Walendo Kinde Duto
1. Ere kaka wang’eyo ni Jokristo mokwongo ne onge gi paro mar yueyo ne tij lendo?
1 Jolendo ma ne jokinda e kinde Jokristo mokwongo ne lando wach maber kamoro amora ma ji ne yudore ma “ok giweyo.” (Tich 5:42) Omiyo ok wanyal bedo gi kiawa ni e seche ma ne gilendo e ot ka ot ne giwuoyo bende gi joma ne giromogo e yo. Bende ne ok ginyal weyo mondo thuolo moro amora mar lendo ne ji okal sama ging’iepo e chirni bang’ tieko lendo. Mana kaka Yesu, ne ok gikaw ni nitie seche mag yueyo ne tij lendo.—Mari. 6:31-34.
2. Dak kaluwore gi nyingwa oriwo ang’o?
2 Waikore Kinde Duto: Nyingwa mar Joneno mag Jehova ok nyis mana tich ma watiyo; onyiso gima wan. (Isa. 43:10-12) Omiyo kinde duto waikore mar dwoko wach ma ng’ato ang’ata nyalo penjo e wi geno ma wan-go, kata seche maok walend ot ka ot. (1 Pet. 3:15) Be itemoga paro chon kuom thuolo manyalo yudore mar lendo e seche maok ichano kae to iiko gima inyalo wacho? Be iting’oga buge minyalo tiyogo ka ng’ato orwako wach? (Nge. 21:5) Dibed ni ilendoga e ot ka ot kende koso ilandoga wach maber ne ji kuonde mamoko bende ka nyalore?
3. En nying mane mowinjore otigo kiwuoyo kuom lendo mitimo e yore, kuonde chungo mtokni, kuonde ma ji yueyoe, kuonde ohala, to gi kuonde mamoko?
3 Lendo e “Lela”: Jaote Paulo nowacho ni nolendo e “lela” kod ot ka ot. (Tich 20:20) Omiyo nying mowinjore otigo sama iwuoyo kuom lendo mitimo e yore, kuonde chungo mtokni, kuonde ma ji yueyoe, kuonde ohala, gi kuonde mamoko, en lendo “lela.” En adier ni lendo mar ot ka ot pod e yo maduong’ ma walandogo wach Pinyruoth kendo man gi nyak moloyo. Kata kamano, gima duong’ ma Jokristo mokwongo noketo e pachgi ne en manyo ji, to ok udi. Ne gitiyo gi thuolo moro amora moyudore mondo giwuo e wi adiera ka gin e lela, e seche maok gin e tij lendo, kod e ot ka ot. Mad wabeduru gi paro machalo kamano mondo wachop tijwa chuth.—2 Tim. 4:5.