May

Yefwata welukili nindi Nzambi watela kumukwasha kulonda yayamwini aIsarela kudi aAmoni. Wamukanini Yehova nindi neyi yamukwasha kushinda, wakamwinka neyi “mulambu wakushita” muntu watachi kwidika mwitala dindi hakufuma kunjita. (Ansomp. 11:30, 31) Chumichi chinatalishi mudihi? Yehova wahela antu alambulaña antu, dichi tuneluki netu Yefwata hadi kuhana mulambu wakushita wamwanindiku. (Kuhit. 18:9, 10) MuNshimbi yaMosi, mulambu wakushita wahanineñayi muntu kudi Yehova chakufuma hamuchima wadiña walema chikupu. Yefwata watalishili mukwila nindi muntu wukahanayi kudi Yehova wakamukalakelaña hatabanaka muchihandilu chindi chejima. Yehova wamutiyilili Yefwata nawa wamukwashili kushinda njita. (Ansomp. 11:32) Yefwata chafuntiliyi kunjita, mwanindi wamumbanda diyi wodikili mwitala, mwanindi wumu hohu. Hanu dinu Yefwata wadi kuhananyi kudi Yehova? w16.04 1:11-13

Yipompelu yayivulu katataka yadizileña mukanda waDraw Close to Jehovah haKudiza Bayibolu haChipompelu. Mwatiyili ñahi chitwadizili hayilwilu yaYehova nichimwatiyili chahosheleñawu amanakwenu chamukeñawu Tata yetu wamwiwulu? Chumichi chayiletesheli mumukeñi Yehova nankashi. Hakupompa, twadizaña cheñi Bayibolu kuhitila mukutiyilila nakanañachima kujimpanji, kuyimwenu nikukutaña Bayibolu. Kupompa kwatukwasha kuzatisha yuma yitwadizaña muBayibolu. (1 Tesa. 4:9, 10) Chakutalilahu, mwadizahu dehi Kaposhi Kakutalila Kakudizamu kayileñeleli mwikali namuchima wakukalakala chikupu mumudimu waYehova, muwahishi njila yimwalombelañamu hela mwanakeni manakwenu hela muhela? Kupompa kutwekalaña naku mukachi kamulungu kwatukwashaña kwiluka chakushimwina nsañu yayiwahi nichakukwasha antu kwiluka chalala chamuBayibolu.—Mat. 28:19, 20. w16.04 3:4, 5

Mwatoñojokahu dehi hadi antu abulili kutiyashana ashimunawu muBayibolu? Mutupetulu twakutachikilahu twamukanda waKutachika, twatañaña nawu, Kena wajahili Abeli (Kutach. 4:3-8); Lameki wajahili mukwenzi weyala wamukatishili (Kutach. 4:23); Atubiña twaAbarahama atobokeleña nawatubiña twaLoti (Kutach. 13:5-7); Haga wadimweneña kulema kubadika Sara, nawa Sara wamuhililili Abarahama (Kutach. 16:3-6); Ishimeli waheleli akwawu nawa niwena amuheleli. (Kutach. 16:12) Muloñadi iyi yakutalilahu chiyayisonekelawu muBayibolu? Muloña tunateli kudizila kuyakutalilahu yanawa antu abula kuwanina adiña mukukala. Ninetu twawanina wanyi, nawa neyi tunakutiyashana wanyi nawakwetu, tunateli kwimbujola yakutalilahu yayiwahi yekala muBayibolu nikutondolwela yakutalilahu yatama. w16.05 1:1, 2

Yesu niatumbanji azatishili njilanyi yakushimwina? Ayileña kwejima kwadiña antu. Chakutalilahu, ashimwinineña munyikwakwa nikuyisankanu. Ayileña cheñi nakuwana antu kumatalawu. (Mat. 10:11; Luka 8:1; Yil. 5:42; 20:20) Kushimwina kwitala nikwitala diyadiña njila yayiwahi yakushimwina antu. Indi aYinsahu jaYehova? Diwu hohu ashimwinaña nawu Yesu watachikili kuyuula neyi Mwanta kufuma tuhu mu 1914. Amwovwahilaña Yesu nikulemesha mudimu wakushimwina muchihandilu chawu. Mukanda waPillars of Faith—American Congregations and Their Partners wahosha nawu: A Yinsahu jaYehova avulamenaña wanyi nawu atela kushimwina hakukuma kwakanu kaayi nikuleja antu nsañu yawamwinu. A Yinsahu jaYehova atwalekañahu kushimwina nsañu yayiwahi nikulondela chadiña nakushimwinayi Yesu niatumbanji twindi. w16.05 2:10, 12

