Sandug Penjo

◼ Be jonyuol ariyo duto nyalo chiwo ripot kuom sa mitiyogo e timo puonjruok mar joot mapile?

Kata obedo ni wuone ema nigi ting’ mokwongo mar pidho nyithindgi ‘ka girieyogi kendo puonjogi kuom Ruoth,’ jonyuol ariyogi duto nigi ting’ mar tiego nyithindgi. (Efe. 6:4) Muma jiwo nyithindo kama: “Wuoda, winj weche ma wuoru opuonji, kendo kik iwe timo kaka meru opuonji.” (Nge. 1:8) Yo achiel ma jonyuol puonjogo nyithindo en puonjruok Muma kaka joot.

E kinde mokalo, mana janyuol matayo puonjruok mar joot kod nyithindo ma pok obatisi kende ema ne chiwo ripot mar sa, kata bed mana ni jonyuol ariyogi duto ne nie puonjruokni. Kata kamano, itimo lokruok e wachni. Ka seche ma itimo puonjruok mar joot jonyuol ariyogi tiyo kanyachiel e puonjo nyithindgi, giduto ginyalo kwano sa ma ok okalo achiel e juma kaka tij lendo. En adier ni jonyuol tiyo gi seche mokalo achiel e juma kuom puonjo nyithindgi. Tiego nyithindo dwaro kinda ma dhi nyime kuom jonyuol ariyogi. (Rapar 6:6-9) Kata kamano, gima duong’ ma ripot mar tij lendo ma dwe ka dwe onego onyis tich ma itiyo e alwora mar lendo. Omiyo, ok onego okwan seche mokalo achiel, kata bed mana ni puonjruok okawo kinde makalo sa achiel, otime mokalo nyadichiel e juma, kata ka nyathi ka nyathi otimgo puonjruok yore. Janyuol achiel kende ema biro chiwo ripot mar puonjruok mar joot kendo obiro mana kwano dok timo limbe achiel kende juma ka juma ma otimie puonjruokno.