Toñojokenu haWushona Wukweti Kapristu Wetu Muneni—Yesu

1-2. (a) Muloñadi Yehova chamutemesheleliyi Mwanindi hanu heseki? (b) Yumanyi yitukuhanjekahu muchinu chibaaba? (AHeberu 5:​7-9)

KUBADIKA yaaka 2,000 yinahitihu, Yehova Nzambi watemesheli Mwanindi alemeshayi chikupu kwinza heseki. Wamutemeshelelidi? Chuma chimu chamutemesheleliyi, wenjili nakukuula antu kwishiñu danshidi nikufwa kushilahu nikufumishahu yuma yatama yaletawu kudi Satana. (Yow. 3:16; 1 Yow. 3:8) Yehova welukili cheñi nindi chihandilu chaYesu chahamaseki chakamukwasha kudiloñeshela chadimu kwikala Kapristu Muneni, wakatutoñojokelañaku nikututiyila wushona. Yesu watachikili kuzata iwu mudimu hanyima yakupapatishewa mu 29 C.E.a

² Muchinu chibaaba, tukuhanjeka yuma yahitilimu Yesu hamaseki chiyamukwashili kwikala washikilamu chikupu kuzata hamu neyi Kapristu Muneni wukweti wushona. Chitukwilukilañahu nsañu yayivulu hadi Yesu chamwilishiliwu “kwikala wawanina” kulonda azati mudimu windi, chikutupelela kuswina kwakwihi naYehova mukulomba, hela chakwila tunaneñi muloña wanshidi jetu indi kwiji kuzeyazeya.—Tañenu AHeberu 5:​7-9.

MWANA KANZAMBI AKEÑAYI CHENJILIYI HAMASEKI

3-4. Kuhimpikanyi kwahitilimu Yesu chenjiliyi hanu hamaseki?

³ Etu amavulu kudi yuma yahimpika muchihandilu chetu, hadaha twabuuka nakushiya itala detu dadiwahi, antaña niamabwambu. Kuhimpika kwamuchidiwu kwaswayi wanyi. Ilaña kwosi muntu niwumu wamonahu dehi kuhimpika kwakuvulu muchihandilu neyi kwamweniyi Yesu. Hadiñayi mwiwulu, diwadiña wabadika chikupu hadi anyana kaYehova akuspiritu. Amukeñeli nankashi kudi Yehova nawa mpinji yejima wazatileña namuzañalu “kuchikasa [chaNzambi] chachidiilu.” (Mas. 16:11; Yish. 8:30) Hela chochu, AFwilipi 2:7 yahosha nawu wadihanini “[nakushiya] yuma yejima yadiñayi nayu,” dikwila nawu chifulu chindi chahewulu chadiñayi nachu mwiwulu kulonda enzi nakushakama nawantu abula kuwanina hanu hamaseki.

⁴ Toñojokenu cheñi chadiña chihandilu chaYesu muyaaka yakutachikilahu hanu hamaseki. Anvwali jaYesu adiña atuzweñi. Tuneluki chumichi muloña wamulambu walambwiliwu hanyima yakuvwalika kwindi. (Lev. 12:8; Luka 2:24) Chelukiliyi nawu Yesu navwaliki, Mwanta watama Herodi wakeñeleña kumujaha. Hakwila amupulwishi abuli kumujaha kudi Herodi, ichi chisaka chayili kuEjipitu nakushakama neyi matunduka hadi kapinji. (Mat. 2:​13, 15) Yuma yahimpikili chikupu muchihandilu chaYesu kubadika chiyadiña henohu kanda enzi hamaseki!

5. Yumanyi yamweniyi Yesu hanu hamaseki, nawa yuma yahitilimu yamukwashili ñahi kudiloñeshela chadimu chakuzata mudimu windi wakwikala Kapristu Muneni? (Talenu cheñi mwevulu.)

⁵ Hampinji yadiñayi hamaseki, Yesu wamweni antu chakabakeneñawu. Chakadi nikujina wafwishili antu akeñayi, kushilahu nitata yindi wamuhembeli, Yosefu. Hampinji yazatileñayi mudimu windi wakushimwina, Yesu wawanineña antu akata mbumba, amputamesu, akata kalepa nianvwali afwishili anyana, nawa wayitiyilileña wushona. (Mat. 9:​2, 6; 15:30; 20:34; Maku 1:​40, 41; Luka 7:13) Mwamweni, Yesu wamweneña antu chakabakeneñawu hamaseki hadiñayi mwiwulu. Ilaña chenjiliyi hamaseki, welukili chikupu chatiyañawu antu neyi anakukabakana. (Isa. 53:4) Yuma yahitilimu Yesu chenjiliyi hanu hamaseki yamukwashili kwiluka chatiyañawu antu, yuma yayihilishaña nichakabakanañawu muloña wakukala kwamonañawu. Neyi chatiyañawu antu ejima niyena wazeyeleña, kwakama nikuneña.

