February

Hampinji yakatiliyi nankashi Mwanta Hezekiya, wamulembeleli Yehova kulonda amukwashi akoli. Yehova waakwili kulomba kwindi kuhitila mukumuuka. (2 Anya. 20:​1-6) Kwambukaku, hampinji kapostolu Pawulu yamulembeleliyi Yehova nindi amufumishi “mwiña mumujimba,” Yehova hafumishilihu akuna kukalaku. (2 Kor. 12:​7-9) Atupostolu ayedi aYakoba naPetulu wejima wawu akeñeleña kuyijaha kudi Mwanta Herodi. Yakoba amujahili, ilaña Petulu amupulwishili muchihayamisha. (Yilw. 12:​1-11) Hadaha tunateli kudihula netu, ‘Muloñadi Yehova chamupulwishililiyi Petulu ilaña Yakoba nehi?’ Bayibolu yahoshahu wanyi haniyi nsañu. Chuma chitwatela kwanukaña chidi chakwila nawu Yehova mpinji yejima ‘hakoñaña yuma yaheñaku.’ (Kuhit. 32:4) Mpinji jikwawu, tunateli kumona kukala kutwabulili nikukuhwelela. Ilaña chineli twakuhwelela netu mpinji yejima Yehova wukwakula kulomba munjila yayiwahi nawa yoloka, hitwajinokaña njila yakwilañamu kulomba kwetuku.—Yoba 33:13. w23.11 21 ¶6

Nsoneki oneneniwu Yakoba wahosheli nindi antu ekalaña namaana “anyakalaña kwovwahila.” Talenu mwatalisha awa mazu. Twatela kwikala namuchima wakufwila chikupu kwovwahila antu enkayi Yehova wuswa wakulombola. Hela chochu, Yehova hakeñaña nindi twovwahileña muntu wunakutuleja nindi tudiwuleña nshimbi Jindiku. (Yilw. 4:​18-20). Tunateli kumona netu chaswayi kumwovwahila Yehova kubadika antu. Muloña mpinji yejima Yehova watwinkaña nshimbi jajiwahi. (Mas. 19:7) Ilaña antu akweti wuswa wakulombola hiyawaninaku. Hela chochu, Tata yetu wamwiwulu wayinkahu wuswa anvwali, anlomboli janfulumendi niakulumpi. (Yish. 6:20; 1 Tes. 5:12; 1 Pet. 2:​13, 14) Neyi tuyovwahila, dikwila nawu tunakumwovwahila Yehova chikupu. w23.10 6 ¶2-3

Njila yimu mutunateli kukoleshela chikuhwelelu chetu hikutoñojoka hañovu jaYehova. Wukweti ñovu yakushikija yuma yejima yakanañayi. Muloña hiNzambi Wañovu Jejima. (Yoba 42:2; Maku 10:27; Efwe. 3:20) Wayikanini aAbarahama naSara nindi akavwala mwana weyala muwushinakaji. (Kutach. 17:​15-17) Wamulejeli cheñi nindi mutaña windi akawinka ituña daKenani. Hadi yaaka yayivulu yashakamini mutaña waAbarahama, dikwila nawu aIsarela, muwuduñu muEjipitu, chatela chamwekeni neyi ichi chikaninu chakashikijewa wanyi. Ilaña chashikijeweli. Wamulejeli mujiki Mariya nindi, wakamuvwalila Mwanindi owu wakaniniyi Yehova kunyima hadi yaaka yayivulu mwitempa daEdeni nindi wakenza.—ichi chikaninu nichena chashikijeweli! (Kutach. 3:15) Twakuhwelelaña chikupu muñovu jaYehova jakuleta kaayi kakaha neyi tutoñojokaña hayikaninu yakaniniyi nichayishikijañayi.—Yosh. 23:14; Isa. 55:​10, 11. w23.04 28 ¶10-12

Yehova waakwili kulomba kwaDavidi kukeña kumwamwina. (1 Sam. 19:​10, 18-20; 2 Sam. 5:​17-25) Ninetu tunateli kukuhwelela muniyi njila. (Mas. 145:18) Mpinji yikwawu Yehova hanateli kwakula kulomba kwetu kwesekeja nachitunakuhweleliku. Pawulu wamulombeli Nzambi nindi amufumishi “mwiña mumujimba.” Hampinji jisatu jashiyashana, Pawulu walombeli hohu haniku kukala kweneni kwamweneñayi. Komana Yehova waakwili akuna kulomba kwindi? Eña, ilaña bayi neyi chakuhweleleliyi Pawuluku. Chatela afumishihu akuna kukala, Yehova wamwinkeli ñovu yakeñekeleña kulonda yimukwashi kutwalekahu kumukalakela nakashinshi. (2 Kor. 12:​7-10) Hadaha mpinji jikwawu ninetu anateli kutwakula munjila yinambukiku nachitunakuhweleli. Twatela kukuhwelela netu Yehova weluka chikupu chakutukwasha. Nateli cheñi “kukoña yuma yasweja kubadika chikupu yuma yitwamulombaña hela yitwatoñojokaña.” (Efwe. 3:20) Muloña wachumichi, nateli kwakula kulomba kwetu hampinji hela munjila yitunabuli kukuhwelela. w23.05 8-9 ¶4-6

