Sandug Penjo

◼ Gin yore mage mwanyalo konyogo jopainia?

E higa mar tijwa ma 2009, owete gi nyimine madirom 800,000 ne gin jopainia mapile kod makende e piny mangima. Jogi matiyo ne Nyasaye e thuologi duto nochiwo sechegi, tekogi, kod gigegi mondo giland wach maber mar Pinyruoth. (Nge. 3:9) Mano kaka Jehova mor gi kinda ma gitimo! Gin yore mage mwanyalo nyisogo ni wan gi paro kaka mar Jehova kendo jiwo mor kod sinani mar owetegi?

Kuom adier, wechewa mabeyo nyalo jiwogi mondo gimed dhi nyime bedo jopainia. (Nge. 25:11) Be wanyalo timo lokruok moko e juma mondo walend kodgi? Seche mwalendo kodgi, wanyalo dhi gi mtokwa kar dhi gi margi. To ka waidho mtokgi, wanyalo miyogi chiwo moro. (1 Kor. 13:5; Fili. 2:4) Wanyalo riwogi lwedo bende ka kinde ka kinde wagwelogi e migago.—1 Pet. 4:8, 9.

Ndiko nyisowa ni Jehova biro chopo dwaro mag joma keto Pinyruodhe bedo mokwongo. (Zab. 37:25; Math. 6:33) Yo achiel motimogo kamano en kokalo kuom hera ma owetewa ma Jokristo nyiso. (1 Joh. 3:16-18) Jopainia ok gen ni jomamoko ema biro kawo ting’ maggi kor ka weche pesa. Bende ok ochuno ni ginyis ng’ato seche ma gichando gimoro. Kata kamano, wanyalo konyo jopainia ma jokinda chopo “rem margi” e yore mopogore opogore kuom bedo joma nyalo ng’eyo seche ma gichando.—2 Kor. 8:14, 15.

Kane Fibi, jalendo ma jakinda e kinde Jokristo mokwongo ma ne wuok e Kanyakla mar Kenkrea odhi Rumi, Paulo nojiwo owete ma Rumi kama: ‘Rwakeuru kuom Ruoth kaka owinjore joma ler otim, kendo ukonye e wach manadi modwaro.’ (Rumi 16:1, 2) Wan gi thuolo maber mar nyiso hera kaka mano ne jogo ma wan-go e kanyakla madhi nyime lando wach maber ka gin jopainia mapile kod makende.—Tich 5:42.