Penjo Moa Kuom Josombwa

Tij lendo ma dhi nyime sani biro rumo karang’o?

Yesu nowacho niya: “Wach maber mar Pinyruoth ibiro yal e piny mangima mondo obed ranyisi ne ogendni duto, eka giko nobi.” (Mat. 24:14) E dho Grik, wach molok e ndikono kaachiel gi wes mar 6 kod 13 ni “giko” en teʹlos. Owuoyo kuom giko mar piny Satanni ma ibiro keth e Har–​Magedon. (Fwe. 16:​14, 16) Omiyo, wabiro dhi nyime lando wach maber nyaka gikono chopi. Mae en lokruok mosetim e yo ma wasebedo ka wawinjogo tiend ndikoni.

Kinde mokalo, ne waparoga ni tij lendo biro rumo ka masira maduong’ osechakore e kinde ma ikethoe Babulon Maduong’. (Fwe. 17:​3, 5, 15, 16) Bende, ne waparo ni mano e ma ne dhi bedo giko mar “higa ma Jehova oyiego.” (Isa. 61:2) E wi mano, ne wawachoga ni joma biro tony e masira maduong’ gin joma nosenyiso ni gimakore gi Jehova kata ka pok masirano ochakore. Ne wapimogi gi Jo-Yahudi ma notony ka iketho Jerusalem e higa mar 607 K.K.P. Ne oseketnegi alama mar tony nikech ne gitiyo ne Jehova kendo ne gisin gi richo. (Eze. 5:11; 9:4) Kata kamano, mano ok winjre gi weche ma Yesu nowacho e Mathayo 24:​14, ma nyiso maler ni ji nyalo rwako wach maber nyaka kodong’ mana matin to Har–​Magedon chakore.

Yo manyien molergo Mathayo 24:14 bende loko yo ma ne wawinjogo tiend ote mar pe e ndiko mar Fweny 16:21. Nonro matut mosetim osekonyowa fwenyo ni ndiko ariyogo otudore. E yo mane? Mano luwore gi yo ma ji rwakogo wach Pinyruoth. Jaote Paulo nowacho ni wach maber en kaka “tik mang’ue mamit” ne “jo ma ireso.” Kata kamano, wachno en kaka “tik mar tho” ne jowasik Nyasaye. (2 Kor. 2:​15, 16) Gisin gi wach Pinyruoth nikech Muma nyiso maler ni piny marach ma giheroni itayo gi Satan kendo ni ibiro kethe machiegnini.—Joh. 7:7; 1 Joh. 2:17; 5:19.

Bende, par ni masira miwuoyoe e Fweny 16:21 biro bedo masira ma “duong’ mokadho.” Mano nyiso ni e kinde masira maduong’, ote ma wabiro lando nyalo bedo mapek moloyo. Nying Jehova biro ng’ere e okang’ ma pok nong’erego. (Eze. 39:7) Bang’ koseketh Babulon Maduong’, be nitie joma biro rwako wach maber kendo nene kaka tik mang’ue mamit? Mano en gima nyalore. Samoro gibiro paro ni kuom higni mang’eny, Joneno mag Jehova nosebedo ka lando ni ibiro keth dinde mag miriambo.

Gima chalo kamano notimore e piny Misri ka ne Jehova ogoyo Jo-Misri gi Masiche Apar. Bang’ “kumo nyiseche duto mag Misri,” ne nitie “oganda maduong’ ma ok gin Jo-Israel” ma bende noriwore gi Jo-Israel. (Wuok 12:​12, 37, 38) Nyalo bedo ni jogo ne oyiero lamo Jehova bang’ neno ka Masiche Apargo timore.

Ng’ato ang’ata ma biro yiero tiyo ne Jehova koseketh Babulon Maduong’ biro yudo thuolo mar konyo owete Kristo ma pod biro bedo e piny e kindego. (Mat. 25:​34-36, 40) Thuolo mar ng’ado ne ji bura kaka rombe biro rumo kinde matin ka Har–​Magedon pok ochakore, e kinde ma Jokristo mowal modong’ e piny biro yudo pokgi e polo.

Yo ma olergo lokruok motimno nyiso kaka Jehova oherowa ahinya kendo kaka ong’won. Kuom adier, “ok odwar ni oketh ng’ato ang’ata, to odwaro ni ji duto ochop kama gilokoe chunygi gia e richo.”—2 Pet. 3:9.