JONG’AD BURA

1 Bang’ tho Joshua,+ Jo-Israel nopenjo Jehova niya:+ “En dhoot mane mabiro kwongo dhi kedo gi Jo-Kanaan?” 2 Jehova ne odwokogi niya: “Dhood Juda e ma biro dhi.+ Neuru, achiwo pinyno e lwetgi.” 3 Eka Jo-Juda nowacho ne owetegi ma Jo-Simeon niya: “Terwauru e piny mosepognwa+ mondo waked gi Jo-Kanaan kae to wan bende wabiro terou e piny mosepognu.” Omiyo, Jo-Simeon ne odhi kodgi.

4 Ka ne Jo-Juda odhi monjo pinyno, Jehova ne ochiwo Jo-Kanaan gi Jo-Perizi e lwetgi+ mi ne giloyo chwo 10,000 e dala mar Bezek. 5 Sa ma ne gikedo gi Jo-Kanaan+ gi Jo-Perizi+ ne giyudo Adonibezek e dala mar Bezek kendo ne gikedo kode kuno. 6 Ka ne Adonibezek oringo, ne gilawe mi gimake kendo ne ging’ado lith lwetene mathuon gi lith tiendene mathuon. 7 Adonibezek nowacho niya: “Nitie ruodhi 70 ma lith lwetgi mathuon gi lith tiendgi mathuon ong’adi kendo gikwanyo chiemo molwar e bwo mesana. Nyasaye osechula mana gima ne atimo.” Bang’ mano, ne gitere Jerusalem+ kendo kuno e ma ne othoye.

8 E wi mano, Jo-Juda ne okedo gi Jerusalem+ mi gikawe. Ne ginego jo ma ne ni kuno gi ligangla, mi giwang’o dalano gi mach. 9 Bang’ mano, Jo-Juda ne odhi monjo Jo-Kanaan ma ne odak e piny gode, gi ma ne odak e piny Negeb, gi piny Shefela.+ 10 Kendo Jo-Juda ne odhi mokedo gi Jo-Kanaan ma ne odak Hebron (chon ne iluongo Hebron ni Kiriath-arba), mi ne giloyo Sheshai gi Ahiman kod Talmai.+

11 Ka ne gia kanyo, ne gidhi monjo jo ma ne odak Debir.+ (Chon ne iluongo Debir ni Kiriath-sefer.)+ 12 Kae to Kaleb+ nowacho niya: “Ng’at modhi kedo gi Kiriath-sefer mokawo pinyno, abiro miye Aksa nyara mondo obed chiege.”+ 13 Othniel+ wuod Kenaz+ ma owadgi Kaleb matin ne okedo gi Kiriath-sefer mokawo pinyno, mi Kaleb nomiye Aksa nyare mondo obed chiege. 14 To ka ne gin e yo ka gidhi dala, Aksa nojiwo Othniel mondo okwa Kaleb wuon mare puodho. Ka ne olor e pundane, Kaleb nopenje niya: “Idwaro ang’o?” 15 Ne odwoke niya: “Akwayi ni imiya mich moro mondo onyis ni iguedha. Isemiya lowo yo milambo, to koro miya Guloth-maim bende.” Omiyo, Kaleb nomiye Guloth ma Malo gi Guloth ma Mwalo.

16 Nyikwa Ja-Keni,+ ma jaduong’* Musa+ ne owuok gi Jo-Juda e dala mar othidhe+ mi gidhi e thim mar Juda man yo milambo mar Arad+ mi gidak e kind jo ma ne ni kuno.+ 17 Kata kamano, Jo-Juda ne odhi kaachiel gi Jo-Simeon ma owetegi mi gimonjo Jo-Kanaan ma ne odak Zefath, kendo ne giketho dalano chuth.+ Omiyo, ne gichako dalano ni Horma.*+ 18 Kae to Jo-Juda ne okawo piny Gaza+ duto, gi piny Ashkelon+ duto, kod piny Ekron+ duto. 19 Jehova ne ni kod Jo-Juda kendo ne gikawo piny motimo gode. Kata kamano, riembo jopinyno ma ne odak e pap ne otamogi nikech jogo ne nigi geche lweny ma ligengni ochuog e tiendegi.+ 20 Ne gimiyo Kaleb piny Hebron mana kaka Musa ne osingone,+ kendo ne oriembo yawuot Anak+ adek e pinyno.

21 Kata kamano, Jo-Benjamin ne ok oriembo Jo-Jebus ma ne odak Jerusalem. Omiyo, Jo-Jebus osebedo kodak gi Jo-Benjamin kuno nyaka kawuononi.+

22 To gie kindeno, jo dhood Josef+ ne odhi monjo Bethel, kendo Jehova ne okonyogi.+ 23 Ne gioro jomoko mondo onon dala mar Bethel (chon ne iluongo dalano ni Luz).+ 24 Jo ma ne oorgo ne oneno ng’at moro ka wuok e dalano, mi giwachone niya: “Kinyisowa yo ma wanyalo donjogo e dalani, ok wabi hinyi.” 25 Kuom mano, ne onyisogi yo ma ginyalo donjogo e dalano kendo ne gidhi ma ginego jo ma ne nie dalano gi ligangla. Kata kamano, ne giweyo ng’atno gi joode mondo odhi ma ok gitimonegi gimoro.+ 26 Bang’ mano, ng’atno ne odhi e piny Jo-Hiti, mogero dala kuno, mi nochako dalano ni Luz, kendo mano e nyinge nyaka kawuononi.

27 Jo-Manase ne ok oriembo jo ma ne odak Beth-shean gi mier matindo molwore, Taanak+ gi mier matindo molwore, kata jo ma ne odak Dor gi mier matindo molwore, kata jo ma ne odak Ibleam gi mier matindo molwore, kod Megido gi mier matindo molwore.+ Jo-Kanaan ne otamore wuok e pinjego. 28 Ka ne Jo-Israel obedo motegno, ne gichuno Jo-Kanaan mondo obed wasumbnigi.+ Kata kamano, ne ok gigologi e pinyno chuth.+

29 To Jo-Efraim bende ne ok oriembo Jo-Kanaan ma ne odak e piny Gezer. Omiyo, Jo-Kanaan ne odhi nyime dak kodgi kuno.+

30 Jo-Zebulun bende ne ok oriembo Jo-Kanaan ma ne odak Kitron gi Nahalol,+ omiyo ne gidhi nyime dak kodgi kuno. Kata kamano, Jo-Zebulun ne olokogi wasumbnigi.+

31 Jo-Asher bende ne ok oriembo jo ma ne odak Ako, gi Sidon,+ gi Alab, gi Akzib,+ gi Helba, gi Afik,+ kod Rehob.+ 32 Kamano, Jo-Asher ne odhi nyime dak e kind Jo-Kanaan ma ne ni kuno, nimar Jo-Asher ne ok oriembogi e pinyno.

33 Jo-Naftali bende ne ok oriembo Jo-Kanaan ma ne odak Beth-shemesh kod Beth-anath,+ to ne gidhi nyime dak e kindgi.+ Kata kamano, Jo-Naftali ne oloko Jo-Beth-shemesh gi Jo-Beth-anath wasumbnigi.

34 Jo-Amor ne oloro ne Jo-Dan e piny gode, kendo ne ok giyienegi lor e pap.+ 35 Jo-Amor notamore wuok e Got Heres, gi piny Aijalon,+ kod piny Shaalbim.+ Kata kamano, ka ne joka Josef omedo bedo motegno ne giloko Jo-Amor wasumbnigi. 36 Piny Jo-Amor ne chakore ka ma iidhogo Akrabim,+ chakre Sela ka dhi malo.

2 Malaika mar Jehova+ ne owuok Gilgal+ modhi Bokim. Kae to nowacho niya: “Ne agolou e piny Misri, mi akelou e piny ma ne asingo ne kwereu,+ mi awacho niya: ‘Ok abi ketho ngang’ singruok ma ne atimo kodu.+ 2 Un to kik utim singruok gi jo ma odak e pinyni,+ kendo neuru ni umuko kendni ma gichiwoe misengni.’+ Kata kamano, ne ok uluwo chikna.+ Ang’o momiyo utamoru winjo chikna? 3 Mano e momiyo an bende ne awacho niya, ‘Ok abi riembonu jopinyni,+ gibiro bedonu obadho+ kendo nyisechegi biro golou kuoma.’”+

4 Ka ne malaika mar Jehova osetieko wacho ne Jo-Israel wechegi, Jo-Israel nochako ywak matek. 5 Kendo ne giluongo kanyo ni Bokim, mi gichiwo ne Jehova misango kanyo.

6 Joshua ne ogonyo Jo-Israel, mi ng’ato ka ng’ato kuomgi ne odhi kawo lowo ma ne opogne.+ 7 Jo-Israel ne odhi nyime tiyo ne Jehova ndalo duto mag Joshua kod ndalo duto mag jodongo ma Joshua ne oweyo ka pod ngima, kendo ma ne oneno honni madongo duto ma ne Jehova otimo ne Jo-Israel.+ 8 Joshua wuod Nun, kendo jatich Jehova ne otho ka en jahigni 110.+ 9 Ne giyike e lope man Timnath-heres+ e piny motimo gode mar Efraim, yo nyandwat mar Got Gaash.+ 10 Tieng’no duto ne otho kendo tieng’ machielo nowuok bang’gi ma ne ok ong’eyo Jehova kata honni ma ne otimo ne Jo-Israel.

11 Jo-Israel ne otimo gik maricho e wang’ Jehova kendo ne gitiyo ne nyiseche mag Baal.+ 12 Omiyo, ne giweyo Jehova Nyasach kweregi, Nyasaye ma ne ogologi e piny Misri.+ Kendo ne gitiyo ne nyiseche ma jo ma ne odak e alworagi ne lamo.+ Ne gikulore ne nyisechego, mi ne gitimo marach ne Jehova.+ 13 Jo-Israel ne oweyo Jehova mi gilamo Baal gi nyiseche mopa mag Ashtoreth.+ 14 Omiyo, Jehova nobedo gi mirima gi Jo-Israel mochiwogi e lwet joyeko ma ne oyakogi.+ Nochiwogi e lwet wasigu ma ne olworogi,+ kendo ne gionge teko mar kedo kodgi.+ 15 Jehova ne kedo kod Jo-Israel kamoro amora ma ne gidhiye, kendo ne okelonegi masiche.+ Ne gisandore malit ahinya+ mana kaka Jehova nowacho kendo kaka Jehova nosingo.+ 16 Kata kamano, Jehova ne ketonegi jong’ad bura ma ne resogi e lwet joyeko.+

17 Gin to ne gitamore winjo kata mana jong’ad bura. Kar mano, ne gilamo nyiseche manono* kendo ne gikulorenegi. Mapiyo nono ne giweyo luwo yo ma kweregi ne oluwo. Kweregi ne orito chike Jehova,+ gin to ne ok gitimo kamano. 18 Kinde duto ma ne Jehova miyo Jo-Israel jang’ad bura,+ Jehova ne bedo gi jang’ad burano kendo ne oresogi e lwet wasikgi ndalo duto mag jang’ad burano; Jehova ne winjonegi malit+ koneno kaka giywak nikech jo ma ne sandogi+ kendo timonegi gik maricho.

19 Kata kamano, ka ne jang’ad burano otho, Jo-Israel ne dok e timbegi maricho kendo ne gitimo marach moloyo kata mana wuonegi. Ne gilamo nyiseche manono ka gitiyonegi kendo gikulorenegi.+ Ne ok giweyo timbegi maricho gi timbegi mag wich-teko. 20 Gikone, Jehova nobedo gi mirima mager gi Jo-Israel+ mowacho niya: “Nikech ogandani oseketho singruok+ ma ne atimo gi kweregi kendo ok giseluwo chikna,+ 21 ok nariembnegi kata mana achiel kuom ogendni ma Joshua ne ok ogolo ka ne pod ongima.+ 22 Nawegi kamano mondo atem Jo-Israel ka be gibiro luwo yore Jehova+ mana kaka kweregi notimo.” 23 Omiyo, Jehova noweyo ogendnigo ma ok ogologi. Ne ok ogologi mapiyo kendo ne ok ochiwogi e lwet Joshua.

3 Magi e ogendni ma ne Jehova ok oriembo mondo otemgo Jo-Israel duto ma ne ok oneno kikedo gi Jo-Kanaan+ 2 (notimo kamano mondo tienge mag Jo-Israel ma ne pok oneno lweny, ong’e gima lweny en): 3 ne gin ruodhi abich mag Jo-Filistia,+ gi Jo-Kanaan, gi Jo-Sidon,+ gi Jo-Hivi+ ma ne odak e Got Lebanon+ chakre Got Baal-hermon nyaka Lebo-hamath.*+ 4 Kokalo kuom ogendnigo ne otem Jo-Israel ka be ne gidhi luwo chike mag Jehova ma ne omiyo kweregi kokalo kuom Musa.+ 5 Omiyo, Jo-Israel ne odak e kind Jo-Kanaan,+ Jo-Hiti, Jo-Amor, Jo-Perizi, Jo-Hivi, gi Jo-Jebus. 6 Jo-Israel ne okendo nyi jogo, nyigi bende ne gimiyo yawuot jogo, kendo ne gichako lamo nyiseche jogo.+

7 Jo-Israel ne otimo gik maricho e wang’ Jehova, kendo wigi ne owil gi Jehova Nyasachgi mi gilamo nyiseche mag Baal+ gi sirni mag yien.+ 8 Kuom mano, Jehova ne oolo mirimbe kuom Jo-Israel mi oketogi e lwet Kushan-rishathaim ruodh Mesopotamia. Kendo Jo-Israel ne otiyo ne ruodhno kuom higni aboro. 9 To ka ne Jo-Israel oywak ne Jehova mondo okonygi,+ Jehova ne omiyogi ng’at maresogi.+ Ng’atno ne iluongo ni Othniel,+ ne en wuod Kenaz ma owadgi Kaleb matin. 10 Roho mar Jehova nobiro kuome,+ mobedo jang’ad bura ne Jo-Israel. Kendo ka ne odhi e lweny, Jehova ne ochiwo Kushan-rishathaim ma ruodh Mesapotamia e lwete mi ne oloyo ruodhno. 11 Bang’ mano, piny nobedo gi kuwe kuom higni 40. Kae to Othniel wuod Kenaz ne otho.

12 Jo-Israel nochako timo gik maricho e wang’ Jehova kendo,+ mi Jehova ne oweyo mondo Eglon ruodh Moab+ ologi, nimar ne gitimo gik maricho e wang’ Jehova. 13 E wi mano ne okelonegi Jo-Amon+ gi Jo-Amalek+ mondo oked kodgi. Ne gikedo gi Jo-Israel ma gikawo dala mar othidhe.+ 14 Jo-Israel notiyo ne Eglon ruodh Moab kuom higni 18.+ 15 Ne giywak ne Jehova,+ mi Jehova ne omiyogi Ehud+ wuod Gera mondo oresgi.+ Ehud ne en Ja-Benjamin+ kendo ne en racham.+ Bang’e, Jo-Israel ne omiyo Ehud osuru mondo oter ne Eglon ruodh Moab. 16 Ehud ne othedho pand ligangla ma dhoge ariyo, to borne ne romo bat achiel, mi otweye ei lawe e bamne ma korachwich. 17 Kae to ne otero ne Eglon ruodh Moab osuruno. Eglon to ne en ng’at machwe ahinya.

