June

Chihandilu chamukolela, iwu nfwila, wudana mali akulandamu yuma yakudikwashamu nachu. Hela chochu, nayi kuyikasha nawa nombilimu tumawayawaya twanyanya tuyedi, hadaha tunatiyakani wanyi nawu anatumbili muchikasha. Yesu neluki tumawayawaya tunombiliyi muchikasha, hitumawayawaya twanyanya twapela wuseya twazatishileñawu haniyi mpinji. Tunashikilimu wanyi kulanda nzwimba wumu, kada kakehelamu wuseya. Yesu namutiyi kuwaha iwu mumbanda nfwila. Natambiki atumbanji twindi, nakuyila nindi munamumoni ona nfwila nawa nahoshi nindi: “Iwu mumbanda nfwila kazweñi nombilimu mali amavulu kubadika ejima.” Kuhiñahu nalumbululi nindi: “Muloña wejima wawu [sweje-e asamaheta] anombilimu mali anafumishiwu hamaheta awu, ilaña iwu mumbanda hela chakwila hikazweñi, nombilimu mali ejima adiñayi nawu akuhandilamu.” (Maku 12:43, 44) Ona nfwila washinshika chombililimu mali ejima adiñayi nawu, wamukuhweleleli Yehova nindi wukumwakamenaña.—Mas. 26:3. w21.04 6 ¶17-18

Yesu watwalekelihu kushimwina hadiñayi hanu hamaseki nawa nakukeña niakwakumulondela niwena atwalekihu kushimwina chakadi kuzeya. (Yow. 4:35, 36) Hampinji yadiñayi Yesu nawatumbanji twindi, adiña nakushimwina neyena. (Luka 10:1, 5-11, 17) Ilaña chelili Yesu amukasi nawa amujahi, atumbanji twindi alekeli kushimwina hakapinji kantesha. (Yow. 16:32) Chamusañwiliwu, Yesu wayikolesheli atumbanji twindi kusha muchima hakushimwina. Hanyima yakwila nayi dehi mwiwulu, atumbanji twindi ashimwinini neyena chikupu chakwila ayilumbu jawu atachikili kuhosha neyi chitunamoni munsona yalelu. Yesu walombweleña mudimu wazatileñawu akwaKristu amumafuku awapostolu nawa Yehova wayikiswilileña chakwila avulili chikupu. Chakutalilahu, haPentekosta 33 C.E., antu akushika ku 3,000 apapatisheweli. (Yilw. 2:41) Nawa atumbanji niwena atwalekelihu nakuvulilaku nankashi. (Yilw. 6:7) Hela chochu, Yesu washimwineñahu dehi nindi antu amavulu aketeja nsañu yayiwahi mumafuku akukuminina.—Yow. 14:12; Yilw. 1:8. w21.05 14 ¶1-2

Munakwanuka mpinji yimwelukili chalala? Mwatoñojokeli nenu antu ejima akwiteja yuma yimwakuhweleleli. Mwelukili nenu nsañu yamuBayibolu yikuyikwasha kwikala namuzañalu muchihandilu chawu makonu nawa akuchiñejaña yuma yayiwahi kumbidi. (Mas. 119:105) Dichi mwayilejeli amabwambu jenu niantaña jenu chalala chimwadizili. Hanu dinu chumanyi chamwekeni? Mwahayamini, muloña antu akaanini yuma yimwayilejeli. Hitwatela kuhayama neyi antu anakukaana nsañu yitwashimwinañaku. Mumafuku aYesu, antu amavulu amukaanini hela chakwila wakoñeli yihayamisha, yamwekesheleña nawu amukwashileña kudi Nzambi. Chakutalilahu, Yesu wamusañwili Lazaru, chihayamisha chadi kuletesha akwakumudimbulula abuli hakuleyela. Hela chochu, anlomboli jawaYudeya hiyamukuhweleleli Yesu nawu hiMesiyaku. Dichi, akeñeleña kumujaha Yesu niLazaru.—Yow. 11:47, 48, 53; 12:9-11. w21.05 2 ¶1-2

Zatenuña nañovu kulonda mupompeña mpinji yejima. Nsañu yimukudiza hakupompa yikuyikolesha nawa mukuyiluka amanakwenu niahela. Dikundenuña nawantu muchipompelu imunateli kudizilaku, hela chakwila akweti yaaka ninkulilu yambukaku nayenu. Bayibolu yatulejaña nawu “maana ekala kudi atushinakaji.” (Yoba 12:12) Akulumpi niwena anateli kudizila kudi atwansi ashinshika. Davidi amubadikili yaaka kudi Jonatani, ilaña chumichi hichayikañesheli kwikala amabwambuku. (1 Sam. 18:1) Davidi naJonatani adikwashileña wumu namukwawu kumukalakela Yehova hela chakwila amweneña kukala kwakuvulu. (1 Sam. 23:16-18) Muhela Irina wekala Chinsahu muchisaka chawu nkawindi wahosheli nindi: “Amanakwetu niahela muchipompelu anateli kwikala anvwali jetu, anyiki jetu hela ayaya jetu. Yehova nateli kuyizatisha kulonda atukwashi.” Amabwambu jenu anakukeña kuyikolesha nikuyikwasha, ilaña mwatela kuyilejamu kulonda wena amoni chakuyikwasha. w21.06 10-11 ¶9-11

