Kaka Wach Maberni Konyo Ji e Gweng’ ma Idakie

E PINY masani wasiko ka wawinjo ji kawacho ni: “Puonj mag Jokristo ok nyal tiyo e ndalowa. Gi onge gi kony moro amora e pinywa ma tinde tek ni.” Kata kamano, paro ma opogore ne owuok e mbaka moro ma ne nitie e kind jatend jo Hindu ma iluongo ni Mohandas K. Gandhi, kod Lord Irwin ma ne en Gavana mar jo Uingresa e piny India. Wachore ni Lord Irwin ne openjo Gandhi gima ne oparo ni ne nyalo tieko ywaruok mane nitie e kind Uingresa kod India. Gandhi ne omako Muma ma oelo Mathayo sula mar abich ma owacho kama: “Chieng’ ma pinjewa nowinjre kuom puonj Kristo mayudore e Twak mane ogolo e Got, eka wanatiek chandruoge mag piny mangima to ok mana mag pinjewa kende.”

E twagno Yesu ne owuoyo kuom dwaro ng’eyo wach Nyasaye, bedo ng’a mamuol, dwaro kuwe, hero ng’wono, kendo kuom ng’ama ohero timbe makare. Twagno ok kwed mana nek kende, to okwedo kata bedo jamirima, kendo ok okwed mana chode kende, to okwedo kata gombo mag chode. Twagno bende kwero ketho kend, mamiyo udi kethore kendo miyo nyithindo chandore. Owachonwa niya: ‘Heruru kata jogo ma ok oherou, chiwuru ne jochan, kik ung’ad ne ji bura ma onge ng’wono, kendo timuru ne ji mana kaka udwaro mondo otimnu.’ Puonjgi nyalo kelo kony mang’eny mana ka ji tiyo kodgi giduto. Kaka ji mang’eny e gweng’ma idakie medo tiyo kod puonjgi, e kaka ngima e gweng’no bende medo bedo maber!

Joneno mag Jehova konyo ji e yorego. Muma puonjogi ni mondo gimi kend luor. Nyithindgi ipuonjo gik makare. Ijiwo ngima maber mar joot. Joot ma odak maber gin gweth e gweng’ ma idakie to kata mana e pinyu. En gima osenenore ratiro ni ka onge tudruok ma otegno e ngima mar joot kendo ka timbe anjawo omedore, pinje mang’eny madongo dokga mana chien. Kaka Joneno mag Jehova medo konyo ji mondo odagi kaluwore gi chike Kristo, e kaka nyithindo makethore bedo matin, timbe anjawo kod mahundu bende biro dok chien e gweng’ ma idakie.

Achiel kuom gik mamiyo ogendini kod pinje yudo chandruok mang’eny, en kwedruok manie kindgi. Kata kamano, jaote Petro ne owacho niya: “Adier, aneno ka Nyasaye ok odewo wang’ ji; to kuom ogendini duto ng’at moluore, kendo ma timo tim makare, e moyiego.” Kendo Paulo ne ondiko kama: “Onge ja Yahudi kata ja Yunani, onge misumba kata ng’at mathuolo, onge madichwo kata madhako; un duto un achiel e Kristo Yesu.” (Tich Joote 10:34, 35; Jo Galatia 3:28) Joneno mag Jehova oyie gi mano. Ji ma owuok e ogendini duto odak kendo tiyo kaachiel e ofisgi maduong’, koda ofisegi matindo, kata e kanyakla maggi.

E Afrika, nitie dhoudi mamoko ma wacho dhok mopogore ma ok nyal dak maonge dhawo. Kata kamano, e chokruoge madongo mag Joneno mag Jehova, ji ma oa e dhoudi ma opogore opogore chiemo, nindo kendo lemo kaachiel e winjruok. Jotend sirkal osewuoro ka gineno mano. Achiel kuom winjruok manyalo betie nikech bedo Jokristo mag adier, ne ondiki e gaset mar New York mar Dwe mar Aboro, Tarik 2, 1958 ma iluongo ni Amsterdam News. Bang’ neno chokruok maduong’ e dala mar New York ma ne oriwo Joneno makalo 250,000 ma owuok e pinje mang’eny, gasedno ne owuoyo e wachno.

“Joratenge, wasunge koda joma oa e pinje Asia gi kuonde duto e piny, bedo ni gimew kata gidhier, ne riwore kaachiel ka gin gimor kendo gi thuolo . . . Joneno ma oa e pinje 120 osedak kendo oselemo gi kwe, kendo mani nyiso jo Amerka kaka dak e winjruok nyalo bedo mayot . . . Chokruogno en ranyisi maber ahinya kaka ji nyalo tiyo kendo dak kaachiel.”

Ji mange’ny nyalo wacho ni puonj mag Jokristo ok nyal tiyo e piny masani. Kata kamano, kara ang’o ma osetiyo kata mabiro tiyo? Puonj mag Jokristo nyalo konyo ka ji tiyo kodgi sani kama idakie, to kendo gibiro kelo riwruok e kind ‘pinje duto, dhoudi duto, gi ogendini duto’ e piny mangima e bwo loch mar Pinyruodh Nyasaye.—Fweny 7:9, 10.

[Blab manie ite mar 23]

Ji ma oa e pinje duto tiyo kanyakla

[Blab manie ite mar 24]

Puonj mag Jokristo tiyo. En ang’o kendo ma osetiyo?