Imbujolenu Kudizoza kwaYehova

1. Kudizoza kwaYehova kwekala ñahi kwabadika?

NEYI mutoñojoka hadi anyuuli janfulumendi adi mukaayi makonu, komana munateli kumona chilwilu chakudizoza mudi wena? Kwakulehi mwani. Ilaña Yehova, wañovu jejima, wadizoza. (Mas. 113:​5-8) Kudizoza hichilwilu chekala mudi Yehova; mudi yena mwosi kakudivwimba hela kanti. Tukuhanjeka hanjila jiwana jamulumbulula chiwahi Yehova chekalayi nawa tukwiluka chamwekeshañayi chilwilu chindi chakudizoza muniji njila. Tukuhanjeka cheñi Yesu chembujoleliyi kudizoza kwaTata yindi. Chitukuhanjekaña hayumiyi, yikutukwasha kuswina kwakwihi naYehova nikwimbujola chikupu chilwilu chindi chakudizoza.

YEHOVA WEKALA WASWAYI KUSOLOMOKA

2. Isamu 62:8 damwekeshaña nawu Yehova wekala ñahi? (Talenu cheñi mwevulu wudi hakava.)

² Kakavulu, chaswayi wanyi kuhosha nawantu adivwimba. Chilwilu chawu chakudivwimba, chayikojejaña kwila yuma yaleteshaña akwawu antu kubula kwikala akasunuka kuhanjeka nawu hela kuyitondolwela. Yehova wambukaku chikupu! Chineli Tata yetu wamwiwulu wadizoza, watulejaña kwikala akasunuka kuhanjeka nindi, nakumuleja yuma yejima yinakutwakamisha muyitoñojoka nimumuchima. (Tañenu Isamu 62:⁠8.) Neyi chatiyililañayi tata yawantu wukweti kukeña yuma yinakuyakamisha anyanindi, Yehova niyena watiyililaña nakanañachima kukulomba kwawakakudifukula indi. Kafwampi, wetejeli kulomba kwakuvulu kwamuchidiwu kulonda akusoneki muBayibolu. Chumichi chinakumwekesha nawu wekala wakasunuka kuhanjeka nindi. (Yosh. 10:​12-​14; 1 Sam. 1:​10-​18) Hanu dinu tukwila ñahi neyi kudi yuma yinakuletesha mpinji jikwawu tutiyeña neyi twashikilamu wanyi kulomba kudi Yehova?

3. Muloñadi chimwatela kukuhwelela chikupu nenu Yehova wakeñaña nindi mwiikali akasunuka kulombaña kudi yena mpinji yejima?

³ Tunateli kwikala akasunuka kulomba kudi Yehova hela chakwila tunakudimona netu twashikilamu wanyi kutumwekeshela kukeña kudi yena. Muloñadi chitunahosheli muniyi njila? Muchakutalilahu chaYesu chamwana wajimbeli, wamwesekejeli Yehova natata yawantu wukweti luwi, wadiña namwana wabalumukili mumuchima nawa wadimweneña nindi akumwiteja wanyi kufunta muchisaka mwafuminiyi. Tata yawantu welili ñahi chelili iwu mwanindi yafuukulihu kufunta kwitala? Yesu wahosheli nindi tata yawantu chamumweniyi hohu mwanindi nakwinza, “wamukinkililili nawa wamukumbatili nakumufufwa.” (Luka 15:​17-​20) Yehova wudi neyi iwu tata yawantu. Chatiyayi hohu kulomba kwawantu akweti nyichima yinabaluki nikuchikeka nayisenda yakudinkamu nyiloña hela kwakama, kudizoza kwindi kwamuleteshaña kuyitiyilila nakanañachima. (Mukeña 3:​19, 20) Wushona wamusañumunaña Yehova kuyitemukila awa antu neyi cheliliyi ona tata yawantu, kulonda yayikundeji nikuyikwasha kukuhwelela nawu wayikeña nawa wayitiyilaña luwi. (Isa. 57:15) Yehova watutemukilaña ñahi makonu? Kakavulu welaña mwenimu kuzatisha akulumpi, antaña jetu etiya niakwetu akakudifukula amakwawu. (Yak. 5:​14, 15) Yehova watukwashaña muniyi njila, muloña wakeñaña tuswineña kwakwihi nayena.