Yesu wahanini chakutalilahu chamwanta ninduñu yindi. Mwanta wamwanakeneni nduñu mukudi wakañenyiyi kufwetayi. Chimwahitili mpinji, iwu nduñu yowumu wakañenyi kwanakena mukwawu nduñu wadiña namukudi wantesha. Nkumininaku, iwu mwanta wamumbilili iwu nduñu wabula luwi mukaleya. Chuma cheliliyi nduñu chamuletesheli yena kukabakana niantu amakwawu. Chatachi, wamukabishili mukwawu nduñu kuhitila mukumutwala “kulonda amushi mukaleya sampu namufweti dehi mukudi windi.” Chamuchiyedi, waneñesheli anduñu amakwawu amweni yuma yeliliyi. “Akwawu anduñu chamweniwu yuma yeliliyi, atiyili kutama nankashi.” (Mat. 18:30, 31) Munjila yoyimu, yuma yitwelaña yinateli kukwasha hela kuneñesha akwetu. Neyi muntu yatuneñesha nawa tukaana kumwanakena, chumanyi chinateli kumwekana? Chatachi, twamuneñeshaña neyi tubula kumwanakena, kumutiyilila hela kumumwekeshela kukeña. Chamuchiyedi, twaleteshaña antu amakwawu muchipompelu kubula kwikala akasunuka neyi amona nawu tunakutiyañana wanyi nanowu muntu. w21.06 22 ¶11-12

Satana wakeñaña antu aleñawu muchifwanisha chaNzambi eleña yuma yatama. Nzambi chamweniyi “kutama kwawantu kunatohi hamaseki” mumafuku aNowa, “Yehova chamufutwili kumuchima nanochu cheliliyi muntu hamaseki, chamutiyishili kumuchima bwi.” (Kutach. 6:5, 6, 11) Komana kaayi kanawahiliku kufuma yina mpinji? Inehi mwani. Diyabolu watiyaña kuwaha kumona nyitapu yawuvumbi yejima chiyinasweji kuvulilaku, kushilahu niyilwilu yawuvumbi yekala hakachi kawamayala niambanda niwutumwa. (Efwe. 4:18, 19) Satana watiyaña kuwaha sweje-e neyi yaletesha antu adifukulaña kudi Yehova kukoña nshidi. Muchiyulu chaSatana muntu ‘nakutamisha mukwawu muntu,’ cheñi nakukisañana iseki nianyama ayinkeliyi Yehova antu nindi ayakameneña. (Mukwa. 8:9; Kutach. 1:28) Yumanyi yinafumimu? Asayantisiti ahoshaña nawu hamuloña wayuma yelañawu, nyitapu yayileñaleña yikujiya muyaaka yantesha yinakwinza. w21.07 12 ¶13-14

Hela chochu, ambuña aYehova amavulu adinkaña nyiloña muloña wayiluwa yakoñeliwu kunyima. Atoñojokaña nawu Yehova kwila yayanakena nehi hela chakwila anahimpi. Neyi mwadinkaña nyiloña, chimweluka nenu Yehova nakukeña kuyimwekeshela kukeña kwakashinshi kukuyikwasha kuleka kudinka nyiloña. Kumukalakela Yehova nachinleji chitooka. Ichi chuma chaswayi muloña “mashi aMwanindi Yesu atutookeshaña kunshidi jejima.” (1 Yow. 1:7) Neyi munaneñi hamuloña wakubula kuwanina, anukenuña nenu Yehova nakufwila kuyanakena neyi mubalumuka. Talenu ñimbi yamasamu Davidi chashimwiniyi kunuñañana kwekala hadi kukeña kwakashinshi nakwanakena. Wasonekeli nindi: “Chimwaleha iwulu nahanu heseki, dimu mwashika niluwi lwindi kutoha lwaanakenañayi awa amwakamaña. Nafumishi nyiloña yetu, nayitwali kwakulehi neyi kufumisha kumusela nakushika kumujika.”—Mas. 103:11, 12. w21.11 5-6 ¶12-13

