Be Somo Bug Nono Ndiko Pile Konyi?

Be somo ndiko modiechieng’ kod weche ma lero ndikono e bug Nono Ndiko Pile en achiel kuom gik mitimoga odiechieng’ kodiechieng’ mondo imed sudo machiegni gi Jehova? Ka po ni ok itim kamano, donge inyalo chako timo kamano pile ka pile? Ji mathoth nonoga ndiko modiechieng’ gokinyi. Mano miyogi thuolo mar paro matut e wi ndikono sama gin e dijegi mamoko godiechieng’. (Jos 1:8; Za 119:97) Ang’o minyalo timo mondo ndiko modiechieng’ omed konyi? Som weche molworo ndikono mondo ing’e gik mamoko motudore gi gima ndikono wuoye. Tem paro wach moro ma Muma wuoye ma nyalo konyi yudo puonj ma ndikono chiwo. Bang’ mano, ne ane kaka inyalo tiyo gi puonjno e ngimani. Sama itiyo gi Wach Nyasaye e ng’ado paro, Wach Nyasaye biro chiko ngimani kendo obiro konyi.​—Za 119:105.

Jo Bethel duto e piny mangima nonoga bug Nono Ndiko Pile e seche mag madho chai okinyi. E kindegi, osebed ka iketo vidio moko mag lamo mokinyi e JW Broadcasting^® e bwo wich ma wacho ni PROGRAMS AND EVENTS. Ineno vidiogo mogik karang’o? Samoro inyalo yudo ka puonj ma nie achiel kuom vidiogo obironi e sa mowinjore. Kuom ranyisi, ere kaka ranyisi mar Lut nyalo konyi e timo yiero?

NEURU VIDIO MA WIYE WACHO NI KIK UHER PINY (1JO 2:15), KAE TO UDWOK PENJO MA LUWOGI:

• En puonj mane ma nie Muma ma ne ilero e Lamo Mokinyi e odiechiengno?

• Ka luwore gi ranyisi mar Lut, en rach mane ma ng’ato nyalo yudo ka ohero piny kata gik ma nie iye?​—Cha 13:12; 14:12; 19:3, 12, 13, 24-26

• Ere kaka wanyalo nyiso ni wahero Jehova to ok piny kata gik ma nie iye?