April

Munjilanyi muyinateli kutukwashila iyi yawaana? Njila yimu hikwimbujola chikuhwelelu chawaeluda niyuma yayiwahi yelañawu. Njila yikwawu hikulondela kufumba kwawu kwamuNsona. (Heb. 13:7, 17) Anukenu nenu aeluda atukeña nawa akeñaña nawu tupameña kuspiritu. Chakutalilahu, neyi amona nawu tunakujiña kukupompa hela iyena detu dinakumana, chakadi nikujina akunyakala kutukwasha. Akututiyilila nawa akutukolesha chiwahi nikutufumba munjila yayiwahi kuzatisha Nsona. Komana mwamonaña wukwashu wamuchidiwu nenu hinjila mwamwekeshelañayi Yehova nindi wayikeña? Ilukenu nenu mpinji yikwawu aeluda chayikalilaña kutusolomoka kulonda atufumbi. Munateli kupelesha ñahi nyidimu yawaeluda muchipompelu? Ikalenu adizoza, aswayi kusolomoka nawa sakililenuña. Monenuña wukwashu wawu nenu Nzambi diyi wunakuyimwekeshela kukeña. Neyi mwila mwenimu chikuyikwasha enu nawa niwena akuzataña nyidimu yawu namuzañalu. w18.03 31 ¶15-16

Atwansi akulaña munjila yashiyashana; amakwawu akulaña swayi-swayi amakwawu nehi. Amakwawu ekalaña namaana akwiluka yuma nawa afwilaña kupapatishewa henohu achidi atwansi. Amakwawu akeñaña kupapatishewa neyi anakuliku dehi. Dichi, anvwali eluka chikupu chalumbuluka chipapatishu hiyakanjikijaña anyanawu kupapatishewaku. Ilaña, akwashaña mwana himwana kwesekeja nayaaka niwuswa wukwetiyi wakuhemba nsañu. Anvwali atiyaña kuwaha neyi mwanawu yeluka chalumbuluka mazu adi munsona yefuku dalelu. Hela chochu, atela kwanukaña mudimu wawu wakwilisha anyanawu kwikala atumbanji twaKristu. Chumichi chikuyiletesha anvwali kudihula nawu, ‘Komana mwanami nashikihu kudihana kudi Nzambi nikupapatishewa nansañu yinadiziyi?’ w18.03 9 ¶6

Neyi atutambika nawa twiteja, twatela kushikijamu. Muntu wunatutambiki wazata nañovu kudiloñesha, dichi neyi tubula kuyaku ñovu jindi jikuya mumenji. (Mat. 5:37) Amakwawu akanaña kuya kwayitambikiliwu hatachi kulonda ayi kunayitambikiwu kunamoniwu nawu kudi chiwahi. Komana chumichi chikumwekesha kukeña hela kalemesha? Twatela kwiteja yuma yidi yejima yinatuloñesheliwu namuchima wakusakilila. (Luka 10:7) Neyi kudi yuma yikuleñela tubuli kuya, tukumwekesha kukeña neyi tumulejamu chadimu manakwetu watutambikili. Chachiwahi cheñi mpinji yikwawu kulemesha yisemwa. Muyisemwa yikwawu, muntu nateli kuya hela amutambika wanyi; ilaña muyisemwa yikwawu chiña anakutambiki. Nawa muyisemwa yikwawu, muntu neyi anamutambiki wakaanaña kamu hela kayedi dinu hakwiteja; ilaña muyisemwa yikwawu neyi muntu yakaana namwekeshi kadiwu. Twitejeña neyi anatutambiki kulonda tuyitiyisheña kuwaha antu anatutambiki. w18.03 18 ¶20-21

Ilukenu nenu kwiluka hohu nsañu yamuBayibolu hikunateli kuletesha muntu kwikala wapama kuspirituku. (1 Anya. 4:29, 30; 11:4-6) Kubombela hakwiluka nsañu yamuBayibolu, chumanyi chikwawu chitwatela kwila? Twatela kutwalekahu kupama kuspiritu. (Kol. 2:6, 7) Hanu tunateli kushimata ñahi? Chuma chalema chatachi, hikudiza mukanda ‘waShakamenu Mukukeña kwaNzambi.’ Neyi mumanisha iwu mukanda mukwiluka chimunateli kuzatisha yishina yamuBayibolu muchihandilu chenu. Neyi mwamanisha dehi kudiza iwu mukanda, kwila mutachika kudiza mukanda wukwawu wakudizamu wunateli kuyikwasha kwikala ashimata muchikuhwelelu nehi? (Kol. 1:23) Komana mwalombaña hampinji yimunakutoñojoka chikupu chimunateli kuzatisha muchihandilu chenu nsañu yimunakudiza? Ilukenu nenu, chitunakudiza nikutoñojokahu chikupu, twatela kwikala namuchima wakufwila kumuzañalesha Yehova nikwovwahila nshimbi jindi. (Mas. 40:8; 119:97) Hampinji yoyimu, twatela kuzata nañovu kulonda tuleki yuma yejima yinateli kutukañesha kupama kuspiritu.—Tit. 2:11, 12. w18.02 24-25 ¶7-9