Mpinji yejima, wejima wetu tukwilaña chiwahi neyi tutoñojokaña hachikaninu chamuBayibolu chahosha hakusañuka kudi kumbidi. Muloñadi? Muloña tuneluki wanyi mpinji yitunateli kukata chikatu cheneni hela kufwisha muntu itwakeña mukukasumwisha. (Mukwa. 9:11; Yak. 4:​13, 14) Kuchiñeja kwakusañuka kutukweti kukutukwasha kuumika iku kukala kwejima. (1 Tes. 4:13) Nsona jatukoleshaña nawu Tata yetu wamwiwulu watwiluka chiwahi, watukoleshaña nawa watukeña chikupu. (Luka 12:7) Yehova Nzambi watela kutwiluka chiwahi hakwila akatusañuli nayilwilu niwuswa wutwadiña nawu wakwanuka yuma. Yehova watukeña nankashi nawa watwinka kukooleka kwakwikala nawumi wahaya nyaaka. Hela chakwila tunafwi, wakatusañula! Muloñadi chitwatela kukuhwelela muchikaninu chakusañuka? Muloña tweluka chikupu netu Muntu wunatukani wukweti muchima wakufwila kwilamu niñovu hela wuswa wakushikija munakaniyi. w23.04 8-9 ¶2-4

AYosefu naMariya cheñi azatilileña hamu hakukolesha wubwambu wawu naYehova. Elukili chichalemena kudifukula kudi Yehova hamu neyi chisaka. (Luka 2:​22-24; 4:16). Ichi hichakutalilahu chachiwahi chatela kwimbujolawu adisumbula makonu! Neyi mudi nawanyana, neyi chadiñawu aYosefu naMariya, hadaha chinateli kuyikalila kuya nakupompa hela kwikala nampinji yakudifukula kwachisaka. Chinateli nikukala nankashi kuwana mpinji yakudizila hamu neyi chisaka hela kulomba. Hela chochu, anukenu nenu neyi mukudifukwilaña hamu kudi Yehova, mukuswina kwakwihi nayena nikudi wumu namukwawu. Dichi twamijenuñaku kudifukula muchihandilu chenu. Neyi mudi nakukala muwulu, munateli kutachika kutoñojoka nenu kudifukwila hamu neyi chisaka kwalema wanyi. Neyi dichidi yuma, tachikenu nansañu yantesha nawa yakuzañalesha. Chumichi chinateli kukolesha wubwambu wenu nawa chikuyikwasha mufwileña kwilila hamu yuma yakuspiritu hamu neyi adisumbula. w23.05 22 ¶7-8

Woma wawuwahi wamukwashili ñahi Obadiya? Chatachi iwu woma wamuletesheli kwikala washinshika nawa muntu akuhweleleliwu; chakwila mwanta wamwinkeli mudimu wakutala amwitala damwanta. (Esekejenu Nehemiya 7:2.) Kumutiya Nzambi woma kwamukwashili cheñi Obadiya kwikala wahamuka chikupu, chilwilu chakeñekeleñayi kwikala nachu. Wadiñaku hampinji yayuulileñayi Mwanta Ahabi watama. (1 Anya. 16:30) Cheñi ñoda Ahabi, Yezebeli, wadifukwileña kudi Bayali wamuheleli nankashi Yehova chakwila wafwilileña kujiyisha kudifukula kwalala muwanta wakukabeta kakuchimunswa. Wajahili niatuprofwetu aNzambi amavulu. (1 Anya. 18:4) Yezebeli chatachikiliyi kukeñakeña atuprofwetu twaNzambi nindi ayijahi, Obadiya wasendelihu atuprofwetu 100 nawa wayiswekeli “mwiyeñu dimu 50, mwiyeñu dikwawu 50 nikutwalekahu kuyinka mankendi nimenji.” (1 Anya. 18:​13, 14) Neyi amwilukili, chakadi nikujina iyala wahamuka Obadiya adi kumujaha. Hela chochu, Obadiya watiyileña neyi chitwatiyaña, nawa hakeñeleña kufwaku. Ilaña Obadiya wamukeñeli Yehova niantu amukalakeleleña kubadika chakeñeliyi wumi windi. w23.06 16 ¶9-10

