Gik Maricho Ogundho!

Dhako moro miluongo ni Smita,a ma jahigni 35 e taon mar Dhaka, Bangladesh, ne ong’ere kaka dhako mohero ji kendo ma dewo ji. Ji ne ong’eye kaka dhako ma jakinda kendo dhako ma nigi dwaro mar konyo ji ong’e Nyasaye. Mano kaka ne en wach ma ne obwogo joodgi kaachiel gi osiepe ka ne Smita oyudo tuo ma kore tek ma ne onege ka pok juma achiel orumo!

James gi jaode, ma gin mana johigni 30 gi wiye ne kitgi chalo mana gi mar Smita. Chieng’ moro ne gidhi limo osiepegi e piny mar Amerka. Ne ok gidok dalagi New York. Ka ne gin e kor yo, ne githo e masich ndara ka giweyo joma oherogi kod joma ne gitiyogo ka okuyo miwuoro.

Ok ochuno ni idhi mabor ahinya mondo eka ine gik maricho kod chandruok ma yudo ji sani. Lwenje nego raia kod jolweny. Timbe gero kod mahundu yudo joma onge ketho. Masiche malich kod tuoche madongo nyalo yudo ng’ato ang’ata kata bed ni en ng’a. Masiche ma ok nyal geng’ nyalo yweyo gweng’ moro ma ok odewo ni gin jomage. Buono ji kod timbe ma ok kare onya ahinya. Samoro in be chandruoge ma wawachogi oseyudi.

Omiyo, en gima winjore ka wapenjore penjo kaka magi:

• Ang’o momiyo gik maricho timore ne joma beyo?

• Be Nyasaye e ma kelo chandruogego?

• Be masichegi gin ma timore aho yaye, koso ji e ma kelogi?

• Be dibed ni wachandore nikech gik ma ne watimo chon?

• Kapo ni Nyasaye ma nyalo duto nitie, ang’o momiyo ok ogeng’ chandruok ne joma beyo?

• Be richo gi chandruok chieng’ norum?

Mondo wadwok penjogi, nyaka wakwong wang’e dwoko mag penjo ariyo madongogi: Ang’o momiyo gik maricho timore, to Nyasaye biro kawo okang’ mane?