November

Makonu, antu amavulu amonañawu nawu akweti maana adiwulaña kufumba kwamuBayibolu. Ahoshaña nawu neyi wumonaña antu amakwawu neyi alema kubadika eyi, akukumonaña nawu wudi wamukunkulwayi nawa akukabishaña. Yumanyi yinafumi muyilwilu yatandishaña kaayi kaSatana? Komana antu asweja kudikeña aweni adi namuzañalu? Komana yisaka yawu yikweti muzañalu? Akweti wubwambu wawuwahi naNzambi? Mukumona kwenu, mudihi mwafumaña yuma yayiwahi, kulondela maana amukanu kaayi tahindi maana ekala Mwizu daNzambi? (1 Kor. 3:19) Antu alondejaña maana awantu amonañawu mukanu kaayi nawu akweti maana, adi neyi mukwakwenda wunakwihula mukwawu mukwakwenda njila yatela kuyayi henohu wejima wawu anajimbelimu. Yesu wahosheli kutalisha hadi ‘akwamaana’ amumafuku indi nindi: “Hiyanlomboli amputamesu. Muloña neyi mputamesu yalombola mukwawu mputamesu, wejima wawu akuholokela mwibuku.” (Mat. 15:14) Chalala, Nzambi wamonaña maana amukanu kaayi nindi hiwusupi. w19.05 24-25 ¶14-16

Makonu, antu anakuda kuyifwikija haChanukishu anakuvulilaku. Komana twatela kwakamena? Inehi. “Yehova weluka antu jindi.” (2 Tim. 2:19) Kwambukaku naYehova, amanakwetu achindaña antu adaña kuyifwikija haChanukishu elukaña wanyi muntu wawayishewa. Dichi kuvula kwawantu adaña munabombeli ninana atoñojokaña nawu awayishewa henohu awayishewa wanyi. Chakutalilahu, antu amakwawu adiileña enjili nakuleka. Amakwawu akata munyitu nawa akuhwelelaña nawu akayuula hamu naKristu mwiwulu. Kuhosha hohu chalala, hituneluki kuvula kwawantu awayishewa achidi hamasekiku. Yesu wakawana awayishewa kumaluña ashiyashana hakenzayi nakuyitwala mwiwulu. Bayibolu yamwekeshaña cheñi nawu kumafuku akukuminina, awayishewa akawanawu hamaseki akekala antesha. (Chim. 12:17) Ilaña yashimuna wanyi kuvula kwawawayishewa akashalahu hampinji yakatachika lukadi lwasweja. w20.01 29-30 ¶11-13

Yesu wazatishili chakutalilahu chamwana wajimbeli nakumwekesha chakeñayi Yehova anyanindi. (Luka 15:11-32) Tata yawantu munichi chakutalilahu wakuhweleleli nindi mwanindi wakafunta. Mwana chafuntiliyi, tata yindi wamutambwilili namuzañalu. Neyi tunavulumuni kudi Yehova ilaña tubalumuka mumuchima, twatela kukuhwelela netu Tata yetu wukweti kukeña wadiloñesha kutwanakena. Tata yetu wakafumishahu kutama kwejima kwaletayi Adama. Chelili Adama yadikañi, Yehova wafukwilihu kutonda a 144,000 mukachi kawantu kulonda akekali anyanta nawa atupristu mwiwulu hamu naMwanindi. Mwituña dadiha, Yesu nia 144,000 akakwasha antu ovwahila kwikala awanina. Hanyima yakuhita mukweseka kwakukumishaku, Nzambi wakayinka wumi wahaya nyaaka. Kuhiñahu dinu Tata yetu wakazañalala hakumona kaayi kanenzali nawantu awanina. Iyi mpinji yakawaha chikupu. w20.02 6-7 ¶17-19

Wejima wetu twatela kudihula netu, ‘Komana inakuhimpa kulonda nimwekaneña hohu kumesu awantu nami nidi mukwaKristu tahindi inakuhimpa mumuchima kulonda nikali mukwaKristu walala?’ Chalema kuhimpa. Yesu wateneni chuma chitwatela kwila haMatewu 12:43-45, mazu adi haniyi nsona atudizishaña chikuma chalema: Twatela kufumisha yitoñojoka yatama mudi etu nakuhiñishamu yitoñojoka yaNzambi. Komana chapela kuhimpa wuntu wetu wamukachi? Izu daNzambi dakula nawu: “Vwalenu wuntu wawuha waleñeliwu kwesekeja nankeñelu yaNzambi mukuloña kwalala nimukashinshi.” (Efwe. 4:24) Eña, chapela kuhimpa wuntu wetu wamukachi, ilaña chaswayi wanyi. Bayi neyi twatela kukumina dakukaana yitoñojoka yakufwila nikuleka kwila yuma yatamaku. Ilaña twatela kuhimpa “muyitoñojoka nimuyilwilu [yetu].” Chumichi, munabombeli kuhimpa yitoñojoka yakufwila, yilwilu nimuloña waweni wutwelilaña yuma. Chakeñekaña kutwalekahu kuzata nañovu kulonda tuhimpeña. w19.06 9-10 ¶6-7

