Munafumi Nsañu Yakuzatisha muChihandilu niMudimu Wanetu AkwaKristu Mukanda waKupompa
APRIL 1-7
YUMA YALEMA YAMWIZU DANZAMBI | 1 AKORINDA 7-9
“Wujiki hiChawaana”
(1 Akorinda 7:32) Chalala, inakukeña mubuleña kwakama. Iyala wabula kusumbula wakamenaña yuma yaMwanta kulonda yawani njila yakumutiyishilamu Mwanta kuwaha.
Zatishenu Chiwahi Wujiki Wenu
Mujiki wekalaña nampinji yeneni nikwikala wakasunuka chikupu kwila yuma yinakukeñayi kubadika muntu wudi mumaluwi. (1 Kor. 7:32-35) Iyi hinjila yayiwahi nankashi yinateli kumukwasha kudikita chikupu mumudimu wakushimwina, kudiluka chiwahi nawantu amakwawu, nikukundama kwakwihi naYehova. Dichi, akwaKristu amavulu eluka kuwaha kwekala muwujiki nawa afuukulañahu ‘kwikala ajiki’ hadi mpinji yantesha. Amakwawu hiyafuukulañahu kushakama wujikiku, ilaña neyi yuma yihimpika muchihandilu chawu, alombaña nakushinshika hachihandilu chawu nawa elukaña nawu Yehova nateli kuyikwasha kuwunda mumuchima. Dichi, hiyadineñaña hamuloña wakuhimpika kwachihandilu chawuku nawa atwalekañahu kushakama wujiki.—1 Kor. 7:37, 38.
(1 Akorinda 7:33, 34) Ilaña, iyala wasumbula wakamenaña yuma yamukaayi kulonda yawani njila yakumutiyishilamu ñodindi kuwaha, 34 nawa washaña maana kuyuma yiyedi. Kubombelahu, mumbanda wabula kusumbuka, kushilahu nimujiki, washaña maana kuyuma yaMwanta kulonda yekali wajila kumujimba nikuspiritu. Ilaña, mumbanda wasumbuka wakamenaña yuma yamukaayi kulonda yawani njila yakumutiyishilamu nfumwindi kuwaha.
Yikuma Yamaneni Kufuma muNyikanda yawaKorinda
7:33, 34—Indi nhoshelu yakwila nawu “yuma yamunu mwishina” yakamenaña amayala asumbula hela ambanda asumbuka yatalisha mudihi? Pawulu wateneneña yuma yakoñañawu antu muchihandilu yakamenañawu akwaKristu ekala mumaluwi. Yuma yeniyi yabombelamu yakudya, yakuvwala, nihakukama, kufumishaku yuma yatama yamukanu kaayi, yatondolwelaña akwaKristu.—1 Yowanu 2:15-17.
(1 Akorinda 7:37, 38) Ilaña neyi muntu yafuukulahu mumuchima windi nawa hanakukabakanaku, wudi nawuswa wakudihemba hachuma chinakukeñayi nawa nadikasi mumuchima windi kubula kusumbula hela kusumbuka, neli chiwahi. 38 Dichi nawa, nimuntu wejima wukusumbula hela wukusumbuka neli chiwahi, ilaña muntu wukubula kusumbula hela kusumbuka, diyi wunabadiki kwila chachiwahi.
w96 10/15 12-13 ¶14
Wujiki hiChenzelu Chanyidimu Yayivulu
MukwaKristu mujiki wazatishaña wujiki nakufwila yuma yakumujimba haneli “chiwahi” kubadika akwakristu adi muwuluku. Hashakamaña wujiki “hamuloña waWanta[ku]”, ilaña hamuloña wayuma yakumujimba. (Matewu 19:12) Mujiki “washaña maana kuyuma yaMwanta” welaña mwenimu “kulonda yawani njila yakumutiyishilamu Mwanta kuwaha” ‘nikutwalekahu kumukalakela Mwanta namuchima wumu mpinji yejima chakadi kumuluwañesha.’ Chinayi mukwila nawu kudihana namuchima wejima nakumukalakela Yehova niYesu Kristu. Neyi ajiki ela muniyi njila, aneli “chiwahi” kubadika akwaKristu adi muwulu.
Kukeña Yuma Yalema yakuSpiritu
(1 Akorinda 7:11) Ilaña neyi yaambuka, watela kushakama chakadi kusumbuka, neyi nehi, watela kufunta kudi nfumwindi; iyala niyena hatela kushiya ñodindiku.
Apendikisi
Mpinji yikwawu, akwaKristu amakwawu afuukulañahu kwambuka hela kudiseña namukwawu wamumaluwi hela chakwila haneli wuvumbuku. (1 Akorinda 7:11) Talenu yuma yantesha yakala yaleñelaña antu kwambuka.
• Kuleka kukwasha chisaka mumushikila: Chisaka chinateli kwikala muwuzweñi chikupu, kukankila yuma yakudikwasha nachu, muloña iyala nakaani kuyinka yuma, henohu nateli kuyinka.—1 Timotewu 5:8.
• Kwetana: Muntu wamumaluwi wekala nalukambu wakojejaña chihandilu chamukwawu wamumaluwi niwumi windi kwikala muwubanji.—Añalija 5:19-21.
• Kusweja kukañesha wuswa wamuntu wakudifukula: Mpinji yejima, wamumaluwi nateli kukañesha mukwawu kubula kwila yuma yakundama kukudifukula kwalala hela kumukanjikija kufumpa nshimbi jaNzambi munjila jikwawu.—Yilwilu 5:29.
(1 Akorinda 7:36) Ilaña, neyi muntu namoni nindi nakañanyi kushakama wujiki nawa neyi nahiti dehi muyaaka yawansi, ichi dichi chatela kwilayi: Yeli munakukeñayi; hanavulumuniku. Yasumbuli hela yasumbuki.
w00 7/15 31 ¶2
Munateli Kwikala Atooka Mukanu Kaayi Katama
Atwansi hiyatela kulusukila kusumbula hela kusumbuka mpinji yikutiyawu hohu katachi mpwila yawuvumbiku. Wulu wakeñekaña kushikija yuma yimwadikanini, nawa kwila mwenimu chakeñekaña kukula muyitoñojoka nikumujimba. (Kutachika 2:24) Chachiwahi muntu kusumbula hela kusumbuka “neyi nahiti dehi muyaaka yawansi” dikwila nawu mpinji yaswejañayi muntu kutiya wuvumbi nawa yinateliyi kufuukula mwaluwa. (1 Akorinda 7:36) Hiwusupi nawa hinshidi neyi muntu wunashikilimu kwiñila muwulu yadiñija muyilwilu yawuvumbi muloña wakwila kanda yamoni muntu wakwiñila nindi muwulu!
