Kwila Yuma Yinateli Kukwasha Amanakwetu niIseki

Etu aYinsahu jaYehova, tweluka netu katataka Yehova Nzambi enzi nakwamwina iseki dinakisañaniwu kudi antu. (Chimwekeshu 11:18) Hela chochu, twazataña kwesekeja nahakumina ñovu jetu kwakamena iseki. Chakutalilahu, twatuña matala etu akudifukwilamu munjila yinateli kubula kuleta wubanji kwiseki.

Nshimbi jakukiña Isaña, hinyidimu yazatañawu munjila yinateli kubula kukisañana iseki. Nyidimwinyi yaniwu muchidi yitunazati? Nawa iyi nyidimu yinatukwashi ñahi kuzatisha chiwahi yawaana?

Kuwana Njila Yakutuutishilamu Itala Deneni daKupompelamu

Hakusambila, Itala Deneni daKupompelamu kuMatola muMozambique adituñili munjila yakwila mumbadi mwadiña mwakujika wanyi nawa hewulu hadiña malata apela. Awa malata aleteleña iyena nankashi mukachi neyi kudi nkanza. Manakwetu wamunidi iluña wahosheli nindi: “Twadiña nakusulwila chikupu! Neyi progilamu yinamani dehi, amanakwetu edikileña hanji lufuchi kulonda ahitiku mpepela.” Twelili ñahi hakwila tukwashi amanakwetu kulonda apompeleña mwiluña dadiwahi?

Twafuukwilihu kumanisha iku kukala munjila yikutukwasha kubula kukisañana iseki: twashilimu mafani azatikaña nampepela niyuma yaletesheleña mutuuteña. Iyi yuma yaleteshaña mutuuteña yakañeshaña iyena kwiñila mukachi nawa mafani aletaña mpepela yayiwahi. Awa mafani hiyazatikaña namalayitiku, ilaña azatikaña nampepela nawa mpepela yeñilañamu yakeñeshaña mpepela yitata kwiñila mukachi. Awa mafani twayilandileña kwakwihi na $50 yimu.a

Iyi njila yinawahishi nankashi mpepela Mwitala Deneni daKupompela. Chineli mpepela yahitañanaña mukachi, munidi itala mwekalaña wanyi mukekemena nikabuwa neyi chimwekalileña hakusambila. Cheñi, himwekalaña nankashi mpepela yacarbon dioxide neyi chichadiña kunyimaku ilaña munakwikalaña nankashi mpepela yitwonaña yaoxygen. Chafumañamu, antu enzaña ashaña maana kuprogilamu nawa ashakamaña chiwahi. Manakwetu ashimunawu hakusambila wahosheli nindi: “Ichi hitwedikaña lufuchi neyi maprogilamu anamaniku. Ilaña twatwalekañahu kushakama hampinji yachayili nakuhanjeka nawamabwambu. Kushakama mwiluña damuchidiwu chatiyakanaña tuhu neyi kwiji wunashakami mwishina damutondu weneni wawuwahi!”

Kuzatisha Ñovu yaMwaana

Hamatala amavulu itwadifukwilaña kudi Yehova, tunashihu masola abalumunaña ñovu yamwana kwikala kesi kawuneñu.” Chafumañamu, hitwazatishaña nankashi malayiti azatikaña namanjiku. Masola atamishaña yuma wanyi nawa atukwashaña kuhemba mali ahanañawu.

Hakasanji kamutayi kaSlovenia alandililihu masola mu 2022. Mapasenti 30 akesi kazatishañawu hanaka kasanji afumaña kumasola. Neyi mpinji yikwawu awa masola aleta kesi kakavulu kubadika kanakukeñeka hakasanji, kesi kakwawu akizatishaña kudi antu amunidi iluña. Awa masola ayilandili namali akushika ku $360,000. Hela chochu, chineli aka kasanji kanakufweta mali antesha kumalayiti, mudi yaaka yiwana hohu tukahemba mali amavulu kubadika itwazatishili mukulanda masola.

