Timo Chokruoge mag Kanyakla e Yor Vidio

Sirkende mang’eny e piny ngima sani ok dwar ni ji obed machiegni gi jowetegi, kendo giseketo chike ma tamo ji chokore kanyachiel. Joneno mag Jehova luwo chike mag sirkalgo, to e sechego bende gidhi nyime timo chokruogegi e yo ma ok kel hinyruok. Nikech mano, kanyakla mang’eny osebedo ka tiyo gi apps mag timo chokruok e yor vidio, kaka Zoom.

Bura Matayo nopwodho mondo ti gi chiwo ma wagolo e ng’iewo akaunt mag Zoom mondo kanyakla mang’eny otigo e timo chokruogegi e yo ma onge chochni. Mano osekonyo kanyakla mang’eny ma ne onge nyalo mar ng’iewo akaunt mag timo chokruok e yor vidio. Nengo akaunt achiel ni e kind siling’ 1,500 gi 2,000, kata mokalo kanyo. Kanyaklago ne nyalo mana tiyo gi akaunt miyudo nono, ma ok nyal tudo ji mang’eny kaka dwarore, to bende akauntgo onge arita maber. Kanyakla ma tiyo gi akaunt mag Zoom ma riwruogwa ochulo koro nyalo chiko gik mang’eny e akauntno, kendo ginyalo rwako ji mang’eny ahinya. Chop sani, kanyakla mokalo 65,000 e pinje mokalo 170 tiyo gi akauntgo.

Kanyakla ma Kairagi ma ni Manado, North Sulawesi, e piny Indonesia, noweyo tiyo gi akaunt miyudo nono mi gichako tiyo gi mar Zoom ma riwruogwa chulo. Owadwa Hadi Santoso lero kama: “Kata mana owete gi nyimine ma ok nigi lony ahinya gi gige tudruok ma nyasani nyalo yudo ber e chokruok, nikech koro chokruok mosechaki ok ng’adre-ng’adre kaka chon.”

Lester Jijón, Jr. ma en jaduong’ e kanyakla ma Guayacanes Oeste ma ni Guayaquil, e piny Ecuador, wacho niya: “Nikech owete gi nyimine mang’eny onge yuto malong’o, ne ok dhi bedo mayot ne kanyakla moko ng’iewo akaunt mag Zoom ma ne nyalo yie ne jo kanyakla te tudo chokruok. Nikech riwruogwa osekonyowa yudo akaunt mag Zoom ma ting’o ji mang’eny, koro wanyalo gwelo ji mang’eny e chokruok, ma onge kibaji moro amora ni Zoom dhi pong’.”

Johnson Mwanza ma en jaduong’ e kanyakla ma Ngwerere North ma ni Lusaka, e piny Zambia, nondiko kama: “Owete gi nyimine mang’eny osawacho ni ‘Zoom ma riwruogwa ochulonwa osemiyo giwinjo ka gin machiegni gi Jokristo wetegi, to ok mana mano kende; gineno bende ni Jehova oherogi kendo odewogi ahinya.’”

Riwruogwa ng’iewo akauntgo ka gitiyo gi pesa mochan tigo e konyo joma oyudo masira. Pesago gin chiwo ma owete gi nyimine golo mondo sirgo tij piny mangima. Thoth chiwogo igolo kokalo kuom donate.jw.org. Wagoyonu erokamano ahinya kuom chiwou musirogo tij piny mangima, moriwo nyaka konyo joma oyudo masira.​—2 Jo-Korintho 8:14.