Kutaña Bayibolu
(1 Akorinda 8:1-13) Dichi, kutalisha hayakuda yinalambuliwu antu kudi ankishi: Wejima wetu tuneluki chikupu chumichi. Kwiluka kwaleñelaña kudinka wanta, ilaña kukeña kwatuñaña. 2 Neyi muntu yatoñojoka nindi weluka chuma, dikwila nawu kanda yeluki yuma yejima kutalisha hanochu chuma. 3 Ilaña neyi muntu wamukeña Nzambi, dikwila nawu iwu muntu amwiluka kudi yena. 4 Dichi, kutalisha hakuda yakuda yinalambuliwu antu kudi ankishi, tweluka netu nkishi wamukunkulwayi mukaayi, nawa kwekala Nzambi wumu hohu. 5 Muloña hela chakwila kudi amakwawu atenañawu nawu anzambi, chili mwiwulu hela hamaseki, neyi chochikwekala “anzambi” amavulu “nianyanta” amavulu, 6 ilaña, kudi etu kudi Nzambi wumu hohu, yowu Tata, kwafumaña yuma yejima, etu twekalilaku muloña wayena; nawa kudi hohu Mwanta wumu, Yesu Kristu, mudi yena dimwaleñeleliwu yuma yejima, ninetu twekalaku kuhitila mudi yena. 7 Hela chochu, bayi neyi antu ejima eluka chumichiku. Ilaña antu amu, chineli kunyima apesheleña ankishi, neyi ada yakuda nawa ayimona nawu hiyuma yakulambula kudi ankishi, chinleji chawu chamuchima chazeya, chatamaña. 8 Hela chochu, yakuda yikutukundamisha wanyi kwakwihi naNzambi; neyi tubula kuda, hitunatamishiku, hela neyi tuda, hitunawahishiku. 9 Ilaña, babalenu kulonda wuswa wenu wakutonda wubuli kwikala chuma chakuhukesha kudi antu azeya. 10 Neyi muntu yakumona eyi wuneluki chumichi wunakuda yakuda mutembeli yankishi, komana chinleji chamuchima chanowu muntu wazeya, hichikamuleñela kutachika kuda yakuda yinalambuliwu kudi ankishiku, tahindi? 11 Dichi, muloña wayuma yiweluka wunakukisañana muntu wazeya, manakweyi afwililiwu kudi Kristu. 12 Neyi muvulumuna anakwenu muniyi njila nikukisañana chinleji chamuchima chawu chazeya, dikwila nawu munakumuvulumuna Kristu. 13 Dichi, neyi yakuda yikuleñela manakwami kuhukana, hinamba kadahu cheñi mbijiku, kulonda nibuli kumuhukesha manakwami.
APRIL 8-14
YUMA YALEMA YAMWIZU DANZAMBI | 1 AKORINDA 10-13
“Yehova Washinshika”
(1 Akorinda 10:13) Kwosi kweseka kwayimwekenahu dehi enu, kwabadika kweseka kwayimwekenaña antu ejimaku. Ilaña Nzambi washinshika, hakayileka enu kuhita mukweseka kwabadika kweseka kumunateli kuumikaku, ilaña kweseka kwejima kumukahitamu, wakayiloñeshela njila yakuumikilamu oku kweseka.
Malwihu kufuma kudi antañi
Kapostolu Pawulu wasonekeli nindi Yehova ‘hakwiteja kuyeseka chabadika muñovu jenuku.’ (1 Kor. 10:13) Komana chinayi mukwila nawu Yehova welukaña kukala kutunateli kuumika nakutonda kukala kutwatela kumona?
▪ Shinshikenu yuma yinateli kufumamu. Manakwetu wumu wadiña namwana weyala wadijahili wehwili nindi: ‘Komana Yehova welukili chadimu nindi ami niñodami tukuumika neyi mwanetu yadijaha? Komana chamwekeni muloña Nzambi welukili nindi tukuumika?’ Komana twatela kukuhwelela netu Yehova wakojejaña yuma yamuchidiwu kutumwekena muniyi njila?
Kushinshika mazu aPawulu ekala hamukanda wa 1 Akorinda 10:13 kukukojeja tukunkululi netu: Kwosi Nsona yamwekeshaña nawu Yehova welukaña chadimu kukala kutunateli kuumika nawa watondaña kukala kutunateli kutwesha kuumika. Tushinshikenu yuma yiwana yikuletesha tuhoshi muniyi njila.
Chatachi, Yehova wayinka antu chawaana chawuswa wakudifuukwila. Wakeñaña tudifuukwileña yuma yakwila muchihandilu. (Kuhit. 30:19, 20; Yosh. 24:15) Neyi tutonda njila yayiwahi, tukwiteja Yehova kutwilombolaña. (Yish. 16:9) Ilaña neyi tutonda njila yatama, tukumona yuma yatama yafumañamu. (Ñal. 6:7) Neyi Yehova diyi wakojejaña kukala, komana wadi kutwinka chawaana chawuswa wakudifuukwila?
Chamuchiyedi, Yehova watukiñaña wanyi “kumpinji nakululakana yatululakenaña tuhu.” (Mukwa. 9:11) Hadaha kunateli kumwekana maposu amaneni chakwila muntu nateli nikufwa muloña tudi mwiluña datama nawa hampinji yatama. Yesu wahosheli hadi antu 18 afwili helili kaposhi kayihumukili nawa wamwekesheli nindi Nzambi diyi wakojejeli wanyi. (Luka 13:1-5) Komana mudi maana kutoñojoka nawu Nzambi welukaña chadimu antu akuhanda niakufwa neyi kunamwekani maposu?
Chamuchisatu, wejima wetu twatela kumwekesha kashinshi ketu. Anukenu nenu Satana wajinokeli kashinshi kawantu ejima amukalakelaña Yehova, wahosheli nindi antu akutwesha wanyi kwikala ashinshika kudi Yehova neyi amona kukala. (Yoba 1:9-11; 2:4; Chim. 12:10) Neyi Yehova wakañesheleña kukala kutumwekena muloña neluki nindi tukutwesha wanyi kuumika, komana chadi kumwekesha wanyi nawu Satana wahosheli mwalala hakuhosha nindi twamukalakelaña Nzambi muloña wayuma yatwinkayi?