4. Yesu wamwekesheli ñahi nindi wadiña wakasunuka?

⁴ Yesu wembujolaña Tata yindi. Yesu wadizoza neyi Tata yindi. Muloña wachumichi, hampinji yadiñayi hanu hamaseki, antu akasunukileña kwinza kudi yena. Hiyatiyileña woma kumwihula malwihuku. (Maku 4:​10, 11) Dichi, neyi yayihula kulonda yatiyi yitoñojoka yawu hansañu yidi yejima, amulejeleña chakufuma hamuchima yitoñojoka yawu. (Mat. 16:​13-​16) Nawa neyi anakoñi chiluwa, atiyileña woma wanyi kumuleja; elukili nawu Yesu wukweti luwi nawa wadiwunjika. (Mat. 17:​24-​27) Chineli Yesu wamwimbujoleli Tata yindi chikupu, chumichi chayikwashili akakumulondela kumwiluka Yesu chiwahi. (Yow. 14:⁠9) Elukili nawu Yehova wadiña wambukaku chikupu nawanlomboli jakudifukula akalisha, adivwimba nawa adituumbakesha, adiñaku munana mafuku. Dichi, elukili nawu Nzambi wadizoza nawa wakeñaña nindi antu aswineña kwakwihi nayena.

5. Muloñadi chichekalila chaswayi antu kutusolomoka neyi twadizoza?

⁵ Tunateli kumwimbujola ñahi Yehova? Neyi twikala adizoza, antu akwikala akasunuka kuhanjeka nanetu. Kubula kudizoza kukutuletesha kwikala nechima, kudivwimba nimuchima wakubula kwanakena, yilwilu yikubula kukokola antu kwinza kudi etu. Ilaña kwikala adizoza kukutukwasha kwilila antu yuma yayiwahi, kwikala adiwunjika nimuchima wakwanakena, yilwilu yikukokola antu kwinza kudi etu. (Kol. 3:​12-​14) Sweje-e akulumpi atela kwikala aswayi kusolomoka. Hela chochu, hakwila ekali aswayi kusolomoka, atela kwikalaña hamu nawamanakwawu niahela kakavulu. Hakwila eli mwenimu, akulumpi atela kuzataña nañovu kuya nakupompela Kwitala daWanta chatela asokankesheña kukupompa kuzatisha yozelu. Nawa kwesekeja nachidi yuma muchihandilu chawu, azatilaña hamu nawamanakwetu niahela mumudimu wakushimwina kwitala niitala. Chayilukawu chiwahi akulumpi chekalawu, akwikala akasunuka kuyileja akulumpi kukala kunakumonawu.

YEHOVA WATOÑOJOKELAÑAKU

6-7. Shimunenu yuma yamwekeni yinakumwekesha nawu Yehova wekala wamwovu muchima hanochu chatiyililañayi kukulomba kwawambuñindi.

⁶ Antu amavulu adivwimba, atoñojokaña nawu eluka yuma yejima nawa hiyakeñaña kuhimpa yitoñojoka yawuku. Ilaña Yehova chineli wadizoza, wekala wamwovu muchima nawa watiyililaña munakutoñojokawu amakwawu hela chakwila wayibadika chikupu ejima. Talenu cheliliyi naMiriyamu, muhela aMosi,. Yena hamu naAroni, amutoobeleli Mosi, wadiña nakumwimenaku Yehova. Dichi, ichi chuma cheliliyi Miriyamu chamwekesheli nawu hanakumwekesha kalemesha kudi Yehovaku. Chafuminimu, Yehova wamuhililili Miriyamu nankashi nawa wamweteli nambumba. Ilaña Aroni walembeli kudi Mosi nindi yamukwashi muhelawu, nawa Mosi walembeli kudi Yehova nindi amuuki. Hanu dinu chumanyi cheliliyi Nzambi? Nzambi hadivwimbili nakukakela kuwunsompeshi wamusompesheliyiku. Chineli Yehova wadizoza, wamutiyilili Mosi nawa wamuukili Miriyamu.​—Kuch. 12:​1-​15.

