October

Wejima wetu tunateli kuletesha kupompa kwendeña chiwahi kuhitila mukwimbila hamu nikwakula chachiwahi. Antu amakwawu chayikalilaña kwimba hela kwakula hadi antu amavulu. Komana ninenu chayikalilaña? Neyi chayikalilaña, talenu chuma chayikwashaña antu amakwawu kuleka kutiya woma. Kutalisha hakwimba, antu amakwawu awana nawu kwimba namuchima wawu wejima kwayikwashaña nankashi. Neyi tunakwimba tumina twetu twaWanta, chuma cheneni chitwatela kufwilaña hikumushimeka Yehova. Dichi, hampinji yimunakuloñesha kupompa, loñeshenuña nitumina nawa esekenuña kumona mazu adimu chinesakaniwu nansañu yimukudiza hakupompa. Cheñi, shenuña muchima hamazu chatela mutoñojokeña hachimwembaña. Kwakulahu kunateli kuyikalila antu amakwawu. Chumanyi chinateli kuyikwasha? Esekenuña kwakulahu mpinji yejima. Anukenuña nenu, chidi hohu CHIWAHI neyi ñakwilu yenu yikala yayihi, yapela, nawa yinashindameni hachikuma. Yehova watiyaña kuwaha chitwazataña nañovu kulonda twakulihu hakupompa. w22.04 7-8 ¶12-15

Izu dakwila nawu ‘nkwashi,’ datalisha kudi muntu wanyakalaña kuya nakukwasha muntu wunakukeñeka wukwashu. Fwikijenu munakumona Yehova nakunyakala kuya nakukwasha muntu wudi mukukala. Mukwiteja nenu iku kulumbulula kunakumwekesha chikupu Yehova chafwilañayi kutukwasha. Neyi Yehova wudi kukabadi ketu, tukuumika kukala kudi kwejima namuzañalu. Njilanyi mwatukwashilañayi Yehova? Hakwila twakuli ilu lwihu, tuhanjekenu hamukanda waIsaya. Muloñadi? Wuprofwetu wawuvulu wamwoneneniwu Isaya nawu asoneki, wunakundami kudi ambuña aNzambi makonu. Kubombelahu, Isaya kakavulu wamulumbululaña Yehova mumazu atupelelaña kutiya. Chakutalilahu, talenu Isaya kapetulu 30. Munaka kapetulu, Isaya wazatisha mazu atukwashaña kufwikija Yehova chatukwashañayi etu antu jindi (1) kuhitila mukutiyilila nakanañachima nikwakula kulomba kwetu, (2) kuhitila mukutulombola, nawa (3) kuhitila mukutukiswila makonu nikumbidi. w22.11 8 ¶2-3

Mumazu atemesheleliyi Yesu yipompelu yamuSimirina niFiladelifiya wayilejeli akaKristu akunawa maluña kubula kutiya woma kukaba makabisha chineli akayisomwena hamuloña wakwikala ashinshika. (Chim. 3:10) Twatela kwiluka netu mpinji yidi yejima anateli kutukabisha nawa twatela kuumika. (Mat. 24:​9, 13; 2 Kor. 12:10) Mukanda waChimwekeshu watulejaña nawu antu jaNzambi akayikabisha mumafuku etu, “mwifuku daMwanta.” (Chim. 1:10) Chimwekeshu kapetulu 12 yashimuna nawu njita yavundumukili mwiwulu hanyima yakuvwalika kwaWanta waNzambi. Mikeli, dikwila nawu Yesu Kristu alemeshawu hamu niamashidika indi azuñili njita naSatana niandemoni jindi. (Chim. 12:​7, 8) Chafuminimu, ayilumbu jaNzambi ayishindili nawa ayinatilili hamaseki, Satana naleti makabi asweja hamaseki nikumuchidi wamuntu.—Chim. 12:​9, 12. w22.05 5 ¶12-13

Mpinji yejima Yehova wasompeshaña mwaloña nawa mwamuwahi. Hekala nachaambuku. Hanakenaña kwesekeja nachinakumwekayi muntu, maheta akwetiyi, mpuhu hela wuswaku. (1 Sam. 16:7; Yak. 2:​1-4) Kwosi wunateli kumukanjikija Yehova hela kumwila majika kanwaku. Hafuukulaña muloña wayitoñojoka hela chikelaku. (Kwid. 34:7) Chakadi nikujina, Yehova hinsompeshi wamuwahi muloña watwiluka nankashi chitwekala. (Kuhit. 32:4) Ansoneki aNsona jachiHeberu elukili nawu kwanakena kwaYehova kwambukaku. Hamaluña amakwawu azatishili izu dachiHeberu dashimunawu mumukanda wumu nawu “adisoneka nakumwekesha kwanakena kwanakenañayi Nzambi mukanshidi, nawa hiyadizatisha haluwi nikwanakena kwamwanakenañayi muntu mukwawuku.” Yehova hohu diyi wukweti ñovu yakwanakena chikupu muntu wunabalumuki mumuchima. w22.06 4 ¶10-11

