Ayub
3 Be obiro hombi gi weche mang’eny,
Koso be dowuo kodi mos?
4 Be dulos kode winjruok
Mondo obed misumbani nyaka chieng’?
5 Be inyalo tugo kode kaka ditug gi winyo,
Koso be ditweye mondo nyithindi ma nyiri otug kode?
6 Be jo ohala digo nengone?
Koso be digiyang’e mondo gipogre ringe?
7 Be inyalo chwo pien dende gi tong’+
Koso be inyalo chwo wiye gi bidhi minegogo rech?
8 Tem ane kedo kode;
Wiyi ok nowil gi lwenyno mi ok nichak imule kendo!
9 Temo make en tich manono.
Nene anena kende biro goyi nyang’eng’.
10 Onge ng’ato ma dihedhre kwinye.
To koro ng’ano ma dichung’ e nyime?+
11 Be nitie ng’at mosemiya gimoro ma dwarore ni aduokne?+
Gimoro amora manie bwo polo en mara.+
12 Abiro wuoyo bende e wi tiendene,
Abiro wuoyo e wi tekone kod dende mochuere maber.
13 Ng’ano mosetemo dang’o piene?
Sa ma ong’amo dhoge, ng’ano ma ditem donjoe?
14 Be nitie ng’at ma diyaw dhoge?
Lekene moruowo lich miwuoro.
15 Dier ng’eye otimo kalagakla moriedo
Kendo gitwere kanyachiel.
16 Moro ka moro ochomore kuom wadgi matek
Ma kata mana muya ok nyal kadho e kindgi.
17 Moro ka moro opadore kuom nyawadgi;
Gimakore matek ma ok nyal poggi.
18 Ka ogir* to ler e ma rieny,
Kendo wengene chalo pilni mar ler mokinyi.
19 Ligek mach wuok e dhoge
Kod pilni mach ma kakni.
20 Yiro dhuolore ka wuok e ume,
Mana ka yich togo miwang’o.
21 Muche moko mach,
Kendo ligek mach wuok e dhoge.
22 Ng’ute tek ta,
Kendo ng’ato ang’ata moromo kode buok ahinya.
23 Pien bund iye otegno sidang’;
Ochalo chuma, kendo onge ng’at ma nyalo dang’e.
24 Chunye tek ka lwanda,
Ee, chunye tek mana ka pong’ rego.
25 Ka oa malo, kata mana jo ma rateke bedo maluor;
Sa ma okeyo pi, ogoyo ji nyang’eng’.
26 Onge ligangla ma nyalo chwoye;
Bed ni en tong’ kata asere.+
27 Chuma yom yomne mana ka tiang’,
Kendo mula be chalone mana ka yien motop.
28 Asere ok mi oringi;
Kendo kite mibayego chalone mana mihudhi.
29 Arungu to chalone mana tiang’,
Kendo ka ji baye gi tong’ to onyiero anyiera.
30 Bwoye chalo gi balategni ma bitho;
Oriere e chuodho mana ka gir dino bel.+
31 Omiyo nam yienyo mana ka dakuon;
Kendo omiyo opapni mana ka aguch mo.
32 Koringo e nam, ndache lokore rachar.
Kendo omiyo ng’ato paro ni pi otimo lwar.
33 Onge gima inyalo pimego e piny,
Nochueye mondo kik oluor gimoro amora.
34 Wang’e ok oluoro le duto ma roteke.
En e ruodh le duto mag bungu.”