⁷ Yehova wamwekesheli cheñi kudizoza hachuma cheliliyi naMwanta Hezekiya. Kuhitila mudi kaprofwetu Kindi, Yehova wamulejeli mwanta nindi wukufwa. Hezekiya wadilili nakulemba kudi Yehova nindi amuuki. Hakumwakula, Yehova wamutiyilili luwi mwanta kuhitili mukumushilaku yaaka 15 kuwumi windi. (2 Anya. 20:​1, 5, 6) Eña, kudizoza kwamuletesheli Yehova kumwekeshela antu wushona nikutiyilila mwahosheleñawu.

8. Yumanyi yinakumwekesha nawu Yesu wekala wamwovu muchima? (Maku 3:​1-6)

⁸ Yesu wamwimbujolaña Tata yindi. Hadiñayi hamaseki, Yesu welilileña antu yuma yayiwahi kwesekeja nakukala kwadiñawu naku. Chakutalilahu, wokili antu haSabata hela chakwila wamweneña ikañesha dafumineña kudi akakumudimbulula. (Tañenu Maku 3:​1-6.) Yesu watwalekahu kwikala namuchima wamwovu chineli diyi mutu wachipompelu chawakaKristu. Chakutalilahu, neyi muntu muchipompelu akoña nshidi yeneni, wadiwunjikaña kuhitila mukumwinka iwu muntu mpinji kulonda ahimpi yilwilu yindi.​—Chim. 2:​2-5.

9. Tunateli kwikala ñahi amwovu muchima, nawa munjilanyi mutunateli kumwekeshela iwu muchima wamwovu? (Talenu cheñi nyevulu.)

⁹ Tunateli kumwimbujola ñahi Yehova? Twatela kuzata nañovu kwikala adizoza kulonda twiikali amwovu muchima neyi Yehova muyuma yitwatoñojokaña niyitwelaña. (Yak. 3:​17) Chakutalilahu, anvwali amwovu muchima hela chakwila etejaña wanyi nawu anyanawu eleña yuma yatama, hiyakuhwelelaña anyanawu kwila yuma yinateli kukañanya kwilawuku. Dichuma chelileñayi niYakoba neyi chitunamoni hansañu yekala haKutachika 33:​12-​14. Anvwali adizoza nawa amwovu muchima, atela cheñi kutondolwela kwesekeja mwana wumu namwana mukwawu munjila yatama. Akulumpi akaKristu niwena atela kwikala amwovu muchima. Njila yimu munateli kwililawu mwenimu, hikulondela munafuukuli akulumpi amavulu hezanvu dawakulumpi neyi chakwila kufuukula kwawu hikunafumpi yishina yamuBayiboluku. (1 Tim. 3:​2, 3) Nawa wejima wetu twatela kuzata nañovu kulemesha yitoñojoka yawakwetu hela chakwila etu tunakumwena yuma munjila yacheñi. (Rom. 14:⁠1) Mwamweni, muntu wejima muchipompelu watela kuzata nañovu kumwekesha “kwovwaha [kwindi] kudi antu ejima.”​—Fwili. 4:⁠5.

YEHOVA WADIWUNJIKA

10. Yehova wamwekeshaña ñahi kudiwunjika?

¹⁰ Chelukewa nawu antu adivwimba chayikalilaña kuhembelela. Kudisamba kwayileteshaña kubula kudiwunjika. Yehova wambukaku chikupu, muloña diwabadika mukumwekesha kudiwunjika! Chakutalilahu, mumafuku aNowa, Yehova wahosheli nindi wukuhembelela hadi yaaka 120 henohu kanda ajilumuni antu atama. (Kutach. 6:⁠3) Chumichi chamukwashili Nowa kwikala nampinji yakukulisha anyanindi nikutuñila hamu watu nachisaka chindi. Mukuhita kwampinji, kañelu wamwimeneneñaku Yehova wamutiyilili Abarahama nakudiwunjika hamwihwileñayi kutalisha hakujilumuka kwaSodoma naGomora. Neyi wadiña wadivwimba wadi kumwihula nindi, ‘Hinyi wunakwinki wuswa wakuñihula ami malwihu?’ Ilaña muloña wakumwimbujola Yehova, iwu kañelu wadiwunjikili naAbarahama.​—Kutach. 18:​20-​33.