Yehova wamutiyilili Loti wushona nakumutemeshela añelu kuya nakumupulwisha hamu nichisaka chindi. Hela chochu, Loti “yena chalabajalayi.” Dichi añelu amukwatili kuchikasa chindi bapi nawa amukwashili yena nichisaka chindi kufuma mumusumba. (Kutach. 19:15, 16) Dichi añelu amulejeli kutemukila kumpidi. Ilaña chatela yamwovwahili Yehova, Loti walombeli kuya mumukala wadiña kwakwihi. (Kutach. 19:17-20) Yehova wamutiyilili nawa wamwitejeli kuya kuniwu mukala. Kuhiñahu Loti watiyili woma kushakamamu nawa wayili kumpidi, kwiluña damulejeliwu kudi Yehova hakusambila nawu yayi. (Kutach. 19:30) Yehova wadiwunjikili chikupu. Kufwana Loti, manakwetu hela muhela nateli kufuukula mwaluwa nikudiletela kukala kwasweja. Neyi chuma chamuchidiwu chimwekana, tunateli kwila ñahi? Hadaha tunateli kutachika kumuleja netu nakwañula yuma yakuwiliyi, chinateli kwikala chalala. (Ñal. 6:7) Hela chochu, twatela kumukwasha. Chinateli kuwaha neyi tumukwasha neyi chamukwashiliwu Loti kudi Yehova. w19.06 20-21 ¶3-5

Neyi ayilumbu jetu alekesha kudifukula kwetu, akeñaña kututiyisha woma kulonda tuleki kumukalakela Yehova. Anateli cheñi kutandisha nsañu yamakudi hadi etu, kutemesha antu jawu kulonda atalatali mumatala etu, kututwala kuyota nikukasa amakwawu hakachi ketu. Atoñojokaña nawu tukutiya woma neyi akasahu amakwawu mutuleya. Neyi tutachika kuyitiya woma, tukuleka kudifukula kudi Yehova. Tunakukeña wanyi kwikala neyi antu ashimunawu haAlevi 26:36, 37. Hitukwiteja woma kutulekesha kumukalakela Yehovaku. Twamukuhwelela chikupu Yehova nawa hitukutiya womaku. (Isa. 28:16) Twalombaña wukwashu kudi Yehova. Tweluka netu nawukwashu windi kwosi hela nfulumendi yikweti ñovu yinateli kutukañesha kudifukula kudi Nzambi yetuku. Chatela atutiyishi woma, makabisha anateli kutukwasha kutwalekahu kumukalakela Yehova. w19.07 9-10 ¶6-7

Hela chakwila kanda muwani muntu wakudizisha, bayi muleka kukeñakeña anakukeña kwikala atumbajiku. Mwatela kwanuka nenu Yesu wesekejeli mudimu wakwilisha atumbanji nawayibinda anshi. Ayibinda anshi azataña maora amavulu henohu kanda akwati inshi. Kakavulu azataña nawufuku hela nantetemena nankashi nawa mpinji yikwawu endaña maluña amalehi hamenji. (Luka 5:5) Munjila yoyimu, akwakushimwina amakwawu azataña maora amavulu ‘hakukeñakeña’ antu mukudiwunjika hampinji jambokamboka nikumaluña ashiyashana. Muloñadi? Kulonda atweshi kuwana antu amavulu. Antu azataña nañovu ekalaña nakukoleka kwakuwana antu amavulu akweti mpwila yakudiza chalala. Kwila mweseka kushimwina hampinji yimunateli kuwana antu hamatala hela heluña dimunateli kuyiwana nehi? Muloñadi chichakeñekelaña kwikala adiwunjika hakulombola atudizi aBayibolu? Muloña wumu wudi wakwila nawu twatela kuzata nañovu chatela tukumineña hohu dakukwasha kadizi kwiluka nikukeña nsañu yamuBayibolu. Twatela kumukwasha kadizi kulonda yamwiluki nikumukeña Yehova, Nsoneki yaBayibolu. w19.07 18-19 ¶14-15

Etu amakwawu twafwilaña kuleka kudinka nyiloña hanshidi yitwakoñeli kunyima. Neyi twadinkaña nyiloña, chinateli kuwaha neyi tutachika kudiza hansañu yefutu danyiloña dahaniniyi Kristu. Neyi tudiza, kutoñojokahu chikupu nikulombelahu chikupu hansañu yitunakudiza yakukolesha, chikutukwasha kuleka kudinka nyiloña. Tunateli nikuleka kudinka nyiloña hanshidi yatwanakenayi dehi Yehova. Shinshikenu hayuma yikwawu yitunateli kudizila kudi Pawulu. Amakwawu aleka nyidimu yawu yamali kulonda azatiku nyidimu yaYehova. Dichi bayi tufwilaña yuma yejima yitwaleka dehiku. (Kuch. 11:4-6; Mukwa. 7:10) “Yuma yakunyima” mwabombela nyidimu yitwamukalakeleli Yehova hela makabi itwomikili kunyima. Hela chochu, neyi tutoñojoka chatukwashiliyi Yehova kunyima, tunateli kuswina kwakwihi naTata yetu. Nawa, tunakukeña wanyi kutoñojoka netu yuma yitunamukalakeli Yehova yinavuli.—1 Kor. 15:58. w19.08 3 ¶5-6

