December

Komana chilolu wamuchota wafumini kuEtiyopiya mwamweni wadiloñesheli kupapatishewa? Talenu chuma cheliliyi: Iwu iyala mwini Etiyopiya “wayili kuYerusalema nakudifukula.” (Yilw. 8:27) Watela wabalumukili nakwikala kaYudeya, dikwila nawu wetejeli ntañishilu yawaYudeya. Chakadi nikujina, wadizili hadi Yehova munyikanda yajila yaNsona jachiHeberu. Hela chochu, wadiña neyena dakudizilahu nsañu yayivulu. Kafwampi, Fwilipu chamuwaniniyi iwu chilolu mumukwakwa, wamuwanini nakutaña muvuñilu wasonekeli kaprofwetu Isaya. (Yilw. 8:28) Wakeñeleña kutwalekahu kudiza. Wafumini kuEtiyopiya kulonda ayi nakudifukula kudi Yehova hatembeli muYerusalema. Mwini Etiyopiya wadizilili kudi Fwilipu nsañu yalala yalema yabulili kwilukayi, kushilahu ninsañu yakumwiluka Mesiya. (Yilw. 8:​34, 35) Waswejeleliku kumukeña Yehova niMwanindi. Wafuukwilihu chuma chalema muchihandilu chindi kuhitila mukupapatishewa nakwikala mukakumulondela Yesu Kristu. Chamweniyi nindi iwu iyala nadiloñeshi, Fwilipu wamupapatishili. w23.03 8-9 ¶3-6

Neyi twatwambaña hitunateli kumuzañalesha Yehovaku. (Yish. 6:​16, 17) Hela chakwila antu amavulu makonu amonaña nawu chidi hohu chiwahi kutwamba, ilaña etu twakuhela nawa twakumonaña neyi chakumonañayi Yehova. (Mas. 15:​1, 2) Hela chochu, twatondolwelaña nhoshelu yakushaku, hela yakufumishaku yikuletesha muntu akunkululi mwaluwa. Twatela cheñi kutondolwela matuñu. (Yish. 25:23; 2 Tes. 3:11) Neyi mumona nenu nsañu yimunakuhanjeka hiyikubalumuka matuñu, himpenu nsañu kulonda mutachiki kuhosha hayuma yayiwahi. Chineli mukaayi mutunakushakama mudi nhoshelu yatama, twatela kuzata nañovu kulonda nhoshelu yetu yimuzañalesheña Yehova. Wukatwikiswila neyi tuzatishaña chiwahi nhoshelu yetu, hakushimwina, hakupompa nihampinji yitunakuhanjeka nawakwetu. Neyi Yehova nafumishihu kaayi katama kamakonu, chikekala chaswayi kumulemesha Yehova nanhoshelu yetu.—Yuda 15. w22.04 9 ¶18-20

Neyi tutoñojoka hachatukeñawu kudi Yehova niYesu, chatuleteshaña ninetu kuyikeña. (1 Yow. 4:​10,) Twaswejaña kuyikeña chitweluka netu Yesu watufwilili hamuntu-hamuntu. Kapostolu Pawulu welukili chumichi nawa wamwekesheli kusakilila chayisonekeleliyi aÑalija nindi: “Mwana kaNzambi, wankeñeli nawa wadihanini yomweni kukoola ami.” (Ñal. 2:20) Yehova wazatisha ifutu danyiloña, nakuyikokela kwakwihi nayena kulonda mwiikali ibwambu dindi. (Yow. 6:44) Komana mwazañalalaña wanyi hakwiluka nenu Yehova wamweni chuma chachiwahi mudi enu nawa nenu wafweteli wuseya weneni hakwila mwiikali ibwambu dindi? Chumichi hichayileteshaña musweji kumukeña Yehova niYesuku? Twatela kudihula netu, ‘Iku kukeña kukunsañumuna kwiladi?’ Kukeña kutwamukeña Nzambi niKristu kwatuleteshaña kuyikeña akwetu.—2 Kor. 5:​14, 15; 6:​1, 2. w23.01 28 ¶6-7

Bayibolu hichitwa chalema nankashi chazatishañayi Yehova hakukwasha akakudifukula indi “[kumukalakela] namuchima wumu.” Yehova waletesheli Nsona jajivulu ajisoneki munjila yakwila ajitiyishisheña hohu kudi antañi adizoza. (Luka 10:21) Antu atañaña Bayibolu kwejima. Ilaña antu adizoza hohu diwu atiyishishaña Bayibolu nikwovwahila muyahoshaña. (2 Kor. 3:​15, 16) Twamonaña maana aYehova muBayibolu. Yehova hazatishaña hohu Nsona hakutukundeja hamu neyi izanvuku, ilaña watudizishaña cheñi nikutukundeja hamuntu-hamuntu. Wejima wetu tunateli kumona Yehova chatwakamenañayi hamuntu-hamuntu hampinji yitwatañaña Izu dindi. (Isa. 30:21) Mapampa añahi imwabakulahu dehi muNsona nawa mutaña vasi yamwekeni tuhu neyi ayisonekeleli enu? Hela chochu, Bayibolu yayishikaña antu amavulu hamuchima. Hanu dinu chumanyi chaleteshaña yitwalekihu kwikala nansañu yikuyikwasha kwesekeja nakukala kumukweti? Chuma chaleteshaña muloña wakwila Nsoneki yaBayibolu wukweti maana chikupu.—2 Tim. 3:​16, 17. w23.02 4-5 ¶8-10