Neyi munakukulisha anyana chakadi iyala hela neyi mwambokelamu mukwitiya ilukenu chikupu nenu yuma yimwelaña yakoleshaña nikusañumuna antu ayimonaña. Mukwila ñahi neyi mwanenu nakwila wanyi yuma yimunakumudizisha? Anukenu nenu hahitaña mpinji yeneni hakwila mumudizishi mwana. Neyi mutumba lubutu, mpinji jikwawu munateli kujinoka neyi chakwila kakakula nakwikala mutondu nakutachika kusoña nyikaabu. Hela chakwila muneluki wanyi chakafumamu, mukutwalekahu nakuwutukumwina kulonda wukuli chiwahi. (Maku 4:​26-29) Munjila yoyimu, mama yawantu nateli kujinoka neyi chakwila nakuyishika anyanindi hamuchima. Tuneluki wanyi yuma yikafumamu. Ilaña neyi mutwalekahu kuzata nañovu kuyidizisha, mukuyikwasha ekali amabwambu jaNzambi. w22.04 19-20 ¶16-17

Hampinji yadifukwileñayi Solomoni kudi Yehova, wadimweneña munjila yayiwahi. Hadiñayi kansi, welukili mwakukumina, nawa walombeleña wukwashu kudi Yehova. (1 Anya. 3:​7-9) Solomoni chatachikiliyi kuyuula, welukili cheñi nindi kudivwimba kwatama. Chawushona, Solomoni wakañenyi kuzatisha kufumba kwindi yomweni. Chihahitili mpinji muchiyuulu chindi, Solomoni watachikili kudivwimba nawa wadiwili nshimbi jaNzambi. Chakutalilahu, nshimbi yimu yahosheli nawu mwanta wawaHeberu “bayi akasumbula ambanda amavuluku, kulonda muchima windi wakabuli kuluwankana.” (Kuhit. 17:17) Solomoni wadiwili lushimbi nawa wasumbwili ambanda 700 niantombu 300. (1 Anya. 11:​1-3) Hadaha Solomoni watoñojokeleña nindi “yuma yejima yidi hohu chiwahi.” Mukuhita kwampinji, Solomoni wamweni kukala muloña wakubula kumwovwahila Yehova.—1 Anya. 11:​9-13. w22.05 23 ¶12

Antu atela kufuukulahu chuma chalema. Komana akuhakwilaku Yehova Nzambi nawu diyi Nyuuli watelela wewulu niiseki, ntahindi akwimana kukabadi kachilumbu wazuwa, Satana Diyabolu? Muntu wejima watela kuditondelahu kukabadi katela kwikalayi. Kabadi kejima kakutondayi kakumwekesha neyi wukekala nawumi wahaya nyaaka hela nehi. (Mat. 25:​31-33, 46) Hampinji “[ya]lukadi lwasweja,” akayisha chinjikijilu chakupuluka hela chakujilumuka. (Chim. 7:14; 14:​9-11; Ezek. 9:​4, 6) Neyi munafuukulihu kuhakwilaku chiyuulu chaYehova, munafuukuli mwamaana. Ichi munakufwila kukwasha antu kufuukula chiwahi. Nkisu jikatambwila antu ahakwilañaku chiyuulu chaYehova nakashinshi. Twatela kwiluka ichi chalala chalema. Neyi twiluka ichi chalala chikutusañumuna kutwalekahu kumukalakela Yehova. Kubombelahu, twatela kuzatisha yuma yitunadizi kukwasha nachu antu kufuukula chachiwahi nikutwalekahu kwesekeja nachinafuukuliwu. w22.05 15 ¶1-2

Twatela kumutiyililaña Yehova bayi ayilumbu jetuku. Yoba watiyilili nakanañachima hampinji Yehova yahosheleñayi nayena. Nzambi wahanjekeleña naYoba, munjila yikwawu wamwihwileña nindi: ‘Neluki yuma yejima yinakumwekeni. Wunakutoñojoka neyi nukukañanya kukwakamena?’ Yoba wakwili nakudizoza nawa wasakilili chikupu nindi Yehova wamuwahi. Wahosheli nindi: “Nakutiyileña hohu namatu ami, ilaña ichi nakumoni namesu ami.” (Yoba 42:5) Yoba hahosheleñayi awa mazu watela wachidiña washakama mumawuti, mujimba windi wejima wadiña namahuti. Hela chochu, Yehova wamulejeli nindi wamukeña Yoba nawa wamutiyaña kuwaha. (Yoba 42:​7, 8) Nimakonu antu anateli kutuhosha kasawuntu nikutwila yuma yikumwekesha neyi tudi amukunkulwayi. Anateli kweseka kututamishila ijina hela ijina dakuloñesha. Kunsañu yaYoba tunadiziliku netu Yehova watukuhwelela nindi tunateli kutwalekahu kwikala ashinshika hela chakwila tunakumona makabi. w22.06 24 ¶15-16