Hakwila twikali nachikuhwelelu neyi chaNowa, twatela kudiza Izu daNzambi, kuhemba yuma yitunakudiza nikwiteja kwiluka kutuwumbi nikutulombola. (1 Pet. 1:13-15) Kufumahu chikuhwelelu nimaana aNzambi akutukiña kutufuta twaSatana nikuspiritu yatama yamukaayi. (2 Kor. 2:11) Iyi spiritu yaleñelaña antu kukeña madombu niwuvumbi. Nawa yaleteshaña antu kufwila yuma yakumujimba. (1 Yow. 2:15, 16) Yinateli nikuletesha antu azeya kujinoka nawu ifuku deneni daNzambi dichidi kwakulehi. Ilukenu nenu Yesu chesekejeleñayi mafuku etu namafuku aNowa, hakonkomweneneña hamadombu nihawuvumbiku, ilaña hawubanji wakuspiritu. (Mat. 24:36-39) Dihulenu nenu: ‘Yuma yinelaña muchihandilu yamwekeshaña nawu namwiluka Yehova? Komana chikuhwelelu chami chankwashaña kulondela nshimbi jaNzambi nikujishimwina kudi antu amakwawu?’ Ñakwilu yenu yatela kumwekesha nawu chalala ninenu ‘mwendaña naNzambi.’—Kutach. 6:9. w18.02 9-10 ¶8-10

Tukutwesha wanyi kudaambula chikupu nawantu ekala nayilwilu yatama. Tunateli kuzata nawu, kuya nawu kushikola hela kushakama nawu. Ilaña twatela kubabala kuchina twakenda katachika kutoñojoka neyi wena nikwimbujola yilwilu yawu. Twatela kwila mwenimu kuhitila mukukolesha wuspiritu wetu kuhitila mukudiza Bayibolu nikwikala nawubwambu wawuwahi nawantu amukalakelaña Yehova. Twatela kuzata nañovu kulonda tukwasheña amakwawu ekali amabwambu jaNzambi. Tushimwineña mpinji yejima yinateleli, nikumulomba Yehova kulonda yayikwashi kuhosha yuma yayiwahi hampinji yatelela. Twatela kuyileja amakwawu netu tudi aYinsahu jaYehova. Neyi twila mwenimu, yilwilu yetu yayiwahi yikuleta kalemesha kudi Nzambi bayi kudi etuku. Atudizisha “kukaana yilwilu yakubula kumwakama Nzambi nikufwila kwayuma yamukaayi, nakutoñojoka mwamaana, nakulondela mwaya kuloña nikumwekesha yilwilu yakumwakama Nzambi muyinu nshakaminu yamakonu.” (Tit. 2:11-14) Neyi tumwekeshaña yilwilu yayiwahi, amakwawu akutumona nawa amakwawu anateli kuhosha nawu: “Tuyi nenu, muloña tunatiyi nawu Nzambi mwekala nindi.”—Zek. 8:23. w18.01 31 ¶17-18

Komana chatama kudikeña etu aweni? Inehi! Chatama wanyi, kudikeña etu aweni kwakuwahi nawa kwalema. Dichatuleñayi Yehova. Yesu wahosheli nindi: “Keñaku mukwenu neyi chiwadikeña eyi aweni.” (Maku 12:31) Neyi twadikeña wanyi etu aweni, hitunateli kukeña akwetuku. Twatañaña cheñi muNsona netu: “Amayala atela kukeña añodi jawu neyi chakeñawu nyijimba yawu aweni. Iyala wakeña ñodindi, wadikeña yomweni, muloña kwosi muntu wahelahu dehi mujimba windiku, ilaña wawudiishaña nikuwuhemba chiwahi.” (Efwes. 5:28, 29) Dichi chatama wanyi kudikeña munjila yayiwahi. Kukeña kwakudikeña etu aweni kwashimunawu ha 2 Timotewu 3:2 hikukeña kwakudimbana. Antu asweja kudikeña aweni, kakavulu atoñojokaña hohu yuma yakuditiyisha aweni kuwaha. (Rom. 12:3) Yuma yafwilañawu muchihandilu hikuditiyisha kuwaha. Akamenaña akwawu wanyi. Neyi yuma yinatami, enkaña akwawu nyiloña chatela eteji yuma yineliwu. Antu amuchidiwu ekala wanyi namuzañalu. w18.01 23 ¶4-5