Tunateli kulomba kudi Nzambi yetu kala mpinji, hichidi namuloña nakutudiku. Yena hakasikaku, ilaña wakeñaña kutiya kulomba kwetu. Neyi twiluka netu Yehova watiyaña kulomba kwetu, twaswinaña kwakwihi nayena. Ñimbi yamasamu wahosheli nindi, ‘Ami namukeña Yehova muloña watiyaña izu dami.’ (Mas. 116:1) Tata yetu watiyaña kulomba kwetu nawa wakwakulaña. Kapostolu Yowanu watuleja nindi: “Chuma chejima chitunateli kumulomba [Nzambi] kwesekeja namwaya nkeñelu yindi, yena watutiyaña.” (1 Yow. 5:14, 15) Hela chochu, Yehova hanateli kwakula kulomba kwetu munjila yitunakuhweleliku. Weluka yuma yinateli kutukwasha, dichi mpinji yikwawu ñakwilu yindi yinateli kwikala inehi hela wukukeña nindi tuchiñilili. (2 Kor. 12:7-9) Yehova watwinkaña yuma yitunakukeña. Welaña yuma yakeñañayi nindi atata jawantu eleña. (1 Tim. 5:8) Wayinkaña anyanindi yuma yinakukeñawu. Hakeñaña nindi twakameneña hayakuda, yakuvwala hela hakukamaku. (Mat. 6:32, 33; 7:11) Chineli hinvwali wukweti kukeña, Yehova wakatwinka yuma yejima yitukakeñaña kumbidi. w20.02 5 ¶10-12

Bayi neyi antu ejima akweti kuchiñeja kwakushakama mwiwulu ekala ‘nduñu wamaana nikashinshiku.’ (Mat. 24:45-47) Neyi chochadiña mumafuku awapostolu, makonu Yehova niYesu anakuzatisha antu antesha kulonda adiishi hela kudizisha antu amavulu. Mumafuku awapostolu akwaKristu awayishewa antesha hohu diwu azatishiliwu kusoneka Nyikanda yachiGiriki yawakwaKristu. Makonu, akwaKristu awayishewa antesha hohu diwu akweti mudimu wakwinka antu jaNzambi ‘yakuda hampinji yatelela.’ Yehova wafuukulahu kwinka antu jindi amavulu hanu hamaseki wumi wahaya nyaaka niantu antesha akayuulaña naYesu mwiwulu. Yehova wayinkaña ambuña indi wuloku, ‘kaYudeya’ ‘niamayala ikumi,’ nawa wakeñaña nindi wejima wawu ovwahileña lushimbi lwolumu nikwikala ashinshika. (Zek. 8:23) Wejima wawu atela kwikala adizoza. Ejima wawu atela kumukalakela Nzambi hamu nikwikala anuñañana. Nawa ejima atela kutwalekahu kuleta kuwunda muchipompelu. Chitunakuswila kwakwihi nakukuma kwakaayi, tutwalekihu kumukalakela Yehova nikulondela Kristu neyi “mukanka wumu.” w20.01 31 ¶15-16

Hitunateli kukanjikija antaña jetu kwiteja nsañu yayiwahiku, ilaña tunateli kuyikolesha kutoñojoka nikwiteja nsañu yamuBayibolu. (2 Tim. 3:14, 15) Lekenu yilwilu yenu yiyihakwiliku. Kakavulu antaña jetu amonaña yuma yitwelaña kubadika yitwahoshaña. Twalekenuhu kweseka kukwasha antaña jenu. Yehova watuleja chuma chitwatela kwila. ‘Kakavulu’ wayinkaña antu kukooleka kwakwiteja nsañu yayiwahi kulonda akatambwili wumi wahaya nyaaka. (Yere. 44:4) Nawa kapostolu Pawulu wamulejeli Timotewu kutwalekahu kukwasha amakwawu. Muloñadi? Muloña mukwila mwenimu, wadi kudamwina yamwini niantu amutiyilileña. (1 Tim. 4:16) Twakeña antaña jetu, dichi tunakukeña eluki chalala chidi Mwiizu daNzambi. w19.08 14 ¶2; 16-17 ¶8-9

