Ruodh Israel Mogik ma ne Ber

JOSIA en jahigini aboro kende ka ikete ruodh dhoudi ariyo ma milambo mag Israel. Higini-go tin ahinya mondo ng’ato obed ruoth. Omiyo kuom kinde motelo, jo madongo konye locho e wi oganda.

Ka Josia osebedo ruoth kuom higini abiriyo, ochako manyo Jehova. Oluwo ranyisi maber mag ruodhi kaka Daudi, Jehoshafat kod Hezekia. Bang’e, ka podi en mana rawera, Josia timo gimoro manyiso ni en gi chir.

Kuom kinde mang’eny, ng’eny Jo-Israel osebedo jo maricho ahinya. Gilamo nyiseche manono. Gikulore ni nyiseche mopa. Nikech mano, Josia wuok gi joge, kendo ochako golo lamo mag miriambo e piny. Ma en tich maduong’ nikech ji mang’eny lamo nyiseche manono. Inyalo neno Josia gi joge kae kaketho nyiseche mopa.

Bang’e, Josia keto ji adek mondo otel ni tij loso hekalu mar Jehova. Ichoko pesa kuom ji, kendo imiyo ji adekgi mondo ochulgo tich ma onego otim. Seche ma gitiyo e hekalu, jadolo maduong’ Hilkia yudo gimoro maber ahinya kanyo. En bug chik ma ne Jehova onyiso Musa mondo ondiki chon ahinya. Bugni ne osebedo kolal kuom higini mang’eny.

Itero bugni ir Josia, kendo okwayo ni mondo osomnego. Ka owinjo kisomone, Josia nwang’o ni kara ji ok osebedo ka luwo chik Jehova. Owinjo marach nikech wachni, omiyo oyiecho lepe mana kaka inyalo neno kae. Owacho kama: ‘Jehova okecho kodwa, nikech wuonewa ne ok oluwo chike mondiki e bugni.’

Josia chiko jadolo maduong’ Hilkia ni mondo onon ane gima Jehova biro timonegi. Hilkia dhi ir Hulda ma en janabi ma dhako, kendo openje wachno. Hulda miye ote moa kuom Jehova mondo oter ne Josia kowacho niya: ‘Jerusalem kod ji duto nokum nikech giselamo nyiseche manono kendo piny opong’ gi richo. To nikech in Josia isetimo maber, kum-no ok nobi nyaka bang’ thoni.’