Yehova natwalekihu kulombola antu jindi makonu neyi cheliliyi kunyima. Wayilombolaña kuhitila mukuzatisha Izu dindi niMwanindi, mutu wachipompelu. Kudihu wunsahu wunakumwekesha nawu Nzambi natwalekihu cheñi kuzatisha antu kulonda amwimeneñaku? Wudi kwoku. Chakutalilahu, talenu chuma chamwekeni hanyima yachaaka cha 1870. Charles Taze Russell nialunda nindi atachikili kutiyishisha nawu chaaka cha 1914 chakekala chaaka chalema nankashi chakatachika Wanta waNzambi. (Dan. 4:​25, 26) Hakwila akunkululi muniyi njila, ashindameneni hawuprofwetu wamuBayibolu. Komana Yehova wadiña nakuyilombola hampinji yasandujoleleñawu muBayibolu? Eña. Yuma yamwekeni mukaayi mu 1914 yamwekesheli hatooka nawu Wanta waNzambi watachikili kuyuula. Njita Yakaayi Yatachi yatachikili, halondeleli yipupu, nyitentanshi nikukeha kwayakuda. (Luka 21:​10, 11) Chakadi nikujina, Yehova wazatishileña ana amayala akaKristu ashinshika hakukwasha antu jindi. w24.02 22 ¶11

Chineli tudi antu jaYehova, tweluka netu watukeña nawa wakeñaña nindi tushakameña chiwahi. (Rom. 8:​35-39) Tweluka cheñi netu yishina yamuBayibolu yatukwashaña neyi tuyizatishaña. (Isa. 48:​17, 18) Hanu dinu, tukwila ñahi neyi tumona kukala kutwabula kukuhwelela? Chakutalilahu, muntu wamuchisaka nateli kwila chimu chinateli kutuneñesha. Hadaha tudi nachikatu cheneni chinakutukañesha kuzata nankashi mumudimu waYehova. Tunateli kuhita mukukala kweneni muloña wawubanji wadimwekenaña. Indi kwiji anateli kutukabisha muloña wayuma yitwakuhwelela. Neyi tumona kukala kwamuchidiwu, hadaha tukudihula netu: ‘Muloñadi yumiyi chiyinakummwekena? Kudihu chuma chinneli? Komana chumichi chinakumwekesha nawu Yehova nakunkiswila wanyi?’ Mwatiyahu dehi muniyi njila? Neyi mwatiyahu dehi muniyi njila, bayi muneñaku. Ambuña aYehova amavulu ashinshika niwena atiyahu dehi muniyi njila.—Mas. 22:​1, 2; Hab. 1:​2, 3. w23.04 14 ¶1-2

Neyi tudi mukweseka kwakwila yuma yatama, twashikenaña kukaana yitoñojoka hela yilwilu yinateli kukisañana wubwambu wetu naNzambi. Yehova wakeñaña ‘tumwovwahileña namuchima wetu wejima.’ (Rom. 6:17) Yuma yatulejañayi kwila yatukwashaña mpinji yejima nawa nshimbi jindi kwila tujihimpa nehi. (Isa. 48:​17, 18; 1 Kor. 6:​9, 10) Diyabolu watulukukaña kumujimba nimuyitoñojoka kulonda atuzeyeshi. Wafwilaña ‘kutwida,’ dikwila nawu kukisañana wubwambu wetu naYehova. (1 Pet. 5:8) AkaKristu amumafuku awapostolu ayichiinishileña, ayeteleña nikuyijaha muloña wakufwila kutwalekahu kwimana akola mbe-e. (Yilw. 5:​27, 28, 40; 7:​54-60) Nimakonu, Satana natwalekihu kuzatisha ikabisha. Chumichi chinakumwekena muchinakuyikabishawu amanakwetu niahela muRussia nimumatuña amakwawu kushilahu nichinakuyilukukawu amanakwetu kudi akakudimbulula. Kubombela hekabisha, Satana wazatishaña cheñi “tufuta.”—Efwe. 6:11. w23.07 15-16 ¶6-9

Chimukutwalekañahu kudiza Izu daNzambi, mukusweja kumukeña Yehova. Iku kukeña kukuyisañumuna kuzatisha yuma yimunakudiza. Mukutachika kufuukula chiwahi kushindamena hayishina yamuBayibolu. Mukuhimpa yilwilu yenu muloña munakukeña kumutiyisha Nzambi kuwaha. Neyi mwana chembujolañayi nvwali wukweti kukeña, ninenu munakukeña kumwimbujola Tata yenu wamwiwulu. (Efwe. 5:​1, 2) Tunateli kudihula netu: ‘Komana naswejeliku kumukeña Yehova kubadika hinekalili mukaKristu? Kufuma hinapapatisheweli, komana natoñojokaña nikwila yuma neyi chelañayi Yehova, sweje-e kumwekeshela amanakwetu niahela kukeña?’ Neyi “kukeña [kumwadiña] naku hakusambila” kunakehañani, bayi muzeyaku. Chuma chamuchidiwu dichayimwekeneni niakaKristu akusambila. Yesu halekeli kuyikwashaku, ninetu hamba kaleka kutukwashaku. (Chim. 2:​4, 7) Weluka nindi tunateli cheñi kwikala nakukeña kutwadiña naku hampinji yitwadizili chalala. w23.07 8 ¶2-3