18 Ka ne Ehud osetieko chulo osuru, ne oa kaachiel gi jo ma ne oting’o osurugo. 19 Kata kamano, ka ne gichopo kar sanamu man Gilgal,+ ne odok ir ruoth en kende, mi nowacho ne ruoth niya: “A ruoth, an gi wach moro maling’ ling madwaro nyisi.” Mi ruoth nowacho ne jotije niya: “Ling’uru thi!” Kendo jotije duto ne owuok mi giweye kende. 20 Ehud nosudo machiegni gi Eglon ka en e ode manie wi tado ma nojabetie mondo yamo okwadhe, mi owacho ne ruoth niya: “An gi oteni ma Nyasaye omiya mondo akelni.” Ka ne Eglon owinjo kamano, ne ochung’ e kome. 21 Ehud notero lwete ma koracham mowuodho ligangla ma ne nie bamne ma korachwich mochuoyogo i Eglon. 22 Liganglano ne odonjo ei Eglon molal ei boche, ne olal kuno gi loge duto, nimar Ehud ne ok otemo wuodhe mi minyaga* ne owuok. 23 Bang’ timo kamano, Ehud nowuok gie varanda, moloro dhoudi mag odno gi kifungu. 24 Ka ne Ehud osedhi, jotij Eglon noduogo mi giyudo ka dhoudi mag ot ma malo olor gi kifungu. Omiyo ne giwacho niya: “Nyaka bed ni ruoth dhi e cho e ode ma iye.” 25 Ne girite mi kibaji nochako makogi, to ka ne gineno ni ok oyaw dhoot, ne gikawo kifungu mi giyawo dhoudigo, to ne giyudo ka ruodhgi osetho piny e dier ot.

26 Ehud ne oringo sa ma jotij ruoth ne pod galore. Ne oringo mokalo kar sanamu+ mochopo Seira. 27 Ka ne ochopo kuno, ne ogoyo tung’+ e piny gode mag Efraim.+ Kendo Jo-Israel nolor e piny motimo gode ka en to otelonegi. 28 Eka ne owachonegi niya: “Luwauru nikech Jehova oseketo wasikwa ma Jo-Moab e lwetwa.” Omiyo, ne giluwe ma gikawo kuonde ma Jo-Moab ne ng’adogago Aora Jordan, kendo ne ok giyiene ng’ato ang’ata ng’ado aorano. 29 Kindeno ne ginego Jo-Moab ma roteke kendo ma jochir madirom 10,000+ ma onge kata mana achiel ma ne otony.+ 30 Kamano, Jo-Israel noloyo Jo-Moab e odiechieng’no kendo piny nobedo gi kuwe kuom higni 80.+

31 Bang’ Ehud, Shamgar+ wuod Anath e ma nobedo jang’ad bura. En e ma ne onego Jo-Filistia 600+ gi riwi.*+ En bende noreso Jo-Israel.

4 Bang’ tho Ehud Jo-Israel ne ochako timo gik maricho kendo e wang’ Jehova.+ 2 Omiyo, Jehova ne ochiwogi e lwet Jabin ruodh Jo-Kanaan+ ma ne locho e piny Hazor. Jatelo mar jolweny mag Jabin ne iluongo ni Sisera kendo ne odak Harosheth.+ 3 Jo-Israel ne oywak ne Jehova+ nikech Jabin ne nigi geche lweny 900 ma tiendegi ochuogie ligengni mag nyinyo,+ kendo ne osando Jo-Israel malit+ kuom higni 20.

4 Gie kindeno, Debora janabi ma dhako+ e ma ne hulo ne Jo-Israel buche ma Nyasaye ong’ado. 5 Debora ne jabet e bwo yadhe mar othidhe ma ne nie kind Rama+ gi Bethel+ e piny Efraim motimo gode; kendo Jo-Israel ne dhiga ire mondo onyisgi buche ma Nyasaye ong’ado. 6 Debora ne oluongo Barak+ wuod Abinoam ma ne ni Kedesh-naftali+ mowachone niya: “Jehova Nyasach Israel owacho niya: ‘Kaw chwo 10,000 e dhoudi mag Naftali kod Zebulun, kendo dhi kodgi e Got Tabor. 7 Abiro keloni Sisera jatend jolweny mag Jabin e aora mar Kishon.+ Abiro kele kaachiel gi gechene mag lweny gi jolwenyne, mi aketgi e lweti.’”+

8 Ka ne Barak owinjo mano, ne odwoke niya: “Abiro mana dhi ka iyie dhi koda, to ka ok idhi koda, to ok abi dhi.” 9 Debora to ne odwoke niya: “Abiro dhi kodi. Kata kamano, lweny midhiyeni ok bi keloni pak, nimar Jehova biro keto Sisera e lwet dhako.”+ Bang’ mano Debora nochung’ modhi gi Barak nyaka Kedesh.+ 10 Barak noluongo Jo-Zebulun gi Jo-Naftali+ mondo gidhi kode Kedesh, kendo chwo 10,000 noluwe. Debora bende ne odhi kode.

11 Gie kindeno, Heber Ja-Keni nosedar moweyo Jo-Keni+ ma ne gin nyikwa Hobab, jaduong’ Musa,*+ kendo noguro hembe machiegni gi yath maduong’ man Zaananim e piny Kedesh.

12 Ne onyis Sisera ni Barak wuod Abinoam odhi e Got Tabor.+ 13 Kanyo gi kanyo, Sisera ne ochoko gechene duto mag lweny, ma ne gin geche 900 ma tiendegi ochuogie ligengni mag nyinyo. Nochoko bende jolwenyne duto ma ne ni Harosheth mondo gidhi e Aora Kishon.+ 14 Debora nowacho ne Barak niya: “A malo, nimar ma e odiechieng’ ma Jehova biro ketoe Sisera e lweti. Donge Jehova e ma oteloni, koso?” Mi Barak nolor kowuok e Got Tabor en kaachiel gi chwo 10,000. 15 Jehova ne ochocho+ Sisera gi gechene mag lweny gi jolwenyne duto moloyogi gi ligangla mar Barak. Gikone, Sisera nolor e gache mar lweny moringo gi tiende. 16 Barak nolawo jolwenygo gi gechegi mag lweny nyaka Harosheth, mi ne oneg jolweny mag Sisera duto gi ligangla ma onge kata achiel ma ne otony.+

17 Kata kamano, Sisera ne oringo gi tiende nyaka e hemb Jael+ chi Heber+ ma Ja-Keni, nimar ne nitie kuwe e kind Jabin+ ruodh Hazor gi od Heber, Ja-Keni. 18 Jael nowuok oko mondo orom ne Sisera, monyise niya: “Ruodha, donj iye, donj iye ka. Kik iluor.” Omiyo, Sisera nodonjo e hembe kendo ne oume gi onget. 19 Kae to Sisera ne onyise niya: “Yie imiya pi matin mondo amodhi, nimar riyo nega.” Jael noyawo chup* chak momiye mondo omadhi.+ Ka ne osemadho chak, Jael ne oume gi onget kendo. 20 Sisera nonyiso Jael niya: “Chung’ e dho hema kendo ka ng’ato openji ni, ‘Be nitie dichwo iye ka?’ Dwoke ni, ‘Ooyo!’”

21 Kata kamano, ka ne nindo osetero Sisera ma ne koro ool ahinya, Jael chi Heber nokawo loch migurogo hema kaachiel gi nyundo molidho mos moguro wi Sisera e dier ot, mi Sisera otho.+

22 Barak nolawo Sisera nyaka e hemb Jael. Jael nowuok oko mondo oromne mowachone niya: “Bi mondo anyisi ng’at ma imanyo.” Barak ne odonjo kode moneno Sisera koriere piny kendo osetho, ka loch mar hema ogur e wiye.

23 Omiyo, odiechiengno Nyasaye nomiyo Jo-Israel oloyo Jabin ruodh Kanaan.+ 24 Jo-Israel nomedo bedo gi teko e wi Jabin ruodh Kanaan+ ma gikone ne gitieke chuth.+

5 Chieng’no Debora+ gi Barak+ wuod Abinoam nower niya:+

 3 Chikuru itu, un ruodhi! Winjuru, un jotelo!

Abiro wer ne Jehova.

Abiro wero wende pak ne Jehova,+ Nyasach Israel.+

A pakuru Jehova!

Mi oganda Jehova ne odhi e rangeye.

12 A Debora,+ a malo, a malo!

A malo, a malo, ichak wer!+

A malo Barak!+ Tel ne jogi igolgi e tuech, a wuod Abinoam!

Ne odhi e pap.+

Jo-Reuben to ne bagni e paro ariyo.

Nimar Jo-Reuben ne bagni e paro ariyo.

To ne ok giyako fedha.+

Ee, mano kaka ne aloyo roteke.

25 Sisera ne okwaye pi, en to ne omiye chak.

Chak mopoto e bakul maber ka bakund ruoth adier.+

Ang’o momiyo pok awinjo tiende faresene nyaka sani?’+

Kendo piny nobedo gi kuwe kuom higni 40.+

6 Jo-Israel nochako timo gik maricho e wang’ Jehova kendo,+ mi Jehova ochiwogi e lwet Jo-Midian kuom higni abiriyo.+ 2 Jo-Midian ne sando Jo-Israel ahinya.+ Omiyo, Jo-Israel ne oloso kuonde pondo e gode, e rogni, kod kuonde matek chopoe.+ 3 Ka ne Jo-Israel ochuoyo puothegi, Jo-Midian gi Jo-Amalek+ gi ogendni mowuok yo wuok chieng’+ ne monjogi. 4 Ne gigoyo kambi e piny Jo-Israel mi giketho cham duto ma puothegi ne onyago. Ne gitimo kamano nyaka Gaza. Onge gimoro amora ma ne giweyo ne Jo-Israel mondo ocham. Ne ok giwenegi rombo kata dhiang’ kata mana punda.+ 5 Ne gijobiro ka ging’eny ka det-bonyo+ mondo giketh piny, kendo ne gibiro kod jambgi kod hembegi. Gin kaachiel gi ngamiagi ne gikalo akwana.+ 6 Nikech mano, Jo-Midian nomiyo Jo-Israel obedo modhier ahinya, mi Jo-Israel ne oywak ne Jehova mondo okonygi.+

7 Ka ne Jo-Israel oywak ne Jehova nikech Jo-Midian,+ 8 Jehova ne ooronegi janabi ma ne owachonegi niya: “Ma e gima Jehova Nyasach Israel owacho, ‘Ne agolou e piny Misri, e piny ma ne unie wasumbni,+ 9 mi aresou e lwetgi, kendo e lwet ji duto ma ne sandou. Ne ariembonugi mi amiyou pinygi.+ 10 Ne awachonu niya: “An Jehova Nyasachu.+ Kik ulam nyiseche mag Jo-Amor ma koro udak e pinygi.”+ To ne ok uwinjo wachna.’”+

11 Bang’ mano, malaika mar Jehova ne obiro+ mobet e tiend yath maduong’ ma ne ni Ofra. Yadhno ne en mar Joash Ja-Abiezer.+ Noyudo ka Gideon+ wuod Joash dino ngano ka mibiyoe mzabibu mondo kik Jo-Midian maye chamgo. 12 Malaika mar Jehova ne obirone mowachone niya: “A jalweny maratego, Jehova ni kodi.”+ 13 Gideon ne odwoke niya: “Ruodha, ka Jehova ni kodwa adier, ang’o momiyo oweyo mondo chandruogegi duto oyudwa?+ Ere honni madongo ma wuonewa nonyisowa ni ne otimo, ka giwachonwa ni,+ ‘Jehova nogolowa Misri?’+ Sani Jehova ojwang’owa+ kendo osechiwowa e lwet Jo-Midian.” 14 Jehova ne ong’iye mowachone niya: “Dhi gi teko ma in-go, kendo ibiro reso Jo-Israel e lwet Jo-Midian.+ Donge an e ma aori?” 15 Gideon ne odwoke niya: “Jehova, yie apenjie. Ere kaka dares Israel? Dhoodwa e dhoot matinie mogik e dhood Manase, kendo an e ma atinie mogik e od wuora.” 16 Jehova ne odwoke niya: “Nikech an kodi,+ inilo Jo-Midian mayot mana ka gima ikedo gi ng’ato achiel.”

17 Bang’ mano, Gideon ne owachone niya: “Ka iyie koda adier, timna gima nyiso ni in e ma iwuoyo koda. 18 Akwayi ni kik ia kae nyaka akelni chiwo mi akete e nyimi.”+ Nodwoke niya: “Abiro riti nyaka iduogi.” 19 Gideon ne odhi moyang’o nyadiel motedo. Kendo ne okawo mogo madirom efa* achiel molosogo makate ma ok oketie thowi.+ Ne oketo ring’ono e okapu, to kado ne oolo e agulu. Kae to ne okelogi ne malaikano e tiend yath maduong’ ka ma ne entie.

20 Malaika mar Nyasaye nowachone niya: “Kaw ring’ono gi makate ma ok oketie thowi kendo iketgi e lwanda maduong’ man kacha, kae to iol kadono e wiye.” Mi Gideon ne otimo kamano. 21 Eka malaika mar Jehova ne orieyo luth ma ne nie lwete, momulo ring’ono gi makateno, mi mach ne omuoch kowuok e lwanda mowang’o ring’ono gi makate.+ Kae to malaika mar Jehova ne olal nono. 22 Gikanyono, Gideon ne ofwenyo ni kare owuoyo gi malaika mar Jehova.+

Mi ne owacho niya: “A Jehova, Wuon Loch Duto, aneno malaika mar Jehova wang’ gi wang’!”+ 23 Jehova ne owachone niya: “Bed gi kuwe, kik iluor,+ ok ibi tho.” 24 Omiyo, Gideon ne ogero ne Jehova kendo mar misango kanyo. Iluongo kendono ni Jehova-Shalom*+ nyaka kawuononi. Kendono pod ni Ofra e piny Jo-Abiezer.

25 Otienono, Jehova ne onyiso Gideon niya: “Kaw rwadh wuonu, rwath matin mar ariyo ma jahigni abiriyo, kae to imuk kendo mar Baal ma wuonu nogero, kendo imuk siro mar yien mochung’ e bathe.+ 26 Bang’ gero ne Jehova Nyasachi kendo mar misango e wi lwanda moriedie kiteni, kaw rwadhno kendo ichiwe kaka misango miwang’o e yien mobar kowuok e sirono.” 27 Omiyo, Gideon ne okawo jotichne apar ma chwo motimo mana kaka Jehova ne onyise. Kata kamano, nikech ne oluoro joodgi gi jodalano ahinya, ne otimo kamano gotieno, to ok godiechieng’.

