22 Bende, jondiko ma ne olor koa Jerusalem ne wacho niya: “En gi Belzebub* kendo ogolo jochiende kotiyo gi teko mar jatend jochiende.”+ 23 Omiyo, bang’ luongogi ire, nowuoyo kodgi gi ngeche kama: “Ere kaka Satan nyalo golo Satan? 24 Ka pinyruoth obedo gi ywaruok e kinde owuon, pinyruodhno ok nyal chung’;+ 25 kendo ka ot nigi ywaruok ok obi chung’. 26 Bende, ka Satan kedo e kinde owuon mobedo gi ywaruok, ok onyal chung’, to ochomo e gikone. 27 Kuom adier, onge ng’at ma nyalo donjo ei od ng’at ma ratego mi oyak gige mak mana ka okwongo otueyo ng’atno. Bang’ mano eka onyalo yako ode.

15 To jomoko kuomgi nowacho niya: “Jali golo jochiende kotiyo gi teko Belzebub,* jatend jochiende.”+ 16 To mondo giteme, jomoko noramo ni mondo omigi ane ranyisi+ moa e polo. 17 Nikech nong’eyo gima ne giparo,+ nokonegi niya: “Pinyruoth ma nigi ywaruok, kethore, kendo ot ma nigi ywaruok, podho. 18 Kamano bende, ka Satan nigi ywaruok e kinde owuon, ere kaka pinyruodhe biro chung’? Nimar uwacho ni agolo jochiende ka atiyo gi teko mar Belzebub. 19 Ka agolo jochiende ka atiyo gi teko mar Belzebub, un to jou gologi gi teko mar ng’a? Mano e momiyo gining’adnu bura. 20 To ka agolo jochiende ka atiyo gi lwet+ Nyasaye, adier, Pinyruodh Nyasaye osebironu kukia.+ 21 Ka ng’at ma ratego momanore gi gige lweny rito ode, onge ng’at ma ketho gige. 22 To ka ng’at ma ratego moloye obiro mi omonje kendo loye, ng’atno maye gige duto mag lweny ma nyocha ogeno, kae to opogo ji gik moseyako kuome. 23 Ng’at ma ok ni kora, kedo koda, to ng’at ma ok chok ji koda, keyogi.+