29 Sa ma ne giwuok Jeriko, oganda mang’ongo noluwe. 30 Ji ariyo ma muofni ma nobet e bath yo nowinjo ka Yesu kalo mi ne gikok matek niya: “Ruoth, Wuod Daudi, kechwa!”+ 31 Oganda nokwerogi matek ni giling’, to ne gimedo kok matek niya: “Ruoth, Wuod Daudi, kechwa!” 32 Omiyo, Yesu ne ochung’ moluongogi kendo nopenjogi niya: “Ang’o mudwaro ni atimnu?” 33 Ne gidwoke kama: “Ruoth, wadwaro ni wengewa oyawre.” 34 Yesu nokechogi, kendo nomulo wengegi+ mi gikanyono wengegi noyawore, kendo ne giluwe.

35 Koro ka Yesu ne chiegni gi Jeriko, ng’at moro ma muofu noyudo obet e bath yo ka okuecho.+ 36 Nikech nowinjo koko mar ji mang’eny ka kadho, nopenjo gima ne dhi nyime. 37 Ne gidwoke kama: “Yesu Ja-Nazareth e ma kadho!” 38 Omiyo, nokok niya: “Yesu, Wuod Daudi, kecha!” 39 Jo ma notelo nyime nokwere matek mondo oling’, to en nomedo kok matek niya: “Wuod Daudi, kecha!” 40 Eka Yesu ne ochung’, kendo nochiko mondo okelne ng’atno. Ka ng’atno nochopo ir Yesu, nopenje niya: 41 “Ang’o midwaro ni atimni?” Nodwoke kama: “Ruoth, yaw wengena onen kendo.” 42 Omiyo, Yesu nowachone niya: “Wang’i mondo onen kendo; yieni osechangi.”+ 43 Eka gikanyono, wengene noyawore, kendo noluwo Yesu+ komiyo Nyasaye duong’. Ka ji duto noneno mano, ne gipako Nyasaye.+