuni chakuluwukila hela chakadi kwiluka;+ nawa mwakatookeshi tembeli kunshidi.+

21 “‘Mukakweji katachi, hefuku damu 14 dakakweji, mwakekala nachawija chaChipandakenu.+ Mwatela kuda mankendi+ akadi iluñi hadi mafuku 7. 22 Hanodu ifuku nlomboli wakaloñesha mwana kañombi wachizamba kulonda akekali mulambu wahanshidi yindi niyawantu ejima amwituña.+ 23 Hadi mafuku 7 achawija, wakaloñeshaña mulambu wamukuma wakushita wakumulambula Yehova wanyana kañombi yayizamba 7 akadi ihuji niayizamba 7 anyikoku akadi ihuji hefuku-hefuku hanawa mafuku 7,+ kushilahu nimpembi wachizamba wamulambu wahanshidi hefuku-hefuku. 24 Watela kuloñesha nimulambu wambutu waifa yimu hamwana kañombi-himwana kañombi wachizamba niifa hamukoku-himukoku wachizamba, kushilahu nihini* yamanji haifa-hiifa.

25 “‘Mukakweji kamu 7, hefuku damu 15 dakakweji, hadi mafuku 7 achawija,+ watela kuloñesha mulambu wahanshidi wowumu, mulambu wamukuma wakushita, mulambu wambutu nimanji.’”

46 “Yehova Mwanta Wabadika nahoshi nindi: ‘Chiisu chamulubanza lwamukachi chatalisha kumusela+ chatela kwikala chakwenzela+ mafuku 6 akuzatilamu nyidimu,+ ilaña atela hohu kuchenzununa hefuku daSabata nihefuku dakakweji kakaha. 2 Nlomboli wakeñililaña hawiñililu wekeeki dakuchiisu,+ nawa wakemanaña kwakwihi nachipamba chakuchiisu. Atupristu akamulambwilaña mulambu windi wamukuma wakushita ninyilambu yindi yakuwunda, nawa wakadibukaña hawiñililu wakuchiisu, kuhiñahu wakedikaña. Ilaña chiisu hiyatela kuchenzelaku kushika nimelela. 3 Antu amwituña niwena akadibukaña kudi Yehova hawiñililu wakuchiisu hampinji yamasabata nihatukweji twatuha.+

4 “‘Mulambu wamukuma wakushita wakalambulañayi nlomboli kudi Yehova hefuku daSabata watela kwikala wanyana kanyikoku 6 yayizamba yakadi ihuji nimukoku wachizamba wakadi ihuji.+ 5 Mulambu wambutu wakekalaña ifa* yimu hamukoku wachizamba nichuma chejima chikutwesha kuhanayi hayizamba yanyana kanyikoku, hamu nahini* yamanji haifa-hiifa.+ 6 Hefuku dakakweji kakaha wakalambulaña mulambu wamwana kañombi wachizamba wakadi ihuji kufuma hamukanka, nyana kanyikoku 6 ayizamba nimukoku wachizamba. Atela kwikala akadi ihuji.+ 7 Watela kulambula mulambu wambutu waifa yimu hamwana kañombi wachizamba, ifa yimu hamukoku wachizamba, nichuma chejima chikutwesha kuhanayi hayizamba yanyana kanyikoku. Nawa watela kulambula hini yamanji haifa-hiifa.

8 “‘Neyi nlomboli nakwiñila, watela kwiñilila hawiñililu wekeeki dahachiisu, nawa dihatela kwidikilayi.+ 9 Nawa neyi antu amwituña enza kudi Yehova hampinji yayawija,+ aneñilili kuchiisu chakukabeta kakuchimunswa nakudifukula atela kwidikila kuchiisu+ chakukabeta kakuchidiilu,+ nawa aneñili kuchiisu chakukabeta kakuchidiilu atela kwidikila kuchiisu chakukabeta kakuchimunswa. Kwosi watela kwidikila kuchiisu kweñililayiku, muloña atela kwidikila kuchiisu chidi kumbidi yawu. 10 Hakwila nlomboli wudi hakachi kawu, watela kwiñila hampinji yinakwiñilawu, nawa watela kwidika hampinji yinakwidikawu. 11 Hampinji yayawija nihayilaaka yayawija, mulambu wambutu watela kwikala ifa yimu hamwana kañombi wachizamba, ifa yimu hamukoku wachizamba, nichuma chejima chikutwesha kuhanayi hayizamba yanyana kanyikoku, hamu nahini yamanji haifa-hiifa.+