Chineli kudiza kwahalwetu diyi njila yakumutiyilila Yehova, kulomba hinjila yakuhosha nindi. MukwaKristu watela wanyi kumona kulomba neyi hichidika hohu chamukunkulwayi; hela neyi ‘hiyitumbu’ yikumukwashaña muyuma yejima yikwilañayi kulonda yilumbulukeña. Ilaña, kulomba hikuhosha naNleñi yetu. Yehova nakukeña kutiya yuma yiwunakukeña. (Fwi. 4:6) Neyi wumona kukala kudi kwejima, londelaku kufumba kwamuBayibolu kwakwila nawu “umbilaku chiteli cheyi hadi Yehova.” (Mas. 55:22) Wunakuhweleli munawa mazu? Yihita yawamanakwetu niahela anamoni nawu awa mazu alala. Nineyi wunateli kumona neyi awa mazu alala! Kudi yuma yikwawu yiwatela kulomba chatela wulombeña hohu wukwashu kudi Yehova. Mpinji yikwawu tunateli kusha maana hakukala kutukweti chakwila tujimbala ninkisu jitukweti. Komana kwila wutoñojoka hayuma yisatu yiwatela kumusakililahu hefuku-hefuku nehi? Neyi wunayitoñojoki dehi, musakilili Yehova. w17.12 25-26 ¶10-11

Atudizi aBayibolu amavulu adihanaña kudi Yehova nikupapatishewa. Hakachi kawu hadi atwansi avwalikila muchalala nawa anatondihu njila yayiwahi yawumi. (Mas. 1:1-3) Neyi mudi nvwali mukwaKristu, chakadi nikujina mwatalilaña ifuku dakapapatishewayi mwanenu. (Esekejenu 3 Yowanu 4.) Anvwali akwaKristu, mwanenu watela kwiluka chikupu nsona jajila, munabombeli Nsona jachiHeberu niNsona jawakwaKristu jachiGriki. Anyana akweti wuswa washiyashana mukudiza yuma, ilaña nimwana wanyanya chikupu nateli kwiluka antu ninsañu yamuBayibolu. Kuloñesha kwaYehova kwaloñesha yitwa yayivulu yinateli kukwasha anvwali kudizisha anyanawu. Yitwanyi yimweluka yimukweti mwidimi denu? Anukenu nenu, kwiluka Nsona dikwaleteshaña muntu kwikala nawubwambu wakola naYehova. w17.12 18 ¶1; 19 ¶4

Neyi mwasumbuka nawa nfumwenu wabula kwitiya nakuyikabisha, mukwila ñahi? Komana mukuwahisha yuma neyi mumutadikishaña hayilwilu yindi? Hela chakwila wukwila yuma yimunakukeña, komana munateli kumubalumuna nakwinza muchalala? Kwakulehi. Ilaña neyi mwovwahilaña wumutu windi, munateli kuleta kuwunda muchisaka, mukumushimeka Yehova nawa munateli kumukoka nfumwenu mukudifukula kwalala, nawa wejima wenu munateli kutambwila isomu. (1 Pet. 3:1, 2) Indochu neyi ñodenu hetiyaku nawa nakuyovwahila wanyi, mukwila ñahi? Komana mukumukanjikija nenu yayilemesheña kuhitila mukumuzuwila nenu mudi mwanta hetala? Himukwila mwenimuku. Nzambi wakeñaña nindi mumwimbujoleña Yesu kuhitila mukuzatisha wumutu wenu munjila yakukeña. Yesu wazatishili wumutu windi chiwahi kuhitila mukukeña chipompelu chindi mukudiwunjika. (Luka 9:46-48) Iyala nateli kumukoka ñodindi mukudifukula kwalala neyi yamwimbujola Yesu. w17.11 28-29 ¶13-14

Yitoñojoka yamukaayi yatukojejaña kudiwula hela kusekesha nshimbi jaYehova nawa yazeyeshaña chikuhwelelu chetu chovu-chovu. Makonu, wejima wetu tweluka yitoñojoka yamukaayi. Muloña ayimwekeshaña hama TV, haintaneti, kumudimu nikushikola. Mumatuña amavulu, antu ahoshaña nawu amukuhwelela wanyi Nzambi; dikwila nawu hiyetiyaku. Hadaha kanda atoñojokeñahu dehi nawu kwekala Nzambi, ilaña ayikokolaña nayitoñojoka yakwila nawu anateli kwila yuma yinakeñiwu. (Mas. 10:4) Amakwawu adimonaña nawu asweja maana chahoshañawu nawu, “Nateli kushakama hohu chiwahi chakadi kuluwañesha hela chakwila hinamukuhwelela Nzambiku.” Komana yitoñojoka yawantu abula kwitiya yakwila nawu hikwekala Nleñiku, yalala? Muntu nateli kuluwankana neyi yasandujolaña nsañu yahosha hasayansi kutalisha kwafuma wumi. Henohu ñakwilu tuhu yapela. Neyi itala dakeñekaña wakudituña, indi yileñaleña yikweti wumi? w17.11 20-21 ¶2-4