Hela chakwila iyi yakekala mpinji yamuzañalu chikupu mwiwulu neyi Babiloni Muneni anamujilumuni dehi, kudi chuma chikwawu chikaleta muzañalu wasweja. (Chim. 19:​1-3) Kafwampi, chuma chalema mumukanda waChimwekeshu, “wulu waMwana kaMukoku.” A 144,000 ejima akekala mwiwulu henohu njita yaAmagedoni kanda ayizuñi. Hela chochu, iyi bayi neyi diyi mpinji yakekalaku wulu waMwana kaMukokuku. (Chim. 21:​1, 2) Wulu waMwana kaMukoku wakekalaku hanyima yakwila njita yaAmagedoni anayizuñi dehi nawa ayilumbu jaNzambi ejima anayifumishihu dehi. (Mas. 45:​3, 4, 13-17) Indi wulu waMwana kaMukoku wunayikundami ñahi antu anadibombelimu? Neyi chadibombañawu eyala namumbanda hamu muwulu, iwu wulu wachifwikija niwena wakanuñañesha Mwanta, Yesu Kristu, hamu ‘nansumbuki’ yindi a 144,000. Iyi mpinji yalema yakatachikisha nfulumendi yayiha kuyuula hamaseki hadi yaaka 1,000.—Chim. 20:6. w22.05 17 ¶11-13

Yesu washimwineñahu dehi nindi kumafuku akukuminina wakatonda “nduñu wamaana nikashinshi” kulonda akaloñesheña yakuda yakuspiritu. (Mat. 24:45) Dichuma chitunakumona. Yesu nakuzatisha izanvu danyanya dawawayishewa kwinka antu jaNzambi niadi nampwila yayakuda yakuspiritu “hampinji yatelela.” Awa amayala hiyadimonaña nawu hiyanyanta hachikuhwelelu chawakwawuku. (2 Kor. 1:24) Ilaña, eluka nawu Yesu Kristu diyi “nlomboli nawa mukulumpi kunyuza.” (Isa. 55:4) Kufuma tuhu mu 1919, nduñu washinshika naloñeshi nyikanda yashiyashana yinakwashi antu akweti mpwila kudiza chalala. Mu 1921 iwu nduñu wedishili mukanda waThe Harp of God kulonda wukwashi adi nampwila kudiza chalala chamuBayibolu. Mukuhita kwampinji edishili nyikanda yikwawu. Mukanda wudihi wayikwashili kumwiluka nikumukeña Tata yetu wamwiwulu? w22.07 10 ¶9-10

Yehova diyi Muntu wahanaña chikupu. Hela chakwila mukumwinka yuma yamuchidinyi, yena wukuyinkaña yuma yayivulu nakubadikahu. (Maku 10:​29, 30) Wukuyinka wumi wawuwahi nawa wukuyitiyishaña kuwaha nichayinu mpinji mukanu kaayi katama. Nawa iyi hintachikilu hohu. Mwakatwalekahu kumukalakela Tata yenu imwakeña haya nyaaka. Kukeña kudi hakachi kenu naTata yenu kwakaswejelañaku nawa mwakashakamaña haya nyaaka nanyaaka neyi chashakamañayi yena. Neyi mudihana nakupapatishewa, mukwikala nakukooleka kwakumwinka Tata yenu chuma chasweja kulema. Yena wayinka yuma yejima yayiwahi, yuma yejima yayizañaleshaña, yimwadiluñishaña chikupu. Neyi mudihana nakupapatishewa, ninenu mukumwinka Mwini iwulu niiseki chuma chabulayi, dikwila nawu, kudihana kwenu kwakumukalakela chakufuma hamuchima. (Yoba 1:8; 41:11; Yish. 27:11) Ichi dichuma chachiwahi nankashi chimwatela kwila muchihandilu chenu! w23.03 6 ¶16-17

Muyaaka yawukampululu, mpwila yawuvumbi yaswejaña nankashi nawa anateli kuyikanjikija kudi akwenu nawu mwili wuvumbi. Dichuma chakeñañayi Satana nindi mwileña. Chumanyi chinateli kuyikwasha kutondolwela kweseka? (1 Tes. 4:​3, 4.) Mukulomba kwenu, mulejenuñamu Yehova chimunakutiya. Mulejenu chimunakutiya nawa mulombenu ayinki ñovu yakuumika. (Mat. 6:13) Anukenuña nenu Yehova nakukeña kuyikwasha bayi kuyinka nyiloñaku. (Mas. 103:​13, 14) Bayi mweseka kumanisha kukala nkawenuku. Yilejenumu anvwali jenu kukala kumunakumona. Chapela wanyi kuhanjeka nsañu yamuchidiwu, ilaña chalema kwila mwenimu. Neyi mutañaña Bayibolu nikutoñojoka hayishina yekalamu, chikuyikwasha kufuukula munjila yikumutiyisha Yehova kuwaha. Mukwiluka nenu himukukeñekaña nshimbi hejimaku, muloña mukwiluka Yehova chatoñojokañayi hanoyu nsañu. w22.08 5 ¶10-12