Kapostolu Petulu wakoñeli yiluwa yayivulu. Chatachi, Petulu wadikuhweleleli, nakudivwimba nindi wukutwalekahu kwikala washinshika hela chakwila akwawu apostolu akumushiya Yesu. (Maku 14:​27-29) Chamuchiyedi, Petulu wakañenyi kutwalekahu kwikala watona kapampa kakavulu. (Maku 14:​32, 37-41) Kuhiñahu, Petulu wamushiyili Yesu muloña wezanvu dawakamadombu. (Maku 14:50) Nkumininaku, Petulu wamukaanini Yesu kapampa kasatu nindi wamwiluka wanyi, chakwila wasanyikili nikusanyika kutalisha hanawa makudi. (Maku 14:​66-71) Petulu welili ñahi chelukiliyi kutoha kwanshidi yakoñeliyi? Waneñeli nawa wadilili nankashi. (Maku 14:72) Chatela amuzuwili Petulu muloña wayiluwa yakoñeleñayi, Yesu wamulejeli iwu ibwambu dindi nindi wakatambwila nyidimu yamaneni. (Yow. 21:​15-17) Petulu welukili nindi wavulumwini chikupu, ilaña watwalekelihu kufwila kwila yuma yaloña. Muloñadi? Muloña wakuhweleleli nindi Nkaaka yindi, Yesu, hamushiyiliku. Chumanyi chitunakudizilaku? Yehova wakeñaña nindi tukuhweleli chikupu netu watukeña nawa watwanakenaña.—Rom. 8:​38, 39. w24.03 18-19 ¶13-15

Kwila wuvumbi kunateli kuletesha muntu kuditiya nsonyi, kudimona nindi washikilamu wanyi, munateli kufuma mavumu akadi kukuhwelela niyisaka kwambuka. Mwamweni, chalema kutondolwela “itala” damumbanda wasupa. Kubombela hakufwa kuspiritu, antu amavulu elaña wuvumbi akataña yikatu yayileteshaña kufwa swayi. (Yish. 7:23) Vasi 18 muYishimu kapetulu 9 yakunkulula nawu: “Enyi indi adi Mwijamu dakunama.” Hanu dinu, muloñadi antu amavulu chetejeleñawu mutambi windi mwafumaña yuma yatama? (Yish. 9:​13-18) Muhetu wumu wunasweji kutaanda hikutala nyevulu yanzekesi. Antu amavulu atoñojokaña nawu kutala nyevulu yanzekesi kwatama wanyi. Ilaña kutala nyevulu yanzekesi kwatama, kwaleteshaña muntu kubula kudimona kulema nawa wateñukaña. Nyevulu yanzekesi yashimataña muyitoñojoka nawa chakalaña kuyivulamena. Chasweja kutama, nyevulu yanzekesi hiyamanishaña mpwila yakufwila kwila yuma yatamaku, ilaña yasañumunaña iyi mpwila. (Kol. 3:5; Yak. 1:​14, 15) Mwamweni, antu amavulu atalaña nyevulu yanzekesi yayikojejaña kwila wuvumbi. w23.06 23 ¶10-11

Hela chakwila mpinji yikwawu matuña amakwawu anateli kudikaña naAnglo-America Wanta waÑovu muKaayi, kwila atwesha kuwusinsa nehi. Tuneluki chumichi muloña “ilola” dinakwimenaku Wanta waNzambi dakachika madatilu, owu emenañaku Anglo-America. (Dan. 2:​34, 35, 44, 45) Komana munakuhweleli chikupu nenu wuprofwetu waDanyeli wahosha hamadatilu achikuñu nandambu walala? Neyi diimu, chumichi chikuyikwasha kwiluka chimwatela kuhanda. Himukufwilaña kwikala namaheta amavulu mukanu kaayi kadi kwakwihi nakujilumunawuku. (Luka 12:​16-21; 1 Yow. 2:​15-17) Kwiluka mwatalisha iwu wuprofwetu kunateli kuyikwasha cheñi kwiluka kulema kwamudimu wakushimwina nikudizisha. (Mat. 6:33; 28:​18-20) Hanyima yakudiza iwu wuprofwetu, kwila mudihula ilu lwihu nehi, ‘Komana yuma yinafuukulaña yamwekeshaña nawu nakuhweleli nami Wanta waNzambi wudi kwakwihi nakujiyisha nfulumendi jawantu jejima?’ w23.08 11 ¶13-14