Twatela kwanukaña netu neyi mukwetu natufumbi dikwila nawu tunaluwañeshi hela chakwila etu aweni tuneluki wanyi. Hampinji yamuchidiwu, hadaha tunateli kushikena kukaana kufumba. Tunateli kutachika kumutoobela muntu wunatufumbi hela mazu ahoshayi. Ilaña neyi twadizoza, tukumwekesha yilwilu yayiwahi. Muntu wadizoza wetejaña neyi anamufumbi. Chakutalilahu: Fwikijenu mudi kukupompa kwawakwaKristu. Hanyima yakuhanjeka nawakwenu akwakwitiya, mukwenu hakuyitwala hambadi nawa hakuyila nindi mumazewu munakakeli yakuda. Chakadi nikujina munateli kutiya nsonyi. Ilaña, munateli kumusakilila hakuyilejaku. Kuhosha hohu walala, mukutoñojoka nenu chiña anleja hakusambila. Munjila yoyimu, neyi mukwetu mukwakwitiya nahamuki hakwinza nakutufumba twatela kumusakilila nikumumona netu himukwetu watukeña, bayi chilumbu chetuku.—Yish. 27:6; Ñal. 4:16. w19.09 5 ¶11-12

Yehova wayinka amama jawantu mudimu walema muchisaka nawa wayinka niwuswa hadi anyanawu. Dichi, yuma yelañayi mama yawantu niyahoshañayi yinateli kuyikwasha anyanindi muchihandilu chawu chejima. (Yish. 22:6) Talenu yuma yinateli kudizilawu amama jawantu kudi Mariya mama yaYesu. Mariya welukili Nsona chikupu. Wamulemesheli chikupu Yehova nawa wadiña nawubwambu wakola naYehova. Welili yuma yejima yamulejeliwu kudi Yehova hela chakwila yumiyi yahimpili chihandilu chindi chejima. (Luka 1:35-38, 46-55) Amama jawantu munateli kumwimbujola Mariya munjila jajivulu. Munjilanyi? Chatachi, mwatela kukolesha wubwambu wenu naYehova kuhitila mukudiza Bayibolu halwenu nikulomba nkawenu mafuku ejima. Chamuchiyedi, mwatela kuhimpa yilwilu yenu kulonda mumuzañalesheña Yehova. w19.09 18 ¶17-19

Kapostolu Yowanu mukukala, Nzambi wamumwekesheleli chimwenu chayuma yikamwekana kumbidi. Munichi chimwenu, kañelu walejeli añelu awana kukwatisha mpepela yalukadi lwasweja yakujilumuna sampu analamiki dehi anduñu. (Chim. 7:1-3) Idi izanvu, hiya 144,000, akayuula naYesu mwiwulu. (Luka 12:32; Chim. 7:4) Dichi Yowanu wateneni cheñi izanvu dikwawu deneni, chakwila wahosheli nindi: “Nami nitali,” awa mazu anakumwekesha nawu wahayamini chikupu nachuma chamweniyi. Yowanu wamwenidi? Wamweni “izaza deneni dakwila kwosi muntu niwumu wadi kutwesha kudichinda, dawantu afumini kunyuza yejima, kunyichidi yejima, kudi antu ejima nikumadimi ejima, anemani kumbidi yetanda nikumesu aMwana kaMukoku.” (Chim. 7:9-14) Yowanu wazañaleli chikupu hakwiluka nindi kumbidi kwakekala antu amavulu akadifukulaña kudi Nzambi muwalala. Chakadi nikujina ichi chimwenu chakolesheli chikuhwelelu chaYowanu. Nawa chikukolesha cheñi chikuhwelelu chetu muloña chinakundami kumafuku akukuminina itunakushakamamu. Makonu, antu amavulu anatachiki kudifukula kudi Yehova nawa akweti kuchiñeja kwakushakama hamaseki haya nyaaka. w19.09 26 ¶2-3

Fwikijenu nyuza dihu hiyinabidiki mbila iyashimwineñahu dehi yakwila nawu “kuwunda nikukiñewa.” Akadisamba nawu mukaayi munekali dehi kuwunda. Nyuza yikakeñaña tukatoñojoki netu anamanishi dehi kukala mukaayi. Ilaña hiyakatwesha kukañesha yuma yikalondelahuku. “Babiloni Muneni” akamujilumuna. (Chim. 17:5, 15-18) “Nzambi [wukasha] munyichima yawu kulonda akakoñi mwaya nkeñelu yindi.” Nkeñelwinyi yeniyi? Yakujilumuna kwitiya kwakutwamba kwejima, kushilahu niKristendomu. Nzambi wakasha nkeñelu yindi munyichima ‘yanseñu 10’ ‘yakanyama wamwisaña chisumi wuchinana nge-e.’ Nseñu 10 yinakwimenaku jinfulumendi jejima jikweti ñovu jakwashaña “kanyama wamwisaña,” dikwila nawu United Nations. (Chim. 17:3, 11-13; 18:8) Neyi awa matuña akweti ñovu anabalumukili dehi kwitiya kwakutwamba dichinjikijilu chikamwekesha nawu lukadi lwasweja lunatachiki. Yikekala himpinji yakutiyisha antu woma hamaseki. w19.10 14 ¶1, 3