Neyi tufuukula yuma yikumutiyisha Yehova kuwaha, tukukundama kudi yena nikwikala amabwambu jindi nawa wukutukiswila. (Yak. 4:8) Tukumukuhwelela chikupu Yehova. Dichi tutoñojokenuña hansañu yitunakutaña muBayibolu kulonda twiluki chatoñojokañayi. Tukudizaña yuma yayiha hadi Yehova. (Yoba 26:14) Ilaña neyi tukuzata nañovu kulonda tumwiluki, tukwikala namaana nawa tukufuukulaña chiwahi. (Yish. 2:1-5) Maana nikufuukula kwawantu kwahimpaña, ilaña Yehova wahimpaña wanyi. Ñimbi yamasamu wahosheli nindi: “Mwafuukulañayi Yehova mwemanaña haya nyaka, niyitoñojoka yamumuchima windi yakolaña kumakiñu ejima mwamba kavwalikilañawu antu.” (Mas. 33:11 NWT) Mwamweni, tukufuukula chiwahi neyi tukutoñojokaña neyi chatoñojokañayi Yehova nikwila yuma yikumutiyisha kuwaha. w16.05 3:17

Twamukuhwelela Yehova netu waluwañeshaña wanyi hakutonda antu. Dichi bayi tusompesha antu itwashimwinaña hela amuchipompeluku. (Yow. 6:44) Neyi twiluka netu Yehova hiKañemi ketu, tukuhimpa chitwamonaña amanakwetu niahela. (Isa. 64:8) Tukuyimonaña netu achidi kuyiwumba kudi Nzambi. Muloña dichayimonañayi Yehova. Wamonaña chiyekalawu mumuchima nawa weluka nindi kubula kuwanina kwawu kwahakampinji kantesha hohu. Weluka cheñi chiyanateli kwikalawu wejima wawu neyi yayiwumba. (Mas 130:3) Tunateli kumwimbujola Yehova neyi tumonaña amanakwetu neyi chayimonañayi. Tunateli nikuzatila hamu naKañemi ketu kukwasha amanakwetu niahela kuyilaku hambidi. (1 Tesa. 5:14, 15) Aeluda muchipompelu atela kwikala atachi kwila mwenimu.—Efwes. 4:8, 11-13. w16.06 1:4-6

Hakushimwina nsañu yayiwahi, twatela kumwekesha yilwilu yidi neyi kudizoza ninyikabu yashiyashana yaspiritu yaNzambi. (Ŋal. 5:22, 23) Neyi tumwimbujola Kristu, antu akwiteja nsañu yitwayishimwinaña nawa akutukeña. Chakutalilahu, aYinsahu ayedi kuAustralia akeñeleña kushimwina kudi wamumbanda, ilaña wadiña wazuwa nawa wawinyi. Hela chochu, aYinsahu atiyilili mwayilejeliyi. Kuhiñahu, ona mumbanda welukili nindi waluwañesheli dichi wasonekeli mukanda kukasanji kamutayi. Wadanakeneni. Wahosheli nindi, “Nidi chileya hakuhaña antu ayedi anakushimwina Izu daNzambi.” Ichi chakutalilahu chinakumwekesha nawu twatela kwikala awunda neyi tunakushimwina. Mwalala mudimu wetu wakushimwina wakwashaña antu amakwawu, ilaña ninetu watukwashaña kuwahishaku yilwilu yetu. w16.06 2:12, 13

Wejima wetu twawanina wanyi muloña wanshidi yaAdama. (Rom. 5:12, 19.) Dichi mpinji yikwawu amanakwetu muchipompelu anateli kuhosha hela kwila yuma yikutuneñesha. Neyi chumichi chimwekana, tukwila ñahi? Tukutwalekahu kumukeña Yehova? Twikwikala ashinshika kudi Nzambi niantu jindi? Chakutalilahu, Eli wadiña kapristu muneni muIsarela, ilaña anyanindi ayedi adiña nakwovwahila wanyi nshimbi jaYehova. Bayibolu yahoshaña nawu: “Anyana kaEli adiñi antu amukunkulwayi, hiyamwilukili Yehovaku.” (1 Sam. 2:12) Eli welukili nindi anyanindi elileña yuma yatama nankashi. Ilaña wayibabesheleña. Chimwahitili mpinji, Yehova wamubabesheli Eli nianyanindi awamayala ayedi. Kuhiñahu, Yehova hetejeli cheñi antu amuchisaka chaEli kwikala atupristuku. (1 Sam. 3:10-14) Mwadi kwila ñahi neyi mwadiñaku mumafuku aEli halekeliyi anyanindi kwila nshidi yahamesu bwi-i? Komana chikuhwelelu chenu chadi kuzeya nikuleka kumukalakela Yehova muloña waniyi yuma? w16.06 4:5, 6