28 Kinyne ka ne jodalano ochiewo, ne giyudo ka omuk kendo mar misango mar Baal kod siro mar yien ma ne ochung’ e bathe, kendo ne osechiw ruath mar ariyo e kendo mar misango ma ne koro oseger kanyo. 29 Ne gipenjore niya: “Ng’a motimo kama?” Bang’ timo nonro, ne giwacho niya: “Gideon wuod Joash e ma otimo kama.” 30 Omiyo, jodalano nowacho ne Joash niya: “Gol wuodi oko mondo wanege, nimar omuko kendo mar misango mar Baal kod siro mar yien ma ne nie bathe.” 31 Joash+ nowacho ne jo ma ne obiro irego niya: “Un e ma nyaka uked ne Baal, koso? Un e ma nyaka urese? Ng’ato ang’ata motemo kedo ne Baal ibiro neg gokinyini.+ Ka Baal en nyasaye, we oked lwenje owuon,+ nimar en e ma ng’ato omuko kendone mar misango.” 32 Chieng’no Joash ne ochako Gideon ni Jerubaal,* kowacho niya: “We Baal oked lwenje owuon, nimar ng’ato omuko kendone mar misango.”

33 Jo-Midian duto+ gi Jo-Amalek+ gi ogendni moa yo wuok chieng’ noriwore,+ kae to ging’ado aora mi gidonjo e Paw Jezreel kendo ne gigoyo kambi kanyo. 34 Roho mar Jehova nobiro kuom Gideon+ mi ogoyo tung’,+ kendo joka Abiezer+ ne obiro mondo oriwe lwedo. 35 Ne ooro joote e piny Manase duto, mi Jo-Manase ne obiro ire. Bende ne ooro joote ir Jo-Asher, gi Jo-Zebulun gi Jo-Naftali, mi gin bende ne gibiro riwe lwedo.

36 Kae to Gideon ne owacho ne Nyasaye niya: “Ka en adier ni ireso Jo-Israel gi lweta mana kaka isesingo,+ 37 ero aketo yie rombo kar dino cham. Ka po ni tho omako mana yie rombo kende to ka ma olwore odong’ kotwo, abiro ng’eyo gadier ni ibiro reso Jo-Israel gi lweta mana kaka isesingo.” 38 To mano e gima ne otimore. Ka ne ochiewo kinyne gokinyi, nobiyo yie rombono, mi pi ma ne owuokie ne opong’o bakul maduong’. 39 Kata kamano, Gideon ne owacho ne Nyasaye niya: “Asayi ni kik iyi wang’ koda, to we akwayi gimoro achiel kendo. Kiyie, we atimie gima chielo gi yie romboni mondo ang’e ni adier ibiro bedo koda. Akwayi, kiyie, we yie romboni e ma obed motwo to ka ma olwore obed mang’ich.” 40 Kamano e kaka Nyasaye ne otimo otienono. Yie rombo kende e ma ne odong’ kotwo, to ka ma olwore ne ng’ich.

7 Jerubaal, ma en Gideon,+ kaachiel gi jolweny ne ochiewo gokinyi mang’ich mi gidhi goyo kambi e soko mar Harod. Kambi mar Jo-Midian to ne ni yo nyandwat, e pap man but got More. 2 Eka Jehova ne owacho ne Gideon niya: “Jolweny ma in-go ng’eny ahinya. Omiyo, ok anyal keto Jo-Midian e lwetgi,+ nimar Israel nyalo sungrena ka owacho ni, ‘Lweta awuon e ma oresa.’+ 3 Koro dhi iwachnegi niya: “Ng’ato ang’ata ma nigi kibaji kata moluor, odog dala.”+ Omiyo, Gideon ne otemogi e yo ma kamano, mi ji 22,000 ne odok dala, to ji 10,000 ne odong’.

4 Eka Jehova ne owacho ne Gideon niya: “Jolweny ma in-go pod ng’eny ahinya. Omiyo, tergi mwalo e dho aora mondo ayierni jo ma ibiro dhigo. Ka awachoni ni, “Jalni nyaka dhi kodi,” to ng’atno nodhi kodi. To ka awacho ni, “Jalni ok dhi kodi,’ to ng’atno ok nodhi kodi.” 5 Omiyo, Gideon ne otero jolweny nyaka e dho aora.

Kae to Jehova ne onyise niya: “Jogo duto ma modho* pi gi lwetgi, ket yorgi, to jogo duto ma goyo chonggi piny mondo e ka gimodhi, bende ket yorgi.” 6 Kwan mar jogo ma ne modho gi lwetgi, ne gin ji 300. To jo ma odong’ ne ogoyo chonggi piny ka gimodho.

7 Bang’ mano, Jehova ne onyiso Gideon niya: “Abiro resi gi lwet jolweny 300 ma omodho pi gi lwetgi, kendo abiro keto Jo-Midian e lweti.+ To jo ma odong’ duto, odog dala.” 8 Kuom mano, bang’ ka ne gisekawo chiemo kod tunge mag jolwenygo, Gideon ne ogonyo jolwenygo mondo gidog dala, en to ne odong’ gi jolweny 300 kende. Kambi mar Jo-Midian to ne ni e pap mwalo.+

9 Otienono, Jehova ne onyiso Gideon niya: “A malo idhi imonj kambi Jo-Midian, nimar asechiwogi e lweti.+ 10 Kata kamano, kiluoro dhi monjogi, kaw Pura jatichni mondo udhi kode. 11 Chik iti iwinj gik ma giwacho, kae to ibiro bedo gi chir mar monjo kambigi.” Eka Gideon gi Pura jatichne ne owuok modhi nyaka e kiewo mar kambi Jo-Midian.

12 Jo-Midian gi Jo-Amalek gi ogendni ma ne oa yo wuok chieng’+ ne ng’eny ahinya kendo ne gipong’o pawno mana ka det-bonyo. Ngamia ma ne gin-go bende ne okalo akwana,+ ne ging’eny ka kuoyo manie dho nam. 13 Ka ne Gideon ochopo kuno, ne owinjo ka ng’at moro nyiso nyawadgi gima ne oleko niya: “Ne aleko lek moro, to e lekno ne aneno ka makate molworore mar shairi ng’ielore mochopo e kambi mar Jo-Midian. Makateno ne ong’ielore mochopo e hema moro mi otuome matek mi hemano olokore ataro mi owuore.+ 14 Eka wadgino ne odwoke niya: “Mano nyaka bed mana ligangla Gideon+ wuod Joash ma Ja-Israel. Nyasaye oseketo Jo-Midian gi kambini duto e lwete.”+

15 Ka ne Gideon owinjo lekno gi kaka oloke,+ nogoyo chonge piny, molemo kanyo gi kanyo. Bang’ mano, ne odok e kambi mar Jo-Israel mowachonegi niya: “Wuoguru, nimar Jehova oseketo kambi mar Jo-Midian e lwetu.” 16 Ne opogo joge 300 e grube adek, kendo ng’ato ka ng’ato ne omiyo tung’+ gi agulu maduong’ moketie taya e iye. 17 Kae to ne owachonegi niya: “Neuru ni ung’iya maber kendo utim mana kaka atimo. Ka achopo e kiewo mar kambi Jo-Midian, neuru ni utimo mana kaka atimo. 18 Ka uwinjo ka agoyo tung’ kaachiel gi jo ma ni koda, un bende gouru tungeu ka ma uchung’ie kulworo kambi, kendo ukog ni, ‘Lwenyni en mar Jehova gi Gideon!’”

19 Gideon kaachiel gi joge 100 ne obiro nyaka e kiewo mar kambi Jo-Midian chuny otieno* sa ma jorit eka donjo. Ne gigoyo tungegi+ kendo ne gitoyo agulni ma ne giting’o e lwetgi.+ 20 Eka grube adekka ne ogoyo tungegi kendo ne gitoyo agulnigi. Ne giting’o teyni e lwetgi ma koracham to tungegi e lwetgi ma korachwich. Ne gigoyo tungegi ka gikok niya: “Lwenyni en mar Jehova gi Gideon!” 21 E kindeno duto, ne gichung’ ka gilworo kambi to jolweny mag Jo-Midian ne ochako ringo ka gigoyo koko.+ 22 Jolweny mia adekgo ne omedo goyo tungegi, kendo Jehova ne omiyo ng’ato ka ng’ato e kambi mar Jo-Midian ochako kedo gi nyawadgi.+ Jo-Midian ne oringo mi gichopo Beth-shita. Ne gidhi nyaka Zerera, mi gichopo Abel-mehola+ machiegni gi Tabath.

23 Ne oluong Jo-Israel kowuok e dhoudi mag Naftali, gi Asher kod Manase duto,+ kendo ne gilawo Jo-Midian. 24 Kae to Gideon ne ooro joote e piny gode mar Jo-Efraim, kowachonegi niya: “Ridreuru udhi uked gi Jo-Midian, telnegiuru nyaka Bethbara gi Aora Jordan kendo ugeng’negi kuonde duto ming’adogo aora.” Kuom mano, jolweny mag Jo-Efraim duto ne ochokore mi gidhi geng’o ne Jo-Midian kuonde duto ming’adogo aora. 25 Ne gimako jotelo ariyo mag Jo-Midian miluongo ni Oreb gi Zeeb. Ne ginego Oreb e lwanda mar Oreb,+ to Zeeb ne ginego kar biyo mizabibu mar Zeeb. Ne gidhi nyime lawo Jo-Midian,+ kendo ne gitero ne Gideon wiye Oreb gi Zeeb e alwora mar Jordan ka ma Gideon ne nitie.

8 Jo-Efraim ne odhawo matek gi Gideon+ ka gipenje niya: “Dak ne iluongowa kidhi kedo gi Jo-Midian?+ Ang’o momiyo itimonwa kama?” 2 En to ne odwokogi niya: “Gima atimoni en ang’o kopim gi gik ma usetimo? Donge hulo mag Jo-Efraim+ oloyo mzabibu ma Jo-Abiezer kayo?+ 3 Donge un e ma Nyasaye ne oketo Oreb gi Zeeb,+ ruodhi Jo-Midian e lwetu? Koro gima atimoni en ang’o kopim kod gik ma usetimo?” Ka ne osewuoyo kodgi kamano, mirimbgi ne okuwe.

4 Bang’ mano, Gideon ne gidhi mi ging’ado Aora Jordan. Kata obedo ni ne ool kaachiel gi jolweny mia adekka, ne gidhi nyime lawo wasigu. 5 Gideon nokwayo Jo-Sukoth kama: “Yie umi jolweny man kodagi chiemo, nimar giol, to pod walawo Zeba gi Zalmuna, ruodhi Jo-Midian.” 6 To jodong Sukoth nodwoke niya: “Ere kaka dwami jolweny ma in-go chiemo, to pok imako Zeba gi Zalmuna?” 7 Ka ne Gideon owinjo kamano, nowachonegi niya: “Nikech uwuoyo kamano, ka Jehova oketo Zeba gi Zalmuna e lweta, abiro rodhou gi kuthe kod oriang’ mag thim.”+ 8 Nowuok kanyo mi odhi nyaka Penuel, kendo nokwayo Jo-Penuel chiemo mana kaka nokwayo Jo-Sukoth. Kata kamano, ne gidwoke mana kaka Jo-Sukoth ne odwoke. 9 Omiyo, nonyiso Jo-Penuel bende niya: “Ka aduogo kangima, to abiro muko ohingani.”+

10 Zeba gi Zalmuna ne ni ka ma iluongo ni Karkor gi jolwenjgi ma dirom 15,000. Mago kende e jolweny ma ne odong’ kuom jolweny ma ne oa yo wuok chieng’,+ nimar jolweny 120,000 ne oseneg. 11 Gideon noidho gi yo ma jo ma ne odak e hembe ne tiyogo. Yorno ne ni yo wuok chieng’ mar Noba gi Jogbeha.+ Kendo nomonjo jolwenygo apoya. 12 Ka ne Zeba gi Zalmuna oringo, Gideon ne olawogi momakogi, mi kambino duto ne obwok ahinya.

13 Bang’ mano, Gideon wuod Joash ne odok koa e lweny moidho gi yo mochomo Heres. 14 Ka en e yo, ne omako rawera moro ma Ja-Sukoth mi onono weche duto kuome, kendo wuoyino ne ondikone nyinge jotelo gi jodong Sukoth 77. 15 Kae to Gideon ne odhi ir Jo-Sukoth, mowachonegi niya: “Ero, neuru Zeba gi Zalmuna ma ne omiyo ujara kupenja ni, ‘Ere kaka dwami jolweny ma in-go ma koro oolgi chiemo, to pok imako Zeba gi Zalmuna?’”+ 16 Eka nomako jodong dalano, mi ne otimonegi anyali korodhogi gi kuthe kod oriang’ mag thim.+ 17 Bende, ne omuko ohinga mar Penuel,+ mi onego jodalano.

18 Bang’e nopenjo Zeba gi Zalmuna niya: “Ne unego jo ma chal nade Tabor?” Ne gidwoke niya: “Ne gichal mana kodi. Ng’ato ka ng’ato kuomgi ne chalo wuod ruoth.” 19 Ka ne gidwoke kamano, Gideon nowachonegi niya: “Mago ne gin owetena, kendo yawuot mamana. Akuong’ora e nying Jehova, ni ka dine ok unegogi, an bende dine ok anegou.” 20 Kae to ne owacho ne Jether wuode makayo niya: “A malo ineggi!” Kata kamano, wuodeno ne ok owuodho ligangla nimar ne oluor, nikech pod ne en rawera. 21 Zeba gi Zalmuna ne owacho ne Gideon niya: “In e ma bi inegwa, nimar ng’ato ing’eyo mana gi tekone.” Omiyo, Gideon nodhi monego Zeba gi Zalmuna,+ mi okawo gik ma ne gidusogo* ng’ut ngamiagi.