12 “‘Neyi nlomboli aloñesha mulambu wamukuma wakushita+ hela nyilambu yakuwunda kulonda yiikali mulambu wakudikeñela wakumulambula Yehova, akamwenzunwina chiisu chatala kumusela, nawa wakaloñesha mulambu windi wamukuma wakushita ninyilambu yindi yakuwunda neyi chelañayi hefuku daSabata.+ Chedikayi, chiisu atela kuchenzela.+

13 “‘Hefuku-hefuku watela kuloñesha mwana kamukoku wachizamba wakadi ihuji wachaaka chimu kulonda ekali mulambu wamukuma wakushita wakumulambula Yehova.+ Watela kwila mwenimu ntetemena-hintetemena. 14 Kubombela hamukoku, watela kuloñesha chipimu chamu 6 chaifa chamulambu wambutu ntetemena-hintetemena, hamu nachipimu chamuchisatu chahini yamanji akusansa hawuña wawuwahi walembuluka kulonda wiikali mulambu wambutu wakumulambula Yehova mpinji yejima. Ilu hilushimbi lwahaya nyaaka. 15 Ntetemena-hintetemena, atela kuloñesha mukoku wachizamba, mulambu wambutu nimanji kulonda yiikali mulambu wamukuma wakushita wakulambula mpinji yejima.’

16 “Yehova Mwanta Wabadika nahoshi nindi: ‘Neyi nlomboli ayinka anyanindi ejima chawaana, chakekala wuswana wawu, chakekala chuma chawanyanindi. Hiheta dawu dawuswana. 17 Ilaña neyi amwinka kambuñindi wumu chawaana hawuswana windi, chakekala chindi kushika nimuchaaka chakusubuka.+ Kufumahu, chakafunta kudi nlomboli. Wuswana wawanyanindi hohu diwakekalaña wawu haya nyaaka. 18 Nlomboli bayi atambula wuswana kudi antu kuhitila mukuyihaña heluña dawuku. Watela kuyinka anyanindi wuswana kufuma heluña dindi yomweni, kulonda hakachi kawantu jami hakabuli kwikala muntu hela wumu akahañawu heluña dindi.’”

19 Kuhiñahu, wanyiñijili mukachi kuzatisha wiñililu+ wadiña kwakwihi nachiisu chakwiñililamu kutupeka twajila twakudiilamu atupristu, twatalishilili kukabeta kakuchimunswa,+ nawa kwenoku namweni iluña dadiña kunyima kukabadi kakumujika. 20 Wanlejeli nindi: “Idi didu iluña kwakatelekelañawu atupristu mulambu wamuloña nimulambu wahanshidi nawa dikwakwochelañawu mulambu wambutu,+ kulonda akabuleña kusenda chuma chidi chejima nakuchitwala mulubanza lwahanji akenda katwala kujila kudi antu.”+

21 Wañidishili nakuntwala mulubanza lwahanji, wanhitañesheli mumawombu awana alubanza, nawa namweni lubanza kwiwombu-hiiwombu dalubanza lwahanji. 22 Kumawombu ejima awana alubanza kwadiña malubanza anyanya, adiña makyubiti 40 mukuleha nawa makyubiti* 30 muwihi. Ejima awana adiña esekana.* 23 Munawa ejima awana mwadiña nyikinkita,* nawa mwishina danyikinkita mwadiña maluña akwochela nyilambu. 24 Dichi wanlejeli nindi: “Awa diwu matala mwatelekelañawu nyilambu yahanañawu antu kudi akakukalakela hatembeli.”+

47 Kuhiñahu, wanfuntishili kuwiñililu watembeli,+ nawa kwenoku namweni menji anakuhita kukabadi kakumusela, anakwidika heseki kuwiñililu watembeli,+ muloña tembeli yatalishilili kumusela. Menji adiña nakuhita kufuma mwishina datembeli kukabadi kakuchidiilu, kukabeta kakuchidiilu chakameña.

2 Kufumahu, wañidishilili kuchiisu chakukabeta kakuchimunswa+ nakuntwala hanji nawa wannyeñumwishili nakunleta kuchiisu chahanji chatalisha kumusela,+ nawa namweni menji anakuhita chovu-chovu kukabadi kakuchidiilu.

