Ang’o Momiyo Nyasaye Nigi Riwruok mar Ogandane?

1. Ang’o momiyo Nyasaye ne oketo Jo-Israel machon obed e riwruok?

Nyasaye ne oketo nyikwa Ibrahim e oganda mi omiyogi chike. Ne oluongo ogandano ni “Israel” kendo kanyo e ma lamo madier kod wachne ne yudoree. (Zaburi 147:19, 20) Omiyo, ogendni mamoko ne nyalo puonjore kuom Jo-Israel.​—Som Chakruok 22:18.

Nyasaye noyiero Jo-Israel mondo obed Jonenone. Sigandgi nyisowa kaka luwo chike Nyasaye kelo gueth. (Rapar mar Chik 4:6) Omiyo, kokalo kuom Jo-Israel, jomamoko ne nyalo ng’eyo Nyasaye madier.​—Som Isaya 43:10, 12.

2. Ang’o momiyo oket Jokristo madier obed e riwruok?

Bang’ kinde, Jo-Israel noweyo Jehova Nyasaye, to mano nomiyo Jehova oketo kanyakla mar Jokristo mondo okaw kargi. (Mathayo 21:43; 23:37, 38) Gie sani, Jokristo madier e ma gin Joneno mag Jehova to ok Jo-Israel.​—Som Tich Joote 15:14, 17.

Yesu nochano jolupne mondo olend kendo otim ogendni duto jopuonjre. (Mathayo 10:7, 11; 24:14; 28:19, 20) Tijni koro ochomo gikone ka piny marachni koro rumo. Magi e kinde ma Jehova okwongo riwoe dhano tara gi tara mowuok e ogendni duto e lamo madier. (Fweny 7:9, 10) Jokristo madier oriw kanyachiel mondo gijiwre kendo gikonyre. E piny mangima, gipuonjore Muma e yo machalre e chokruogegi.​—Som Jo-Hibrania 10:24, 25.

3. Riwruok mar Joneno mag Jehova ma kindegi ne ochakore nade?

E higini mag 1870, grup moro matin mar jopuonjre Muma ne ochako fwenyo adiera mag Muma ma nosegalal kuom higini mang’eny. Ne gifwenyo ni Yesu nochano kanyakla mar Jokristo mondo olend. Omiyo, ne gichako kampen mar lando wach Pinyruoth e pinje duto. E higa mar 1931, ne gichako luongore ni Joneno mag Jehova.​—Som Tich Joote 1:8; 2:1, 4; 5:42.

4. Riwruok mar Joneno mag Jehova ochan e yo mane?

E kinde Jokristo mokwongo, ne nitie bura matayo ma ne nigi migawo mar neno ni kanyakla mag Jokristo me pinje mang’eny dhi maber, kendo Yesu ma e Wi kanyakla e ma ne tayo burano. (Tich Joote 16:4, 5) E kindegi bende, Bura Matayo e ma chiko tije mag Joneno mag Jehova e piny mangima. Gichung’ ne tije ma dhi nyime e ofise mag Joneno mag Jehova, kaka tij loko buge e dhok mopogore opogore, goyo buge, kendo oro buge ma konyo ji puonjore Muma e dhok mokalo 800. Omiyo, Bura Matayo nyalo chiwo puonj mowuok e Ndiko ma konyo kanyakla mokalo 110,0e piny mangima. E moro ka moro kuom kanyaklago, chwo mowinjore tiyo kaka jodongo, kata jorit. Magi gin joma kwayo rombe Nyasaye gi hera.​—Som 1 Petro 5:2, 3.

Ochan Joneno mag Jehova mondo giland wach maber kendo gilok ji jopuonjre. Walendo ot ka ot mana kaka joote notimo. (Tich Joote 20:20) Bende wachiwore puonjruok Muma gi joma ohero adiera. Kata kamano, ok wan mana riwruok kaka riwruoge mamoko mag pinyni. Kar mano, wan kaka joot mar owete gi nyimine moherore e kindgi. (2 Jo-Thesalonika 1:3) Nikech jo Jehova gin joma ochan mondo otim dwaro mar Nyasaye kendo okony jomoko, gin e joot ma morie moloyo e piny.​—Som Zaburi 33:12; Tich Joote 20:35.