BARUA MAR ARIYO NE TIMOTHEO

1 An Paulo, jaote Kristo Yesu kokalo kuom dwaro mar Nyasaye kaluwore gi singo mar ngima man kuom Kristo Yesu,+ 2 andikoni in Timotheo, nyathina ma ahero:+

Ng’wono mogundho gi kech kod kuwe mar Nyasaye Wuoro kod Kristo Yesu Ruodhwa mondo obed kodi.

3 Agoyo erokamano ne Nyasaye ma atiyone ka an gi chuny maler, mana kaka kwerega bende notiyone, kendo ok awe pari e lamo maga mag sayo odiechieng’ gi otieno. 4 Ka aparo kaka pi wang’i nochuer, agombo ahinya neni mondo abed mamor chuth. 5 Nimar aparo yie ma in-go ma onge wuondruok,+ ma ne okwongo bet kuom Lois dani kod Yunike minu, ma an gadier ni ni kuomi bende.

6 Mano e momiyo aparoni ni mondo imi mich mar Nyasaye man kuomi oliel ka mach, ma en mich ma niyudo ka naketo lwetena kuomi.+ 7 Nikech Nyasaye ok ne omiyowa chuny mar bedo maluor,+ to nomiyowa chuny mar bedo gi teko,+ hera, kod mar bedo jo ma pachgi long’o. 8 Omiyo, wiyi kik kuodi sa ma ichiwo neno e wi Ruodhwa,+ kata kuoma an jal motue nikech en. Kar mano, in bende yie mondo iyud masiche+ nikech wach maber ka igeno kuom teko mar Nyasaye.+ 9 Noresowa kendo noluongowa gi luong maler,+ ok nikech gik ma watimo to nikech dwache owuon kod ng’wonone mogundho.+ Nomiyowa ng’wonono chon ahinya kuom Kristo Yesu, 10 to koro sani osemi mano onenore maler kokalo kuom fwenyruok mar Jawarwa Kristo Yesu+ ma osemiyo tho obedo ma onge teko,+ kendo osemiyo ler orieny ne ngima,+ kod ngima ma ok kethre+ kokalo kuom wach maber+ 11 ma ne oketae mondo abed jayalo kendo jaote kendo japuonj.+

12 Mano e momiyo an bende ayudo chandruogegi,+ to wiya ok kuodi.+ Nikech ang’eyo Jalno ma aseyie kuome, kendo an gadier ni onyalo ritona maber gima asemiye nyaka chop chieng’no.+ 13 Sik ka imakori gi mise moseket mar weche mangima*+ ma ne iwinjo koa kuoma, ka in gi yie kod hera ma betie nikech bedo e winjruok achiel gi Kristo Yesu. 14 Rit mwandu maberno kokalo kuom roho maler ma odak e iwa.+

15 Ing’eyo wachni, ni ji duto man e alwora mar Asia+ oselokore mi giweya, moriwo nyaka Fugelo kod Hermogene. 16 Ruoth mondo okech jood Onesiforo+ nikech kinde mang’eny ne ojaduogo chunya, kendo wiye ne ok okuot gi nyorochena mag jela. 17 Kar mano, ka ne en Rumi, ne omanya gi kinda ahinya mi ne oyuda. 18 Ruoth mondo okeche, kendo oyud ng’wono mar Jehova* e chieng’no. Bende, ing’eyo malong’o tije duto ma ne otimo Efeso.

2 Kuom mano, in nyathina,+ dhi nyime nwang’o teko kuom ng’wono mogundho man kuom Kristo Yesu; 2 kendo weche ma ne iwinjo koa kuoma ma joneno mang’eny bende ne osiro,+ iket wechego e lwet jo minyalo gen, mondo gin bende gibi gipuonj jomamoko e yo molony. 3 Kaka jalweny maber+ mar Kristo Yesu, in bende yie iyud masiche.+ 4 Onge ng’at ma tiyo kaka jalweny ma donjore* gi ohelni mapile mag ngima,* nimar odwaro bedo malong’o e wang’ jal ma nondike kaka jalweny. 5 Kendo kata mana e tuke, ok nyal sidh osimbo ne ng’at ma piem, mak mana ka opiem kaluwore gi chike mag tugo.+ 6 Japur ma tiyo matek e ma nyaka kwong cham olemo mag puothe. 7 Sik ka iketo pachi kuom weche ma awachogi; to Ruoth biro miyo ibed gi rieko mar ng’eyo tiend weche e gik moko duto.