Muloñadi Yesu chahosheleliyi awa mazu? Walumbulwili muvasi 32 nindi: “Tata yenu wamwiwulu neluki chimunakaankili yuma yejimiyi,” dikwila nawu yuma yakeñekaña muchihandilu. Henohu kanda twiluki netu tunakukeña yakuda, yakuvwala nihakukama, Yehova welukañahu dehi. (Fwi. 4:19) Welukaña yitukavwala ifuku dikwawu. Welukaña yakuda yitwatela kuda nihakukama hatelela, kwesekeja nachisaka chitukweti. Yehova wukutwinkaña yuma yitunakukeña. Mwamweni, twatela kukuhwelela netu neyi tukwila yuma yitwatela kwila, dikwila nawu kutwamijaku yuma yakuspiritu muchihandilu chetu, Yehova wukutwinka yuma yayiwahi. “Kwakama Nzambi” kukutukwasha kwiluka netu “yakuda niyakudivwika,” hela hakukama yinawanini.—1 Tim. 6:6-8. w16.07 1:17, 18

Iku kukundamwisha kwatukwasha kwikala nawubwambu wawuwahi naNzambi. Chineli tudi akwanshidi, twadiña ayilumbu jaNzambi kufuma tuhu hakuvwalika. Pawulu wesekejeli iku kukooleka naluwi lwaYehova, nindi: “Chitunekali [amanakwaKristu awayishewa] dehi aloña nakukuhwelela, tukweti kuwunda naNzambi mudi Mwanta wetu Yesu Kristu. Kudi yena nawa diku tunamweni kwiñila muluwi ilu mutwekala nakukuhwelela.” (Rom. 5:1, 2) Iku hikukooleka kwakweni! Wejima wetu twekala aloña wanyi. Ilaña kaprofwetu Danyeli wahosheli nindi mumafuku akukuminina, “akwamaana,” awayishewa ashalahu ‘akakondolaña akwawu amavulu ayi mukuloña.’ (Dan 12:3.) Kuhitila mumudimu wawu wakushimwina nikudizisha, anakwashi “anyikoku acheñi” kwikala nañimenu yayiwahi naYehova. (Yow. 10:16) Hela chochu, chumichi chinamwekani muloña wakwila Yehova wukweti luwi.—Rom. 3:23, 24. w16.07 3:10, 11

Awa añelu adibalumwini muwuntu nakuhumañana nawambanda, avweli anyana amadombu ateneneñawu nawu aNefwili. Dichi, ‘kutama kwawantu kwaswejeli hamaseki.’ (Kutach. 6:1-5) Yehova waleteli Dibaji mumafuku aNowa kulonda yajilumuni antu atama. Hayina mpinji, antu ashili maana kuyuma yelileñawu muchihandilu chawu kushilahu tuhu niwulu chakwila adiwili nsañu yashimwineñayi “Nowa mukwakushimwina kuloña” kutalisha kukujilumuka. (2 Pet. 2:5) Yesu wesekejeli yuma yamwekeni nayuma yitunakumona makonu. (Mat. 24:37-39.) Makonu, antu amavulu anakukaana kutiyilila kunsañu yayiwahi yaWanta waNzambi yinakushimwinawu mukaayi kejima kulonda kwilisha wunsahu munyuza yejima henohu kukuma kwakanu kaayi katama kanda kushiki. Bayi twiteja nsañu yachisaka chidi neyi wulu hela kukulisha anyana yituleteshi tutachiki kutoñojoka netu ifuku daYehova didi kwakulehiku. w16.08 1:8, 9

Chineli tunakushakama ‘mumafuku akukuminina,’ tunakumona “nyaaka yakala.” (2 Tim. 3:1-5) Ilaña kwikala akola kuspiritu, kukutukwasha kuumika kukala kutunakumona mukanu kaayi. Munsona yefuku dalelu, bayi neyi Pawulu walejeleña adisumbula kubula kudakamenaku. Ilaña chineli mpinji yinakehi, atela kusha maana kuyuma yakuspiritu. (Mat. 6:33) Hela chakwila tunakushakama mumpinji yakala nawa antu amavulu anakudiseña, antu anateli kwikala nawulu wamuzañalu nawa wakola. Mwamweni, akwaKristu adisumbula adikundaña nawantu jaNzambi, azatishaña kufumba kwamunsona nawa etejaña wunlomboli waspiritu yaYehova hiyanateli kwambula ‘anabombuwu kudi Nzambiku.’—Maku 10:9. w16.08 2:17, 18

