KONY MABERIE MOGIK NE JOMA OKUYO

E HIGNI MACHIEGNI, JI OSETIMO NONRO MANG’ENY E WI LIT MA NG’ATO BEDOGO SAMA OSIEPNE KATA WATNE MORO OTHO. Kata kamano, mana kaka ne waseneno, paro moro amora ma joma olony chiwo e wi wachno, thothne winjorega gi paro ma Muma chiwo. Mano nyiso kaka rieko manie Muma tayowa kinde duto. Kata kamano, Muma ok oting’o mana rieko ma nyalo tayo ji, to en bende gi paro ma ok nyal yud kamoro amora, kendo ma hoyoga chuny joma watgi kata osiepgi moro otho.

• Geno madier ni osiepwa kata watwa motho ok sandre kamoro

  Muma wacho e Eklesiastes 9:5 kama: “Jo motho ok ong’eyo gimoro amora.” Bende, owacho ni ‘chieng’ ma ng’ato otho, gik moparo duto lalga.’ (Zaburi 146:4) Muma bende pimo tho gi nindo.​—Johana 11:11.

• Bedo gi yie motegno kuom Nyasaye hoyo chuny

  Muma wacho kama e Zaburi 34:15: “Wenge Jehovaa ng’iyo jo makare, kendo ite winjo ywakgi.” Nyiso Nyasaye e lamo kaka wawinjo e chunywa, ok en mana yo ma wagologo parruok, to en yo ma konyowa medo tego winjruokwa gi Jachuechwa, Nyasaye ma nyalo tiyo gi tekone mondo ohowa.

• Kinde maber ma warito

  Temie paro kinde ma ibiro chierie jomotho mondo gidag e piny! Muma wuoyo nyadinwoya e wi kindeno. Sama Muma wacho kaka piny biro chalo e kindego, owachoga ni Nyasaye ‘biro yweyo pi wenge duto, mi tho ok nobedie kendo, kata kuyo, kata ywak, kata rem ok nobedie kendo.’​—Fweny 21:3, 4.

Thoth joma oseketo yiegi kuom Jehova, ma en Nyasaye ma Muma wuoye, winjoga maber ahinya sama giparo e wi geno mar neno wedegi kod osiepegi ma nosetho kendo. Kuom ranyisi, Ann ma jaode notho bang’ ka gisebedo e kend kuom higni 65 wacho kama: “Muma osekonya bedo gadier ni osiepewa kod wedewa mosetho ok sandre kamoro kendo ni Nyasaye biro chiero joma nie liete. Wechego konyaga ahinya sama achako paro tho mar jaoda, kendo gisekonya nyagora maber gi lit ma pok nabedogo e ngimana nyaka nene!”

Tiina, ma nosewuoye motelo e sula mag gasedni wacho kama: “Nyasaye osekonya ahinya chakre chieng’ ma Timo notho. Aseneno kaka lwet Jehova osebedo koda e kinde ma nakuyo. Kendo an gadier gi singo ma wacho ni Jehova biro chiero jomotho. Wachno konya dhi nyime nano nyaka chop chieng’ ma abiro nenoe Timo kendo.”

Magi gin mana moko kuom weche ma ji milionde mogeno Muma nigo gadier. Kata ka po ni iparo ni weche manie Muma ok gin adier, kata ni gin mana lek, kaw thuoloni mondo itim nonro mondo ine ka be paro kod singo mochiwo gin madier. Inyalo fwenyo ni Muma e ma chiwo kony maberie mogik ne joma okuyo.

PUONJRI WECHE MOMEDORE E WI GENO MA JOMA OTHO NIGO

Ne vidio motudore gi wachni e websaitwa mar jw.org/luo

ANG’O MA TIMORENEGA NG’ATO KA OTHO?

Ang’o ma timorenwaga ka watho? Dwoko maler ma Muma chiwo jiwowa kendo hoyo chunywa

Dhi e LAIBRARI >VIDIO (Yier Vidio Midwaro: MUMA)

BE DIHER WINJO WACH MABER?

Ere kama wanyalo yudoe weche mabeyo e piny mopong’ gi gik marichoni?

Dhi e PUONJ MAG MUMA > KUE KOD MOR