3 Chelili owu iyala ayi kukabadi kamusela namwonji wakupima nachu muchikasa chindi,+ wapimini makyubiti* 1,000 nawa wanlejeli kuhita mumenji; menji ashikili mukapokosu.

4 Kuhiñahu, wapimini amakwawu 1,000 nawa wanlejeli kuhita mumenji, nawa menji ashikili mumanuñu.

Wapimini amakwawu 1,000 nawa wanlejeli kuhita mumenji, nawa menji ashikili mumbunda.

5 Chapiminiyi amakwawu 1,000, kekalili kaloña nawa nakañenyi kuzambuka, muloña kakunamini chakwila muntu chiña asala chakusala, kaloña kakukañanya kuzambuka hamaseki.

6 Wañihwili nindi: “Eyi mwana kamuntu, wunamoni chumichi?”

Dichi wanlejeli kufunta kuchikumu chakaloña. 7 Chinafuntili, namweni kuchikumu chakaloña kudi nyitondu yayivulu ishinadi niishinadi.+ 8 Kufumahu, wanlejeli nindi: “Awa menji anakuya kukabadi kakumusela nakukunkumukila kuAraba*+ ndo-o nimukaluñalwiji. Chashikawu mukaluñalwiji,+ menji aku akayuuka. 9 Nyikanka yayileñaleña* yayumi yakashakamaña kwejima kwakaya menji.* Kwakekala inshi jajivulu, muloña awa menji akayaña kwenoku. Menji amukaluñalwiji akayuuka, nawa yuma yejima yakashakamaña kwejima kwakaya kaloña.

10 “Ayibinda anshi akemanaña kuchikumu chakaluñalwiji kufuma kuEngedi+ ndo-o nikuEnegilayimi, kwakekala maluña hakwanyika makokela. Kwakekala inshi jajivulu nankashi janyichidi yashiyashana, neyi inshi jamuKaluñalwiji Keneni.*+

11 “Kakekala namaluña amachiñichiñi nimaluña amalowa, nawa awa maluña akayuuka wanyi. Akashala kamuñwa hohu.+

12 “Nyitondu yashiyashana yejima yasoñaña yakuda yakamena kuyikumu yakaloña. Mafu ayu akooma wanyi; nawa hiyakakañanya kusoña nyikaabuku. Yakasoñaña nyikaabu yayiha hakakweji-hikakweji, muloña menji ayu akafumaña kwiluña dajila.+ Nyikaabu yayu yakekala yakuda nawa mafu ayu akekala akuuka nachu.”+

13 Yehova Mwanta Wabadika nahoshi nindi: “Idi didu iluña dimwakenka nyichidi 12 yaIsarela kulonda dakekali ituña dawuswana wawu, nawa Yosefu wakekala namaluña ayedi.+ 14 Mwakadiswana nawa mwakatambwila maseka esekana.* Nasanyikili kuyinka ankakulula jenu+ idi ituña, ilaña ichi anayinkidu kulonda diikali wuswana wenu.

15 “Iyi diyi ñinza yetuña kukabeta kakuchimunswa: Yatachikila kuKaluñalwiji Keneni kunjila yaya kuHetiloni+ nakuya kuZedadi,+ 16 Hamati,+ Berota+ niSibirayimi, yekala hakachi keluña daDamakasa neluña daHamati, nakushika kuHazeri Hatikoni, yekala kwakwihi nañinza yaHawurani.+ 17 Dichi ñinza yakafuma kukaluñalwiji nakushika kuHazari Enoni,+ nakukulisha ñinza yaDamakasa kukabeta kakuchimunswa nikuñinza yaHamati.+ Iyi diyi ñinza yakukabeta kakuchimunswa.

18 “Kukabeta kamusela yakahita hakachi kaHawurani naDamakasa nawa yakakulisha Yodani haneli Giliyadi+ iku ituña daIsarela iku. Mwakapimi kufuma kuñinza nakushika kukaluñalwiji kadi kumusela.* Iyi diyi ñinza yakumusela.

19 “Ñinza yakukabeta kakuchidiilu* yakafuma kuTamari nakushika kumenji aMeribati Kadeshi,+ kushika nikuMuhoñi* ndo-o nikuKaluñalwiji Keneni.+ Iyi diyi ñinza yakukabeta kakuchidiilu.