Iyala mukwaKristu watela kumulemeshaña ñodindi. (1 Pet. 3:7) Mukumulemesha mwabombela kumusha maana nikulemesha antu amakwawu. Chakutalilahu, iyala walemeshaña ñodindi kuhitila mukumumona nindi walema. Hamwilaña nindi yeleña yuma yabadika muñovu yindiku. Nawa hamwesekejaña nawambanda amakwawuku. Mumbanda wukutiya ñahi neyi nfumwindi yamwilaña chamuchidiwu? Iyala wabula kwikala Chinsahu wasumbula muhela Rosa kakavulu wamwesekejaña ñodindi nawambanda amakwawu. Mazu indi atama amuleteshaña muhela Rosa kuneña nikudimona nindi kwosi wamukeña. Wahosheli nindi: “Kakavulu nakeñaña kuñanukisha nawu Yehova wankeña.” Kwambukaku, iyala mukwaKristu wamulemeshaña ñodindi. Weluka nindi neyi yelaña mwenimu, wubwambu windi nañodindi niYehova wukukola. Iyala wamulemesha ñodindi, wamuhamekaña, wamulejaña nindi wamukeña nawa wamumonaña nindi walema. w21.07 22 ¶7-8

Komana mwatiyaña kutama neyi chuma chimunakuchiñilila chibula kushika kwesekeja nachimwakuhwelela? Hanu neyi mwiluka nenu kudi chuma chaletesha hakwila chuma chenu chibuli kushika hampinji yimwakuhwelela? Neyi mwiluka chuma chinaleteshi, komana mukudiwunjika nakuchiñililaña wanyi? Chakutalilahu chalumbulula muloña waweni wutwatela kwikalila adiwunjika achishimuna haYishimu 13:11. Hahoshaña nawu: “Maheta akuhetela kuyuma yakuhemesha amba kaya nakukeha; ilaña muntu wapompeshaña yuma yindi nakukabakana wakamona yakaya nakuvula.” Chumanyi chitunadizili kuniyi vasi? Muntu wukweti maana welaña yuma mukubabala nawa mukudiwunjika nawa mwafumaña yuma yayiwahi. Yishimu 4:18 yatulejaña nawu: “Njila yawantu aloña yidi neyi mwaana wahakucha, wayaña nakutooka nichikushika itañwa mwiwulu.” Mazu atalisha munjila yasolwelañamu Yehova nkeñelu yindi chovu-chovu kudi antu jindi. Hela chochu, iyi vasi yinateli cheñi kutukwasha kwiluka mukwaKristu chahimpañayi yilwilu yindi muchihandilu chindi nakuswina kwakwihi naYehova. Muntu hanateli kushikena kwikala ibwambu daNzambi hohenohuku. Hahitaña mpinji. w21.08 8 ¶1, 3-4

Tukweti nyidimu yayivulu yakuzata chitunakuswina kwakwihi nakukuma kwanshakaminu yamakonu. (Mat. 24:14; Luka 10:2; 1 Pet. 5:2) Wejima wetu tunakukeña kumukalakela Yehova hanakumini ñovu jetu. Antu amavulu anakuzata nankashi mumudimu wakushimwina. Amakwawu akeñaña kuzata wupayiniya. Amakwawu akeñaña kukalakela haBeteli hela kutuña maluña amaneni akupompela, matala aWanta, tusanji twanyitayi hela tusanji twakubalumwina. Nawa amanakwetu amavulu anakuzata nañovu kulonda ashikihu kwikala ankoñi akuzatila hela akulumpi muchipompelu. (1 Tim. 3:1, 8) Yehova wazañalalaña nankashi hakumona antu jindi chinakudihanawu chamuchidiwu! (Mas. 110:3) Komana mwaneñaña muloña wakwila kanda mutachiki kuzata mudimu wumwafwilaña mumudimu waYehova? Neyi mwaneñaña, mulejenumu Yehova chimunakutiya. (Mas. 37:5-7) Kubombelahu, ihulenu amanakwetu apama kulonda ayikwashi chimwatela kuzata mumudimu waNzambi nawa esekenu kwila munayilejiwu. Neyi mwila mwenimu, mwakazata mudimu wumwafwilaña. w21.08 20 ¶1; 21 ¶4

Nfwila Ana, kaprofwetu wamumbanda wadiña nayaaka 84, ilaña mpinji yejima ‘wawanikileña hatembeli.’ Wayileña hatembeli mpinji yejima nawa wamumweni Yesu hadiñayi nkemba. (Luka 2:36-38) Makonu, atushinakaji amavulu ashinshika hiyakutalilahu yayiwahi kudi atwansi. Tukudizilaku yuma yayivulu neyi tuyihulaña malwihu nikutiyilila chinakutulejawu yuma yayiwahi yinadiluñishiwu mukuloñesha kwaYehova. Amanakwetu niahela ashinakaja dehi alema kudi Yehova nimukuloñesha kwindi. Anamoni Yehova chinakiswiliyi kuloñesha kwindi munjila jamboka-mboka nichinayikiswiliwu wena. Anadiziliku yuma yalema kuyiluwa yawu yakoñeleñawu. Yimonenuña nenu “[hi]kasulu kamaana,” nawa dizilenuña kudi wena. (Yish. 18:4) Neyi mwikalaña nampinji yakuyiluka, chikuhwelelu chenu chikukola . w21.09 3 ¶4; 4 ¶7-8; 5 ¶11, 13

