Kinda mar Goyo Milome e Piny Mangima ne Chokruog-Distrikt Mawacho ni, “Mfuateni Kristo!”
Wang’ni Kendo Jolendo Biro Pogo Kalatase Makende mag Gwelo Ji
1 Higa mokalo, kampen ma notim e piny mangima mar lando Chokruog-Distrikt ma ne wacho ni “Ukombozi Unakaribia!” ne omoro ji ahinya. Jogo ma ne ogwel ma obiro, ne oneno ber mogundho mar winjo wach Nyasaye kanyachiel gi Joneno mag Jehova. (Isa. 65:13) Ne gineno ber mar bedo gi owetewa ma Jokristo mopong’ gi mor. (Zab. 133:1) Mondo wakony ji mang’eny kaka nyalore ochopi e Chokruog-Distrikt mawacho ni “Mfuateni Kristo!” wabiro pogo kendo kalatase makende mag gwelo ji e piny mangima.
2 Higa Mokalo: Kaluwore kod ripode ma ne oyud kowuok kuonde duto e piny, ne nitie gik mabeyo ahinya ma ne onenore nikech lando Chokruog-Distrikt ma ne wacho ni, “Ukombozi Unakaribia!” Kuonde mang’eny, ji ne owuoyo kuomwa maber. Kuom ranyisi, e taon moro, gaset moro ne ondiko weche kuom wach kampenno, ka giwacho kama: “Mondo omi gichop ne ng’ato ka ng’ato e kinde mowinjore, Joneno osebedo ka timo kinda e yo makende e alworawa —gitiyo kuom seche mogwaro, giwuotho dhi kuonde maboyo, kendo wuoyo e yo machuok.” Tich ma notim mar pogo kalatasego e yo mochanore maber, ne omako wang’ jondik-gaset manie taon moro, ma omiyo gindiko wechego e yo matut. Gasede madirom adek ne owuoyo maber kuom tijwa ka chokruogno podi. Jandik-gaset moro ne ondiko gik mang’eny mapong’o oboke ariyo e gaset moro mar Jumapil. Wechego ne wuoyo adimba kuom puonj magwa, riwruokwa mar owete, kuom tij pogo kalatas makendeno kaachiel gi wach chokruogno. Kane jalendo moro chiwo kalatasno ne wuon ot, wuon odno ne ok oweyo jalendono otiek wuoyo mong’ade kowachone ni: “Ee. Mano e wach ma ne asomo e gaset sani!” Wuon ot moro machielo to ne owacho gi iilo kama: “A onwang’o asomo wachu, to koro un kae jowa! Be mano e kalatas ma gwela?” Bang’e ne omedo wacho ni, “Gima Joneno mag Jehova timoni en gima ber mipuoyo.”
3 Ne one thoth jogo ma ne ogwel ka dhi kuonde chokruok koting’o kalatasego e lwetegi. Jomoko kuomgi ne onwang’o oriembo mtokni ka gia e taonde maboyo mondo omi gichop e chokruogno. Kinda motegno ma ne watimo mar gwelo ji, ne omiyo kwan jogo ma ne ochopo e chokruogno oidho, kendo e piny moro, joma ne obiro ne omedre gi pasent 27 maloyo kwan mar higa motelo ni mano.
4 Ipoge e Okang’ Mane: Unyalo chako pogo kalatasego jumbe adek ka chokruogu mar distrikt podi. Onego otim kinda mar pogo kalatasego kuonde lendo duto manie bwo kanyaklau. E kanyakla ma nigi kuonde lendo madongo ahinya, kanyalore jolendo nyalo soyo kalatasego e yo mariek e ute ma ok giyudoe ji, to ginyalo timo kamano e juma mogik ka chokruogno podi. Kanyakla onego otem pogo kalatase duto ma oornegi kendo gitim kamano kuonde mang’eny kaka nyalore. Jo painia manie kanyakla nyalo pogo kalatase ma dipo ni odong’.
5 Gima Inyalo Wachi: Inyalo wacho kama: “Watiyo tich masani timore e piny mangima, mar pogo kalatasni kigwelo ji e chokruok moro makende. Ma endi en mari. Ibiro yudo weche mamoko momedore ei kalatas ma gwelino.” Tiyo gi weche manok biro miyo wagwel ji mang’eny. Kata kamano, en adier ni ka wuon ot nigi penjo, kaw thuolo mar dwoko penjogo. Kama ng’ato onyiso ni omor gi wechego, ndik nyinge piny kendo idog ilime mapiyo kaka nyalore.
6 Mano kaka dwarore mondo watim kinda mar luwo Kristo! (Joha. 3:36) Chokruogwa mabiro mar distrikt, nokony jogo duto mochopo mondo otim mana kamano. Kuom adier, wanyalo geno neno kaka ibiro chiw neno e okang’ mamalo nikech kinda mitimoni mar lando Chokruog-Distrikt mawacho ni, “Mfuateni Kristo!” Kuom mano, tim kinda mar gwelo joma ng’eny kaka nyalore mondo gichopi e chokruogno. Wakwayo mondo gweth mang’eny mag Jehova obed kuom kinda ma in iwuon ibiro timo e kampenni matimore e piny mangima.