20 “Kukabadi kamujika kudi Kaluñalwiji Keneni, kufuma kuñinza nakushika heluña datalañana naLebo Hamati.*+ Iyi diyi ñinza yakumujika.”

21 “Mwakadanzañeni idi ituña hakachi kenu, hakachi kanyichidi 12 yaIsarela. 22 Mwatela kudanzañena hakachi kenu dakekali wuswana wenu niwawañiinza imunakushakama nawu avweli anyana mpinji yimwashakamineña nawu; nawa enu mwakayimonaña neyi enimbu avwalikila muIsarela. Akatambula wuswana nanyichidi yaIsarela hamu nanenu. 23 Ñiinza mwatela kumwinka wuswana mwiluña damuchidi munakushakamayi,” dichinahoshiyi Yehova Mwanta Wabadika.

48 “Awa diwu majina anyichidi, kutachikila kunsa yakabeta kakuchimunswa: iluña daDani+ dakahita kunjila yaya kuHetiloni kushika kuLebo Hamati*+ ndo-o nikuHazari Enani, nakukulisha ñinza yaDamakasa kukabeta kakuchimunswa, kwakwihi naHamati;+ nawa yakafuma kumusela kushika kuñinza yakumujika. 2 Iluña daAsheri+ dakadikumashana nañinza yaDani, kutachikila kuñinza yakumusela kushika kuñinza yakumujika. 3 Iluña daNafitali+ dakadikumashana nañinza yaAsheri, kufuma kuñinza yakumusela kushika kuñinza yakumujika. 4 Iluña daManasi+ dakadikumashana nañinza yaNafitali, kutachikila kuñinza yakumusela kushika kuñinza yakumujika. 5 Iluña daEfuremu dakadikumashana nañinza yaManasi,+ kutachikila kuñinza yakumusela kushika kuñinza yakumujika. 6 Iluña daRubeni dakadikumashana nañinza yaEfuremu,+ kutachikila kuñinza yakumusela kushika kuñinza yakumujika. 7 Iluña daYuda dakadikumashana nañinza yaRubeni,+ kutachikila kuñinza yakumusela kushika kuñinza yakumujika. 8 Kufuma kuñinza yaYuda, kutachikila kuñinza yakumusela kushika kuñinza yakumujika, chawaana chimwakambula chatela kwikala makyubiti* 25,000 mukutoha+ nawa mukuleha chatela kwesekana nampata janyichidi yikwawu kufuma kuñinza yakumusela kushika kuñinza yakumujika. Iluña dajila dakekala mukachi kachu.

9 “Chawaana chimwakamwambwila Yehova chakekali makyubiti 25,000 mukuleha nawa makyubiti 10,000 muwihi. 10 Ichi dichakekala chawaana chajila chawatupristu.+ Chakekala makyubiti 25,000 kukabeta kakuchimunswa, 10,000 kumujika, 10,000 kumusela nawa 25,000 kukabeta kakuchidiilu. Iluña dajila daYehova dakekala mukachi kachu. 11 Dakekala dawatupristu ajilikawu amudi anyana kaZadoki,+ owu adiña nakunkalakela nyidimu yinayinkeli nawa abulili kufuma kudi ami hampinji yafuminiwu aIsarela niaLevi kudi ami.+ 12 Akayibalwila iluña kuchawaana champata yinaambuliwu nawu hichuma chajila chikupu, chakadikumashana nañinza yawaLevi.

13 “Kwakwihi neluña dawatupristu, kwakekala iluña dawaLevi damakyubiti 25,000 mukuleha nawa makyubiti 10,000 muwihi. (Kuleha kwejima kwakekala makyubiti 25,000 mukuleha nawa makyubiti 10,000 muwihi.) 14 Bayi alandisha, kuhimpa hela kuhana chibalu chidi chejima hanawa maluña amawahi ampataku, muloña hichuma chajila kudi Yehova.

