Ti Maber gi Thuolo ma In-go e Lando Wach Pinyruoth!

1. En puonj mane mwanyalo yudo kuom ranyisi mar Daudi?

¹ Ruoth Daudi ne ok en ng’ama chunye tho kapo ni ne ok onyal timo gimoro kaka chunye ne dwaro. Kuom ranyisi, Daudi ne dwaro gero ne Jehova ot. Kata kamano, kane otame timo mano, chunye ne ok otho, kar mano ne oloko chenrone ma okonyo e choko gik ma Solomon ne dhi tiyogo e gero hekaluno. (1 Ruo. 8:17-19; 1 Weche 29:3-9) Kar keto pache kuom gik ma ne ok onyal timo, Daudi ne oketo pache kuom gik ma ne onyalo timo. Ere kaka wanyalo luwo ranyisi mar Daudi sama wamanyo yore mag lando wach Pinyruoth?

2. Wanyalo nonore e wi wach mane?

² Tim Kar Nyaloni: Jolendo mang’eny oseketo ngimagi mayot mondo gibed jopainia makonyo kata jopainia mapile. (Math. 6:22) In be inyalo timo kamano? Ka inono chal mari kendo iketo wachno e lamo, inyalo fwenyo ni in bende ‘oyawni dhoot malach mar tich.’ Ka en kamano, ti maber gi thuolono!​—1 Kor. 16:8, 9.

3. Gin thuolo mage ma wanyalo lendoe kata obedo ni ok wanyal bedo jopainia?

³ To nade ka ok inyal bedo painia? Podi inyalo tiyo maber gi thuolo ma in-go. Kuom ranyisi, kapo ni tich ma itiyo miyo iromo gi joma ok gin Joneno, donge inyalo tiyo gi thuolono mondo ilendnegi? To kapo ni ituwori, donge nyalo bedo maber ka ilendo ne lakteche gi jothieth mamoko ma ijatudorigo? Ng’e ni oyie ne joma tuwo oketo piny kata joma hikgi oniang’ ahinya mondo ogol kata mana dakika 15 e dwe. Ne ni indiko dakika duto milendogo sama ichiwo ripot mar lendo e giko dwe, riw dakika duto ma ne ilendogo sama ne in e dijeni, ndik bende kwan mag buge duto ma ne ichiwo moriwo trakt kod otese mag gwelo ji e Rapar kata mag gwelo ji e chokruogewa mag ndalo adek. Inyalo wuoro kaka dakika matin tin-go koriw, bedo seche mabup!

4. Ing’ado e chunyi mar timo ang’o?

⁴ Bed ni inyalo bedo painia kata ooyo, ti maber gi thuolo ma in-go e lando wach maber. Mano biro miyo wabed gi chuny mokuwe nikech wang’eyo ni watimo kar nyalowa ne Pinyruoth.​—Mari. 14:8; Luka 21:2-4.