December

Yesu wesekejeli wubwambu wukwetiyi nawatumbanji twindi nachadikundañayi kabiña nanyikoku yindi. (Yow. 10:14) Ichi chakutalilahu chinateleli. Nyikoku yeluka izu dakabiña kawu nawa yatiyililaña izu dindi. Dichuma chamweniyi nimuntu wumu. Wahosheli nindi: “Twakeñeleña kukwata nyevulu yanyikoku nawa twafwilileña kuyileta kukamwihi. Ilaña yenjili wanyi muloña yelukili wanyi mazu etu. Nkumininaku kwenjili kabiña wakansi; chayitambikiliyi hohu, enza nikwinza.” Chuma chamweniyi iwu muntu chatwanukishaña mazu aYesu ahosheliyi hadi anyikoku jindi hela netu atumbanji twindi. Wahosheli nindi: “Akatiya izu dami.” Yesu wudi mwiwulu. Hanu tunateli kutiya ñahi izu dindi? Njila yimu mutwamwekeshelaña netu tunakutiya izu daNkaaka yetu hikuzatisha yuma yatudizishiliyi muchihandilu chetu.—Mat. 7:24, 25. w21.12 16 ¶1-2

Kapostolu Pawulu wadiña mukakukabisha akaKristu. Chimwahitili mpinji welukili nindi welileña yuma yatama nawa wazatili nañovu kulonda ahimpi yilwilu yindi niwuntu windi. (1 Tim. 1:12-16) Nawukwashu waYehova, Pawulu wekalili mukulumpi wukweti kukeña, wushona nawa kabiña wadizoza. Ilaña washili wanyi muchima nakutoñojoka hakuzeyazeya kwindi, wakuhweleli nindi Yehova namwanakeni. (Rom. 7:21-25) Hatoñojokeli nindi hatela kwikala wawaninaku. Ilaña wazatili nañovu kulonda ekali nayilwilu yamukaKristu nawa wamushindameneni Yehova amukwashi kuzata mudimu windi. (1 Kor. 9:27; Fwili. 4:13) Akulumpi hiyayitondaña hamuloña wakwila awaninaku. Hela chochu, Yehova wakeñaña nindi etejeña yiluwa yawu nikwikala nayilwilu yawakaKristu. (Efwe. 4:23, 24) Mukulumpi watela kuzatishaña yuma yadizañayi muBayibolu kulonda chimukwasheñaku kumona hatela kuwahishayi. Nkumininaku, Yehova wukumukwasha kwikala namuzañalu nikwikala mukulumpi wamuwahi.—Yak. 1:25. w22.03 29-30 ¶13-15

Chumanyi chitwatela kwila neyi twiluka netu tunamusompeshi mukwetu mukwakwitiya? Twatela kwanuka netu twatela kuyikeña amanakwetu. (Yak. 2:8) Twatela cheñi kumulomba Yehova nakumulembelela kulonda yatukwashi tubuleña kusompesha akwetu. Twatela kwila mutunakulomba kuhitila mukwikala nampinji yakuhanjeka namuntu itwatoñojokeleleña mwakutwamba. Twatela kumulomba kulonda twakazati nindi mumudimu wakushimwina hela yakenzi tukadiili hamu. Chitukumwilukaña chiwahi manakwetu, twatela kumwimbujola Yehova niYesu kuhitila mukumona yilwilu yayiwahi mudi yena. Neyi twilaña iyi yuma, tukumwekesha netu tunakutiyilila lushimbi lwatulejeliyi kabiña wamuwahi nindi, lekenu kusompesha akwenu. Neyi chochatiyililaña nyikoku izu dakabiña kawu, atumbanji twaYesu niwena atiyililaña izu dindi. Hela chakwila tudi “mukanka wanyikoku wanyanya” hela “anyikoku amakwawu,” tutwalekihu kutiyilila nikwovwahila izu dakabiña wamuwahi.—Luka 12:32; Yow. 10:11, 14, 16. w21.12 19 ¶11; 21 ¶17-18

Chelili Rehobowami ekali mwanta waIsarela, antu jindi enjili kudi yena nakumulomba chuma chimu. Amulombeli kuyipeleshelaku chisenda chayitwikiliwu kudi tata yindi, Solomoni. Rehobowami welili chachiwahi wayili nakuyihula akulumpi amuIsarela kulonda yeluki chatela kuyakulayi antu. Dichi akulumpi amulejeli nawu neyi yela munakukeñawu antu, antu akuzatilaña hamu nayena. (1 Anya. 12:3-7) Chakadi nikujina, Rehobowami wazañaleli wanyi nachamukwashiliwu akulumpi dichi wayili nakwihula akwawu akuliliyi nawu hamu. Amulejeli nawu yayibombeliku kuyisenda yawantu. (1 Anya. 12:9-11) Rehobowami wateleleli kumwihula Yehova kulonda amuleji mwakwilila. Ilaña walondeleli kufumba kwamufumbiliwu kudi akwawu atwansi. Chafuminimu yena niaIsarela amweni kukala. Ninetu kufumba kutunateli kutambwila hikunateli kututiyisha kuwaha mpinji yejimaku. Ilaña neyi kunashindameni Hezu daNzambi twatela kukutambwila. w22.02 9 ¶6