22 Bang’e Jo-Israel nokwayo Gideon niya: “Loch e wiwa, in gi wuodi, gi nyikwayi bende, nimar iresowa e lwet Jo-Midian.”+ 23 To Gideon ne odwokogi niya: “Ok abi locho e wiu, wuoda bende ok noloch e wiu. Jehova e ma biro locho e wiu.”+ 24 Gideon nomedo wacho niya, “Yieuru akwau gimoro achiel: ng’ato ka ng’ato kuomu omiya stadi mag um mogolo kuom gik moyako.” (Jo ma ne ologo ne nigi stadi mag um molos gi dhahabu, nimar ne gin Jo-Ishmael.)+ 25 Ne gidwoke niya: “Wayie miyigi.” Mi ne gipedho kandho, kendo ng’ato ka ng’ato ne oketo stadi achiel kuom gik ma ne oyako. 26 Stadi duto mag dhahabu ma ne omi Gideon ne romo kilo 19.* E wi mano, ne omiye tigo, gik mirwako e ng’ut ma chalo dwe, lewni ma rajamna molos gi yie rombo ma ruodhi mag Jo-Midian ne rwako, kod tigo mirwako ne ngamia.+

27 Gideon ne oloso efod* gi dhahabugo,+ mi ne okete e dala miluongo ni Ofra.+ Jo-Israel duto ne ochako dwanyo lamo maler kuom lamo* efodno,+ kendo efodno ne obedo obadho ne Gideon kod joode.+

28 Kamano, Jo-Israel ne oloyo Jo-Midian,+ mi Jo-Midian ne ok otemo kedo kodgi kendo. Piny nobedo gi kuwe kuom higni 40 e ndalo Gideon.+

29 Jerubaal+ wuod Joash ne odok dak dalane.

30 Gideon ne onyuolo yawuoyi 70, nikech ne en gi mon mang’eny. 31 Ne en gi dhako moro mosiepne Shekem ma ne onyuolone wuoyi, mi Gideon ne ochako wuoyino ni Abimelek.+ 32 Gideon wuod Joash ne otho ka hike oniang’, kendo ne oyike e liend Joash wuon mare ma ne ni Ofra e piny Jo-Abiezer.+

33 To ka ne Gideon osetho, Jo-Israel nochako kendo dwanyo lamo maler kuom lamo nyiseche miluongo ni Baal,*+ kendo ne giketo Baal-berith mondo obed nyasachgi.+ 34 Wi Jo-Israel ne owil gi Jehova Nyasachgi+ ma ne oresogi e lwet wasigu duto ma ne olworogi;+ 35 bende ne ok gitimo maber ne jood Jerubaal, ma en Gideon, kata obedo ni ne otimo ne Jo-Israel gik mabeyo.+

9 Bang’ kinde, Abimelek+ wuod Jerubaal ne odhi Shekem thurgi min-gi, mi owacho ne owete min-gi kaachiel gi anyuola kwargi* duto niya: 2 “Asayou, penjnauru jodong Shekem kama, ‘Mane mabernu, loch mar yawuot Jerubaal 70 duto,+ koso loch mar ng’ato achiel? Kik wiu wil ni an rembu.’”

3 Omiyo, owete min-gi ne odhi wuoyone gi jotelo duto mag Shekem, kendo ne ging’ado mar riwo Abimelek lwedo. Ne giwacho niya: “En owadwa.” 4 Ne gikawo fedha 70 e od* Baal-berith+ mi gimiyo Abimelek, kendo Abimelek notiyo gi fedhago e nyiewo chwo moko ma achach kendo ma ne bet abeta ka timo nono mondo oluwe. 5 Bang’ mano, Abimelek ne odhi Ofra+ e dala Jerubaal wuon-gi monego owetene+ 70 e wi kidi achiel. Jotham wuod Jerubaal machogo kende e ma ne otony nikech ne opondo.

6 Jotelo duto mag Shekem kod Beth-milo ne ochokore but yath maduong’ man machiegni gi siro ma ne ni Shekem, mi ne giketo Abimelek ruoth.+

7 Ka ne Jotham owinjo wachno, ne odhi e wi Got Gerizim+ mi nokok gi dwol maduong’ niya: “Winjauru, un jotelo mag Shekem, eka Nyasaye biro winjou.

8 “Kinde moro ne nitie yien ma ne dwaro bedo gi jaloch. Omiyo, ne gikwayo yadh zeituni niya: ‘Loch e wiwa.’+ 9 To yadh zeituni ne odwokogi ni, ‘Ere kaka dawe golo mo ma amiyogo Nyasaye kod dhano duong’ mana mondo afwadh obokena e wi yien mamoko?’ 10 Bang’ mano, yien-go nonyiso yadh ng’owo niya: ‘Bi iloch e wiwa.’ 11 To yadh ng’owo ne openjogi ni, ‘Ere kaka dawe golo olembena mabeyo kendo mamit mana mondo afwadh obokena e wi yien mamoko?’ 12 Kae to yien-go ne odhi ir yadh mzabibu mi ginyise niya: ‘Bi iloch e wiwa.’ 13 Yadh mzabibu ne odwokogi ni, ‘Ere kaka dawe golo divai ma amiyogo Nyasaye gi dhano mor mana mondo afwadh obokena e wi yien mamoko?’ 14 Gikone, ne gidhi ir yadh kudho ma ginyise niya: ‘Bi iloch e wiwa.’+ 15 To ka ne yadh kudho owinjo kamano, ne owacho ni, ‘Ka adier udwaro ni abed ruodhu, bi uyue e tipona. Ka ok utimo kamano, mach biro wuok e kudho kendo biro wang’o yiend sida man Lebanon.’

16 “Be utimo gima kare kuom keto Abimelek ruoth?+ Be gima utimo ne Jerubaal gi ode en gima owinjore? 17 Ka ne wuonwa odhi kedonu,+ ne oikore kata mana tho mondo oresu e lwet Jo-Midian.+ 18 To koro uselokoru gi od wuonwa kendo usenego yawuote 70 duto e wi kidi achiel.+ Kae to uketo Abimelek wuod jatichne ma nyako+ mondo obed ruodh jotelo mag Shekem mana nikech en wuodu. 19 Koro ka uneno ni gima usetimo ne Jerubaal gi ode ber kendo owinjore, kare moruru gi Abimelek, to en bende obed mamor kodu. 20 To ka gima utimo ok ni kare, to we mach owuog kuom Abimelek kendo otiek jotend Shekem gi jotend Beth-milo,+ kendo mach owuog kuom jotend Shekem gi jotend Beth-milo mi otiek Abimelek.”+

21 Bang’ mano, Jotham+ ne oringo modhi Beer, kendo ne odak kuno nikech ne oluoro Abimelek owadgi.

22 Abimelek ne olocho e piny Israel kuom higni adek. 23 Eka Nyasaye ne omiyo sigu obetie e kind Abimelek gi jotend Shekem, kendo ne gichako timo ne Abimelek gik maricho. 24 Mano notimore mondo ochul kuor nikech nek marach ma ne oneggo yawuot Jerubaal 70, kendo mondo buch remo obed e wi Abimelek nikech ne onego owetene,+ kendo buch remo obed e wi jotend Shekem nikech ne gikonyo Abimelek nego owetene. 25 Jotend Shekem nooro jomoko mondo odhi omonj Abimelek e wi got, kendo jogo ne yako ng’ato ang’ata ma ne kalo e ndara. Bang’e wachno ne ochopo ne Abimelek.

26 Gaal wuod Ebed gi owetene ne odhi nyaka Shekem+ kendo jotend Shekem ne ogeno ni onyalo konyogi. 27 Jo-Shekem nodhi e puothegi mi gichoko mzabibu kendo gibiyogi kae to ne gitimo nyasi. Bang’e, ne gidhi e od nyasachgi+ mi gimetho, gichiemo, kendo gikuong’o Abimelek. 28 Eka Gaal wuod Ebed nowacho niya: “Abimelek en ng’a, to Shekem en ng’a ma dwatine? Donge Abimelek en mana wuod Jerubaal+ kendo Zebul en jatichne? Tiuru ne dhood Hamor ma wuon Shekem! Ere gimomiyo dwatine Abimelek? 29 Ka dine bed ni an jatend ogandani, dine agolo Abimelek e loch.” Kae to ne owacho ne Abimelek niya: “Med jolweny magi mondo ibi wakedi.”

30 Ka ne Zebul jatend dalano owinjo weche Gaal wuod Ebed, mirima nomake. 31 Omiyo, ne ooro joote aling’ aling’ ir Abimelek mondo onyise niya: “Ne! Gaal wuod Ebed kaachiel gi owetene ni Shekem kendo githuwi gi jodalani. 32 Omiyo, wuog kaachiel gi jogi gotieno mondo ubut oko machiegni gi dalani. 33 Kae to umonj dalano gokinyi ka chieng’ wuok. To ka Gaal owuok gi joge mondo giked kodu, timuru duto munyalo mondo ulogi.”

34 Omiyo, Abimelek nowuok gi joge gotieno, kendo ne gipogore e grube ang’wen mi gidhi kiyo Jo-Shekem. 35 Ka ne Gaal wuod Ebed owuok e rangach gi joge, Abimelek bende ne owuok gi joge ka ma ne gipondoe. 36 Gaal ne oneno ji ka biro mowacho ne Zebul niya: “Ne! Nitie jo ma biro koa e wi gode.” To Zebul nodwoke niya: “Ok gin ji, to ineno mana tipo mag gode.”

37 Bang’e Gaal nowacho niya: “Ne! Ji biro kendo gisechopo e chuny piny, to grup machielo biro gi yo makadho but yath maduong’ man Meonenim.” 38 Zebul nodwoke ni, “Koro thian ane wach kaka ne ithiano ni, ‘Abimelek to ng’a ma dwatine?’+ Donge magi e jo ma ne isechayoka? Koro dhi iked kodgi ane.”

39 Omiyo, Gaal ne otelo ne jotend Shekem mi gidhi kedo gi Abimelek. 40 Abimelek ne olawo Gaal, to Gaal ne oyombe. Kata kamano, ne oneg ji mang’eny nyaka e dho ranga dala.

41 Abimelek nodok Aruma modhi nyime dak kuno, to Zebul+ noriembo Gaal gi joge Shekem. 42 Kinyne, Jo-Shekem nowuok modhi oko mar dalagi kendo ne onyis Abimelek wachno. 43 Omiyo, Abimelek ne ochoko joge mi opogogi e grube adek kae to gidhi pondonegi kuno. To ka ne oneno ka jogo wuok e dalano, ne okedo kodgi monegogi. 44 Abimelek nowuok gi grup achiel mi giringo nyaka e dho ranga dala, to grube ariyo modong’ ne okedo gi jo ma ne ni oko, mi ginegogi. 45 Abimelek ne okedo gi jo dalano odiechieng’ mangima mi okawo dalano. Ne onego jo ma ne ni kuno kendo noketho dalano+ mi okwore chumbi.

46 Ka ne jotelo duto mag ohinga mar Shekem owinjo wachno, ne giwuok piyo mi gidhi kar pondo manie od* El-berith.+ 47 To ka ne onyis Abimelek ni jotelo mag ohinga mar Shekem osechokore, 48 Abimelek gi joge nodhi e Got Zalmon. Ne okawo le mi otong’ogo bad yath mi oketo e goke, kae to ne onyiso joge niya: “Gima uneno ka atimoni, e ma un bende utim piyo piyo!” 49 Omiyo, ji duto ne otong’o bede yien mi giluwo Abimelek. Ne giketo bede yien-go e ot ma ji ne opondeno, kae to gimokoe mach. Omiyo, ji duto ma ne odak e ohinga mar Shekem bende ne otho. Ne gin chwo gi mon ma dirom 1,000.

50 Abimelek ne odhi Thebez mi nokedo gi Jo-Thebez mokawo dalano. 51 Ne nitie ot moger motegno e chuny dalano, kendo chwo gi mon duto gi jotendgi duto ne oringo modhi kuno. Ne gilorore e iye mi ne giidho nyaka e tat odno. 52 Abimelek ne odhi momonjo odno. Ne odhi nyaka e dho odno mondo owang’e. 53 To dhako moro ma ne ni kuno ne obolo nyapong’ e wi Abimelek mi wiye obarore.+ 54 Mapiyo piyo Abimelek ne oluongo jatije ma ne ting’one gige lweny mi onyise niya: “Wuodh liganglani mondo inegago, mondo ji kik wach ni, ‘Dhako e ma ne onege.’” Omiyo, jatijeno ne ochwoye gi ligangla mi otho.

55 Ka ne Jo-Israel oneno ni Abimelek osetho, ne gidok dala. 56 Kuom mano, Nyasaye ne ochulo Abimelek nikech richo ma ne otimo ne wuon-gi kuom nego owetene 70.+ 57 Nyasaye ne omiyo richo duto ma ne Jo-Shekem otimo oduogonegi. Omiyo, kuong’ ma ne Jotham+ okuong’ogo wuod Jerubaal+ ne obironegi.

10 Bang’ Abimelek, Tola wuod Pua ma wuod Dodo kendo ma Ja-Isakar, nowuok mondo ores Jo-Israel.+ Tola ne odak Shamir e piny gode mag Efraim. 2 Nobedo jang’ad bura e piny Israel kuom higni 23. Bang’ mano, ne otho moyike Shamir.

3 Bang’ Tola, Jair Ja-Gilead nobedo jang’ad bura kuom higni 22 e piny Israel. 4 Ne en gi yawuoyi 30, ma ne idho punde 30. Yawuoyigo ne nigi mier 30 ma pod iluongo ni Havoth-jair+ nyaka kawuononi. Miergo nie piny Gilead. 5 Bang’ mano, Jair ne otho moyike Kamon.

6 Kendo Jo-Israel ne otimo gik maricho e wang’ Jehova.+ Ne gichako lamo nyiseche miluongo ni Baal,+ sanamu mag Ashtoreth, gi nyiseche mag Jo-Aram,* gi mag Jo-Sidon, gi mag Jo-Moab,+ gi mag Jo-Amon,+ gi nyiseche mag Jo-Filistia.+ Ne giweyo Jehova kendo ne ok gitiyone. 7 Jehova nobedo gi mirima gi Jo-Israel mi nochiwogi e lwet Jo-Filistia gi Jo-Amon.+ 8 Omiyo, ogendnigo ne osando Jo-Israel malit ahinya e higano. Ne gisando Jo-Israel duto ma ne odak loka Jordan e piny Jo-Amor man Gilead kuom higni 18. 9 Jo-Amon bende ne ng’adoga Aora Jordan mondo gidhi gimonj Jo-Juda, gi Jo-Benjamin, kod Jo-Efraim; kendo Jo-Israel ne osandore malit. 10 Jo-Israel ne oywak ne Jehova mondo okonygi+ ka giwacho niya: “Wasetimo richo e nyimi, nimar waweyi mi walamo Baal.”+

11 Jehova ne owacho ne Jo-Israel niya: “Donge an e ma ne aresou e lwet Jo-Misri,+ gi Jo-Amor,+ gi Jo-Amon, gi Jo-Filistia,+ 12 gi Jo-Sidon, gi Jo-Amalek, kod Jo-Midian ka ne gisandou malit? Ka ne uywakna, donge ne aresou e lwetgi? 13 Kata kamano, ne uweya muchako lamo nyiseche mamoko.+ Mano e momiyo ok abi resou kendo.+ 14 Dhiuru ir nyiseche ma useyierogo mondo gikonyu.+ We giresu e kinde mag chandruok.”+ 15 Kata kamano, Jo-Israel nowacho ne Jehova niya: “Wasetimo richo. Timnwa kaka ineno ni owinjore. En mana ni wasayi ni ireswa kawuononi.” 16 Jo-Israel ne owito nyiseche manono mi gichako tiyo ne Jehova.+ Omiyo, ne onenonegi lit nikech ne gisandore.+

17 Bang’ kinde, Jo-Amon+ ne ochokore ne lweny mi gigoyo kambi Gilead. Jo-Israel bende ne ochokore mi gigoyo kambi Mispa. 18 Oganda kaachiel gi jotelo mag Gilead ne penjore e kindgi niya: “Ng’ano ma biro telonwa e lweny gi Jo-Amon?+ Ng’atno nobed jatelo e wi Jo-Gilead duto.”