Mumafuku awapostolu, Diyotefwesi watiyilili ichima ana adiña nakulombola muchipompelu chawakwaKristu. Wakeñeleña “kwikala watachi” hakachi kawantu adiña muchipompelu, dichi watandishileña nsañu yamakudi hadi Yowanu niamanakwetu adiña nakulombola kulonda antu aleki kuyilemesha. (3 Yow. 10) Hela chakwila hitukwila neyi chelili Diyotefwesiku, ninetu tunateli kutachika kutiyila akwetu akwaKristu ichima neyi anayinki mudimu wutwakeña, sweje neyi twiluka netu ninetu tweluka kuzata owu mudimu hadaha nikuyibadika. Ichima didi neyi matahu avumbishaña. Neyi ichima ditachika tuhu mumuchima wetu, chinateli kwikala chakala kudifumishamu. Ichima dasañumunaña yilwilu yikwawu yidi neyi lwisu, kudinka wanta, nikudikeña. Ichima dinateli kukañesha yilwilu yayiwahi yidi neyi kukeña, wushona niluwi. Neyi ichima ditachika kutaanda mudi etu, twatela kudifumisha swayi-swayi mumuchima wetu. w20.02 15 ¶6-7

Kapostolu Pawulu watalishili mukwila nindi wamweni kukala kwaniwu muchidi. Wahosheli nindi iku kukala kwadiña neyi “kañelu kaSatana” kadiña ‘nakumweta jimbañala.’ Hadaha Satana niañelu jindi hidiwu aleteleña kukala kwejima kwaPawulu kwadiña neyi mwiña mumujimbaku. Ilaña chelili awa aspiritu atama amoni “mwiña,” hadaha afwilileña kuwiñija nankashi mumujimba kulonda Pawulu yatiyeña kuyeña. Pawulu welili ñahi? Hakusambila, Pawulu wakeñeleña nindi Yehova yamufumishi iwu “mwiña.” Wahosheli nindi: “Namulembeleleli Mwanta [Yehova] mapampa kasatu nami, iwu mwiña wunfumi.” Hela chakwila Pawulu walombeleña, iwu mwiña wamufumini wanyi. Komana chinayi mukwila nawu Yehova wakwileña wanyi kulomba kwaPawulu? Inehi. Wakwileña. Yehova hafumishilihu kukalaku, ilaña wamwinkeleña Pawulu ñovu yakuumika. Yehova wahosheli nindi: “Mukuzeyazeya kweyi dimunakulumbulukila ñovu jami.” (2 Kor. 12:8, 9) Muloña wawukwashu waNzambi, Pawulu watwalekelihu kwikala namuzañalu nikuwunda.—Fwi. 4:4-7. w19.11 9 ¶4-5

Twatela kudifukula hohu kudi Yehova muloña diyi Watuleñeli niKutwinka Wumi. (Chim. 4:11) Hela chochu, twamonaña kukala. Hela chakwila twamukeña nikumulemesha Yehova, yuma yimu yinateli kwikala yalema muwumi wetu chakwila yinateli kutukañesha kumukeña nikudifukula kudi Yehova. MuBayibolu, kumukeña Yehova chikupu kwabombelamu cheñi kudifukula hohu kudi yena. Hituketeja muntu wudi wejima hela chuma chidi chejima kutukañesha kudifukula kudi yenaku. (Kwi 34:14) Kudihana kwetu kudi Yehova kwalala. Muloñadi? Muloña kwashindamena hayuma yitunadizi kutalisha hadi yena. Twatiyaña kuwaha nayilwilu yindi yayiwahi. Tweluka yuma yakeñayi niyahelayi nawa chatiyañayi dichi twatiyaña. Tweluka nkeñelu yindi hadi antu nawa twalondelaña nshimbi jindi. Twatiyaña kuwaha muloña watwitejaña kwikala amabwambu jindi. (Mas. 25:14) Yuma yejima yitwadizaña hadi Nleñi yetu yatuleñelaña kuswina kwakwihi nayena.—Yak. 4:8. w19.10 26 ¶1-3

Makonu, amanakwetu niahela anakumona kukala kwamboka-mboka. Chakutalilahu, amavulu akabakanaña nakukala kwaletaña antu hela nawubanji wadimwekenaña. Neyi chumichi chinamwekani, twatela kuyitambwila awa amabwambu mumatala etu. Amakwawu anateli kuyikwasha munsañu yamali. Ilaña wejima wetu twatela kuyilombelaku kudi Yehova kulonda yayikwashi. Chinateli kutukalila kuwana mazu akuhosha hela chuma chakwila namanakwetu hela muhela wunaneñi. Ilaña wejima wetu tunateli kuyikwasha. Chakutalilahu, twatela kwikalaku nampinji yakuhanjekaña nawamabwambu jetu. Twatela kuyimwekeshela luwi neyi anakuhosha. Nawa tunateli cheñi nikuhanjeka nawu nsona yakukundeja yitwakeñesha. (Isa. 50:4) Chuma chalema hikwikala nampinji yakuhanjeka nawu neyi anakuyikeña. Yinu diyi mpinji yakukolesha wubwambu wetu nawamanakwetu niahela. Wubwambu wetu wukatwalekahu chahaya nyaaka, hiwakamanaku. w19.11 7 ¶18-19

