Nsañu Yekala muMukanda waYoba Yinateli Kuyikwasha Kwiluka chaKufumbana Chiwahi

1-2. Muloñadi chichinayikalili amabwambu jaYoba asatu niElihu kwiluka hakutachikila kuhanjeka nindi?

NSAÑU yataandili neyi kesi hakachi kawantu akuMusela. Yoba, muntu wayili mpuhu kwejima muloña wamaheta adiñayi nawu, wajimbesheli yuma yejima. Chelili amambwambu jaYoba ejima asatu​—Elifazi, Bilidadi, niZofari​—atiyi yuma yamumwekeneni Yoba, ayili kuUzi kulonda amukundeji. Ilaña hiyakuhweleleli kumona yuma yawaniniwu hampinji yashikiliwuku.

² Fwikijenu chumichi. Yoba najimbeshi yuma yejima yahetayi. Nyikanka yindi yejima yawanyikoku, añombi, angameli niayimbuulu anayijahi nawa yikwawu anayiyi. Anyanindi anayijahi kushilahu niambuñindi amavulu. Nawa itala mwafwila anyana kaYoba dinahumuki nakushala kwala-a. Bayi neyi dikukala kunamwekani hohuku, niYoba yomweni namoni kañalaña. Mujimba windi wejima wudi namahuti ayeña chikupu. Kudi amayala asatu anakumutalila Yoba hahalehi iku nadineñi nawa nashakami mumawuti. Chumanyi chineliwu? Hadi mafuku 7, hiyanamuhosheshihu iwu iyala wudi muyihuñu yayeni izu hela dimuku. (Yoba 2:​12, 13) Chimunahiti mpinji, kansi weyala wejina daElihu nenzi nawa nashakami kwakwihi nanawa amayala. Nkumininaku, Yoba natachiki kuhosha nakushiña ifuku davwalikiliyi nawa nakuhosha nindi chikuwaha hohu neyi wukufwa. (Yoba 3:​1-3, 11) Mwamweni, Yoba nakukeñeka wukwashu! Nawa chumichi chinayikalili amabwambu jindi hakutachikila. Yuma yikuhoshawu awa amayala nichikuyihoshawu, chikumwekesha neyi chakwila hiyamabwambu aYoba alala nawa neyi mwamweni anakufwila kumukwasha.

3. Ichi dinu tukuhanjeka hayumanyi?

³ Yehova wamulejeli Mosi kusoneka yuma yelili niyahosheli amabwambu jaYoba asatu, kushilahu niElihu. Chinamwekani hatooka nawu mazu amakwawu ahosheliyi Elifwazi atela ayoneneni kudi kuspiritu watama. Ilaña mazu ahosheliyi Elihu ayoneneni kudi Yehova. (Yoba 4:​12-​16; 33:​24, 25) Dimuloña waweni hela chakwila mumukanda waYoba mwekala kufumba kwakuwahi nankashi, ilaña mwekala cheñi kufumba kwatama kwafumbeniwu antu. Chikuma chalema chitunateli kudizila kumukanda waYoba hikwiluka chitwatela kwila hakwila tufumbani chachiwahi. Tusambilenu kuhanjeka hadi amabwambu jaYoba asatu kulonda tudiziliku yuma yitunateli kubula kwila hela kuhosha. Kuhiñahu, tukuhanjeka hayuma yayiwahi yahosheliyi Elihu niyeliliyi. Tukudiza cheñi yuma yateleli kudizilawu aIsarela kunsañu yekala mumukanda waYoba nichitunateli kudizilaku makonu.

