Enu Munakuli Dehi, Mwakwashaña Chipompelu muNjila Jajivulu
“Neyi nanuka, inakuhayama yuma yinatwesheleña kwila hinachidiña kansi. Ilaña ichi muloña wakukula, inakutwesha wanyi kwila yuma yinelileña.”—A Connie, adi nayaaka 83.
Hadaha ninenu muloña wakukula kumujimba himunakutwesha kwila yuma yikwawu yimwelileñaku. Hela chakwila munamukalakeli Yehova nakashinshi hadi yaaka yayivulu, munateli kudimona amukunkulwayi muloña wakukala kunakuyikañesha chayinu mpinji. Chakutalilahu, munateli kutachika kwesekeja yuma yimunakwila chayinu mpinji nayimwelileña kunyima. Neyi dichuma chinakuyimwekena, yumanyi yimwatela kwila hakwila mukañeshi yitoñojoka yamuchidiwu?
CHUMA CHAKEÑAÑAYI YEHOVA NINDI MWILI
Dihulenu nenu, “Chumanyi chakeñañayi Yehova nindi niili? Mazu ekala haKuhituluka 6:5 anateli kuyikundeja, ahosha nawu: “Watela kukeña Yehova Nzambi yeyi namuchima weyi wejima ninawumi weyi wejima ninañovu jeyi jejima.”
Kwesekeja naniyi vasi, Yehova wakeñaña nindi mumukalakeleña kwesekeja nahanakumini ñovu jenu. Kwiluka chumichi kukuyikwasha kutondolwela kudesekeja nawakwenu—hela kwesekeja yuma yimunakwila chayinu mpinji nayuma yimwelileña kunyima.
Toñojokenu hachumichi: Himwachidiña kansi, chumanyi chimwamwililileña Yehova? Antu jaYehova amavulu anateli kuhosha nawu amukalakeleleña hakumina ñovu jawu. Munateli kuhosha nenu mwamukalakeleleña hakumina ñovu jenu kwesekeja nachadiña yuma muchihandilu chenu hayina mpinji. Chumanyi chimunakumwinka Yehova chayinu mpinji? Munakumukalakela cheñi hakumina ñovu jenu chayinu mpinji, kwesekeja nachidi yuma muchihandilu chenu. Neyi mumonaña yuma muniyi njila, mukukunkulula nenu munakumukalakela Yehova hakumina ñovu jenu neyi chimwamukalakeleleña kunyima. Mwamukalakeleleña hakumina ñovu jenu kunyima, nawa nichayinu mpinji munakumukalakela hakumina ñovu jenu.
Mwamukalakeleli Yehova hakumina ñovu jenu himwachidiña kansi, nawa munakumukalakela hakumina ñovu jenu hampinji yimunakuli
MUNATELI KUKWASHA CHIKUPU ANTU AMAKWAWU
Talenu chuma chikwawu: Chatela mutoñojokeña nenu wushinakaji wunakuyikañesha kuzata nañovu, monenuña kushinakaja nenu hikukooleka kumukweti kwakukwashilamu antu amakwawu. Chalala, chineli mudi mukaKristu wakula dehi, kudi yuma yikwawu yimunateli kwila chayinu mpinji yimwadi kukañanya kwila himwachidiña kansi. Chakutalilahu, munateli kwila yuma yinalondelihu:
Lejenuku akwenu yuma yimunadizi muchihandilu. Toñojokenu hanawa mazu analondelihu asonekawu muBayibolu:
Mwanta Davidi: “Nadiñi kansi nawa ichi nakuli, ilaña kanda nimoneñahu dehi muntu waloña anamushiyi chisayikila, hela anyanindi anakuya nakulombalomba dinkendiku.”—Mas. 37:25.
Yoshuwa: “Dichi talenu! Ami keña nifwi, nawa muneluki chikupu namuchima wenu wejima ninawumi wenu wejima nenu kwosi izu nidimu dahayikaninu yayiwahi yejima dayilejeliyi Yehova Nzambi yenu dinabuli kushikijewaku. Ejima anashikijewi hadi enu. Kwosi izu nidimu dinabuli kushikijewaku.”—Yosh. 23:14.
Hadaha ninenu mwahoshahu dehi mazu amuchidawa. Davidi niYoshuwa wejima wawu ayedi ahosheli yuma yadimweneniwu namesu kapu. Muloña awa ambuña aYehova ashinshika ahosheli yuma yadimweneniwu nikutiya hanyima yakushinshika yumiyi hadi yaaka yayivulu, yuma yahosheliwu mwadiña maana chikupu.
Neyi munamukalakeli Yehova hadi yaaka yayivulu, ninenu mukweti yuma yayiwahi yimwatela kuhosha yinayimwekeni muchihandilu chenu muloña wakumukalakela. Kudihu mpinji yayiwahi yimunakwanuka yimwamweni Yehova chakiswililiyi antu jindi? Neyi yidi kwoku, munateli kulejaku akwenu yuma yayiwahi yamwekeni! Chumichi chinateli kuyizañalesha, neyi chochimuneluki. Munjila yoyimu, neyi amanakwenu niahela atiya yuma yayiwahi yinayimwekeni muchihandilu chenu, mukuyikolesha nankashi.—Rom. 1:11, 12.