Chamuchiwana, Yehova welukilaña chadimu wanyi yuma yikutumwekena. Yitoñojoka yakwila nawu Nzambi welukaña chadimu kukala kutukumona, yikumwekesha neyi kwiji weluka dehi chihandilu chetu chakumbidi. Ilaña yitoñojoka yamuchidiwu yamuNsona wanyi. Chakadi nikujina Nzambi nateli kwiluka yuma yakumbidi. (Isa. 46:10) Ilaña Bayibolu yamwekeshaña nawu watondaña yuma yakwiluka yakamwekana kumbidi. (Kutach. 18:20, 21; 22:12) Dichi wazatishaña chiwahi ñovu yindi yakwilukila chadimu yuma muloña walemesha wuswa wetu wakufuukula. Komana dichuma chitwatela kukuhwelela kudi Nzambi walemesha wuswa wetu wakufuukula nawa wamwekeshaña yilwilu yindi yaloña munjila yayiwahiku?—Kuhit. 32:4; 2 Kor. 3:17.
Hanu dinu, tunateli kutiyishisha ñahi mazu aPawulu akwila nawu: ‘Nzambi . . . hakwiteja kuyeseka chabadika muñovu jenuku’? Pawulu wadiña nakulumbulula yuma yelañayi Yehova hampinji yinamwekani kweseka bayi neyi henohu kweseka kanda kumwekaniku. Mazu akapostolu atukoleshaña nawu hela tukumona kweseka kwamuchidinyi muchihandilu chetu, Yehova wukutukwasha neyi tukumukuhwelela. (Mas. 55:22) Mazu aPawulu akukundeja ashindamena hawunsahu walala wuyedi.
Watachi, twamonaña kweseka “kwayimwekenaña antu ejima.” Kweseka kutwamonaña akumonaña kudi antu ejima. Kweseka kwamuchidiwu kunateli kubadika wanyi muñovu jetu, neyi tushindamena hadi Nzambi. (1 Pet. 5:8, 9) Hamukanda wa 1 Akorinda 10:13, Pawulu wateneneña kweseka kwamweniwu aIsarela muchinkalampata. (1 Kor. 10:6-11) Kwosi kweseka kwaswejeli kwadi kukañanyawu kuumikaku hela kwabadikili muñovu jawaIsarela ashinshika. Pawulu wahosheli kapampa kawana nindi “amakwawu” adikañili. Chawushona, aIsarela amakwawu atachikili kutoñojoka mwaluwa muloña akañenyi kushindamena hadi Nzambi.
Wamuchiyedi, “Nzambi washinshika.” Nzambi chazatañayi nawantu chamwekeshaña nawu wamwekeshelaña kukeña kwalala “antu amukeña ahembaña kuleja kwindi.” (Kuhit. 7:9) Iyi nsañu yamwekeshaña nawu Nzambi washikijaña mwakanañayi. (Yosh. 23:14) Neyi tushinshika chamwekesheliyi kashinshi kindi kunyima, antu amukeña nawa amwovwahila anateli kukuhwelela chikupu muniyi yikaninu yindi yiyedi neyi ayeseka: (1) Wukwiteja wanyi kweseka kweneni kutunateli kukañanya kuumika, nawa (2) “wukubuzilaku njila yakupulukila.”
Yehova wabuzilañaku ñahi njila kudi antu amukuhwelelaña neyi adi mukweseka? Hela chochu, neyi nakeñi, nateli kukwifumishahu kweseka. Ilaña anukenu mazu aPawulu akwila nawu: ‘Yehova wukubuzilaku njila yakupulukila, kulonda mutweshi kuumika.’ Dichi, kakavulu ‘wabuzilañaku njila’ kuhitila mukutwinka yuma yinateli kutukwasha kuumika chiwahi kweseka. Talenu njila jimu jinateli kuzatishayi Yehova kutubuzilaku njila:
▪ “Watukundejaña mukweseka kwejima kutwamonaña.” (2 Kor. 1:3, 4) Yehova nateli kutukundeja muyitoñoka, munyichima nawa neyi tunaneñi kuhitila Mwizu dindi, spiritu yajila niyakuda yakuspiritu yaloñeshaña nduñu washinshika.—Mat. 24:45; Yow. 14:16, tth., Rom. 15:4.
▪ Nateli kutukwasha naspiritu yindi yajila. (Yow. 14:26) Neyi tudi mukweseka, spiritu yinateli kutukwasha kwanuka nsañu niyishina yamuBayibolu kulonda tufuukuli njila yaloña.
▪ Nateli kuzatisha añelu kulonda atukwashi.—Heb. 1:14.
▪ Nateli kutukwasha kuhitila mudi amanakwetu niahela anateli kuzatisha mazu hela yuma yikwawu kulonda ‘atukoleshi’.—Kol. 4:11, tth.
Hanu dinu, tukukunkulula netudi mwatalisha mazu aPawulu ekala ha 1 Korinda 10:13? Yehova watondaña wanyi kweseka kutunateli kumona. Ilaña neyi kweseka kunatuwani muchihandilu, twatela kukuhwelela netu: Neyi tumukuhwelela chikupu Yehova, wukwiteja wanyi kweseka kutwibadiki ñovu; wukubuzilaku njila kulonda tuumiki. Iyi nsañu yakukolesha nankashi!
(1 Akorinda 10:13) Kwosi kweseka kwayimwekenahu dehi enu, kwabadika kweseka kwayimwekenaña antu ejimaku. Ilaña Nzambi washinshika, hakayileka enu kuhita mukweseka kwabadika kweseka kumunateli kuumikaku, ilaña kweseka kwejima kumukahitamu, wakayiloñeshela njila yakuumikilamu oku kweseka.
(1 Akorinda 10:13) Kwosi kweseka kwayimwekenahu dehi enu, kwabadika kweseka kwayimwekenaña antu ejimaku. Ilaña Nzambi washinshika, hakayileka enu kuhita mukweseka kwabadika kweseka kumunateli kuumikaku, ilaña kweseka kwejima kumukahitamu, wakayiloñeshela njila yakuumikilamu oku kweseka.
