Muloñadi Nzambi Chatuleñeleliyi?

NEYI mutaña chipapilu chansañu, mutala nyuzi hatelevijeni hela kutiya nyijimbu kuchisanji, mukumona nikutiya nsañu yayivulu yamadombu, njita niyawubanji. Hekwawu ninenu munakukabakana muloña wayikatu indi kwiji munafwishi muntu imwakeña.

Dihulenu nenu:

• Komana Nzambi nakukeña nind ami nichisaka chami tumonena kukala kwamuchidiwu?

• Kudihi kunatela kuwana wukwashu wakuumika iku kukala?

• Kwamba kekalahu kuwunda kwakweni?

Bayibolu yakula chachiwahi awa malwihu.

BAYIBOLU YASHIMUNAÑA NAWU NZAMBI WAKELA YUMA YAKUHAYAMISHA HAMASEKI.

• Antu hiyakatiyaña cheñi kukata hela kushinakaja nikufwaku.—Chimwekeshu 21:4

• ‘Chifwayi wakakiluka neyi nkayi.’—Isaya 35:6

• ‘Mesu awamputa mesu akayitonesha.’—Isaya 35:5

• Afu akayisañula nakwikala cheñi nawumi.—Yowanu 5:28, 29

• Kwosi muntu wukakataña.—Isaya 33:24

• Antu ejima hamaseki akekala nayakuda yayivulu.—Masamu 72:16

  

TAMBWILENU WULOKU MUYUMA YADIZISHAÑA BAYIBOLU

Hadaha mukutachika kutoñojoka nenu nsañu yimunatañi hamafu akutachikilahu antesha yakutwamba. Ilaña Nzambi nashiiki nindi katataka yahimpi yuma yejimiyi hamaseki nawa Bayibolu yinashimuni chakayihimpayi.

Bayibolu yashimuna yuma yayivulu. Yatulejaña yuma yitwatela kwila kulonda twikali namuzañalu nikwikala nawumi wawuwahi chayinu mpinji. Toñojokenu hayuma yayakameshaña. Yumiyi yinabombelimu nsañu yamali, kukala muchisaka, yikatu hela kufwa kwamuntu yimwakeña. Bayibolu yinateli kuyikwasha kuumika kukala kwamuchidiwu nawa yikuyikwasha kwakula malwihu adi neyi:

• Muloñadi chitwakabakenaña?

• Tunateli kuumika ñahi nakukala kutwamonaña?

• Chisaka chetu chinateli kwikala chamuzañalu?

• Twayaña kudihi neyi tunafwi?

• Twamba kayimona cheñi antu itwakeña afwa dehi?

• Chumanyi chinaleteshi tukuhweleli netu Nzambi wakela yuma yejima yinashiikiyi?

Chineli munakutaña wunu mukanda chinamwekeshi hatooka nawu munakukeña kwiluka yuma yadizishaña Bayibolu. Wunu mukanda wukuyikwasha. Maparagilafu akweti malwihu, akuyikwasha kwiluka chiwahi chahosha Bayibolu. Antu amavulu atiyaña kuwaha kuhanjeka nsañu yamuBayibolu nawaYinsahu jaYehova. Tunakuhweleli netu ninenu mukuzañalala. Tunakulomba netu Nzambi yayikiswili hampinji yimukwiluka yuma yinateli kutudizisha Bayibolu.