Mutu wachisaka mukaKristu washañaku nankashi muchima kukwakamena chisaka chindi kumujimba. Neyi mudi mutu wachisaka, munateli kudakamena chakuwana yakuda nimali akusonkela nachu itala. Hadaha mwatiyaña cheñi woma nenu neyi mudimu wumana chikayikalila kuwana mudimu wukwawu. Hela hekwawu mwashintajalileña kuhimpa mudimu wenu wakumujimba nenu chihandilu chikukola. Satana nazatishi iyi njila hadi mpinji yayilehi nawa natweshi. Satana wakeñaña tutoñojokeña netu Yehova watwakamenaña wanyi hamuntu-hamuntu nawa wukutukwasha wanyi kwakamena chisaka chetu. Chikufumamu, tukukunkulula netu twatela kuzata nañovu kulonda tutwalekihu namudimu wetu hela chakwila tukulondelaña wanyi yishina yamuBayibolu. w22.06 15 ¶5-6

Tweluka netu Nzambi “wukweti luwi niwushona, hazuwaña swayiku nawa wavulisha kukeña kwakashinshi nichalala.” (Kwid. 34:6) Yehova wakeña wuñanji. (Isa. 61:8) Chamukataña hakumona etu tunakukabakana nawa wadiloñesha, eña wafwilaña chikupu, kumanisha yihuñu yejima hampinji yatoñolayi. (Yere. 29:11) Chumichi chikawaha nankashi! Dichitwamukeñela Yehova nankashi! Chumanyi chikwawu chaletesha tukeñi chalala? Mukwiluka chalala mwafumaña yuma yayiwahi. Talenu chakutalilahu. Chalala chamuBayibolu mwabombela yuma yitwachiñejaña kumbidi. Neyi chikuñu chakwimika nachu watu chichemikaña watu, kuchiñeja kwamuBayibolu nikwena kwatukwashaña kuumika kukala kutwamonaña. Munsona yalelu, kapostolu Pawulu wateneneña kuchiñeja kwamwiwulu kwawakaKristu awahishewa. Ilaña mazu indi anakundami cheñi niakaKristu achiñejaña kushakama muparadisa hamaseki. (Yow. 3:16) Mwamweni, kudiza hakuchiñeja kwakushakama haya nyaaka kunatukwashi kushakama chihandilu chachiwahi. w22.08 14-15 ¶3-5

Kukeña dikwaleteshaña tukuhweleli antu. Kapetulu 13 kaAKorinda watachi kalumbulula kukeña chikunateli kutukwasha kukuhwelela hela kutachika cheñi kuyikuhwelela akwetu. (1 Kor. 13:​4-8) Chakutalilahu, vasi 4 yahosha nawu “kukeña kwadiwunjikaña nawa kwatiyilaña luwi.” Yehova wekala wadiwunjika hela chakwila tunamuvulumuni. Dichi, twatela kudiwunjika nawamanakwetu neyi anahoshi hela aneli yuma yinatuhilishi hela kututiyisha kutama. Vasi 5 yabombelahu nawu: “[Kukeña] hikwahilaña swayiku. Hikwahembaña nkunyiku.” Bayi twanukaña mwatuluwañesheliwu amanakwetuku. Mukwakutañisha 7:9 yahosha nawu “bayi wunyakala kuzuwaku.” Yimonenuña amanakwenu niahela neyi chayimonañawu kudi Yehova. Nzambi wayikeña nawa hayihembelaña nshidi jawuku. Ninetu dichitwatela kwila. (Mas. 130:3) Chatela tusheña muchima hayiluwa yawu, tumoneña yilwilu yawu yayiwahi.—Mat. 7:​1-5. w22.09 3-4 ¶6-7

Mukanda waDanyeli washimuna yuma yayiwahi yikamweka mundonda mumpinji yakukumishaku. Chakutalilahu, Danyeli 12:1 yamutena Mikeli, hela netu Yesu Kristu, nawu ‘nakwimenaku antu [jaNzambi].’ Iwu wuprofwetu watachikili kushikijewa mu 1914 hamutondeliwu Yesu kwikala Mwanta waWanta waNzambi wamwiwulu. Hela chochu, Danyeli amulejeli cheñi nawu Yesu “wakemana” mumpinji “yayihuñu yakwila kanda yimwekaneñahu dehi kufuma hampinji yekaliliku muza kushika nihanoyu mpinji.” Iyi “mpinji yayihuñu” “[hi]lukadi lwasweja” lwashimunawu haMatewu 24:21. Yesu wakemana, hela wakakiña antu jaNzambi hakukuma kwayinu mpinji yayihuñu, dikwila nawu haAmagedoni. Mukanda waChimwekeshu watena awa nawu “izaza deneni anafumi mulukadi lwasweja.”—Chim. 7:​9, 14. w22.09 21 ¶4-5