Kukeña Yuma Yalema yakuSpiritu
(1 Akorinda 10:8) Nawa bayi twila wuvumbi neyi cheliliwu amu wuvumbiku, chakwila antu 23,000 afwili mwifuku dimu.
w04 4/1 29
Malwihu kufuma kudi antañi
Muloñadi 1 Akorinda 10:8 chiyahoshela nawu aIsarela 23,000 afwili mwifuku dimu muloña elili wuvumbi, iku Kuchinda 25:9 yashimuna nawu antu 24,000 diwu afwili?
Kudi yuma yayivulu yaletesha awa mavasi ayedi kushimuna manaambala ambuka. Chikuma chapela chakwila nawu naamba yayeni yatela kwikala hakachi ka 23,000 na 24 000, chikuletesha amakwawu kuyiswija ku 23,000 hela ku 24, 000.
Toñojokenu chuma chikwawu. Kapostolu Pawulu washimwini ichi chakutalilahu chawaIsarela hiyadiñawu kuShitimi kutalisha kudi akwaKristu amuKorinda, musumba mwenzeli yilwilu yawuvumbi nankashi. Wasonekeli nindi: “Nawa bayi twila wuvumbi neyi cheliliwu amu wuvumbiku, chakwila antu 23,000 afwili mwifuku dimu.” Washimwini hohu antu ajahiliyi Yehova muloña wakwila wuvumbi, dihafumini Pawulu kusoneka nindi 23,000.—1 Akorinda 10:8.
Hela chochu, kapetulu 25 kamukanda waKuchinda, kashimuna nawu “AIsarela adibombeli naBayali Peyori. Yehova wazuwili nawaIsarela.” Dichi Yehova wamwinkeli Mosi lushimbi lwakujaha “tulambu twawantu twejima.” Mosi wayilili ansompeshi awaIsarela kwila mwamulejeliwu. Nkumininaku, chelili Fwinehasi yanyakali kujaha kaIsarela waleteli mumbanda kaMidiyani muchimba, ‘chipupu chahitili, nikuhita.’ Nsañu yamana namazu akwila nawu: “Afwili nachipupu ochu makombakaji makumi ayedi nawana.”—Kuchinda 25:1-9.
Naambala yashimunawu muKuchinda yamwekeshaña hatooka nawu mwabombela “tulambu twawantu twejima,” twajahiliwu kudi ansompeshi niantu ajahiliwu kudi Yehova yamweni. Kwatela kwadiña atulambu amavulu ajahiliwu kudi ansompeshi, dichaletesheli naambala kushika ku 24,000. Hela awa atulambu, elili wuvumbi, anakeneñaku yidika, hela ayitejeli hohu, adiña namuloña ‘wakudibomba naBayali Peyori.’
MuBayibolu yimu Izu dakwila nawu ‘kudibomba’ adilumbulula nawu dinateli kutalisha “kukudikunda namuntu.” AIsarela adiña antu adihana kudi Yehova ilaña chelili “adibombi naBayali Peyori,” akisañeni wubwambu wawu naNzambi. Chimwahitili yaaka 700, Yehova wahosheli kuhitila mudi kaprofwetu Hoseya, hadi aIsarela nindi: “Ilaña wena ayili kuBayali Peyori, adijilikilili chuma chansonyi, abalumukili kwikala ayishimashima neyi chumochu chakeñeluwu.” (Hoseya 9:10) Antu ejima elileña mwenimu ateleleli kuyibabesha. Dimuloña waweni, Mosi chayanukishililiyi anyana ka Isarela nindi: “Enu aweni munamoni namesu enu cheliliyi Yehova hansañu yaBayali Peyori; muloña amayala ejima amulondeli Bayali Peyori ayijilumwini kudi Yehova Nzambi yenu mukachi kenu.”—Kuhituluka 4:3.
(1 Akorinda 11:5, 6) ilaña mumbanda wejima walombaña hela kuprofweta henohu kumutu windi nabutiku chuma wanyi, iwu mumbanda wasawulaña mutu windi, chumichi chinesekani namumbanda wunatewuli kawewula kumutu windi. 6 Muloña neyi mumbanda nabuti wanyi chuma kumutu windi, watela kutewula nsuki yindi; ilaña neyi hichuma chansonyi mumbanda kutewula nsuki jindi hela kutewula kawewula, dichi watela kubuta chuma kumutu windi.
(1 Akorinda 11:10) Iwu diwu muloña waweni mumbanda watela kubutilayi chuma kumutu windi kulonda chiikali chinjikijilu chakwovwahila, muloña wawañelu.
Malwihu kufuma kudi antañi
Komana mukwakushimwina waWanta wamumbanda watela kuvwala chitambala neyi nakulombola kadizi waBayibolu hamu namukwakushimwina weyala?
▪ Muchibaaba chinakwila nawu “Malwihu Kufuma Kudi Antañi” chekala muKaposhi Kakutalila kaJuly 15, 2002 kaChibemba, ashimwinumu nawu muhela watela kuvwala chitambala neyi nakulombola kadizi waBayibolu hamu namukwakushimwina weyala wapapatishewa hela nehi. Iyi nsañu yashimwini cheñi nawu chumichi chalema nankashi kutalisha haniyi nsañu.
Neyi mukwakushimwina weyala wunakuzata hamu namuhela hakulombola kadizi waBayibolu wapapatishewa, muhela watela kuvwala chitambala hakulombola. Nakulemesha ntanjikilu yaYehova yakwila nawu iyala nateli kwikala mutu mukachi kachipompelu chawakwaKristu muloña nakuzata mudimu wazatañawu amana kwetu atondawu. (1 Kor. 11:5, 6, 10) Neyi chinatwesheki, muhela nateli kumuleja mana kwetu nindi yalomboli kadizi neyi washikahu nawa natweshi kudizisha.
Munjila yikwawu, neyi muhela nakuzatila hamu namukwakushimwina weyala wabula kupapatishewa wabula kwikala nfumwindi hakulombola kadizi waBayibolu, kwesekeja naNsona hanateli kuvwala chitambalaku. Hela chochu, chinleji chawahela chinateli kuyileñela avwali chitambala nihampinji yamuchidiwu.