Muntu wadikehesha nawa wadizoza washaña maana hañovu jikwetiwu atwansi bayi hakubula kwiluka nyidimuku. Wadibechaña nawu wanyi, ilaña wayimonaña nindi hiyakwakukalakala hamu nindi. Antu akula dehi atoñojokaña nawu atwansi hiyawana yakufuma kudi Yehova nawa ayisakililaña hanyidimu yazatañawu. Neyi ñovu jawu hijikuya nakumana, antu akula dehi eluka nawu kudi atwansi adi nañovu anakukeña kuzata nyidimu muchipompelu nawa anakuzata nañovu. Nyawomi himuntu ashimunawu muBayibolu watela kwimbujolawu antu akula dehi wetejeli kumukwashaku kudi kansi. Hakusambila Nyawomi wamulejeli mukuwindi Luti kufunta kudi antaña jindi. Hela chochu, chelili Luti yamukakeli Nyawomi nindi wukufunta nindi kuBetelemi, Nyawomi wetejeli. (Luti 1:7, 8, 18) Nawa chuma cheliliyi chayikwashili wejima wawu. (Luti 4:13-16) Neyi antu akula dehi ekala adizoza akumwimbujolaña Nyawomi. w21.09 10-11 ¶9-11

Tata yetu wamwiwulu watwiluka wonsu wetu niyuma yitunateli kwila. Hadaha munateli kuzata chiwahi kubadika antu amavulu imweluka nawa imwakeña. Hadaha munateli wanyi kuzata neyi chinakuzatawu akwenu, hadaha muloña wayaaka, kukola kumujimba indi kwiji nyidimu yamuchisaka. Bayi muzeyaku. (Ñal. 6:4) Yehova hakavulamena mudimu wenuku. Wukuzañalala chakala hohu munakuzata hanakumini ñovu yenu nawa nayilwilu yayiwahi. Yehova wamonaña cheñi yuma yimunakukeña kuzata. Nakukeña nindi mwikali namuzañalu nikuzañalala nanyidimu yimunakuzata mukudifukula kwetu. Tukweti kuwunda kwamuyitoñojoka muloña tweluka netu Yehova wakwashaña akakudifukula indi neyi anakumona kukala. (Isa. 41:9, 10) Tukweti wunsahu wukuletesha twikali namuzañalu hampinji yitunakudifukula kudi Tata yetu wukweti kukeña “watelela kutambwila kulema nikalemesha” kufuma kuyileñaleña yindi yejima!—Chim. 4:11. w22.03 24 ¶16; 25 ¶18

Twatela kumwimbujola Yesu, ilaña bayi tuneñaku neyi tunakumwimbujola wanyi Yesu chikupu. (Yak. 3:2) Kadizi hanateli kwila yuma yejima yelañayi ntañishi yindiku. Ilaña chikudizilañayi kuyiluwa yindi nikumwimbujola ntañishi yindi, kadizi wukuyilañaku hambidi chovu-chovu mukudiza kwindi. Munjila yoyimu, neyi tuzatishaña yuma yitwadizaña muBayibolu nikuhimpa chovu-chovu, tukulondelaña chakutalilahu chaYesu chikupu. (Mas. 119:59) Tunakushakama mukaayi munatandi chilwilu chakudikeña. Ilaña antu jaYehova ambukaku. Chilwilu chaYesu chakudihana chinatushiki hamuchima nawa tunakufwila kumwimbujola. (1 Pet. 2:21) Chitukwimbujolaña chilwilu chaYesu chakudihana, ninetu tukwikala namuzañalu wenzaña hamuloña wakumutiyisha Yehova _kuwaha. w22.02 24 ¶16; 25 ¶18

Njila yimu Yehova munakulombwelayi antu jindi makonu hikuzatisha Izu dindi, Bayibolu. Neyi twikala nampinji yakutoñojoka chikupu hayuma yinakutudizishayi Yehova, tukulondelaña wunlomboli windi nikuzata mudimu wetu wakushimwina. (1 Tim. 4:15, 16) Njila yikwawu mwatulombwelañayi Yehova hikuzatisha “nduñu wamaana nikashinshi.” (Mat. 24:45) Mpinji yikwawu, iwu nduñu nateli kutuleja nshimbi jitunateli kubula kutiyishisha chikupu. Chakutalilahu, anateli kutuleja nshimbi yinakushimuna chitwatela kupuluka kuwubanji wadimwekenaña wutunateli kutoñojoka netu kwila wumwekana mwiluña detu nehi. Tunateli kwila ñahi neyi tunakutoñojoka netu nshimbi jinakutwinkawu jamukunkulwayi? Toñojokenu nsañu yikwawu yamuBayibolu yitunatañi. Mpinji yikwawu antu jaNzambi atambwilileña wunlomboli wamwekeneña neyi hiwukuyikwashaku kwesekeja nammwenu yawuntu ilaña wayipulwishili.—Anso. 7:7; 8:10. w22.03 18-19 ¶15-16