Chineli tudi akaKristu alala, twamukeña Yehova nankashi. Tunakukeña kumukalakela Yehova hakumina ñovu jetu. Neyi tunakukeña netu tudikiti nankashi mumudimu waYehova, twatela kwimika yikonkwanyi yidi neyi kwikala nayilwilu yatela kwikala namukaKristu, kudiza yuma yayiha nikuyikalakela amanakwetu niahela. Muloñadi chitwatela kufwila kwikalila ambuña aYehova amawahi? Sweje-e, tunakufwila kumutiyisha kuwaha Tata yetu wamwiwulu wukweti kukeña. Yehova watiyaña kuwaha neyi atumona tunakuzatisha waana wetu niñovu chikupu mumudimu windi. Kubombelahu, tunakukeña kuzata nankashi mumudimu waYehova kulonda tuyikwasheña nankashi amanakwetu niahela. (1 Tes. 4:​9, 10) Hela chakwila tunashimbuli muchalala twatela kudikita nankashi mumudimu waYehova. w22.04 22 ¶1-2

Katataka amubalumukimu Babiloni Muneni, wanta wamukaayi wakwitiya kwakutwamba. Chuma chakelawu dichakekala ntachikilu yalukadi lwasweja. Komana chumichi chikasañumuna antu amavulu kutachika kudifukula kudi Yehova? Inehi. Kwambukaku, Chimwekeshu kapetulu 6 yashimuna nawu haniyi mpinji yakala, antu abulaña kumukalakela Yehova akakeñaña kuyikiña kudi akamatuña nachiyuulu ninyitayi yakulanda nakulandulula yamukaayi, yesekejawu najimpidi. Chineli akahakwilañaku Wanta waNzambi wanyi, Yehova wakayimona nindi hiyakakudikaña. (Luka 11:23; Chim. 6:​15-17) Eña, ambuña aYehova ashinshika akekala ambukaku haniyi mpinji yakala yalukadi. Didu izanvu dawantu hamaseki dakatwalekahu kumukalakela Yehova Nzambi nikukaana kuhakwilaku “kanyama wazuwa.”—Chim. 13:​14-17. w22.05 16-17 ¶8-9

“Nsañu yayiwahi yaWanta” hidiyi nsañu yatela kushimwina antu jaNzambi hohuku. (Mat. 24:14) Atela cheñi kukwashaku mudimu wawañelu anashimuniwu muChimwekeshu kapetulu 8 nakushika mu 10. Awa añelu abidikaña yihuñu yikamonawu antu adikañaña naWanta waNzambi. Dichi, aYinsahu jaYehova anakushimwina nsañu yawunsompeshi yinesekejiwu ‘nanvula yamalola nikesi,’ nakumwekesha wunsompeshi waNzambi hayuma yidi mukaayi katama kaSatana. (Chim. 8:​7, 13) Antu atela kwiluka nawu kukuma kudi mukamwihi kulonda ahimpi yilwilu yawu nawa akapuluki hefuku dakuzuwa kwaNzambi. (Zef. 2:​2, 3) Ilaña iyi nsañu hiyatiyakana kwejimaku. Kuyishimwina chiña twikala ahamuka. Hampinji yalukadi lwasweja, mazu akukumishaku awunsompeshi akayitiyishaña antu kutama.—Chim. 16:21. w22.05 7 ¶18-19

Toñojokenu hadi akaKristu adisumbula adi kwakwihi nakwikala anvwali. Hadi yaaka yayivulu, anatiyilili kujimpanji jahoshaña hachakukulisha anyana. Ichi dinu iyi yishina yikwikala yalema mukuhanda kwawu. Akwikala namwana wakadikulishilañawu. Iwu himudimu weneni chikupu! Chalala, neyi yuma yinahimpiki muchihandilu chetu yishina yimu yamuBayibolu yekalaña yalema kudi etu. Dichuma chimu chaleteshaña akakudifukula aYehova kutaña Nsona nawa neyi chayilejeliwu anyanta awaIsarela kwila nikutoñojokahu chikupu “mafuku ejima” akuhanda kwawu. (Kuhit. 17:19) Enu anvwali, mukweti mudimu weneni chikupu watela kwikala namukaKristu, wakudizisha anyanenu kulonda amwiluki Yehova. Ilaña bayi mukumina dakuyidizisha nsañu yahosha hadi Nzambi yetuku. Mwatela kuyikwasha anyanenu kulonda amukeñi nankashi. w22.05 26 ¶2-3