YESU WATOÑOJOKELAÑAKU ANTU

6. Yumanyi yitunakudizila kuyakutalilahu yazatishiliyi kaprofwetu Isaya kutalisha hawushona wamwekeshelañayi Yesu antu? (Isaya 42:3)

⁶ Mumudimu windi wejima, Yesu watiyilileña wushona chikupu antu azeya nawa amweneñawu nawu alema wanyi. Chelileñayi mwenimu, washikijileña wuprofwetu. MuNsona jachiHeberu, antu aheta nawa akola ayesekejaña netempa dinakutukumwinawu chiwahi hela nanyitondu yamaneni nawa yakola. (Mas. 92:12; Isa. 61:3; Yere. 31:12) Ilaña atuzweñi niantu anakwilawu yuma yatama ayesekejaña neteti dabaloka ninawanda wenoñu wunakufwinda wishi, yuma yamonañawu antu ejima nawu yidana mudimu. (Tañenu Isaya 42:3; Mat. 12:20) Chamwoneneniwu, kaprofwetu Isaya wazatishili iyi yakutalilahu kulonda ashimwini chadimu wushona nikukeña kwakamwekeshelayi Yesu antu amonañawu kudi antu nawu alema wanyi.

7-8. Yesu washikijili ñahi wuprofwetu waIsaya?

⁷ Nsoneki waNsañu Yayiwahi, Matewu, wamwekesheli nindi Yesu washikijili wuprofwetu waIsaya chasonekeliyi nindi: “Hamba kakotola iteti dachikekaku, nawa hamba kajima wanda wunakufwinda wishiku.” Yihayamisha yikwawu yakoñeliyi Yesu yakwashili antu elileñawu yuma yatama nawa amweneña neyi yuma yakayiwahilahu wanyi muchihandilu chawu. Hakachi kanawa antu, hadiña niiyala wadiña nambumba mujimba wejima. Watela wakuhweleleli nindi kwosi akamuuka hela hakadikundahu cheñi nachisaka chindi niamabwambuku. (Luka 5:​12, 13) Kwadiña cheñi iyala mukwawu wadiña njika matu nawa wakabakeneña hakuhosha. Toñojokenu iwu iyala chatiyileñayi neyi amona antu anakuhanjeka ilaña kwiluka jinakuhoshawu nehi. (Maku 7:​32, 33) Ilaña iku bayi neyi dikukala hohu kwamweneñawu antuku.

⁸ Mumafuku aYesu, aYudeya amavulu akuhweleleli nawu antu akabakeneña nayikatu hela nawufwayi, ayikabishileña muloña wanshidi jakoñeleñawu hela muloña wanshidi jawanvwali jawu. (Yow. 9:2) Muloña waniyi ntañishilu yakutwamba yakuhweleleliwu, antu akabakeneña nayikatu niwufwayi adimweneña nawu amukunkulwayi. Hakwila ashikiji iwu wuprofwetu waIsaya, Yesu wokili antu akabakeneña nawa wayikwashili kwiluka nawu Nzambi wayakamenaña. Yumiyi yinakutukwasha kukuhwelela chumanyi?

9. AHeberu 4:​15, 16 yamwekeshaña ñahi nawu Kapristu wetu Muneni wekala mwiwulu watiyilaña chikupu wushona antu abula kuwanina?