YOBA CHAMUFUMBILIWU KUDI AMABWAMBU JINDI ASATU

4. Muloñadi amabwambu jaYoba asatu chakañenyiwu kwila chuma chafwilileñawu? (Talenu cheñi mwevulu.)

⁴ Bayibolu yahosha nawu amabwambu jaYoba asatu ayili “nakumukwasha Yoba nikumukundeja” hanyima yakutiya yihuñu yahitileñamu. (Yoba 2:​11) Hela chochu, akañenyi kwila mwenimu. Muloñadi? Kudi yuma yisatu yaletesheli. Chatachi, ashikeneni kukunkulula mwaluwa. Chakutalilahu, atoñojokeñeleña mwaluwa nawu Yoba amubabesheleña muloña wanshidi jakoñeliyi.a (Yoba 4:7; 11:14) Chamuchiyedi, kufumba kwamufumbiliwu awa amayala hikwamukwashili hela hantiku nawa kwamukatili chikupu kumuchima. Chakutalilahu, mazu ejima ahosheleña awa amayala asatu atiyakeneña neyi amawahi ilaña ashindameneni hawunsahu walala wanyi. (Yoba 13:12) Bilidadi wamulejeli Yoba ­kayedi munjila yatama nindi waswejeli kuhosha nankashi. (Yoba 8:2; 18:⁠2) Nawa Zofari wamuhosheli Yoba kasawuntu nindi “muntu wakadi maana.” (Yoba 11:12) Chamuchisatu, hela chakwila ahosheleña nezu damwishina hampinji yahosheleñawu naYoba, munhoshelu yawu mwadiña kumubulisha maana, kumusupisha nikumwinkamu nyiloña. (Yoba 15:​7-​11) Kafwampi, awa amayala chuma chakeñeleñawu hohu hikumufwisha Yoba nanyiloña chatela amukundeji hela kukolesha chikuhwelelu chindi.

5. Yumanyi yafumini mukufumba kwamufumbiliwu Yoba kudi amabwambu jindi?

⁵ Chakadi nikujina, kufumba kwamufumbiliwu Yoba kudi amabwambu jindi asatu kwamukwashili wanyi. Yoba watiyili neyi anamuchiki namazu awu. (Yoba 19:⁠2) Munamoni chaletesheli cheñi yakeñeña kuhakwilaku ijina dindi. Chumichi chamuletesheli yatachiki kutoñojoka mwaheña nikuhosha yuma yateleleli kubula kuhoshayi. (Yoba 6:​3, 26) Amabwambu jaYoba hiyatoñojokeleña neyi chatoñojokañayi Yehovaku, nawa amutiyilili Yoba wushona wanyi. Chafuminimu, ayizatishili chikupu kudi Satana kwila nkeñelu yindi. (Yoba 2:​4, 6) Iyi nsañu yateleli kuyikwasha ñahi aIsarela, nawa yinateli kutukwasha ñahi ninetu makonu?

6. Yumanyi akulumpi muIsarela yateleli kudizilawu kuyuma yatama yeliliwu amabwambu jaYoba asatu?

⁶ Iyi nsañu chiyateleli kuyikwasha aIsarela. Hanyima yakushaku muza waIsarela, Yehova watondeli amayala ashikahu, akulumpi, kulonda asompesheña iwu muza kwesekeja nanshimbi jindi jaloña. (Kuhit. 1:​15-​18; 27:⁠1) Awa amayala akeñekeleña kutiyilila nakanañachima henohu kanda afumbani hela kusompesha. (2 Kushi. 19:⁠6) Akeñekeleña cheñi kwihula malwihu chatela atoñojokeña nawu aneluki yikuma yejima. (Kuhit. 19:18) Awa akakufumbana amuIsarela akeñekeleña kutondolwela kuhosha nakuzuwa neyi anakuhosha nawantu enjileña kudi wena nawu ayikwashi. Muloñadi? Muloña kuhosha nakuzuwa kwadi kuyikañesha awa antu kushimuna yuma yidi kumuchima wawu. (Kwid. 22:​22-​24) Chakadi nikujina, akulumpi amuIsarela adizilili kunsañu yahosha hadi Yoba, atela adizili yuma yayivulu yayikwashili.