Dizozenu nakwiluka nenu hadaha mukutwesha wanyi kwila yuma yejima yimunakukeña kwila chayinu mpinji muloña wakukula, kubula kukola kumujimba nichidi yuma muchihandilu. Neyi cheliliyi Bazilayi, kaanenuña nyidimu yikwawu neyi muneluki nenu mukutwesha wanyi muloña wakukula kumujimba indi kwiji kukata. (2 Sam. 19:​35, 36) Neyi cheliliyi Mosi, itejenuña wukwashu nawa inkenuku akwenu nyidimu neyi chinatwesheki. (Kwid. 18:​21, 22) Kudizoza kwamuchidiwu kukuyikwasha kubula kukuhwelela kwila yuma yimukubula kutwesha yinateli kuyizeyesha. Hitwatela kutiya neyi iyetu twaleteshaña akwetu afuukuleña mwaluwaku. Hitunateli kuyifuukwilaku akwetu, hela kuyikiña kukukala kwafumaña mukufuukula kwawu kwatamaku. Chakutalilahu, mwanenu nateli kufuukulahu kuleka kumukalakela Yehova. Kufuukula kwamuchidiwu kunateli kuyineñesha chikupu anvwali. Hela chochu, anvwali adinkaña nyiloña muloña wakufuukula kwaluwa kwamwanawu aditwikaña aweni chiteli chalema. Ichi hidichiteli chakeñañayi Yehova nindi anvwali asendeñaku. w23.08 29 ¶11-12

Samusoni wadiña wabula kuwanina neyi etu, dichi mpinji jikwawu wafuukwileña mwaluwa. Chuma chimu chafuukwiliyi chamuleteleli kukala kwakuvulu. Hanyima yakukalakala mudimu wawunsompeshi hadi mpinji yayilehi, Samusoni “wakeñeli mumbanda washakamineña muChinekineki chaSoreki nawa ijina dindi wadiña Delila.” Hakusambila, Samusoni woteli mumbanda kaFilisitinu, ilaña iku kudikunda ‘kwafumini kudi Yehova,’ owu “wakeñeleña njila yakuzuñilamu nawaFilisitinu.” Nkumininaku, Samusoni washakamini mwitala dachivumbi mumusumba wawaFilisitinu waGaza. Haniyi mpinji, Nzambi wamwinkeli Samusoni ñovu yakusenda yenzelu yakuchiisu chamusumba, nakuletesha musumba wubuli kwikala wakiñewa. (Anso. 14:​1-4; 16:​1-3) Hela chochu, Delila watela wadiña kaIsarela, dichi kudikunda kwawu hikwadi kuletesha awani njila yakuzuñilamu nawaFilisitinuku. Delila watambwili mali amavulu kudi aFilisitinu kulonda amufukejeli Samusoni. w23.09 5 ¶12-13

Kashinshi kanateli kutukwasha kwikala amwovu. Muntu wukweti kashinshi wadiyuulaña neyi anakumwihula kutalisha hayuma yakuhwelelayi. Kakavulu, neyi antu atwihula malwihu hiyatulejaña chinaleteshi atwihuli owu malwihuku. Dichi henohu kanda twakuli, tukwila chiwahi neyi twanuka netu hadaha hitunateli kwiluka chuma chinaleteshi owu muntu ehuli olu lwihuku. (Yish. 16:23) Talenu Gidiyoni chayakwiliyi amayala eni Efuremu. Amwihwili nakuhila chaletesheli abuli kuyitambika hakusambila kulonda ayi nindi nakuzuña nawayilumbu jaIsarela. Chumanyi chaletesheli ahili nankashi? Muloña wakwila atiyili kutama? Tuneluki wanyi, ilaña Gidiyoni walemesheli chatiyileñawu nawa wayakwili namuchima wawovu. Chumanyi chafuminimu? Bayibolu yahosha nawu chahosheliyi awa mazu, “awundishili nyichima.”—Anso. 8:​1-3. w23.09 16 ¶8-9