Hitwatela hohu kukumina dakutiya kutama hayuma yatama yitwelili hela hanshidi yitwakoñeliku, ilaña twatela cheñi kwilahu chuma chimu. Chuma chalema chashinshikañahu Yehova neyi chakwila nateli kumwanakena muntu hikuhimpa yilwilu yindi. Kuhimpa kwatalisha “mukubalumuka.” Mumazu amakwawu, muntu watela kuhimpa yilwilu yindi kuhitila muleka yuma yatama nakutachika kumwovwahila Yehova. (Isa. 55:7) Muntu watela kubalumuka muyitoñojoka yindi kulonda amulomboleña nayitoñojoka yaYehova. (Rom. 12:2; Efwe. 4:23) Watela kuleka yitoñojoka yatama niyuma yelañayi. (Kol. 3:​7-9) Hela chochu, kukuhwelela mumulambu waKristu dichuma chaleteshaña Yehova kutwanakena nikututookesha kunshidi. Yehova wukutwanakena kushindamena haniwu mulambu neyi amona nindi tunakuzata nañovu kulonda tuhimpi yilwilu yetu.—1 Yow. 1:7. w22.06 6 ¶16-17

Kufuma tuhu kunyima antu adikatishaña wumu namukwawu. (Mukwa. 8:9) Chakutalilahu, antu azatishaña wuswa wawu chatama, ambanji ajahañanaña, akakuchiinisha kumashikola atukanaña nikuchiinisha akwawu akashikola nawa antu amakwawu akabishaña antaña jawu. Dichaleteshaña antu kutiya akwawu antu woma. Satana wazatishaña ñahi muhetu wakutiya antu woma kulonda atulawuli? Satana watuleteshaña kutiya antu woma kulonda tuchiineña nikuleka kushimwina. Satana waleteshaña jinfulumendi kulekesha mudimu wetu nikutukabisha. (Luka 21:12) Mukanu kaayi kaSatana antu atandishaña nsañu yakutwamba hadi aYinsahu jaYehova. Antu etejaña iyi nsañu yakutwamba anateli kutuseha hela kutulukuka. (Mat. 10:36) Komana tufuta twaSatana twatuyamba? Inehi mwani. Watachikili dehi kutuzatisha mumafuku awapostolu.—Yilw. 5:​27, 28, 40. w22.06 16 ¶10-11

Anyi akekala hakachi ‘kawantu amavulu’ akakwashawu kwikala aloña? Munabombeli antu akasañulawu, akapuluka haAmagedoni nianyana amavulu akavwalika mwituña dadiha. Hakumana kwayaaka ikombakaji ejima akekala hamaseki akekala awanina. Twatela kwanuka netu kwikala awanina hichinayi mukwila nawu muntu wakashikena kutambula wumi wahaya nyaakaku. Toñojokenu hadi Adama naEva. Adiña awanina, ilaña ateleleli kumwovwahila Yehova Nzambi henohu kanda ayinki wumi wahaya nyaaka. Nawa chawushona akañenyi kumwovwahila. (Rom. 5:12) Chineli ejima akekala awanina hakumana kwayaaka 1,000, komana awa ejima awanina akahakwilaku chiyuulu chaYehova lwejima? Tahindi amakwawu akekala neyi aAdama naEva, akañenyi kwikala ashinshika hela chakwila adiña awanina? Awa malwihu atela kuyakula. w22.09 22-23 ¶12-14

Neyi mumona yuma chiyidi mukaayi, komana chayikalilaña kumona yuma munjila yayiwahi? Yisaka yinakutiyañana wanyi. Antu anaswejeliku kwikala namadombu, kudikeña aweni nikuzuwa. Amavulu chayikalilaña kukuhwelela akawuswa. Ilaña iyi yuma yinakumwekana yinateli kuyikwasha kwikala nachikuhwelelu. Muloñadi? Muloña antu anakwila yuma yashimwineñawu dehi muwuprofwetu kutalisha “mumafuku akukuminina.” (2 Tim. 3:​1-5) Kushikijewa kwaniwu wuprofwetu, kunateli kubula kukaanawu kudi muntu washinshika, kunakumwekesha nawu Kristu Yesu hiMwanta wunatachiki dehi kuyuula muWanta waNzambi. Ilaña iwu hiwuprofwetu wumu hohu hawuprofwetu wawuvulu wahosha haWanta. Iwu wuprofwetu wejima wunesekani kulonda chitukwashi kwiluka hitunashiki kwesekeja nachatanjikayi Yehova, neyi yikunku-yikunku (jigsaw) yinanuñiwu hamu. w22.07 2 ¶1-2