Iwu wadiña mulambu wahanineñayi muntu muloña wakumukeña Yehova Nzambi yindi. Muntu wahanineña mulambu nichisaka chindi kushilahu nikapristu adiileña mbiji yakanyama wunalambuluwu. Ilaña yiidi yimu yakanyama ayihanineña hohu kudi Yehova. Yiidinyi? Yehova walemesheli nankashi manji akanyama. Yehova washimwini cheñi yiidi yikwawu, kushilahu ninshiya nindi yadiña yalema. (Alevi  3:6, 12, 14-16) Dichi, Yehova watiyileña kuwaha sweje-e neyi kaIsarela mukudikeñela yamulambula iyi yiidi yakanyama yamanji. KaIsarela walambwileña yumiyi wamwekesheleña nindi nakumwinka Nzambi chakufuma hamuchima. Munjila yoyimu, Yesu, wamukalakeleli Yehova namuchima windi wejima muloña Wakumukeña. (Yow. 14:31) Kwila nkeñelu yaNzambi dikwakeñeliyi Yesu. (Mas. 40:8) Yehova watiyileña kuwaha chamukalakeleleñawu kudi Yesu muloña wakumukeña. w19.11 22-23 ¶9-10

Izu daNzambi dashimuna nawu Nzambi walekeli kuleña yuma hamaseki, hanyima ‘yamafuku’ 6. (Kutach. 2:2) Hela chochu, Yehova wakeña kuzata nawa munjila yikwawu “wuchidi kukalakala.” (Yow. 5:17) Yehova wazatili hadi “mafuku” 6 nawa wanokeli hefuku damu 7. Kuhiñahu wayilejeli aIsarela kwila chochimu. Nzambi wahosheli nindi Sabata yadiña chinjikijilu hakachi kayena nawaIsarela. (Kwid. 31:12-14) Antu ejima ayikaanishileña kuzata kushilahu anyana, anduñu niyimuna. (Kwid. 20:10) Yaletesheleña antu kusha maana kuyuma yakuspiritu. Anlomboli amumafuku aYesu amavulu atuñili nshimbi jakala kutalisha hakwovwahila nshimbi yaSabata. Ahosheleña nawu chadiña chaluwa hela kunona tidiku nakuda hefuku daSabata hela kuuka muntu wakata. (Maku 2:23-27; 3:2-5) Ilaña dichakeñeleñayi Nzambi wanyi, nawa Yesu wayilumbulwilileña antu adiña nakumutiyilila. w19.12 3-4 ¶8-9

Neyi tudizaña mpinji yejima hayilwilu yaYehova, chikutukwasha kumwimbujola chikupu. Davidi wamwilukili chiwahi Tata yindi wamwiwulu, dichi wadiña naKumwimbujola chakushakama nawantu. Muloña wakwila Davidi wadiña nawubwambu wawuwahi naYehova, aIsarela amukeñeli nankashi nawa Yehova wamuzatishili kwikala chakutalilahu kudi anyanta awaIsarela. (1 Anya. 15:11; 2 Anya. 14:1-3) Chumanyi chitukudizilaku? Twatela kwikala “akwakwimbujola Nzambi.” Neyi twimbujola yilwilu yaNzambi, chikutukwasha cheñi kwiluka netu tudi anyanindi. (Efwe. 4:24) Tukaleka wanyi kudiza hadi Yehova. (Mukwa. 3:11) Bayi neyi yuma yitweluka hadi yena diyi yuma yasweja kulema hohuku, ilaña nichitwazatishaña yuma yitweluka. Dichi neyi tuzatishaña yuma yitunakudiza nikumwimbujola Tata yetu wukweti kukeña, wukatwalekahu kuswina kwakwihi nanetu. (Yak. 4:8) Watukana kuhitila Mwizu dindi nindi hamba kashiya chisayikila ana amukeñakeñañaku. w19.12 20 ¶20; 21 ¶21, 23

Yakoba wakeñeli anyanindi ejima, ilaña waswejeli kukeña mwanindi Yosefu wadiña nayaaka 17. Amana kwaYosefu elili ñahi? Amutiyilili ichima nawa ichima didaletesheli kumuhela. Dichi Yosefu amulandishili muwuduñu nawa atwambili kudi tata yawu nawu mwanindi akeñayi anamudi kudi kanyama chisumi. Ichima daletesheli muchisaka mubuli kwikala kuwunda nawa tata yawu waneñeli nankashi. (Kutach. 37:3, 4, 27-34) Ichima didi hakachi ‘kanyidimu yamujimba wanshidi’ yinateli kuletesha muntu yakabuli kuswana Wanta waNzambi. (Ñal. 5:19-21) Ichima didasañumunaña yilwilu yafwana yidi neyi kuhelañana, yikonkojola nikuzuwa. Chuma chamwililiwu Yosefu kudi amanakwindi chinakumwekesha nawu ichima dinateli kuluwañesha kunuñañana nikuwunda kwekalaña muchisaka. Hela chakwila hitunateli kwila chuma cheliliwu amana kwaYosefuku, wejima wetu twawanina wanyi nawa tukweti muchima wadimbanaña. Diyi yuma yaleteshaña mpinji yikwawu kutiyila akwetu ichima. w20.02 14 ¶1-3