Kutaña Bayibolu
(1 Akorinda 10:1-17) Ichi dinu enu anakwami, inakukeña mwiluki nenu, ankakulula jetu ejima adiña mwishina deevu nawa wejima wawu ahitili mukaluñalwiji 2 nawa wejima wawu ayipapatishili mudi Mosi kuhitila mwivu nimukaluñalwiji, 3 cheñi, wejima wawu adiili yakuda yakuspiritu yoyimu 4 nawa wejima wawu anwini yakunwa yakuspiritu yoyimu. Muloña adiña nakunwa kwilola dakuspiritu dayilondeleleña, nawa idi ilola demeneneñaku Kristu. 5 Hela chochu, Nzambi hayitiyili kuwaha wejima wawuku, muloña ayijahili mwisaña. 6 Dichi, yumiyi yekala yakutalilahu kudi etu kulonda tubuleña kufwila yuma yatama neyi chayifwililiwu wena. 7 Nawa bayi twikala akwakupesha neyi cheliliwu amu mukachi kawuku; neyi chochasonekawu nawu: “Antu ashakamini nakuda nikunwa. Kuhiñahu, emeni nakuzañalala.” 8 Nawa bayi twila wuvumbi neyi cheliliwu amu wuvumbiku, chakwila antu 23,000 afwili mwifuku dimu. 9 Nawa bayi tumweseka Yehova neyi chamwesekeliwu amuku, dichi awa antu ayijahili kudi tupela. 10 Nawa bayi mwikala akwakutooba neyi chatoobeleñawu amuku, awa antu ayijilumwini kudi akwakujilumuna. 11 Iyi yuma yayimwekeneni kulonda yiikali yakutalilahu kudi etu, nawa ayisonekeli kulonda yiikali yakutusoñamisha etu tunakushakama kukukuma kwanshakaminu yamakonu. 12 Dichi muntu wunakutoñojoka nindi nemani, yababali kulonda yabuli kudimbuka. 13 Kwosi kweseka kwayimwekenahu dehi enu, kwabadika kweseka kwayimwekenaña antu ejimaku. Ilaña Nzambi washinshika, hakayileka enu kuhita mukweseka kwabadika kweseka kumunateli kuumikaku, ilaña kweseka kwejima kumukahitamu, wakayiloñeshela njila yakuumikilamu oku kweseka. 14 Dichi, enu akwetu inakeña, tondolwelenu kupesha. 15 Ami inakuhosha neyi kudi antu akweti kashinshi; dichi fuukulenu enu aweni neyi yuma yinnakuhosha yalala hela nehi. 16 Kaapu kankisu kitwakiswilaña, komana hichatalisha mukwila nawu kuhetela mumashi aKristuku, tahindi? Komana dinkendi ditwahumunaña, hichatalisha mukwila nawu kuhetela mumujimba waKristuku, tahindi? 17 Muloña kudi hohu dinkendi dimu, dichi, hela chakwila etu tudi amavulu, tudi mujimba wumu, muloña wejima wetu tunakuda kunidi dinkendi dimu.
APRIL 22-28
YUMA YALEMA YAMWIZU DANZAMBI | 1 AKORINDA 14-16
“Nzambi Wakekala ‘Yuma Yejima Kudi Antu Ejima’”
(1 Akorinda 15:24, 25) Nkumininaku, neyi nahani dehi Wanta kudi Nzambi yindi nawa Tata yindi, hampinji yakela najilumuni dehi nfulumendi jejima, niwuswa wejima niñovu jejima. 25 Muloña watela kuyuula neyi mwanta kushika nimpinji yakashayi Nzambi ayilumbu ejima mwishana danyendu yindi.
w98 7/1 21 ¶10
“Kufwa Akakwifumishahu”
‘Kukuma’ hikumana kwaYaaka Ikombakaji yaKuyuula kwaKristu, mpinji yakahanayi Yesu Wanta kudi Nzambi nawa Tata yindi mukudizoza. (Chimwekeshu 20:4) Nkeñelu yaNzambi “yakupompesha yuma yejima mudi Kristu,” yikekala yashikijewa dehi. (Aefwesesa 1:9, 10) Chatachi, Kristu wukajilumuna “nfulumendi jejima, niwuswa wejima niñovu jejima” jasekeshaña chiyuulu chaNzambi. Muniku kujilumuna munabombeli kujilumuka kukekalaku hanjita yaAmagedoni. (Chimwekeshu 16:16; 19:11-21) Pawulu wahosheli nindi: “Muloña [Kristu] watela kuyuula neyi mwanta kushika nimpinji yakashayi Nzambi ayilumbu ejima mwishina danyendu yindi. Nawa chilumbu wakukumishaku, dikwila nawu kufwa, akamujilumuna.” (1 Akorinda 15:25, 26) Mwalala, nshidi jejima jaleteliyi Adama nikufwa akajifumishahu. Kuhiñahu, Nzambi wakasañula afu adi “mumajamu achanukishu.”—Yowanu 5:28.
(1 Akorinda 15:26) Nawa chilumbu wakukumishaku, dikwila nawu kufwa, akamujilumuna.
Wanta Wunakwila Nkeñelu yaNzambi Hamaseki
Ndochu kufwa akakwila ñahi? Kufwa ‘hichilumbu wakukumishaku’ wakabishaña antu abula kuwanina. (1 Kor. 15:26) Komana Yehova wukukañanya kufumishahu kufwa? Shinshikenu chashimwineñahu dehi Isaya nindi: ‘Naminyi dehi kufwa chahaya nyaaka; Yehova wakakombola madilu mumesu awantu ejima.’ (Isa. 25:8) Fwikijenu yuma chiyakekala? Hikwakekala yipenji, majamu hela kudila madilu awushonaku. Ilaña kwakekala madilu amuzañalu hakumona Yehova chakashikijayi chikaninu chindi chachiwahi chakusañula afu. (Tañenu Isaya 26:19.) Nkumininaku, kutama kutwatiyaña hamuloña wakufwisha kwakamana.
(1 Akorinda 15:27, 28) Muloña Nzambi “wovwahishili yuma yejima mwishina danyendu yaKristu.” Ilaña chahoshayi nindi, ‘Novwahishi yuma yejima mwishina danyendu yaKristu,’ hichinatalishi mukwila nawu Owu wovwahishili yuma yejima niyena wadovwahishili yomweni mwishina danyendu yaKristuku. 28 Ilaña yuma yejima anayovwahishi mwishina danyendu yindi, dichi Mwana niyena wakadovwahisha yomweni kudi Owu wovwahishili yuma yejima kudi yena kulonda Nzambi yakekali yuma yejima kudi antu ejima.