⁹ Tañenu AHeberu 4:​15, 16. Twatela kukuhwelela chikupu netu Yesu wukututiyilaña wushona mpinji yejima. Awa mazu atalisha mudihi? Muntu wukweti wushona chamukataña kumuchima neyi amona mukwawu muntu nakukabakana kumujimba nimuyitoñojoka. Izu dachiGiriki kwabalumunawu mazu akwila nawu “kutiyila wushona,” datalisha kukutiya nikumona kukala kunakuhitamu mukwenu neyi iyenu munakukuhitamu. (Talenu cheñi AHeberu 10:​34, hazatishiliyi Pawulu izu dachiGiriki dodimu.) Nsañu yahosha hayihayamisha yaYesu, yamwekeshaña chichamukatileña chikupu Yesu kumuchima hakumona antu amakwawu anakukabakana. Hokileña antu muloña hohu dichuma chateleleli kwilayiku. Wayakameneneña chikupu nawa wakeñeleña kuyikwasha. Chakutalilahu, hampinji yokileñayi mukambumba, neyi wakeñeli wadi kukoña ichi chihayamisha iku nemani hahalehi, ilaña wayili nakumukwata iwu iyala hamujimba. Hadaha aka dikadiña katachi iwu mukambumba kumukwata hamujimba kudi muntu hanyima yayaaka yayivulu! Yesu wamutoñojokeleliku iyala njika matu kuhitila mukumufumisha hezaza dawantu aleteleña mapumba nawa wayili nakumuukila kwakankawindi. KaFwarisi chatachikiliyi kudiwula mumbanda wabalumukili mumuchima wawelesheli nyendu yaYesu namadilu nikuyikombwela nansuki jindi, Yesu wamuhakwililiku iwu mumbanda chikupu. (Mat. 8:3; Maku 7:33; Luka 7:44) Yesu watondolweleleña wanyi antu akabakeneña nayikatu yashiyashana hela akoñeleña nshidi yahamesu bwi-i. Ilaña, wayilejeleña awa antu kwinza kudi yena nawa wayitiyilileña wushona. Twatela kukuhwelela chikupu netu watutiyilaña wushona ninetu.

CHITWAMWIMBUJOLAÑA KAPRISTU WETU MUNENI MAKONU

10. Yumanyi yitunateli kuzatisha makonu hakwila tukwashi anjika matu niamputamesu? (Talenu cheñi nyevulu.)

¹⁰ Chineli tudi akakumulondela Yesu ashinshika, twazataña nañovu kumwimbujola kuhitila mukumwekeshela kukeña antu amakwawu, kuyitoñojokelaku nikuyitiyila wushona. (1 Pet. 2:21; 3:8) Hela chakwila hitunateli kuuka anjika matu hela amputamesuku, tunateli kuyikwasha awa antu kuspiritu. Chakutalilahu, nyikanda yashindamena haBayibolu yamwidimi dawatumama ichi yidi mumadimi kubadika ha 100. Hakwila akwashi antu abulaña kumona chiwahi hela amputamesu, kudi nyikanda yawamputamesu mumadimi kubadika ha 60 nimazu akukwata dehi edishawu mumadimi kubadika ha 100 anakulumbulula yuma yinakumwekana mumavidiyo etu. Iyi ntanjikilu yakwashaña anjika matu niamputamesu kuswina kwakwihi naYehova niMwanindi.

11. Kuloñesha kwaYehova kwamwimbujolaña ñahi Yesu kumwekeshela wushona antu akweti nkulilu yashiyashana? (Yilwilu 2:​5-7, 33) (Talenu cheñi nyevulu.)

¹¹ Kuloñesha kwaYehova kwazataña nañovu hakwila kukwashi antu akweti nkulilu yashiyashana. Anukenu nenu hanyima yakumusañula, Yesu wahuñunwini spiritu yajila kulonda antu ejima apompeli kuchawija chaPentekosita atiyi nsañu yayiwahi “iwu mwidimi dindi, iwu mwidimi dindi.” (Tañenu Yilwilu 2:​5-7, 33.) Kuhitila mukulondela wunlomboli windi, kuloñesha makonu kwedishaña nyikanda yashindamena haBayibolu mumadimi kubadika ha 1, 000, nawa madimi amakwawu hanawa madimi ayihoshaña kudi antu antesha nankashi. Chakutalilahu, madimi amakwawu awenimbu amuAmerica ayihoshaña hohu kudi antu antesha ashakamaña muNorth nimuSouth America. Hela chochu, nyikanda yetu anayidishi mumadimi kubadika ha 160 munawa madimi kulonda antu amavulu nankashi ekali nakukooleka kwakutiya nsañu yayiwahi. Nyikanda yetu yidi cheñi mumadimi kubadika ha 20 ahoshañawu aRomani. Antu amavulu nankashi azatishaña awa madimi, anakwiteja chalala.

12. Wukwashwinyi wukwawu wutunakutambwila mukuloñesha kwaYehova?

¹² Kubombela haniyi ntanjikilu yinakukwasha nsañu yayiwahi kutaanda, kuloñesha kwaYehova kunakukwasha cheñi antu anakukabakana muloña wawubanji wadimwekenaña. Muloña wachumichi, amanakwetu niahela amavulu anakudihana mukudikeñela kukwasha amanakwawu niahela adi muniku kukala. Kuloñesha kwaYehova kunakukwashana cheñi kuhitila mukutuña matala amawahi akudifukwilamu kulonda antu apompeña hamu nakudizilahu yuma yayivulu hanochu chayikeñayi Nzambi.