Kudi kukankila kweneni kwawatubiña awakwaKristu muchipompelu, nawa antu atela kuzata iwu mudimu kumbidi atela kutwalekahu kuyidizisha. Pawulu wamulejeli Timotewu nindi, “Nsañu jiwatiyili kudami mukachi kawayinsahu amavulu, jikunjiki antu ashinshika akatwesha kuleja akwawu nawa.” (2 Tim. 2:1, 2) Timotewu wadizili muloña wadiña nakuzatila hamu nakapostolu wachikulumpi. Nawa Timotewu wazatishili njila jamulejeliwu kudi Pawulu mumudimu wakushimwina nimunyidimu yikwawu yajila. (2 Tim. 3:10-12) Pawulu wamudizishileña Timotewu mpinji yejima. Wazatileña nindi munyidimu yejima. (Yil. 16:1-5) Aeluda atela kwimbujola chakutalilahu chaPawulu kuhitila mukusendaña ankoñi akuzatila ashikahu neyi anakuya nakubiña. Dichi aeluda neyi akwila mwenimu akukwasha amanakwetu kwiluka chakutañisha, kwikala nachikuhwelelu, kukaba kabe-e nikwikala nakukeña kwatela kwikala namukwaKristu mukwakukalakela akwawu. Iyi ntanjikilu yinabombelimu kudizisha atubiña akabiñaña “mukanka wanyikoku yaNzambi” kumbindi. w16.08 4:16, 17

Kuzeya kwamakasa achifwikija mpinji jikwawu akwizatishaña kukutena muntu wunazeyi, wunaneñi hela wunabuli kuchiñeja. (2 Kushi. 15:7; Heb. 12:12) Kakavulu muntu wudi mukukala kwamuchidiwu wazeyaña. Chawushona, chihandilu mukaayi kaSatana katama chakala, chaleteshaña muntu kwakama nikudimona neyi wamukunkulwayi. Chidi neyi chikuñu chinakasiliwu kuwatu, chinakukañesha watu kuya hambidi. (Yish. 12:25) Chumanyi chikuyikojeja mutiyi muniyi njila? Hadaha munakuumika chineñi chakufwisha muntu imwakeña, mukweti chikatu cheneni, chinakuyikalila kwakamena chisaka chenu muyinu mpinji munakali mali hela anakuyidimbulula. Kukala kwamuchidiwu kunateli kuyizeyesha. Kunateli kuyiletesha cheñi kubula kwikala namuzañalu. Hela chochu, mukukuhwelela nenu Nzambi wukuyikwasha.—Isa. 41:10, 13. w16.09 1:2, 4

Kukala kumu kunamoniwu antu amavulu, hikulwisha kulonda ashindi kuzeyazeya kwawu. Amakwawu azataña nañovu kulonda atwalekihu kuzata chiwahi mumudimu wakushimwina. Hadaha, munakuumika hela chakwila mwakatakataña kumujimba indi kwiji mwatiyaña wudi. Amakwawu chayikalilaña kwanakena muntu wunayineñeshi hela wunayivulumuni. Hela chakwila tunamukalakeli Yehova hadi yaaka yayivulu hela nehi, wejima wetu twatela kuzata nañovu kulonda tushindi yuma yinateli kutukañesha kumukalakela Nzambi, wasomwenaña ashinshika. Neyi mwiluka nenu munaluwankani, lombenu spiritu yajila kulonda yiyikwashi. Kulomba nispiritu yajila jinateli kuyinka ñovu yakuya munjila yayiwahi yinateli kukiswilayi Yehova. Zatilenu hayuma yimunakulomba. Esekenu kutaña chibalu chamuBayibolu hefuku-hefuku nikwikala nampinji yakudiza kwahalwenu kushilahu niKudifukula kwaChisaka mpinji yejima.—Mas. 119:32. w16.09 2:10, 11

Komana antu ayilejahu dehi nawu akuhwelela nawu yuma yadileñeli yayeni muloña yashindamena hasayansi ilaña kukuhwelela mudi Nzambi kwashindamena hachikuhwelelu? Antu amavulu akuhwelela iyi yitoñojoka. Hela chochu, chalema kwiluka chumichi: Hichikweti muloña nayuma yakuhwelelayi muntu hadi Nzambi hela nindi yuma yadileñeli yayeniku, chikuhwelelu chakeñekaña. Munjilanyi? Hakachi ketu hosi muntu wamumonahu dehi Nzambi hela wamweni anakuleña chuma. (Yow. 1:18) Nawa kwosi muntu hela wumu chili hisayantisiti hela nehi, wamonahu dehi chuma chikweti wumi chinakuhimpika kwikala chuma chikwawu. Chakutalilahu, kwosi wamonahu dehi inoka hela munsulu nakubalumuka kwikala mutupa hela nzovu. (Yoba 38:1, 4) Dichi, wejima wetu twatela kushinshika chikupu wunsahu nikuzatisha wuswa wetu wakutoñojoka kulonda tukunkululi mwamaana. Kapostolu Pawulu wasonekeli kutalisha hakuleña nindi: “Kufumisha haleñeluwu mpata yamunu mwishina, yuma [yaNzambi] yakadi kumonewa yalumbulukila, muloña ayilukaña nayuma yaleñeliyi, joju ñovu jindi jahaya nyaka niwuNzambi windi; kulonda abuli mwakuleyela.”—Rom. 1:20. w16.09 4:4