Yesu wahosheli nezu datiyakana mazu adi munsona yalelu. Yesu welukili nindi wumi windi washindameneni hadi Yehova nawa welukili chikupu nindi Tata yindi wakamwanuka. Yumanyi yitunateli kudizila kumazu aYesu? Ikalenuña ashinshika kudi Yehova hela chakwila wumi wenu wudi muwubanji. Hakwila mwili mwenimu, mwatela ‘kumukuhwelela Yehova namuchima wenu wejima.’ (Yish. 3:5) Talenu chakutalilahu chaJoshua, Chinsahu wadiña nayaaka 15 wakatili chikatu chafwana. Wakaanini kuzatisha njila yakuukilamu yikuletesha yafumpi nshimbi jaNzambi. Henohu kanda yafwa wamulejeli mama yindi nindi: “Mama Yehova wukuñakamena. . . . Nakuhweleli chikupu chumichi: Neluki nami Yehova wukansañula. Neluki yitoñojoka yami nichinatiyaña nawa namukeña nankashi.” Wejima wetu twatela kudihula netu, ‘Neyi chikuhwelelu chami chadiña mukweseka chakwila nifwa, komana nukutwalekahu kwikala washinshika kudi Yehova nakumukuhwelela nami wakañanuka neyi nifwa?’ w21.04 12-13 ¶15-16

Mudimu wakushimwina wayikoleshaña antu jaYehova. Neyi tulejaku antu chalala chamuBayibolu, twatiyaña kuwaha hela chakwila aneteji hela nehi. Muloña wakukala kunakumonawu, amakwawu anateli kutoñojoka nawu hiyanakuzata nañovu mumudimu wakushimwinaku. Neyi ninenu dichimwatoñojokaña, anukenu nenu Yehova wazañalalaña chimwazataña hakumina ñovu yenu. Yehova wamonaña nawa watiyaña kuwaha chitwazataña nañovu mumudimu wakushimwina hela chakwila twekala hohu hetala muloña wayikatu. Nateli kutukwasha kuyishimwina anhembi, andotolu hela anansi. Neyi twesekejaña chitwazatileña kunyima nachitunakuzata yinu mpinji tunateli kuzeya. Ilaña neyi twiluka Yehova chinakutukwashayi chayinu mpinji, tukwikala nañovu yakuumika kukala namuzañalu. Tuneluki wanyi mbutu jachalala jitunakutumba jikamena nakutachika kukula.—Mukwa. 11:6. w21.05 24-25 ¶14-17

Lwisu lwamuletesheli Mwanta Davidi kuvulamena yuma yamwinkeliwu kudi Yehova, maheta, mpuhu nichashindiliyi ayilumbu jindi amavulu. Davidi welukili nindi yawaana yaNzambi ‘yasweja kuvula, kutwesha kuyichinda nehi.’ (Mas. 40:5) Ilaña mpinji yimu, Davidi wavulameneni yuma yamwinkeliyi Yehova. Hela chakwila Davidi wadiña nawambanda amavulu, wetejeli kufwila kwatama kumukojeji kufwila ñoda mukwawu. Iwu mumbanda wadiña Batisheba nawa nfumwindi wadiña Uriya kaHiti. Dichi Davidi welili wuvumbi naBatisheba, nawa wamwinkeli ivumu. Chuma cheliliyi Davidi chadiña chatama, ilaña wabombelelihu nichuma chikwawu chasweja kutama, wakwatili kafuta kakumujahilamu Uriya. (2 Sam. 11:2-15) Chumanyi chatoñojokeleñayi Davidi? Komana watoñojokeleña nindi Yehova wukumumona wanyi? Kambuña aYehova wadiña washinshika wekalili nalwisu, nawa lwamuleteleli kukala. Nkumininaku, Davidi wetejeli nshidi jindi nawa wabalumukili. Watiyili kuwaha chamwanakeneniwu kudi Yehova.—2 Sam. 12:7-13. w21.06 17 ¶10

Tunateli kutoñojoka netu tukutwesha wanyi kulombola atudizi aBayibolu. Hadaha twatoñojokaña netu twatela kwiluka yuma yayivulu hela jinjila jajivulu henohu kanda tutachiki kudiza namuntu. Neyi dichimwatoñojokaña, talenu jinjila jisatu jinateli kuyikwasha. Chatachi, Yehova weluka nindi munashikilimu kudizisha antu. Chamuchiyedi, Yesu ‘wudi nawuswa wejima wakutala yuma yejima yamwiwulu nihamaseki,’ wayinka mudimu wakudizisha. (Mat. 28:18) Nawa chamuchisatu, mudi nawakwenu anateli kuyikwasha. Yesu amulejeleña yuma yakuhosha kudi Tata yindi, ninenu anateli kuyikwasha. (Yow. 8:28; 12:49) Kubombelahu, munateli kuhanjeka namukulumpi wezanvu denu dakushimwina, payiniya hela namukwakushimwina wunateli kuyikwasha kutachika nikulombola kadizi waBayibolu. Njila yimu yinateli kuyikwasha kwikala antañishi amawahi, hikuzata nanawa akwakushimwina neyi anakulombola atudizi aBayibolu. w21.07 6 ¶12