Toñojokenu chichalemena kuwanika kuChanukishu. Anukenu nenu, kupompa kwachipompelu hinjila yimu yitwadifukwilañamu. Yehova niYesu eluka antu ejima azataña nañovu hakwila nawu awaniki kuniku kupompa kwahachaaka. Chakadi nikuhita mumbadi, tunakukeña eluki nawu twakawanika kuChanukishu, chiña hohu neyi yuma yinakali chikupu. Neyi tumwekesha muyilwilu yetu netu twalemesha kupompa, tukuletesha Yehova yabuli kufuta majina etu “mumukanda wakwanukaña nachu”—“mumukanda wawumi”—mudi majina awantu akatambwila wumi wahaya nyaaka. (Chim. 20:15) Mumafuku akutwala kuChanukishu, twatela kwikala nampinji yakulomba nikushinshika chidi wubwambu wetu naYehova.—2 Kor. 13:5. w18.01 13 ¶4-5

Itunduka wadiña wakiñewa neyi wudi mumusumba wakubatamina. Yehova wahosheli kutalisha kuniyi nyisumba nindi: “Yakekali nyikala yenu yakupulukila.” (Yosh. 20:2, 3) Yehova wakeñeleña wanyi nindi muntu wunajahañani amusompeshi cheñi, nawa hiyetejeleña mukwakutenda mashi kwiñila mumusumba nakujaha ona muntuku. Dichi itunduka wachinineña wanyi kumujaha. Yehova wamukiñileña hampinji yadiñayi mumusumba. Aka hikadiña kaleya kakubataminaku. Musumba wamukwashileña kuzata, kukwasha amakwawu nikumukalakela Yehova mukuwunda. Mwamweni, washakamineña chiwahi namuzañalu! Antu jaNzambi amakwawu avulumunahu dehi ilaña abalumuka mumuchima atiyiña neyi adi “mukaleya” muloña wanshidi yakoñeliwu, nikutiya neyi kwiji Yehova hakavulamena nshidi jawu jakoñeliwuku. Neyi dichimwatiyaña, mwani mwatela kwiluka nenu Yehova neyi nayanakeni, dikwila nawu chinahiti. w17.11 9 ¶6; 11 ¶13-14

Njila yamuchiyedi yitwaletelañamu kunuñañana hikwiluka chemenañaku yifwikija yitwazatishaña haChanukishu. Toñojokenu hakulema kwadinkendi dakadi iluñi nivinyu yichinana henohu ifuku daChanukishu kanda nihawufuku wekalañaku Chanukishu. (1 Kor. 11:23-25) Dinkendi demenañaku mujimba wakadi nshidi wahaniniyi Yesu nawa vinyu yemenañaku mashi indi apwekeli. Anukenu nenu ifutu danyiloña daKristu mwabombela yuma yiyedi yamwekeshaña kukeña kwabadika. Kukeña kwamwekesheliyi Yehova hakutwinka Mwanindi nikukeña kwamwekesheliyi Yesu hakuhana wumi windi hadetu. Kutoñojoka hakukeña kwamwekesheliwu kukutukwasha ninetu kuyimwekeshela kukeña. Kukeña kutwamukeña Yehova nikukeña kwamukeñawu akwetu akwakwitiya kudi neyi monji watukasawu ejima wetu nawa kwakoleshaña mpaanda yetu yakunuñañana. w18.01 14 ¶11

Yehova wayikeña chikupu antu nawa wayilemesha. Wafwilileña kuzatisha mashi aMwanindi kulonda twakamoni wamwinu wahaya nyaaka. (Yow. 3:16) Neyi Yehova wakañenyi kushikija yikaninu yindi, Diyabolu wadi kumutena Nzambi nindi hintwambi nawa hahanaña yuma yayiwahiku dikwila nawu chiyuulu chindi chatama. Nawa chadi kumwekesha nawu akwakudikaña ahoshaña mwalala hakwihula nawu: “Indi chikaninu chakwikalahu kwindi chakanawu chidi kudihi? Muloña kufuma tuhu mpinji yafwiliwu ankakulula jetu, yuma yejima yinatwalekihu kwikala neyi chiyadiña hampinji yatachikiliwu kuleña yuma.” (2 Pet. 3:3, 4) Dichi, Yehova wakahakwilaku chiyuulu chindi kuhitila mukwamwina antu ovwahila. (Isa. 55:10, 11) Kubombelahu, kukeña kwaYehova kwamwekeshaña nawu wukweti wuswa wakuyuula. Dichi tunakuhweleli netu wayikeña, wayilemesha nawa wayihamekaña ambuñindi.—Kwid. 34:6. w17.06 23 ¶7