Yehova mukukeña wayiloñesheleli njila jayikwashileña enyi adiña muIsarela kwikala nawuswa wakunonojola yakuda yashalileña mwiha. (Lev. 19:9, 10) Chatela yayileji aIsarela nindi atela kulemesha enyi, Yehova wayilembeleli nindi ayitiyileña luwi. (Kwid. 23:9.) Elukili ‘chichatiyakeneña kwikala mwenyi.’ Nihampinji yadiñawu muwuduñu, aHeberu ayikanishileña kudi aEjipitu muloña wachaambu chekowa nikudivwimba kwawakulumpi jansakililu. (Kutach. 43:32; 46:34; Kwid. 1:11-14) A Isarela amweni kukala kweneni muchihandilu chawu hadiñawu enyi mwituña dacheñi, ilaña Yehova wakeñeleña nindi amoneña enyi neyi ‘hiyenimbu’ mukachi kawu. (Lev. 19:33, 34) Chakadi nikujina, Yehova nakwakamena antu afuma kuyisemwa yashiyashana apompaña muyipompelu yetu. (Kuhit. 10:17-19; Mal. 3:5, 6) Neyi tukutoñojoka chikupu hakukala kunakumonawu, kudi neyi chaambu hela muchidi, tukukeñakeña njila jakuyimwekeshelamu kukeña niluwi.—1 Pet. 3:8. w16.10 1:3-5

Mukanda waYakoba walumbulwili nawu chikuhwelelu chalala chamukwaKristu hichashindamena hakukuhwelela hohuku, ilaña nihanyidimu. Yakoba wasonekeli nindi: “Nleji chikuhwelelu cheyi chakadi nyidimu, ninami nikukuleja chikuhwelelu chami nanyidimu yami.” (Yak. 2:18) Yakoba watwalekelihu kumwekesha chaambu chekala hakukuhwelela nikumwekesha chikuhwelelu. Andemoni akuhwelela nawu Nzambi wekala kwoku, ilaña hiyekala nachikuhwelelu chalalaku. Hamuloña wakubula kwikala nachikuhwelelu chalala, azataña nañovu kulonda eleña yuma yambukaku nankeñelu yaNzambi. (Yak. 2:19, 20) Kwambukaku, Yakoba wehwili hadi muntu mukwawu wakushankulu wadiña nachikuhwelelu nindi: “Nkakulula yetu Abarahama, chalambwiliyi mwanindi Isaka hakameña haloñeli nanyidimuku, tahindi? Wunamoni kwitiya kwakoñeli chimu nanyidimu yindi, nikwitiya kwelili kwalala nanyidimu.” (Yak. 2:21-23) Kuhiñahu, hakwila nindi yamwekeshi chikuma chakwila nawu chikuhwelelu chatela kumwekena munyidimu, Yakoba wabombelelihu mazu adi munsona yefuku dalelu. w16.10 4:8

Sayansi yashimuna yuma yayivulu yamwiwulu niyahamaseki nawa yinatukwashiku muyuma yayivulu muchihandilu. Ilaña kuchidi malwihu amavulu anakañanyiwu kwakulawu kudi sayansi. Chakutalilahu, antu eluka jatutumba hiyakutwesha kutuleja chikupu yileñaleña yejima chiyatachikili kwikalaku hela chitwekalila hanu haMaseki hekala yuma yayivulu yikweti wumiku. Cheñi, antu hiyakutwesha kulumbulula chuma chaletesha antu akeñeña kuhanda haya nyaakaku. Muloñadi chikunekalili malwihu amavulu alema akubula kwakula? Muloña asayantisti amavulu niantu amakwawu atoñojokaña yuma yatama nawa ahoshaña nawu yuma yadinjilili yayeni. Ilaña Yehova wazatishaña Mukanda windi kwakula malwihu ehulañawu antu ejima. Yuma yejima yitwelaña yashindamena hanshimbi jashaku Yehova kutalisha kuyileñaleña. Akwamalayiti, atalaña jamenji, mainjiniya, akwakwendesha ndeki, akwakuladika, wejima wawu azataña kushindamena haniji nshimbi. w16.11 2:4, 5