11 Jeftha+ Ja-Gilead ne en jalweny ma ratego. Ne en wuod dhako ma ochot, to wuon-gi ne iluongo ni Gilead. 2 Chi Gilead bende ne onyuolone yawuoyi. Ka yawuotego ne obedo madongo, ne giriembo Jeftha ka giwachone niya: “Ok ibi yudo pok e od wuonwa kae, nimar in wuod dhako machielo.” 3 Omiyo, Jeftha noringo modhi dak e piny Tob. Kendo chwo moko ma timo nono ne oriwore kode.

4 Bang’ kinde, Jo-Amon nodhi kedo gi Jo-Israel.+ 5 Ka ne Jo-Amon ochako kedo kodgi, jodong Gilead ne odhi e piny Tob mondo giluong Jeftha. 6 Ne giwacho ne Jeftha niya: “Bi itelnwa waked gi Jo-Amon.” 7 To Jeftha nodwokogi niya: “Donge un e ma ne ok udwara ma uriemba e dala wuora?+ Koro ang’o momiyo ubiro ira sa ma un gi chandruok?” 8 Eka jodong Gilead nowachone niya: “Mano e ma omiyo wabiro iri. Ka iyie dhi kodwa e lweny mondo waked gi Jo-Amon, to ibiro bedo jatend Jo-Gilead duto.”+ 9 To Jeftha nodwokogi niya: “Ka adok kodu mondo aked gi Jo-Amon mi Jehova okonya loyogi, eka abiro bedo jatendu.” 10 Jodong Gilead nosingorene niya: “Jehova obed janeno e kindwa kodi, kendo ong’adnwa bura ka ok watimo kamano.” 11 Omiyo, Jeftha nodhi gi jodong Gilead kendo ne gikete jatendgi mar lweny. Ka ne gichopo Mizpa, Jeftha ne onwoyo e nyim Jehova weche duto ma ne gisewinjore.+

12 Eka Jeftha nooro joote ir ruodh Jo-Amon,+ kopenje niya: “Ang’o milaro koda, momiyo ibiro kedo gi pinywa?” 13 To ruodh Jo-Amon nodwoko jootego niya: “En nikech ka Jo-Israel ne wuok Misri,+ ne gikawo pinywa chakre Arnon+ nyaka Jabok kendo nyaka Jordan.+ Omiyo, koro dwoknwauru pinyno gi kuwe.” 14 Jeftha nochako ooro joote ir ruodh Jo-Amon 15 mondo ginyise niya:

“Jeftha owacho ni wanyisi kama: ‘Jo-Israel ne ok okawo piny Jo-Moab+ kata piny Jo-Amon,+ 16 nimar ka ne giwuok Misri ne gikalo e thim mi ging’ado Nam Makwar,+ mi gichopo Kadesh.+ 17 Kae to Jo-Israel ne ooro joote ir ruodh Edom+ ka gikwaye niya: “Yienwa wakadh e pinyi,” to ruodh Edom notamore. Ne gikwayo ruodh Moab+ bende, to en bende ne otamore. Omiyo, Jo-Israel nodhi nyime dak Kadesh.+ 18 Sa ma ne gikadho e thim, ne ok gidonjo e piny Edom+ kata piny Moab. Ne giluwo yo wuok chieng’ mar piny Moab+ mi gigoyo kambi e alwora mar Arnon. Ne ok gidonjo Moab nikech Arnon e ma ne en tong’ mar Jo-Moab.+

19 “‘Bang’ mano, Jo-Israel nooro joote ir Sihon ruodh Jo-Amor ma ne locho Heshbon, mi gikwaye niya: “Yienwa mondo wakadh e pinyi ka wadhi e pinywa.”+ 20 To Sihon ne ochich kodgi mi otamogi kadho e pinye. Nochoko joge duto mag lweny, mi gigoyo kambi Jahaz mondo giked gi Jo-Israel.+ 21 To Jehova Nyasach Israel, nochiwo Sihon gi joge duto e lwet Jo-Israel, mi Jo-Israel noloyogi, mi gikawo piny Jo-Amor duto.+ 22 Kamano ne gikawo piny Jo-Amor duto chakre Arnon nyaka Jabok kendo chakre e thim nyaka Jordan.+

23 “‘Omiyo, Jehova Nyasach Israel, e ma noriembo ne Jo-Israel Jo-Amor,+ to koro uketru ni unyalo riembo Jo-Israel? 24 Donge un bende udak e piny ma Kemosh nyasachu+ e ma omiyou? Omiyo, jo ma Jehova Nyasachwa oseriembo e ma wan bende wariembo.+ 25 Koro, uparo ni uloyo Balak+ wuod Zipor ma ruodh Moab? Be osegayware gi Jo-Israel kata kedo kodgi? 26 Kuom higni 300 duto ma Jo-Israel ne odakgo Heshbon gi mier matindo molwore+ kaachiel gi Aroer gi mier matindo molwore kod mier man e bath Aora Arnon, dak ne utemo mayogi miergo?+ 27 Pok wakethonu. Umonjowa kayiem nono. Jehova obed jang’ad bura+ e kind Jo-Israel gi Jo-Amon kawuono.’”

28 To ruodh Jo-Amon ne otamore winjo wach ma Jeftha ne oorone.

29 Roho mar Jehova nopong’o Jeftha,+ mi okadho Gilead gi Manase, modhi Mizpe man Gilead.+ Ka noa kanyo, nodhi mi omonjo Jo-Amon.

30 Jeftha nokuong’ore+ ne Jehova niya: “Ka ichiwo Jo-Amon e lweta, 31 mi aduogo gi kuwe bang’ loyogi, to ng’ato ang’ata ma nokwong wuok e oda ka biro romona nobed mari, in Jehova,+ kendo abiro chiwe kaka misango miwang’o.”+

32 Omiyo, Jeftha nodhi kedo gi Jo-Amon, kendo Jehova nochiwogi e lwete. 33 Nonego ji mang’eny e mier 20 chakre Aroer nyaka Minith. Bende, ne onego ji nyaka Abel-keramin. Kuom mano, Jo-Israel noloyo Jo-Amon.

34 Ka ne Jeftha odok dalane Mizpa,+ nyare ne obiro romone ka goyo thum kendo miel. Ne en nyathi achiel kende. Jeftha ne onge wuoyi kata nyako machielo. 35 To ka ne oneno nyareno, noyiecho lepe, mowacho niya: “Yaye nyathina, inego chunya! Kare in e ng’at ma asekuong’ora ni abiro chiwo! To nikech asesingora ne Jehova, ok anyal lokora.”+

36 Nyare nowachone niya: “Wuora, ka isesingori ne Jehova kamano, to tim koda mana kaka isesingori,+ nimar Jehova osemiyo ichulo kuor ne Jo-Amon wasiki.” 37 Eka nomedo wacho ne wuon-gi niya: “Yie akwayie gimoro achiel kende: Weya mondo adhi e gode kuom dweche ariyo mondo aywag gi nyiri wetena nikech ok bi kenda.”

38 Jeftha nodwoke niya: “Inyalo dhi.” Omiyo, ne odhi e gode gi nyiri wetene mondo oywag kuom dweche ariyo nikech ne ok dhi kende. 39 Bang’ dweche ariyo, noduogo ir wuon-gi, mi wuon-gi notimo mana kaka nosekuong’ore.+ Nyareno ne ok onindo gi dichwo e ngimane duto. Kendo Jo-Israel ne obedo gi tim* mar 40 oro nyigi mondo gidhi gipwo nyar Jeftha Ja-Gilead, ndalo ang’wen, higa ka higa.

12 Ne oluong Jo-Efraim, mi ging’ado aora mi gidhi Zafon* kendo ne giwacho ne Jeftha niya: “Ang’o momiyo ne ok iluongowa sa ma ne idhi kedo gi Jo-Amon?+ Wabiro wang’i gi odini te.” 2 Jeftha to ne onyisogi niya: “An kaachiel gi joga ne wabedo gi ywaruok matek gi Jo-Amon kendo ne aluongou mondo ubi ukonya to ne ok ubiro resa e lwetgi. 3 Bang’ neno ni ne ok udwar konya, ne achoko chir* mi adhi kedo gi Jo-Amon,+ kendo Jehova ne oketogi e lweta. Omiyo, ang’o momiyo kawuono ubiro kedo koda?”

4 Jeftha ne ochoko Jo-Gilead duto+ kendo ne gikedo gi Jo-Efraim, mi Jo-Gilead ne oloyo Jo-Efraim ma ne oyudo osejarogi niya: “Kata obedo ni un Jo-Gilead modak e gwenge mag Efraim kod Manase, ng’euru ni un mana jo ma ne oringo koa Efraim.” 5 Jo-Gilead ne otelo ne Jo-Efraim mi gigeng’o kuonde ming’adogo Aora Jordan.+ Ka ne Jo-Efraim temo kalo kuondego, ne gikwayo Jo-Gilead niya, “Yienwauru wang’ad aora.” Jo-Gilead to ne penjo ng’ato ka ng’ato kuomgi ni, “Dibed ni in Ja-Efraim? To ka ne ng’atno odwoko ni, “Ooyo!” 6 Jo-Gilead ne wachone ni, “Wach ni Shiboleth.” Kata kamano, en ne owacho ni, “Siboleth” nikech Jo-Efraim ne ok nyal luongo nyingno maber. Mano ne miyo Jo-Gilead nego ng’atno kanyo gi kanyo. Kamano ne oneg Jo-Efraim 42,000 e kindeno.

7 Jeftha ne obedo jang’ad bura e piny Israel kuom higni auchiel, kae to ne otho moyike e dalane man Gilead.

8 Bang’ Jeftha, Ibzan Ja-Bethlehem ne obedo jang’ad bura e piny Israel.+ 9 Ibzan ne onyuolo yawuoyi 30 gi nyiri 30. Ne ochiwo nyige mondo okend e dhoudi mamoko, kendo ne okelo ne yawuote nyiri 30 kowuok e dhoudi mamoko mondo gikend. Ibzan ne obedo jang’ad bura e Israel kuom higni abiriyo. 10 Ibzan ne otho moyike Bethlehem.

11 Bang’ Ibzan, Elon Ja-Zebulun ne obedo jang’ad bura e Israel kuom higni apar. 12 Elon Ja-Zebulun ne otho moyike Aijalon man e piny Zebulun.

13 Bang’ Elon, Abdon wuod Hilel Ja-Pirathon ne obedo jang’ad bura e piny Israel. 14 Ne en gi yawuoyi 40 gi nyikwayo 30 ma yawuoyi ma ne idho punde 70. Ne obedo jang’ad bura e piny Israel kuom higni aboro. 15 Eka Abdon wuod Hilel Ja-Pirathon ne otho moyike Pirathon e piny Efraim, e god Ja-Amalek.+

13 Kendo Jo-Israel nochako timo gik maricho e wang’ Jehova,+ mi Jehova nochiwogi e lwet Jo-Filistia+ kuom higni 40.

2 E kindeno, ne nitie Ja-Dan+ ma nyinge Manoa,+ to ne odak Zora.+ Chiege ne onge nyathi nikech ne en migumba.+ 3 Chieng’ moro malaika mar Jehova ne ofwenyore ne dhakono monyise niya: “Kata obedo ni ionge nyathi nikech in migumba, ibiro mako ich minyuol wuoyi.+ 4 En mana ni kik imadh divai kata kit kong’o moro amora,+ bende kik icham gimoro ma ok ler e nyim Nyasaye.+ 5 Ibiro mako ich minyuol wuoyi kendo kuom ngimane duto kik liel wiye,+ nikech obiro bedo Ja-Nazir mar Nyasaye chakre nyuolne, kendo nores Jo-Israel e lwet Jo-Filistia.”+

6 Dhakono ne odhi monyiso chwore kama: “Ng’at Nyasaye ne obiro ira. Ne ochalo malaika mar Nyasaye kendo ne olich miwuoro. Ok ne apenje ka ma ne oaye, nyinge bende ne ok onyisa.+ 7 Gima ne onyisa e ma: ‘Ibiro mako ich minyuol wuoyi. En mana ni kik imadh divai kata kit kong’o moro amora, bende kik icham gimoro ma ok ler, nikech nyathi mibiro nyuolono nobed Ja-Nazir mar Nyasaye chakre nyuolne nyaka thone.’”

8 To Manoa nosayo Jehova kama: “A Jehova, yie iornwa ng’aticha kendo, mondo obi opuonjwa kaka wabiro pidho nyathi midhi nyuolno.” 9 Nyasaye notimo kaka Manoa nokwaye, mi malaika mar Nyasaye ne odok ir dhakono ka en oko mar dala; to Manoa chwore ne onge kode kanyo. 10 Omiyo, dhakono noringo piyo ir chwore mowachone niya: “Ne! Ng’at ma nyocha obiro iracha oduogo kendo.”+

11 Ka ne Manoa owinjo kamano, nochung’ moluwo chiege. Ka ne ochopo ir ng’atno, nopenje niya: “In e ng’at ma nyocha owuoyo gi chiega?” Nodwoke kama: “Ee, en an.” 12 Eka Manoa nonyise niya: “Mad wecheni timre kamano adier! Apenji, ngima nyathino biro chalo nade, to obiro timo tich mane?”+ 13 Malaika mar Jehova nodwoko Manoa kama: “Kik chiegi tim gimoro amora ma ne akwere ni kik otim.+ 14 Kik ocham gimoro amora molos gi mzabibu, kata madho divai, kata kit kong’o moro amora.+ Bende, kik ocham gimoro ma ok ler,+ to oluw weche duto ma asechike.”

15 Manoa nokwayo malaika mar Jehova kama: “Yie irit matin walosni nyadiel mondo icham.”+ 16 Malaika mar Jehova nodwoko Manoa niya: “Kata ka arito, ok abi chamo chiembu; kata kamano, ka misango miwang’o e ma udwaro chiwo ne Jehova, unyalo timo kamano.” Manoa ne ok ong’eyo ni malaika mar Jehova e ma ne owuoyogo. 17 Kae to Manoa ne openjo malaika mar Jehova kama: “Nyingi ng’a,+ mondo wabi wamiyi duong’ ka gik misenyisowagi otimore adier?” 18 Malaika mar Jehova to ne odwoke niya: “Idwaro ng’eyo nyinga nang’o, to en nying malich miwuoro?”

19 Eka Manoa ne okawo nyadiel kod cham mi ochiwogi kaka misango ne Jehova e wi lwanda. E sechego Nyasaye ne otimo gimiwuoro ka Manoa gi chiege neno. 20 Malaika mar Jehova ne odonjo e mach ma ne liel e kendo mar misango moidho gi majno malo e polo ka Manoa gi chiege ng’iyo. Gikanyono, ne gipodho piny auma. 21 Chakre kanyo, malaika mar Jehova ne ok oduogo kendo ir Manoa gi chiege. Eka Manoa nofwenyo ni kare ne en malaika mar Jehova.+ 22 Manoa nowacho ne chiege kama: “Wabiro tho, nikech waseneno Nyasaye.”+ 23 To chiege ne odwoke niya: “Dabed ni Jehova dwaro negowa, ok doyie gi misango miwang’o+ kata chiwo mar cham ma wasemiye, bende ok doyie mondo wane gigi duto, kata dine ok owachonwa wechegi duto.”

