Yesu Nadizishi Atumbanji Twindi Chakulomba

Yuma yejima yelileñawu aFwarisi yadiña hohu yakutiyisha antu kuwaha. Neyi akoña chuma chachiwahi, elileña mwenimu kulonda ayimoni. Adiña nakulombela kumaluña kwawanikileña antu amavulu kulonda ayimoni kudi antu ejima. AFwarisi akwatilileña kulomba kwakulehi kumutu nakukufuntisha-funtishahu mumasinagogi nihamansaña anyikwakwa kulonda ayitiyeña. Dichi antu ahayamini chelili Yesu ayileji nindi: ‘Bayi mulombaña neyi aFwarisiku. Atoñojokaña nawu Nzambi wukuyitiya kuwaha neyi avulisha mazu, ilaña hayitiyaña kuwahaku. Watela hohu kulomba nkaweyi kudi Yehova. Bayi wufuntisha-funtishahu mazu wowamuku. Yehova nakukeña nindi wumuleji chiwunakutiya.

‘Ichi dichiwatela kulomba neyi: “Tata yetu wekala mumawulu, ijina deyi diikali dajila. Wanta weyi winzi. Nkeñelu yeyi ayili hamaseki neyi chayilañawu mwiwulu.”’ Yesu wayilejeli cheñi nindi atela kulomba yakuda yahanodu ifuku, kuyanakena nshidi jawu niyuma yikwawu yinakukeñawu.

Yesu wahosheli nindi: ‘Bayi muleka kulombaku. Lombenuña yuma yayiwahi kudi Tata yenu, Yehova. Nvwali wejima wakeñaña kwinka mwanindi yuma yayiwahi. Neyi mwaneyi akulomba dinkendi, komana wukumwinka ilola? Neyi akulomba inshi, komana wukumwinka kapela?’

Kuhiñahu Yesu walumbulwili chitunateli kudizilaku, nindi: ‘Neyi mweluka kwinka anyanenu yawaana yayiwahi, dikwila nawu Tata yenu, Yehova, wukusweja kuyinka enu spiritu yajila. Chuma chimwatela kwila hohu hikumulomba.’ Komana wovwahilaña kufumba kwaYesu? Yumanyi yiwalombaña?