Makabi Ejima Keña Amani!

Hampinji yimu watela wadihulahu dehi muwumi weyi neyi, ‘Muloñadi chikwekalila makabi?’ Hamakombakaji ayaaka, yisaka yawantu yinakabakani nankashi kumajita, nikuwuzweñi, nikuyihuñu, nikuwubaji, nikuwuñanji waheña, nikuyikatu nawa nikukufwa. Nkulakaji yayaaka yinahitihu antu anamoni makabi amavulu akwila kanda amwekaneñahu dehi. Komana makabi ejima awa amba kamana?

Kwakula kwakukundeja kudi kwakwila nawu eña, keña amani! Izu daNzambi Bayibolu dahoshaña nawu: “Muntu watama hakekala nawa mwokuku . . . Ilaña akwakudizoza akaswana ituña, akatiya kuwaha nankashi nakushakama chachiwahi chamwena.” Kushika kumpinjinyi? “Akwakuloña akaswana ituña, akashakamamu haya nyaka.”—Masamu 37:10, 11, 29.

Iseki akadibalumuna kwikala paradisa, hanyima yakwila Nzambi nafumishihu dehi kutama nimakabi. Dihu dinu hamba kashakamawu antu haya nyaka chakadi kukata nawa amuzañalu. Izu daNzambi dashimunañahu dehi nawu: “[Nzambi] wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku.”—Chimwekeshu 21:4.

Mudina ituña dadiha, afu niwena akayisañula hakwila nawu akadiluñishi munoyu nshakaminu yamuzañalu: “Kwamba kekala kusañuka kwawaloña nikwawabula kuloña.” (Yililu 24:15) Diwu muloña waweni Yesu Kristu chalejeleliyi ona mbanji wafutumukili mumuchima nakumwekesha chikuhwelelu mudi yena nindi, “Wukekala nanami muParadisa [NW].”—Luka 23:43.

Muloñadi Makabi Chiyatachikilili?

Muloñadi Nzambi chetejeleliyi makabi kutachika henohu wakeñeli nindi muchidi wamuntu yekali nambidi yayiwahi? Muloñadi chinetejeliyi makabi hampinji yayilehi ñana?

Hampinji Nzambi yaleñeliyi Adama naEvu, wayileñeli nanyijimba niyitoñojoka yawanina. Wayinkeli mwitempa daparadisa nakuyinka mudimu wakuyitiyisha kuwaha. Bayibolu yahoshaña nawu: “Nzambi wamweni yuma yejima yeliliyi nindi yinawahi nankashi.” (Kutachika 1:31) Neyi Adama niEvu amwovwahilili Nzambi, kachi adi kuvwala anyana aloña, nawa nikaayi kejima kadikwikala paradisa, omu mwadikushakamawu antu mukuwunda nimumuzañalu haya nyaka.

Nzambi wayinkeli Adama naEvu chawaana chachiwahi chawuswa wakufuukula, neyi himbadi yakuleña kwamuntu. Hiyadiña neyi makina abulaña kutoñojokaku. Hela chochu, kutwalekahu kwawu kwakwikala amuzañalu kwashindameneni hakuzatisha yitoñojoka yawu yawuswa wakufuukula munjila yaloña—yakwovwahila nshimbi jaNzambi. Nzambi nindi: “Yami Yehova Nzambi yeyi, yami nakulejaña mwakukuwahisha, yami nakulombolaña njila yatela kuya eyi.” (Isaya 48:17) Kuzatisha wuswa wakufuukula munjila yaheña, kunakukojesha kukala, hakwila antu hiyayileñeli kulonda kudiyula chachiwahi chakadi Nzambiku. Bayibolu yahoshaña nawu: “Njila yamuntu hiyekala mudi yomwenuku, mudi muntu wendaña himwekala yakuyula nyendu yinduku.”—Yeremiya 10:23.

Chawushona, anvwali jetu atachi aditiyili nawu anateli kudiyula chakadi Nzambi nakutwesha kuhanda chiwahi. Ilaña chiyakanini wunyuli waNzambi, hayilekeli kwikala aloña cheñiku. Atachikili kukula nkumininaku ashinakajili nakufwa. Hamuloña wakwila tudi anyanawu, twaswana kufwa nikubula kuloña.—Aroma 5:12.