Mumpinji yachipupu chaCOVID-19, atulejeli chitwatela kupompa nikushimwina. Hashimbwili wanyi, twatachikili kupompa kwachipompelu, kwanyanya nikweneni kuzatisha mavidiyo nikudisokankesha. Twatachikili cheñi kushimwina kuhitila mukusoneka nyikanda nimafoni. Yehova wakiswilili nyidimu yetu. Tusanji twashimwini nawu akakushimwina anavuliliku nankashi. Kafwampi, amavulu amweni yuma yayiwahi hayina mpinji. Antu amakwawu hadaha atoñojokeleña nawu kuloñesha kunasweji kukolesha nshimbi kutalisha hachipupu. Ilaña mumpinji nimpinji, chamwekesheleña hatooka nawu nshimbi jatwinkeliwu jatukwashili. Nawa chitukutoñojokaña njila yayiwahi munakulombwelayi Yesu antu jindi, tuneluki chikupu netu hela kumbidi kukekala kukalanyi, Yehova niMwanindi akeñayi akekala nanetu.—Heb. 13:​5, 6. w22.07 13 ¶15-16

Kubombela hakumushimeka Yehova mukulomba kwetu, twatela kumusakililaña hayuma yayivulu yatwililayi. Chakutalilahu, tunateli kumusakilila hawulombu wawuwahi wamwekenaña mujinkenu, yakuda yayivulu yayiwahi niwubwambu wawuwahi wutwadiluñishaña nawakwetu. Tata yetu wukweti kukeña watwinka iyi yuma niyikwawu yitunabuli kutena kulonda tuzañalaleña. (Mas. 104:​12-15, 24) Nawa chasweja kulema, twamusakililaña Yehova hayakuda yakuspiritu yatwinkayi nihakuchiñeja kwakumbidi. Chinateli kwikala chaswayi kuvulamena kumusakilila Yehova hayuma yayiwahi yatwililayi. Yumanyi yinateli kuyikwasha kwanuka? Munateli kusoneka yuma yimwalombahu dehi nawa shinshikenu mumoni kulonda Yehova chayakwiliyi. Kuhiñahu lombenu nakumusakilila chayikwashiliyi.—Kol. 3:15. w22.07 22 ¶8-9

Hitwatela kukumina dakudiza chalalaku. Twatela kuhemba chalala dikwila nawu, kuzatisha yuma yitunakudiza muchihandilu chetu. Chikufumamu tukwikala namuzañalu waweni. (Yak. 1:25) Tunateli kumwekesha ñahi netu tunakuzatisha yuma yitunakudiza? Manakwetu wumu wahosheli nindi twatela kudishinshika muchihandilu chetu kulonda tumoni mutunakwila chiwahi nihitwatela kuzatila. Kapostolu Pawulu wahosheli nindi: “Kwesekeja nakupama kwejima kutunapaminiku, tutwalekenuhu kwenda chiwahi muniyi njila yoyimu.” (Fwili. 3:16) Toñojokenu hayuma yayiwahi yezaña hamuloña wakutwalekahu kuzata nañovu kulonda ‘twendeña muchalala’! Twawahishañaku chihandilu, twamuzañaleshaña Yehova niakwetu akakwitiya. (Yish. 27:11; 3 Yow. 4) Kudihu yuma yabadika iyi yikutuletesha tukeñi chalala nikuchihemba? w22.08 18-19 ¶16-18

Akulumpi anateli kumwekesha ñahi nawu amukeña Yehova niYesu? Chuma chimu chalema chatela kwilawu hikwakamena nyikoku yaYesu. (1 Pet. 5:​1, 2) Yesu wamukwashili kapostolu Petulu kwiluka kulema kwanichi chuma. Hanyima yakumukaana Yesu kasatu, hadaha Petulu wafwilileña chikupu kumwekesha nindi wamukeñeli Yesu. Hanyima yakumusañula, Yesu wamwihwili Petulu nindi: “Shimona mwana kaYowanu, komana wankeña?” Tuneluki chikupu netu Petulu wadi kwila chuma chidi chejima kulonda amwekeshi nindi wamukeña Nkaaka yindi. Yesu wamulejeli Petulu nindi: “Biñaña anyikoku ami anyanya.” (Yow. 21:​15-17) Nawa mukuhanda kwindi kwejima, Petulu wakameneneña chiwahi anyikoku aMwanta, nakumwekesha nindi wadiña wamukeña Yesu. Enu akulumpi, munateli kumwekesha ñahi nenu mazu aYesu amulejeliyi Petulu alema? Munateli kumwekesha chimwamukeña Yehova niYesu kuhitila mukuzata mudimu wakubiña nikuzata nañovu kukwasha antu azeya kulonda afunti kudi Yehova.—Ezek. 34:​11, 12. w23.01 29 ¶10-11

