Gima Nokonyo Joma Tiyo e Osiptal Moro Mondo Ginyagre gi Parruok

Bryn modak North Carolina e piny Amerka tiyo e achiel kuom Komiti Matudore gi Osiptende. Komitigo konyoga Joneno mag Jehova ma tuore e yudo lakteche ma nyalo thiedhogi e yo maber.

Nikech korona, osiptende mang’eny ne ok yie ne ji limo jotuo. Bryn nogocho e osiptal moro kokwayo mondo owuo gi jatelo ma rwakoga joma dhi jiwo jotuo kata ma dwaro lemonegi. Nodwaro kwaye mondo oyiene tudore gi Joneno mag Jehova ma ne tuore e osiptandno mondo ojiwgi.

Nomi Bryn thuolo mar wuoyo mana gi jalup jatelono. Nikech ne ok oyie ne ji limo jotuo, Bryn nokwayo ka be ninyalo mi Joneno mag Jehova ma tuo kanyo nambane mondo gitudre kode. Jalup jatelono noyie timo kamano.

Kae to Bryn nochako paro kaka nonyalo jiwo joma tiyo osiptandno be. Nonyiso jalup jatelono ni nomor ahinya gi kinda ma jotichgo ne timo kendo ni nogeno ni ngimagi dhi maber. Nomedo ni nosegasomo kaka ji mang’eny e piny ngima, to ahinya-ahinya joma tiyo e osiptal nigi parruok mang’eny nikech korona.

Jalup jatelono nowacho ni adier korona nomiyo ngima obedo matek ahinya e osiptandno.

Kae to Bryn nonyise kama: “Websaitwa mar jw.org nigi weche mang’eny ma nyalo jiwo joma nigi parruok. Kiyawe kae to indiko ‘parruok’ kama ondik ni ‘Many,’ ibiro yudo sula mang’eny ma nyalo jiwo joma utiyogo e osiptal kae.”

Mana gie seche ma pod ne giwuoyono, jalup jatelono noyawo websaitwa mondiko “parruok” kama ondik ni “Many,” moneno sula moried kanyo. Nowacho ni “Mae ber manade! Nyaka anyis jatelo wachni. Wechego dhi konyowa waduto kaachiel gi jomamoko. Adhi goyo kopi mang’eny mondo amigi.”

Jumbe matin bang’e, Bryn nogocho ne jatelo, kendo jatelono nonyise ni ne gidonjo e websaitwa ma gigoyo kopi mang’eny mag sula ma wuoyo kuom parruok kaachiel gi weche mamoko motudore gi parruok. Nowacho ni ne gimiyo nas kod jotich mamoko sulago.

Bryn wacho kama: “Jatelono nogoyona erokamano kuom tich ma watimo kendo kuom sula mabeyo ahinyago. Nowacho ni sulago nokonyogi ahinya.”