Be Teko ma Wach Nyasaye Nigo Chiko Ngimani?

Ka wasomo Muma pile ka pile wabiro bedo ‘mogurore’ kendo “motegno e yie.” (Kol. 2:6, 7) Kata kamano, mondo mi Wach Jehova ma nigi teko ochik ngimawa, nyaka wapar matut weche ma wasomo e Wachneno, kendo waikre tiyo gi puonj man e iye. (Hib. 4:12; Jak. 1:22-25) Ndiko mar Joshua 1:8 leronwa okenge adek mwanyalo luwo sama wasomo: (1) Som Wach Nyasaye “odiechieng’ gotieno.” (2) ‘Par wechene,’ ma tiende ni ipar matut chal ma joma iwuoyoe ne nitiere. (3) Tim kinda e tiyo gi weche “duto mondikie.” Ka waluwo okengego, to yorewa ‘biro bedo maber,’ kendo wabiro ‘tiyo gi rieko’ e ngimawa mapile.