Hampinji yimu, Yehova wafumishili ñovu jikwawu mudi Mosi nakwinka izanvu dawakulumpi amuIsarela emeni kwakwihi netenti dakubulakena. Hanyima yachumichi, Mosi watiyili nawu akulumpi ayedi abulili kwinza kwitenti dakubulakena niwena atambwilili spiritu yajila nawa atachikili kuprofweta. Hanu dinu welili ñahi chelili Yoshuwa yamuleji nindi yalekeshi ana akulumpi ayedi? Mosi hayitiyilili ichima hachawaana chayinkeliwu kudi Yehovaku. Ilaña wadizozeli nawa watiyili kuwaha chaprofweteleñawu. (Kuch. 11:24-29) Chumanyi chitwatela kudizila kudi Mosi? Neyi mudi akulumpi, ayilejahu dehi nawu mudizishi muntu mudimu wumukweti nawa wumwakeñesha muchipompelu? Neyi mwadizoza neyi Mosi, himukwakama nenu manakwenu wakayitambula mudimu neyi ayileja nawu mumudizishiku. Ilaña, mukutiya kuwaha kumudizisha. w20.02 17 ¶9; 17 ¶10-11

Yikatu yinateli kutuneñesha nikutuleñela kutoñojoka netu tudi amukunkulwayi kudi akwetu. Tunateli kuneña neyi antu eluka nawu tunakuzata wanyi kwesekeja nachitwazatileña hela neyi tunakushindamena hadi akwetu. Hela chakwila amakwawu aneluki wanyi nawu twakata, tunateli kutiya kutama muloña hitunakutwesha kuzata kwesekeja nachitwazatileñaku. Haniyi mpinji yakala, Yehova watukoleshaña. Munjilanyi? Mwizu dindi Bayibolu, Yehova watuleja yuma yayiwahi yatwanukishaña nawu twalema kudi yena hela chakwila twakata. (Mas. 31:19; 41:3) Kuhitila mwiizu daNzambi donenawu, Yehova wukutukwasha kushinda chineñi chenzaña namuloña wayikatu. Mwatela kwiluka nenu Yehova neluki yuma yimunakuhitamu. Lembenu kudi yena yayikwashi kutoñojoka munjila yayiwahi hakukala kumukweti. Kuhiñahu zatishenu Bayibolu kulonda muwani mazu akukundeja ayisonekelayi Yehova. Shenu muchima hamavasi amwekeshaña nawu Yehova walemesha ambuña indi. Chimukwilaña mwenimu, mukumona nenu Yehova wamuwahi kudi antu amukalakelaña nakashinshi.—Mas. 84:11. w20.01 15-16 ¶9-10; 17 ¶12

Isaka wadiña waheta, ilaña aFwilistinu amutiyilili ichima muloña wamaheta indi. (Kutach. 26:12-14) Ashiikilili mashima mwadiña nakunwishilayi Isaka yimuna yindi. (Kutach. 26:15, 16, 27) Makonu antu amakwawu atiyilaña antu akweti maheta ichima neyi cheliliwu aFwilistinu. Afwilaña yuma yawakwawu, cheñi hiyakeñaña akwawu kwikala nayuma yikwetiwuku. Akulumpi jawaYudeya amutiyilili Yesu ichima muloña amukeñeli nankashi kudi antu amavulu. (Mat. 7:28, 29) Yesu wadiña nakumwimenaku Nzambi nawa wadizishileña chalala. Hela chochu, akulumpi jakwitiya atandishileña makudi kulonda amutamishili Yesu ijina. (Maku 15:10; Yow. 11:47, 48; 12:12, 13, 19) Kusoñamishanyi kutunateli kudizila kuniyi nsañu? Neyi amanakwetu ayikeña nankashi muchipompelu muloña wayilwilu yawu yayiwahi, bayi tuyitiyilaña ichimaku. Ilaña twatela kwimbujola yilwilu yawu yayiwahi.—1 Kor. 11:1. w20.02 15 ¶4-5