24 Bang’e, dhakono ne onyuolo wuoyi mochake ni Samson;+ kaka wuoyino ne medo dongo, e kaka Jehova bende ne guedhe. 25 Bang’ kinde, roho mar Jehova nochako tiyo kuom Samson+ ka en Mahane-dan+ manie kind Zora gi Eshtaol.+

14 Samson nolor modhi Timna mi oneno nya Jo-Filistia kuno. 2 Ka ne oduogo, ne owacho ne min-gi gi wuon-gi niya: “Ka ne an Timna, ne aneno nya Jo-Filistia moro momako wang’a, omiyo adwaro ni udhi unyuomnago.” 3 Jonyuolne to ne openje niya: “Ok diyud nyako e kind wedewa kata kuom jowa?+ Nyaka ikend mana nyar jo ma ok oter nyangu?” Kata kamano, Samson ne odwoko wuon mare ni: “Nyuomnagouru anyuoma, nikech oberna.”* 4 Jonyuolne ne ok ong’eyo ni Jehova e ma ne tayo wachno, nimar Nyasaye ne manyo thuolo mar kedo gi Jo-Filistia ma kindeno ne nigi teko e wi Jo-Israel.+

5 Samson ne odhi gi jonyuolne Timna, to ka ne ochopo e puothe mag mzabibu mag Timna, nopo ka sibuor* ruto kochome tir. 6 Gikanyono, roho mar Jehova nomiyo obedo gi teko+ moyiecho sibuorno diriyo gi lwete nono mana kaka ng’ato diyiech nyadiel. Kata kamano, ne ok onyiso jonyuolne gima ne otimono. 7 Ka ne Samson ochopo Timna, ne owuoyo gi nyakono kendo nyakono pod ne berne abera.+

8 Bang’e, ka ne odok thurgi nyakono mondo okawe,+ ne obaro mondo ong’i sibuor ma ne onegocha, to ne oyudo ka kich gi more opong’o sibuorno. 9 Nochodho mor kich gi lwete mi ochako chamo ka odhi. To ka ne ojuko jonyuolne, ne opogonegi mor kichno mondo gicham, to ne ok onyisogi ni ogole kuom sibuor ma ne onegocha.

10 Ka ne gichopo dalagi nyakono, Samson ne obago nyasi kuno, nimar kamano e kaka yawuoyi ne timoga. 11 Ka ne jodalano onene, ne gikelo yawuoyi 30 mondo obudh kode. 12 Samson ne onyiso yawuoyigo niya: “Daher goyonu ngero moro, to ka unyisa tiende ka ndalo abiriyo mag nyasini pok orumo, abiro miyou lewni* ma iye 30 kod lewni ma oko 30. 13 To ka lero tiend ngerono otamou, un e ma ubiro miya lewni ma iye 30 gi lewni ma oko 30. Ne gidwoke niya: “Kare nyiswa ngerono mondo wawinji.” 14 Ne ogoyonegi ngerono kama:

Kata kamano, ndalo adek ne okalo ka lero tiend ngerono pod otamogi. 15 E odiechieng’ mar ang’wen ne giwacho ne chi* Samson niya: “Wuond chwori*+ mondo onyiswa tiend ngerono, to ka ok itimo kamano, wabiro wang’i kaachiel gi od wuonu te. Uparo ni ne uluongowa kae mondo umawa gikwa?” 16 Bang’ mano, chi Samson ne odhi ywak ne Samson kowachone niya: “Ok ihera, ang’eyo ni isin koda,+ nikech isegoyo ne jowa ngero to an to pok inyisa tiende.” Samson nodwoke niya: “Kata mana wuonwa gi minwa e ma pok anyiso tiend ngerono, ere kaka danyisi?” 17 Kuom odiechienge duto modong’ mag nyasino, nyakono ne siko ywakne. Gikone, e odiechieng’ mar abiriyo, Samson ne ool gi ywakne monyise tiend ngerono. En to ne odhi monyiso yawuoyika.+ 18 E odiechieng’ mar abiriyo ka chieng’ pok opodho,* jo dalano ne onyiso Samson niya:

Nodwokogi niya:

19 Bang’ mano, roho mar Jehova ne omiye teko+ molor nyaka Ashkelon+ kendo ne onego chwo 30 kuno mokawo lepgi. Ne otero lepgigo ne jo ma ne onyise tiend ngerone.+ Ne odok e od wuon-gi ka en gi mirima mager.

20 Ne ochiw chi Samson+ ne achiel kuom yawuoyi 30 ma ne okel mondo obudh gi Samson e nyasi.+

15 Bang’ kinde, Samson ne odhi gi nyadiel limo chiege. Ne en ndalo mikayoe ngano. Ne owacho e chunye niya: “Daher dhi e gul* ir chiega.” Kata kamano, wuon nyakono ne ok oyiene donjo kuno. 2 Wuon nyakono ne onyise niya: “Ne aparo ni koro isejok kode+ mi achiwe ne achiel kuom yawuoyi ma ne ubudhogoka.+ Donge nyamin-gi matin jaber moloye? Ok ikawe ma kare.” 3 Samson ne owachonegi niya: “Wang’ni ka atimo ne Jo-Filistia marach, to aonge gi ketho.”

4 Samson ne odhi momako bwe 300 motudo yiw bwe ariyo ariyo kae to oketo gima inyalo chwinyie mach e kind yiwgigo. 5 Nomoko mach moweyogi mondo gidhi e puothe Jo-Filistia mi giwang’o gimoro amora e puothego; cham moseka gi mapod ochung’, gi puothe mzabibu duto kod puothe zeituni.

6 Jo-Filistia ne openjo niya: “Ng’a motimo kama?” Ne onyisgi ni: “Samson or Ja-Timna e ma otimo kamano, nikech jaduong’ne nokawo chiege momiyo achiel kuom yawuoyi ma ne obiro budheka.”+ Ka ne giwinjo kamano, ne gidhi mi giwang’o nyakono gi wuon mare.+ 7 Eka Samson ne onyisogi niya: “Ka kamano e kaka utimo, to ok abi yueyo ka pok achulo kuor.”+ 8 Omiyo, ne onego ji mang’eny, achiel bang’ machielo. Kae to ne odhi dak e rogo manie lwanda Etam.

9 Bang’e, Jo-Filistia ne odhi goyo kambi e piny Juda, kendo ne giwuotho awuotha ei Lehi ka gitimo gik maricho.+ 10 Jo-Juda ne openjogi niya: “Marang’o ubiro kedo kodwa?” Ne gidwoko niya: “Wabiro mako Samson mondo watimne mana kaka osetimonwa.” 11 Jo-Juda 3,000 ne owuok modhi e rogo manie lwanda Etam ir Samson mi ginyise niya: “Donge ing’eyo ni Jo-Filistia locho e wiwa?+ Marang’o isetimonwa kama?” Ne odwokogi niya: “Ne atimonegi mana kaka ne gitimona.” 12 To gin ne gidwoke kama: “Wabiro tweyi mondo wachiwi e lwet Jo-Filistia.” Samson ne owachonegi niya: “Kuong’reuru ni un to ok ubi hinya.” 13 Ne gidwoke niya: “Wan wabiro mana tweyi kae to wachiwi e lwetgi, ok wabi negi.”

Omiyo ne gitweye gi tonde ariyo manyien kae to gigole e lwanda kanyo. 14 Ka ne gichopo Lehi, Jo-Filistia ne okok gi mor ka ne ginene. Eka roho mar Jehova ne omiyo Samson teko+ mi tonde ma ne otwego bedene ne ochot mayot mana ka usi mar kitani morew e mach, kendo ne gileny nono e lwete.+ 15 Samson noneno chok-lemb punda mapod numu, mokwanyogo, mi onegogo ji 1,000.+ 16 Samson ne owacho kama:

“Gi chok punda achiel ne anego ji mi achokogi pidhe pidhe!

Gi chok punda achiel ne anego ji 1,000.”+

17 Ka ne otieko wuoyo, ne owito chok pundano moluongo kanyo ni Ramath-lehi.+ 18 Riyo ne oloye, mi osayo Jehova kama: “In e ma isemiyo jatichni resruok maduong’ kama. To koro riyo e ma dimi atho e lwet jo ma ok oter nyangugi?” 19 Kuom mano, Nyasaye ne obaro bur moro man Lehi mi pi owuok.+ Ka ne osemodho pigno, chunye* ne oduogo. Mano e ma omiyo noluongo kanyo ni En-hakore, kendo sokono ni Lehi nyaka kawuononi.

20 Samson ne obedo jang’ad bura e piny Israel e ndalo Jo-Filistia kuom higni 20.+

16 Chieng’ moro ka ne Samson odhi Gaz′a, ne oneno dhako moro ma ochot, mi odonjo e ode. 2 Ne owach ne Jo-Gaza niya: “Samson obiro dalawa ka.” Omiyo, ne gibuto ka gilworo dalano kendo ne gikiye e rangach otieno mangima. Ne giwacho e kindgi kama: “Wabiro nege ka piny oru.”

3 Kata kamano, Samson ne onindo kanyo nyaka dier otieno kae to ne ochiewo mi omako thike mag ranga dalano gi sirnige ariyo mopudhogi kanyakla gi yath ma ne orindgigo. Noketogi e goke mi oterogi e wi got momanyore gi Hebron.

4 Bang’e, ne omako osiep gi nyako ma nyinge Delila+ ma ne odak but Aora Sorek. 5 Eka jodong Jo-Filistia nodhi monyiso nyakono niya: “Wuondnwa Samson+ mondo ing’e ka ma tekone mang’enygi wuokie kendo kaka wanyalo tweye mi waloye gi teko. Kitimo kamano to ng’ato ka ng’ato kuomwa biro miyi fedha 1,100.

6 Bang’e, Delila ne okwayo Samson kama: “Yie inyisa ka ma tekoni mang’enygi aye kod gima inyalo tweyigo kod kaka inyalo loyi gi teko.” 7 Samson nodwoke ni, “Kotweya gi tonde* abiriyo mapod numu, tekona biro dok chien mi abed mana kaka jomoko. 8 Omiyo, jodong Jo-Filistia notero ne Delila tonde abiriyo manumu motweyogo Samson. 9 Eka Delila ne okok matek niya: “Samson, Jo-Filistia ero biro maki!” Gikanyono, Samson ne ochodo tondego mayot mana ka tworo ma mach orewo.+ To gie kindeno duto, Jo-Filistia ne oyudo obuto ne Samson e ot ma iye. Kata kamano, ne ok gifwenyo ka ma tekone aye.

10 Eka Delila nowacho ne Samson kama: “In iwuonda awuonda; ok inyisa adier. Koro nyisa, inyalo tweyi gang’o?” 11 Ne odwoke niya: “Kotweya gi tonde manyien ma pok otigo, tekona biro dok chien mi abed mana kaka jomoko.” 12 Delila nokawo tonde manyien motweyego kae to okok matek niya: “Samson, Jo-Filistia ero biro maki!” (Jo-Filistia ne oyudo obuto ne Samson e ot ma iye) Gikanyono, Samson ne ochodo tondego mana ka usi.+

13 Eka Delila nowacho ne Samson kama: “Nyaka chop sani pod iwuonda awuonda, ok inyisa adier.+ Koro nyisa gima inyalo tweyigo.” Nodwoke niya: “Tekona biro lal ka otwe yie wiya mokadi abiriyo mi otwang’gi motegno gi usi.” 14 Omiyo, Delila ne otwang’ogi mi omakogi motegno gi riwi, kae to ne okok matek niya: “Samson, Jo-Filistia ero biro maki!” Samson ne ochiewo mopudho riwino kod usi ma ne otwang’go yie wiye.

15 Delila ne onyise kama: “Ere kaka inyalo wacho ni ihera+ to chunyi bor koda kama? Isewuonda nyadidekgi te, kendo pok inyisa ka ma tekoni mang’enygi aye.”+ 16 Nikech Delila ne ywakne kamano pile ka pile, Samson ne ojok mi ogombo mana tho.+ 17 Gikone, ne onyise adiera te manie chunye. Nonyise niya: “Yie wiya pok ne olielga nyaka nene, nikech an Ja-Nazir mar Nyasaye chakre ne nyuola.+ Omiyo, ka oliela, tekona biro weya mi abed mana kaka jomoko.

18 Ka Delila ne ofwenyo ni Samson osenyise adiera te manie chunye, noluongo jodong Jo-Filistia+ piyo piyo kowachonegi niya: “Biuru, nimar wang’ni oyawona chunye.” Omiyo, jodong Jo-Filistia nobiro gi pesa ma ne gisesingone. 19 Delila ne ohoyo Samson mi onindo koteno wiye e chong Delila. Eka Delila ne oluongo ng’at moro molielo yie wi Samson mokadi abiriyo. Bang’ mano, Delila ne ochako loyo Samson gi teko, nikech koro tekone ne weye. 20 Eka Delila ne okok matek niya: “Samson, Jo-Filistia ero biro maki!” Samson ne ochiew mowacho e chunye kama: “Abiro buodho mana kaka pile.”+ Gima ne ok ong’eyo en ni Jehova ne oseweye. 21 Jo-Filistia nobiro momake mi gigolo wengene oko. Kae to ne gitere Gaza mi gitweye gi nyororo mar mula, kendo gikete obedo jarego e jela. 22 Kata kamano, yie wiye ma ne oseliel nochako dongo kendo.+

23 Jodong Jo-Filistia ne wacho niya: “Nyasachwa osechiwo Samson jasikwa e lwetwa!” Omiyo, ne gichokore mondo gitim sawo kendo gichiw misango ne Dagon+ nyasachgi. 24 Ka ne gineno Samson, ne gipako nyasachgi ka giwacho niya: “Nyasachwa oseketo jasikwa e lwetwa, jal moseketho pinywa+ kendo osenego jowa mang’eny.”+

25 Nikech mor gi ilo ma ne gin-go, ne giwacho kama: “Keluru Samson mondo otugnwa.” Eka ne gigole e jela mi gikele mondo otugnegi. Ne gikete mondo ochung’ e kind sirni mag odno. 26 Eka Samson ne owacho ne wuoyi ma ne omako lwete niya: “Chor lweta e sirni mag odni mondo asirrae.” 27 (Ne oyudo odno opong’ gi chwo gi mon. Kendo jodong Jo-Filistia duto ne nikanyo, to chwo gi mon madirom 3,000 ne nie wi tado malo ka ging’iyo kaka Samson tugo.)