Yehova watwinka yuma yayivulu yitwatela kumusakilila. Watwinka wumi, chakubula yena kachi twekalaku wanyi watwinka chawaana chalema, mukanda windi Bayibolu. Twayimonaña netu hinsañu yafuma kudi Nzambi, neyi chochayimweneñawu akwaKristu amuTesalonika nawu izu daNzambi. (1 Tesa. 2:13) Tunakundami kwakwihi naYehova nawa niyena nakundami kwakwihi nanetu muloña Wezu daNzambi datwinkayi. (Yak. 4:8) Tata yetu wamwiwulu watwinka kukooleka kwakweni kwakwikala mukuloñesha kwindi. Twasakililaña chikupu. Ñimbi yamasamu wasakilili chachiwahi chembiliyi nindi: “Musakililenu Yehova, himuwahi; luwi lwindi lwahaya nyaka.” (Mas. 136:1) Mumukanda waMasamu 136 mwekala mazu akwila nawu “luwi lwindi lwahaya nyaka” mapampa 26. Neyi tumwovwahila Yehova nikuloñesha kwindi, tukumona awa mazu alala muloña twakashakama haya nyaka! w16.11 3:18, 19

Iyi vasi ayizatisha nankashi mumukanda waChumanyi Chacheni Chatañishaña Bayibolu? Chimukudizaña iwu mukanda nawanyanenu hela nawantu acheñi, mukutañaña nsona yaAroma 5:12 neyi munakuhanjeka hadi Nzambi chaleñeleliyi iseki, ifutu danyiloña nichekalawu afu mutupetulu 3, 5, ni 6. Hanu dinu mwatoñojokahu dehi haniyi nsona yaAroma 5:12 kutalisha hawubwambu wenu naYehova, yilwilu nichihandilu chenu chakumbidi? Hela chochu, wejima wetu tudi akwanshidi. Twavulumunaña ifuku niifuku. Ilaña tweluka netu Nzambi wanukaña nindi watuleña nalunkuñu nawa watutiyilaña luwi. (Mas. 103:13, 14) Mukulomba kwindi kwachitalilu, Yesu wamulombeli Nzambi nindi: “Twanakeni nyiloña yetu.” (Luka 11:2-4) Dichi, twatela wanyi kutoñojoka cheñi hayiluwa yatwanakenayi dehi Nzambi. Ilaña, chatukwashaña neyi twiluka chinateli kutwanakenayi nichatwanakeneniyi. w16.12 1:1-3

Dichi akwaKristu amuRoma ateleli kutoñojoka chikupu hayuma yalemesheliwu. Komana aswejeli kukeña ‘yuma yakumujimba’? Dichi ninetu twatela kutoñojoka chikupu hayuma yitwalemesha muwumi. Yumanyi yitwakeña nankashi nawa nhoshelu yetu yamwekeshañadi? Yumanyi yitwafwilaña hefuku hefuku? Amakwawu ashaña maana hakutompa vinyu yayiha, kuwahisha itala, kulanda yakuvwala yayiha, kwila bizininsi, kuya nakunooka niyuma yikwawu. Iyi yuma yatama wanyi; hiyuma yitwafwilaña. Chakutalilahu, mpinji yimu Yesu welishili vinyu nawa Pawulu wamulejeli Timotewu nindi yanweña “tuvinyu twanti.” (1 Tim. 5:23; Yow. 2:3-11) Komana Yesu niPawulu “ahosheleña mpinji yejima” havinyu? Komana dikuyashiliwu maana nakuhoshahu mpinji yejima? Inehi. Indochu etu? Yumanyi yitwalemesha nankashi muwumi? w16.12 2:5, 10, 11

Tunateli kwesekeja awa mazu nachahosheliyi Yesu kutalisha hakutwamijaku Wanta waNzambi nikuloña kwindi. (Mat. 6:33) Kapostolu Petulu wamwinhwili Yesu nindi: “Tunashiyi yuma yejima, tunakulondeli; indi etu twakatambuladi?” (Mat. 19:27) Chatela yamuzuwili Petulu hakwihula ilu lwihu, Yesu walejeli atumbanji twindi nindi akayisomona muloña wakudihana kwawu. Apostolu niantu amakwawu ashinshika akayuula hamu nindi mwiwulu. Hela chochu tunakuhetelamu makonu. Yesu wahosheli nindi: “Ejima anashiyi hela matala, hela ana kwawu, hela ahelawu, hela atata jawu, hela amama jawu, hela anyana, hela maha, hansañu yejina dami, akatambwilamu nkulakaji, akaswana niwumi wahaya nyaka.” (Mat. 19:29) Atumbanji twindi akutambwila nkisu yabadika hakudihana kwawu kudi kwejima. Komana atata jetu, amama jetu, amanakwetu, aheletu nianyanetu akuspiritu hiyanabadiki yuma yejima yitunashiyi muloña wakutwamijaku Wantaku? w16.12 4:4, 5

