Joshua

10 Ka ne Adonizedek ruodh Jerusalem owinjo ni Joshua osekawo piny Ai moketho chuth, kendo ni notimo ne Ai gi ruodhe+ mana kaka ne osetimo ne Jeriko gi ruodhe,+ kendo ka nowinjo ni Jo-Gibeon oseloso kuwe gi Jo-Israel+ kendo gidak e kind Jo-Israel, 2 nobuok ahinya,+ nimar Gibeon ne en dala maduong’ mana ka dala ma ruoth lochoe. Ne oduong’ moloyo Ai,+ kendo chwo duto ma ne ni kuno ne gin jolweny. 3 Omiyo, Adonizedek ruodh Jerusalem nooro ote ne Hoham ruodh Hebron,+ gi Piram ruodh Jarmuth, gi Jafia ruodh Lakish, kendo ne Debir ruodh Eglon,+ kowachonegi niya: 4 “Biuru mondo ukonya kedo gi Jo-Gibeon, nimar giseloso kuwe gi Joshua kod Jo-Israel.”+ 5 Kuom mano, ruodhi abich mag Jo-Amor,+ ma noriwo ruodh Jerusalem, ruodh Hebron, ruodh Jarmuth, ruodh Lakish, kod ruodh Eglon nochokore gi jolwenjgi ma gidhi ma gilworo Jo-Gibeon mondo gimonjgi.

6 Omiyo, Jo-Gibeon nooro wach ne Joshua e kambi ma ne ni Gilgal+ niya: “Wan wasumbnini, wakwayi ni kik ijwang’wa.+ Bi piyo! Bi piyo mondo ireswa kendo ikonywa nimar ruodhi mag Jo-Amor oseriwore mondo gimonjwa.” 7 Kuom mano, Joshua nowuok Gilgal gi jolweny duto ma roteke.+

8 Eka Jehova nowacho ne Joshua niya: “Kik iluorgi,+ nimar aseketogi e lweti.+ Onge kata achiel kuomgi ma biro kedo kodi maloyi.”+ 9 Joshua nowuotho otieno mangima koa Gilgal, mopoyogi. 10 Jehova nomiyo wasigu ochochni e nyim Jo-Israel,+ kendo jolwenj Israel nonego wasigu mang’eny ka gin Gibeon. Ne gilawogi ka giidho kodgi Beth-horon, kendo ne gimedo negogi nyaka Azeka gi Makeda. 11 Sa ma wasigugo ne ringo ka Jo-Israel lawogi e orido rido mar Beth-horon, Jehova ne oolo pe madongo dongo kuomgi monegogi chakre kanyo nyaka Azeka. Adier, jo ma ne pe onego ne ng’eny moloyo jo ma ne Jo-Israel onego gi ligangla.

12 Kinde ma Jehova ne onegoe Jo-Amor ka Jo-Israel neno gi wang’gi, e ma Joshua nowachoe ne Jehova ka Jo-Israel winjo niya:

13 Omiyo, chieng’ ne ochung’ tir kendo dwe ne ok osudo nyaka Jo-Israel notieko chulo kuor ne jowasikgi. Donge wechego ondik e bug Jashar?+ Chieng’ nochung’ tir e kor polo ma ok opodho odiechieng’ mangima. 14 Odiechieng’ ma kamano ne pok one nyaka nene kendo ne ok ochak one bang’e, nimar Jehova ne kedo ne Jo-Israel.+ Ne pok one ka Jehova owinjo dhano+ e yo ma kamano.

15 Bang’ mano, Joshua gi jolweny mage duto ne odok e kambi man Gilgal.+

16 To ruodhi abichka noringo modhi opondo Makeda e rogo moro.+ 17 Mi nonyis Joshua niya: “Ruodhi abichka oyud kopondo Makeda e rogo moro.”+ 18 Omiyo, Joshua nowachonegi niya: “Ng’ieluru kite madongo e dho burno, kendo uket jomoko mondo oritgi kik giringi. 19 Kata kamano, jo modong’ to kik chung’. Lawuru wasiku kendo uneggi.+ Kik uwe gidonj e miechgi, nimar Jehova Nyasachu oseketogi e lwetu.”

