Dwar Joma Owinjore
1. Ere kaka wanyalo nyiso ni wamor gi tij lendo?
1 Kane Yesu tiyo tije mar lendo notimo matek mondo oho chuny joma muol gi wach maber. (Isa. 61:1, 2) Wan kaka joote kendo jotich kar Kristo, wan gi tich majaber mar luwo ranyisine kuom lendo maok waol kendo dwaro chuth joma owinjore e alworawa.—Math. 10:11; 2 Kor. 5:20.
2. Yo ma Paulo ne timogo lokruok e tij lendo nenore nade, kendo yorno ne okelo ber mage?
2 Ikri mar Timo Lokruok: Jaote Paulo ne ong’iyo gi dhi mokwongo e sunagogi mondo olend ne Jo-Yahudi kod jogo ma ne luwo din mar Jo-Yahudi. (Tich 14:1) Kane gin e dala mar Filipi, Paulo gi Sila ne odhi dwaro ji kama ne ‘giparo ni kar lemo nitie.’ Ne gichako lendo ne mon ma ne ni kanyo, kendo achiel kuom mon-go miluongo ni Ludia, ne orwako adiera mapiyo.—Tich 16:12-15.
3. Gin thuolo mage mag lendo mwanyalo tiyogo e wi lendo marwa mar ot ka ot?
3 E wi lendo mari mar ot ka ot, be inyalo lendo ne joma yudore kuonde michungoe mtokni, kuonde yueyo, e ofise, e ndara ma ji ng’enyie, kod kuonde mag ohala manie alwora milendoe? Seche moko inyalo lendo kitiyo gi barua kata e yor simo ne joma odak e udi maok oyie ne ji donjoe. Tiyo gi rieko kendo bedo ng’at ma oikore timo lokruok mowinjore gi alworau biro miyi thuolo mar ‘tiyo matek pile e tich Ruoth.’—1 Kor. 15:58.
4. Gin thuolo mage ma wan-go ka kanyaklawa nigi alwora matin mar lendo?
4 Jolendo mang’eny osetiyo tijgi mar lendo e okang’ momedore kuom dar dhi e kanyakla machielo manie pinygi kata e piny moro. Moko osepuonjore dhok machielo mondo omi gilend ne joma nie alworagi mawacho dhokno.
5. Onego wane nade kinde ma wadakiegi, kendo onego wang’ad mar timo ang’o?
5 Waduto onego waket e paro ni “puodho en piny.” (Math. 9:37; 13:38) Bedo ni giko mar piny marachni okayo machiegni, ng’ato ka ng’ato kuomwa onego onon ahinya chal mare, nyalo ma en-go, thuolone, kod kaka onyalo tiyo tij lendo e okang’ momedore. Jehova nyisowa ni ka waketo dwaro mag Pinyruoth obed mokwongo, obiro gwedho kinda ma waketo e tiyo tijwa mar lendo e okang’ momedore.—Math. 6:33.