Akwakristu alala atalilaña kuchiñeja kwakuwahi. Wejima wetu, chili twawayishewa hela tudi “anyikoku acheñi,” twatalilaña mpinji hakashikijewa nkeñelu yaNzambi yakusambila nikujilika ijina daYehova. (Yow. 10:16; Mat. 6:9, 10) Antu ejima atela kwikala nakuchiñeja kwamuchidiwu. Twatalilaña cheñi mpinji yakatukiswilayi Nzambi nawumi wahaya nyaaka wakanayi, chili twatalilaña kushakama ‘mumawulu amaha’ hela ‘heseki dadiha.’ (2 Pet. 3:13) Ilaña chayinu mpinji, tunakutalila kumona antu jaNzambi chikuyañawu hambidi kuspiritu. Antu amavulu niwena ekalaña nayuma yachiñejañawu, ilaña ajinokaña yuma yachiñejañawu neyi yakashikijewa. Chakutalilahu, akwakuhema yisela yakudibecha amavulu akuhwelelaña kuwina, ilaña chayikalilaña kwiluka chikupu neyi akuwina. Munjila yikwawu, chikuhwelelu chalala “hikwiluka chikupu” yuma yachiñejañawu akwaKristu. w16.10 3:1, 2

Yehova watwinka wejima wetu yawaana, yozelu, wuswa muloña waluwi lwindi lwasweja. Tunateli kuyizatisha hakumulemesha nikukwasha amakwawu. (Rom. 12:4-8) Yehova watulemesha kuhitila mukutwinka nyidimu yindi. Bayi neyi twakatwalekahu kuzata mudimu wowumu mukuloñesha kwaNzambiku. Wunateli kuhimpa mukuya kwampinji. Tushinshikenu chakutalilahu chaYesu. Hakusambila wadiña naYehova. (Yish. 8:22) Kuhiñahu wamukwashili Nzambi kuleña yileñaleña yakuspiritu, mawulu nimaseki ninetu antu. (Kol. 1:16) Chimwahitili mpinji, Yesu wenjili hamaseki, wavwalikili neyi nkemba nawa wakulili. (Fwi. 2:7) Hanyima yakulambula wumi windi, Yesu wafuntili mwiwulu kulonda akekali Mwanta waWanta waNzambi mu 1914. (Heb. 2:9) Hanyima Yakuyuula Yaaka Ikombakaji, Yesu wakafuntisha Wanta kudi Yehova kulonda “Nzambi yakekali yuma yejima kudi antu ejima.”—1 Kor. 15:28. w17.01 3:11, 12

Hampinji yafuukwileñayi, mumbanda wumu wamulejeli ibwambu dindi nindi: “Bayi wunfuukwilaku; eyi nleji hohu yuma yinatela kwila. Chikunkwashaku.” Iwu mumbanda wakeñeli nindi amuleji mwakwilila chatela yakabakaneña nakuzatisha chawaana chamwinkawu kudi Nleñi, chakudifuukwila. Indochu enu? Mwakeñaña kudifuukwila tahindi mwakeñaña akwenu ayifuukwili? Mwatiyaña ñahi hansañu yakudifuukwila? Antu anahoshi chikupu haniyi nsañu hadi yaaka yayivulu. Antu amakwawu ahoshaña nawu kwosi muntu watela kudifuukwila muloña Nzambi weluka dehi yuma yejima yitwelaña. Amakwawu nawu muntu watela kudifuukwila chiwahi neyi wasubuka chikupu. Hela chochu, hakwila twiluki iyi nsañu chiwahi, twatela kutaña Izu daNzambi, Bayibolu. Muloñadi? Muloña datulejaña nawu Yehova watuleñeli nawuswa wakudifuukwila, dikwila nawu twekala asubuka kwila yuma yitunakukeña. w17.01 2:1, 2

Hadaha Davidi watoñojokeli nindi Solomoni washikililimu wanyi kuzata iwu mudimu walema wakutuña itala daNzambi. Muloña tembeli yadi kwikala ‘yeneni nankashi’ nawa Solomoni haniyi mpinji ‘wachidiña kansi nawa kanda apami.’ Ilaña, Davidi welukili nindi Yehova wukumukwasha Solomoni kuzata iwu mudimu wunamwinkiyi. Dichi Davidi washili maana hakumukwasha nawa waloñesheli yuma yayivulu yakuzatisha. Munjila yoyimu, amanakwetu achikulumpi makonu bayi atiya kutama neyi hiyakwinka amanakwawu atwansi nyidimu yazatañawu. Ilaña mudimu wendaña chiwahi neyi atwansi ayidizisha chakuzata nyidimu. Amanakwetu atondewa atela kutiya kuwaha neyi atwansi anadizishiwu ashikahu kuzata mudimu. w17.01 5:8, 9