Chinakufumamu, antu jaYehova anakuzatisha yuma yelukawu yateneniyi Isaya nindi, “mayeli anyuza.” (Isa. 60:5, 16) Nawukwashu wanawa amayala niambanda anakwinza muchalala, mudimu wakushimwina anakuwuzata mumatuña 240 nawa nyikanda yinakwidika mumadimi akubadika 1,000. Munanu mafuku akukuminina, kukanka kwanyuza kunakuletesha antu kumona chuma chatela kwilawu. Komana akutondahu kuhakwilaku Wanta waNzambi tahindi akukuhwelela nfulumendi jamukaayi? Ichi hichuma chatela kufuukulayi muntu yomweni. Hela chakwila antu jaYehova ovwahilaña nshimbi janfulumendi jamumatuña mwashakamañawu, hiyadiñijaña munsañu jamatuña nachiyulu mukanu kaayiku. (Rom. 13:1-7) Eluka nawu Wanta waNzambi hohu diwunateli kumanisha kukala kwawantu. Iwu Wanta hiwamukanu kaayiku.—Yow. 18:36, 37. w21.09 17-18 ¶13-14

Neyi muntu imwakeña yamushiya Yehova, chalema nankashi kukolesha chikuhwelelu chenu enu aweni nikukolesha antu adi muchisaka chenu. Munateli kwila ñahi mwenimu? Ilenu Yehova yayikwashi kuhitila mukutaña Izu daNzambi nikutoñojokahu kushilahu nikuya kukupompa kwawakwaKristu. Muhela Joanna, wukweti atata yindi nimuhelindi afuma muchalala wahosheli nindi: “Muchima wawundaña neyi nitaña nsañu yawantu ashimunawu muBayibolu adi neyi Abigayili, Esita, Yoba, Yosefu niYesu. Nsañu yawu yankoleshaña nawa yankwashaña kuwundisha muchima.” Mulejenumu Yehova yuma yejima yinakuyakamisha. Neyi munaneñi, bayi muleka kulombaku. Twalekenuhu kumulomba Nzambi kulonda yayikwashi mumoneña yuma neyi chayimonañayi nawa ‘yayileji maana ninjila yimwatela kwenda.’ (Mas. 32:6-8) Hela chochu, chinateli kuyikalila kumulejamu Yehova chimunakutiya. Ilaña Yehova welukaña chimwatiyaña. Wakeñaña nindi mumulombeña.—Kwid. 34:6; Mas. 62:7, 8. w21.09 28 ¶9-10

Hanyima yachipandakenu chamu 32 C.E., kapostolu Petulu, Yakoba niYowanu amweni chimwenu chakuhayamisha. Hadiña hampidi yayilehi, hadaha mpidi yaHerimoni. Amumweni Yesu nakuhimpika mmwekenu yindi. “Kumesu indi kwatoñekeli neyi itena nawa yakuvwala yindi yahewulu yatookeli nankashi neyi chejeji.” (Mat. 17:1-4) Apostolu atiyili Nzambi nakuhosha nindi: “Iwu diyi Mwanami, inakeña, inatiyaña kuwaha. Mutiyililenu.” Yuma yeliliwu awa apostolu muchihandilu chawu, yamwekesheli nawu amutiyilili Yesu. Twatela kuyimbujola. Twatiyaña kuwaha hakwiluka netu Yehova wazatishaña “mutu wachipompelu” Yesu Kristu hakutulombola. (Efwe. 5:23) Tutwalekenuhu ‘kumutiyilila’ Yesu neyi chelili kapostolu Petulu, Yakoba niYowanu. Neyi twila iyi yuma, akutukiswila chayinu mpinji nawa twakekala namuzañalu kumbidi. w21.12 22 ¶1; 27 ¶19

MukwaKristu muKorinda welileña wuvumbi nañoda tata yindi. Kapostolu Pawulu wayilejeli aKorinda kumuhaña muchipompelu. Yilwilu yaniwu iyala yaluwañesheleña antu amakwawu muchipompelu, chakwila amakwawu atoñojokeleña nawu iyi yadiña nshidi yasweja wanyi! (1 Kor. 5:1, 2, 13) Chimwahitili mpinji, Pawulu welukili nindi iwu muntu nahimpi chikupu. Pawulu wayilejeli akulumpi nindi: “Mwatela kumwanakena nikumukundeja.” Talenu chuma chaletesheli Pawulu yahoshi mwenimu: “Kulonda yabuli kusweja kwikala nachineñi.” Pawulu wamutiyilili wushona iwu iyala wabalumukili. Hakeñeleña iwu iyala kusweja kuneña hela kuzeya nachuma cheliliyi chakwila yaleki kulomba kwanakenaku. (2 Kor. 2:5-8, 11) Kufwana Yehova, akulumpi atiyilaña antu luwi. Ababeshaña muntu wunakoñi nshidi neyi hanateleli nawa neyi chinatwesheki amutiyilaña luwi. Ilaña neyi akulumpi akumubabesha wanyi, chikumwekesha nawu hiyanakumutiyila luwiku ilaña anakwiteja yiluwa yinakoñiyi. w21.10 11-12 ¶12-15