Yehova niYesu adikunda chikupu, kudikunda kwekala hohu hakachi katata yawantu namwanindi. Chakadi nikujina, chamukatili nankashi Yehova hakumona Mwanindi anakumukabisha, anakumukaana nikumweseka. Nvwali wejima wafwishahu dehi mwana, weluka chichatiyakanaña neyi mwana nafwi. Twakuhwelela chikupu netu kwakekala kusañuka, ilaña chumichi hichamanishaña chikela chekalaña kumuchima wetu neyi tufwisha ntaña yetuku. Ichi chakutalilahu chinatukwashi kwiluka chatiyiliyi Yehova hamweniyi Mwanindi akeñayi nakukabakana nikufwa hadina ifuku mu 33 C.E. (Mat. 3:17) Kufuma lelu nakushika hefuku daChanukishu, kwila mutachika kudizilahu nsañu yayivulu hefutu danyiloña hakudiza kwankawenu hela haKudifukula kwaChisaka nehi? Nawa hefuku daChanukishu, bayi mwakavulamena kutala progiramu yadimena yaKudifukula kwaNtetemenaku. Neyi tudiloñeshela chadimu henohu Chanukishu kanda, chikutupelela kukwasha akwetu kulonda niwena akahetelimu kuChanukishu.—Ezera 7:10. w24.01 11 ¶10-12

Chuma chimu chitwatela kwila hakwila tutambwili ñovu yafumaña kudi Yehova, hikulomba kudi yena. Yehova wukwakula kulomba kwetu kuhitila mukutwinka “ñovu yabadika hañovu jawantu.” (2 Kor. 4:7) Tunateli cheñi kwikala nañovu neyi tutañaña Izu dindi nikutoñojokahu chikupu. (Mas. 86:11) Nsañu yatulejañayi Yehova yekala muBayibolu “[yikweti] ñovu chikupu.” (Heb. 4:12) Neyi mulombaña kudi Yehova nikutaña Izu dindi, mukutambwila ñovu yikuyikwasha kuumika, kutwalekahu kwikala namuzañalu, hela kuzata mudimu wakala wunayinkiwu. Talenu Yehova chamukolesheliyi kaprofwetu Yona. Yona watiyili woma kuya nakuzata mudimu wakala wamwinkeliwu kudi Yehova, dichi watemukili. Chafuminimu, yena niantu adiñayi nawu muwatu hashalili hohu hanti chiña afwili nanvula yeneni yampepela. Chamunatililiwu hakaluñalwiji, wadiwanini mwiluña mwabulayi kushakamahu dehi, mwivumu danshi weneni. Chumanyi cheliliyi Yona hakwila ekali cheñi nañovu hampinji yadiñayi nkawindi mwivumu danshi? Walombeli.—Yona 2:​1, 2, 7. w23.10 13 ¶4-6

Hela chakwila kapostolu Petulu wayisonekeleli iyi nyikanda akaKristu adiñaku hayina mpinji, Yehova wabombeleli iyi nyikanda Mwizu Dindi. Dichi iyi nyikanda yinateli kutukwasha ninetu. (Rom. 15:4) Twashakamaña nawantu abula kukuhwelela wuprofwetu wamuBayibolu. Akakudimbulula anateli kutusupisha muloña wakwila tunatwalekihu kutalila kukuma hadi yaaka yayivulu. Akakudimbulula amakwawu ahoshaña nawu kwakenza wanyi. (2 Pet. 3:​3, 4) Neyi tutiya mazu amuchidawa kudi mwini itala, mukwetu mutwazatilaña hela muntu wamuchisaka chetu, chikuhwelelu chetu chinateli kuzeya. Petulu walumbulwili chuma chinateli kutukwasha. Antu amakwawu anateli kumona nawu Yehova nakulaba kujilumuna akanu kaayi katama. Mazu aPetulu anateli kutukwasha kumona yuma munjila yayiwahi, muloña atwanukishaña nawu Yehova chamonañayi mpinji chambuka chikupu nachayimonañawu antu. (2 Pet. 3:​8, 9) Yehova wamonaña yaaka 1,000 neyi hiifuku dimu. Yehova wadiwunjika nawa hakeñaña muntu hela wumu akajilumukiku. Hela chochu, chakenza ifuku dindi, akanu kaayi kakakuma. w23.09 26-27 ¶2-5

Muloñadi kapostolu Pawulu chayisonekeleliyi mukanda akaKristu aHeberu adiña muYudeya? Hadaha, muloña waniyi yuma yiyedi. Chatachi, kulonda ayikoleshi. Amavulu hakachi kawu akulilili mukudifukula kwawaYudeya. Akulumpi jawu jakudifukula mwadiñawu hakusambila atela ayiseheleña chelili ekali akaKristu. Muloñadi? Muloña akaKristu hiyadiña natembeli yayiwahi yakudifukwilamuku, adiñahu wanyi nakameña kakulambwilahu nyilambu kudi Nzambi nawa hiyadiñahu nawatupristu akuyikalakelaku. Chumichi chadi kuletesha atumbanji twaKristu kuzeya, kushilahu nichikuhwelelu chawu. (Heb. 3:​12, 14) Amakwawu hakachi kawu atela atoñojokeleña jakufunta mukudifukula kwawaYudeya. Chamuchiyedi, Pawulu wayilejeli ana akaKristu aYudeya nindi hiyazatileña nañovu kutiyishisha ntañishilu yakuspiritu yayiha hela yakunamaku, dikwila nawu ‘yakuda yakola’ yekala Mwizu daNzambi. (Heb. 5:​11-14) Chakadi nikujina, amakwawu hakachi kawu achidiña kulondela Nshimbi jaMosi. w23.10 24-25 ¶3-4