Kufuma tuhu hampinji yelili Yehova yakani Chamwinu, wasonekawu haKutachika 3:15, Wamweni neyi iwu mulambu wawulambula dehi. Cheñi, chimwahitili yaaka 4,000, Yehova wadibondeli hakuhana Mwanindi wumu hohu akeñayi mukaayi. (Yow. 3:16) Twatiyaña kuwaha Yehova chamwekesheliyi kukeña kwakadi kudimbana. Twamwekeshaña kukeña kwakadi kudimbana muloña Nzambi watuleñeli neyi chochekalayi. Abeli wamwekesheli nindi wamukeñeli Nzambi chakadi kutwamba chalambwiliyi chuma chabadika chadiñayi nachu. (Kutach. 4:3, 4) Nowa wamwekesheli kukeña kwakadi kudimbana kuhitila mukuyishimwina antu nsañu yaNzambi hayaaka yayivulu hela chakwila kwosi wetejeli. (2 Pet. 2:5) Abarahama wamukeñeli Nzambi chikupu kubadika yomweni hampinji yamulejeliwu nawu yalambuli mwanindi Isaka. (Yak. 2:21) Kufwana awa amayala ashinshika, twatela kumwekesha kukeña hela chakwila tunakumona kukala. w17.10 7-8 ¶3-4

Kapristu muneni wadiña nakuyikolesha aIsarela nindi nshidi yawu akuyanakena, dikwila nawu Kapristu Muneni, Yesu wukutukolesha etu nindi anateli kututiyila “wushona niluwi lwasweja lwakutukwasha hampinji yatelela.” (Heb. 4:16) Hakwila nawu mubatami mudi Yehova, kuhwelelenu mumulambu waYesu. Nawa kuhwelelenu nenu ifutu danyiloña adihaninini enu nkawenu. (Ñal. 2:20, 21) Kuhwelelenu nenu nshidi jenu anateli kujanakena kushindamena hefutu danyiloña. Nawa kuhwelelenu nenu ifutu danyiloña dayinka kuchiñeja kwawumi wahaya nyaaka. Mulambu waYesu hichawaana chayinkayi Yehova. Yehova neyi natwanakeni nshidi jetu, hitwatela kutiya woma netu nakukeña njila yakutusompeshelamu cheñi nanshidi yitwakoñeliku. (Mas. 103:8-12) Mwamweni, twatela kukuhwelela netu Yehova natwanakeni. w17.11 11-12 ¶14-17

Hawufuku hadiileñawu Kuda kwaMwanta kwaMelela kwatachi, Yesu walombeli nindi atumbanji twindi akekali anuñañana neyi chanuñañanayi yena naTata yindi. Yehova nakuli kuna kulomba kwamwanindi akeñayi nawa mamiliyoni awantu anakuhweleli nawu Yehova watemesheli mwanindi. Chanukishu, dikupompa hohu kwapompañawu antu jaNzambi kwamwekeshaña hatooka nawu aYinsahu jaYehova anuñañana. Kumaluña amakwawu, nsakililu yikwawu yapompaña wanyi hamu nawantu akweti makowa ashiyashana nawa neyi apompa hamu ayidiwulaña kudi akwawu. Ilaña Yehova niYesu atiyaña kuwaha kunuñañana kwamuchidiwu! Etu aYinsahu jaYehova twahayamaña wanyi chitwekala anuñañana. Yehova niyena washimwineñahu dehi nindi twakekala anuñañana.—Ezek. 37:15-17; Zek. 8:23. w18.01 14 ¶7-9

“Antuñi,” hela netu anlomboli awaYudeya, amukaanini Mesiya. Amukaanini Yesu nawu hidiyi Kristuku. Nawa aYudeya amavulu amukaanini chakwila abidikileña nawu amujahi. (Luka 23:18-23) Mwamweni, diwu aletesheli Yesu amujaheña. Neyi Yesu amudiwili nikumujaha, hanu wekalili ñahi “ilola damwiwombu dahewulu”? Chumichi chadi kumwekana chiña hohu neyi amusañula nakuhanda cheñi. Kapostolu Petulu wahosheli hadi “Yesu Kristu wakuNazareta, owu imwajahilili hamutondu ilaña asañwiliwu kudi Nzambi kufuma mudi afu.” (Yil. 3:15; 4:5-11; 1 Pet. 2:5-7) Iwu Mwana asañwiliwu wekalili muntu wukweti ijina “mukachi kawantu mutunateli kuwana wamwinu.”—Yil. 4:12; Efwes. 1:20. w17.12 9-10 ¶6-9