20 Joshua gi Jo-Israel nonego wasikgi ka gima gitiekogi, mi odong’ mana jo manok ma ne otony modonjo e miechgi mochiel motegno. 21 Bang’ mano, ji duto ne odok ir Joshua e kambi man Makeda maonge kata ng’ato achiel kuomgi mohinyore. Kendo onge ng’ato ang’ata ma ne otemo ting’o dhoge ka wacho gima rach e wi Jo-Israel. 22 Eka Joshua nowacho niya: “Yawuru rogo mondo ukelna ruodhi abichka.” 23 Omiyo, ne gigolo ruodhi abichgo e rogo ma giterogi ir Joshua. Ruodhigo ne gin: ruodh Jerusalem, ruodh Hebron, ruodh Jarmuth, ruodh Lakish, gi ruodh Eglon.+ 24 Ka ne gisetero ruodhigo ir Joshua, Joshua noluongo jolweny duto ma Jo-Israel monyiso jotendgi ma ne odhi kode e lweny niya: “Suduru machiegni. Nyonuru ng’ut ruodhigi gi ka tokgi.” Omiyo, ne gibiro ma ginyono ng’ut ruodhigo.+ 25 Kae to Joshua nonyisogi niya: “Kik uluor kendo kibaji kik gou.+ Beduru gi chir kendo gi teko, nimar kama e kaka Jehova biro timo ne wasigu duto mubiro kedogo.”+

26 Eka Joshua nogoyogi monegogi, kendo nolierogi e wi yiende abich moweyogi kanyo nyaka odhiambo. 27 Ka chieng’ ne chiegni podho, Joshua nochiko mondo ogolgi e wi yien+ kae to obolgi e i rogo ma ne gipondoecha. Bang’ mano ne gidino dho rogono gi kite madongo dongo. Kendo kitego pod ni kanyo nyaka kawuononi.

28 Joshua nokawo Makeda+ odiechieng’no, kendo ne onego jo ma ne ni kuno gi ligangla. Ne onego ruodhe gi ji duto ma ne nie iye, kendo onge kata mana ng’at achiel ma ne otony.+ Notimo ne ruodh Makeda+ mana kaka notimo ne ruodh Jeriko.

29 Eka Joshua kaachiel gi Jo-Israel duto nowuok Makeda ma gidhi Libna ma gikedo gi Jo-Libna.+ 30 Kendo Jehova noketo Libna gi ruodhe+ e lwet Jo-Israel ma ginego ji duto ma ne ni Libna gi ligangla, kendo onge kata mana ng’at achiel ma ne otony. Kuom mano, ne gitimo ne ruodh Libna mana kaka ne gitimo ne ruodh Jeriko.+

31 Bang’ mano, Joshua kaachiel gi Jo-Israel nowuok Libna ma gigoyo kambi Lakish,+ kendo ne gikedo gi Jo-Lakish. 32 Jehova noketo Lakish e lwet Jo-Israel, kendo ne gikawo pinyno e odiechieng’ mar ariyo. Ne ginego ji duto ma ne ni kuno gi ligangla+ mana kaka ne gitimo ne Libna.

33 Horam ruodh Gezer+ nodhi konyo Jo-Lakish, kata kamano, Joshua ne onege kaachiel gi joge duto ma onge kata mana ng’at achiel kuomgi ma ne otony.

34 Eka Joshua kaachiel gi Jo-Israel nowuok Lakish ma gigoyo kambi Eglon,+ kendo ne gikedo gi Jo-Eglon. 35 Ne gikawo Eglon mi ginego ji duto ma ne ni kuno gi ligangla, mana e odiechieng’no. Ne gitimo ne Eglon mana kaka ne gitimo ne Lakish.+

36 Bang’e, Joshua kaachiel gi Jo-Israel duto nowuok Eglon ma gigoyo kambi Hebron,+ kendo ne gikedo gi Jo-Hebron. 37 Ne gikawo Hebron ma ginego ji duto ma ne ni kuno gi ligangla. Ne ginego ruodh Hebron gi ji duto ma ne ni kuno moriwo nyaka jo ma ne odak e taonde molworogi, ma onge kata mana ng’at achiel kuomgi ma ne otony. Ne onego ji duto ma oketho pinyno mana kaka ne otimo ne Eglon.

38 Gikone, Joshua kaachiel gi Jo-Israel duto nodhi Debir+ ma gikedo kodgi. 39 Ne okawo Debir gi taonde duto molwore monego ruodhe gi ji duto ma ne odak kuno gi ligangla,+ ma onge kata mana ng’at achiel kuomgi ma ne otony.+ Ne otimo ne Debir gi ruodhe mana kaka ne otimo ne Hebron gi Libna gi ruodhigi.

40 Joshua noloyo piny duto motimo gode, piny Negeb, piny Shefela,+ kod piny motimo gode, kendo ne onego ruodhigi duto kaachiel gi ji duto ma ne ni kuno ma onge kata mana ng’at achiel kuomgi ma ne otony;+ ne onego gimoro amora mangima mana kaka Jehova Nyasach Israel ne ochiko.+ 41 Joshua noloyo pinjego chakre Kadesh-barnea+ nyaka Gaza,+ gi piny Goshen+ duto nyaka Gibeon.+ 42 Joshua nomako ruodhigo duto mokawo pinjegi e lweny achielno, nimar Jehova Nyasach Israel e ma ne kedo ne Israel.+ 43 Kae to Joshua kaachiel gi Jo-Israel duto nodok e kambi ma ne ni Gilgal.+