11. Neyi chashimunawu ha 2 Petulu 3:​9, muloñadi Yehova chinakumwekeshelayi kudiwunjika makonu?

¹¹ Yehova nakumwekesha kudiwunjika nimakonu. Nakuhembelela mpinji yindi yatoñolayi kushika kulonda yakaleti kukuma. Muloñadi chinakudiwunjikilayi? “Muloña hakeñaña muntu hela wumu akakisikiku, ilaña wakeñaña antu ejima abalumuki munyichima.” (Tañenu 2 Petulu 3:⁠9.) Komana kudiwunjika kwaYehova kunakuya hohu mumenji? Inehi! Mamiliyoni awantu akweti nyichima yashinshika anaswini kwakwihi nayena. Nawa tunakuhweleli netu antu amavulu nankashi niwena akwila mwomumu. Hela chochu, kudiwunjika kwaYehova kudi nahakukumina. Yehova wayikeña antu ilaña hakayiteja kutwalekahu kwila yuma yinakwilawuku. Wakaleka wanyi kutama kwakatwalekihu haya nyaaka.​—Hab. 2:⁠3.

12. Yesu wembujolaña ñahi kudiwunjika kwaYehova?

¹² Yesu wamwimbujolaña Tata yindi. Yesu nembujoli kudiwunjika kwaYehova hadi yaaka yayivulu nankashi. Yesu wamonaña Satana chamutwambilañayi Yehova niantu ashinshika. (Kutach. 3:​4, 5; Yoba 1:​11; Chim. 12:10) Yesu cheñi nakumona antu chinakukabakanawu chikupu. Toñojokenu hohu chinakufwilayi “kulonda akisañani nyidimu yaDiyabolu.” (1 Yow. 3:⁠8) Chumanyi chamukwashaña Yesu kuhembelela nakudiwunjika sampu anamwiteji kudi Yehova kukisañana nyidimu yaDiyabolu yejima? Chuma chimu chaleteshaña, muloña Yesu wadizoza. Weluka nindi Yehova diyi wukweti wuswa wakufuukula mpinji yakaletayi kukuma.​—Yilw. 1:⁠7.

13. Yesu wadiwunjikili ñahi nawapostolu indi, nawa muloñadi?

¹³ Hadiñayi hanu hamaseki, Yesu wadiwunjikileña cheñi nawapostolu indi. Chakutalilahu, apostolu haditaadikishileñawu mapampa amavulu kulonda eluki wadiña mukulumpi hakachi kawu, Yesu hayimweni nindi hiyamba kahimpaku. Ilaña watwalekelihu kudiwunjika. (Luka 9:​46; 22:​24-​27) Wakuhweleleli nindi mukuhita kwampinji akahimpa yilwilu yawu. Komana kudihu chiluwa chochimu chimwafuntisha-­funtishañahu kuchikoña? Neyi dichayimwekenaña, chakadi nikujina mwasakililaña nankashi hakwikala naMwanta wadizoza nawa wadiwunjika wunakuyiyuula.

14. Tunateli kwikala ñahi nachilwilu chakudiwunjika?

¹⁴ Tunateli kumwimbujola ñahi Yehova? Neyi twikala “[nayitoñojoka] yaKristu,” tukutachika kutoñojoka nikwila yuma neyi Yehova. (1 Kor. 2:​16) Tunateli kwiluka ñahi chekala yitoñojoka yaKristu? Kudi chuma chimu chatela kutukwasha. Hikutaña Nyikanda yaNsañu Yayiwahi. Kuhiñahu twatela kwikalaña nampinji yakutoñojoka hansañu yitunatañi kulonda twiluki yitoñojoka yaYesu hanoyu nsañu. Nawa chakadi nikujina, twatela kumulomba Yehova kulonda atukwashi twiikali nayitoñojoka yakudizoza neyi yekala naYesu. Chitukwikalaña nayitoñojoka yaKristu, tukumwimbujolaña Nzambi kuhitila mukudiwunjika nanetu aweni niakwetu akakwitiya.​—Mat. 18:​26-​30, 35.