Dichi, majina adi muniwu mukanda wawumi chayinu mpinji anateli kuyijimamu hela kuyifumishamu, chidi neyi Yehova hakusambila wasonekaña awa majina napensulu. (Chim. 3:5) Munjila yikwawu, twatela kuzata nañovu hakwila majina etu atwalekihu kwikala muniwu mukanda kulonda ayisoneki nawulombu, hela inki. Izanvu dimu dawantu asonekawu majina mumukanda mwekala antu atondawu akayuula naYesu mwiwulu. Kwesekeja namazu akapostolu Pawulu asonekeleleliyi ‘akwawu mwakalakeleleñawu’ muFwilipi, majina awantu awayishewa, atondawu kuyuula hamu naYesu, adi mumukanda wawumi. (Fwili. 4:3) Ilaña hakwila nawu majina awu atwalekihu kwikala muniwu mukanda wachifwikija, atela kutwalekahu kwikala ashinshika. Neyi atambwila chilamiku chakukumishaku, henohu kanda afwi hela henohu lukadi lwasweja kanda lutachiki, majina awu akuyisoneka mumukanda wawumi haya nyaaka.—Chim. 7:3. w22.09 14 ¶3; 15 ¶5-6

Kanda mumoneñahu dehi chumichi? Muntu wumu ateleka yakuda yimwakeñesha. Ilaña hamuloña wakubula mpinji hela mukweti yuma yayivulu yakwila, dichi muyida swayi-swayi chakadi kutiya chiyinakutiyakana. Hanyima yakumanisha kuda, mwinza mwanuka nenu chiña mwada chovu-chovu kulonda mutiyi chiyinakutiyakana chiwahi. Munjila yoyimu, mwatañahu dehi Bayibolu swayi-swayi chakwila mukañanya kutiyisha nsañu yidimu? Ikalenuña nampinji yeneni yakudiluñisha kutaña Izu daNzambi; fwikijenuña yuma yamwekeni, fwikijenuña yivumina yamazu nawa toñojokenuña yuma yimunatañi. Neyi mwila iyi yuma mukwikala namuzañalu. Yesu watonda “nduñu wamaana nikashinshi” kulonda atuloñesheleña yakuda yakuspiritu hampinji yatelela nawa atudiisheña chachiwahi. (Mat. 24:45) Nsona jonenewa dijazatishañawu kudi nduñu washinshika hakutuloñeshela iyi yakuda.—1 Tes. 2:13. w22.10 7-8 ¶6-8

Bayibolu yatusoñamishili nawu mumafuku akukuminina, himwakabulena akakuseha akwawuku. (2 Pet. 3:​3, 4) Atiyaña kuwaha “kufwila kwawu kwayuma yakubula kumwakama Nzambi.” (Yuda 7, 17, 18) Tunateli kudikiña ñahi etu aweni kulonda tubuli kulondela akakusupisha? Njila yimu hikubula kudikunda nawantu amuchidiwu. (Mas. 1:1) Hitwatela kutiyilila hela kutaña nsañu yawakakusekeshaku. Tweluka netu neyi kubabala nehi, tunateli kwikala nachilwilu chakutaadikisha nakutachika kumujinoka Yehova niwunlomboli wutwatambwilaña mukuloñesha kwindi. Hakwila tutondolweli yilwilu yamuchidiwu twatela kudihula netu: ‘Komana nahoshaña chatama neyi tunatambwili wunlomboli wawuha hela ntiyishishilu yayiha? Komana nakeñaña kuwana yiluwa mudi anakulombola?’ Neyi tunyakalaña kuwahisha yilwilu yamuchidiwu, Yehova wukutiya kuwaha.—Yish. 3:​34, 35. w22.10 20 ¶9-10

Spiritu yajila yamwinkeli Ezekeli ñovu yakuzata mudimu watambwililiyi, mudimu wakushimwina antu “achinchika nawa adikaña” adiña mwiluña mwashimwinineñayi. Yehova wamulejeli Ezekeli nindi: “Nakoleshi kumesu eyi neyi chakola kumesu awu nawa nakoleshi ihama deyi neyi chakola mahama awu. Nakoleshi ihama deyi neyi dayimani, nadikoleshi nankashi kubadika ilola dakola. Bayi wuyitiya woma hela kuchiina chamwekanañawu kumesuku.” (Ezek. 3:​8, 9) Munjila yikwawu, Yehova wamulejeleña Ezekeli nindi: ‘Bayi witeja antu achinchika akuzeyeshiku. Nukukukolesha.’ Nkumininaku, spiritu yaNzambi yamutwalili Ezekeli mwiluña mwashimwinineñayi. Ezekeli wasonekeli nindi: “Ñovu yaYehova yinakuzatika chikupu mudi ami.” Mwahitili mulungu wumu hakwila iwu kaprofwetu atiyishishi iyi nsañu yayileña nakushimwinayi. (Ezek. 3:​14, 15) Kuhiñahu Yehova wamutwalili kuchana chachinekineki “kweñilili spiritu mudi [yena].” (Ezek. 3:​23, 24) Haniyi mpinji, Ezekeli wadiloñesheli kutachika mudimu windi wakushimwina. w22.11 4-5 ¶8-9