Mazu atama tunateli kuyesekeja nayilonda. Tuyilonda tukwawu twanyanya; ilaña yikwawu yamaneni. Chakutalilahu, neyi tunakushinkula envelopu, hadaha chipapilu chinateli kutuleñula hantesha kumunu. Chinateli kutukata chimukuhita ifuku dimu hela ayedi, tukwanukaña wanyi netu twadikatishili. Munjila yoyimu, yuma yikwawu yatumwekenaña yekala yalema nankashi wanyi. Chakutalilahu, ibwambu detu nateli kuhosha hela kwila chuma chikwawu chinateli kutuneñesha, ilaña chinateli kwikala chaswayi kumwanakena. Dichi neyi chilonda cheneni, ndotolu nateli kuchichima nikuchikasa. Ilaña neyi tutokobolañahu, chikukusuka wanyi nawa chikutohelaku. Chawushona, muntu nateli kwila chuma chinadifwaniku sweje-e neyi anamuneñeshi nankashi. Nateli kutwalekahu kutoñojoka chamuneñeshawu nichinakutiyayi. Ilaña antu ahembaña nkunyi adikatishaña hohu aweni. Dichi, twatela kwovwahilaña kufumba kwekala munsona yalelu. w21.12 12 ¶15

Tuhoshi netu mukulumpi nakwakama hamutapu wanvwalilu yamukwawu mukakwitiya. Mukulumpi nateli kudihula nindi, ‘Hadihu nsañu yamuBayibolu yikuletesha nimufumbi haniyi nsañu? Muloña wakwila mukulumpi nakukeña wanyi kuzatisha yitoñojoka yindi, nateli kwihulaku mukwawu mukulumpi hela mukakushimwina wapama kulonda atiyi chidi yitoñojoka yindi. Anateli kushakama hamu nakuhanjeka hakufumba kwaPawulu kwahosha hanvwalilu. (1 Tim. 2:9, 10) Pawulu washimwini yishina yayivulu nakumwekesha nindi nvwalilu yamukaKristu yatela kwikala yatelela, yamweseka nawa yakalemesha. Ilaña Pawulu hashimwinihu nshimbi hayuma yatela kuvwalayi muntu hela yatela kubula kuvwalayiku. Welukili nindi amanakwindi niahela atela kuvwala yuma yinateli kutondawu, chakala hohu yinakufumpa nshimbi jamuBayibolu wanyi. Dichi akulumpi atela kumona neyi chakwila yuma yinatondiyi muntu yatelela nawa yakavumbi. Twatela kwanukaña netu akaKristu ayedi anateli kufuukula mwashiyashana, ilaña wejima wawu anafuukuli mwamuwahi. Bayi tukanjikijaña amanakwetu kwila yuma yitunakutoñojoka netu diyaloñaku. w22.02 16 ¶9-10

Kudi yuma yikuletesha tudimwekesheleña kukeña kwakashinshi. Yumanyi yeniyi? Talenu iyi yishimu yamuBayibolu chiyinakuli ilu lwihu: “Luwi nansañu yalala bayi yakakushiyaku. . . . Chenochu wakawana wuselewa, nikutiyakana mpuhu yayiwahi, nikumesu aNzambi nikumesu awantu.” “Muntu wekala naluwi wadiwahishaña yomweni.” “Muntu walondaña kuloña naluwi wawanaña wumi.” (Yish. 3:3, 4; 11:17; 21:21) Iyi yishimu yinashimuni yuma yisatu yikuletesha tumwekesheña kukeña kwakashinshi. Chatachi, neyi tumwekeshaña kukeña kwakashinshi tukwikala alema kudi Nzambi. Chamuchiyedi, neyi tumwekeshaña kukeña kwakashinshi tukutambwilaña yuma yayiwahi chayinu mpinji. Chakutalilahu, twekalaña nawubwambu wawuwahi nawakwetu. Chamuchisatu, neyi tumwekeshaña kukeña kwakashinshi tukatambwila yuma yayiwahi kumbidi kushilahu niwumi wahaya nyaaka. Mwamweni, kudi yuma yayivulu yikuletesha twovwahileña mazu aYehova akwila nawu: “Mumwekeshi luwi nawushona, muntu namana kwindi, muntu namana kwindi.” w21.11 8 ¶1-2

Neyi kukala kumwamweni kunyima hela kumunakumona chayinu mpinji kunakumwekesha nawu chikuhwelelu chenu chazeya, bayi muneñaku. Zatishenu iyi mpinji kulonda mukoleshi chikuhwelelu chenu. Lombenuña mpinji yejima kudi Yehova neyi munamoni kukala. Ilukenu chikupu nenu Yehova wukuyikwasha kuhitila mudi chisaka hela amabwambu. Neyi mumwiteja Yehova kuyikwasha nakukala kumunakumona chayinu mpinji, mukukuhwelela chikupu nenu wukayikwasha kuumika kukala kudi kwejima kumukamona kumbidi. Yesu wayikwashili atumbanji twindi kwiluka hiyateleleli kuzatila kulonda ekali nachikuhwelelu chakola, ilaña welukili nindi Yehova wukayikwasha kuumika kukala kwadi kumonawu kumbidi. (Yow. 14:1; 16:33) Welukili chikupu nindi chikuhwelelu chikakwasha izaza deneni kupuluka halukadi lwasweja lunakwinza. (Chim. 7:9, 14) Neyi muzata hakumina ñovu jenu kulonda mukoleshi chikuhwelelu chenu.—Heb. 10:39. w21.11 25 ¶18-19