YEHOVA WALEMESHA ANTU ADIZOZA

15. Shimunenu yakutalilahu yawantu yinakumwekesha nawu Yehova wakeña antu adizoza. (Isamu 138:⁠6)

¹⁵ Tañenu Isamu 138:6. Toñojokenu hachumichi: Yehova, Mukakubadika mwiwulu nihamaseki, walemesha chikupu antu adizoza! Talenu yakutalilahu yantesha yawantu adizoza analemeshiwu kudi Yehova hadi yaaka yayivulu yinahitihu. Amakwawu hadaha munateli nikuyiluka wanyi, ilaña ayishimuna muBayibolu. Yehova wamwoneneni Mosi kusoneka ijina danleli wejina daDebora, wadiñaku mumpinji yawankakulula. Wazatili iwu mudimu nakashinshi mwitala daIsaka nimwitala daYakoba, hadaha hadi yaaka 125! Hela chakwila kwosi nsañu yayivulu yelukewa hadi iwu mumbanda washinshika, Yehova wamulejeli Mosi kusoneka nsañu yonenewa yamwekeshaña nawu iwu mumbanda amukeñeli nankashi. (Kutach. 24:59; 35:​8, tth.) Chimwahitili yaaka yayivulu, Yehova wamutondeli Davidi, kabiña wakansi, nawa wamwilishili kwikala mwanta wamuza waIsarela. (2 Sam. 22:​1, 36) Chimwahitili kapinji kantesha kufuma havwalikiliyi Yesu, Nzambi watemesheli añelu kuya nakulemesha atubiña adizoza kuhitila mukuyilisha kwikala atachi kwiluka nawu muBetelemi yamukamwihi munavwaliki mwana wakekala Mesiya kumbidi. (Luka 2:​8-​11) Nawa aYosefu naMariya chamuleteliwu Yesu kutembeli, Yehova wayilemesheli awa antu akula dehi, aSimiyoni naAna, kuhitila mukuyiteja kumumona Mwanindi. (Luka 2:​25-​30, 36-​38) Eña, “hela chakwila Yehova washakama hewulu haheni, washaña maana kudi adizoza”!

16. Yesu wamwimbujoleli ñahi Tata yindi chalemeshayi antu?

¹⁶ Yesu wamwimbujolaña Tata yindi. Kufwana Tata yindi, Yesu walemeshaña antu adizoza. Antu ‘abula kutaña nawa amweneñawu nawu hiyantu hohu kwawu’ wadizishili chalala chahosha haWanta waNzambi. (Yilw. 4:​13; Mat. 11:25) Cheñi, Yesu wokili akata nawa welili mwenimu munjila yayikwashili kwiluka nawu ayikeña nawa ayilemesha. (Luka 5:​13) Hawufuku wakukumishaku wakutwala hefuku damujahiliwu, Yesu wazatili mudimu wawuñamba kuhitila mukuwelesha nyendu yawapostolu indi. (Yow. 13:⁠5) Nawa henohu kanda yayi mwiwulu, walemesheli akakumulondela ejima adizoza, adiñaku hayina mpinji niakekalaku neyi nayi dehi, kuhitila mukuyinka mudimu wasweja kulema nankashi​—mudimu wakukwasha antu kwikala nawumi wahaya nyaaka.​—Mat. 28:​19, 20.

17. Tunateli kulemesha ñahi akwetu antu? (Talenu cheñi mwevulu.)

¹⁷ Tunateli kumwimbujola ñahi Yehova? Twayilemeshaña antu neyi tushimwinaña nsañu yayiwahi kudi ejima atiyililaña hichikweti muloña nankulilu yawu, ikowa hela shikola yatañawuku. Nawa twayilemeshaña amanakwetu niahela neyi tuyimonaña netu atubadika, hichikweti muloña nawuswa hela kukoleka kutukwetiku. (Fwili. 2:⁠3) Yehova watutiyaña kuwaha neyi tudizozaña ‘nakutachikilahu’ kudimwekeshela kalemesha wumu namukwawu muniji njila nimunjila jikwawu.​—Rom. 12:10; Zef. 3:​12.

18. Muloñadi chimukufwilaña kwimbujola kudizoza kwaYehova?

¹⁸ Chitukuzataña nañovu kwimbujola kudizoza kwaTata yetu wamwiwulu wukweti kukeña, antu akukasunukaña chikupu kutusolomoka, tukwikala amwovu muchima nankashi nawa asweja kudiwunjika. Nawa tukulemesha akwetu antu neyi chayilemeshañayi Yehova. Dichi tuzateña hakumina ñovu jetu kuswina kwakwihi naNzambi yetu wadizoza, kulonda wejima wetu hamuntu-hamuntu tusweji kwikala alema kumesu indi.​—Isa. 43:4.