Bayi mufwa mumuhetu wakutoñojoka nenu kwosi muntu wunateli kutiyishisha kukala kumunakumonaku. Kutoñojoka muniyi njila kukuyiletesha kukunkulula nenu kukala kumunakumona kwila kumana nehi nawa nenu himukutwesha kushinda kufwila kwatamaku. Ilaña Bayibolu yahosha chambukaku. Yahosha nawu: “Neyi kweseka kunayiwani, wukuyiloñeshela ninjila kulonda mutweshi kuumika.” Dichi, hela chakwila tunakulwisha nakufwila kwatama nankashi, tunateli kuumika. Yehova wukutukwasha kubula kukoña chuma chatama. Mpinji yejima anukenuña chumichi: Chineli mwawanina wanyi, kwila mutwesha kukañesha kufwila kwatama kwinza mudi enu nehi. Ilaña neyi hikukwinza mudi enu, kukaanenu hohenohu neyi chashikeneniyi Yosefu kumutemuka ñoda Potifwari. (Kutach. 39:12) Bayi mwiteja kufwila kwatama kuyikojeji kwila chuma chatamaku! w23.01 12-13 ¶16-17

Wuñanji hichilwilu chekala naYehova. (Kuhit. 32:4) Chilwilu chawuñanji chendelaña hamu chikupu nakubula chaambu, nawa Yehova hakweti chaambuku. (Yilw. 10:​34, 35) Chilwilu chindi chakubula chaambu chamwekenaña mumadimi azatishiliwu hakusoneka Bayibolu. Yehova wakanini nindi mumpinji yakukuminina, “kwiluka kwalala” kwekala muBayibolu “kwakavula.” Antu amavulu akatiyishisha Bayibolu. (Dan. 12:4) Chuma chimu chinaleteshi iku kwiluka kuvulilaku hikuhitila mukubalumuna, kwidisha nikuhana maBayibolu ninyikanda yashindamena haBayibolu. Antu jaYehova anabalumuni Bayibolu, yamukuma hela yachibalu, mumadimi kubadika ha 240 nawa muntu wejima nateli kutambula Bayibolu chawaana. Chinakufumamu, antu akunyuza yejima anakutambwila “nsañu yayiwahi yaWanta” henohu kukuma kanda kwinzi. (Mat. 24:14) Nzambi yetu wawuñanji nakukeña kwinka antu amavulu kukooleka kwakumwiluka kuhitila mukutaña Izu dindi. Muloña wakwila watukeña wejima wetu. w23.02 5 ¶11-12

Komana mwakeña kuloña? Chakadi nikujina mwakukeña. Ilaña wejima wetu hitwawaninaku, dichi neyi kubabala nehi, tunateli kuluwankana nachamonaña kaayi kuloña. (Isa. 5:20) Neyi antu anakuhosha hadi muntu waloña, amavulu atoñojokaña hadi muntu wababala-babala, wasompesha-sompeshaña, hela wadimonaña kuloña. Ilaña Nzambi wahela yilwilu yamuchidiwu. Yesu hadiñayi hamaseki, wayizuwilili akulumpi jakwitiya adiñaku hayina mpinji nachiyashileñaku nshimbi jawu aweni jakuloña. (Mukwa. 7:16; Luka 16:15) Kuloña kwakweni hikwatalisha mukudimona kuloñaku. Kuloña hichilwilu chachiwahi hama. Muwihi, kuloña kwatalisha mukwila yuma yayiwahi kumesu aYehova Nzambi. MuBayibolu, mazu akwila nawu “kuloña,” atalisha mukuhemba nshimbi jaYehova jaloña. w22.08 27 ¶3-5

Yesu wayikuhweleleli atumbanji twindi hela chakwila aluwañesheleña. (Yow. 15:16) Yowanu naYakoba chamwililiwu Yesu nawu akashakami hamaluña alema muWanta, Yesu hajinokeli chuma chaletesheli amukalakeli Yehova hela kuyikaana kwikala apostolu. (Maku 10:​35-40) Chimwahitili mpinji, atumbanji twaYesu ejima amushiyili nkawindi hawufuku wamukwatiliwu. (Mat. 26:56) Hela chochu, Yesu halekeli kuyikuhwelelaku. Welukili nindi awanina wanyi; hela chochu, “wayikeñeli kushika nikunsa.” (Yow. 13:1) Chelili anamusañuli dehi Yesu, wayinkeli apostolu indi ashinshika 11 mudimu walema wakulombola mudimu wakushimwina nikwakamena nyikoku yindi yalema. (Mat. 28:​19, 20; Yow. 21:​15-17) Kudi yuma yaletesheli ayikuhweleli awa antu abula kuwanina. Ejima wawu adiña ashinshika sampu nichafwiliwu. Chakadi nikujina, twatela kumwimbujola Yesu nakukuhwelela antu abula kuwanina. w22.09 6 ¶12