Njila yikwawu yimunateli kuyikoleshelamu amanakwenu niahela hikuya nakupompela hamu nawu Kwitala daWanta, kwesekeja nahanakumini ñovu jenu. Neyi mwilaña mwenimu, mukuyikoleshaña akwenu akakwitiya ninenu aweni. A Connie, ashimunawu hakusambila, ahosheli nawu: “Kuya nakupompa Kwitala daWanta kwankwashaña kubula kwikala nachineñi. Nateli kwikala ñahi nachineñi neyi nitoñojoka hakukeña kwejima kwammwekeshelañawu neyi niya Kwitala daWanta? Namwekeshaña muchima wakusakilila kuhitila mukwinka amanakwetu niahela yawaana yanyanya. Nawa natwalekañahu kuzata nyidimu yakuspiritu hamu nawamanakwami niahela kwesekeja nahanakumini ñovu.”
YEHOVA WALEMESHA CHIMWAMUKALAKELAÑA NAKASHINSHI
MuNsona mwekala yakutalilahu yawantu amavulu akañenyeña kuzata kwesekeja nachakeñeleñawu muloña wanochu chadiña yuma muchihandilu chawu, ilaña Yehova wayikeñeli. Talenu chuma chamumwekeneni Simiyoni, kaIsarela wakula dehi, wadiñaku mumpinji yavwalikiliyi Yesu. Hampinji yayileñayi kutembeli, chakadi nikujina wamweneña atwansi chakalakeleñawu nyidimu yalema hatembeli. Indi Simiyoni wadi kudimonaña ñahi yomweni? Kwesekeja nammwenu yawuntu, wadi kutoñojokaña nindi walema wanyi kumesu aYehova. Ilaña Yehova wamweneña yuma munjila yaambukaku. Wamumweni Simiyoni nindi “wadiña waloña nawa wamwakama Nzambi” nawa wamukiswilili kuhitila mukumwinka kukooleka kwakumona Yesu hadiñayi mukeki. Yehova wamuzatishili cheñi Simiyoni kuprofweta nindi Yesu diyi wakekala Mesiya kumbidi! (Luka 2:25-35) Chakadi nikujina, Yehova hashili muchima hawushinakaji waSimiyoniku, ilaña wamumweneña nindi hiiyala wukweti chikuhwelelu chakola, “nawa spiritu yajila yadiña hadi yena.”
Yehova wamukiswilili Simiyoni kuhitila mukumwinka kukooleka kwakumona mukeki Yesu nikuprofweta kutalisha hadi yena nindi wakekala Mesiya kumbidi
Ninenu mwatela kukuhwelela nenu Yehova watiyaña kuwaha chimwamukalakelaña nakashinshi hela chakwila kudi kukala kumunakumona. Muloña yena “wetejaña hohu chawaana chahanañayi muntu kufuma hamuchima. . . , bayi chikubula kutweshayiku.”—2 Kor. 8:12.
Muloña wachumichi, shenuña hohu muchima hayuma yimukutwesha kwila. Chakutalilahu, toñojokenu hanjila jakushimwinamu jinateli kuyipelela, hela chakwila mukushimwina hadi kapinji kantesha hohu. Cheñi, munateli kukolesha amanakwenu niahela kuhitila mukuyitemeshela foni hela kaadi himunasoneki tumazu twantesha. Neyi muyilila akwenu akakwitiya yuma yanyanya yinakumwekesha nawu mwayikeña, munateli kuyikolesha sweje-e neyi enu anamukalakeli Yehova hadi yaaka yayivulu, iyenu munakwila yumiyi.
Antu amakwawu alwishaña nakukala kumujimba. Talenu chuma chamwekeni kuEast Africa chinashimuniwu muchikasha chidi muchinu chibaaba chinakuhosha nawu “Bayibolu Yamwinini Wumi Waniwu Mumbanda.”
Anukenu nenu chakutalilahu chenu chachiwahi chakumukalakela Yehova hadi yaaka yayivulu nakashinshi, chinateli kukolesha antu nankashi. Chakutalilahu chenu chakuumika chinateli kukwasha amanakwenu niahela kuumika, nawa kuhwelelenu nenu “Nzambi waloña nawa hakavulamena mudimu wenu nikukeña kumwakeñeli ijina dindiku, nachimwakalakeleli akakujila nichimunatwalekihu nakuyikalakela.”—Heb. 6:10.
TWALEKENUHU KUZATA HAKUMINA ÑOVU JENU
Kusandujola kwakuvulu kwamwekeshaña nawu antu anakuli dehi nawa akwashaña akwawu antu, ekalaña akola kumujimba, atoñojokaña chiwahi nawa ashakamaña yaaka yayivulu.
Hela chochu, kwila yuma yayiwahi kunateli kumukañesha wanyi muntu kumona kukala kwenzaña muloña wawushinakaji. Wanta waNzambi hohu diwakela chumichi kuhitila mukufumishahu chuma chacheni chakojejaña tushinakajeña nikufwa, dikwila nawu wakafumishahu nshidi yitwaswana.—Rom. 5:12.
Ilaña mudimu wumwamukalakelaña Yehova, mwabombela kukwasha antu kulonda amwiluki, wayikwashaña enu kwikala nakuchiñeja kwakola nawa wunateli cheñi kuyikwasha kwikala akola kumujimba. Enu mwakula dehi, mwani ilukenu nenu Yehova walemesha chimwamukalakelaña hakumina ñovu jenu mumudimu windi nawa nenu chipompelu chasakililaña hachikuhwelelu chimukweti.