Ambanda amakwawu atondañahu kushakama wujiki. (Mat. 19:​10-12) Ilukenu nenu Yehova niYesu hiyadiwulaña akaKristu ajikiku. Mwahita kaayi, ahela ajiki akwashaña chikupu chipompelu. Muloña wakukeña kwakufuma hamuchima kwamwekeshelañawu akwawu, kwaleteshaña awa ambanda akaKristu kwikala ahela niamama jawantu akuspiritu. (Maku 10:​29, 30) Amakwawu anakuzata mudimu wampinji yejima. Ambanda akaKristu diwu azataña nankashi mumudimu wakushimwina mukaayi kejima. (Mas. 68:11) Komana kwila mutoñojokahu kuzata mudimu wampinji yejima nehi? Munateli kwikala payiniya, kudihana kuzataku mudimu wakutuña hela kuzatila haBeteli. Lombelenuhu hachikonkwanyi chenu. Hanjekenu nawamanakwetu hela ahela ashikija dehi ochu chikonkwanyi, nawa yihulenu kulonda ayileji yuma yimwatela kwila hakwila ninenu muchishikiji. Kufumahu wanenu njila yikuyikwasha kushikija ochu chikonkwanyi. Neyi muchishikija, mukwikala nakukooleka kwakuvulu kwakuwahi kwakuzataku mumudimu waYehova. w23.12 22 ¶16-17

Chineli lukadi lwasweja lunakuswina kwakwihi, chalema nankashi kudi etu kwanukaña netu twatela kwovwahila lushimbi lwahosha hamudimu wakushimwina. Hela chochu, hadaha chinateli kutukalila kusha muchima hamudimu wakushimwina neyi tunakumona kukala kwamali indi kwiji anakukañesha mudimu wetu wakushimwina. Chumanyi chinateli kutukwasha kutwamijaku mudimu waWanta? Neyi tutwalekañahu kukuhwelela chikupu netu “Yehova wamazaza” wudi kukabadi ketu. Wukutukwasha neyi tutwalekahu kutwamijaku mudimu waWanta chatela tutwamijiku yuma yitunakukeña. Dichi kwosi chuma chitwatela kutiya womaku. (Hag. 2:4) Yehova wakeñaña nindi tusheña muchima hamudimu wakuhandisha mawumi awantu wakwilisha atumbanji. Hagayi wayikonkomweneni antu jaYehova kutachika chachiha kuzata mudimu wajila, neyi kwiji adiña nakwaala cheñi chikuku chatembeli. Yehova wayikanini ‘kuyitemeshela nkisu’ neyi ela chumichi. (Hag. 2:​18, 19) Ninetu twatela kukuhwelela netu Yehova wukutukiswila neyi tuzata nañovu kutwamijaku mudimu watwinkayi kuzata. w23.11 16 ¶8; 17 ¶11

Mumukanda wayisonekeleliyi aRoma, kapostolu Pawulu washimwini nindi antu ejima hiyakanshidi. Hanu dinu, muntu anateli kumumona ñahi nawu waloña hela wakadi muloña kulonda amutiyeña kuwaha kudi Nzambi? Hakwila akwashi akaKristu ejima ashinshika kwiluka ñakwilu yanilu lwihu, Pawulu wahosheli hayuma yeliliyi Abarahama. Yehova wamuteneni Abarahama nindi waloña hampinji yashakamineñayi mwituña daKenani. Muloñadi Yehova chamuteneneniyi Abarahama nindi waloña? Komana chuma chaletesheli himuloña wakwila Abarahama wovwahilileña chikupu Nshimbi jaMosi? Dichuma chaletesheli wanyi. (Rom. 4:13) Muza waIsarela awinkeli iji Nshimbi chelili munahiti dehi yaaka kubadika 400 kufuma hamuteneniwu Abarahama kudi Nzambi nawu waloña. Hanu dinu, chumanyi chacheni chaletesheli Nzambi amuteni Abarahama nindi waloña? Yehova wamutiyilili Abarahama luwi lwasweja nawa wamuteneni nindi waloña muloña wachikuhwelelu chindi.—Rom. 4:​2-4. w23.12 3 ¶4-5