Kaprofwetu Habakuki wamweni kukala kwakuvulu. Mpinji yimu, wajinokeli neyi chakwila Yehova wamwakameneneña. Dichi wamulejelimu Yehova mukulomba chatiyileñayi. Yehova waakwili kulomba kwakufuma hamuchima kwakambuñindi washinshika. (Hab. 2:​2, 3) Hanyima yakutoñojoka hadi Yehova chamwinañayi, Habakuki wekalili cheñi namuzañalu nankashi. Wenjili nakwiluka chikupu nindi Yehova wamwakameneneña nawa wukumukwashaña kuumika kukala kwejima kukumonañayi. (Hab. 3:​17-19) Chumanyi chitunakudizilaku? Neyi munakuhita mukukala, lombenuña kudi Yehova nakumulejamu chimunakutiya. Nawa mulejenu kulonda ayikwashi. Neyi mwila mwenimu, ilukenu nenu Yehova wukuyinka ñovu yimunakukeña hakwila muumiki. Nawa neyi mumona chinakuyikwashayi, mukusweja kumukuhwelela chikupu. Neyi mutwalekahu kwila yuma yakuspiritu, himwaketeja kukala hela chilwilu chakujinoka kuyambula kudi Yehovaku.—1 Tim. 6:​6-8. w22.11 15 ¶6-7

Yesu niatupondu ayedi adiña kwakwihi nayena akabakeni hampinji yafwileñawu. (Luka 23:​32, 33) Atupondu ejima ayedi adiña nakumusupisha Yesu. (Mat. 27:44; Maku 15:32) Ilaña wumu hakachi kawu wahimpili yitoñojoka yindi. Wamwilili nindi: “Yesu, wakañanukaña neyi wuneñili dehi muWanta weyi.” Yesu wamwakwili namazu adi munsona yalelu. (Luka 23:​39-42) Mazu aYesu amulejeliyi kapondu atela kutusañumuna kutoñojoka hachakekala yuma muParadisa. Chakadi nikujina, kudi yuma yitwatela kudizila kukuwunda kwadiña muchiyuulu chaMwanta Solomoni kutalisha haParadisa. Nawa twatela kwiluka netu Yesu, muntu wamubadika Solomoni, wakazatila hamu nawantu akayulañayi hamu nindi kuwahisha iseki. (Mat. 12:42) Mwamweni, “anyikoku amakwawu” atela kushaku muchima kwiluka yuma yatela kwilawu hakwila akashakami haya nyaaka muParadisa.—Yow. 10:16. w22.12 8 ¶1; 9 ¶4

Isaya watulejaña nindi Yehova wukututiyilila nakanañachima neyi tumwaabila nawa wukunyakala kwakula kulomba kwetu kwakulembelela. Isaya wabombelelihu nindi: “Chachitiyayi hohu wakakwakula.” Awa mazu anakutwanukisha nawu Tata yetu nakufwila chikupu kukwasha antu amwaabilaña. Kwiluka chumichi kwatukwashaña kuumika namuzañalu. Yehova watiyililaña kukulomba kwetu hamuntu-hamuntu. Tunahoshelidi mwenimu? Mazu akutachikilahu aIsaya kapetulu 30, izu dakwila nawu “ayimwekesheli” anadizatishi hakutena antu amavulu muloña Yehova nakuleja antu jindi neyi izanvu. Hela chochu, muvasi 19 izu dakwila nawu “eyi” anakuleja muntu-himuntu. Isaya wasonekeli nindi: “Eyi wakadila wanyi”; “chakadi nikujina wakakutiya kuwaha”; “wakakwakula.” Chineli hiTata wukweti kukeña, Yehova watwakamenaña hamuntu-hamuntu nawa watiyililaña kukulomba kwetu hamuntu-hamuntu.—Mas. 116:1; Isa. 57:15. w22.11 9 ¶5-6

Twekalaña namuzañalu nikuwunda neyi tutwalekahu kushimwina nikutañisha hela chakwila anakutukabisha. Mumafuku awakaKristu akusambila helili akawuswa aYudeya aleji apostolu nawu aleki kushimwina, awa amayala ashinshika afuukwilihu kumwovwahila Nzambi. Atwalekelihu kushimwina nawa iwu mudimu wayileteleleña muzañalu. (Yilw. 5:​27-29, 41, 42) Hela chochu, neyi mudimu wetu anawulekeshi, twatela kwikala ababala hampinji yitunakushimwina. Ilaña neyi tuzata hakumina ñovu jetu, twakekala namuzañalu wenzaña muloña wakumutiyisha Yehova kuwaha nihamuloña wakushimwina nsañu yakupulwisha mawumi awantu. Kuhwelelenu chikupu nenu nimumpinji yakala chikupu, tunateli kwikala nakuwunda. Muniyi mpinji, twatela kwanukaña netu kuwunda kutwatela kwikala naku hikuwunda kwahanañayi Yehova hohu. Mushindamenenuña hampinji yikunenzi musoñu, wubanji wadimwekenaña, hela neyi anakuyikabisha. Ovwahilenuña kuloñesha kwindi. Talilenuña yuma yayiwahi yidi kumbidi. Neyi mwila mwenimu, “Nzambi wakuwunda wukwikalaña nanenu.”—Fwili. 4:9. w22.12 21 ¶17-18