7. Kubombela hadi akulumpi muIsarela, anyi amakwawu adiña namudimu wakufumbana, nawa nsañu yaYoba yateleli kuyikwasha ñahi? (Yishimu 27:⁠9)

⁷ Hela chochu, amayala apama hidiwu hohu afumbañeneña muIsarelaku. Kafwampi, kaIsarela wejima​—kansi hela mukulumpi, weyala hela wamumbanda​—wadiña namudimu wakukwasha ibwambu dindi wakeñekeleña kuwahishaku kudifukula kwindi, hela kumwolola neyi nakoñi chuma chatama. (Mas. 141:⁠5) Amabwambu alala adifumbaña chakufuma hamuchima muniyi njila. (Tañenu Yishimu 27:⁠9.) Yuma yatama yeliliwu amabwambu jaYoba asatu, yateleli kuyikwasha chikupu aIsarela kwiluka yuma yatela kubula kuhoshawu niyatela kubula kwilawu neyi anakufumbana.

8. Yumanyi yatama yitwatela kutondolwela neyi tunakufumbana? (Talenu cheñi nyevulu.)

⁸ Iyi nsañu chiyinateli kutukwasha ninetu. Etu akaKristu, twatela kukwasha amanakwetu niahela hampinji yinakumonawu kukala. Hela chochu hampinji yitunakwila mwenimu, twatela kutondolwela yuma yeliliwu amabwambu jaYoba asatu. Chatachi, twatela kutondolwela kushikena kukunkulula mwaluwa nawa twatela kumona kwila nawu yuma yitunakukeña kuhosha yinashindameni hawunsahu walala. Chamuchiyedi, kufumba kwetu kwatela kushindamena chikupu Hezu daNzambi bayi hayuma yitweluka yabula kwikala nawunsahu walala, neyi cheliliyi Elifazi mapampa amavuluku. (Yoba 4:8; 5:​3, 27) Chamuchisatu, twatela kutondolwela kuhosha nakuzuwa hela kuhosha munjila yakubula kumwekesha luwi. Anukenu nenu yuma yikwawu yahosheliyi Elifazi nawamabwambu jindi yadiña yalala; mazu amakwawu ahosheliwu ayisonekeli nikudi nsoneki mukwawu waBayibolu oneneniwu. (Esekejenu Yoba 5:​13 na 1 AKorinda 3:​19.) Hela chochu, yuma yayivulu yahosheliwu yamwekesheli neyi kwiji Nzambi hisakutwamba nawa yamukatili Yoba kumuchima. Dichi Yehova wahosheli nindi yuma yahosheliwu yadiña yalala wanyi. (Yoba 42:​7, 8) Neyi tufumbana chachiwahi tukumwekesha netu Yehova wayitoñojokelañaku ambuñindi nawa akwiluka nawu wayikeña. Ichi dinu tuhanjekenu yuma yitunateli kudizila kuyuma yayiwahi yeliliyi Elihu.

CHAMUFUMBILIWU YOBA KUDI ELIHU

9. Lumbululenu muloña waweni Yoba chakeñekeleleñayi wukwashu hanyima yakwila amabwambu jindi analeki kuhosha nawa nichamukwashiliwu kudi Yehova.

⁹ Hampinji Yoba niamabwambu jindi yalekeliwu kutaadeka, yuma yatela yadiña chiwahi wanyi. Mazu ahosheliwu awa amayala enzesha tupetulu 28 twamuBayibolu, nawa yuma yayivulu yahosheliwu ayihosheli nakuzuwa hela iku anahili. Tunamoni komana chaletesheli Yoba yatwalekihu kwaaba! Hela chochu, wakeñekeleña kumukundeja nikumwolola. Yehova wamukwashili ñahi Yoba? Wazatishili Elihu kulonda yamufumbi. Muloñadi Elihu chabulililiyi kushikena kuhosha? Wahosheli nindi: “Ami nidi kansi. Nawa enu amayala mudi akulumpi. Nadiwunjika muloña nayilemesha.” (Yoba 32:​6, 7) Kansi Elihu welukili chuma chelukawu antu amavulu makonu: Akulumpi anashakami yaaka yayivulu nawa aneluki yuma yayivulu, muloña wachumichi ekalaña namaana nawa elukaña yuma yayivulu muchihandilu kubadika yelukañawu atwansi. Ilaña hanyima yakumutiyilila Yoba niamabwambu jindi nakudiwunjika, Elihu hatwalekelihu kumwenaku. Wahosheli nindi: “Yaaka hohu hiyaleteshaña muntu kwikala namaanaku, hela akulumpi hidiwu elukaña yuma yaloña hohuku.” (Yoba 32:⁠9) Mazwinyi amakwawu ahosheliyi Elihu, nawa wayihosheli ñahi?

