Barua Mowuok Kuom Bura Maduong’

Ne Owete gi Nyiminewa Mwageno:

Gocho mar ji duto mokwongo mar Mnara wa Mlinzi mar Januar 1, 2008, ne onyiso ni ibiro chak go sula mamit e bwo wich mawacho ni “Igeni Imani Yao” (“Luw Yie Margi”) e gasedno. A kanyo, sulano osebedo ka yudore bang’ dweche adek ka dweche adek, kendo gisebedo sula mamorowa ahinya.

Joma somo sulano osewacho ang’o kuomgi? Miyo moro nowacho kama bang’ somo sula mawuoyo kuom Maritha: “Ne anyiero nikech mana kaka Maritha, an be kinde duto ka ayudo welo, abedo modich ahinya gi loso chiemo kar kawo kinde mar goyo mbaka gi welogo.” Nyako moro ma rawera bende nowacho kama bang’ somo sigand Esther: “Ka ok watang’, wanyalo keto pachwa ahinya kuom lewni manyien moriwo nyaka ma koro eka oa wuok. En adier ni onego warwakre maber; kata kamano, ok onego wakal tong’.” Omedo wacho kama: “Gima Jehova odichgo en kaka chunywa chalo.” To nyaminwa moro nowacho kama ka en gi ilo bang’ somo sigana ma ne wuoyo kuom jaote Petro: “Weche ma ne siganano wuoyoe ne omula ahinya. Ne chalo ka gima ne an kanyo. Koro wang’a ne oyawore neno gik ma yande asomo asoma!”

Jogi kaachiel gi mamoko ma bende osewuoyo ka puoyo kaka sulagi osemorogi ahinya, siro weche ma ne jaote Paulo ondiko chon niya: “Weche duto, ma nondik chon, nondikgi mondo wapuonjrego.” (Rumi 15:4) Ee, Jehova nomiyo ondik wechegi e Muma mondo wayud puonj mang’eny koa kuomgi. Waduto, kata obedo ni wasebedo e adier kuom kinde malach, wanyalo puonjore kuom sigendnigo.

Wajiwi mondo isom bugni mapiyo kaka nyalore. Ti kode e Lamo Maru mar Joot nikech nyithindo biro here ahinya. Kinde ma kanyakla biro tiyo kode e Puonjruok Muma e Kanyakla, kik ilew ne chokruoge kata juma achiel. Ket pachi sama isome. Tem ketori e chal ma joma Muma wuoyoego ne nitiere. Tem winjo kaka jogo ne owinjo, tem neno e pachi gik ma ne gineno. Ne gima ne jogo otimo e chal moro kipimo gi gima into ditimo.

Wamor ahinya loso bugni mondo okonyi kaachiel gi joodi. Waherou kendo wagombo ni weche odhinu maber,

Bura Maduong’ mar Joneno mag Jehova