Chineli kukuma kwanshakaminu yamakonu kunakuswina mukamwihi, twatela kukuhwelela chikupu munjila yelilañamu Yehova yuma kubadika kunyima. Muloñadi? Hampinji yalukadi lwasweja, hadaha tukatambwila nshimbi jikamwekana neyi jakala kutiyisha hela kujovwahila. Hela chochu, Yehova hakahoshaña nanetu hamuntu-hamuntuku. Hamwaha wakatwinkaña nshimbi kuhitila mudi antu amwimenañaku. Kwakekala wanyi mpinji yakujinoka wunlomboli hela kutoñojoka netu, ‘Komana yuma yinakutulejawu yinakufuma kudi Yehova tahindi hiyitoñojoka yawamanakwetu anakulombola?’ Komana mwakamukuhwelela Yehova nikuloñesha kwindi haniyi mpinji yakala mukuhanda kwawantu? Neyi mwalondelaña wunlomboli wafumaña kudi antu amwimenañaku Nzambi chayinu mpinji, chikuyikwasha kwakula ilu lwihu. Neyi mwovwahilaña nshimbi yitwatambwilaña makonu, chakadi nikujina mwakela chuma chochimu nihalukadi lwasweja. w22.02 6 ¶15

Gideyona niamayala 300 ashindili njita nawukwashu waYehova yateleleli kudisambilawu. Amayala akuEfweremi ayili nakumuwana Gideyona bayi nakumuhamekaku, ilaña nakumubobwesha muloña ayitambikili wanyi nawu enzi nakwasila nawu hamu njita. (Anso. 8:1) Gideyona wayanukishili Yehova chayikwashiliyi kuzata mudimu weneni. Chafuminimu, awa amayala “nikuzuwa nindi nehi.” (Anso. 8:3) Gideyona wadizozeli kulonda yatwalekihu kwikala mukuwunda nawantu jaNzambi. Kudi aEfweremi, tunakudizilaku netu hitwatela kusha maana hakudilemesha etu aweniku, ilaña twatela kumulemesha Yehova. Nyitu yayisaka niakulumpi, munateli kudizila kuyuma yeliliyi Gideyona. Neyi muntu nahili nayuma yitwelili, twatela kwiluka yuma yinaleteshi yahili. Twatela cheñi kumuhameka muntu hayuma yayiwahi yineliyi. Chakeñekaña kwikala adizoza hakwila twili mwenimu. Chachiwahi kuleta kuwunda kubadika kumwekesha netu etu tudi chiwahi. w21.07 16-17 ¶10-12

Yehova chatuleñayi muchinfwana chindi wamwekeshaña nindi watulemesha. Chineli Yehova watuleña muchinfwana chindi tunateli kwikala nayilwilu yayiwahi yidi neyi kukeña, luwi, kashinshi nikuloña. (Mas. 86:15; 145:17) Neyi twikalaña naniyi yilwilu, tukumwekesha netu twamulemesha Yehova nawa twamusakililaña. (1 Pet. 1:14-16) Neyi tumuzañaleshaña Tata yetu wamwiwulu, tukwikalaña namuzañalu. Nawa chatuleñayi muchinfwana chindi, Yehova watwinka wuswa wakwikala muchisaka neyi antu akeñañayi muchisaka chindi. Yehova watuloñesheleli mukala wawuwahi. Henohu kanda yaleñi muntu watachi, Yehova wayiloñesheleli antu iseki kulonda ashakameñamu. (Yoba 38:4-6; Yere. 10:12) Chineli watutoñojokelañaku nawa wekala nachisambu, Yehova watuloñesheleli yuma yayiwahi nawa yayivulu yitwatela kudiluñisha. (Mas. 104:14, 15, 24) Mpinji yimu, washinshikili hayuma yaleñeliyi nawa ‘wamweni nindi yinawahi.’—Kutach. 1:10, 12, 31. w21.08 3 ¶5-6

Wejima wetu tukweti mudimu wakushimwina nikwilisha atumbanji. (Mat. 28:19, 20; Rom. 10:14) Komana mukukeña kuwahishaku nzatilu yenu muniwu mudimu walema? Tañenuña broshuwa yaKutañisha nawa ikalenu nayikonkwanyi yikuyikwasha kuzatisha yuma yimunadizi. Bayi muvulamena nenu chikonkwanyi chalema chimwatela kwikala nachu, hikwikala nayilwilu yamuzañaleshaña Nzambi. (Kol. 3:12; 2 Pet. 1:5-8) Chakadi nikujina, wejima wetu twakeñaña kumukalakela Yehova chikupu kubadika chitunakumukalakela chayinu mpinji. Mwituña dadiha daNzambi, tukamukalakelaña hakumina ñovu jetu. Dichi neyi tuzataña nañovu mumudimu wutukweti chayinu mpinji, tukwikala namuzañalu nawa tukuneñaña wanyi. Nawa chuma chasweja kulema, tukuleta mpuhu nikalemesha hadi Yehova, Nzambi yetu “wamuzañalu.” (1 Tim. 1:11) Dichi tuzañalaleña nanyidimu yitunakuzata chayinu mpinji! w21.08 25 ¶18-20