Bayi mukuhwelelaña kuyikiña muchihayamishaku. Nawa twakuhwelela netu antu ejima amukuhwelela Yehova akekala nawumi wahaya nyaaka hela chakwila akufwa chayinu mpinji. Katataka, chikuhwelelu chetu chakwila nawu Yehova wukweti wuswa wakutukiña, chikwikala mukweseka. Gogi waMagogi, hela netu kudibomba kwanyuza, hampinji yakayilukukawu antu jaNzambi mawumi etu akamwekana neyi adi mukukala. Haniyi mpinji twatela kukuhwelela netu Yehova wukutwamwina. Kudi iyi nyuza, tukamwekana neyi nyikoku yinabuli wakuyikiña. (Ezek. 38:10-12) Twakekala nayitwa wanyi, nawa hitwakekala antu adizishawu chakuzuñaku. Nyuza yikatoñojoka nawu chaswayi kutushinda, eluka wanyi nawu añelu jaYehova adiloñesha kutukiña. Ilaña etu tweluka chumichi muloña wachikuhwelelu. Nyuza hiyakuhwelela mudi Nzambiku. Akahayama chikupu chiyakatuzuñilaku kudi amashidika amwiwulu!—Chim. 19:11, 14, 15. w22.01 6 ¶12-13

Yehova wayikeña ambuñindi ejima, hela chakwila anamukalakeli yaaka yayivulu hela amaha muchalala. Yehova walemesha amanakwetu niahela ejima, ninetu twatela kuyilemesha. Twatela kuzataña hanakumina ñovu yetu kulonda tuyikiñi amanakwetu nikuyakamena. Neyi tunaneñeshi hela kuhukesha muntu, hitwatela kwilaña neyi kwosi chuma chinamwekaniku, nakutoñojoka netu mukwetu nateli kutwanakena nikudiwulaku. Chumanyi chaleteshaña antu amakwawu kuhukana? Hadaha hamuloña wankulilu yawu. Amanakwetu niahela amakwawu adimonaña nawu ashikilamu wanyi. Amakwawu achidi amaha muchalala; kanda eluki nawu atela kwanakena antu neyi anayineñeshi. Hichikweti muloña nachitunakutiyaku, twatela kuzata nañovu kulonda tuleteña kuwunda. Kubombelahu, hela chakwila muntu wahukanaña nankashi nayuma yelaña akwawu, watela kwiluka nindi watela kudiwulañaku. Yuma yikufumamu, wukwikala namuzañalu ninawubwambu wawuwahi nawamanakwindi. w21.06 21 ¶7

Yesu weluka chimwatiyaña. Neyi tunakwakama twatela kuzañalala hakwiluka netu tukweti ibwambu detu weluka chitwatiyaña. Ibwambu yeniwu hiYesu. Weluka chichatiyakanaña neyi muntu nazeyi nawa nakukeña kumukwasha. Weluka kuzeyazeya kwetu nawa wukutukwasha “hampinji yatelela.” (Heb. 4:15, 16) Neyi chetejeliyi Yesu kumukwasha kudi kañelu mwitempa daÑesimani, ninetu twatela kwiteja wukwashu wunakufuma kudi Yehova kuhitila munyikanda, vidiyo, mumpanji, hela anenzi nakutukolesha kudi akulumpi hela ibwambu detu wapama. (Luka 22:39-44) Yehova wukuyinka “kuwunda kwaNzambi.” Yehova wukutukolesha ñahi? Neyi tulomba, tukwikala “[na]kuwunda kwaNzambi kwabadika kwiluka kwejima.”—Fwili. 4:6, 7. w22.01 18-19 ¶17-19

Yehova welaña yuma yaloña mpinji yejima. Hela chochu, chinateli kutukalila kukuhwelela antu atondayi hamaseki. Tunateli kutachika kujinooka neyi antu akweti wuswa mukuloñesha kwaYehova anakulondela munakuyilejayi Yehova indi kwiji anakuzatisha yitoñojoka yawu. Yehova wayikuhwelela awa antu atondayi nindi alomboleña mukuloñesha kwindi nimuchipompelu. Dichi neyi twayikuhwelela wanyi awa amayala, kwila tuhosha netu twamukuhwelela Yehova nehi. Makonu Yehova nakulombola kuloñesha kwindi kwaheseki kuhitila mudi “nduñu wamaana nikashinshi.” (Mat. 24:45) Kufwana izanvu dalombolaña dadiñaku mumafuku awakaKristu akusambila, iwu nduñu walombolaña antu jaNzambi mukaayi kejima nawa wahanaña nshimbi jatela kulondelawu akulumpi muchipompelu. Akulumpi niwena azataña nañovu kulonda alondeleña iyi nshimbi muyipompelu. Twamwekeshaña netu twakuhwelela munjila mwelilañayi Yehova yuma neyi tunakutiyilila wunlomboli watwinkañawu mukuloñesha nikudi akulumpi. w22.02 4 ¶7-8