Twatela kuzata nañovu hakwila twili mwenimu. Twatela cheñi kuzata nañovu kulonda tutondolweleña iyi yilwilu yatama yidi neyi, ndulu, kuhila nikuzuwa. (Efwe. 4:​31, 32) Muloñadi chichinateli kutukalila kwila mwenimu? Muloña chinateli kwikala chakala kuleka yilwilu yikwawu yatama. Chakutalilahu, Bayibolu yahoshaña nawu antu amakwawu ‘azuwaña swayi’ nawa ‘ekalaña nandulu.’ (Yish. 29:22) Hakwila muntu aleki yilwilu yatama yashimata mumuchima windi watela kutwalekahu kuzata nañovu nihanyima yakupapatishewa. (Rom. 7:​21-23) Mulombenu Yehova hachilwilu chatama chimunakulwisha nachu, nakukuhwelela nenu wukuyitiya nawa wukuyikwasha. (1 Yow. 5:​14, 15) Hela chakwila Yehova hakufumishahu ochu chilwilu muchihayamishaku, ilaña wukuyinka ñovu yikuyikwasha kubula kuchimwekesha cheñi. (1 Pet. 5:10) Chayinu mpinji, ilenuña yuma kwesekeja nakulomba kwenu kuhitila mukutondolwela yuma yikuletesha mwiikali cheñi nanichi chilwilu chawuntu wawukulu. Nawa bayi mutoñojokaña hayuma yatamaku.—Fwili. 4:8; Kol. 3:2. w23.01 10 ¶7, 9-10

Njila yimu mutwamwekeshelaña iku kukeña hikuzata nañovu mumudimu wakushimwina. Twahanjekaña nawantu ejima itwawanaña. Hitwamwekeshaña chaambu kudi muntu wudi wejima muloña wekowa dindi, muchidi, mali akwetiyi hela nkulilu yindiku. Neyi twila mwenimu, dikwila nawu tunakuzata kwesekeja nankeñelu yaYehova yakwila nawu “wakeñaña nindi antu ejima ayamwini nawa eluki chalala chikupu.” (1 Tim. 2:4) Twamwekeshaña cheñi netu twamukeña Nzambi niKristu kuhitila mukuyimwekeshela amanakwetu niahela kukeña. Twayakamenaña nikuyikwasha mpinji yinakumonawu kukala. Twayikundejaña neyi anafwishi ntaña yawu, twayaña nakuyihempula neyi anakati nikuyikolesha neyi ananeñi. (2 Kor. 1:​3-7; 1 Tes. 5:​11, 14) Twatwalekañahu kuyilombelaku, nakwanuka netu “kulomba kwakulembelela kwamuntu waloña kwekala nañovu chikupu.”—Yak. 5:16. w23.01 28-29 ¶7-8

Neyi chakulukilañayi mukakutuña mukuhita kwampinji, ninetu tunateli kwikala akulukila mukuyituña amanakwetu niahela. Tunateli kukwasha akwetu kwikala nañovu yakuumika kuhitila mukuyileja yakutalilahu yawantu omikili kunyima. (Heb. 11:​32-35; 12:1) Tunateli kuleta kuwunda neyi tuhoshaña yuma yayiwahi yitwamonaña mudi akwetu, kuleta kuwunda neyi hakachi ketu hosi kutiyaña nawa neyi tunambokelimu. (Efwe. 4:3) Cheñi tunateli kutwalekahu kutuña chikuhwelelu chawamanakwetu niahela neyi tuyilejañaku chalala chamuBayibolu, kuyikwashaku nayuma yakumujimba nikukwasha ejima anazeyi kuspiritu. Tunateli kwikala namuzañalu neyi tukwashanaña mumudimu wakutuña chipompelu kuspiritu. Kwambukaku namudimu wakutuña wakumujimba watokaña mukuhita wampinji, yuma yafumaña mumudimu wetu wakutuña kuspiritu yahaya nyaaka! w22.08 22 ¶6; 25 ¶17-18