Neyi twiluka chikupu netu Yehova watukeña nawa wudi nanetu, tunateli kumushinda Satana kuleka kututiyisha woma. Chakutalilahu, nsoneki weIsamu 118 wamweni kukala kwakuvulu kwamwakamishileña. Wadiña nawayilumbu amavulu, kushilahu niantu alema (vasi 9, 10). Mpinji yikwawu, wadiña mukukala kwasweja (vasi 13). Nawa Yehova wamubabesheli chikupu (vasi 18). Hela chochu, ñimbi yaisamu wembili nindi: “Hinukutiya womaku.” Welukili nindi hela chakwila Yehova wamubabesheli, Tata yindi wamwiwulu wamukeña. Ñimbi yaIsamu welukili chikupu nindi hela chakwila wudi mumukala kwamuchidinyi, Nzambi yindi wukweti kukeña wukumukwashaña mpinji yejima. (Mas. 118:29) Twatela kwiluka chikupu netu Yehova watukeña hamuntu-hamuntu. Neyi twiluka netu watukeña chikutukwasha kuleka kutiya woma iyi yuma yisatu, (1) kuchiina netu hitukutwesha kukeñela chisaka chetu yuma yakumujimbaku, (2) kutiya antu woma (3) nikuchiina kufwa. w22.06 15 ¶3-4

Twatela kulemesha chikupu kudifukula kudi Yehova muchihandilu chetu. Chineli Yehova diyi Nleñi yetu, yena hohu diyi itwatela kudifukulaku. (Chim. 4:11; 14:​6, 7) Dichi, twatela kudifukulaña kudi yena munjila yetejayi, “muspiritu nimuchalala.” (Yow. 4:​23, 24) Tunakukeña spiritu yajila yaNzambi yilomboleña kudifukula kwetu kulonda kwendeleña hamu nachalala chekala Mwizu dindi. Twatela kutwamijaku kudifukula hela chakwila twashakamaña mwituña mwalekeshawu mudimu wetu. Katataka ichi, amanakwetu niahela akubadika ha 100 anayikasi muloña wakwila hiyaYinsahu jaYehova. Hela chochu, azataña nañovu jawu kulomba, kudiza nikulejaku amakwawu hadi Nzambi yetu niWanta windi! Neyi anakutusawula hela kutukabisha twatela kuzañalala hakwiluka netu Yehova wudi nanetu nawa wukutukiswila.—1 Pet. 4:14. w22.10 9 ¶13

Mukanda waYishimu wejima, mwekala kufumba kwatwinkayi Yehova kunateli kutukwasha muchihandilu chetu neyi tukuzatisha. Talenu iyi yakutalilahu yiyedi yakufumba kwamaana. Chatachi, monenuña yuma yimukweti nenu yinawanini. Yishimu 23:​4, 5 yahana iku kufumba nawu: “Bayi wudizeyesha nakufwila kuhetaku. . . . Muloña akamena mpuula neyi mbuulu nawa akatuuka nakuya mwiwulu.” Hela chochu, aheta niatuzweñi afwilaña kukwata mali. Chumichi chinateli kuyikojeja kwila yuma yinateli kuyitamishila ijina, wubwambu wenu nikuyiletela wubanji kumujimba. (Yish. 28:20; 1 Tim. 6:​9, 10) Chamuchiyedi, mwatela kutoñojoka henohu kanda muhoshi. Neyi kubabala nehi, tunateli kuhosha mazu anateli kukatisha akwetu. Yishimu 12:8 yahosha nawu: “Nhoshelu yakutuboka yidi neyi yilonda yampoku yakabali, ilaña idimi damukamaana dookaña.” Twekalaña nawubwambu wawuwahi neyi tutondolwelaña kutuñula akwetu hayiluwa yawu.—Yish. 20:19. w22.10 21 ¶14; 22 ¶16-17

Ezekeli wateleleli kutiyisha chikupu nsañu yayileña nakushimwinayi. Wateleleli kuyikuhwelela kulonda yimusañumuni kushimwina. Kuhiñahu kwamwekeni chuma chakuhayamisha. Ezekeli wenjili nakwiluka nindi ona muvuñilu “watoweli neyi wuchi.” (Ezek. 3:3) Muloñadi? Muloña Ezekeli, wamweneña kumwimenaku Yehova neyi hichuma chatowala hela chachiwahi. (Mas. 19:​8-11) Watiyili kuwaha hakwiluka nindi Yehova namwiteji kwikala kaprofwetu kindi. Nkumininaku, Yehova wamulejeli Ezekeli nindi: “Shakuku muchima nawa tiyililaku mazu ami ejima innakukuleja.” (Ezek. 3:10) Kuhitila mukumuleja awa mazu, Yehova wamulejeli Ezekeli kwanukaña awa mazu asonekeliwu mumuvuñilu nikutoñojokañahu chikupu. Kwila mwenimu kwakolesheli chikuhwelelu chaEzekeli. Kwamukwashili cheñi kwiluka nsañu yalema yayileña nakulejayi antu. (Ezek. 3:11) Namazu aNzambi adiña mumuchima windi nikunyivumbu yindi, Ezekeli wetejeli mudimu wamwinkeliwu nawa wawuzatili. w22.11 6 ¶12-14