Hawowuna wufuku wahosheliyi kaprofwetu Natani mazu adi hewulu kudi Mwanta Davidi, Yehova wamulejeli Natani nindi Davidi hidiyi wukutuña tembeliku. (1 Kushi. 17:​3, 4, 11, 12) Davidi welili ñahi chamulejeliwu awa mazu? Washili muchima hakupompesha mali niyuma yakakeñayi mwanindi Solomoni hakuzata iwu mudimu. (1 Kushi. 29:​1-5) Hanyima yakumuleja Davidi nindi diyi wukutuña wanyi tembeli, Yehova wakwatili chitiyañenu nayena. Yehova wamukanini Davidi nindi mwanindi wumu wakayuula haya nyaaka. (2 Sam. 7:16) Fwikijenu owu muzañalu wakatiyayi Davidi hakwiluka nindi nakushakama muChiyuulu chaYaaka Ikombakaji chaYesu, Mwanta wamuchisaka chindi! Iyi nsañu yinakutukwasha kwiluka nawu hela chakwila hitukutwesha kuzata nyidimu yejima yitwafwilileña kumuzatila Yehovaku, Nzambi yetu nateli kutwinka yuma yikwawu yayiwahi yitwabulili kukuhwelela. w23.04 16 ¶8-10

Mukuwana nenu nsañu yimu yamuBayibolu yinateli kuyikundeja neyi munatiyi woma. Chakutalilahu, nsañu yekala mumukanda waYoba, waMasamu niwaYishimu kushilahu nimazu aYesu ekala muMatewu kapetulu 6 anateli kuyikolesha. Chimukulombaña kudi Yehova nikutaña Izu dindi, mukukundejewaña. Twatela kukuhwelela chikupu netu Yehova wukutukwashaña hampinji yitukumonaña kukala muchihandilu chetu. Hakatushiya chisayikilaku. (Mas. 23:4) Yehova watukana nindi wukutuhembaña, wukutukwashaña kwikala akiñewa, wukutukwashaña nawa wukutukundejaña. Isaya 26:3 yahosha kutalisha hadi Yehova nawu: “Eyi wakahemba antu akushindamenaña chikupu; wakayinka kuwunda kwabulaña kumana, muloña akuhwelela mudi eyi.” Dichi mukuhwelelenuña Yehova, nawa itejenuña njila jejima jazatishañayi hakuyikwasha. Neyi mwila mwenimu, mwakekalaña nañovu yakuumika nihampinji yimunakumona kukala. w24.01 25 ¶16-17

Awa mazu onenewa adi munsona yidi hewulu anakushikijewa makonu. Mazu akukundeja analondelihu niwena anakushikijewa muyinu mpinji yitunakushakamamu, akwila nawu: “Anyaneyi ejima akayidizisha kudi Yehova, nawa kuwunda kwawanyaneyi kwakasweja nankashi. Akakukolesha chikupu mukuloña. . . . Kwosi chuma chiwakatiya woma hela chikakufwisha mutentuku, muloña hichakenza kwakwihi naneyiku.” (Isa. 54:​13, 14) “[Ninzambi] wanshakaminu yamakonu” hakweti ñovu yakukañesha mudimu wunakuzatawu antu jaYehova wakudizisha antu hadi Yehovaku. (2 Kor. 4:4) Kudifukula kwalala anakufuntishi dehi, nawa hikwakatamishewahu cheñi nantañishilu yakutwambaku. Kwakatwalekahu haya nyaaka nanyaaka. Kwosi chitwa chanjita chakachilawu nawu atukatishi nachu chakazatikaku! w24.02 4 ¶10

Etu akaKristu, kudihana kwetu kudi Yehova twakulemesha nankashi. Dichuma chitwatoñojokañahu hampinji yitunakufuukula nikwila yuma yinakundami chisaka chetu. Twazataña nañovu kwakamena chisaka chetu kwesekeja nanyidimu yashimunawu muNsona, ilaña hitwatwamijañaku yuma yakeñaña antu amuchisaka chetu kubadika yakeñañayi Yehovaku. (Mat. 10:​35, 36; 1 Tim. 5:8) Mpinji jikwawu, tunateli kufuukula kwila yuma yinateli kubula kuzañalesha antaña jetu ilaña yikumutiyisha Yehova kuwaha. Yena diyi washiliku ntanjikilu yachisaka, nawa wakeñaña nindi twikaleña namuzañalu muchisaka. (Efwe. 3:​14, 15) Neyi tunakukeña muchisaka chetu mwikaleña muzañalu chikupu, twatela kwilaña yuma kwesekeja nachakeñañayi Yehova. Kuhwelelenu chikupu nenu Yehova walemesha chimwadihanaña chakufuma hamuchima kumukalakela hampinji yimunakwakamena chisaka chenu nikuyimwekeshela kukeña nikalemesha.—Rom. 12:10. w24.02 18 ¶11, 13