Kuwunda Hadi Ikombakaji Danyaka Nihaya Nyaka!
Kwosi njila yikwawu yitwatela kulumbulwilamu chikekala chihandilu chawantu hakukuma kwayaaka ikombakaji yakubadika mazu akwila nawu ‘Nzambi wakekala yuma yejima kudi antu ejima.’ Indi awa mazu atalisha mudihi? Toñojokenu mpinji yakunyima muEdeni henohu antu awanina, Adama naEvu, achidi muchisaka chaYehova chawunda. Yehova, Mwanta Wakuleña Kwejima, diyi wayuulileña yileñaleña yindi yejima, añelu niantu. Ahosheleña nindi, adifukwileña kudi yena nawa Yehova wayikiswilileña. Yehova wadiña ‘yuma yejima kudi antu ejima.’
Kukeña Yuma Yalema yakuSpiritu
(1 Akorinda 14:34, 35) ambanda amwenihu muyipompelu, muloña hichetejewa wena kuhoshaku. Ilaña, ovwahileña neyi chahosha niNshimbi. 35 Neyi kudi yuma yinakukeña kwilukawu, atela kwihula anfumu jawu kwitala, muloña chansonyi mumbanda kuhosha muchipompelu.
w12 9/1 9, chikasha
Komana Kapostolu Pawulu Wayikaanishili Ambanda Kuhosha?
Kapostolu Pawulu wahosheli nindi: “ambanda amwenihu muyipompelu,” (1 Akorinda 14:34) Watalishili mudihi? Komana wadiña nakuyimona nindi amukunkulwayi? Inehi. Kakavulu wahosheleña nindi ambanda atela kwikala antañishi amawahi. (2 Timotewu 1:5; Titusa 2:3-5) Mumukanda windi wasonekeleliyi akwaKorinda, Pawulu halejeli ambanda hohuku ilaña niantu adiña nawuswa wakuhosha nikuprofweta ‘kumwenahu’ neyi mukwawu mukwakwitiya nakuhosha. (1 Akorinda 14:26-30, 33) Kakavulu ambanda akwaKristu etiyili adiña neyena chikupu chakwila adiña ninakuketwisha nhoshi nakumwihula malwihu, neyi chejililiwu muchisemwa chawu. Hakwila nawu abuli kuleta ipumba, Pawulu wayilejeli nindi: “atela kwihula anfumu jawu kwitala.”—1 Akorinda 14:35.
(1 Akorinda 15:53) Muloña iwu mujimba watokaña wakabalumuka nakwikala wabulaña kutoka, nawa iwu mujimba wafwaña wakabalumuka nakwikala wabulaña kufwa.
it-1 1197-1198
Kubula kutoka
Neyi chochadiña kusañuka kwaYesu, answana jindi niwena ayisañulaña nawumi wahaya nyaaka neyi yileñaleña yakuspiritu nikwikala nanyijimba yabulaña kufwa nikutoka. Ashakamahu dehi, kukalakala nakashinshi nikufwa nanyijimba yawuntu, chayinu mpinji atambwilaña nyijimba yakuspiritu yabulaña kutoka neyi chashimwiniyi Pawulu ha 1 Akorinda 15:42-54. Hela chochu, Kubula kufwa kwatalisha kuchihandilu chiyadiluñishañawu, chabulaña kukuma nikumana, ilaña kubula kutoka kwatalisha kumujimba wayinkañayi Nzambi, wabulaña kutoka, kukisika hela kujilumuka. Chinamwekani neyi Nzambi wayinkaña ñovu yakudihandila awenawu, hiyashindamena hayuma yikwawu neyi chekala yileñaleña yindi yakumujimba nikuspirituku. Ichi chayikwashaña kwiluka nawu Nzambi wayikuhwelela. Iku kudimena nikubula kufwa kwekalaku, hikwayambulaña kuwunlomboli waNzambiku; nawa kufwana Yesu Kristu hamu neyi mutu wawu atwalekañahu kwovwahila nkeñelu niwunlomboli waTata yawu.—1Ko 15:23-28; talenu kubula kufwa; wumi.
Kutaña Bayibolu
(1 Akorinda 14:20-40) Enu anakwami, bayi mutoñojokeña neyi anyana anyanyaku, ilaña ikalenu neyi anyana anyanya kuyuma yatama; nawa toñojokenuña neyi muntu wapama chikupu. 21 Chasonekewa muNshimbi nawu: “Yehova nahoshi nindi, ‘Nakahosha nanawa antu kuhitila mukuzatisha madimi awañiinza ninyivumbu yawenyi, hela chochu, akakaana kuntiyilila.’” 22 Dichi, madimi hichinjikijilu chawantu etiyaku, chiña antu abula kwitiya, wuprofwetu niwena hiwawantu abula kwitiyaku, chiña antu etiya. 23 Dichi neyi chipompelu chejima chidipompesha heluña dimu nawa wejima wawu atachika kuhosha mumadimi acheñi, ilaña antu abula kutaña hela antu abula kwitiya eñila mukachi, komana akuhosha wanyi nawu munazaluki tahindi? 24 Ilaña neyi wejima wenu munakuprofweta, nawa muntu wabula kwitiya hela wabula kutaña yeñila mukachi, mazu imunakuhosha wejima wenu akumukonkolola nikumuleñela yadishinshiki yomweni chikupu. 25 Kuhiñahu, yuma yakujinda yidi mumuchima windi yikusoloka, kulonda yadimbuki chamesu hamaseki nakudifukula kudi Nzambi, nakuhosha nindi: “Chalala Nzambi wudi mukachi kenu.” 26 Hanu dinu, chikwikala ñahi enu anakwami? Neyi mupompa hamu, wumu nakwimba isamu, mukwawu nakutañisha, mukwawu nakusolola yuma, mukwawu nakuhosha mwidimi dacheñi, nawa mukwawu nakulumbulula mazu. Yuma yejima yikoñenuña kulonda mudituñeña wumu namukwawu. 27 Nawa neyi muntu wumu wahoshaña mwidimi dacheñi, ekali hohu antu ayedi hela asatu kunahu, nawa adihimpeña, wumu watela kulumbulula. 