Neyi yuma yinahimpiwu mukuloñesha yinashi kashinshi kenu mukweseka, chumanyi chimwatela kwila? Ovwahilenuña chikupu kuhimpika kwamukuloñesha. Hampinji yendeleñawu mwisaña, aKohati amakwawu asendeleña chimbañu chachitiyañenu nakutwaminaku kumbidi yawantu ejima. (Kuch. 3:​29, 31; 10:33; Yosh. 3:​2-4) Iwu wadiña himudimu walema chikupu! Hela chochu, yuma yahimpikili helili aIsarela atachiki kushakama Mwituña daChikaninu. Haniyi mpinji, Chimbañu hiyavulileña kuchituntujolaku. Dichi aKohati amakwawu ayinkeli nyidimu yikwawu. (1 Kushi. 6:​31-33; 26:​1, 24) Kwosi hitwatañaña nawu aKohati atoobeli hela akeñeli nawu ayinki mudimu walema chineli azatileña mudimu walema hakusambilaku. Chumanyi chitunakudizilaku? Ovwahilenuña namuchima wejima neyi kudi kuhimpika mukuloñesha kwaYehova, kushilahu nikuhimpika kwamudimu wumwazataña mukuloñesha. Zañalalenuña namudimu wejima wunayinkiwu. Anukenuña nenu mudimu wumwazataña hidiwu waleteshaña mwiikali alemaku. Yehova walemesha chimwamwovwahilaña kubadika mudimu wejima wumukweti. w22.11 23 ¶10-11

Onesifwolu wamukeñakeñeli kapostolu Pawulu nawa chamuwaniniyi, wazatileña nañovu kulonda amukwashi munakaankiliyi. Chelileñayi mwenimu, Onesifwolu washileña wumi windi muwubanji. Chumanyi chitunakudizilaku? Bayi twiteja antu atutiyishi woma hela kutukañesha kukwasha amanakwetu anakukabishawuku. Ilaña tuyihakwileñaku nikuzata nañovu kulonda tuyikwashi. (Yish. 17:17) Anakukeñeka kuyikwasha nikuyimwekeshela kukeña. Talenu amanakwetu niahela muRussia chinakukwashawu akwawu akakwitiya anakasiwu mutuleya. Neyi amakwawu anakuyisompesha, amanakwetu niahela amavulu enzaña kuchota chanyiloña nakuyikolesha. Chumanyi chitunakudizilaku? Neyi amanakwetu anakulombola anayitwambili, anayikasi hela kuyikabisha, bayi mutiya womaku. Yilombelenuñaku, akamenenuña amuchisaka chawu nawa keñakeñenuña njila mumwatela kuyikwashila.—Yilw. 12:5; 2 Kor. 1:​10, 11. w22.11 17 ¶11-12

Mudimu wukwawu wukwetiwu akulumpi muchipompelu hikwakamena antu kuspiritu nikukwasha ananeñi. (1 Pet. 5:2) Neyi kunamwekani wubanji, chuma chatachi chatela kwilawu akulumpi hikwiluka neyi amanakwetu niahela akiñewa, adi nayakuda, yakuvwala nihakukaama. Nawa neyi munahiti dehi tukweji twatuvulu, amanakwetu apulukili kuwubanji akakeñekaña kuyakamena kuspiritu nikuyikwasha muloña wachineñi. (Yow. 21:15) Manakwetu Harold, wamuKometi yaKasanji kaMutayi nawa wunamoni amanakwetu niahela amavulu anahiti muwubanji, wahosheli nindi: “Halehaña hakwila ajimbaliku. Anateli kutachika kujimbalaku yuma yamwekeni, ilaña akwanukaña ntaña yawu wafwili, iheta dajimbesheliwu nikukala kwahitilimu hakwila apuluki. Kwanuka yumiyi kunateli kuyiletesha kutachika cheñi kuneña. Ichi hichinayi mukwila nawu adana chikuhweleluku, ilaña dichatiyañayi muntu wejima.” Akulumpi azatishaña kufumba kwakwila nawu “dilenuña nanowu anakudila.”—Rom. 12:15. w22.12 22 ¶1; 24-25 ¶10-11