Yesu wahosheli kutalisha halukadi lwasweja lunakwinza nindi: “Akamona Mwana kamuntu nakwinza hamavu amwiwulu nañovu nikulema kwasweja. Cheñi, [Yesu] wakatemesha añelu jindi nampuña yasweja kuvuma nawa wena akapompesha hamu antu indi atondewa.” (Mat. 24:29-31) Iku ‘kupompesha kwawantu atondewa’ kwahosha hampinji yikatambwilawu akwaKristu ejima awayishewa achidi heseki wuloku wawu wamwiwulu. Chumichi chikamwekana kumatachikilu alukadi lwasweja henohu njita yaAmagedoni kanda yitachiki. Kuhiñahu dinu a 144,000 ejima akazatila hamu naYesu kujilumuna anyanta ahamaseki. (Chim. 17:12-14) Chanukishu chanakanañawu haniyi mpinji yakapompeshañawu awayishewa nakuya mwiwulu dichakekala chakukumishaku, muloña Yesu wakela ‘wenza’ dehi. w18.01 16 ¶15

Mwiwulu mwadiyi Yesu, washakamaña “haya nyaaka nanyaaka” chakubula kutoka. (Chim. 1:5; Rom. 6:9; Kol. 1:18; 1 Pet. 3:18) Walejeli apostolu indi ashinshika nindi akayuula hamu nindi mwiwulu. (Luka 22:28-30) Pawulu wasonekeli nindi “Kristu amusañula kufuma mudi afu, dichi yena diyi mukabu watachi wanowu anaholokeli mutulu twakufwa.” Pawulu wamwekesheli cheñi nindi kudi amakwawu akasañuka nakuya mwiwulu chahosheliyi nindi: “Muntu-himuntu akamusañula kwesekeja nandonda yindi: Kristu diyi nyikabu yatachi, kuhiñahu antu jaKristu akayisañula hampinji yakwikalahu kwindi.” (1 Kor. 15:20, 23) Kufuma mu 1914, tunakushakama mumpinji yateneniyi Yesu nindi “kwikalahu kwindi.” Kwikalahu kwindi kunatwalekihu, nawa kukuma kwanshakaminu yamakonu kudi mukamwihi chikupu. w17.12 10-11 ¶11, 14-16

Tata yetu wasweja luwi niyena wajimbeshahu dehi antu akeñayi adi neyi, Abarahama, Isaka, Yakoba, Mosi niMwanta Davidi. (Kuch. 12:6-8; Mat. 22:31, 32; Yil. 13:22) Izu daNzambi datulejaña nawu Yehova nakufwila chikupu nindi yakayisañuli. (Yoba 14:14, 15) Akazañalala nawa akekala nanyijimba yakola. Shinshikenu cheñi hadi Mwanindi asweja kukeñayi ‘wamutiyishilaña kuwaha hefuku-hefuku,’ wafwili kufwa kwayeña. (Yish. 8:22, 30) Tukutwesha wanyi kulumbulula chatiyiliyi Yehova. (Yow. 5:20; 10:17) Tunateli kukuhwelela chikupu netu Yehova wakatukwasha. Bayi tushintajala kumulejamu mukulomba chakufuma hamuchima chitunakutiyaku. Twakundejewaña chikupu kwiluka netu Yehova weluka chitwatiyaña nawa watukundejaña!—2 Kor. 1:3, 4. w17.07 13 ¶3-5

Makonu, yihita yawantu yinakwinza mukudifukula kwalala nawa yinakuhana ‘yuma yawu’ chakufuma hamuchima. Yinakuhana mpinji, ñovu nimaheta awu kulonda akwashi kutuña tembeli yaYehova yakuspiritu. (Yish. 3:9) Yehova wakajimbala wanyi nyidimu nikukeña kutwamumwekeshelaña. Yuma yituneli hakukwasha kudifukula kwalala yinakumwekesha hatooka nawu Yehova natukiswili nawa Kristu diyi wunakulombola. Tudi mukuloñesha kwakiñewa nawa kwahaya nyaaka. Nkeñelu yaYehova kutalisha kukudifukula kwalala ‘yikashikijewa.’ Lemeshenu mudimu wumunakuzata mukuloñesha kwaYehova, nawa ovwahilenuña “izu daYehova Nzambi yenu chakushaku muchima.” (Zek. 6:15) Neyi mukwila mwenimu akuyikiña kudi Mwanta wetu nawa Kapristu Muneni nikudi añendeshi amakalu amwiwulu. Zatenu nañovu kulonda mukwasheña kudifukula kwalala. Neyi mwila mwenimu, mukumona Yehova wamazaza chikuyikiñayi munanu mafuku anshakaminu yamakonu nihaya nyaaka. w17.10 30 ¶18-19