Muloña Waweni—waWanta

Muloñadi Nzambi chabulili kuyikisañanayi Adama naEvu nakuleña iyala wacheñi nimumbanda wacheñi? Muloña wanta waNzambi wakuleña kwejima, dikwila nawu wuswa windi wakuyula, awizuñañesheli. Lwihu lwadiñi lwakwila nawu, Hinyi wukweti wuswa wakuyula, nawa kuyula kwanyi kwashikila? Kubombelahu, Komana antu atela kushakama chiwahi neyi chakwila hiyayiyulileña kudi Nzambiku? Nzambi wayinkeli antu mpinji yeneni yakweseka kudiyula awenawu, kulonda kukumisha kujinwoka kwakwila nawa anateli kuyulewa chachiwahi nayena hela kudiyula awenawu.

Mpinji yetejeliyi yadikwikala yeneni kulonda antu eseki nyichidi yejima yansañu yamatuña nachiyulu, nshakaminu yawantu, nimaheta ninsakililu yinambukiku nawunlomboli waNzambi.

Chumanyi chinafumimu? Makombakaji ayaaka ansañu yawantu yatulejaña nawu makabi atachikili dehi kufuma tuhu kunyima. Munkulakanji yayaaka yinahitihu, yisaka yawantu anamoni makabi akadi kumonañahu dehi. Yihita yawantu ayijahili hampinji yanjita yamuchiyedi yakaayi kejima. Yihita yakubadika ha 100 anayijahi kunjita. Wubanji nimadombu anatandi kwejima. Kuzatisha yitumbu munjila yaheña kunasweji mukaayi. Nyisoñu yakusambula muwuvumbi yichidi kutanda. Makumi ayihita yawantu anakufwa hachaka hachaka kunzala nikunyisoñu. Chihandilu chayisaka nikulema kwayililu kunakisiki kudi kwejima. Nfulumendi yawantu hiyidi najinjila mwakumanishila iku kukalaku. Kwosi niwumu hakachi kawu wunateli kumanisha kushinakaja, kukata, nikufwaku.

Chihandilu chawantu chidi neyi ochiyashimwineñahu dehi muBayibolu kutalisha kumpinji yetu. Izu daNzambi damwekeshaña mpinji yetu neyi ‘himafuku akukuminina’ anshakaminu yamakonu, “kwakenza nyaka yakala.” Neyi chochahosheli Bayibolu nawu, ‘antu atama niakwakutwamba anaswejeliku kutama.’—2 Timotewu 3:1-5, 13.

Makabi Adi Kwakwihi naKumana

Wunsahu wejimiwu wunakumwekesha nawu hitukushika kwakwihi nakumana kwakutama kwawantu kwakweseka kudiyula chakadi Nzambi. Chinamwekani hatooka to-o nawu kuyula kwawantu chakadi Nzambi hikunatweshi kutwalekahuku. Wunyuli waNzambi hohu diwu wunatweshi kuleta kuwunda, nimuzañalu, nikubula kukata, niwumi wahaya nyaka. Dichi kutama nimakabi etejayi Yehova adi kwakwihi nakumana. Nzambi keña adiñijimu munsañu jawantu kuhitila mukukisañana nshakaminu yamakonu yejima yabulaña kuleta muzañalu.

Wuprofwetu waBayibolu wahoshaña nawu: “Hamafuku amba kekala anyantowu, [awantu anakuyula makonu] Nzambi wamwiwulu wamba kaloñesha wanta [mwiwulu] wakabula kukisika haya nyaka, . . . wakahumonaña mawantawa ejima [anakuyula makonu] puchi puchi, nakuyinoñesha, wakemana mbe haya nyaka.” (Danyeli 2:44) Chishina chantañishilu yaBayibolu hikuyiñisha kwawanta waYehova, wuswa windi wakuyula, kuhitila muWanta windi wakwiwulu. Hampinji Yesu yashimwineñahu dehi chikuma chalema chayijikijilu, ‘yamafuku akukuminina,’ Yesu wahosheli nindi: “Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.”—Matewu 24:14.

Neyi kukumisha kunashiki, anyi akapuluka? Bayibolu yakulaña nawu; “Akwakuloña diwu akashakama mwituña, antu alala diwu akashalamu. Hakwila antu atama akayifumisha mwituña.” (Yishimu 2:21, 22) Akwakuloña diwu antu adizaña nkeñelu yaYehova nakwilamu. Yesu Kristu wahosheli nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.” (Yowanu 17:3) Mwalala, “Mpata yamunu mwishina yikuhita, . . . , hakwinza muntu welaña muchima waNzambi washakamaña haya nyaka.”—1 Yowanu 2:17.

Nsona yitunazatishi yinafumi muBayibolu yaLunda yamu 1962. Ilaña neyi mukuwana tunazatishi NW yinalondeli hansona, dikwila nawu nsonoyu yinafumi muBayibolu yawundeli yaNew World Translation of the Holy Scriptures—With Reference.