10. Yumanyi yeliliyi Elihu henohu kanda yamufumbi Yoba? (Yoba 33:​6, 7)

¹⁰ Henohu Elihu kanda yamufumbi Yoba, kudi yuma yayiwahi yasambilili kwilayi. Welili yumanyi? Chatachi, wayuulili yitoñojoka yindi. Tuneluki chumichi muloña Bayibolu yahosha nawu hakusambila Elihu wazuwili. (Yoba 32:​2-5) Hela chochu, kwosi ifuku nidimu Elihu dahanjekeliyi naYoba nakuzuwa. Ilaña, wahosheli nayena munjila yayiwahi nawa yakukolesha. Chakutalilahu, wamulejeli Yoba nindi: “Tiyaña! Ami nidi tuhu neyi eyi kumesu aNzambi walala.” (Tañenu Yoba 33:​6, 7.) Kuhiñahu Elihu wamutiyilileña Yoba nakanañachima. Kafwampi, henohu kanda yamufumbi wahitulukili muyikuma yamaneni yahosheliyi Yoba. (Yoba 32:11; 33:​8-​11) ­Elihu welili chuma chadifwanaku mpinji yikwawu hamufumbileñayi Yoba cheñi.​—Yoba 34:​5, 6, 9; 35:​1-4.

11. Elihu wamufumbili ñahi Yoba? (Yoba 33:⁠1)

¹¹ Hamufumbileñayi Yoba, Elihu wamufumbili munjila yamwekesheli nawu wamulemesheli iwu iyala washinshika. Chakutalilahu, Elihu wamuteneneña Yoba hejina, hadaha chuma chabulili kwilawu ana amayala amakwawu asatu. (Tañenu Yoba 33:⁠1.) Hadaha chanukiliyi Elihu chafwilileñayi chikupu kuhoshahu hampinji yaditaadikishileñayi Yoba nawamabwambu jindi, dichamukojejeli yamwinkeña Yoba mpinji yakuhosha hampinji yamufumbileñayi. (Yoba 32:4; 33:32) Elihu cheñi wamusoñamishili Yoba chakadi kumuhita mumbadi kutalisha hayuma yatama yinateli kufuma muyitoñojoka yindi yaheña, nawa wamwanukishili hamaana, ñovu, wuñanji nikukeña kwakashinshi kwekala naYehova. (Yoba 36:​18, 21-​26; 37:​23, 24) Chakadi nikujina, kufumba kwakuwahi kwafumbeniyi Elihu kwamukwashili Yoba kwikala namuchima wakwovwahila nshimbi jikwawu jafumineña kudi Nleñi yindi. (Yoba 38:​1-3) Yuma yayiwahi yeliliyi Elihu yateleli kuyikwasha ñahi aIsarela, nawa yinateli kutukwasha ñahi ninetu makonu?

12. Yehova wazatishili ñahi atuprofwetu kukwasha antu jindi, nawa yuma yayiwahi yeliliyi Elihu yateleli kuyikwasha ñahi aIsarela?

¹² Yuma yateleli kwilawu aIsarela hakwila yuma yelili Elihu yiyikwashi. Mumafuku ejima akuhanda kwawaIsarela, Yehova watondeleña atuprofwetu akwashileña antu kwiluka nkeñelu yindi. Chakutalilahu, mumpinji yawansompeshi, Debora diyi wenkeleña muza wunlomboli wakuspiritu, nawa Samweli, kufuma tuhu kuwansi windi wazatileña nañovu mudimu wakumuhoshelaku Yehova. (Anso. 4:​4-7; 5:7; 1 Sam. 3:​19, 20) Kuhiñahu mumafuku awanyanta, Yehova watwalekelihu kutonda atuprofwetu kulonda akolesheña antu jindi kuspiritu nikufumba antu afumineña mukudifukula kwalala. (2 Sam. 12:​1-4; Yilw. 3:​24) Yuma yayiwahi yeliliyi Elihu yasonekawu mumunkanda waYoba, yateleli kuyikwasha chikupu amayala niambanda ashinshika kwiluka yuma yatela kuhoshawu nichatela kuyihoshawu hampinji yinakufumbanawu.   

