Sandug Penjo

◼ Bende owinjore mondo Janeno mar Jehova oyud thieth kod rit e achiel kuom osiptende kata kuonde miritoe jotuwo mitayo gi riwruok mar din moro?

Riwruok mopogore opogore mag din tayo osiptende kata kuonde rito jotuwo machiwo thieth kata miritoe jotuwo ma nigi tuoche ma ok rum piyo. Kinde mathoth, kuonde ma kamago ok oger ni mondo oland dwach Babulon Maduong’. (Fwe. 18:2, 4) Riwruok mag dindego nyalo bedo ni ne ochako osiptendego mondo gitimgo ohala. E ndalogi, osiptende moko odong’ mana gi nying din ma ne ochakgi chon, to moko kuomgi ema jotend din matin pod tiyoe.

Ka Janeno mar Jehova moro dwaro thieth e osiptal kata kar rito jotuwo moro, onego otim yiero mare owuon ka obiro dhi kuonde thieth ma nyalo bedo ni itayo gi riwruok mar din. Chuny ng’at achiel nyalo yiene mondo odhi, to chuny ng’at machielo nyalo tame. (1 Timo. 1:5) Nitie gik moko manyalo chiko yiero mar ng’ato, kendo owinjore ng’iyo gigo.

Kuom ranyisi, osiptal kata kar rito jotuwo moro miluongo gi nying din kende ema nyalo bedo ni nwang’ore machiegni. Kata ka nitie machielo machiegni kanyo, osiptal motudore gi dinno ema samoro chiwo thieth kata rit malong’o ne jotuwo. Osiptal miluongo gi nying dinno kende ema kamoro nigi gik thieth manyalo thiedho tuwo moro, kata nyalo bedo ni osiptandno kende ema laktar mathiedhi kata ma timoni yeng’o nigi thuolo mar timo kit thieth mamoko. Bende, seche moko osiptende ma nigi tudruok gi din nyalo chiwo luor ne chung’ mari kaka Jakristo kuom wach remo, ma samoro osiptende mamoko mag ji giwegi kata mag sirkal nyalo tamore. Omiyo magi gin moko kuom gik minyalo paro mondo okonyi e timo yiero mar kuonde thieth.

Ka iyiero yudo thieth e osiptal kata kar rito jotuwo ma nigi tudruok gi din, inyalo mana nene kaka chulo ng’at ma timoni tije mowinjore. Inyalo kawo wachno ka gima riwruok mar dinno timo ohala moro, kendo seche ma ichulo gima gitimoni kuom ohala ma kamano ok bi bedo ni itimo chiwo moriere e riwo din mar miriambo lwedo. Ibiro mana bedo ni ichulo gimoro kata tich motini.

En adier ni kaka Jakristo, e weche machalo kamago nyaka ine ni ok idonj e yore lemo mag miriambo. Bende, ok ibi luongo ji ma tiyo kuonde thiethgo gi nying ma ji ong’iyo tiyogo kaka, “Fadha” kata “Sista.” (Math. 23:9) Gima onego ine en ni wachno obed mana ohala kende ma gima iyudo en thieth kod rit, ma onge wach machielo.

Seche ma orwaki e osiptal, inyalo hero nyiso joma tiyo kanyo ni in achiel kuom Joneno mag Jehova kendo ni diher mondo jodong-kanyakla mani machiegini kanyo obi olimi. Mae biro konyi mondo inwang’ kony kodok korka weche mag Nyasaye e seche ma un kodgi.—1 Thes. 5:14.

Joot ma gin Joneno, jodong-kanyakla mani machiegni kanyo, kod ji mamoko manie kanyakla onego kaw ting’ korka weche mag Nyasaye mag owete gi nyimine moti modak kuonde mag rito jotuwo, to moloyo ka gin kuonde ma itayo gi riwruok mag din. Timo kinda e yorego biro jiwo joma otigo kendo geng’ogi mondo kik rwakgi ma ok ging’eyo e timbe din, nyasigi, kata gik mamoko mitimo e osiptende kod kuonde rito jotuwogo.

Ka weche mochiwgo nie paro, ng’ato ka ng’ato biro nono weche ma dwarore to otimo yiero mare owuon kuom osiptal kata kar rito jotuwo ma obiro dhiye.—Gala. 6:5.