Yesu wamwekesheli nindi kashinshi dichilwilu chalema chitwatela kwikala nachu neyi tunakukeña netu tutiyishisheña nsañu yitunakutaña Mwizu daNzambi. (Mat. 24:15) Kashinshi hichumanyi? Hichilwilu chatukwashaña kwiluka kunuñañana kudi hakachi kansañu yimu nansañu yikwawu, chiyambuka nayikwawu nikutiyishisha nsañu yabula kulumbululawu jiika. Kubombelahu, neyi chamwekesheliyi Yesu, twatela kwikala nakashinshi hakwila twiluki yuma yinakumwekana yinakushikija wuprofwetu wamuBayibolu. Twatela cheñi kwikala nanichi chilwilu hakwila nsañu yejima yitwatañaña muBayibolu yitukwasheña chikupu. Yehova wayinkaña ambuñindi kashinshi. Dichi mulombenu kulonda ayikwashi mwiikali nanichi chilwilu. Munateli kuzata ñahi kwesekeja namumunalombi? Toñojokenu chikupu hansañu yimunatañi nawa talenu chiyinanuñañani nansañu yikwawu yimweluka. Keñakeñenu mwatalisha nsañu yamuBayibolu kulonda mwiluki chimunateli kuyizatisha muchihandilu chenu. (Heb. 5:14) Hampinji yimukutañaña nakashinshi, mukuswejaña kutiyishisha Nsona. w23.02 10 ¶7-8

Fwikijenu ibwambu denu nayinki itala dadiwahi ilaña dinafukuluki nawa dinakuvwa chanti. Hela chakwila didi naniku kukala, idi itala munateli kudilanda namamiliyoni amadola. Chakadi nikujina, mukusakilila nawa mukudihembaña chiwahi idi itala. Munjila yoyimu, Yehova watwinka chawaana chalema, chawaana chawumi. Kafwampi, Yehova wamwekeshaña chalemeshayi wumi wetu kuhitila mukutwinka Mwanindi kwikala ifutu danyiloña. (Yow. 3:16) Yehova diyi Nsulu yawumi. (Mas. 36:9) Kapostolu Pawulu niyena wetejeli chumichi hahosheliyi nindi: “Twekala nawumi, twendaña nawa twahandaña muloña wayena.” (Yilw. 17:​25, 28) Dichi twatela kuhosha netu wumi wetu hichawaana chatwinkawu kudi Nzambi. Watwinkaña yuma yejima yitwakeñaña kulonda tutwalekihu kuhanda. (Yilw. 14:​15-17) Ilaña Yehova hakiñaña mawumi etu muchihayamishaku. Hela chochu, wakeñaña nindi tuzateña kwesekeja nahanakumini ñovu jetu kudikiña kumujimba nikuspiritu.—2 Kor. 7:1. w23.02 20 ¶1-2

Twamusakililaña chikupu Yehova Nzambi hakutwinka Bayibolu! Watwinka kufumba kwakuwahi muBayibolu kunateli kutukwasha kuumika kukala kutwamonaña makonu. Watukana cheñi kutwilila yuma yayiwahi kumbidi. Chasweja kulema, Yehova wazatisha Bayibolu kumwekeshelamu yilwilu yayivulu yekalayi nayu. Chitwatoñojoka hayilwilu yindi yayiwahi, nyichima yetu yazañalalaña chikupu nawa twaswinaña kwakwihi naNzambi yetu kuhitila mukwikala nawubwambu wakola nayena. (Mas. 25:14) Yehova wakeñaña antu amwiluki. Kunyima, wadimwekesheleña yomweni kuhitila muyilota, yimwenu nimudi añelu. (Kuch. 12:6; Yilw. 10:​3, 4) Indi iyi yilota, yimwenu hela nsañu yashimwineñawu añelu twadi kuyidizaña ñahi neyi hiyayisonekeliku? Dichaletesheli Yehova aleji antu nindi ‘asoneki mumukanda’ yuma yakeñeleñayi nindi tuyiluki. Chineli “njila yaNzambi walala yaloña,” twatela kukuhwelela netu iyi njila yakuhanjekelamu nanetu yayiwahi chikupu nawa yatukwashaña.—Mas. 18:30. w23.02 2 ¶1-2

Imikenu yikonkwanyi yalala. Tondenu yikonkwanyi yinateli kuyikolesha nawa yikuyikwasha kupama. (Efwe. 3:16) Chakutalilahu, munateli kuwahishaku kulonda mudizeña nikutaña Bayibolu mpinji yejima. (Mas. 1:​2, 3) Indi kwiji mwatela kuzata nañovu kulonda mulombeña mapampa amavulu nikuwahishaku kulomba kwenu. Hadaha mwatela kudiyuula kulonda mutondeña yisela chachiwahi nikuzatisha chiwahi mpinji yenu. (Efwe. 5:​15, 16) Munateli kupaminaku kuspiritu neyi mukwashaña antu amakwawu. Chakutalilahu, munateli kuzata nañovu kulonda mukwasheña atushinakaji niayifwayi adi muchipompelu chenu. Hadaha munateli kuyikwashaku kulanda yuma hela kuyidizisha chakuzatisha yozelu yakesi kawuneñu. Mwatela kuyikeña cheñi antu abula kwikala muchipompelu, kuhitila mukuyishimwina nsañu yayiwahi yaWanta. (Mat. 9:​36, 37) Neyi chinatwesheki, ikalenu nachikonkwanyi chakuzataku mumudimu wakushimwina wampinji yejima. w22.08 6 ¶16-17