Neyi ayikulishilili muchisaka chawaYinsahu jaYehova, hadaha mwamwilukili Yehova himwadiña akansi. Ayidizishili nawu diyi Nleñi, wukweti yilwilu yayiwahi, nawa wakeñaña kwilisha iseki kwikala Paradisa. (Kutach. 1:1; Yilw. 17:24-27) Antu amavulu akuhwelela nawu kwekala Nzambi wanyi nawa nawu diyi waleñeli yuma yejima wanyi. Ilaña, akuhwelela nawu yuma yadivumbukilili hohu yayeni nawa yatachikili kutuñika nakwikala yuma yamaneni yashiyashana yikweti wumi. Antu amakwawu akuhwelela mwenimu hiyantu ataña nankashi. Ashimunaña nawu sayansi yinamwekeshi nawu Bayibolu yashimunaña mwakutwamba nawa antu akuhwelela mudi Nleñi hiyantu abula kutaña, abula kubabala, hela aswayi kudimba. Hela chakwila hanashimbuli kufuma hitwekalili Chinsahu chaYehova, wejima wetu twatela kutwalekahu kukolesha chikuhwelelu chetu. Neyi twila mwenimu, akutudimba wanyi “namaana awantu, nintañishilu yamukunkulwayi yamwaya tushidikilu twawantu,” yatadikishaña Izu daNzambi.—Kol. 2:8. w21.08 14 ¶1-3

Abeli, Nowa, Abarahama niYoba amwekesheli nawu amulemesha Yehova nikumukeña kuhitila mukumwovwahila, mukumukuhwelela nikumulambula nyilambu. Azatili hakumina ñovu jawu kumulemesha Yehova, nawa wetejeli kudifukula kwawu. Chimwahitili mpinji, Yehova wayinkeli anyana kaAbarahama Nshimbi jaMosi. Muniyi nshimbi mwabombeleli nshimbi yahosheleña hachateleleliwu kudifukula kudi Yehova munjila yetejayi. Chelili Yesu afwi nawa asañuki, Yehova hakeñeleña nindi twovwahileña Nshimbi jaMosiku. (Rom. 10:4) Dichi akaKristu ateleleli kulondela lushimbi lwaluha, “lushimbi lwaKristu.” (Ñal. 6:2) Ateleleli kwovwahila ilu “lushimbi,” bayi neyi kulondela nshimbi jajivuluku, ilaña kuhitila mukumwimbujola Yesu nikulondela ntañishilu yindi. Nimakonu, akaKristu azataña nañovu hakumulondela Kristu kulonda amuzañaleshi Yehova nawa ‘anookeña.’—Mat. 11:29. w22.03 20-21 ¶4-5

Yehova wayitiyililaña anyanindi. Yehova watiyilili kulomba kwakuvulu kwalombeliyi Mwanindi hampinji yadiñayi hanu hamaseki. Watiyilili kulomba kwaYesu hampinji yafuukwileñayi chuma chalema, chidi neyi hakutonda apostolu 12. (Luka 6:12, 13) Yehova watiyili cheñi kulomba kwaYesu hampinji yakameneniyi nankashi. Henohu kanda amufukejeli, Yesu walombeli kudi Tata yindi hayuma yenjili nakumumwekena. Yehova hakuminini dakutiya kulomba kwaYesuku, ilaña watemesheli cheñi kañelu kulonda yamukoleshi Mwanindi wakeñayi. (Luka 22:41-44) Nimakonu, Yehova natwalekihu kutiyilila kulomba kwawambuñindi, nawa wakulaña hampinji yatelela nawa munjila yayiwahi. (Mas. 116:1, 2) Talenu muhela wakuIndia chamweniyi Yehova chakwiliyi kulomba kwindi. Wakameneneña chikupu, nawa wamulombeli Yehova kulonda yamukwashi naniku kukala kwadiñayi naku. Wasonekeli nindi: “JW Broadcasting^® yaMay 2019 yahosheleña hachitunateli kwila neyi tunakwakama yankwashili. Yehova wakwili kulomba kwami.” w21.09 21-22 ¶6-7

