Jona gi Rech Maduong’

NE ANE ng’at ma ni ei pi no. En e chandruok maduong’, donge? Rechno chiegini mwonye! Be ing’eyo ni en ng’a? Nyinge en Jona. We mondo wane kaka ne odonjo e chandruok maduong’ni.

Jona en janabi mar Jehova. Kinde matin osekalo bang’ tho janabi Elisha ka Jehova nyiso Jona ni: ‘Dhi e dala mar Nineve. Richo mag ji e dalano ng’eny, kendo adwaro ni mondo iwuo kodgi e wachno.’

Kata kamano, Jona ok dwar dhi. Kuom mano, oidho yie mochomo yo mopogore gi Nineve. Jehova ok mor gi Jona nikech oringo odhi yo machielo. Kuom mano, Jehova kelo yamo maduong’. Yamo duong’ ahinya mamiyo yie chiegni nimo ei pi. Luoro omako joma kwang’o yie ahinya, kendo giyuak ni nyisechegi mondo okonygi.

Gikone, Jona nyisogi kama: ‘An alamo Jehova, Nyasaye ma ne ochweyo polo gi piny. To aringo kadhi yo machielo nikech ok adwar timo kaka Jehova owachona.’ Kuom mano jo kwang’ yie penje ni: ‘Watimi nade mondo yamoni ochung’?’

Jona wachonegi ni: ‘Bolauru ei nam, to nam biro kuwe kendo.’ Jo kwang’ yie ok dwar timo mano, to nikech yamoni medo kudho matek, gikone gibolo Jona kuro. Gikanyono, yamo chung’, kendo nam bedo mokuwe.

Seche ma Jona nimo ei pi, rech maduong’ mwonye. Kata kamano, ok otho. Kuom ndalo adek, odiechieng’ gotieno en mana ei rechno. Jona winjo marach ni ne ok owinjo wach Jehova mondo odhi Nineve. Kuom mano, be ing’eyo gima otimo?

Jona kwayo Jehova mondo okonye. Bang’e, Jehova miyo rech ng’ogo Jona e piny kama otwo. Bang’ mano, Jona dhi Nineve. Donge mani puonjowa ni onego watim gimoro amora ma Jehova wachonwa?