Fwikijenu munashakami muPeresi yaaka 2,500 yinahitihu nawa munakukeña nenu muhoshi namwanta. Ilaña henohu kanda muyi nakuhosha namwanta mwatela kutambula ntahi lusesa kudi yena. Muloña neyi muya chakadi kutambula lusesa, akuyijaha. Twazañalalaña hakwiluka netu Yehova hekala neyi mwanta wakuPeresiku. Yehova wabadika anyuuli ejima awantu, ilaña tunateli kuhanjeka nindi mpinji yidi yejima. Wakeñaña nindi twikali akasunuka kuhanjeka nindi. Chakutalilahu, hela chakwila Yehova wukweti nkumbu jidi neyi Nleñi Wabadika, Wañovu Jejima nawa Mwanta Wabadika, wakeñaña nindi tuhanjekeña nindi kuzatisha izu dapela dakwila nawu “Tata.” (Mat. 6:9) Twatiyaña kuwaha hakwiluka netu Yehova wakeñaña nindi tuswini kwakwihi nayena. Chatelela kumutena Yehova netu “Tata” muloña diyi Kaseloki kawumi. (Mas. 36:9) Chineli diyi Tata yetu, twatela kumwovwahila. Neyi twila mwatulejañayi, twakadiluñisha nkisu jajivulu. (Heb. 12:9) Muniji nkisu mwabombela wumi wahaya nyaaka, hela mwiwulu chili hamaseki. w20.02 2 ¶1-3

Tunakufwila kukwasha kadizi ketu kaBayibolu kupaminaku kuspiritu. (Efwe. 4:13) Neyi muntu yeteja kudiza Bayibolu, wukukeñaña nankashi kwiluka yuma yinakudizayi chiyinateli kumukwasha. Neyi yatachika kumukeña Yehova, nateli kutachika kutoñojoka chinateli kukwashayi amakwawu, kushilahu ninana adi muchipompelu. (Mat. 22:37-39) Neyi mpinji yinashikili, mulejenu kadizi kenu nenu tukweti mudimu wakuhana yawaana yakukwasha mudimu waWanta. Mudizishenu kadizi waBayibolu chatela kwilayi neyi kunamwekani kukala. Chakutalilahu, mukwila ñahi neyi kadizi wenu waBayibolu, wabula kupapatishewa yayileja nindi kudi muntu wunamuneñeshi muchipompelu? Bayi mumuleja wunaluwañeshi hakachi kawuku, ilaña mulumbulwilenu chatela kwilayi kwesekeja nachahosha Bayibolu. Nateli kumwanakena manakwetu nikujimbalaku. Hela neyi wukumwanakena wanyi, watela kuhosha nindi munjila yayiwahi kulonda ‘yamukwashi manakwindi kwila chuma chachiwahi.’ (Esekejenu Matewu 18:15.) Kwashenu kadizi wenu waBayibolu kulonda yeluki chatela kuhoshayi. w20.01 5-6 ¶14-15

Twamwekeshaña netu twasakililaña chanakenañayi Yehova neyi tumulomba netu yatwanakeni, twiteja kufumba nawa tuzata nañovu nakubula kufuntishahu yiluwa yoyimu. Neyi twila mwenimu, tukwikala mukuwunda kwamuyitoñojoka. Chatukoleshaña hama kwiluka netu, “Yehova wudi kwakwihi nawantu abaluka nyichima yawu mwivumu, wayamwinaña antu akweti spiritu yachikeka puchi.” (Mas. 34:18) Chineli tunakuswina kwakwihi nakukuma, yuma yatwakamishaña yikuswejelaku chikupu. Neyi mutachika kwakama, nyakalenuña kumulejamu Yehova. Dizenuña Bayibolu nankashi. Dizilenuña kudi Hana, kapostolu Pawulu niMwanta Davidi. Mulombenu Tata yenu wamwiwulu yayikwashi kwiluka yuma yinakuletesha mwakameña. (Mas. 139:23) Itejenu yayikwashiku kusenda yisenda yenu, sweje-e yisenda yimunakukañanya kusenda. Neyi mwila yumiyi, mukwikala neyi ñimbi yamasamu wembili kudi Yehova nindi: “Chinaswejeli kwakama mumuchima wami, eyi wankundejeli nikunwundisha.”—Mas. 94:19. w20.02 24 ¶17; 25 ¶20-21

Nzambi wazatishili spiritu yindi nakusha yitoñojoka yindi mudi ansoneki aBayibolu. Neyi tutañaña Bayibolu nikutoñojokahu chikupu hayuma yitunakutaña, nshimbi jaNzambi jikushakama muyitoñojoka nimunyichima yetu. Awa mazu onenawu akutukwasha kuhimpa yilwilu yetu kulonda tumuzañalesheña Yehova. (Heb. 4:12) Ilaña hakwila nawu spiritu yajila yitukwashi, twatela kwikalaña nampinji yakudiza Bayibolu mpinji yejima nikutoñojoka chikupu hayuma yitunakudiza. Kuhiñahu dinu, Izu daNzambi dikutulombolaña muyuma yejima yitunakwila. Cheñi twatela kudifukula hamu kudi Nzambi. (Mas. 22:22) Spiritu yaYehova yekalaña hakupompa. (Chim. 2:29) Neyi tunakupompa hamu nawamanakwetu niahela, twalombaña spiritu yajila, twembaña tumina twaWanta twashindamena Hezu daNzambi nawa twatiyililaña kukufumba kwashindamena haBayibolu kwahanañawu amanakwetu atondawu naspiritu yajila. Hakwila nawu spiritu yajila yitukwashi twatela kuloñeshaña nikwakulahu hakupompa. w19.11 11 ¶13-14