Hamu neyi Mwanta waWanta waNzambi, Yesu wakamuchika kapela kumutu nikufumishahu kudikaña kwaSatana. Hampinji yadiñayi hamaseki, Yesu wakwashili atumbanji twindi kwiluka kulema kwaWanta waNzambi. Hanyima yakumupapatisha hohu, Yesu washimwinini “nsañu yayiwahi yaWanta waNzambi” kwejima. (Luka 4:43) Mumazu indi akukumishaku alejeliyi atumbanji twindi henohu kanda yafunti mwiwulu, Yesu wayilejeli kushimwina “kwakumina iseki dejima.” (Yil. 1:6-8) Kuhitila mumudimu wakushimwina Wanta, antu mukaayi kejima adi nakukooleka kwakudiza hefutu danyiloña kulonda akayiyuuli kudi Wanta waNzambi. Makonu, twakwashaña Wanta kuhitila mukukwasha amanakwaKristu anenkiwu mudimu wakushimwina nsañu yayiwahi yaWanta mukaayi kejima.—Mat. 24:14; 25:40. w17.02 2:7, 8

Hela chakwila izanvu dalombolaña dadiña nawuswa wakulombola chipompelu, elukili nawu Nlomboli yawu hiYesu. Kapostolu Pawulu wasonekeli nindi: “Tupameña muyuma yejima mudi Kristu wekala mutu.” (Efwes. 4:15) Chatela aditumbi ijina dakapostolu waya mpuhu, ilaña ‘atumbanji ayiteneneña nawu akwaKristu.’ (Yil. 11:26) Mwamweni, Pawulu welukili kulema “kwakukakela yaaku,” hela kwila yuma yashindamena haNsona, yayinkeliwu kudi apostolu nikudi amayala amakwawu alombweleña. Hela chochu, wabombelelihu nindi: “Ilaña inakukeña enu mwiluki nenu, mutu weyala, [kushilahu tuhu niamamembala amwizanvu dalombolaña] hiKristu; . . . nawa mutu waKristu hiNzambi.” (1 Kor. 11:2, 3) Mwamweni, kuhitila mudi Mutu windi, Yehova, Nzambi, Kristu Yesu wabulaña kumwekana nawa alemeshawu wadiña nakulombola chipompelu. w17.02 4:7

Munjila yikwawu, tukwikala mukuwunda neyi tumwekeshaña kalemesha katelela kudi antu atelela. Chikutukwasha kubula kudimona kulema neyi antu amakwawu anakutulemesha. Chikutukwasha cheñi kwendela hamu nakuloñesha kwaYehova, kwabulaña kwiteja antu ejima, aYinsahu hela abula kwikala aYinsahu kuyilemesha kubadika chatela kuyilemeshawu. Kubombelahu, chikutukwasha kubula kutuntuka neyi antu itwalemesha anatuneñeshi. Twamutiyishaña Nzambi kuwaha neyi tulemesha antu atelela kulemeshewa munjila yatelela. Twelaña kwesekeja nachakeñayi nikuhemba kashinshi ketu kudi yena. Chumichi chatukwashaña kwakula antu amusawulaña. (Yish. 27:11) Mukaayi mudi antu abula kalemesha. Twasakililaña muloña etu tweluka chakulemesha antu kwesekeja nachakeñayi Yehova. w17.03 1:13, 20, 21

Kufwana tata yindi, Asa, Yehoshafwati wakwashili antu kumukeñakeña Yehova. Welili mwenimu kuhitila mukuloñesha kampeni kakuzatisha “mukanda waNshimbi jaYehova.” (2 Kushi. 17:7-10) Wayili kukabeta kaluwunda kawanta wawaIsarela, kushika nikudi eniEfweremi, “nakuyifuntisha cheñi kudi Yehova.” (2 Kushi. 19:4) Wejima wetu tunateli kudibomba mukampeni yakudizisha antu hayuma yinakwilayi Yehova makonu. Komana mwadizishaña antu Izu daNzambi hakakweji kulonda abalumuki munyichima nakutachika kumukalakela Nzambi? Munateli kutachika kudizisha antu Bayibolu neyi mukudihana enu aweni nawa ninawukwashu waNzambi. Komana mwalombelañahu kwila mwenimu? Mukudihana kutachika kuzata iwu mudimu wakala nikuzatishaku mpinji yenu yakunooka kulonda muzati iwu mudimu? Kufwana Yehoshafwati wayili kwiluña dawaEfweremi nakukwasha antu kufunta mukudifukula kwalala, ninetu tunateli kuya nakukwasha antu anazeyi. w17.03 3:10, 11