28 Ilaña neyi kwosi mukwakulumbulula, muntu wahoshaña mumadimi watela kumwenahu muchipompelu nakudihoshesha kankawindi mumuchima nikudi Nzambi. 29 Atuprofwetu ayedi hela asatu aprofweti, nawa antu amakwawu eluki munalumbulukili mazu wenowu. 30 Ilaña neyi kwikala muntu anasolweliwu yuma hampinji yinashakamiyi mwenomu, nhoshi wakusambila yomweni nzo-o. 31 Muloña wejima wenu munateli kuprofweta wumu hampinji yimu, mukwawu nawa hampinji yikwawu, kulonda antu ejima adizi nikukoleshewa. 32 Nawa atuprofwetu atela kwiluka chiwahi njila muyazatishilañawu yawaana yaspiritu. 33 Muloña Nzambi, hiNzambi wakuwunda bayi neyi wakuluwañeshaku. Neyi chichekala muyipompelu yejima yawakwakujila, 34 ambanda amwenihu muyipompelu, muloña hichetejewa wena kuhoshaku. Ilaña, ovwahileña neyi chahosha niNshimbi. 35 Neyi kudi yuma yinakukeña kwilukawu, atela kwihula anfumu jawu kwitala, muloña chansonyi mumbanda kuhosha muchipompelu. 36 Komana izu daNzambi dafumini kudi enu tahindi dashikili hohu kudi enu? 37 Neyi muntu wejima nakutoñojoka nindi hikaprofwetu hela nindi wukweti chawaana chaspiritu, watela kwiluka nindi yuma yinnakuyisonekela enu, hinshimbi jaMwanta. 38 Ilaña neyi muntu wejima yadiwula chumichi, niyena akamudiwula. 39 Dichi enu anakwami, fwilenuña kuprofweta, ilaña bayi mukaanisheña antu kuhosha mumadimi acheñiku. 40 Dichi, yuma yejima yilenuña mukutelela nawa mukuloña.
APRIL 29–MAY 5
YUMA YALEMA YAMWIZU DANZAMBI | 2 AKORINDA 1-3
“Yehova, ‘Nzambi Wakukundeja Kwejima’”
(2 Akorinda 1:3) Kulema kwiikali kudi Nzambi nawa Tata yaMwanta wetu Yesu Kristu, Tata wasweja luwi nawa Nzambi wakukundeja kwejima,
“Dililenuña Hamu naWantu Adilaña”
Tata yetu wasweja luwi niyena wajimbeshahu dehi antu akeñayi adi neyi, Abarahama, Isaka, Yakoba, Mosi niMwanta Davidi. (Kuch. 12:6-8; Mat. 22:31, 32; Yilw. 13:22) Izu daNzambi datulejaña nawu Yehova nakufwila chikupu nindi yakayisañuli. (Yoba 14:14, 15) Akazañalala nawa akekala nanyijimba yakola. Shinshikenu cheñi hadi Mwanindi asweja kukeñayi ‘wamutiyishilaña kuwaha hefuku-hefuku,’ wafwili kufwa kwayeña. (Yish. 8:22, 30) Tukutwesha wanyi kulumbulula chatiyiliyi Yehova.—Yow. 5:20; 10:17.
(2 Akorinda 1:4) yena watukundejaña mukweseka kwejima kutwamonaña, kulonda ninetu tutweshi kukundeja antu amakwawu mukweseka kwejima kwamonañawu kuhitila mukuyikundeja nakukundeja kutwatambwilaña kudi Nzambi.
“Dililenuña Hamu naWantu Adilaña”
Mwamweni, chinateli kukala kwiluka mazu akuhosha namuntu wunaneñi. Hela chochu, Bayibolu yahosha nawu “madimi awakwamaana akoleshaña antu.” (Yish. 12:18) Antu amakwawu akundejewaña nansañu yekala mubuloshuwa yakwila nawu Ilyo Untu Watemwa Afwa. Kakavulu, chuma chapela chimwatela kwila hikudilila “hamu nawantu adilaña.” (Rom. 12:15) Gaby, wafwishili nfumwindi wahosheli nindi, “Kudila dikwankwashaña. Dichi nakundejewaña neyi akwetu ankwashaku kudila. Neyi ankwashaku kudila, namonaña nami naneñi nkawami wanyi.”
Kukeña Yuma Yalema yakuSpiritu
(2 Akorinda 1:22) Cheñi nawa natulamiki chilamiku chindi nawa natwinki spiritu yajila munyichima yetu. Kuhitila mukwila mwenimu, watuleja nkisu yayuma yitukatambwila kumbidi.
Malwihu Kufuma Kudi Antañi
Nzambi wakamwinka mukwaKristu wejima wawayishewa “Chinjikijilu” ‘nichilamikwinyi’?—2 Kor. 1:21, 22, Kj.
▪ “Chinjikijilu”: Kwesekeja namukanda wumu, izu dachiGiriki dabalumunawu nawu “chinjikijilu” ha 2 Akorinda 1:22 dadiña “munshimbi nimujakulanda nakulandulula” dikwila nawu “mali atachi kufwetaku, kusondamisha, akukwatila nachu, kuhaninaku chadimu, amwekeshaña nawu ochu chuma cheyi, hela aleteshaña chitiyañenu kwikala chakola.” Kudi awayishewa, wufwetu hela wuloku wawu, awilumbulula ha 2 Akorinda 5:1-5 munabombeli nikwikala namujimba wabulaña kutoka mwiwulu. Cheñi muniwu wuloku mwabombela nikutambwila chawaana chawumi wabulaña kufwa.—1 Kor. 15:48-54.
MuchiGiriki chamakonu, iyi nhoshelu ayizatishaña hakutena kazeya kiyanavwikiwu muntu wunotiwu. Ichi chakutalilahu chashikila kudi antu akekala iñoda jaKristu muchifwikija.—2 Kor. 11:2; Chim. 21:2, 9.
▪ Chilamiku: Kushankulu, chilamiku achizatishileña neyi kufwachika hakumwekesha nawu ochu chuma cheyi nihakuditeja nachu. Kudi awayishewa, “ayilamikili” hela kuyinka chinjikijilu muchifwikija naspiritu yajila neyi antu jaNzambi. (Efwe. 1:13, 14) Hela chochu, ichi chilamiku chekalaña hohu chahaya nyaaka neyi muntu yafwa washinshika hela hampinji yikatachika lukadi lwasweja.—Efwes. 4:30; Chim. 7:2-4.