28 Samson+ ne oywak ne Jehova niya: “A Jehova, Wuon Loch Duto, asayi, para kendo miya teko+ mana dichielni kende, A Nyasacha, yie achul kuor kuom Jo-Filistiagi mana ne wang’a achiel kuom wengena ariyo ma ne gigolo.”+

29 Eka Samson nonyono piny matek mosiro bedene e sirni ma diere mag odno, noketo bade ma korachwich e siro achiel, to bade ma koracham e siro machielo. 30 Mi nokok matek niya: “We atho gi Jo-Filistiagi!” Kae to ne odhiro sirnigo gi tekone duto mi odno noruombore piny monego jodong Filistia gi ji duto ma ne ni iye.+ Omiyo, jo ma Samson ne othogo, ne ng’eny moloyo ma ne onego e ngimane duto.+

31 Bang’e, owetene gi joka wuon-gi ne obiro mokawo ringrene mi gitero thurgi. Ne giyike e kind Zora+ gi Eshtaol, e rogo ma ne oyikie Manoa+ wuon-gi. Noyudo Samson osebedo jang’ad bura e Israel kuom higni 20.+

17 Ne nitie ng’at moro ma ne iluongo ni Mika ma ne odak e piny gode mag Efraim.+ 2 Ng’atno nowacho ne min-gi niya: “Iparo fedha magi 1,100 ma ne okwal mi ikuong’o ng’at ma ne okwalogi ka awinjo? An e ma ne akwalo fedhago kendo an kodgi.” Ka ne min-gi owinjo kamano, ne owacho niya: “Mad Jehova oguedh wuoda.” 3 Kae to Mika ne oduoko ne min-gi fedhago duto. Kata kamano, min-gi ne owacho niya: “Abiro walo fedhagi ne Jehova mondo alosnigo sanamu milamo mar bao kod mar chuma.+ Omiyo, koro fedhagi biro bedo meki.”

4 Ka ne Mika oseduoko ne min-gi fedhago, min-gi ne okawo fedha 200 momiyo jatheth ma ne olosonego sanamu mar bao gi sanamu mar chuma, mi ne oket sanamugo e od Mika. 5 Mika ne nigi ot mikete nyiseche, kendo ne oloso efod*+ gi terafim*+ moketo achiel kuom yawuote mondo obedne jadolo.+ 6 E kindego ne onge ruoth e piny Israel,+ kendo ng’ato ka ng’ato ne timo gima owinjore e wang’e.+

7 Ne nitie rawera moro ma Ja-Bethlehem+ man Juda kendo ne owuok e anyuola mar Juda. Ne en Ja-Lawi+ kendo ne oyudo osedak Bethlehem kuom kinde. 8 Rawerano ne owuok Bethlehem man Juda komanyo ka ma onyalo dakie. Nowuotho mochopo e od Mika e piny gode mag Efraim.+ 9 Mika ne openje niya: “Iwuok kanye?” Rawerano nodwoke ni, “An Ja-Lawi mowuok Bethlehem man Juda, to amanyo ka ma anyalo dakie.” 10 Eka Mika nowachone niya: “Dag koda ka mondo ibedna jang’ad rieko* kendo jadolo. Abiro chuli fedha apar higa ka higa kendo abiro miyi lewni kod chiemo.” Omiyo, Ja-Lawino ne odonjo e od Mika. 11 Ne oyie dak gi Mika mobedo mana kaka achiel kuom yawuote. 12 Kendo Mika noketo Ja-Lawino mondo obedne jadolo,+ mi ne odak e od Mika. 13 Kae to Mika nowacho niya: “Koro ang’eyo ni Jehova biro guedha, nikech Ja-Lawi e jadolona.

18 E kindego piny Israel ne onge ruoth.+ Bende, e kindeno Jo-Dan+ ne manyo ka ma ginyalo dakie nikech nyaka chop ndalogo ne pok giyudo lopgi e kind Jo-Israel.+

2 Jo-Dan ne oyiero ji abich mathuondi kuomgi mondo odhi onon piny. Ne giyierogi kowuok Zora gi Eshtaol,+ kendo ne giwachonegi niya: “Dhiuru unon kaka pinyno chalo.” Ka ne jogo ochopo e piny gode mag Efraim, ne gibworo e od Mika+ ma ginindo kanyo. 3 Ka ne gin kanyo, ne giwinjo dwond rawera ma Ja-Lawi ma ne odak gi Mika. Omiyo, ne gi dhi ire mi gipenje niya: “Ng’a mokeli kae? Ang’o mitimo ka? En dich mane ma omaki kae?” 4 Ne odwokogi niya: “Mika e ma oketa ka, atiyone kaka jadolo, kendo ochula.”+ 5 Eka ne ginyise niya: “Penjnwae Nyasaye ka wuodhwa biro bedo maber.” 6 Jadolono nodwokogi niya: “Dhiuru gi kuwe, Jehova biro tayou e wuodhuno.”

7 Ji abichgo ne odhi nyime gi wuoth mi gichopo Laish.+ Ne giyudo ka jo ma odak kuno odak mana ka Jo-Sidon ma onge gima gichando. Ne gidak gi kuwe kendo ne ok gipar ni inyalo monjgi.+ Bende, onge ruoth ma ne obiro chandogi e pinygi. Ne gidak mabor gi Jo-Sidon, kendo ne gionge tudruok moro amora gi ogendni mamoko.

8 Ka ne gidok ir owetegi ma ne ni Zora gi Eshtaol,+ owetegigo ne openjogi kama: “Uwuotho nade?” 9 Ne gidwokogi niya: “Wadhiuru waked kodgi, wayudo ka pinyno ber ahinya. Kik uluor, kendo kik udigni dhi kawo pinyno. 10 Ka uchopo kuno ubiro yudo ka pinyno lach kendo jo ma odak kuno odak adaka ma ok gipar ni inyalo monjgi.+ Nyasaye oseketo pinyno e lwetwa, kendo en piny ma ok ochando gimoro amora.”+

11 Eka jolweny 600 ma joka Dan ne owuok Zora gi Eshtaol,+ 12 mi gigoyo kambi Kiriath-jearim+ man Juda. Mano emomiyo iluongo kanyo ni Mahane-dan+ nyaka kawuononi. Oyudore yo podho chieng’ mar Kiriath-jearim. 13 Ka ne giwuok kanyo ne gidhi nyaka e piny gode mag Efraim mi gichopo e od Mika.+

14 Ji abich ma ne odhi nono piny Laish+ ne onyiso owetegi niya: “Be ung’eyo ni utegi nigi efod,* gi terafim,* gi sanamu mopa, gi sanamu mar chuma?+ Omiyo, paruru maber gima onego watim.” 15 Jolwenygo ne obaro e dala Mika, ka ma Ja-Lawi nodakie+ mondo ging’e kaka Ja-Lawino dhi. 16 Gie sechego, jolweny mia auchielgo+ ne ochung’ e dho rangach. 17 To ji abich ma ne odhi nono piny ka+ ne odonjo e ot mondo gikaw sanamu mopa, gi sanamu mar chuma,+ gi terafim,*+ kod efod.*+ (Jadolo+ to ne ochung’ e dho rangach gi ji 600 ma jolwenyka.) 18 Ji abichka ne odonjo e od Mika mi gikawo sanamu mopa, gi sanamu mar chuma, gi terafim,* kod efod.* Mi jadolo ne openjogi niya: “Mano ang’o mutimono?” 19 Ne gidwoke niya: “Mi dhogi! Ling’ thi! Bi mondo ibednwa jang’ad rieko kendo jadolo. Ere gima ber moloyo? Bedo jadolo mar od ng’ato achiel+ koso bedo jadolo mar dhoot mangima e Israel?”+ 20 Jadolono ne mor gi wachno, moting’o efod, gi terafim* gi sanamu mopa+ modhi kodgi.

21 Ne gichako wuoth ka giketo nyithindgi, gi jambgi, kod mwandugi nyime. 22 Ka ne gisechwalre matin gi dala Mika, jo ma ne odak machiegni gi dala Mika nochokore molawogi kendo ojukogi. 23 Ne giluongo joka Dan matek, mi joka Dan ne olokore mopenjo Mika niya: “En ang’o machandi? Marang’o ilawowa gi jogi duto?” 24 Ne odwokogi niya: “Ere kaka dupenja ni ang’o machanda to usekawo nyisechena gi jadolona mi udhigo? Uparo ni uweya gang’o?” 25 Joka Dan ne odwoke niya: “Kik idhaw kodwa, nono to jo ma nigi mirimagi biro hinyi, mi ginegi kaachiel gi joodi.” 26 Jo-Dan ne odhi nyime gi wuodhgi, to Mika ne olokore modok e ode nikech nofwenyo ni jogo tek moloye.

27 Ka joka Dan ne osemayo Mika gike kendo kawo jadolone, ne gidhi Laish,+ ir jo ma ne odak mokuwe, ma ne ok par ni inyalo monjgi.+ Ne ginego jogo gi ligangla, mi giwang’o dalagino. 28 Dalano ne nie paw Beth-rehob.+ Onge ng’at ma ne nyalo reso dalano nimar ne en mabor gi Sidon, kendo jodalano ne onge tudruok moro amora gi ogendni mamoko. Bang’e Jo-Dan ne ogero dalano kendo, mi gidakie. 29 Chon dalano ne iluongo ni Laish,+ to gin ne gichako dalano ni Dan,+ ma en nying wuon-gi, ma ne en achiel kuom yawuot Israel.+ 30 Ne gichungo sanamu mopacha kanyo.+ To Jonathan+ wuod Gershom,+ ma wuod Musa kaachiel gi yawuote ne obedonegi jodolo nyaka e kinde ma ne oter joka Dan e tuech. 31 Joka Dan ne ochungo sanamu mopa ma ne Mika oloso, kendo sanamuno ne osiko kanyo kuom ndalo duto ma od Nyasaye ne ni Shilo.+

19 E ndalogo, ka pod ne onge ruoth e Israel,+ Ja-Lawi moro ma ne odak ka mabor e gode mag Efraim+ ne okendo nyako moro ma ne wuok Bethlehem+ man Juda. 2 Chiegeno ne ochako chodo mi oweye modok dalagi Bethlehem man Juda mi nobedo kuno kuom dweche ang’wen. 3 Eka chwore ne odhi saye mondo oduogi. Ne odhi gi jatichne ma dichwo kaachiel gi punde ariyo. Dhakono ne orwake e od wuon-gi, kendo wuon-gi ne mor ka ne onene. 4 Wuon nyakono nokwaye mondo obed kodgi kuom ndalo adek. Ndalogo duto, ne gichiemo, ne gimetho, kendo ng’atno ne nindo kuno.

5 E odiechieng’ mar ang’wen, ka ne gimondo chiewo mondo gidog thurgi, wuon nyakono ne onyiso jalo niya: “Kwong icham gimoro mondo iyud teko eka idhi.” 6 Omiyo, ne gibet piny mi gichiemo kendo gimetho. Bang’ mano, wuon nyakono nowacho ne ng’atno niya: “ Asayi, nind kawuono bende mondo imed budho kodwa.” 7 To ka ng’atno ne ochung’ mondo odhi, jaduong’ne ne omedo saye mondo kik oa. Omiyo, ne onindo kanyo kendo.

8 E odiechieng’ mar abich, ng’atno ne omondo chiewo kendo mondo odog thurgi, to wuon nyako ne onyise niya: “Kwong icham gimoro mondo iyud teko eka idhi.” Ne gichiemo mi gibudho nyaka odhiambo. 9 Ka ne ng’atno oseikore wuok gi chiege kaachiel gi jatichne, jaduong’ne nonyise niya: “Koro ne, piny oselewo. Asayi, yie inind kawuono bende. Nind kawuono bende mondo ibudhwa kae to inyalo wuok gokinyi mondo idog thuru.” 10 Kata kamano, ng’atno ne ok oyie nindo kuno kendo, omiyo ne ochung’ mochako wuoth nyaka Jebus, tiende ni Jerusalem.+ Ne odhi gi chiege kod jatichne gi pundene ariyo.

11 Ka ne gichiegni chopo Jebus piny ne oseniang’ ahinya. Omiyo, jatije nonyise niya: “Donge wanyalo bworo e dala Jo-Jebus kae?” 12 To nodwoko jatijeno niya: “Ok wanyal bworo e dala ma ok mar Jo-Israel. Wabiro dhi nyaka Gibea.”+ 13 Eka nonyiso jatijeno niya: “Watem matek mondo wadhi wabwor Gibea kata Rama.”+ 14 Omiyo, ne gidhi nyime gi wuoth kendo chieng’ ne ochako podhonegi ka gichiegni chopo Gibea, dala Jo-Benjamin.

15 Omiyo, ne gibaro Gibea mondo gibwor kanyo. Ne gibet e laru mar dalano to onge ng’at ma ne orwakogi e ode.+ 16 Koro jaduong’ moro nobiro kanyo koa e puothe godhiambo. Ne en japiny gode mag Efraim,+ kendo nobiro dak Gibea, dala Jo-Benjamin.+ 17 Ka noting’o wang’e moneno ng’atno kobet e laru mar dalano, ne openje niya: “Ua kanye, to udhi kune?” 18 Ng’atno ne odwoke niya: “Waa Bethlehem man Juda to koro wadok thurwa e piny gode mag Efraim man ka mabor. Nyocha adhi Bethlehem man Juda+ to koro adok e od Jehova.* Kata kamano, onge ng’at ma oserwakowa mondo wabwor e ode. 19 Wan gi chiemo moromo pundewa,+ kod makate+ gi divai moroma gi chiega kod jatichna, kendo onge gima wachando.” 20 Kata kamano, jaduong’no nowacho niya: “Kik chunyu chandre. Abiro ritou maber. Wadhiuru e oda, kik unind e laru kae.” 21 Omiyo, ne odhi kodgi e ode kendo ne omiyo pundego chiemo, kae to ne gilwoko tiendegi mi gichiemo kendo gimetho.

22 To ka ne pod gibudho, chwo moko ma achach ma jo dalano ne obiro molworo odno, mi gichako dwong’o dhoot matek ka giwacho ne jaduong’ ma wuon odno niya: “Golnwa ng’at ma ne obiro e odi kae, mondo waterre kode.”+ 23 Eka jaduong’no ne owuok oko monyisogi niya: “Asayou owetena, kik utim gima rach kamano. Ng’atni en mana wendo e oda kae. Kik utim tim dwanyruok ma kamano. 24 An gi nyara ma pod silili kod chi ng’atno e oda kae. We akelnugi mondo uterru kodgi, ka mano e ma udwaro.+ Ng’atni to kik udwanyrugo.”

25 To jogo ne odagi winjo jaduong’no, omiyo Ja-Lawi ma ne obworo e ode ne ogolo chiege+ oko ne jogo. Ne ginindo kode githuon mi gidwanye otieno mangima nyaka kogwen kae to ne giweye mondo odhi. 26 Ne odhi mopodho e dhood jaduong’no ka ma chwore ne nitie monindo kanyo nyaka piny oyawore. 27 Ka ne chwore ochiewo gokinyi moyawo dhoot mondo odhi nyime gi wuodhe, noyudo chiege konindo oko to orieyo lwetene e dhoot. 28 Omiyo, ne owacho ne chiege niya: “Chung’ malo wadhi.” To chiege ne ok odwoke nikech ne osetho. Eka ng’atno ne okete e pundane mi ochako wuoth kodok thurgi.

29 Ka ne ochopo ode, ne okawo pala mi opogo ringre chiege nyadi 12 mi okowo moro ka moro ne dhoot ka dhoot mar Israel. 30 Ji duto ma ne oneno mano ne owacho niya: “Gima ka ma pok one kendo pok otimorega e oganda Israel nyaka ne giwuog Misri. Paruru wachni, unone matut+ mondo unyiswa gima onego watim.”