8 Ng’e ni ne ochier Yesu Kristo a kuom jo motho+ kendo ne oa e anyuola mar Daudi,*+ kaluwore gi wach maber ma ayalo+ 9 ma e momiyo sani ayudo sand kendo otueya e jela kaka jaketho.+ Kata kamano, wach Nyasaye to ok nyal tue.+ 10 Mano e momiyo adhi nyime nano e weche duto nikech jo moyier+ mondo gin bende giyud warruok kuom Kristo Yesu kaachiel gi duong’ mochwere. 11 Wachni en wach migeno: Ni kuom adier ka watho kanyachiel kode, wanabed mangima kanyachiel kode bende;+ 12 ka wadhi nyime nano, wanaloch bende kanyachiel kode kaka ruodhi;+ ka wakwer ni ok wang’eye, en bende obiro kwer ni ok ong’eyowa;+ 13 ka ok wamakore gi Nyasaye, en to osiko ja adier nimar ok onyal kwedore owuon.

14 Dhi nyime paronegi wechegi, ka ichikogi e nyim Nyasaye ni kik giyware e wi weche, nimar mano ok kony kata matin, to ohinyo* mana jo ma winjogi. 15 Tim duto kar nyaloni mondo inyis ni in ng’at malong’o e wang’ Nyasaye, jatich ma onge gima kuodo wiye, kitiyo gi wach mar adiera e yo makare.+ 16 Kik idonj e weche manono ma njawo gik maler;+ nimar gibiro medo mana kelo timbe ma ok nyis luoro Nyasaye 17 kendo wechegi biro nya kaka adhola ma landore. Humenayo kod Fileto gin moko kuomgi.+ 18 Jogo osebaro moweyo adiera ka giwacho ni chier en gima osetimore,+ kendo giketho yie mar jomoko. 19 Kata kamano, mise motegno mar Nyasaye osiko ka ogurore, kendo en gi kido mondik ni, “Jehova* ong’eyo joge,”+ kendo ni, “Ng’ato ka ng’ato ma luongo nying Jehova*+ mondo okwed tim ma ok kare.”

20 Koro e ot mang’ongo nitie gik molos, ok mana gi dhahabu kod fedha kende, to bende gi bepe kod lowo, kendo moko gin mag tich ma imiyo duong’ to mamoko gin mag tich ma onge gi duong’. 21 Omiyo, ka ng’ato bedo mabor gi gik ma tichgi onge duong’go, obiro bedo gir tich molos ne tich mimiyo duong’, mopwodh maler, ma konyo wuon-go, kendo moseik ne tije duto mabeyo. 22 Omiyo, ring gombo mag rowere, to law tim makare, gi yie, gi hera, kod kuwe kanyachiel gi jo ma luongo Ruoth gi chuny maler.

23 E wi mano, kik idonj e mbaka mag fuwo gi mino wach ma onge rieko,+ king’eyo ni gikelo mana dhawo. 24 Nimar misumba Ruoth ok onego odhaw, to dwarore ni obed ng’at mamuol gi ji duto,+ ma nigi nyalo mar puonjo, ma nyiso ritruok sa ma okethne,+ 25 ng’at ma puonjo jo akwede e yor muolo.+ Di po ka Nyasaye omiyo giloko chunygi* gia e richo mi gibed gi ng’eyo malong’o kuom adiera,+ 26 kendo di po ka pachgi oduogo mi gitony gia e obadho mar Jachien, bang’ fwenyo ni osemakogi ka gingima mondo gitim dwache.+

3 To ng’e wachni, ni kinde matek ahinya nobedie e ndalo mag giko.+ 2 Nimar ji nobed jo moherore giwegi, jo mohero pesa, jo ma pakore, jong’ayi, jo achaya, jo ma ok winj jonyuolgi, jo ma ok go erokamano, jo ma ok makre chuth gi jomamoko, 3 jo ma onge hera, jo ma ok oikore loso winjruok moro amora, joketh nying ji, jo ma onge ritruok, jo mager, jo ma ok ohero gik mabeyo, 4 jo andhoga, jo ma wigi tek, jo sunga, jo mohero mor mag piny kar hero Nyasaye, 5 jo ma nenore gi oko ni gin jo moluoro Nyasaye to gitamore yie mondo tekone ochik ngimagi;+ to in pogri ia kuom jo ma kamago. 6 Nimar kuom jogi e ma wuokie jo ma tiyo gi riekni mag wuond ka gidonjo e udi mondo giwuond mon ma yom yom ma richo turo, kendo ma gombo mopogore opogore chiko, 7 ka kinde duto gisiko gipuonjore to e ma pod ok gibed gi ng’eyo malong’o e wi adiera.

