Sandug Penjo

◼ Be en gima kare timo chenro mar uso gik moko kaka kanyakla kata timo harambe mar solo pesa mondo okony kanyakla?

Dinde mang’eny nigi chenro mag solo pesa ka gitiyo gi yore kaka mag nyolworo, uso gik moko, kata e nyasi mamoko. Kata obedo ni jomoko nyalo neno ni timo kamano en gima konyo, solo pesa gi yore kaka mago en kwecho. Joneno mag Jehova ok ti gi yore machalo kamago.

Gocho mar ariyo mar Watch Tower, mar Agost higa 1879 nowacho kama kuom gimomiyo watamore luwo timbe mag kwecho ma kanise timo: “Nikech wan gi yie ni JEHOVA ema siro gaset mar ‘Zion’s Watch Tower’, gasedno ok bi kwecho kata timo solro kuom ji mondo giyud kony. Ka Nyasaye mawacho ni: ‘Fedha duto gi dhahabu mag gode gin maga,’ ok ochiwo pesa madwarore, wabiro ng’eyo ni gin kinde mag chungo goyo gasedno matin.”

Podi wadhi nyime gi luwo puonj manie Ndiko mawacho ni: “Ng’ato ka ng’ato mondo ochiw kaka oseparo e chunye; ok mar ng’ura, kata mar achuna: nikech Nyasaye ohero jachiwo mamor.” (2 Kor. 9:7) Sanduge mag keto chiwo ni e Ute mag Romo mondo jo madwaro golo chiwo maggi otim kamano ka gidwaro. (2 Ruo. 12:9) Onge timo kwecho; kendo joma chiwo ok tim kamano gi paro mar yudo gimoro bang’ chiwo.