20 Jo-Israel duto nowuok chakre Dan+ nyaka Beer-sheba kod Gilead+ mi gichokore Mizpa e nyim Jehova.+ 2 Jotend dhout Israel duto ne okawo kargi e kind oganda mar Nyasaye. Jolweny duto ma ne omanore gi ligengni ne gin 400,000.+

3 Jo-Benjamin nowinjo ni jolwenj Jo-Israel ne odhi Mizpa.

Eka Jo-Israel ne openjo Ja-Lawi ma ne oneg chiege niya: “Lernwa ane, gima lich kamano ne otimore nade?”+ 4 Ja-Lawino+ ne odwokogi niya: “Ne adhi gi chiega Gibea+ man Benjamin mi wabworo kuno. 5 Jodalano nobiro molworo ot ma ne waninde gotieno mondo gimonja. An e ma ne gidwaro nega. Kata kamano, chiega e ma ne gimako mi ginindogo githuon, mi gikone otho.+ 6 Bang’e, ne apogo ringre chiega mi akowo ne dhoot ka dhoot mar Jo-Israel+ nikech ne gitimo tim modwanyore kendo mar wich-kuot e piny Israel. 7 Omiyo, un Jo-Israel duto, ng’aduru gima ubiro timo kuom wachni.”+

8 Ji duto ne ochung’ riat mowacho kama: “Onge kata ng’ato achiel kuomwa ma biro dok e hemane kata e ode. 9 Ma e gima wabiro timo ne Gibea: Wabiro yiero ji gi ombulu+ mondo odhi oked gi Gibea. 10 E dhoot ka dhoot mar Jo-Israel, wabiro kawo ji 10 kuom ji 100, kendo ji 100 kuom ji 1,000, gi ji 1,000 kuom ji 10,000, mondo gichok ne jolweny chiemo. Jolwenygo biro dhi kedo gi Gibea man Benjamin nikech tim modwanyore ma gisetimo e piny Israel.” 11 Jo-Israel duto ne oriwore mondo gidhi giked gi Gibea.

12 Koro dhoudi duto man Israel ne ooro joote ir Jo-Benjamin mondo owachnegi niya: “Ere kaka gima lich kama ne nyalo timore e kindu? 13 Nikech mano, miwauru Jo-Gibea ma timbegi achachgo+ mondo waneggi kendo watiekgi e piny Israel.”+ Kata kamano, Jo-Benjamin ne otamore winjo owetegi ma Jo-Israel.

14 Jo-Benjamin nowuok e miechgi mi gichokore Gibea mondo gidhi giked gi Jo-Israel. 15 E odiechieng’no, Jo-Benjamin nochoko jolweny 26,000 kowuok e miechgi, moro ka moro kuomgi ne omanore gi ligangla. Bende, ne gin gi chwo 700 moyier kowuok Gibea. 16 To kuom jolwenygo duto ne nitie chwo 700, ng’ato ka ng’ato kuomgi ne racham kendo ne olony ahinya e bayo kidi gi orujre ma nyalo dimbo kata mana yie wich achiel.

17 Jo-Israel to ne nigi jolweny 400,000 momanore gi ligangla,+ kendo moro ka moro ne en jalweny molony. 18 Ne gidhi Bethel penjo Nyasaye gima onego gitim.+ Ne gipenje niya: “En dhoot mane monego otelnwa sa ma wadhi kedo gi Jo-Benjamin?” Jehova ne odwokogi ni, “Dhood Juda e ma onego otelnu.”

19 Bang’ mano, Jo-Israel ne omondo gokinyi ma gidhi goyo kambi machiegni gi Gibea mondo gimonj dalano.

20 Jo-Israel nodhi kedo gi Jo-Benjamin Gibea, to ka ne gichopo kuno, ne gichanore ne lweny. 21 Ka ne Jo-Benjamin oneno kamano, ne giwuok Gibea mi ginego jolweny mag Jo-Israel 22,000 e odiechiengno. 22 Kata kamano, jolweny mag Jo-Israel ne ok oluor, mi ne gidok kanyo, kendo ne gichanore ne lweny mana kaka ne gisetimo e odiechieng’ mokwongo. 23 Bende, ne gidhi mi giywak e nyim Jehova ka gipenjo Jehova niya: “Be owinjore wadhi waked gi owetewa ma Jo-Benjamin kendo?”+ Jehova ne odwokogi ni, “Dhi uked kodgi.”

24 Omiyo, Jo-Israel ne odhi machiegni gi Jo-Benjamin e odiechieng’ mar ariyo mondo gimonjgi. 25 Kata kamano, Jo-Benjamin nowuok Gibea mi girado gi jolweny mag Israel e odiechieng’ mar ariyono. Kendo ne ginego jolwenj Israel 18,000+ momanore gi ligangla. 26 Ka ne jolwenj Israel oneno kamano, ne gidhi giduto Bethel. Ne gibet kanyo kendo ne giywak e nyim Jehova,+ ne giriyo kech+ nyaka odhiambo mi gigolo ne Jehova misengni miwang’o+ gi misengni mag kuwe.+ 27 Bang’ mano, Jo-Israel nopenjo Jehova gima owinjore gitim,+ nimar sandug singruok mar Nyasaye ne ni Bethel e kindego, 28 kendo Finehas+ wuod Eleazar ma wuod Harun e ma ne tiyo tij dolo e nyim sandugno. Jo-Israel nopenjo Nyasaye niya: “Be owinjore wadhi waked gi owetewa ma Jo-Benjamin kendo, koso wawe kedo kodgi?”+ Jehova ne odwokogi kama: “Dhi uked kodgi nimar kiny naketgi e lwetu.” 29 Eka Jo-Israel ne oketo jolweny mondo obut+ kolworo Gibea.

30 E odiechieng’ mar adek, Jo-Israel ne odhi kedo gi Jo-Benjamin kendo. Ne gichanore mondo giked gi Jo-Gibea mana kaka ne gisebedo ka gitimo.+ 31 Jo-Benjamin ne owuok mondo orad kodgi, to Jo-Israel ne olokore mi ochako ringo mi gimiyo Jo-Benjamin osudo mabor gi dala.+ Jo-Benjamin ne ochako nego jolweny mag Israel mana kaka ne gisetimo mokwongo. Ne ginego jolweny 30 e pap, moko ne ginego e ndara ma dhi Bethel to moko ne ginego e ndara ma wuok Gibea.+ 32 Omiyo, Jo-Benjamin nowacho niya: “Ero waloyogi mana kaka pile.”+ Kata kamano, Jo-Israel to ne wacho ni, “We waringuru aringa mondo wami gichop e nderni.” 33 Jo-Israel duto ne owuok ka ma ne gibutoe mi gichanore Baal-tamar mondo giked gi Jo-Benjamin, to Jo-Israel ma ne obuto e alwora mar Gibea bende ne owuok. 34 Jolwenj Israel 10,000 ne obiro e nyim Gibea, kendo lweny nobedo mager. Kata kamano, Jo-Benjamin ne ok ong’eyo ni gichiegni yudo masira.

35 Jehova ne omiyo Jo-Israel oloyo Jo-Benjamin+ odiechieng’no, mi Jo-Israel ne onego jolweny mag Jo-Benjamin 25,100.+

36 Ka ne Jo-Israel oringo, Jo-Benjamin koro ne paro ni gidhi loyogi.+ Kata kamano, Jo-Israel ne oringo nikech ne ging’eyo ni nitie jolwenjgi mobuto ma ne dhi monjo dala mar Gibea.+ 37 Jo ma ne obutogo ne okawo okang’ mapiyo piyo ma gidonjo Gibea, mi gikere e dalano duto kendo ginego ji ma ne ni kuno gi ligangla.

38 Noyudo Jo-Israel osewinjore ni jolwenjgi ma ne obuto ne dhi wang’o dalano, kendo yiro madum kochomo e polo e ma ne dhi bedo ranyisi.

39 Ka ne Jo-Israel olokore mondo girad gi Jo-Benjamin, Jo-Benjamin nokedo kodgi monego Jo-Israel 30.+ Ne giwacho niya: “Ero waloyogi mana kaka ne watimo e lweny motelo.”+ 40 Kata kamano, yiro motwere nochako dum Gibea kochomo polo. Ka ne Jo-Benjamin oloko ng’egi, ne gineno ka dalagi duto omako mach. 41 Jo-Israel ne olokore mi gichako kedo gi Jo-Benjamin ma ne koro obwok ahinya, nikech ne gifwenyo ni oselogi. 42 Jo-Benjamin ne oringo ka gichomo thim, to Jo-Israel ne olawogi. Jolweny ma ne wuok e mier man machiegni bende ne oriwore gi jolweny wetegi mondo gineg Jo-Benjamin. 43 Ne gilworo Jo-Benjamin ma gidinonegi kuonde duto. Ne gilawogi ma ok gimiyogi thuolo, mi ginegogi nyaka e nyim Gibea gi yo wuok chieng’. 44 Jo-Israel ne onego jolwenj Jo-Benjamin maroteke 18,000.+

45 Jo-Benjamin noringo e thim nyaka e lwanda mar Rimon,+ kendo Jo-Israel ne onego ji 5,000 kuomgi e nderni. Ne gidhi nyime lawogi nyaka Gidom mi ginego Jo-Benjamin 2,000 mamoko. 46 Kwan duto mar jolweny mag Jo-Benjamin ma ne oneg e odiechieng’no ne en 25,000. Jolweny ma ne oneggo duto ne gin chwo maroteke momanore gi ligangla.+ 47 Kata kamano, Jo-Benjamin 600 ne odhi e thim mopondo e lwanda mar Rimon, kendo ne gidak e lwandano kuom dweche ang’wen.

48 Gikone, jolweny mag Israel nolokore modhi nego Jo-Benjamin ma ne pod odong’ e dala, ne ginego dhano gi jamni gi gik moko duto ma ne odong’ kuno. Bende ne giwang’o mier duto ma ne gikalo e yo.

21 Jo-Israel ne okuong’ore ka gin Mizpa+ niya: “Onge ng’ato ang’ata kuomwa ma nomi Ja-Benjamin nyare mondo okendi.”+ 2 Kae to ne gidhi Bethel+ mi gibet e nyim Nyasaye nyaka odhiambo ka giywak malit. 3 Ne giywak niya: “A Jehova Nyasach Israel, ang’o momiyo gima ka ma otimore Israel? Ang’o momiyo achiel kuom dhoudi mag Israel onge kawuono?” 4 Kinyne, Jo-Israel ne omondo chiewo gokinyi mi gigero kendo mar misango kanyo mi ne gichiwo misengni miwang’o gi misengni mag kuwe.+

5 Jo-Israel ne owacho niya: “En dhood Israel mane ma ne ok obiro chokore e nyim Jehova?” Nimar ne gisekuong’ore mager ni ng’ato ang’ata ma ne ok obiro Mizpa e nyim Jehova ne idhi negi. 6 Jo-Israel ne owinjo malit ne Benjamin owadgi nikech gima ne otimorene. Ne giwacho niya: “Kawuono ong’ad oko dhoot achiel kuom dhoudi mag Israel. 7 Koro wabiro timo ang’o mondo wayud ne Jo-Benjamin modong’ mon, nimar wasekuong’ore e nyim Jehova+ ni ok wabi miyogi nyiwa mondo gikendi?”+

8 Ne gipenjo niya: “En dhoot mane e kind dhoudi mag Israel ma ne ok obiro Mizpa e nyim Jehova?”+ Ne giyudo ni onge ng’at ma ne owuok Jabesh-gilead ma ne obiro e kambi ka ma chokruok ne nitie. 9 Ka ne okwan jo ma ne ni kuno ne oyud ni onge ng’at ma ne obiro kowuok Jabesh-gilead. 10 Omiyo, Jo-Israel ne ooro jolweny 12,000 maroteke moloyo mi gichikogi ni: “Dhi uneg ji duto modak Jabesh-gilead gi ligangla; chwo, mon gi nyithindo duto.+ 11 Ma e gima onego utim: Neguru dichwo moro amora, kata dhako moro amoro mosenindo gi dichwo.” 12 Jolwenygo ne oyudo nyiri ma silili 400 Jabesh-gilead, nyirigo ne pok onindo gi chwo. Omiyo, ne gikelogi e kambi man Shilo+ e piny Jo-Kanaan.

13 Bang’ mano, Jo-Israel ne ooro wach ne Jo-Benjamin ma ne nie lwanda mar Rimon+ mondo olos kuwe kodgi. 14 Omiyo, Jo-Benjamin ne oduogo e kindeno kendo Jo-Israel nomiyogi nyi Jabesh-gilead+ ma ne giduogogo, en mana ni ne ok giyudonegi nyiri moromogi giduto. 15 Jo-Israel ne owinjo malit ne Jo-Benjamin+ nikech Jehova ne omiyo nyinggi olal e kind Jo-Israel wetegi. 16 Jodong’ Jo-Israel ne owacho niya: “Nikech oseneg mon duto ma Jo-Benjamin, en ang’o ma wanyalo timo mondo wayud mon ne Jo-Benjamin modong’?” 17 Ne gimedo wacho niya: “Jo-Benjamin onego odong’ e lopgi, mondo dhoodgi kik lal nono e kind Jo-Israel. 18 Kata kamano, ok oyienwa miyo Jo-Benjamin nyiwa mondo gikend, nimar Jo-Israel ne osekuong’ore niya: ‘Okuong’ ng’ato ang’ata ma omiyo Ja-Benjamin nyako mondo okendi.’”+

19 Jodongogo ne owacho niya: “Nitie nyasi mar Jehova mitimoga higa ka higa Shilo+ man yo nyandwat mar Bethel, yo wuok chieng’ mar ndara ma wuok Bethel ka dhi Shekem gi milambo mar Lebona.” 20 Kae to ne giwacho ne chwo ma Jo-Benjamin niya: “Dhi upond e puothe mag mzabibu. 21 To ka uneno nyi Shilo ka biro miel, ng’ato ka ng’ato kuomu owuog e puothego kendo okaw achiel kuom nyi Shilogo mondo obed chiege, kae to udog e pinyu. 22 To ka wuonegi kata owetegi obiro ywaknwa, wabiro nyisogi niya: ‘Nyiswauru ng’wono, nimar ne ok wayudo nyiri moromogi e lweny+ kendo un bende ne ok unyal miyogi nyiri ma ok ubedo gi bura.’”+

23 Jo-Benjamin ne otimo mana kaka ne ochikgi, ng’ato ka ng’ato kuomgi ne okawo achiel kuom nyiri ma ne mielgo mondo obed chiege. Bang’ mano, ne gidok e pinygi mi gichako gigero mier ma ne ni kuno,+ mi gidakie.

24 Jo-Israel ne owuok kanyo e kindeno, kendo ng’ato ka ng’ato kuomgi ne odok ir joode, e lope manie kind anyuolagi.

25 E kindego ne onge ruoth e piny Israel+ kendo ng’ato ka ng’ato ne timo mana gima ber e wang’e.