(2 Akorinda 2:14-16) Ilaña tumusakililenu Nzambi, watulombolaña mpinji yejima muchendu chakushindila hamu naKristu, nawa watandishaña ivumba dadiwahi dakumwiluka yena mumaluña ejima kuhitila mudi etu! 15 Muloña etu kudi Nzambi, tudi neyi ivumba dadiwahi nankashi daKristu hakachi kawantu anakwamwinawu nihakachi kawantu anakujilumuka; 16 kudi antu anakujilumuka, tudi ivumba dakufwa datwalaña kukufwa, kudi antu anakupulwishawu, tudi ivumba dawumi datwalaña kuwumi. Nawa, hinyi wunashikilimu kuzata iwu mudimu?
Komana Mweluka?
Kapostolu Pawulu watela watoñojokeleñadi chahosheliyi nindi “muchendu chakushindila”?
▪ Pawulu wasonekeli nindi: “Nzambi watulombolaña . . . muchendu chakushindila hamu naKristu, nawa watandishaña ivumba dadiwahi dakumwiluka yena mumaluña ejima kuhitila mudi etu! Muloña etu kudi Nzambi, tudi neyi ivumba dadiwahi nankashi daKristu hakachi kawantu anakwamwinawu nihakachi kawantu anakujilumuka; kudi antu anakujilumuka, tudi ivumba dakufwa datwalaña kukufwa, kudi antu anakupulwishawu, tudi ivumba dawumi datwalaña kuwumi.”—2 Akorinda 2:14-16.
Kapostolu watalishileña kuchidika chadiña nakwanakana Aroma hakulemesha muntu wunashindi ayilumbu jindi Mwituña. Haniyi mpinji, antu anashindi niatuyili enjileña hamu nakujaha jiñombi nikujilambula hampinji yoyimu mukulumpi wawu niamashidika indi anakuyilemesha nikuzañalela nawu hamu. Hanyima yakumanisha chenichi chidika añombi ayilambwileña nawa atuyili amavulu ayijahileña.
Mazu akwila nawu “ivumba dadiwahi nankashi daKristu” anakwimenaku wumi kudi antu amakwawu nawa kufwa kudi amakwawu “hadaha adifumisha kuyuma yelileñawu Aroma hakwocha insensi neyi anashindi,” neyi chahosha The International Standard Bible Encyclopedia. “Ivumba dadiwahi dadiña chinjikijilu kudi akwakwimika mushindu hadaha dayanukishileña atuyili kufwa kwadiña hambidi yawu.”
Kutaña Bayibolu
(2 Akorinda 3:1-18) Komana, tukutachika cheñi kudihameka etu aweni kudi enu tahindi? Nawa, komana tunakukeña nyikanda yakuleta kudi enu hela yakufuma kudi enu yakutuhameka nachu neyi chelañawu antu amakwawu tahindi? 2 Enu yenu mukanda wetu, wasonekawu hanyichima yetu, welukawu nawa watañañawu kudi antu ejima. 3 Muloña enu anayimwekeshi kwikala mukanda waKristu wasonekawu kudi etu akwakukalakala, wasonekawu bayi nawulombuku, ilaña wasonekawu naspiritu yaNzambi wamumi, hiyawusoneka hamalola awubasaku, ilaña awusoneka hawubasa wakumujimba, dikwila nawu hanyichima. 4 Tukweti iku kukuhwelela kudi Nzambi kuhitila mudi Kristu. 5 Bayi neyi etu aweni yetu tunadilishi kwikala ashikilamu kuzata iwu mudimuku, ilaña Nzambi diyi wunatwilishi kwikala ashikilamu kuzata iwu mudimu, 6 yena diyi wunatuleteshi twiikali akwakukalakala ashikilamu achitiyañenu chachiha, bayi neyi anshimbi jasonekawuku, ilaña anshimbi jakuspiritu; muloña nshimbi jasonekawu jasompeshelaña muntu kukufwa, ilaña spiritu yahandishaña. 7 Dichi, neyi nshimbi jatwalaña muntu kukufwa nawa jabazililiwu hamalola, jenjili nakulema chakwila anyana kaIsarela akañenyi nikushinshika kumesu aMosi muloña wakulema kwadiña kumesu indi, oku kwateleleli kujiyishawu, 8 komana kuzata kwaspiritu hikunateli kwikala nakulema kwabadikaku, tahindi? 9 Muloña neyi nshimbi jasompeshelaña muntu kukufwa jadiña nakulema kwamuchidiwu, dikwila nawu kuloña kukabadika kulema nankashi. 10 Kafwampi, nichuma chalemesheliwu nankashi hakusambila anachihukuli kulema, muloña wakulema kunachibadiki. 11 Muloña neyi chuma chateleleli kujiyishawu achileteli nakulema, dikwila nawu chuma chakashala chakabadika kulema nankashi. 12 Chineli tukweti iku kuchiñeja, tunakuhosha nakukasunuka chikupu, 13 nawa hitwelaña neyi cheliliyi Mosi wabutili ihina kumesu indi kulonda anyana kaIsarela akañanyi kushinshika chikupu chuma chateleleli kujiyishawuku. 14 Ilaña yitoñojoka yawu yachinchikili. Muloña kushika nikwifuku dalelu idi ihina dodimu dichidi dakubuta nihampinji yinakutañawu chitiyañenu chachikulu, muloña idi ihina anateli hohu kudijiyisha kuhitila mudi Kristu. 15 Kafwampi, kushika nikwifuku dalelu, mpinji yejima yinakutañawu nsañu yasonekeliyi Mosi, idi ihina saña dabutila hanyichima yawu. 16 Ilaña neyi muntu yabalumukila kudi Yehova, idi ihina adibutununañahu. 17 Yehova hiSpiritu, nawa kwejima kudi spiritu yaYehova, kwenoku dikwekala nikusubuka. 18 Nawa wejima wetu kumesu etu kwakubuta ihina wanyi, tudi neyi yibanjilu yinakumwekesha kulema kwaYehova. Hampinji yitunakwila mwenimu, anakutubalumuna kwikala neyi chifwanisha chindi, nakumwekesha chikupu kulema neyi chakumwekeshañayi Yehova owu wekala Spiritu.