8 Koro mana kaka Janes kod Jambre nokwedo Musa, jogo bende dhi nyime kwedo adiera. Jo ma kamago gin jo ma pachgi osekethore chuth, ka gibedo jo ma Nyasaye ok oyiego nikech ok giwuoth e yie. 9 To onge dongruok ma gibiro medo timo, nimar fupgi biro ng’ere maler ne ji duto mana kaka fup ji ariyogo nobedo.+ 10 In to iseluwori machiegni gi puonjna, gi kit ngimana,+ gi dwarona, gi yiena, gi horuokna, gi herana, gi sinani, 11 gi sandna, kod chandruokna kaka ma ne oyuda e Antiokia+ gi Ikonio+ kod Lustra.+ Ne anano e bwo sandgo, kendo Ruoth ne oresa kuom gigo duto.+ 12 Adier, ji duto ma dwaro chiwore chuth ne Nyasaye gi ngimagi ka gin e winjruok achiel gi Kristo Yesu, bende ibiro sand.+ 13 To jo ma richo gi jo ma pando kitgi biro medo bedo maricho moloyo, ka gimiyo ji lal to gin bende ilalogi.+

14 In to sik kuom weche misepuonjori kendo ma ne okonyi yie kuomgi chuth,+ king’eyo ni gin ng’a gini ma ne ipuonjori kuomgi. 15 Bende, ng’e ni chakre ka ne in nyathi matin ahinya,+ isebedo king’eyo ndiko maler+ ma nyalo miyo ibed mariek mondo iyud warruok kokalo kuom yie kuom Kristo Yesu.+ 16 Ndiko duto okudh gi much Nyasaye+ kendo gikonyo kuom puonjo ji,+ kuom siemo ji, kuom rieyo gik moko, kendo kuom kwero ji kaluwore gi gik makare,+ 17 mondo ng’at Nyasaye obed moromo chuth, moikore maber ne tije mabeyo duto.

4 Achiki matek e nyim Nyasaye kod Kristo Yesu, ma biro ng’ado bura+ ne jo mangima gi jo motho,+ kendo kokalo kuom fwenyruokne+ kod Pinyruodhe:+ 2 Yal wach;+ sik kitime e okang’ mapiyo ahinya, e kinde ma weche beyo kata e kinde ma weche tek; kwer ji,+ siem ji matek, jiw ji. Tim kamano gi horuok duto kod lony e puonjo.+ 3 Nimar kinde nobi ma ji biro tamore winjo puonj mangima,*+ to kaluwore gi gombogi giwegi, ginibed gi jopuonj mathoth ma miyogi weche ma moro mana itgi.+ 4 Ginilokre mi giwe winjo adiera kendo ginichik itgi ne sigendni mag miriambo. 5 In to sik ka pachi ni kare e weche duto, nan e chandruok,+ ti tij jaland-injili, tim tich mosemiyi e yo maber chuth.+

6 Nimar sani koro iola piny kaka chiwo miolo+ e kendo mar misango, kendo ndalo mibiro gonyae+ osekayo. 7 Asekedo e lweny maber,+ asetieko ng’weya,+ aserito yie. 8 Chakre sani ka dhi nyime, nitie osimbo mosekanna mimiyo jo makare,+ ma Ruoth kendo jang’ad bura makare+ biro miya kaka pokna e chieng’no,+ ok mana an kenda, to bende ne ji duto mosehero fwenyruokne.

9 Tem matek mondo ibi ira mapiyo. 10 Nikech Dema+ oseringo moweya nimar nohero pinyni,* kendo osedhi Thesalonika; Kreske to osedhi Galatia; to Tito osedhi Dalmatia. 11 Luka kende e ma ni koda. Kaw Mariko ibigo nimar en jal ma konya e tij Nyasaye. 12 To aseoro Tukiko+ mondo odhi Efeso. 13 Sa ma ibiro, ikelna kandho ma ne aweyo Troa ir Karpo kod buge modol, to moloyo, buge modol molos gi piende.

14 Aleksander ma jathedh mula ne otimona gik malit mang’eny. Jehova* biro chule kaluwore gi gik mosetimogo.+ 15 In bende nyaka itang’ kode nikech ne okwedo wach ma ne wayalo, ka okwedo wachno e okang’ maduong’ ahinya.

16 Ka natemo chiwo dwoko kuom weche ma nodonjnago, onge ng’at ma nodokna, to ji duto noringo moweya—Nyasaye mondo kik kwan wachno e wigi. 17 To Ruoth ne ochung’ buta kendo nomiya teko mondo kokalo kuoma, tij yalo wach otimre chuth kendo ogendni duto owinj wachno;+ bende, ne oresa a e dho sibuor.+ 18 Ruoth biro resa kuom gik moko duto maricho kendo obiro resa mondo orwaka e Pinyruodhe mar polo.+ Mad obed gi duong’ nyaka chieng’. Amin.

19 Mosnauru Priska gi Akula+ kod jood Onesiforo.+

20 Erasto+ ne odong’ Korintho, to Trofimo+ ne aweyo Mileto ka otuo. 21 Tim matek mondo ichop ka ndalo koyo pok ochakore.

Yubulo ooroni mosne, Pude gi Lino gi Klaudia kod owete duto bende otimo kamano.

22 Ruoth mondo obed gi chuny minyiso. Ng’wono mogundho mar Nyasaye mondo obed kodi.