Ikri Kinde Duto Chako Puonjruok mar Muma gi Ji
1. Chopo weche ma Yesu nowacho e Mathayo 28:19, 20 oriwo timo ang’o?
1 Yesu nomiyowa ote mar timo ji ‘jopuonjre, ka wapuonjogi.’ (Math. 28:19, 20) Omiyo, dwarore ni kinde duto waikre chako puonjruok mar Muma gi ji, ok mana e odiechieng’ moyangi kende. Paro maluwogi nyalo konyowa.
2. Jomage ma wanyalo chakogo puonjruok mar Muma?
2 Chak Puonjruok mar Muma: Kaka wamedo timo kinda e chako puonjruok mar Muma gi ji, e kaka wamedo yudo thuolo mar yudo japuonjre Muma. (Ekl. 11:6) Be isetemo chako puonjruok mar Muma achiel kaachiel? Kanyakla moro mani Amerka notimo kinda ahinya e timo kamano kuom dwe achiel. Mano kaka ne giyudo mor kuom chako puonjruok mag Muma gi ji 42! Kik ipar ni joma ilendone ong’eyo ni ijatimo puonjruok mar Muma gi ji. Be inyalo chako puonjruok kodgi seche ma idok limogi? Kapo ni giwacho ni ok gidwar puonjore Muma, kik idew. Podi inyalo limogi. Be isepenjoe joma odak machiegni kodi, wedeni, jotich weteni, kata joskul weteni ka digiher puonjore Muma kodi? Bende inyalo penjo jopuonjreni mag Muma kagin gi osiepegi kata wedegi manyalo dwaro puonjore Muma.
3. En ang’o manyalo konyowa e chako puonjruok Muma gi ji, to wanyalo tiyo kode e kinde mage?
3 Gima Nyalo Konyowa: Trakt mar Bende Diher Ng’eyo Adiera? nyalo konyowa ahinya e chako puonjruok mar Muma gi ji. Inyalo miyo weg udi traktno kata kapo ni gitamore buge mamoko. Inyalo tiyo kode seche milendo kuonde mag ohala, e yore, seche mindiko ne ng’ato barua, kod seche midok timo limbe. Inyalo weye bende ne joma ok iyudo e utegi. Bende inyalo ting’e seche midhi wuoth, midhi nyiepo, kata e tich. Onyis chenro mar puonjruok Muma gi ji e tok traktno kendo onyis bug Muma Puonjo.
4. Ere kaka wanyalo chako puonjruok mar Muma kwatiyo gi trakt mar Ng’eyo Adiera?
4 Bang’ chiwo traktno ne ng’ato, inyalo nyise penjo mayudore e ng’eye, kae to ipenje ni, “En penjo mane mamori ahinya e kind penjogi?” Kae to nonuru kanyachiel dwoko mochiw ei traktno, bang’e to usom kata iwuoye chenro mar puonjruok Muma gi ji mayudore e ite mogik mar traktno. Inyalo nyise kama weche momedore e wi wach ma uwuoyoeno yudore e bug Muma Puonjo, chiw bugno, kendo itim chenro mar dok mondo udhi nyime wuoyo e wi wachno.
5. Ang’o momiyo onego waikre kinde duto mar chako puonjruok mar Muma gi ji?
5 Alworawa mar lendo podi nigi jogo madwaro ng’eyo gima Muma puonjo kuom adier. Ka waikre kinde duto mar chako puonjruok mar Muma gi ji, wabiro yudo thuolo momedore mag yudo mor e konyo jomoko mondo oluw yo matero ji e ngima.—Math. 7:13, 14.