Chatela chayikalili awa akwaKristu akusambila kushiya yuma yejima yadiñawu nayu nakutachika chihandilu chachiha. Ateleleli kumukuhwelela Yehova nawu wukuyinka yuma yejima yinakukeñawu. Ilaña kwadiña chuma chadi kuyikwasha. Chimwahitili yaaka 5 henohu Aroma kanda akuchiki musumba waYerusalema, kapostolu Pawulu wayifumbili aHeberu nindi: “Chihandilu chenu chiikali chakadi kusweja kukeña mali, iku munakuzañalala nayuma yimudi nayu. Muloña yena wahosha nindi: ‘Hinamba kakushiya hela kukufutalelaku.’ Kulonda twiikali nawulobu wakuhosha netu: ‘Yehova diyi nkwashi yami; hinukutiya womaku. Chumanyi chikuñilayi muntu?’” (Heb. 13:5, 6) Chakadi nikujina, ana atiyilili kufumba kwaPawulu henohu aRoma kanda ayilukuki chayipeleleli kwinjilila kushakama chihandilu chapela kwayiliwu. Elukili chikupu nawu Yehova wukuyinkaña yuma yinakukeñawu. w22.01 4 ¶7, 9

Neyi tunakutoñojoka hadi muntu wukweti luwi, tunateli kufwikija muntu wukweti muchima wamuwahi, wukweti wushona nawa wahanaña. Hadaha tukutoñojoka cheñi hansañu yashimwiniyi Yesu yakaSamaliya wamuwahi. Iwu iyala wakumuza wacheñi “wamutiyilili luwi” kaYudeya eteliwu kudi atupondu. KaSamaliya “wamutiyilili wushona” iwu kaYudeya akatishiliwu nawa wamuhembeli chiwahi. (Luka 10:29-37) Ichi chakutalilahu chinakutudizisha kwikala naluwi, chilwilu chachiwahi chekala naNzambi. Nzambi wukweti luwi muloña watukeña. Watutiyilaña luwi munjila jajivulu. Kudi njila yikwawu munateli kumwekeshelayi muntu luwi. Muntu wukweti luwi nateli kufukulahu kubula kubabesha muntu atela kubabeshawu. Dichi chatumwekeshelañayi Yehova luwi ninetu. Ñimbi yamasamu wahosheli nindi: “Hanatwili mwesekena nshidi jetuku.” (Mas. 103:10) Hela chochu, mpinji yikwawu Yehova neteli kubabesha muntu wunakoñi nshidi. w21.10 8 ¶1-2

Yehova wamwekeshaña kukeña kwindi kwakashinshi hohu kudi antu akweti wubwambu wawuwahi nayena. Mazu ashimwiniyi Mwanta Davidi nikaprofwetu Danyeli amwekeshaña chumichi. Chakutalilahu, Davidi wahosheli nindi: “Twalekakuhu kumwekesha kukeña kweyi kwakashinshi kudi antu akwiluka.” “Luwi lwaYehova lwakuyitiyilaña antu amwakamaña, lwakufumisha kunyaka yejima nakutwala kunyaka yahaya nyaka.” Danyeli niyena wahosheli nindi: “Eyi [Yehova] Nzambi muneni wakutiya woma, wahembaña chitiyañenu naluwi nawa amukeña, ahembaña nshimbi jindi.” (Mas. 36:10; 103:17; Dan. 9:4) Kwesekeja nanawa mazu onenawu, Yehova wayimwekeshelaña ambuñindi kukeña kwakashinshi muloña amwiluka, amwakama nawa ahembaña nshimbi jindi. Yehova wamwekeshaña kukeña kwindi kwakashinshi kudi antu adifukulaña kudi yena munjila yayiwahi. Henohu kanda tutachiki kumukalakela Yehova, Nzambi watukeñeli neyi chakeñayi antu ejima. (Mas. 104:14) Hela chochu, chineli tudi akwakudifukula indi, watumwekeshelaña cheñi kukeña kwindi kwakashinshi. w21.11 4 ¶8-9

Hela chakwila muntu wukutukanjikija chamuchidinyi, twovwahilaña awa amazu aYesu adi hewulu. Makonu, antu amavulu akeña kutiyilila kudi antañishi aya mpuhu. Ayitiyaña kuwaha chakwila adifukulaña kudi wena. Antu amavulu enzalaña mumachechi awu, alandaña nyikanda yawu nawa ayinkaña mali amavulu. Antu amakwawu akuhwelelaña mazu ejima ahoshañawu. Azañalalaña nankashi hakumona awa antañishi neyi chinateli kuzañalalawu neyi amumona Yesu. Kwambukaku, antu adifukulaña kudi Yehova munjila yayiwahi alondelaña antu wanyi. Hela chakwila twayilemeshaña antu alombolaña, wejima wetu twovwahilaña ntañishilu yaYesu yakwila nawu: “Wejima wenu mudi amanakwamuntu.” (Mat. 23:8-10) Hitwadifukulaña kudi antuku, chili anlomboli jansakililu hela anlomboli akwamatuña nachiyuulu. Hitwetejaña nsakililu yawu hela yuma yafwilañawu kwilawuku. Hitwadiñijaña munsañu jamatuña nachiyuuluku nawa twambukaku nakaayi. Muyuma yejimiyi, twekala ambukaku chikupu nansakililu yejima yaditenaña nawu tudi akwaKristu.—Yow. 18:36. w21.10 20 ¶6-7