15 “Iluña dakashalaku damakyubiti 5,000 muwihi dadikumashana nañinza yamakyubiti 25,000 dakekala damusumba dakuzatisha kunyidimu yikwawu,+ dakushakamamu nikudiishilamu yimuna. Musumba wakekala mukachi kadu.+ 16 Iyi diyi yipimu yamusumba: Ñinza yakukabeta kakuchimunswa yakekala makyubiti 4,500, ñinza yakukabeta kakuchidiilu yakekala makyubiti 4,500, ñinza yakumusela yakekala makyubiti 4,500 nawa ñinza yakumujika yakekala makyubiti 4,500. 17 Iluña damusumba dakudiishilamu yimuna dakekala makyubiti 250 kukabeta kakuchimunswa, 250 kukabeta kakuchidiilu, 250 kumusela nawa 250 kumujika.

18 “Kuleha kweluña dakashalaku kwakesekana nakuleha kwachawaana chajila,+ dakekala makyubiti 10,000 kumusela nawa makyubiti 10,000 kumujika. Dakesekana nachawaana chajila, nawa yuma yakamenañamu yakekala yakuda yawantu anakukalakela musumba. 19 Antu anakukalakela musumba akunyichidi yejima yaIsarela dimwakadimañawu.+

20 “Iluña dejima dachawaana dakekala makyubiti 25,000 mumbadi jejima jiwana. Mwatela kudaambula kulonda dakekali chawaana chajila hamu nampata yamusumba.

21 “Chibalu chakashala kukabadi kachawaana chajila nakukabadi kampata yamusumba chakekala chanlomboli.+ Chakadikumashana najiñinza jamakyubiti 25,000 jidi kumusela nikumujika wachawaana. Chakesekana namaluña adikumashana nachu, nawa chakekala chanlomboli. Chawaana chajila niiluña dajila datembeli jakekala mukachi kachu.

22 “Mwiluña danlomboli dimwakekala mpata yawaLevi nimpata yamusumba. Iluña danlomboli dakekala hakachi kañinza yaYuda+ nañinza yaBenjamini.

23 “Hakwila nyichidi yinashali: iluña daBenjamini dakatachikila kuñinza yakumusela kushika kuñinza yakumujika.+ 24 Iluña daSimiyoni dakekala kwakwihi nañinza yaBenjamini,+ kutachikila kuñinza yakumusela kushika kuñinza yakumujika. 25 Iluña daIsakari+ dakekala kwakwihi nañinza yaSimiyoni, kutachikila kuñinza yakumusela kushika kuñinza yakumujika. 26 Iluña daZebuluni dakekala kwakwihi nañinza yaIsakari,+ kutachikila kuñinza yakumusela kushika kuñinza yakumujika.+ 27 Iluña daGadi dakekala kwakwihi nañinza yaZebuluni,+ kutachikila kuñinza yakumusela kushika kuñinza yakumujika. 28 Ñinza yakukabeta kakuchidiilu yidi kwakwihi nañinza yaGadi yakafuma kuTamari+ nakuya kumenji aMeribati Kadeshi,+ kushika nikuMuhoñi*+ ndo-o nikuKaluñalwiji Keneni.*

29 Yehova Mwanta Wabadika nahoshi nindi, “Idi didu ituña dimwatela kwanzañena nyichidi yaIsarela+ kulonda dakekali wuswana wawu, nawa awa diwu akekala maluña awu.”+

30 “Awa diwu akekala maluña akwidikila amusumba: kukabadi kakukabeta kakuchimunswa kwakekala makyubiti 4,500.+

31 “Yiisu yamusumba akayituumba majina kwesekeja nanyichidi yaIsarela. Hayiisu yisatu yakukabeta kakuchimunswa, chiisu chimu chaRubeni, chikwawu chaYuda nawa chikwawu chaLevi.

32 “Kukabadi kakumusela kwakekala makyubiti 4,500 mukuleha, nawa kwakekala yiisu yisatu: chiisu chimu chaYosefu, chikwawu chaBenjamini, nawa chikwawu chaDani.

33 “Kukabadi kakukabeta kakuchidiilu kwakekala makyubiti 4,500, kwakekala yiisu yisatu: chiisu chimu chaSimiyoni, chikwawu chaIsakari, nawa chikwawu chaZebuluni.

34 “Kukabadi kakumujika kwakekala makyubiti 4,500, kwakekala yiisu yisatu: chiisu chimu chaGadi, chikwawu chaAsheri, nawa chikwawu chaNafitali.

35 “Musumba wejima kuwunyeñumuka wakekala makyubiti 18,000. Nawa kufuma tuhu hanodu ifuku musumba akawutenaña nawu Yehova Wudi Mwenomu.”+