Twatiyaña kuwaha chikupu hakwikala aYinsahu jaYehova! Twazañalalaña neyi tukwasha muntu wudi “namuchima washinshika wakukeña kwikala nawumi wahaya nyaaka” kulonda yekali mukwakwitiya. (Yilw. 13:48) Twatiyaña neyi chatiyiliyi Yesu, “wazañaleli nankashi” chelili atumbanji twindi amuleji yuma yayiwahi yamweniwu mumudimu wakushimwina. (Luka 10:1, 17, 21) Kapostolu Pawulu wamukolesheli Timotewu nindi: “Dihembeña eyi aweni nikusha muchima kuntañishilu yeyi.” Wabombelelihu nindi: “Mukwila mwenimu, wakadaamwina eyi aweni ninowu akutiyililaña.” (1 Tim. 4:16) Dichi mudimu wakushimwina wapulwishaña mawumi awantu. Twadihembaña etu aweni muloña tudi enimbu amuWanta waNzambi. Mpinji yejima twakeñaña kwikala nayilwilu yayiwahi yamuzañaleshaña Yehova nikumwekesha netu twakuhwelela nsañu yayiwahi yitwashimwinaña. (Fwili. 1:27) Twashaña muchima kuntañishilu yetu kuhitila mukuloñesha henohu kanda tuyi nakushimwina nikumulomba Yehova kulonda yatukwashi henohu kanda tutachiki kushimwina. w21.10 24 ¶1-2

“Wuntu wawuha” hikutoñojoka nikwila yuma neyi chelañayi Yehova. Muntu wavwalaña wuntu wawuha kuhitila mukumwekesha mukaabu waNzambi waspiritu, kwiteja spiritu yajila yiyuuleña yitoñojoka yindi, chinakutiyayi, nichinakwilayi. Chakutalilahu, wamukeña Yehova niantu jindi. (Mat. 22:36-39) Watwalekañahu kwikala namuzañalu hela chakwila nakuumika kweseka. (Yak. 1:2-4) Wekala mukwakuleta kuwunda. (Mat. 5:9) Wekala wadiwunjika nawa wayitiyilaña akwawu luwi. (Kol. 3:13) Wafwilaña yuma yayiwahi nawa diyelañayi. (Luka 6:35) Wamwekeshaña muyilwilu yindi nindi wamukuhwelela chikupu Tata yindi wamwiwulu. (Yak. 2:18) Wadiwunjikaña neyi anamuvuloki nawa wadiyuulaña neyi wudi mukweseka. (1 Kor. 9:25, 27; Tit. 3:2) Hakwila nawu tuvwali wuntu wawuha, twatela kwikala nayilwilu yejima yashimuna AÑalija 5:22, 23 niyikwawu yashimunawu muBayibolu. w22.03 8-9 ¶3-4

Akulumpi atela kumwimbujola kapostolu Pawulu kutalisha hakushimwina kwitala nikwitala nikwikala adiloñesha kulonda ashimwineña mpinji yejima. (Efwe. 6:14, 15) Kufwana Pawulu, akulumpi atela kudizishañaku amanakwawu niankoñi akuzatila hampinji yinakushimwinawu. (1 Pet. 5:1, 2) Ilaña akulumpi hiyatela kwikalaña akasika nanyidimu chakwila akañanyeña kwikala nampinji yakushimwinaku. (Mat. 28:19, 20) Hakwila ekaleña nampinji yakuzata nyidimu yinakukeñawu, mpinji yikwawu atela nikukaanaña kutambwila nyidimu yikwawu. Hanyima yakutoñojokahu nikulombelahu, akwiluka nawu neyi eteja nyidimu yikwawu akwikala wanyi nampinji yakuzata nyidimu yalema nankashi, chidi neyi kulombola kudifukula kwachisaka, kushimwina mpinji yejima nikudizisha anyanawu muniyi nyidimu. Atela kwiluka nawu Yehova weluka muchima wukwetiwu wakwakamena nyidimu yikwawu. w22.03 27 ¶4, 7; 28 ¶8