MukwaKristu wejima wunakukeña kwikala wajila watela kwiluka nindi kwosi chuma chidi chejima chatela kwikala chalema kubadika wubwambu windi naNzambi. Nawa chineli tudi aYinsahu jaYehova, twafwilaña kutondolwela kwila yuma yikuleta kasawuntu hejina dindi dajila. (Lev. 19:12; Isa. 57:15) AIsarela amwekesheli nawu amwitejeli Yehova nawu hiNzambi yawu chovwahilileñawu nshimbi jindi. Alevi 18:4 yahosha nawu: “Mwakelaña mwaya wuñaji wami, mwakahembaña yidika yami, kulonda kwendelamu; yami Yehova Nzambi yenu.” Mukapetulu 19 mwekala “yidika” yayilejeliwu aIsarela. Chakutalilahu, muvasi 5-8, 21, 22 atenamu nyilambu yawanyama. AIsarela ahanineña iyi nyilambu munjila yakwila yibuli ‘kujilola yuma yajila yaYehova.’ Kutaña awa mavasi kukutuletesha kukeña kumuzañalesha Yehova nikuhana nyilambu yetejayi, neyi chatulejaña AHeberu 13:15. w21.12 5-6 ¶14-15

Antu anadisumbuli katataka atela kudizila kudi antu aneluki chakumushindamena Yehova. Adisumbula amakwawu anakalakali yaaka yayivulu mumudimu wampinji yejima. Yihulenu kulonda ayikwashi neyi munakufuukula yuma yimwatela kwila. Diyi njila yikwawu yakumwekeshalamu nenu mwamukuhwelela Yehova. (Yish. 22:17, 19) Anukenuña, Wulu hichawaana chafuma kudi Yehova. (Mat. 19:5, 6) Wakeñaña adisumbula adiluñisheña ichi chawaana. Enu munadisumbuli katataka shinshikenu chidi chihandilu chenu. Komana munakuzata nañovu kulonda mumwekeshi nenu munakusakilila hachawaana chayinkayi Yehova? Mulombenu Yehova. Sandujolenu yishina yinateli kuyikwasha Mwizu Dindi. Zatishenu kufumba kunakuyinkayi Yehova. Mwatela kwiluka nenu mukwikala namuzañalu nichihandilu chachiwahi neyi mumukalakelaña Yehova muwulu wenu! w21.11 19 ¶16, 18

Yakoba hatoñojokeli nindi wabadika akwawuku. Yakoba hatoñojokeli nindi wadiña walema kubadika akwawu akwaKristuku, muloña wakwila wadiña manakwaYesu hela muloña wakwila wadiña nanyidimu yalema. Wayiteneni akwawu akwaKristu nindi, “enu amanakwami inakeña.” (Yak. 1:16, 19; 2:5) Hadimweneña kuloñaku. Chuma chitunakudizilaku: Anukenu nenu wejima wetu tudi akwanshidi. Hitwatela kutoñojokaña netu hadaha twabadika antu itwadizishañaku. Muloñadi? Neyi tumuletesha kadizi wetu kutoñojoka nindi etu twawanina, wukuzeya, muloña wukutoñojokaña nindi hakutwesha kumwovwahila Nzambi chikupuku. Ilaña neyi twitejaña netu ninetu mpinji yejima chatukalilaña kwovwahila yishina yamuBayibolu nawa tumulumbulwila chinatukwashiyi Yehova kuumika kukala, tukumukwasha kadizi wetu kwiluka nindi niyena nateli kumukalakela Yehova. w22.01 11-12 ¶13-14

Neyi tutoñojokaña neyi chatoñojokañayi Yesu, tukwilaña neyi chelañayi nawa tukwimbujolaña yilwilu yindi. (Heb. 1:3) Hadaha tunateli kutoñojoka netu: ‘Yesu wawanina. Hinukutwesha kwikala neyi yenaku!’ Neyi mumona nenu munatachiki kutoñojoka muniyi njila, mwanukeña iyi yikuma. Chatachi, ayileñeli neyi chekalayi Yehova niYesu. Dichi munateli kutondahu kuyimbujola nawa mukutwesha kwikala neyi wena, munateli kuyimbujola hanakumini ñovu yenu. (Kutach. 1:26) Chamuchiyedi, spiritu yaNzambi yajila diyi ñovu yabadika mukuleña kwejima. Yikuyikwasha kuzata nyidimu yayivulu yimukukañanya kuzata nañovu jenu. Chamuchisatu, Yehova hakuhwelelaña nindi mukumwekeshaña mukaabu waspiritu nakushikahuku. Kafwampi, Tata yetu wukweti kukeña washaku yaaka 1,000 kulonda antu akweti kuchiñeja kwakushakama hamaseki akekali awanina. (Chim. 20:1-3) Chuma chinakukeñayi Yehova chayinu mpinji hikuzata nañovu nikumushindamena yena kulonda atukwashi. w22.03 9 ¶5-6