Mu 2024, hakasanji kamutayi kaSri Lanka alandililihu masola nibatili yeneni nankashi. Mali azatishiliwu kulanda iyi yuma ashikili ku $3 miliyoni, nawa kasanji kazatishaña mapasenti 70 akesi kawuneñu kafumaña kunawa masola. Mali itukuhemba hadi yaaka yisatu akubadika mali itwalandili nachu iyi yuma. Muchochenachina chaaka, hakasanji kamutayi kaNetherlands twalandililihu masola adihu. Awa masola twayilandili namali akushika ku $1.1 miliyoni nawa kasanji kazatishaña mapasenti 35 akesi kawuneñu afumañaku. Muyaaka 9 hohu mali itwakahemba akabadika mali itwalandililimu iyi yuma.

Hatusanji twanyanya (RTO) twambokamboka twamu Mexico nihena tunashihu masola. Toñojokenu hanichi chakutalilahu: kasanji kanyanya kaTarahumara (Central) RTO kekala muChihuahua. Mumpinji yachishika, mpinji jikwawu kwatuutaña nankashi na 0 degrees Celsius (32°F), nawa munvula kwatataña nakubadika ha 40 degrees Celsius (104°F)! Hela chochu, chineli wuseya wamalayiti wunasweji, amanakwetu alekeli kuzatisha yuma yakutatisha nachu nikuututisha nachu. Manakwetu Jonathan, wazatilaña haRTO, wahosheli nindi: “Twazatishaña nyemba niyakuvwala yadita nawa mumpinji yanvula twenzununaña mawindu.”

Mu 2024, haKasanji Kanyanya kaKubalumwina ashilihu masola. Awa masola ayilandili namali akushika ku $21,480, ilaña mali azatishiliwu kulanda awa masola akafunta muyaaka yitanu. Ichi amanakwetu anateli kuzatisha yuma yakutatisha nikutuutisha nachu kakavulu. Jonathan wahosheli nindi: “Twadiluñishaña kuzata mudimu wetu nawa twazataña chiwahi. Hampinji yoyimu, twatiyaña kuwaha hakwiluka netu kasanji ketu kanakuzatisha chiwahi mali amukuloñesha kwetu nawa kwesekeja nachidi yuma kutwekala.”

Kuzatisha Menji Anvula

MuAfrica, Matala aWanta amakwawu hiyakweti menjiku. Muloña chumichi, amanakwetu afumishaña menji kwakulehi nakuleta Kwitala daWanta. Hamatala aWanta amakwawu amanakwetu alandaña menji aletañawu kudi motoka, nawa ekala nawuseya nankashi nawa akisañanaña iseki.

Hakwila amanakwetu ekaleña namenji, haMatala aWanta amavulu amuAfrica twashahu nyipayipi kwatewinañawu menji anvula nimatanki amaneni. Henohu kanda tushihu iyi yuma, amanakwetu amunodu iluña asambilaña kushinshika chekalaña nchiilu kunodu iluña kulonda ashi iyi yuma munjila yinateli kuyikwasha kwikala namenji mwitala daWanta. Hakusha iyi yuma Kwitala daWanta twazatishili mali akushika ku $600 na $3,000. Hela chochu, iyi yuma yinaleteshi Matala aWanta kuzatisha mali antesha chineli amanakwetu analeki dehi kuzatisha mali amavulu kulanda menji.

Awa menji anvula atewunañawu anakwashi amanakwetu. Muhela Noemia, wakuMozambique, wahosheli nindi: “Kunyima, twendeleña maluña amalehi kuya nakutewuna menji. Twashikileña Hetala daWanta iku tunomoki. Chineli chadiña chakala kututa menji, chatukalilileña kwikala awunyonji kumujimba. Ichi, antu ejima esukaña kumakasa. Ichi twazeyaña wanyi neyi tunayi Kwitala daWanta nawa twadiluñishaña kupompa. Tunasakililiku nankashi!”

Mali azatishañawu kulanda awa masola afumaña kudihi? Afumaña kuyawaana yahanañawu kumudimu wamukaayi kejima, amavulu ayihanaña kuzatisha njila jashiyashana jawanañawu ha jw.org hasonekawu nawu donate. Tunakuyisakilila chikupu hayawaana yimwahanaña mukudikeñela!