KAPRISTU WETU MUNENI NATELI KUYIKWASHA

13. Njilanyi jikwawu mwatukwashilañayi Yesu?

¹³ Chineli hikabiña ketu wamuwahi, Yesu watwakamenaña hamuntu-hamuntu kuspiritu. (Yow. 10:14; Efwe. 4:7) Mpinji jikwawu, kukala kutunakuhitamu muchihandilu kwaleteshaña tudimoneña neyi wanda wunakufwinda wishi hela iteti dachikeka. Tunateli kuneña nankashi muloña wachikatu cheneni chitukweti, kuzeyazeya kwetu hela neyi tunakutiyañana wanyi namukwetu mukakudifukula. Chinateli kutukalila kusha muchima hayuma yayiwahi yakumbidi yitunakuchiñeja muloña wakukala kutunakuhitamu chayinu mpinji. Hela chochu, anukenuña nenu Yesu wamonaña kukala kwejima kumunakuhitamu nawa weluka yitoñojoka yenu yayeni yamukachi. Wushona wukwetiyi Yesu diwaleteshaña ayikwashi. Chakutalilahu, nateli kuzatisha spiritu yajila kuyikolesha hampinji yimunazeyi. (Yow. 16:7; Tit. 3:6) Kubombelahu, Yesu nateli kuzatisha ‘amayala ekala yawaana’ niakwenu akakudifukula kulonda ayikoleshi nikuyikwasha.—Efwe. 4:8.

14. Chumanyi chitwatela kwila neyi tunaneñi?

¹⁴ Neyi iyena denu dakudikita dinakehi hela spiritu yenu yinachikeki, toñojokenuhu chikupu hamudimu wukwetiyi Yesu wakwikala Kapristu wetu Muneni. Anukenuña nenu Yehova wamutemesheli Yesu hanu hamaseki nakuhana wumi windi kwikala ifutu danyiloña nikumukwasha kulonda eluki chekala kukala kwamonañawu antu abula kuwanina. Neyi tunaneñi muloña wanshidi hela kuzeyazeya kwetu, Yesu wadiloñesha nawa wadihana kutukwasha “hampinji yatelela.”—Heb. 4:​15, 16.

15. Shimunenu chakutalilahu chinakumwekesha nawu muntu wunafumi hamukanka wanyikoku yaYehova anateli kumukwasha kufunta muchipompelu.

¹⁵ Yesu cheñi walombolaña antu jindi hampinji yinakuzatawu nañovu kukeñakeña nikukwasha antu anafumi hamukanka wanyikoku yaYehova. (Mat. 18:​12, 13) Talenu chuma chamumwekeneni Stefano.b Chimwahitili yaaka 12 kufuma hamufumishililiwu muchipompelu, wafuukwilihu kuya nakupompa. Wahosheli nindi: “Champeleleli wanyi, ilaña nakeñeleña kwikala cheñi muchisaka chaYehova mudi antu akweti kukeña. Akulumpi ambulakeni, ankwashili kwikala wakasunuka. Mpinji jikwawu, yitoñojoka yakuditiya nawu nashikilamu wanyi yasefukileña cheñi nawa nakeñeleña kuzeya. Ilaña amanakwetu añanukishileña nawu Yehova niYesu anakukeña nawu nibuli kuzeya. Chanfuntishiliwu, chipompelu chejima chantambwilili ami nichisaka chami namuzañalu. Nkumininaku, ñodami wetejeli kudiza Bayibolu nawa chayinu mpinji chisaka chetu chejima chinakumukalakela Yehova.” Wenowu muzañalu watiyañayi Kapristu wetu Muneni hakumona antu anabalumuki mumuchima anakuyikwasha kulonda afunti muchipompelu!

16. Muloñadi chimwasakililaña hakwikala naKapristu Muneni wukweti wushona?

¹⁶ Hampinji yadiñayi hamaseki, Yesu wakwashili antu amavulu nankashi hampinji yatelela. Makonu, tunateli kukuhwelela chikupu netu wukutukwashaña mukukala kwejima kutunakumona. Nawa mukaayi kakaha kanakwinza katataka, wakakwasha antu ovwahila kuhanda chihandilu chakadi makabi ejima itwamonaña muloña wanshidi nikubula kuwanina. Twamusakililaña nankashi Nzambi yetu, Yehova, hakumutonda Mwanindi wukweti wushona kwikala Kapristu wetu Muneni muloña wakukeña Kwindi kwabadika niluwi!