Kulomba hidiyi njila yimu hohu mutunateli kukoleshela wubwambu wetu naYehovaku. Kudiza Izu daNzambi nikuya nakupompa nikwena kunateli kutukwasha kuswina kwakwihi naNzambi. Munateli kuzatisha ñahi mpinji chiwahi hampinji yimunakudiza nihimunakupompa? Dihulenu nenu, ‘Chumanyi chanluwañeshaña neyi inakupompa hela neyi inakudiza?’ Himafoni tahindi, maemelu, mameseji tahindi yozelu yikwawu? Neyi mumona nenu munatachiki kutoñojoka hayuma yacheñi hampinji yimunakudiza hela kupompa, mulombenu Yehova kulonda yayikwashi. Chekalaña chakala kuleka kutoñojoka hachuma chinakuyakamisha nakusha muchima hakudiza, ilaña chalema kushaku muchima. Lombenu ayinki kuwunda kukuhemba muchima wenu “niyitoñojoka yenu.”—Fwili. 4:6, 7. w22.01 29-30 ¶12-14

Mwanta Uziya wakaanini kutambwila kufumba. Weñilili mukapeka kamutembeli yaYehova mwetejeliwu hohu atupristu kwiñilamu nawa wakeñeleña hohu kuhana insensi. Atupristu aYehova amuwanini nakumuleja nawu: “Eyi Uziya, chachiwahi wanyi eyi kumwochela Yehova insensi! Atupristu hohu diwu atela kwocha insensi.” Indi Uziya welili ñahi? Neyi wadizozeli nakwiteja kufumba nawa nakufuma mutembeli hohenahana, Yehova wadi kumwanakena. Ilaña “Uziya wazuwili nankashi.” Muloñadi chazuwililiyi nakukaana kutambula kufumba? Chakadi nikujina, watoñojokeleña nindi chineli wadiña mwanta, wadiña nañovu yakwila yuma yejima yakeñeleñayi. Ilaña Yehova dichatoñojokeleñayi wanyi. Hamuloña wachilwilu chindi chakudinka wanta, Uziya amweteli nambumba nawa wekalili “mukambumba kushika nifuku dafwiliyi.” (2 Kushi. 26:16-21) Chuma chamumwekeneni Uziya chinakutudizisha nawu, hichikweti muloña nachitwekalaku, neyi tukaana kufumba kwamuBayibolu wubwambu wetu naYehova wunateli kumana. w22.02 9 ¶7

Muntu wavwala “wuntu wawukulu” kakavulu watoñojokaña nikwila yuma kwesekeja nanshidi. (Kol. 3:9) Nateli kwikala wadikeña, wazuwa, wabulaña kusakilila nawa wadivwimba. Nateli kudiluñisha kutala nyevulu yanzekesi nimafwilimu atama hela amadombu. Chakadi nikujina, wudi nayilwilu yikwawu yayiwahi nawa nateli kudinka nyiloña hayuma yatama yahoshañayi hela yelañayi. Ilaña hanakufwila kuhimpa chikupu yitoñojoka yindi niyilwilu yindiku. (Ñal. 5:19-21; 2 Tim. 3:2-5) Wejima wetu twawanina wanyi, dichi kwosi muntu wunateli kufumisha chikupu yitoñojoka yatama hela kufwila kwatama muyitoñojoka yetuku. Mpinji yikwawu tukwilaña hela kuhosha yuma yitunateli kuditoñesha. (Yere. 17:9; Yak. 3:2) Ilaña neyi tuvuula “wuntu wawukulu” yilwilu yakumujimba niyaaku hiyikutuyuulañaku. Twekalaña ambukaku.—Isa. 55:7. w22.03 3 ¶4-5

Enu akulumpi, monenuña yilwilu yayiwahi yidi nawamanakwenu niahela. Ejima wawu awanina wanyi; ilaña akweti yilwilu yayiwahi. Hela chochu, akulumpi atela kuyifumba amanakwetu niahela mumpinji-mumpinji. Ilaña kufwana kapostolu Pawulu, akulumpi atela kuzata nañovu kulonda abuleña kusha muchima kumazu anateli kumuneñesha muntu niyuma yelañawu. Ilaña atela kushaña muchima hakukeña kwamukeñayi iwu muntu Yehova, chinakuumikayi hakumuzatila Nzambi, nimuchima wukwetiyi wukukeña kwila yuma yayiwahi. Akulumpi ashaña muchima hayilwilu yayiwahi yikwetiwu akwawu, ayikwashaña amanakwawu niahela kwiluka nawu ayikeña kudi antu ejima muchipompelu. Anukenuña nenu Yehova hanakukeña nindi mwikali awaninaku; ilaña nindi mwikali ashinshika. (1 Kor. 4:2) Mwatela kwiluka chikupu nenu Nzambi watiyaña kuwaha nanyidimu yimwazataña mumudimu windi. Yehova “hakavulamena mudimu wenu nikukeña kumwakeñeli ijina dindiku nachimwakalakeleli akakujila nichimunatwalekihu nakuyikalakela.”—Heb. 6:10. w22.03 31 ¶19, 21