Ezekiel
28 Wach Jehova nobirona kendo niya: 2 “Wuod dhano, wach ne ruodh Turo kama, ‘Ma e gima Jehova Wuon Loch Duto owacho:
“Chunyi opong’ gi sunga+ e momiyo isiko iwacho ni, ‘An nyasaye.
Abet e kom-loch nyasaye e chuny nam.’+
Ok in nyasaye, to in mana dhano,
Kata obedo ni chunyi wuondi ni in nyasaye.
3 Ne! Iriek moloyo Daniel.+
Onge wach ma ling’ling’ mosepandni.
4 Riekoni kod lony ma in-go osemiyo ibedo mowewo,
Kendo isemedo dhahabu gi fedha e uteni mag keno.+
5 Ne iloko ohala gi rieko, miyudo mwandu mathoth,+
Kendo mwandunigo nomiyo ibedo gi sunga e chunyi.”’
6 “‘Kuom mano, ma e gima Jehova Wuon Loch Duto owacho:
“Nikech chunyi wuondi ni in nyasaye,
7 Akelo ogendni makwiny mondo oked kodi,+
Gibiro wuodho ligangla maggi mondo giketh berni kod riekoni.
Kendo ginidwany duong’ ma in-go.+
8 Gibiro lori nyaka e liel,
Kendo initho tho marach e chuny nam.+
9 Be pod ibiro nyiso ng’at ma negi ni, ‘An nyasaye’?
Inibed mana dhano, to ok nyasaye e lwet jo ma dwanyo duong’ ma in-go.”’
10 ‘Ibiro tho ka jo ma ok oter nyangu, e lwet jo ma oa e ogendni mamoko,
Nimar an awuon e ma asewacho,’ Jehova Wuon Loch Duto owacho.”
11 Wach Jehova nobirona kendo niya: 12 “Wuod dhano, wer ne ruodh Turo wend ywagruok, kendo inyise ni, ‘Ma e gima Jehova Wuon Loch Duto owacho:
13 Ne in e Eden, puodho mar Nyasaye.
Ne obidhi gi kite ma nengogi tek
Rubi, topaz, kod jaspa; krisolait, oniks, gi jade; safir, tarkois,+ kod emerald;
Ne oket kitego e gik molos gi dhahabu.
Gigo ne olos chieng’ ma ne ochueyie.
14 Ne awali mondo ibed kerubi ma tiyo tij umo.
Ne in e got maler mar Nyasaye,+ kendo ne iwuotho e kind kite maliel.
15 Ne ionge ketho chakre chieng’ ma ne ochueyie
Nyaka chieng’ ma tim ma ok kare ne oyud kuomi.+
Omiyo, abiro goli e god Nyasaye kendo kethi,+
Yaye in kerubi ma tiyo tij umo, kendo ma wuotho e kite maliel.
17 Ne isungori e chunyi nikech ber mari.+
Duong’ ma ne in-go ne omiyo injawo riekoni.+
Abiro witi e piny.+
Abiro miyo ruodhi duto oneni.
18 Ne idwanyo kuondeni maler gi richoni madongo kod ohelni ma ne opong’ gi mibadhi.
Abiro moko mach kuomi, mi majno nowang’i pep.+
Abiro loki buru e nyim ji.
19 Ji duto ma ne ong’eyi biro bwok ka gineno gima otimoreni.+
Gikoni nobi apoya kendo nobed malit,
Kendo ok inichak ichung’ ngang’.”’”+
20 Wach Jehova nobirona kendo niya: 21 “Wuod dhano chom wang’i ing’i Sidon,+ kendo ikorne gima biro timorene. 22 Ibiro wacho kama, ‘Ma e gima Jehova Wuon Loch Duto owacho:
“Yaye Sidon, amon kodi, to anayud duong’ e dieru;
Kendo ji biro ng’eyo ni an Jehova e kinde ma abiro kethie, kendo nyiso ni an e Nyasaye maler.
23 Abiro orone tuoche kendo remo biro mol e yorene.
Joge biro tho koni gi koni gi ligangla;
Mi gining’e ni an e Jehova.+
24 “‘“Eka jogo mokiewo gi Jo-Israel ok nobednegi kendo kaka oriang’ kod kuthe ma chuopo malit,+ kendo ok ginijargi; mi ji biro ng’eyo ni an e Jehova Wuon Loch Duto.”’
25 “‘Ma e gima Jehova Wuon Loch Duto owacho: “Ka asechoko Jo-Israel kuom ogendni ma gikeree,+ ogendnigo biro ng’eyo ni an e Nyasaye maler.+ Jo-Israel biro dak e piny ma ne amiyo jatichna ma Jakobo.+ 26 Ginidag kuno gi kuwe,+ giniger udi, kendo pidho puothe mzabibu.+ Ginidag gi kuwe chieng’ ma ang’ado bura ne ogendni mokiewo kodgi ma ne jarogi;+ mi gining’e ni an e Jehova Nyasachgi.”’”