Sandug Penjo

◼ Be owinjore mondo kanyakla kata ng’ato oti gi logo mag riwruoge ma Joneno mag Jehova tiyogo?

Logo en nying’, ranyis, kata picha moro molos mondo riwruok moro ofwenyrego e yo mayot. Logo mar Watch Tower ochung’ne Watch Tower Bible and Tract Society of Pennsylvania koda riwruoge mamoko ma itiyogo gi Joneno mag Jehova e buge sirkal. Riwruok mar Christian Congregation of Jehovah’s Witnesses tiyo gi picha kata logo mar Muma moel e barupe ma gindiko. Riwruoge mamoko ma Joneno mag Jehova tiyogo nigi logo kata picha mopogore opogore.

Ok onego kanyakla kata ng’ato oti gi logo, picha, kata nying’ moro amora mar riwruoge ma Joneno mag Jehova tiyogo, ok onego oketgi e Od Romo, e sain-bod mar Od Romo, e barua, e gir ng’ato owuon, koda kuonde mamoko. Tiyo gi picha kata logo moro amora mar riwruoge mag Joneno mag Jehova nyalo chocho jo sirkal, owete ma Jokristo, kod joma moko, mi tamgi ng’eyo tudruok mantie e kind kanyaklano kod riwruogego. Kamano bende, barupe moketie logo kata pichego nyalo nenore ka gima giwuok e ofis maduong’ kata e ofise mamoko mag Joneno mag Jehova.

Logo mar Watch Tower, kata mamoko, ok onego otigo e Udi mag Romo michano ger e kinde mabiro kata obedo ni udigo gin mag riwruok moro mar Watch Tower. Kanyakla masani ni kod Od Romo ma nigi logo moro amora ok ochuno ni nyaka golgi mapiyo, nikech timo kamano nyalo dwaro ni otim lokruok maduong’ kendo kawo seche, kod pesa mang’eny. Kata kamano, onego one ka timo lokruok mar golo gigo ok bi kawo kinde kendo ok bi dwaro ni otim tich mang’eny. To ka ok en tich maduong’, to inyalo time e kinde mochan loso kuonde mokethore e Od Romo kata e sain-bod mar Od Romo.