Katataka yuma yejima yamukaayi kaSatana, mapolitiki, jinsakililu ninsañu yakulanda nakulandulula jimani. Kaprofwetu Ezekeli niZefwaniya ashimwineñahu dehi nawu wuru nasiliva, hashindamena maheta amukanu kaayi, jikekala jamukunkulwayi. (Ezek. 7:19; Zef. 1:18) Twakatiya ñahi neyi tushika kumakumishilu akanu kaayi nawa twiluka netu twadiña nakuhemba ‘maheta abula kuloña’ amukanu kaayi chatela tuhembeña maheta alala? Twadi kutiya neyi iyala wazatilili mali amavulu muchihandilu chindi chejima, hakwinza nakwiluka nindi awa mali amukunkulwayi. (Yish. 18:11) Maheta amuchidiwu akamana, dichi zatishenuña maheta imukweti kulonda ‘mukwati amabwambu’ mwiwulu. Yuma yejima yitwelaña hakukwasha Wanta waYehova yatukwashaña kwikala namaheta akuspiritu. w17.07 11 ¶16

AkwaKristu amakwawu elahu dehi nshidi yahamesu bwi-i afwilaña kusweka nshidi jawu nawu abuli kusawuka hela kuneñesha amakwawu. (Yish. 28:13) Ilaña, yitoñojoka yamuchidiwu yatama, yakisañanaña muntu wunavulumuni niantu amakwawu. Yinateli kukañesha spiritu yaNzambi kukwasha chipompelu nawa chikwikala mukuwunda wanyi. (Efwes. 4:30) Kukeña kwalala kukusañumuna akwaKristu akoñahu dehi nshidi yamaneni kushimuna kudi aeluda kulonda ayikwashi. (Yak. 5:14, 15) Kukeña dichilwilu chabadika hayilwilu yejima. (1 Kor. 13:13) Dichilwilu chatwilukilañawu antu nawu tudi atumbanji twaYesu nawa akwakumwimbujola Yehova, Ntachiki yakukeña. Pawulu wasonekeli nindi: “Neyi . . . nikweti wanyi kukeña, dikwila nawu nidi wamukunkulwayi.” (1 Kor. 13:2) Tutwalekenuhu kumwekesha kukeña, bayi ‘mumazu’ hohuku ilaña ‘nimunyidimu nimuchalala.’—1 Yow. 3:18. w17.10 11 ¶17-18

Yosefu wamwekesheli kuhamuka hampinji yakeñeleñayi ñoda Potifwari kwila nindi wuvumbi. Hadaha watela watoñojokeli nindi neyi yamukaana mwadi kufuma yuma yatama. Hela chakwila welukili nindi mukufuma yuma yatama, wamwekesheli kuhamuka nawa wamutemukili. (Kutach. 39:10, 12) Rahaba niyena wamwekesheli kuhamuka. Hampinji yelili akwakwendesha ituña awaIsarela enzi kwitala dindi kuYeriku, kachi watiyili woma nakuyihaña. Ilaña wamukuhweleleli Yehova nawa wamwekesheli kuhamuka hakuyisweka awa mayala ayedi nikuyileja chakutemuka. (Yosh. 2:4, 5, 9, 12-16) Kuhamuka kwamwekesheliyi Yesu kwayikwashili niwena kwikala ahamuka. Apostolu atwalekelihu kushimwina mwijina daYesu hela chakwila ayikañesheleña kudi aSadusi. (Yil. 5:17, 18, 27-29) Yosefu, Rahaba, Yesu niapostolu indi adikwatishili chikupu kulonda azati nyidimu yayiwahi. Bayi neyi amwekesheli kuhamuka muloña adishindameneniku. Ilaña ashindameneni hadi Yehova. Twatela kushindamena hadi Yehova chatela tudishindameneña etu aweni.—2 Tim. 1:7. w17.09 29 ¶6-9

Muntu hanatweshi kuvuula wuntu wawukulu nañovu jindi yomweniku. Kakavulu, antu elili mwenimu azatili nañovu hakwila nawu aleki yilwilu yawu yatama. Atwesheli kwila mwenimu muloña enzunwini nyichima yawu niyitoñojoka yawu kulonda Izu daNzambi nispiritu yindi yajila yiyikwashi. (Luka 11:13; Heb. 4:12) Hakwila nawu Izu daNzambi nispiritu yajila yitukwashi, twatela kutaña Bayibolu mafuku ejima nikutoñojokahu. Twatela cheñi kutwalekahu kulomba maana niñovu kulonda tuzatisheña kufumba kwamuBayibolu. (Yosh. 1:8; Mas. 119:97;1 Tesa. 5:17) Twahetelaña cheñi Mwizu daNzambi nispiritu yajila neyi tuloñeshaña nikuyaña kukupompa kwachipompelu. (Heb. 10:24, 25) Kubombelahu, twatela kuda yakuda yakuspiritu yitukweti yaloñeshelañawu antu jaNzambi mukaayi kejima. (Luka 12:42) Hela chakwila akwaKristu atela kuvuula nikuleka yilwilu yatama, ilaña diyi yuma hohu yakeñekaña hakwila nawu Nzambi yatutiyi kuwahaku.—Kol. 3:10. w17.08 21 ¶16-17

