Kwidisha Mukanda Wabadika Nyikanda Yejima

“Natalilili hadi yaaka 19!” Chumanyi chatalilileñayi iwu mukwetu mukwakwitiya? Bayibolu yaKaayi Kakaha YaNsona JawakwaKristu JachiGiriki mwidimi dindi, daBengali. Antu amavulu dichiyahoshañawu neyi anedishi Bayibolu yaNsona jaKaayi Kakaha mwidimi dawu. Hanu mwatoñojokahu dehi hayuma yelañawu hakwila nawu edishi awa maBayibolu?

Chatachi, neyi Kometi Yasonekaña Yezanvu Dalombolaña yineteji dehi izanvu dawakwakubalumuna adinkaña mudimu wakubalumuna Bayibolu. Hahitaña yaaka yiñahi hakwila nawu amanishi kubalumuna Bayibolu? A Nicholas Ahladis, azatilaña kuDipatimenti yaMudimu Wakubalumuna haWarwick, muNew York, alumbulwili nawu: “Kudi yuma yayivulu hashindamenaña yaaka yikuhitahu hakwila amanishi mudimu wakubalumuna, chidi neyi kuvula kwawaKwakubalumuna akuzatilahu, kukola kwedimi dinakubalumwinawu oyu Bayibolu, kwiji antu iyanakubalumwinawu oyi Bayibolu eluka nikutiyishisha chadiña chihandilu hampinji yayisonekeleñawu Bayibolu, indi kwiji idimi diyanakubalumwinawu damboka kwesekeja neluña kunakudihoshelawu. Kakavulu, hahitaña chaaka chimu nakushika kuyaaka yisatu hakwila nawu amanishi kubalumuna Bayibolu yachikunku YaNsona jawakwaKristu jachiGiriki nawa hahitaña cheñi yaaka yikwawu yiwana hela kubadikahu hakwila nawu amanishi kubalumuna Bayibolu yejima. Iwu mudimu washimbulaña nankashi neyi anakubalumuna mwidimi dawatumama.”

Kubombela hadi akwakubalumana kudi cheñi amakwawu adibombelamu muniwu mudimu. Izanvu dawakwakutaña munyikanda yinabalumuniwu akumaluña ninshakaminu yamboka-mboka—nawa mpinji jikwawu afumaña nimumatuña amboka-mboka, ahitulukaña munsañu yinabalumuniwu, azataña iwu mudimu chawaana hohu. Yitoñojoka yawu yahanañawu hanyima yakuhitulakamu yakwashaña akwakubalumuna kubalumuna Bayibolu yinakuhosha mwalala, yaswayi kutiya nawa yoloka. Neyi kwesekejaku nichahosheli mukwakudizisha akwakubalumuna Bayibolu wakuSouth Africa, nindi, “akwakubalumuna eluka nawu iwu himudimu weneni chikupu wakeñekaña kwikala washinshika kudi Yehova nikudi antu atañaña Izu dindi.”

Hanyima yakumanisha kubalumuna Bayibolu ayitemeshaña kwakupulintila nikubomba yipapilu. Hakuzata iwu mudimu akakupulinta, “azatishaña” iyi yuma 10: yipapilu, inki, makava, jakulamika nachu, jakusha mukachi kamakava, kadihina kasiliva, tunyonji, kadihina kakukwatisha nachu yipapilu, jakukwatisha nachu yipapilu nimakava, nijakubomba nachu yipapilu yejima yamuBayibolu. Muchaaka cha 2019, azatishili mali akushika ku 20 million dollars (mumali akuU.S.) kulanda nachu yuma yakuzatisha kumudimu wakwidisha maBayibolu. Nawa muchochenichi chaaka amanakwetu azatilaña kuKupulinta azatili maora akushika ku 300,000 kulonda edishi nikuyitwala maBayibolu.

Muloñadi chiyazatishililiwu mali amavulu nikumba mpinji yeneni kuniwu mudimu? a Joel Blue akuInternational Printing Department ashosheli nawu “Bayibolu himukanda walema nankashi kubadika nyikanda yejima yitwedishaña, dichi tunakukeña nimmwekenu yayu hohu yimuleshemeña Nzambi itwadifukulañaku ninsañu yitwashimwinaña.”

Twedishaña cheñi Bayibolu Yakaayi Kakaha mwidimi dawatumama nidawamputa mesu. Chakutalilahu, tunedishi Bayibolu yaNsona jaKaayi Kakaha yawamputa mesu mumadimi 10. Hakwila nawu Bayibolu yimu yansona jawamputa mesu yimani chasendaña maora 8, nawa yipapilu yayu yakeñekaña iluña dashika mumamita 2.3 (7.5 ft). Tunakwidisha cheñi maBayibolu awatuyili adi mutuleya muyetejañawu hohu nyikanda yidi namakava ayipapilu.

Bayibolu yaKaayi Kakaha yakwashaña chikupu antu ayizatishaña. Chakutalilahu, tuhoshenu hadi chipompelu chedimi daKiluba chekala mwiluña daTombe, mwituña daDemocratic Republic of the Congo. Neyi munakuzatisha mukwakwa kufuma mumusumba weneni muCongo nakuya kuTombe hekala makilomita 1,700 (hela netu mamayilu 1,000). Munichi chipompelu mwadiña hohu Bayibolu yimu yamuKiluba yadiña namazu akala kutiyishisha nawa diyazatishileña chipompelu chejima. Hakwila aloñeshi kupompa amanakwetu muchipompelu elileña iwu yazatishaku chamanishayi yenkaku mukwawu, chochenochu hohu. Iku kukala kwaminini muAugust 2018, muloña akwakushimwina ejima munichi chipompelu ayinkeli hamuntu-hamuntu Bayibolu yamukuma nawa yaswayi kutiya yaKaayi Kakaha yamwidimi daKiluba.

Muhela wumu wedimi daGerman chineli ichi wukweti Bayibolu yaKaayi Kakaha wahosheli nindi: “Ichi nelaña wanyi nami natela kutaña Bayibolu. Ilaña ‘natañaña Bayibolu chikupu kulonda nilukiluku jajivulu’” Kayili wumu wasonekeli nindi: “Anyinkeli Bayibolu yaKaayi Kakaha, yinakunkwasha kuhimpa yilwilu yami. Kufuma hinatachika kutaña iyi Bayibolu dihinatachika dinu kutiyishisha Izu daNzambi. Inakukeña kuyiluka chikupu aYinsahu jaYehova nichinatela kwila hakwila nikali chinsahu.”

Ejima akweti Bayibolu yaKaayi Kakaha asakililaña nankashi hayawaana yimwahanaña kulonda atweshi kwidisha iyi Bayibolu. Iyi yawana yakukwasha mudimu wamukaayi kejima ayihanaña kuzatisha njila yakuhaninamu yidi hadonate.jw.org. Tunakuyisakilila hamuchima wumukweti wakuhana yawaana.