Hakwila tutwesheña kwila yuma yaloña, Yehova watwinkaña spiritu yindi yajila. Neyi tudiza Izu daNzambi, tunakwiteja iyi spiritu kutukwasha. Twatambwilaña cheñi spiritu yajila neyi tuya nakupompa. Haniku kupompa kwawakaKristu, tunateli kuhanjeka nawamanakwetu niahela, anakuzata nañovu kwila yuma yaloña neyi etu, nawa chumichi chikutukolesha. (Heb. 10:​24, 25; 13:7) Nawa neyi tumulomba Yehova chakufuma hamuchima nakumulembelela netu atukwashi mukuzeyazeya kutukweti, wukutwinka spiritu yindi yajila kulonda yitukwashi kutwalekahu kulwisha. Hela chakwila iyi yuma hiyinateli kufumishahu kufwila kwatamaku, ilaña yikutukwasha kudikaña nayitoñojoka yatama yakufwila kwila yuma yatama. Neyi tutachika kwila yuma yikutukwasha kwikala nawubwambu wakola naYehova, chalema kutwalekahu kwila mwenimu kulonda tufwileña kwila yuma yayiwahi. w23.01 11 ¶13-14

Hela chakwila Bayibolu himukanda wahosha hansañu jakukola kumujimba hela hayakuda yitwatela kudaku, yamwekeshaña Yehova chatoñojokañayi kutalisha hayumiyi. Chakutalilahu, watukonkomwenaña kudikiña “kuyuma yafwana” yinateli kukisañana mujimba wetu. (Mukwa. 11:10) Yuma yinateli kusha wumi wetu muwubanji, dikwila nawu kufwa hakuda nikusheta, yejima ayikaanisha muBayibolu. (Yish. 23:20) Yehova wakeñaña tudiyuuleña hampinji yitunakufuukula yuma yitwatela kuda nikunwa nawa nikuvula kwayu. (1 Kor. 9:25) Tunateli kufuukula yuma yikumwekesha nawu twasakililaña chikupu hachawaana chawumi chatwinkawu kudi Nzambi kuhitila mukuzatisha wuswa wetu wakutoñojoka. (Mas. 119:​99, 100; Yish. 2:11.) Chakutalilahu, twazatishaña chiwahi wuswa wetu wakutoñojoka hayuma yitwafuukulaña kuda. Neyi kudi yakuda yitwakeña ilaña yatukatishaña kumujimba, twafuukulañahu kubula kuyida. Twamwekeshaña cheñi netu twatoñojokaña mwamaana neyi tukaamaña swayi, kukolesha mujimba mpinji yejima, kudiwahisha kumujimba nikuhemba matala etu nawunyonji. w23.02 21 ¶6-7

Munateli kuwana ñahi yuma yalema yakuspiritu hampinji yimunakutaña Bayibolu? Talenu chahosha 2 Timotewu 3:​16, 17. Yahosha nawu “Nsona yejima . . yayiwahi” (1) kudizisha nachu, (2) kuzuwila nachu, (3) kwolola nachu, (4) nikubabesha nachu. Iyi yuma yiwana yikuyikwasha, munateli kuyiwana nimunyikanda yikwawu yamuBayibolu yimwabulaña kutaña kakavulu. Shinshikenu hanoyu nsañu kulonda mwiluki chiyinakuyidizisha hadi Yehova, nkeñelu yindi hela hayishina yaNzambi. Talenu chiyawahila kuzuwila nachu. Ilenu mwenimu kuhitila mukumona owu mavasi chikuyikwashawu kwiluka nikutondolwela yaaku hela yilwilu yatama kulonda mutwalekihu kwikala ashinshika. Shinshikenu hachimunateli kuzatisha oyu nsañu kwolola nachu yitoñojoka yaheña, hadaha yahosheli muntu imwawanini mumudimu wakushimwina. Nawa talenu kubabesha kudi kwejima kudi munowu mavasi kukuyikwasha kwiluka chatoñojokañayi Yehova. Neyi mwanukaña kuwaha kwaniyi yuma yiwana, mukuwana yuma yalema yakuspiritu yikuyikwasha kutiyishisha yuma yimunakutaña muBayibolu. w23.02 11 ¶11

Wuprofwetu wamumukanda waDanyeli washimwineñahu dehi nawu Yesu wukatambwila Wanta hakukuma kwampinji 7 yawuprofwetu. Komana chaswayi kwiluka hamwekeni iyi mpinji yamuzañalu? (Dan. 4:​10-17) “Mpinji 7” yinakwimenaku yaaka 2,520. Iyi mpinji yatachikili mu 607 B.C.E. helili aBabiloni afumishi mwanta wakukumishaku hetanda daYehova muYerusalema. Yamanini mu 1914 C.E. helili Yehova namuswanyiki dehi Yesu, muntu “wukweti wuswa,” kwikala Mwanta waWanta waNzambi. (Ezek. 21:​25-27) Iwu wuprofwetu wunateli kutukwasha ñahi? Kwiluka “mpinji 7” kwatukwashaña kwiluka netu Yehova washikijaña yikaninu yindi mumpinji. Neyi chashiliku mpinji yakwikalaku Wanta windi, wakashikija cheñi wuprofwetu wejima kwesekeja nampinji yashaku. Eña, ifuku daYehova ‘hidakalabaku!’—Hab. 2:3. w22.07 3 ¶3-5