Mwanta Davidi niyena amwilili chatama. Davidi amuwayishili kudi Yehova iku wuchidi kansi kulonda yakekali mwanta wawaIsarela. Wahembeleleli hadi yaaka 15 hakwila nawu yekali mwanta wamutaña wawu. (2 Sam. 2:3, 4) Hadiña nakuhembelelayi, mpinji yimu Mwanta Sawulu wabula kushinshika wakeñeleña kumujaha. Dichi, Davidi watemukili. Wayili nakushakama mwituña dacheñi nawa mpinji yikwawu wakaamineña mumayeñu muyinkalampata. Nichelili Sawulu anamujahi dehi kunjita, Davidi wahembeleleli yaaka 7 hakwila nawu yekali mwanta wamuza wawaIsarela. (2 Sam. 5:4, 5) Muloñadi Davidi chahembeleleliyi mukudiwunjika? Davidi wamukuhweleleli Yehova muloña waluwi lwindi. Wadiña nakuhembelela kumupulwisha nawa watoñojokeleña chamukwashiliwu kudi Yehova. (Mas. 13:6) Davidi wamweni nindi welili chiwahi kuhembelela. w17.08 6 ¶14-15

Idimi dahimpaña mukuhita kwayaaka. Mazu ninhoshelu yahimpaña nakutachika kutalisha mwacheñi. Hadaha munateli kutoñojoka hamazu amakwawu anahimpi mwidimi dimwahoshaña. Madimi azatishiliwu hakusoneka Bayibolu chiHeberu nichiGiriki, niwena ahimpa. ChiHeberu nichiGiriki chinakuhoshawu makonu chinambuki chikupu nachahoshelañawu kunyima hasonekeleñawu Bayibolu. Hakwila nawu antu ejima kubombelahu nianakuhosha chiHeberu hela chiGiriki atiyishishi Izu daNzambi, atela kutaña Bayibolu yabalumunawu. Antu amakwawu atoñojokaña nawu atela kudiza chiHeberu nichiGiriki chahosheleñawu kunyima hakwila nawu atañileña Bayibolu mwidimi muyayisonekeliwu. Hela chochu, chumichi hichinateli kuyikwashaku. Twasakililaña muloña Bayibolu anayibalumuni yamukuma hela yachibalu kwakwihi namadimi 3,000. Mwamweni Yehova nakukeña “akwanyuza yejima, akwanyichidi yejima” adizi Izu dindi. (Chim. 14:6) Komana chumichi kwila chiyikwasha kuswina kwakwihi naNzambi wakukeña nawa wabula chaambu nehi? w17.09 19 ¶4

Neyi mukwetu mukwaKristu hela ntaña yetu yaluwañesha, kudiwunjika neyi cheliliyi Yosefu kukuyikwasha kubula kwila mwaluwa. Neyi mukweti ntaña ahañawu muchipompelu, mwatela kudihemba kulonda mubuleña kuvula kuhosha nindi. Kudihemba munsañu yamuchidiwu kwakala, ilaña tunateli kudihemba neyi tumwimbujola Nzambi chadihembañayi nawa neyi tunakulondela kufumba kwindi. Muntu wadihembeli wadiña Mwanta Davidi. Wadiña nawuswa, ilaña hazatishili wuswa windi chatama hamuvulokeliwu kudi Sawulu niShimeyiku. (1 Sam. 26:9-11; 2 Sam. 16:5-10) Davidi hadihembeleña mpinji yejimaku, neyi chituneluki wakoñeli nshidi naBatisheba nichuma cheliliyi kutalisha hadi Nabali wadiña nalwisu. (1 Sam. 25:10-13; 2 Sam. 11:2-4) Hela chochu, kudi yuma yayivulu yitunateli kudizila kudi Davidi. Chatachi, atulama ejima alombolaña antu jaNzambi atela kwikala asoñama kulonda abuleña kuzatisha wuswa wawu munjila yatama. Chamuchiyedi, kwosi watela kudishindamenaku, nakutoñojoka nindi hanateli kumona kwesekaku.—1 Kor. 10:12. w17.09 5-6 ¶12-13