Komana mwanukaña mpinji yimwatiyili woma hakwikala Chinsahu chaYehova? Hadaha mwatoñojokeleña nenu mukutweshaña wanyi kushimwina kudi antu amavulu. Hela hadaha mwatiyileña woma nenu chisaka chenu hela amabwambu jenu anateli kuyikañesha. Neyi dimu, munateli kwiluka chinakutiyayi kadizi wenu waBayibolu neyi nakutiya chochimu. Yesu welukili nindi antu amakwawu anateli kutiya woma wamuchidiwu. Hela chochu, wayilejeli akwakumulondela kubula kwiteja woma wuyikañeshi kumukalakela Yehova. (Mat. 10:16, 17, 27) Twalekenuhu kudizisha atudizi enu kulonda alejeñaku akwawu yuma yakuhwelelawu. Hadaha atumbanji twaYesu atiyili woma hayitemesheliyi nindi ayi nakushimwina. Ilaña Yesu wayikwashili chayilejeliyi kwiluña kwakushimwina ninsañu yakushimwina. (Mat. 10:5-7) Munateli kumwimbujola ñahi Yesu? Mukwashenu kadizi wenu yeluki kwatela kushimwinayi. Chakutalilahu, mwihulenu neyi kudihu muntu welukayi watela kutiya kuwaha kudiza chalala chamuBayibolu. Mukwashenu chakuloñesha yuma yatela kuhoshayi nawa mulejenu chatela kulejayi akwawu chalala. w21.06 6 ¶15-16

“Mujiminiti jantesha hohu, mashopu nimatala atachikili kuhumoka. Antu ejima adiña nakululuta . . . Antu amavulu ahosheli nawu chasendeli hohu maminiti kwakwihi nayedi. Kudi ami chamwekeni neyi chasendeli mpinji yayilehi.” Awa diwu mazu ahosheli antu apulukili hampinji yikwaholokeli mutentashi mwituña daNepal mu 2015. Hela chochu, chayinu mpinji tunakumona kukanka kwambukaku kunakumwekana mumatuña amavulu. Kaprofwetu Hagayi wasonekeli nindi: “Yehova wamazaza nahoshi nindi, ‘Cheñi nawa, kunashali mpinji yantesha nakakankisha mawulu namaseki.’” (Hag. 2:6) Kukanka kwateneniyi Hagayi hikudi neyi mutentanshi wakisañanaña hohu yumaku. Ilaña mwafumaña yuma yayiwahi. Yehova yomweni watuleja nindi: “Nakakankisha ninyuza yejima, niyuma yatiyaña nyuza yejima kuwaha yakenza, nakenzesha italidi nakulema.” w21.09 14 ¶1-3

Wubwambu wawantu wakolaña neyi anakuhanjeka mpinji yejima nikudileja chinakutiyawu. Wubwambu wetu naYehova niwena dichiwekala. Neyi tumulejamu mukulomba chitunakutiya nichitunakutoñojoka, twamwekeshaña netu twamukuhwelela cheñi netu watukeña. (Mas. 94:17-19; 1 Yow. 5:14, 15) Dikundenuña nawamabwambu jenu ashinshika; hiyawaana yatwinkayi Yehova. (Yak. 1:17) Tata yetu wamwiwulu wamwekeshaña nindi watukeña chatwinkayi amanakwetu niahela “[atukeña] mpinji jejima.” (Yish. 17:17) Mumukanda wayisonekeleliyi aKolosi, kapostolu Pawulu watenenimu akwaKristu amukwashileña nindi ‘amukundejeleña chikupu.’ (Kol. 4:10, 11) Kristu Yesu niyena wayisakilileña amabwambu jindi amukwashileña, añelu niantu. (Luka 22:43) Kulejamu amabwambu jetu apama kukala kwetu kwamwekeshaña nawu twazeya wanyi, ilaña kunateli kutukwasha. w21.04 24-25 ¶14-16

Indi neyi mukwenu mukwakwitiya yela yuma yinayineñeshi, mukwila ñahi? Zatenu nañovu yejima kulonda muleti kuwunda. Mulejenumu Yehova mukulomba chimunakutiya. Mulombenu yamukiswili owu muntu wunayihukeshi, nawa yayikwashi kumona yilwilu yayiwahi yekala nanowu muntu, yilwilu yayiwahi yakeñayi Yehova mudi yena. (Luka 6:28) Neyi mukutwesha wanyi kujimbala yiluwa yineliyi manakwenu, toñojokenu hanjila yayiwahi yimwatela kuhanjekelamu. Chachiwahi kutoñojoka mpinji yejima nenu manakwenu hanateli kuyineñeshelamu hohuku. (Mat. 5:23, 24) Neyi munakuhanjeka nindi, toñojokenuña nenu himuntu wudi nayilwilu yayiwahi. Indi neyi nakukeña kuleta kuwunda wanyi? “Ditiyililenuña.” Twalekenuhu kwikala adiwunjika namanakwenu. (Kol. 3:13) Chuma chasweja kulema, bayi mudihililaku muloña chikuluwañesha wubwambu wenu naYehova. Bayi mwiteja chuma chidi chejima chiyihukeshiku. Neyi mwilaña mwenimu, mukumwekeshaña nenu mwamukeña Yehova kubadika chuma chidi chejima.—Mas. 119:165. w21.06 23 ¶15