13. AkaKristu makonu atela kukolesha ñahi akwawu akakudifukula?

¹³ Iyi nsañu chiyinateli kutukwasha ninetu. Etu akaKristu, ninetu twalejaña antu nkeñelu yaNzambi kuhitila mukuyileja nsañu yekala Mwizu dindi, Bayibolu. Njila yikwawu mutwelilaña mwenimu hikuzatisha mazu amawahi akukundeja nikukolesha akwetu akakudifukula. (1 Kor. 14:⁠3) Sweje-e akulumpi atela kwiluka kulema kwakuhosha nawamanakwawu niahela munjila ‘yakukundeja,’ kushilahu ninowu anahili hela anakuhosha “mazu akutuboka.”​—1 Tes. 5:​14; Yoba 6:⁠3.

14-15. Shimunenu chakutalilahu chinakumwekesha mukulumpi chinateli kumwimbujolayi Elihu neyi nakufumbana.

¹⁴ Fwikijenu chumichi. Mukulumpi neluki nindi muhela wumu muchipompelu chawu nakukabakana nachineñi. Iwu mukulumpi neli chuma chachiwahi, nayi hamu namanakwetu mukwawu nakumuhempula iwu muhela kulonda amukoleshi. Hampinji yidiwu kweniku, muhela nayileji yuma yinakumuneñesha. Nayileji nindi hela chakwila wayaña nakupompa nikushimwina, ilaña muzañalu wudana. Hanu dinu iwu mukulumpi wukwila ñahi?

¹⁵ Chatachi, wukusambila kwiluka yuma yayeni yinakuletesha iwu muhela aneñeña. Hakwila yeluki yumiyi, watela kutiyilila nakudiwunjika. Komana iwu muhela nakutoñojoka nindi washikilamu wanyi kumukeña kudi Nzambi? Komana “[kwakama] kwamuwumi” dikunakumuzeyesha? (Luka 21:34) Chamuchiyedi, iwu mukulumpi wukumona munakwilayi chiwahi iwu muhela kulonda yamuhameki. Muloña hela chakwila nakukabakana nachineñi, natwalekihu kupompa nikuya nakushimwina. Nawa chamuchisatu, mukulumpi chelukayi kukala kwejima kukwetiyi iwu muhela niyuma yinakuletesha yaneñeña, wukuzatisha Bayibolu kulonda yamukwashi kukuhwelela chikupu nindi amukeña kudi Nzambi.​—Ñal. 2:​20.

TWALEKENUHU KUDIZA YUMA YALEMA YEKALA MUMUKANDA WAYOBA

16. Yumanyi yitwatela kwila hakwila tutwalekihu kudiza yuma yalema yekala mumukanda waYoba?

¹⁶ Mwamweni, kudi yuma yayivulu yitunateli kudizilaku neyi tudizaña nsañu yekala mumukanda waYoba! Neyi chitwadizili muchibaaba chinafumihu, iyi nsañu yonenewa yatukwashaña kwiluka muloña waweni Nzambi chetejelayi makabi nichitunateli kuumika. Nawa neyi chitunahanjekihu muchinu chibaaba, wejima wetu tunateli kwiluka chakufumbana chiwahi neyi tubulaña kulondela yuma yatama yeliliwu amabwambu jaYoba asatu, ilaña tulondelaña yuma yayiwahi yeliliyi Elihu. Mumafuku adi hambidi, komana kwila muhituluka muyuma yimunadizi mumukanda waYoba henohu kanda muyi nakufumba akwenu nehi? Nawa neyi yaaka yinakotoki kufuma himwatañilili mukanda Yoba, dimikilenu chikonkwanyi chakutaña cheñi iwu mukanda wukweti nsañu yalema. Chakadi nikujina, mukudizilaku yuma yikwawu yalema yidi muniwu mukanda.